1. Гава мәрьвәки мә жь щьвате те дәрхьстьне, әв йәк дькарә сәр мә ча һʹӧкӧм кә?

ГАВА мәрьвәки мә жь щьвате те дәрхьстьне, агьр дьле мә дькʹәвә. Хушкәкә бь наве Нора * ӧса дьбежә: «Әз у мере мьн 41 сал тʹәвайи дьжитьн. Гава мере мьн мьр, әз дьфькьрим кӧ жь ви дәрди гьрантьр тʹӧ дәрд тʹӧнә. Ле гава кӧрʹе мьн жь щьвате һатә дәрхьстьне у жьн-зарʹед хԝә һишт, әв йәк бона мьн дәрдәки дьһа гьран бу».

2-3. Ль гора Зәбур 78:40, 41, гава хьзмәткʹаред Йаһоԝа пьшта хԝә дьдьнә ԝи, әв йәк сәр ԝи ча һʹӧкӧм дькә?

² Һәла бьдьнә һʹәсабе хԝә кӧ гава һьнә мәләк жь малбәта Йаһоԝа пьшта хԝә данә ԝи, дьле ԝи чьԛас ешийа! (Щьһуда 6) Хԝәде Исраелийа жи гәләк һʹьз дькьр, ле әԝана гәләк щар мьԛабьли ԝи рʹадьбун. Гәло әԝ йәк сәр Йаһоԝа ча һʹӧкӧм дькьр? Кʹьтеба Пироз дьбежә ԝәки әԝ бинтәнг дьбу у дьле ԝи дьешийа (Зәбур 78:40, 41 бьхунә). Чахе мәрьвәки тәйи һʹьзкьри рʹастийе дьһелә, баԝәр бә кӧ дьле Йаһоԝа жи дьешә. Ләма жи әԝ еша тә фәʹм дькә, у әԝ ԝе бь дьлшәԝати али тә бькә.

³ Ве готареда, әме бьвиньн кӧ гава тьштәки ӧса те сәре мә, әм чаԝа дькарьн жь Йаһоԝа аликʹарийе бьстиньн. Ӧса жи, әме бьвиньн ча әм дькарьн али хушк-бьра бькьн, йед кӧ рʹасти чәтьнайикә ӧса һатьнә. Ле пешийе әме бьвиньн кӧ гәрәке әм чь нәкьн.

4. Гава кӧрʹ йан ԛизәк рʹастийе дьһелә, гәләк де-бав чь дьфькьрьн?

⁴ Чахе кӧрʹ йан ԛиза дәлал Йаһоԝа дьһелә, де-бав гәләк щар хԝә дьпьрсьн, гәло ԝана бь рʹасти һәр тьшт кьрьбу ԝәки зарʹа ԝан сәр рʹийа рʹастийе бьминә. Бьре мә Лука, кӧрʹе кʹижани жь щьвате һатьбу дәрхьстьне, ӧса дьбежә: «Мьн хԝә сущдар дькьр. Мьн хәԝнед хьраб дьдитьн. Әз щарна дьгьрийам, у дьле мьн гәләк дьешийа».  Кӧрʹе хушкәке бь наве Елизабет жи жь щьвате һатьбу дәрхьстьн. Елизабет дьбежә: «Әз дьфькьрим кӧ әз дайькәкә хьраб бум у мьн ча лазьм ә али кӧрʹе хԝә нәкьрьбу ԝәки әԝ Йаһоԝа һʹьз бькә».

5. Гава кәсәк Йаһоԝа дьһелә, әв йәк гӧне кʹе йә?

⁵ Бир нәкә кӧ Йаһоԝа азайа бьжартьне дайә мә. Демәк, әм дькарьн хԝәха сафи кьн гӧрʹа Йаһоԝа бькьн йан на. Һьнә де-бав зарʹед хԝәрʹа мәсәла баш ниньн, ле зарʹ диса жи жь рʹийа рʹастийе дәрнакʹәвьн. Жь алийе дьнва жи, һьнә де-бав алийе хԝәда һәр тьшти дькьн ԝәки зарʹед хԝә ль гора принсипед Кʹьтеба Пироз мәзьн бькьн, ле зарʹ йәкә пьшта хԝә дьдьнә рʹастийе. Ахьрийеда, гәрәке һәр кәс хԝәха сафи кә Йаһоԝарʹа хьзмәт кә йан на (Йешу 24:15). Ләма жи де-бавно, һәгәр һун дьлшкәсти нә, чьмки зарʹа ԝә пьшта хԝә дайә Йаһоԝа, нәфькьрьн кӧ әв йәк гӧне ԝә йә!

6. Гава де йан бав рʹийа Хԝәде дьһелә, әв йәк щарна сәр зарʹед ԝан ча һʹӧкӧм дькә?

⁶ Щарна, де йан бав һьм щьвате һьм жи нәфәред хԝә дьһелә (Зәбур 27:10). Гава тьштәки ӧса дьԛәԝьмә, зарʹарʹа әԝ йәк зийанәкә мәзьн тинә, чьмки әԝана де у баве хԝә гәләк һʹьз дькьн у ԛәдре ԝан дьгьрьн. Әстәр, баве кʹижане жь щьвате һатьбу дәрхьстьне, ӧса дьбежә: «Әз гәләк щар дьгьрийам, чьмки баве мьн нә тʹәне жь рʹастийе дур кʹәт, ле әԝи бь һʹәмде хԝә сафи кьр ԝәки тʹәрка Йаһоԝа бьдә. Әз баве хԝә һʹьз дькьм, ләма жи гава әԝ жь щьвате һатә дәрхьстьне, әз бона ԝи гәләк бәрхԝә дькʹәтьм. Щәм мьн һәла һе нәхԝәшийа емосийали жи пешда һат, әԝ һәбу реаксйонед паники».

7. Гава де йан бав жь щьвате те дәрхьстьне, Йаһоԝа сәр зарʹед ԝан ча дьньһерʹә?

⁷ Щаһьлно, һәгәр де йан баве ԝә жь щьвате һатийә дәрхьстьне, дьле мә сәр ԝә дьшәԝьтә! Баԝәр бьн кӧ Йаһоԝа жи еша дьле ԝә занә. Һьм Йаһоԝа һьм жи хушк-бьра ԝә һʹьз дькьн у  амьнийа ԝә ԛимәт дькьн. Бир нәкьн, һун сәва сафикьрьнед де йан баве хԝә щабдар ниньн. Ча мә ида дит, Йаһоԝа мәщале дьдә һәр кәси ԝәки хԝәха сафикьрьна хԝә бькә. Һәр кәсе кӧ жийина хԝә тʹәсмили Йаһоԝа кьрийә у һатийә ньхӧмандьне, гәрәке «баре хԝә һьлгьрә» (Галати 6:5, ИМ).

8. Һʹәта кӧ һәвал йан мәрьве мә вәгәрʹә бал Йаһоԝа, әм дькарьн чь бькьн? (Ӧса жи чаргошә бь наве « Вәгәрʹә щәм Йаһоԝа» бьньһерʹә.)

⁸ Гава һәвал йан мәрьвәки тә Йаһоԝа дьһелә, тӧ бешьк һивийе йи ԝәки рʹожәке әԝе вәгәрʹә. Ле һʹәта ԝе дәме, гәрәке тӧ чь бьки? Лазьм ә тӧ рʹӧһʹанида ԛәԝи бьмини. Бь ви щурʹәйи, тӧ дькари малбәта хԝәрʹа у дьбәкә һәла һе ԝи кәсирʹа жи, кӧ жь щьвате һатийә дәрхьстьне, бьби мәсәла баш. Ӧса жи, һәгәр тӧ рʹӧһʹанида ԛәԝи би, тӧйе бькарьби бәр ве тәнгасийе сәбьр ки. Ԝәрә әм дина хԝә бьдьн һьнә тьштед кӧ тӧ дькари бьки.

9. Сәва кӧ әм жь Йаһоԝа ԛәԝате бьстиньн, гәрәке әм чь бькьн? (Ӧса жи чаргошә « Һьнә Рʹезед кӧ Дькарьн Дьлрʹьһʹәтийе Бьдьнә Ԝә» бьньһерʹә.)

⁹ Хԝә тʹьме ль шьхӧлед рʹӧһʹани бьгьрә.  Гәләк фәрз ә ԝәки тӧ бәрдәԝам ки һьм хԝә һьм жи малбәта хԝә алийе рʹӧһʹанида ԛәԝи бьки. Гәло тӧ ча дькари ве йәке бьки? Сәва кӧ тӧ жь Йаһоԝа ԛәԝате бьстини, Кʹьтеба Пироз һәр рʹож бьхунә у һәрʹә щьвина. Щоана, бав у хушка кʹижане жь рʹастийе дәркʹәтьн, ӧса дьбежә: «Гава әз дәрһәԛа кәсед ӧса ча Абигаил, Әстәр, Ибо, Усьв у Иса дьхуньм, дьле мьн рʹьһʹәт дьбә. Сәрһатийед ԝан еша дьле мьн сьвьк дькьн. Ӧса жи, әз кʹьламед тʹәшкиләте гәләк һʹьз дькьм».

10. Ль гора Зәбур 32:6-8, чь дькарә али мә бькә ԝәки әм бәр дьлтәнгийе сәбьр кьн?

¹⁰ Гава тӧ дьлтәнг дьби, дьле хԝә Йаһоԝарʹа вәкә у тʹьме дӧада дәрһәԛа хәмед хԝә ԝирʹа гьли кә. Жь Хԝәдайе һʹьзкьри аликʹарийе бьхԝазә, ԝәки тӧ бькарьби сәр ве дәрәще пе чʹәʹве ԝи бьньһерʹи. Йаһоԝа созәки ӧса дьдә: «Әзе тә аԛьл у сәрԝахт кьм у рʹийа кӧ теда һәрʹи бәр тә вәкьм» (Зәбур 32:6-8 бьхунә). Дьбәкә тәрʹа нә һеса йә Йаһоԝарʹа дәрде хԝә гьли ки. Ле баԝәр бә кӧ Йаһоԝа еша дьле тә рʹьнд фәʹм дькә. Әԝ тә гәләк һʹьз дькә у дьхԝазә ԝәки тӧ дьле хԝә ԝирʹа вәки (Дәркʹәтьн 34:6; Зәбур 62:7, 8).

11. Ль гора Ибрани 12:11, ԝе чьма баш бә итʹбарийа хԝә сафикьрьна Йаһоԝа биньн? (Ӧса жи чаргошә « Гава Кәсәк жь Щьвате Те Дәрхьстьне, Әв Йәк Һʹьзкьрьна Йаһоԝа Нишан Дькә» бьньһерʹә.)

¹¹ Пьштгьрийа сафикьрьна рʹуспийа бькә. Гава кәсәк жь щьвате те дәрхьстьне, әв йәк те һʹәсабе ԝәки Йаһоԝа ԝи ширәт дькә. Ширәткьрьна ԝи бона ԛәнщийа һәр кәси йә – демәк бона кәсе кӧ жь щьвате һатийә дәрхьстьне  жи (Ибрани 12:11 бьхунә). Һьнә кәс дькарьн сафикьрьна рʹуспийа бькьнә бьн шьке, чьмки нахԝазьн дәрһәԛа кәсе кӧ гӧнә кьрийә, тьштәки хьраб бежьн  йан жи кьред ԝийә хьраб әʹйан кьн. Ле гәрәке әм бир нәкьн кӧ әм һәр тьшти ньзаньн. Ләма, әм гәрәке итʹбарийа хԝә рʹуспийа биньн, чьмки ԝана ль гора принсипед Кʹьтеба Пироз әԝ йәк сафи кьрьнә у бона ве сафикьрьне бәр Йаһоԝа щабдар ьн (2 Дирок 19:6).

12. Һьнә кәса кӧ пьштгьрийа сафикьрьна Йаһоԝа кьрийә, чь кʹар стандьнә?

¹² Һәгәр тӧ пьштгьрийа сафикьрьна рʹуспийа бьки, әв йәк дькарә али кәсе кӧ жь щьвате һатийә дәрхьстьне бькә, ԝәки әԝ вәгәрʹә бал Йаһоԝа. Елизабет ӧса дьбежә: «Мәрʹа гәләк чәтьн бу һәләԛәтийа хԝә тʹәви кӧрʹе хԝәйи мәзьн бьԛәтиньн. Ле гава әԝ вәгәрʹийа щәм Йаһоԝа, әԝи гот ԝәки әԝ бь рʹасти жи һежа бу жь щьвате бе дәрхьстьне. Паше, әԝи гот кӧ әԝ гәләк тьштед фәрз һин бу. Мьн фәʹм кьр ԝәки ширәткьрьна Йаһоԝа чьԛас ԛимәт ә». Мере ԝе Марк жи ӧса дьбежә: «Гәләк ԝәхт шунда, кӧрʹе мә мьнрʹа гот, ԝәки йәк жь сәбәбед кӧ чьрʹа әԝи хԝәст вәгәрʹә әв бу, кӧ мә һәләԛәтийа хԝә тʹәви ԝи ԛәтандьбу. Әз гәләк ша мә ԝәки Йаһоԝа али мә дькьр гӧрʹа ԝида бьминьн».

13. Чь дькарә али тә бькә кӧ тӧ сәбьр ки?

¹³ Дьле хԝә һәвалед хԝәрʹа вәкә, йед кӧ еша дьле тә фәʹм дькьн. Тʹәви хушк-бьред рʹӧһʹанида гьһишти һәвалтийе бькә, йед кӧ дькарьн али тә бькьн һевийа хԝә ӧнда нәки (Мәтʹәлок 12:25; 17:17). Щоана ӧса дьбежә: «Дьле хԝәда, мьн хԝә тʹәне тʹәхмин дькьр, ле хәбәрдана тʹәви һәвалед бь итʹбар али мьн дькьр ԝәки сәбьр кьм». Ле һәгәр готьнед һьнә хушк-бьра дьле тә дьһа дьешиньн, тӧ дькари чь бьки?

14. Чьрʹа лазьм ә кӧ әм «ль һәв сәбьр кьн у ль һәв бьбахшиньн»?

¹⁴ Һьндава хушк-бьра бь сәбьр бә. Дьбәкә һьнә кәс щарна бе һʹәмде хԝә тьштәки нәрʹаст бежьн (Аԛуб 3:2). Әм гьшк гӧнәкʹар ьн, ләма жи һәгәр һьнә кәс ньзаньн чь бежьн йан жи мә бь готьнед хԝә әʹщьз бькьн, гәрәке әм әʹщебмайи нәминьн. Ве ширәта Паԝлосе шанди бир нәкә: «Ль һәв сәбьр кьн у ль һәв бьбахшиньн, һәгәр газьне йәки ль һьндава йәкида һәбә» (Колоси 3:13). Хушкәкә, кӧрʹе кʹижане жь щьвате һатьбу дәрхьстьне ӧса дьбежә: «Һьнә хушк-бьра дьхԝәстьн бәр дьле мьнда бьһатана, ле дәԝсе ԝана бь готьнед хԝә дьле мьн дьешанд. Йаһоԝа али мьн кьр кӧ бьбахшиньм ԝана у фәʹм кьм кӧ ԝана ԛәнщийа мьн дьхԝәст». Гава кәсәк жь щьвате те дәрхьстьне, гәло щьват ча дькарә али малбәта ԝи бькә?

15. Гава кәсәк жь щьвате те дәрхьстьне, әм ча дькарьн али малбәта ԝи бькьн?

¹⁵ Гава кәсәк жь щьвате те дәрхьстьне, малбәта ԝирʹа рʹәʹм у дьлгәрм бә. Хушкәкә бь наве Мириам дьбежә кӧ гава бьре ԝе жь щьвате һатьбу дәрхьстьне, жерʹа чәтьн бу һәрʹә щьвата. Әԝ дьбежә: «Әз дьтьрсийам ԝәки хушк-бьра ԝе мьнрʹа чь бежьн. Ле ԝедәре һәвалед  дьлшәԝат һәбун, йед кӧ дәрһәԛа бьре мьн тьштед нәбаш нәдьготьн. Бь сайа пьштгьрийа ԝан, мьн хԝә бечʹарә тʹәхмин нәдькьр». Хушкәкә дьн жи ӧса дьбежә: «Паши кӧ кӧрʹе мә жь щьвате һатә дәрхьстьне, чәнд һәвалед мәйә дәлал һатьн, ԝәки бәрдьлийе бьдьнә мә. Һьнә жь ԝан ньзаньбун чь бежьн. Һьнәк тʹәви мьн гьрийан, һьнәка жи бь нәʹмед хԝә дьлбини дьданә мьн. Ԝана бь рʹасти жи дьле мьн рʹьһʹәт кьр!»

16. Щьват ча дькарә бәрдәԝам кә аликʹарийе бьдә?

¹⁶ Бәрдәԝам кә пьштгьрийа малбәтед ӧса бькә. Һʹьзкьрьн у дьлгәрмийа тә ԝанрʹа гәләк лазьм ә (Ибрани 10:24, 25). Щарна, гава кәсәк жь щьвате те дәрхьстьне, һьнә хушк-бьра хԝә жь малбәта ԝи жи дур дьгьрьн, те бежи әԝана жи жь щьвате һатьнә дәрхьстьне. Тʹӧ щар ве шашийе нәкьн! Илаһи хушк-бьред щаһьл, де-баве кʹижана Йаһоԝа һиштьн, һʹәԝще пʹайи у дьлбинийе нә. Мариа, мере кʹижане һьм жь щьвате һатьбу дәрхьстьн һьм жи малбәта хԝә һишт, дьбежә: «Һьнә һәвалед мьн дьһатьн мала мьн кӧ хԝарьне мәрʹа чекьн у али мә бькьн ԝәки тʹәви зарʹа ԛӧльхкьрьна малбәте дәрбаз кьм. Ԝана еша мьн фәʹм дькьр, у әԝана тʹәви мьн дьгьрийан. Гава тьштед нәрʹаст дәрһәԛа мьн бәла дькьрьн, ԝана хԝә кәрʹ нәдькьрьн у бәр мәрьва әз дьпарастьм. Ԝана бь рʹасти гәләк ԛәԝат дьданә мьн!» (Рʹомайи 12:13, 15).

17. Рʹуспийед щьвате дькарьн чь бькьн?

¹⁷ Рʹуспино, чь кӧ жь дәсте ԝә те бькьн, ԝәки дьле малбәтед ӧса ԛәԝи кьн. Гава кәсәк жь щьвате те дәрхьстьне, лазьм ә кӧ һун дьле малбәта ԝи рʹьһʹәт кьн. Әв йәк щабдарийа ԝә йә (1 Тʹесалоники 5:14). Пешийа у паши щьвина тʹәви ԝан хәбәр дьн у ԝана бьшьдиньн. Тʹәви ԝан дәркʹәвьн хьзмәте, йан ԝана щара тʹәглифи сәр ԛӧльхкьрьна малбәте бькьн. Бәле, лазьм ә кӧ шьванед рʹӧһʹани бәрхед Хԝәде йед дьлшкәсти хԝәй кьн у ԝанрʹа дьлрʹәʹм у дьлшәԝат бьн (1 Тʹесалоники 2:7, 8).

18. Ль гора 2 Пәтрус 3:9, Хԝәде дьхԝазә кӧ кәсед гӧнәкʹар чь бькьн?

¹⁸ Йаһоԝа «нахԝазә тʹӧ кәс ӧнда бә, ле дьхԝазә ԝәки һʹәму жь гӧнәкьрьне вәгәрʹьн» (2 Пәтрус 3:9 бьхунә). Һәгәр кәсәки гӧнәки гьран кьрьбә жи, жийина ԝи бона Йаһоԝа гәләк ԛимәт ә. Бир нәкә, Йаһоԝа әʹмре Кӧрʹе хԝәйи дәлал бона һәр кәси ԛӧрбан кьр. Йаһоԝа бь дьлрʹәʹми гази гӧнәкʹара дькә ԝәки әԝана вәгәрʹьн щәм ԝи. Чаԝа жь мәтʹәлока Иса дәрһәԛа кӧрʹе ӧндабуйи әм дьвиньн, чʹәʹве Йаһоԝа рʹийа ԝан ә (Луԛа 15:11-32). Гәләк кәсед кӧ жь рʹастийе дәркʹәтьбун, вәгәрʹийанә бал Йаһоԝа, у чахе йед ӧса вәдьгәрʹьн щьвате, хушк-бьра жи гәләк ша дьбьн. Елизабет, кӧрʹе кʹижане жи вәгәрʹийа щьвате, ӧса дьбежә: «Әз ԝан хушк-бьрарʹа гәләк рʹази мә, йед кӧ тʹьме дьготьн ԝәки әз гәрәке һевийа хԝә ӧнда нәкьм».

19. Чьрʹа әм дькарьн баԝәр бьн ԝәки Йаһоԝа ԝе али мә бькә?

¹⁹ Әм дькарьн баԝәр бьн кӧ рʹебәрийа Йаһоԝа һәртʹьм бона ԛәнщийа мә йә. Әԝ Бавәки дәствәкьри у дьлрʹәʹм ә, у әԝ хьзмәткʹаред хԝә гәләк һʹьз дькә. Ԝәʹде тәнгасийе, Йаһоԝа ԝе тә тʹәне нәһелә (Ибрани 13:5, 6). Марк ӧса дьбежә: «Йаһоԝа мә тʹӧ щар тʹәне наһелә. Гава әм дькʹәвьн тәнгасийе, әԝ һәртʹьм незики мә йә». Баԝәр бә кӧ Йаһоԝа ԝе «зорайийа ԛәԝате» бьдә тә (2 Корьнтʹи 4:7). Бәле, һәгәр мәрьвәки тәйи һʹьзкьри Йаһоԝа һиштийә жи, тӧ дькари амьн бьмини у һевийа хԝә ӧнда нәки!