1-2. (а) Ль гора Мәтʹәлок 16:31, гәрәке әм сәр хушк-бьред әʹмьрда мәзьн чаԝа бьньһерʹьн? (б) Ве готареда, әме щабед кʹижан пьрса бьстиньн?

ДӘԜЛӘТЕД Йәкбуйида парка ӧса һәйә, кʹидәре кӧ алмаз һеса тенә дитьне. Ле ԛимәта ԝан алмаза әшкәрә нинә, чьмки әԝана һәла һе бьрьԛанди ниньн. Ләма жи, гава мәрьв алмаз тʹәбийәтеда сәр әʹрде дьвиньн, әԝана щарна фәʹм накьн кӧ ԛимәта ԝан чьԛас мәзьн ә.

² Хушк-бьред мәйә әʹмьрда мәзьн мина алмаза нә. Әԝана бь рʹасти жи хьзнә нә. Ль гора Кʹьтеба Пироз, пʹорʹе ԝанә спи, «кʹофийа рʹумәте йә» (Мәтʹәлок 16:31 бьхунә; 20:29). Йазьх щарна ԛимәта ԝана әшкәрә найе кʹьфше. Ле һәгәр әм тедәрхьн кӧ әԝана чьԛас ԛимәт ьн, әм дькарьн жь мәсәла жийина ԝан кʹарәкә мәзьн бьстиньн. Ве готареда, әме щабед ван се пьрса бьстиньн: Гәло Йаһоԝа хьзмәткʹаред хԝәйә әʹмьрда мәзьн чьма ча хьзнә һʹәсаб дькә? Тʹәшкиләта Йаһоԝа чьма хушк-бьред әʹмьрда мәзьн ԛимәт дькә? Әм чаԝа дькарьн жь мәсәла жийина ԝан кʹаре бьстиньн?

3. Ль гора Зәбур 92:12-15 Йаһоԝа чьрʹа хьзмәткʹаред хԝәйә әʹмьрда мәзьн, ԛимәт дькә?

³ Йаһоԝа хьзмәткʹаред хԝәйә әʹмьрда мәзьн гәләк ԛимәт дькә. Әԝ ԝана рʹьнд нас дькә у һʹӧнӧред ԝанә баш занә. Хԝәде дьхԝазә ԝәки әв биланийа кӧ ԝана бь сала дәстхьстийә, щаһьларʹа пʹарәвәкьн (Ибо 12:12; Мәтʹәлок 1:1-4). Ӧса жи, Йаһоԝа амьнийа ԝан ԛимәт дькә (Малахи 3:16). Бәр щурʹә-щурʹә дәрд у тәнгасийа, ԝана баԝәрийа хԝә тʹӧ щар ӧнда нәкьрийә. Һевийа ԝан чьԛас дьчә, дьһа ԛәԝи дьбә. Хенщи ве йәке, Йаһоԝа ԝана һʹьз дькә чьмки әԝана «һʹәта мәзьнайийа хԝәда жи» наве  ԝи пироз дькьн (Зәбур 92:12-15 бьхунә).

4. Чь дькарә бәрдьлийе бьдә хушк-бьред әʹмьрда мәзьн?

⁴ Һәгәр тӧ ида кал йан пир буйи, баԝәр бә ԝәки Йаһоԝа шьхӧле кӧ тә щаһьлтийа хԝәда дькьр, бир нәкьрийә (Ибрани 6:10). Баве мәйи әʹзмана жь тә рʹази йә, чьмки тә мьзгина Пʹадшатийе бь дьл у щан бәла дькьр. Тә һьмбәри тәнгасийа сәбьр дькьр, тә һәртʹьм гӧһ дьда ԛанунед Хԝәде у тә щабдарийед гьран дьанинә сери. Тә чь жь дәсте тә дьһат дькьр, ԝәки ль гора рʹебәрийа тʹәзә йа тʹәшкиләта Йаһоԝа бьжийи. Тә дьле хушк-бьра ԛәԝи дькьр, ԝәки әԝана хьзмәта хԝә ча пешәнгед һәртʹьм, бәрдәԝам кьн. Бәле, Йаһоԝа тә гәләк һʹьз дькә, чьмки тӧ ԝирʹа амьн дьмини. Хԝәде соз дьдә кӧ әԝе хьзмәткʹаред хԝәйә амьн нәһелә (Зәбур 37:28). Әԝ ӧса дьбежә: «Һʹәта һун пʹорʹспи бьбьн жи әзе ԝә һьлгьрьм» (Ишайа 46:4, ИМ). Ле нәфькьрә кӧ һәгәр тӧ кал йан пир буйи, тӧ тʹәшкиләта Йаһоԝада ида кери тьштәки найейи. Баԝәр бә кӧ бь рʹасти рола тә гәләк фәрз ә!

5. Хушк-бьред әʹмьрда мәзьн гәрәке чь бир нәкьн?

⁵ Хушк-бьред әʹмьрда мәзьн дькарьн гәләк тьштада кʹаре бьдьн тʹәшкиләте. Рʹаст ә ԛәԝата ԝан ида мина йа бәре нинә, ле әԝана гәләк щерʹьбанди нә. Ләма жи, Йаһоԝа дькарә щурʹә-щурʹә щабдари у шьхӧл бьдә ԝан. Ԝәрә әм дина хԝә бьдьн чәнд мәсәла.

6-7. Кʹьтеба Пироз бәʹса кʹижан кәсед әʹмьрда мәзьн дькә, йед кӧ сәва амьнийа хԝә һатьн кʹәрәмкьрьне?

⁶ Кʹьтеба Пирозда чәнд сәрһатийед кәсед амьн һәнә, йед кӧ әʹмьре хԝәйә мәзьнда жи бь дьл у щан Йаһоԝарʹа хьзмәт дькьрьн. Мәсәлә, гава Муса бу пʹехәмбәр у сәроке мьләте Исраел, әԝ ԝәкә 80 сали бу. Чахе Данийел  ԝәкә 90 сали зедәтьр бу, Йаһоԝа ԝи ча пʹехәмбәр дьда хәбате. Ӧса жи, чахе Йуһʹәннайе шанди жь бина бәр Хԝәде кʹьтеба Әʹйанти дьньвиси, әʹмре ԝи жи ԝәкә 90-и зедәтьр бу.

 ⁷ Диса гәләк кәсед амьн һәбун, йед кӧ нә һаԛас бь нав у дәнг бун. Йәкә, Йаһоԝа әԝ дьдитьн у хәлат дькьрьн, чьмки ԝана бь амьни ԝирʹа хьзмәт дькьрьн. Мәсәлә, Кʹьтеба Пироз тʹәне щарәке бәʹса каләмерәки бь наве Шьмһʹун дькә. Ле Йаһоԝа заньбу ԝәки әԝ йәки «рʹаст» у «хԝәдехоф» ә, ләма жи Йаһоԝа мәщал да ԝи, ԝәки әԝ Исайе вьрʹни бьвинә у дәрһәԛа ԝи у дийа ԝи пʹехәмбәртийе бькә (Луԛа 2:22, 25-35). Ӧса жи дәрһәԛа Һанайе бьфькьрьн. Кʹьтеба Пироз дьбежә, ԝәки әв жьнәби пʹехәмбәр бу, у гава әԝ 84 сали бу жи, «жь пʹарьстгәһе дур нәдькʹәт». Жь бо ве йәке кӧ Һана бәрдәԝам дькьр дьчу пʹарьстгәһе, әԝе Исайе бьчʹук дит. Бәле, Йаһоԝа Шьмһʹун у Һанайе ԛимәт дькьр (Луԛа 2:36-38).

8-9. Гәрәке әм чьрʹа жьнәбийа ԛимәт кьн?

⁸ Рʹожед мәда жи, гәләк хушк-бьред әʹмьрда мәзьн бона щаһьла мәсәлед баш ьн. Ԝәрә әм дина хԝә бьдьнә сәрһатийа хушка мә Лоис Дидур. Гава әԝ 21 сали бу, әԝ у мере ԝе Щон, Канадайеда хьзмәт дькьрьн ча пешәнгед мәхсус. Паше, Щон ча бәрпьрсийаре мьһале һатә кʹьфшкьрьне. Чәнд сал шунда, Лоис тʹәви мере хԝә Бәйтʹәла Канадайеда дәстпекьрьн хьзмәт кьн, у ԝана 20 сала зедәтьр ԝедәре хьзмәт кьрьн. Гава Лоис 58 сали бу, ԝана гази Бәйтʹәла Украине кьрьн. Гәло ԝана ԝедәре ԝе чь бькьра? Гәло әԝана дьфькьрин кӧ ида кал у пир бунә у нькарьн ԝәлатәки дьнда хьзмәт бькьн? На! Ԝана әв тʹәглифкьрьн ԛәбул кьр, у Щон ча әндәме Комитейа Филиале һатә кʹьфшкьрьне. Һʹәфт сал шунда Щон мьр, ле Лоисе сафи кьр Бәйтʹәла Украинеда бьминә. Лоис ньһа 81 сали йә. Әԝ һʹәта ньһа бь дьл у щан ԝедәре хьзмәт дькә, у Бәйтʹәлван ле гәләк һʹьз дькьн.

⁹ Жьнәбийед мина Лоисе дьбәкә ида ча бәре накʹәвьн бәр чʹәʹва. Диса жи, жь бо ве йәке кӧ әԝана жьнәби нә, ԛимәта ԝан накʹәвә. Йаһоԝа гәләк ԛимәт дькә хушкед кӧ бь гәләк сала пьштгьрийа меред хԝә дькьрьн у ньһа жи бь амьни ԝирʹа хьзмәт дькьн (1 Тимотʹейо 5:3). Сәрда жи, хушк-бьред щаһьл дькарьн жь мәсәла ԝан гәләк тьшта һин бьн.

10. Тони чь мәсәләкә баш һишт?

¹⁰ Һьнә хушк-бьред әʹмьрда мәзьн мала кал-пирада дьминьн, у әԝана жи хьзнед рʹӧһʹани нә. Мәсәлә, Америкайеда, бьраки бь наве Тони ньһа щики ӧсада дьжи. Сала 1942-да, гава Тони 20 сали бу, әԝ һатә ньхӧмандьне. Ԝәхтәкә кьн паши ньхӧмандьне, әскәрийа Америкайе гази ԝи кьр. Ле жь бо ве йәке кӧ әԝи инкʹар кьр һәрʹә әскәрийе, ԝи сәр дӧ сал у нива кьрьнә кәле. Тони у жьна ԝи дӧ зарʹед хԝә рʹастийеда мәзьн дькьрьн, ле әԝ шьхӧле Йаһоԝада жи гәләк хирәт бу. Мәсәлә, әԝи чәнд  щьватада ча координаторе кʹома рʹуспийа у ча бәрпьрсийаре щьвата мәзьн хьзмәт дькьр. Ӧса жи, әԝ дьчу кәле ԝәки ԝедәре щьвина у һинбунед Кʹьтеба Пироз дәрбаз бькә. Тони ньһа 98 сали йә, ле әԝ һʹәта ньһа жи бь дьл у щан Йаһоԝарʹа хьзмәт дькә у тʹәви щьвата хԝә һәвкʹарийе дькә.

11. Әм чаԝа дькарьн нишан кьн ԝәки әм хушк-бьред әʹмьрда мәзьн, йед кӧ мала кал-пирада дьминьн, ԛимәт дькьн?

¹¹ Гәло әм ча дькарьн бьдьнә кʹьфше, ԝәки әм хушк-бьред кӧ мала кал-пирада дьжин, ԛимәт дькьн? Ԝе баш бә кӧ рʹуспи чьԛас дькарьн али ԝан бькьн, ԝәки әԝана щьвина бьньһерʹьн йан жи бьбьһен, у мьзгине тʹәви щьвате бәла кьн. Хенщи рʹуспийа, әм жи дькарьн тʹәсәлийа ԝан бькьн йан бь сайа интернете тʹәви ԝан хәбәр дьн. Илаһи фәрз ә кӧ әм дина хԝә бьдьнә кәсед әʹмьрда мәзьн, йед кӧ щики дур дьминьн, бона ԝана хәм бькьн у ԝана бир нәкьн. Һьнә кәсед әʹмьрда мәзьнрʹа дьԛәԝьмә һеса нинә бәʹса жийин у хьзмәта хԝә бькьн. Ле һәгәр әм тʹәви ԝана ԝәʹдә дәрбаз кьн у бежьнә ԝана кӧ дәрһәԛа жийина хԝә мәрʹа гьли кьн, әме кʹарәкә мәзьн бьстиньн.

12. Хушк-бьред әʹмьрда мәзьн чьрʹа мина хьзнед рʹӧһʹани нә?

¹² Щьвата мәда жи дьԛәԝьмә һьнә хушк-бьред әʹмьрда мәзьн һәнә, йед кӧ гәләк сала бь амьни хьзмәт кьрьнә. Амәрикайеда, хушкәкә бь наве Һариете бь дәһа сала щьватәкә Нийу Щерсийеда бь хирәт хьзмәт дькьр. Ле гава әԝ пир бу, әԝ дәрбази мала ԛиза хԝә у щьватәкә дьн бу. Хушк-бьред щьвата ԝейә тʹәзә тʹәви ԝе ԝәʹдә дәрбаз дькьрьн ԝәки ԝе нас бькьн, у ԝана фәʹм кьр кӧ әԝ зерʹе зәр ә. Һариете сала 1925-да щара пешьн дәрһәԛа рʹастийе бьһист, у әԝе хушк-бьрарʹа бәʹса сәрһатийед хьзмәта хԝәйә бәре дькьр. Мәсәлә, Һариете ԝанрʹа гот кӧ гава әԝ дьчу хьзмәте, әԝе һәртʹьм чотка дьрана тʹәви хԝә һьлдьда, чьмки әԝе заньбу кӧ полис дькарә ԝе бьгьрә у бавежә кәле. Сала 1933-да, ԝе дӧ щара сәр һʹәфтеки кьрьнә кәле. Мере ԝе Шәʹде Йаһоԝа нибу, ле әԝи диса жи пьштгьрийа ԝе дькьр у бона се зарʹед ԝан хәм дькьр. Бәле, хушк-бьред амьн, йед мина Һариете бона мә гәләк ԛимәт ьн.

13. Тʹәшкиләта Йаһоԝада, хушк-бьред әʹмьрда мәзьн чьрʹа ԛимәт ьн?

¹³ Хушк-бьред мә йед әʹмьрда мәзьн бь рʹасти жи бона Йаһоԝа у тʹәшкиләта ԝи гәләк ԛимәт ьн. Ԝана жь Йаһоԝа гәләк кʹәрәм стандьнә, у ԝана гәләк щара дитийә кӧ Йаһоԝа тʹәшкиләта хԝә чаԝа кʹәрәм дькә. Ӧса жи, ԝана жь шашийед хԝәйә бәре дәрс стандьнә. Ләма жи, ԝе баш бә кӧ әм ԝана ча «канийа сәрԝахтийе» һʹәсаб кьн, у жь билани у жийина ԝан кʹаре бьстиньн (Мәтʹәлок 18:4). Һәгәр әм ԝана рʹьнд нас бькьн, баԝәрийа мә ԝе дьһа ԛәԝи бә у әме гәләк тьштед тʹәзә жь ԝана һин бьн.

14. Ль гора Ԛануна Дӧщари 32:7, ԝе баш бә кӧ әм чь бькьн?

¹⁴ Гава пешьн бавежә, ԝәки тʹәви хушк-бьред әʹмьрда мәзьн хәбәрдане дәстпеки (Ԛануна Дӧщари 32:7 бьхунә). Дьбәкә чʹәʹве ԝан ида рʹьнд навинә, әԝана ида нькарьн зу рʹе һәрʹьн у дәнге ԝан ида ԛәԝи нинә, ле ча те готьне, дьл пир набә. Сәрда жи, ԝана щәм Йаһоԝа «наве баш» ԛазанщ кьрийә (Ԝаиз 7:1, ИМ). Бир нәкә кӧ чьма Йаһоԝа ԝана ԛимәт дькә. Ԛәдре  ԝан бьгьрә. Мина Елиша бә. Әԝ һʹәта хьлазийе щәм Елйас ма, у әԝи се щара ԝирʹа гот: «Әз тә бәрʹнадьм» (2 Пʹадшати 2:2, 4, 6).

15. Әм дькарьн жь хушк-бьред әʹмьрда мәзьн чь бьпьрсьн?

¹⁵ Жь дьл гӧһ бьдә хушк-бьред әʹмьрда мәзьн у бь сайа пьрса ԝана һелан кә дьле хԝә вәкьн (Мәтʹәлок 1:5; 20:5; 1 Тимотʹейо 5:1, 2). Мәсәлә, тӧ дькари пьрсед ӧса бьпьрси: «Гава һун щаһьл бун, һун чаԝа баԝәр бун ԝәки рʹийа Йаһоԝа, рʹийа рʹаст ә? Ԛәԝьмандьнед жийина ԝәда ԝә чаԝа дьһа незики Йаһоԝа кьрьн? Бь дитьна ԝә, мәрьв чаԝа дькарә хьзмәта Йаһоԝада бәхтәԝар бьминә?» (1 Тимотʹейо 6:6-8). Паше, рʹьнд гӧһ бьдә щабед ԝан.

16. Чахе йед әʹмьрда мәзьн у йед щаһьл һәвдӧрʹа хәбәр дьдьн, әԝана чь кʹаре дьстиньн?

¹⁶ Чахе кәсәки әʹмьрда мәзьн у кәсәки щаһьл һәвдӧрʹа хәбәр дьдьн, һәрдӧ жи кʹаре дьстиньн (Рʹомайи 1:12). Кәсе щаһьл ԝе дьһа баш фәʹм бькә кӧ Йаһоԝа хьзмәткʹаред хԝәйә амьн чаԝа хԝәй дькә, у йе әʹмьрда мәзьн ԝе ша бә, чьмки хушк йан бьре щаһьл ԝи ԛимәт дькә. Кәсе әʹмьрда мәзьн ԝе бь шабуне бәʹса сәрһатийед хԝә у кʹәрәмед Йаһоԝа бькә.

17. Хушк у бьред әʹмьрда мәзьн чь алива чьԛас дьчьн һаԛас бәдәԝ дьбьн?

¹⁷ Сал дәрбаз дьбьн у бәдәԝбуна рʹува жи дәрбаз дьбә, ле хьзмәткʹаред Йаһоԝайә амьн бәр чʹәʹве ԝи дьһа бәдәԝ дьбьн (1 Тʹесалоники 1:2, 3). Гәло чьма? Чьмки ԝана бь гәләк сала изьн данә ԝәки рʹӧһʹе Хԝәде ԝана һин бькә у али ԝан бькә һʹӧнӧред баш нав хԝәда пешда биньн. Чьԛас кӧ әм ван хушк у бьред дәлал нас бькьн, ԛәдьре ԝан бьгьрьн у жь ԝан һин бьбьн, һаԛас әме бьвиньн кӧ әԝана бь рʹасти жи хьзнед гәләк ԛимәт ьн.

18. Готара дьнда, әме дәрһәԛа чь хәбәр дьн?

¹⁸ Чаԝа кӧ фәрз ә ԝәки кәсед щаһьл ԛәдре кәсед әʹмьрда мәзьн бьгьрьн, бона пешдачуйина щьвате ӧса жи гәләк фәрз ә, ԝәки кәсед әʹмьрда мәзьн хушк-бьред щаһьл ԛимәт кьн. Готара дьнда, әме бьвиньн кӧ йед әʹмьрда мәзьн чаԝа дькарьн нишан кьн, ԝәки әԝана хушк-бьред щаһьл ԛимәт дькьн.