Нәфрʹәти әԝ ә чахе кәсәк ԛә тә хԝәш найе у чахе тӧ мәрьвәки йан жи кʹомәкә мәрьва һʹәрам һʹәсаб дьки. Әԝ һерсбуна ԝәʹдәлу нинә, ле һәстәки дьһа ԛәԝи йә.

Мәрьв жь бо гәләк мәʹнийа дәстпекьрьн һәв нәфрʹәт бькьн. Гәләк щар нәфрʹәти пешда те нә жь бо ԝе йәке кӧ мәрьва тьштәк кьрьнә, ле жь бо ԝе йәке кӧ әԝана кʹи нә. Һьнә кәс жь бо ԝе йәке мәрьва нәфрʹәт дькьн, кӧ ԝана ча кәсед зӧлм у хоф һʹәсаб дькьн у дьфькьрьн ԝәки әԝана нькарьн тьштәки баш бькьн. Сәр ԝана ча сәр кәсед ньмьз у ча сәр канийа проблема дьньһерʹьн. Мәрьвед кӧ тенә нәфрʹәткьрьне рʹасти зорбәтийе, нәһәԛийе у тьштед дьн тен. Жь бо ԝе йәке нав ԝанда хԝәстьн пешда те, кӧ һʹәйфе һьлдьн.

Щарна мәрьв ԝан кәса нәфрʹәт дькьн, кʹижана кӧ ԛәт нас накьн жи. Мәсәлә, мәрьв дькарә бе һʹәмде хԝә ньһерʹандьна мәрьвед хԝәйиԛәдьр йан жи ньһерʹандьна бьра у пьсмама ԛәбул кә. Мәрьв чʹәʹв дьдьнә һәв у кʹомед мәрьва нәфрʹәт дькьн у ӧса нәфрʹәти зу бәла дьбә.

Чахе әм заньн ԝәки чь щурʹәйи нәфрʹәти бәла дьбә, әм фәʹм дькьн кӧ чьрʹа һаԛас мәрьв һәв нәфрʹәт дькьн. Ле сәва кӧ нәфрʹәтийе жь дьле хԝә дәрхьн, ԝе баш бә пешийе пебьһʹәсьн, кӧ нәфрʹәти чь щурʹәйи пешда һатийә. Дәрһәԛа ԝе йәке Кʹьтеба Пироз мәрʹа әʹйан дькә.

МӘРЬВ ӦСА НӘҺАТЬНӘ ӘʹФЬРАНДЬНЕ КӦ НӘФРʹӘТИ ДЬЛЕ ԜАНДА ҺӘБӘ. Нәфрʹәти һьнге пешда һат, чахе мәләкәк мьԛабьли Хԝәде рʹабу, кʹижан кӧ һатә навкьрьне Мире-щьна. Чахе әԝ мьԛабьли Хԝәде дәркʹәт, әԝ ида бу «меркӧж, ИМ». «Әԝ дәрәԝин ә у баве дәрәԝа йә» ләма жи бәрдәԝам дькә нәфрʹәтийе у зӧлмийе бәла кә (Йуһʹәнна 8:44; 1 Йуһʹәнна 3:11, 12). Кʹьтеба Пирозда әԝ әʹйан дьбә ча кәсе зӧлм, һерс у берʹәʹм (Ибо 2:7; Әʹйанти 12:9, 12, 17).

МӘРЬВЕД ГӦНӘКʹАР ҺЕСА ДЬКʹӘВЬНӘ БӘР БАЙЕ НӘФРʹӘТИЙЕ. Мәрьве пешьн, Адәм, пәй Мире-щьна чу у бу гӧнәкʹар. Ахьрийеда гӧнәкʹари дәрбази сәр тʹәмамийа зӧрʹәта ԝи бу (Рʹомайи 5:12). Кӧрʹе Адәми пешьн, Ԛайин, бьре хԝә Һабил ӧса нәфрʹәт кьр кӧ әԝ кӧшт (1 Йуһʹәнна 3:12). Рʹаст ә гәләк мәрьв һʹьзкьрьн у дьлшәԝатийе дьдьнә кʹьфше, ле жь бо гӧнәкʹарийе диса жи хԝәһʹьзийе, һʹәвсудийе у ԛӧрʹәбуне әʹйан дькьн, демәк һʹӧнӧред кӧ нәфрʹәтийе пешда тиньн (2 Тимотʹейо 3:1-5).

КӘСЕ КӦ ФЬРԚИЙЕ ДЬКӘ НАВА МӘРЬВА, НӘФРʹӘТИЙЕ НАВ ХԜӘДА ПЕШДА ТИНӘ. Иро ньһерʹандьн у кьред мәрьвада берʹәʹмти әʹйан дьбә, чь кӧ зийане у нәфрʹәтийе пешда тинә. Рʹожа иройин ӧса жи бабахи, хәбәрдана нәщайиз, беһӧрмәткьрьн у ԛачахти гәләк бәлабуйи нә, чьмки «тʹәмамийа дьнйайе бьн һʹӧкӧме Йе Хьрабда йә», демәк бьн һʹӧкӧме Мире-щьна (1 Йуһʹәнна 5:19).

Кʹьтеба Пироз нә кӧ тʹәне шьровәдькә, ԝәки нәфрʹәти чь щурʹәйи пешда һатийә, ле ӧса жи, ԝәки әв ԝе чаԝа бе һьлдане.