1-2. (а) Һьнәкарʹа чьрʹа чәтьн ә итʹбарийа хԝә кәсед хԝәйиһʹӧкӧм биньн? (б) Ве готареда, әме дәрһәԛа чь шеԝьр кьн?

ИРО гәләк кәс итʹбарийа хԝә кәсед хԝәйиһʹӧкӧм найньн. Гәло чьрʹа? Чьмки ԝана дитийә кӧ системед ԛануни у политики һе зедә алийе кәсед дәԝләмәнд у кәсед бь нав у дәнг дьгьрьн, нә кӧ али кʹәсиба дькьн. Бәле, чаԝа кӧ Кʹьтеба Пирозда һатьбу ньвисаре, сәрԝертийа мәрьва бь рʹасти жи зьраре дьдә һәр кәси (Ԝаиз 8:9). Сәрда жи, һьнә сәрԝеред религи кьред нә баш дькьн. Жь бо ве йәке һьнә кәс баԝәрийа хԝә һьндава Хԝәде ӧнда кьрьнә. Ләма, гава әм тʹәви кәсәки һинбуна Кʹьтеба Пироз дәстпедькьн, гәрәке әм али ԝи бькьн кӧ әԝ итʹбарийа хԝә Йаһоԝа у бьред щабдар бинә, йед кӧ алийе Ԝида һатьнә кʹьфшкьрьне.

² Һәмьки нә тʹәне хԝәндәкʹаред Кʹьтеба Пироз гәрәке итʹбарийа хԝә Йаһоԝа у тʹәшкиләта ԝи биньн. Кәсед кӧ гәләк сала Йаһоԝарʹа хьзмәт дькьн жи, гәрәке тʹӧ щар бир нәкьн ԝәки сафикьрьнед Йаһоԝа һәртʹьм рʹаст ьн. Ве готареда, әме дина хԝә бьдьне кӧ баԝәрийа мә дькарә ван се алийада бе щерʹьбандьне: (1) гава әм Кʹьтеба Пироз дьхуньн, (2) гава әм жь тʹәшкиләта Йаһоԝа рʹебәрийе дьстиньн у (3) гава ахьрийеда әм рʹасти тәнгасийа бен.

3. Һьнә сәрһатийед Кʹьтеба Пироз чьма дькарьн итʹбарийа мә һьндава Йаһоԝа бьщерʹьбиньн?

 ³ Чахе әм Хәбәра Хԝәде дьхуньн, дьбәкә щарна мәрʹа чәтьн ә кӧ мәʹнийед һьнә сафикьрьнед Йаһоԝа фәʹм  бькьн. Мәсәлә, кʹьтеба Жьмарда те готьне кӧ Йаһоԝа фәрман да, ԝәки мерәки кӧ рʹожа Шәмийе ԛьрш тʹоп кьрьбу, бькӧжьн. Ле кʹьтеба 2 Самуйелда әм дьвиньн кӧ чәнд ԛьрʹнә паши ве йәке, Йаһоԝа бенамуси у меркӧжийа Даԝьд бахшанд (Жьмар 15:32, 35; 2 Самуйел 12:9, 13). Әм дьбәкә дьфькьрьн: «Йаһоԝа чьма гӧнед гьран йед Даԝьд бахшандьн, ле фәрман да ԝәки мерәки кӧ гӧнәки бьчʹук кьрьбу, бькӧжьн?» Сәва кӧ әм щаба ве пьрсе бьстиньн, ԝе баш бә ԝәки әм ԝәʹде хԝәндьна Кʹьтеба Пироз се тьшта биньн бира хԝә.

4. Готьнед жь Дәстпебун 18:20, 21 у Ԛануна Дӧщари 10:17 чаԝа баԝәрийа мә дьһа ԛәԝи дькьн, ԝәки һʹәму сафикьрьнед Йаһоԝа рʹаст ьн?

⁴Кʹьтеба Пироз щарна һәр тьшти зәлал накә. Мәсәлә, әм заньн кӧ Даԝьд сәва гӧнед хԝә жь дьл тʹобә кьр (Зәбур 51:2-4). Ле гәло мере кӧ ԛануна Шәмийе тʹәрʹьбанд, йәки чаԝа бу? Гәло әԝ сәва гӧне хԝә пʹошман бу? Гәло әԝи бәре жи ԛанунед Йаһоԝа дьтʹәрʹьбанд у тʹәмийед ԝи пьшт гӧһе хԝәва давит? Кʹьтеба Пироз щаба ван пьрса надә. Ле әм дькарьн баԝәр бьн кӧ щәм Йаһоԝа нәһәԛи тʹӧ щар «тʹӧнәйә» (Ԛануна Дӧщари 32:4). Дәнг-бәʹс, фьрԛикьрьна ортʹа мәрьва у дәрәщед дьн, щарна дькарьн сәр ньһерʹандьна мәрьва һʹӧкӧм кьн, ле Йаһоԝа ӧса нинә. Хԝәде занә кӧ бь рʹасти чь ԛәԝьмийә, у әԝ сафикьрьнед хԝә ль гора ве йәке дькә (Дәстпебун 18:20, 21; Ԛануна Дӧщари 10:17 бьхунә). Чьԛас әм Йаһоԝа нас дькьн у принсипед ԝи һин дьбьн, һаԛас әм баԝәр дьбьн ԝәки сафикьрьнед ԝи рʹаст ьн. Ләма жи һәгәр әм рʹасти һьнә рʹеза бен, йед кӧ әм бь тʹәмами фәʹм накьн, ԝе баш бә ԝәки әм биньн бира хԝә, кӧ Йаһоԝа «рʹаст ә, һʹәму рʹе-дьрбед Хԝәда» (Зәбур 145:17).

5. Ԛьсурдари чаԝа дькарә сәр ньһерʹандьна мә сәр һәԛийе һʹӧкӧм кә? (Ӧса жи чаргошә бь наве « Ԛьсурдари Ньһерʹандьна Мә сәр Һәԛийе Хьраб Дькә».)

⁵Әм гӧнәкʹар ьн, ләма жи ньһерʹандьна мә сәр һәԛийе щарна шаш ә. Хԝәде әм сурәте хԝәда әʹфьрандьнә, ләма жи әм жь нәһәԛийе әʹщьз дьбьн (Дәстпебун 1:26). Ле чьԛас жи әм бьфькьрьн кӧ әм һәр тьшти заньн, йәкә әм ԛьсурдар ьн у ньһерʹандьна мә дькарә нәрʹаст бә.  Мәсәлә, бинә бира хԝә кӧ гава Йаһоԝа сафи кьр ԝәки рʹәʹма хԝә щьмәʹта Нәйноԝайе бинә, Уньс чьԛас әʹщьз бу (Уньс 3:10–4:1). Ле дина хԝә бьде кӧ сафикьрьна Йаһоԝа кʹарәкә чьԛас мәзьн ани! Зедәтьри 120 000 кәсед кӧ тʹобә кьрьн, сах ман. Әʹйан ә кӧ ньһерʹандьна Уньс шаш бу, ле ньһерʹандьна Йаһоԝа рʹаст бу.

6. Йаһоԝа чьрʹа мәщбур нинә, ԝәки бона сафикьрьнед хԝә һʹәсаба бьдә мә?

⁶Йаһоԝа мәщбур нинә бона сафикьрьнед хԝә һʹәсаба бьдә мә. Бәле, Йаһоԝа щарна изьн дьда кӧ хьзмәткʹаред ԝи фькьред хԝә һьндава сафикьрьнед ԝи бежьн (Дәстпебун 18:25; Уньс 4:2, 3). Щарна жи Йаһоԝа хԝәха мәʹнийед сафикьрьнед хԝә ԝанрʹа шьровәдькьр (Уньс 4:10, 11). Ле Йаһоԝа мәщбур нинә кӧ һәр сафикьрьнед хԝә мәрʹа шьровәкә. Әԝ Әʹфьрандаре мә йә, ләма жи әԝ һʹәԝще ԛәбулкьрьна мә нинә, нә пешийа кӧ әԝ тьштәки бькә, нә жи паши ве йәке (Ишайа 40:13, 14; 55:9).

7. Дьбәкә чь мәрʹа чәтьн бә, у чьрʹа?

⁷ Әм сәд сәләфи баԝәр ьн, ԝәки һʹәму шьхӧл у сафикьрьнед Йаһоԝа рʹаст ьн. Ле дьбәкә мәрʹа чәтьн бә итʹбарийа хԝә бьред кʹьфшкьри биньн. Әм дьбәкә бәрхԝә дькʹәвьн һәла әԝана ль гора рʹебәрийа Йаһоԝа һәр тьшти дькьн, йан ль гора һʹьш-аԛьле хԝә. Дьбәкә кәсед кӧ ԝәʹде бәре дьжитьн жи ӧса дьфькьрин. Сәрһатийед жь  абзаса сьсийа бьдә бәр чʹәʹве хԝә. Дьбәкә мәрьвәки ԝи мери, йе кӧ ԛануна Шәмийе тʹәрʹьбанд, бәрхԝә дькʹәт у дьфькьри һәла Муса бь рʹасти жь Йаһоԝа пьрси, пешийа кӧ фәрман бьдә ԝәки ԝи бькӧжьн. Йан жи, дьбәкә һьнә һәвалед Урийайе Һитти дьфькьрин, ԝәки Даԝьд сәре хԝә хьлаз кьр, чьмки әԝ пʹадша бу. Рʹасти әв ә ԝәки Йаһоԝа итʹбарийа хԝә ԝан мәрьва тинә, кʹижана кӧ әԝи тʹәшкиләта хԝәда кʹьфш кьрьнә. Ләма жи, һәгәр әм итʹбарийа хԝә ԝана найньн, әм нькарьн бежьн ԝәки әм итʹбарийа хԝә Йаһоԝа тиньн.

8. Ль гора Кʹаред Шандийа 16:4, 5, щьватед ԛьрʹна йәке чаԝа рʹебәри дьстандьн, у иро әм ча рʹебәрийе дьстиньн?

⁸ Иро, Йаһоԝа бь сайа «хӧламе амьн у сәрԝахт», рʹебәрийа тʹәшкиләта хԝә дькә (Мәтта 24:45). Мина кʹома рʹебәрийе йа ԛьрʹна йәке, әв хӧлам бона хьзмәткʹаред Хԝәде сәр тʹәмамийа дьнйайе хәм дькә у рʹебәрийе дьдә рʹуспийед щьвата (Кʹаред Шандийа 16:4, 5 бьхунә). Рʹуспи жи ве рʹебәрийе щьватада дьдьнә хәбате. Гава әм гӧһ дьдьн рʹебәрийа кӧ әм жь тʹәшкиләте у жь рʹуспийа дьстиньн, әм нишан дькьн кӧ әм итʹбарийа хԝә сафикьрьнед Йаһоԝа тиньн.

9. Кʹәнге дьбәкә мәрʹа чәтьн бә ԝәки сафикьрьнед рʹуспийа ԛәбул кьн, у чьрʹа?

⁹ Дьбәкә щара мәрʹа һеса нинә ԝәки сафикьрьнед рʹуспийа ԛәбул кьн. Мәсәлә, ван салада гәләк щьват у мьһал тʹәзәда һатьнә организәкьрьне. Һьнә дәра, рʹуспийа мьзгинванарʹа готийә ԝәки әԝана дәрбази щьватәкә дьн бьн, кʹидәре һәжмара мьзгинвана һьндьк ә. Гава мәрʹа те готьне ԝәки әм дәрбази щьватәкә дьн бьн, дьԛәԝьмә мәрʹа чәтьн ә һәвал у мәрьвед хԝә бьһельн. Гәло рʹуспи рʹастә-рʹаст жь Хԝәде рʹебәрийе дьстиньн кӧ кʹижан мьзгинван гәрәке һәрʹә кʹижан щьвате? Һьлбәт на. Ләма жи дьбәкә мәрʹа нәһеса йә ԝәки ве рʹебәрийе ԛәбул кьн. Ле Йаһоԝа итʹбарийа хԝә рʹуспийа тинә у изне дьдә,  ԝәки әԝана сафикьрьнед ӧса бькьн, у гәрәке әм жи итʹбарийа хԝә ԝана биньн. *

10. Ль гора Ибрани 13:17, чьрʹа фәрз ә ԝәки әм тʹәви рʹуспийа һәвкʹарийе бькьн?

¹⁰ Һәгәр сафикьрьнед рʹуспийа нә ль гора дьле мә бьн жи, ԝе баш бә кӧ әм тʹәви ԝан һәвкʹарийе бькьн у пьштгьрийа сафикьрьнед ԝан бькьн, ԝәки йәктийа нав хьзмәткʹаред Хԝәдеда хьраб нәбә (Әфәси 4:2, 3). Гава һәр кәс бь мьлукти гӧрʹа сафикьрьнед кʹома рʹуспийа дькьн, щьват дьһа пешда дьчә у гәш дьбә (Ибрани 13:17 бьхунә). Йа һәри фәрз, гава әм итʹбарийа хԝә бьред кʹьфшкьри тиньн, әм нишан дькьн ԝәки әм итʹбарийа хԝә Йаһоԝа тиньн (Кʹаред Шандийа 20:28).

11. Чь дькарә али мә бькә ԝәки итʹбарийа хԝә рʹебәрийа рʹуспийа биньн?

¹¹ Пешийа кӧ рʹуспи сафикьрьна дькьн, әԝана дӧа дькьн, ԝәки Йаһоԝа рʹӧһʹе пироз бьдә ԝан. Ӧса жи, әԝана ль гора принсипед Кʹьтеба Пироз у рʹебәрийа тʹәшкиләта Йаһоԝа ван сафикьрьна дькьн. Әԝана дьхԝазьн дьле Йаһоԝа ша кьн у хьзмәткʹаред ԝи бь щурʹәки баш хԝәй кьн. Әв бьред амьн заньн ԝәки әԝана гәрәке һʹәсаб бьдьн Хԝәде, кӧ ча щабдарийед хԝә тиньн сери (1 Пәтрус 5:2, 3). Ԝәрә бьфькьрьн: Мәрьвед ве дьнйайе сәва мьләт, религийа у политике һәв нәфрʹәт дькьн, ле хьзмәткʹаред Йаһоԝа йәктийеда Хԝәдейе рʹаст дьһʹәбиньн. Гәло әв йәк кӧ Йаһоԝа тʹәшкиләта хԝә чаԝа кʹәрәм дькә, али мә накә ԝәки әм итʹбарийа хԝә рʹебәрийа рʹуспийа биньн?

12. Гава рʹуспи леколин дькьн һәла кәсәк бь рʹасти тʹобә дькә йан на, гәрәке әԝана дина хԝә бьдьн кʹижан фактора?

¹² Йаһоԝа дьхԝазә ԝәки рʹуспи щьват рʹӧһʹанида тʹәмьз хԝәй кьн, у әва щабдарикә мәзьн ә. Гава Мәсиһик гӧнәки гьран дькә, Йаһоԝа дьхԝазә ԝәки рʹуспи сафи кьн кӧ һәла әв кәс дькарә щьватеда бьминә йан на. Жь бо ве йәке, гәрәке әԝана тедәрхьн һәла әԝ сәва кьред хԝә бь рʹасти пʹошман дьбә йан на. Һәгәр әԝ дьбежә жи ԝәки әԝ тʹобә дькә, гәло әԝ кьред хԝә бь рʹасти нәфрʹәт дькә? Гәло әԝи хԝәрʹа ԛьрар кьрийә ԝәки ви гӧнәйи щарәкә дьн нәкә? Һәгәр рʹуйе һәвалед нәбашда әԝи гӧне гьран кьрийә, гәло әԝ һазьр ә ԝәки һәвалтийа хԝә тʹәви ԝан бьбьрʹә? Рʹуспи гәрәке бь аликʹарийа Кʹьтеба Пироз дина хԝә бьдьн һʹәму фактора у ӧса жи ве йәке кӧ кәсе гӧнәкʹар ча сәр кьред хԝә дьньһерʹә. Паше, гәрәке әԝана сафи кьн һәла әԝ кәс дькарә щьватеда бьминә йан лазьм ә ԝәки әԝ жь щьвате бе дәрхьстьне (1 Корьнтʹи 5:11-13).

13. Гава һәвал йан мәрьвәки мә жь щьвате те дәрхьстьне, дьбәкә әме бона чь бәрхԝә кʹәвьн?

¹³ Гәло баԝәрийа мә һьндава рʹуспийа чаԝа дькарә бе щерʹьбандьне? Һәгәр кәсе кӧ жь щьвате һатийә дәрхьстьне һәвал йан мәрьве мә нинә, дьбәкә мәрʹа һеса бә ԝәки сафикьрьна рʹуспийа ԛәбул кьн. Ле һәгәр әԝ һәвале мә йә, ԝи чахи мәрʹа дькарә чәтьн бә. Дьбәкә әм бәрхԝә дькʹәвьн һәла рʹуспийа бь рʹасти дина хԝә данә һʹәму фактора йан на. Ӧса жи, дьбәкә әм дӧдьли бьн һәла ԝана бь рʹасти ль гора хԝәстьна Йаһоԝа әв йәк сафи кьрьнә йан на. Гәло чь дькарә али мә бькә ԝәки әм сафикьрьна ԝан ԛәбул кьн?

14. Һәгәр һәвал йан мәрьвәки мә жь щьвате бе дәрхьстьне, гәрәке әм чь бир нәкьн?

 ¹⁴ Гава кәсәк жь щьвате те дәрхьстьне, гәрәке әм бир нәкьн ԝәки әв йәк бона кʹара щьвате йә у дькарә кәсе гӧнәкʹаррʹа жи кʹаре бинә. Һәгәр кәсәки кӧ тʹобә накә щьватеда бьминә, әԝ дькарә зьраре бьдә щьвате (Галати 5:9). Ӧса жи, дьбәкә әԝ фәʹм нәкә кӧ гӧне ԝи чьԛас гьран ә, у хирәт нәкә ԝәки ньһерʹандьн у рʹабун-рʹуньштьна хԝә рʹаст кә, сәва кӧ диса достийа хԝә тʹәви Йаһоԝа ԛазанщ кә (Ԝаиз 8:11). Әм дькарьн баԝәр бьн кӧ гава рʹуспи сафи дькьн ԝәки кәсәк гәрәке жь щьвате бе дәрхьстьне, әԝана ве сафикьрьне ль гора принсипед Йаһоԝа дькьн. Әԝана сәр ве щабдарийе сәрʹа-бәрʹа наньһерʹьн, чьмки ча һʹакьмед ԝәʹде бәре, әԝана нә кӧ бона мәрьва, ле бона Йаһоԝа диԝане дькьн (2 Дирок 19:6, 7).

15. Чьрʹа фәрз ә кӧ әм ньһада итʹбарийа хԝә рʹебәрийа Йаһоԝа биньн?

¹⁵ Чьԛас әм незики хьлазийа ве дьнйайе дьбьн, һаԛас дьһа зедә әм гәрәке итʹбарийа хԝә сафикьрьнед Йаһоԝа биньн. Гәло чьрʹа? Ԝәʹде тәнгасийа мәзьн, дьԛәԝьмә рʹебәрийа кӧ әме бьстиньн щара мәрʹа әʹщеб йан нәлогики бе кʹьфше. Йаһоԝа ԝе һәмьки рʹастә-рʹаст тʹәви мә хәбәр нәдә. Ле әԝе бь сайа бьред кʹьфшкьри рʹебәрийе бьдә мә. Ԝәʹде тәнгасийа мәзьн, гәло әме бькʹәвьнә шьке һәла рʹебәрийа кӧ мә жь бьред щабдар стандийә, бь рʹасти жь Йаһоԝа йә йан на? Һьнге ԝе гәләк фәрз бә ԝәки әм итʹбарийа хԝә Йаһоԝа у тʹәшкиләта ԝи биньн. Ләма жи гәрәке әм ида ньһада гӧһ бьдьн рʹебәрийа тʹәшкиләта Хԝәде. Һәгәр әм итʹбарийа хԝә ван рʹебәрийа тиньн, кʹижан кӧ әм иро дьстиньн у пәй ван рʹебәрийа дьчьн, ԝе мәрʹа һеса бә ԝәʹде тәнгасийа мәзьн жи ӧса бькьн (Луԛа 16:10).

16. Ахьрийеда баԝәрийа мә чаԝа дькарә бе щерʹьбандьне?

¹⁶ Хенщи ве йәке, гава Йаһоԝа ахьрийеда диԝана ве дьнйа зӧлм бькә, гәло әме ча хԝә бьдьнә кʹьфше? Ньһа, әм дәрһәԛа һевикә хԝәш ча һʹәму мәрьварʹа ӧса жи мәрьвед хԝәйи нәбаԝәрмәндрʹа гьли дькьн. Ле ԝәʹде Һармәгәдоне, Йаһоԝа ԝе бь сайа Иса Мәсиһ дәрһәԛа ахьрийа ԝан ԝе сафикьрьна хьлазийе бькә (Мәтта 25:31-33; 2 Тʹесалоники 1:7-9). Һьнге әме нькарьбьн сафи кьн кӧ кʹе һежайи рʹәʹма Йаһоԝа йә у кʹе на (Мәтта 25:34, 41, 46). Гәло әме һьнге  жи баԝәр бьн ԝәки Йаһоԝа тʹьме рʹаст диԝане дькә? Гәләк фәрз ә кӧ әм ньһада баԝәрийа хԝә һьндава Йаһоԝа дьһа ԛәԝи кьн, ԝәки ахьрийеда жи бь дьл у щан итʹбарийа хԝә ԝи биньн.

17. Әме чь кʹаре бьстиньн, гава Йаһоԝа диԝана ве дьнйа хьраб бькә?

¹⁷ Бинә бәр чʹәʹве хԝә ԝәки дьнйа тʹәзәда, гава әме ахьрийа диԝана Йаһоԝа бьвиньн, әме чьԛас ша бьн. Религийед ԛәлп, тьмайа системед комерси у политики, йед кӧ бь һʹәзара сала әʹмьре мәрьва гьран кьрьнә у зӧлми кьрьнә, ԝе ида тʹӧнә бьн. Тʹӧ кәс ԝе ида кал у пир нәбә у нәхԝәш нәкʹәвә, у тʹӧ кәс ԝе ида мәрьвед хԝәйи һʹьзкьри ӧнда нәкә. Мире-щьна у щьнед ԝи ԝе һʹәзар сал гьрти бьн. Ахьрийа рʹабәрибуна ԝан ԝе кʹокева бе рʹакьрьне (Әʹйанти 20:2, 3). Һьнге, әме чьԛас рʹази бьн кӧ мә итʹбарийа хԝә сафикьрьнед Йаһоԝа анийә!

18. Әм жь мәсәла Исраелийа кӧ Жьмар 11:4-6 у 21:5-да ньвисар ә, чь дәрса һин дьбьн?

¹⁸ Гәло итʹбарийа мә һьндава сафикьрьнед Йаһоԝа, дьнйа тʹәзәда жи дькарә бе щерʹьбандьне? Бинә бира хԝә кӧ гава Исраели жь хӧламтийа Мьсре аза бун, ԝәʹдә шунда чь ԛәԝьми. Һьнә жь ԝана дькьрә кӧтә-кӧт у газьне хԝә дькьрьн, чьмки ԝана бира хԝарьнед Мьсре дькьрьн, у әв мана йа кӧ Йаһоԝа дьда ԝан, нәдьшекьрандьн (Жьмар 11:4-6; 21:5 бьхунә). Паши тәнгасийа мәзьн, гәло әме жи сәва һьнә тьшта әʹщьз бьн? Мәсәлә, әм ньзаньн кӧ чьԛас шьхӧл ԝе һәбә һʹәта кӧ әм әʹрде тʹәмьз кьн у һеди-һеди бькьн щьнәт. Дьԛәԝьмә ԝе гәләк шьхӧл һәбә, у пешийе жийина мә ԝе һʹәвәки чәтьн бә. Гәло әме һьнге сәва тьштед кӧ Йаһоԝа дайә мә, газьна бькьн? Һәгәр әм ньһада бона тьштед кӧ Йаһоԝа дьдә мә рʹази бьн, әԝ йәк ԝе али мә бькә ԝәки әм һьнге жи шекьрдар бьн.

19. Ве готареда дәрсед сәрәкә чь нә?

¹⁹ Сафикьрьнед Йаһоԝа һәр гав рʹаст ьн. Гәрәке әм итʹбарийа хԝә ԝан биньн. Ӧса жи, гәрәке әм итʹбарийа хԝә ԝан кәса биньн, йед кӧ алийе Йаһоԝада һатьнә кʹьфшкьрьне. Ԝәрә әм тʹӧ щар ван готьна бир нәкьн: «Ԛәԝата ԝә ԝе йәкеда нә, ԝәки дьле хԝәда рʹьһʹәтийе хԝәйи кьн у итʹбари бьдьнә кʹьфше» (Ишайа 30:15, ДТʹ).