1. Һәр кәс жь мә гәрәке чь бькә?

ԜӘЙЕ бьхԝәста ләщмәйдана чәтьнда бьрʹәвьйана, илаһи һәрге һун нәхԝәш буна йан жи ԝәстийайи буна? Фәʹмдари йә на. Ле Паԝлосе шанди гот, ԝәки һʹәму Мәсиһийед рʹаст ләщеда ньн (Ибрн. 12:1). Һәрге әм дьхԝазьн хәлата кӧ Йаһоԝа дьдә мә, бьстиньн, фьрԛи тʹӧнә әм щаһьл ьн йан әʹмьрда мәзьн ьн, ԛәԝат ьн йан ԝәстийайи нә, әм гьшк жи гәрәке һʹәта хьлазийе ве ләщеда бь сәбьр бьрʹәвьн (Мәт. 24:13).

2. Ль гора 2 Тимотʹейо 4:7, 8, чьрʹа Паԝлос бь сәрфьнийази тʹәви Мәсиһийа дәрһәԛа ләще хәбәр да?

² Паԝлос хԝәха жи ләщеда «рʹийа хԝә ԛәданд», ләма бь сәрфьнийази Мәсиһийед майин бәрбь ве йәке һелан дькьр. (Бьхунә 2 Тимотʹейо 4:7, 8.) Ле әԝ чь щурʹә ләщ бу, бәʹса кʹижани Паԝлос дькьр?

3. Паԝлос дәрһәԛа чь щурʹә ләще хәбәр дьда?

³ Паԝлос чахе дьхԝәст дәрсед фәрз һин кә, щара жь листькед Йунаньстана бәре мәсәлә дьанин (1 Корн. 9:25-27; 2 Тимтʹ. 2:5). Гәләк щар әԝи жийина Мәсиһийа бәрамбәри рʹәва ләщмәйданеда дькьр (1 Корн. 9:24; Галт. 2:2; Фили. 2:16). Мәрьв чахе хԝә тʹәсмили Йаһоԝа дькә у те ньхӧмандьне, һьнгеда әԝ дәстпедькә ве «ләщеда» бьрʹәвә (1 Пәт. 3:21). Ле әԝ хәза финишерʹа һьнге дәрбаз дьбә, чахе Йаһоԝа ԝи пе жийина һʹәта-һʹәтайе хәлат дькә (Мәт. 25:31-34, 46; 2 Тимтʹ. 4:8).

4. Әме ве готареда дәрһәԛа чь шеԝьр кьн?

⁴ Рʹәва ләщмәйдана дьреж чьда мина жийина Мәсиһити йә? Чәнд тьштада әԝана мина һәв ьн. Ԝәрә әм тʹәне се тьшта шеԝьр кьн. Йа пешьн, әм гәрәке рʹийа рʹаст  бьжберьн, йа дӧда, гәрәке һʹьш-аԛьле хԝә бьдьн сәр финише, у йа сьсийа әм гәрәке бәрдәԝам кьн бьрʹәвьн чахе рʹасти чәтьнайа жи тен.

5. Әм гәрәке кʹижан рʹе бьжберьн, у чьрʹа?

⁵ Сәва рʹәви хәлате бьстиньн, әԝана гәрәке ве рʹеда бьрʹәвьн, кʹижан бона ләще һатийә бьжартьне. Мина ве йәке, һәрге әм дьхԝазьн хәлата жийина һʹәта-һʹәтайе бьстиньн, әм гәрәке рʹийа Мәсиһитида бьрʹәвьн, демәк сәр рʹийа жийине (Кʹар. Шанд. 20:24; 1 Пәт. 2:21). Ле Мире-щьн у пьштгьред ԝи дьхԝазьн әм рʹекә дьн бьжберьн, әԝана дьхԝазьн әм тʹәви ԝан рʹийа ԝанда бьрʹәвьн (1 Пәт. 4:4). Әԝана ԛәрфе хԝә ве рʹе дькьн, йа кӧ мә бьжартийә, у дьбежьн, ԝәки рʹийа ԝан жь йа мә четьр ә, чьмки азайе дьдә. Ле әԝ йәк дәрәԝ ә (2 Пәт. 2:19).

6. Һун жь сәрһатийа Браин чь пеһʹәсьйан?

⁶ Һәр кәсед кӧ тʹәви ԝан дьрʹәвьн, йед кӧ дьнйа Мире-щьнда ньн, ԝе зутьрәке тедәрхьн, ԝәки әԝ рʹийа кӧ ԝана бьжартийә, нә кӧ азайе дьдә, ле ԝана дькә хӧлам (Рʹом. 6:16). Дина хԝә бьдьнә мәсәла Браин. Де-баве ԝи әԝ ширәт дькьрьн, ԝәки рʹийа Мәсиһити бьжберә, ле әԝ щаһьлтийеда кʹәтә шьке, кӧ әв рʹе ԝе ԝи бәхтәԝар нәкә. Браин сафи кьр тʹәви ԝан бьрʹәвә, йед кӧ пе принсипед Шәйтʹан дьжин. Әԝ гьли дькә: «Мьн нә жи баԝәр дькьр, ԝәки әԝ азайа кӧ мьн дьхԝәст, ԝе мьн бәрбь тьштед ӧса хьраб бьвә, кʹижанава әз һатьмә гьредане. Ԝәʹдә шунда, мьн наркотика дьда хәбате, һини ичʹке бум, у мьн бенамуси дькьр. Паши чәнд сала, ида мьн дәстпекьр наркотикед ԛайим бьдьмә хәбате, у әз бумә хӧламе ԝан тьшта. . . . Сәва бь ви әʹмьри бьжита, мьн дәстпекьр наркотика бьфьрошьм». Ахьрийеда Браин хԝәрʹа нет дани, ԝәки пе принсипед Йаһоԝа бьжи. Әԝи рʹийа хԝә гӧһаст у сала 2001-да һатә ньхӧмандьне. Әԝ ньһа бь рʹасти бәхтәԝар ә, чьмки рʹийа жийинеда дьрʹәвә. *

7. Ль гора Мәтта 7:13, 14, кʹижан дӧ рʹе пешийа мә нә?

⁷ Чьԛас фәрз ә, ԝәки әм рʹийа рʹаст бьжберьн! Мире-щьна дьхԝазә, ԝәки һәр кәс жь мә «рʹийа тәнгда», кӧ «дьбә бәрбь жьйине», рʹәва хԝә бьдә сәкьнандьне, у дәрбази ве рʹе бә, сәр кʹижани һʹәчʹи зәʹф мәрьв дьчьн. Рʹаст ә әв рʹе дина мәрьва дькʹьшинә, чьмки һеса йә ве рʹерʹа һәрʹьн, ле әԝ «дьбә бәрбь ӧндабуне». (Бьхунә Мәтта 7:13, 14.) Сәва әм сәр рʹийа рʹаст бьминьн у нәкʹәвьнә бәр байе мәрьвед ве  дьнйайе, әм гәрәке итʹбарийа хԝә Йаһоԝа биньн у гӧһ бьдьнә ԝи.

8. Йе кӧ дьрʹәвә, чахе дькʹәвә әԝ чь дькә?

⁸ Йед кӧ ләщмәйданеда дьрʹәвьн, һʹьш-аԛьле хԝә дьдьнә сәр рʹийа кӧ пешийа ԝан ә, сәва нәкʹәвьн. Ле дькарә ӧса бьԛәԝьмә кӧ ньшкева әԝ жь бо рʹәвийе кʹеләка хԝә, бькʹәвә, йан жи ньге ԝи бькʹәвә чʹәʹла. Һәрге жи әԝана дькʹәвьн, диса рʹадьбьн у бәрдәԝам дькьн дьрʹәвьн. Әԝана дина хԝә надьнә ве йәке кӧ чь бу мәʹни ԝәки әԝана кʹәтьн, ле һʹьш-аԛьле хԝә дьдьн сәр хәза финише у хәлате кӧ дьхԝазьн бьстиньн.

9. Һәрге әм бьлькʹӧмьн, әм гәрәке чь бькьн?

⁹ Ләщмәйдана мәда жи әм дькарьн гәләк щар бьлькʹӧмьн чахе хәбәрдан йан кьред хԝәда шашийа дькьн. Йан жи хушк-бьред мә кӧ тʹәви мә дьрʹәвьн, дькарьн шашийед ӧса бькьн кӧ дьле мә бешиньн. Чахе тьштед ӧса дьԛәԝьмьн, әм гәрәке әʹщебмайи нәминьн, чьмки әм гьшк жи гӧнәкʹар ьн, у әм һʹәму жи рʹийа тәнгрʹа дьрʹәвьн. Ләма жи бьхԝазьн нәхԝазьн щара әме «бьньчʹиньнә» һәв. Паԝлос гот, ԝәки щара газьне мә ԝе ль һьндава һәвдӧ һәбә (Колс. 3:13). Дәԝса кӧ әм һʹьш-аԛьле хԝә бьдьнә сәр ве йәке кӧ чь бу мәʹни әм лькʹӧмин, ԝәрә әм һʹьш-аԛьле хԝә бьдьнә сәр хәлата пешийа хԝә. Һәрге жи әм бьлькʹӧмьн, ԝәрә әм диса рʹабьн у рʹәва хԝә бәрдәԝам кьн. Ле һәрге әм һерс кʹәвьн, хәйде дьле хԝәда хԝәй кьн, у нәхԝазьн рʹабьн, әме хәза финишерʹа дәрбаз нәбьн у хәлате нәстиньн. Хенщи ве йәке, әме бьбьнә кәвьре лькʹӧмандьне бәр ньге хушк-бьра, йед кӧ рʹийа жийинеда тʹәви мә дьрʹәвьн.

10. Әм ча дькарьн нәбьнә «кәвьрәк ль бәр ньге» кәсәки?

¹⁰ Диса чь щурʹәйи нәбьнә «кәвьрәк ль бәр ньге» хушк-бьра, әԝ ә кӧ бьһельн әԝана хԝәха сафикьрьна бькьн чаԝа дьхԝазьн, нә кӧ зоре ԝан бькьн, ԝәки мина мә сафикьрьна бькьн (Рʹом. 14:13, 19-21; 1 Корн. 8:9, 13). Ԝи щурʹәйи, әме нәбьнә мина ԝан рʹәвийа ләщмәйданеда, йед кӧ һәврʹа дькʹәвьнә ләще, у һәр кәс хәлате тʹәне хԝәрʹа дьхԝазә. Әԝ рʹәви тʹәне дькʹәвьнә һʹәйра хԝә сәва сәркʹәвьн. Әԝана йед майин дәʹв дьдьн, сәва кӧ пешийа ԝан кʹәвьн. Ле әм мина ԝан рʹәвийа ниньн,  әм һәврʹа накʹәвьнә ләще (Галт. 5:26; 6:4). Нета мә әԝ ә кӧ чьԛас дькарьн али гәләка бькьн, ԝәки тʹәви мә хәза финише дәрбаз бьн, у хәлата жийине бьстиньн. Ләма жи әм ширәта Паԝлос тиньн сери, кӧ «тʹәне ль кʹара хԝә нәгәрʹьн, ле . . . ль кʹара һәвале хԝә жи» (Фили. 2:4).

11. Йе рʹәви һʹьш-аԛьле хԝә дьдә сәр чь, у чьрʹа?

¹¹ Хенщи ве йәке, чахе рʹәви рʹийа пешийа хԝә дьньһерʹьн, әԝана һʹьш-аԛьле дьдьнә сәр хәза финише. Һәрге жи чʹәʹве ԝан хәза финише навинә, әԝана дьдьнә бәр чʹәʹве хԝә, кӧ ча хәза финише дәрбаз дьбьн у хәлате дьстиньн. Әԝана чахе тʹьме сәр ве йәке дьфькьрьн, ԛәԝате дьстиньн у бәрдәԝам дькьн дьрʹәвьн.

12. Йаһоԝа жь һʹьзкьрьне чь соз дьдә мә?

¹² Йаһоԝа жь һʹьзкьрьне соз дьдә, ԝәки хьлазийа рʹәва ләщмәйдана мә, ԝе хәлате бьдә мә, демәк жийина һʹәта-һʹәтайе, сәр әʹзмана йан жи щьнәтеда сәр әʹрде. Кʹьтеба Пироз әве хәлате мәрʹа зәлал әʹйан дькә, сәва әм бькарьбьн бьдьнә бәр чʹәʹве хԝә, кӧ жийина мә ахьрийеда ԝе чьԛас хԝәш бә. Һәрге һевийа мә һʹьш у дьле мәда тʹьме сах бьминә, әме нәһельн, ԝәки тьштәк мә ӧса бьлькʹӧминә, кӧ әм нькарьбьн рʹабьн.

13. Әм чьда жь рʹәвийед листькада щӧдә дьбьн?

¹³ Листькед Йунанида йед дьрʹәвийан гәрәке бәр чәтьнайа тәйах кьрана, мәсәлә әԝана дьԝәстийан у еш дькʹьшандьн. Һьнге ԝана һевийа хԝә дьда тʹәне сәр ве йәке, чь кӧ һин бьбун у сәр ԛәԝата хԝә. Әм жи мина ԝан рʹәвийа тенә һинкьрьне, кӧ ча ләщмәйданеда бьрʹәвьн. Ле дәрәща мә жь йа ԝана щӧдә дьбә ве йәкеда, кӧ әм дькарьн ԛәԝате жь Йаһоԝа бьстиньн, у синоре ԛәԝата ԝи тʹӧнә. Йаһоԝа соз дьдә, кӧ һәрге әм итʹбарийа хԝә ԝи биньн, әԝ ԝе мә нә кӧ тʹәне һин кә, ле ӧса жи ԛәԝи кә! (1 Пәт. 5:10)

14. Чахе әм рʹасти чәтьнайа тен, рʹезед жь 2 Корьнтʹи 12:9, 10, ча дькарьн али мә бькьн?

¹⁴ Чәтьнайед Паԝлос гәләк бун. Хенщи кӧ гәләка әԝ беһӧрмәт дькьрьн у пәй ԝи дькʹәтьн, әԝ ӧса жи щара сьст дьбу, у дьчәрчьри жь бо «стьрийәк» ль бәдәна хԝәда (2 Корн. 12:7, ИМ). Ле әԝ чәтьнайи бона ԝи нәдьбун сәбәб кӧ әԝ бькʹәвә, дәԝсе әԝи сәр ван чәтьнайа дьньһерʹи ча мәщал, кӧ дәсте Йаһоԝа бьвинә. (Бьхунә 2 Корьнтʹи 12:9, 10.) Жь бо ве ньһерʹандьна ԝи, Йаһоԝа али ԝи кьр, кӧ һʹәму щерʹьбандьнед хԝәда тәйах кә.

15. Һәрге әм чʹәʹв бьдьнә Паԝлос, әме чь бьвиньн?

¹⁵ Бона баԝәрийа мә, щара мә жи беһӧрмәт дькьн у пәй мә дькʹәвьн. Әм ӧса жи дьбәкә жь бо сьһʹәт-ԛәԝата хьраб дьчәрчьрьн, у бетʹаԛәт дьбьн. Ле һәрге әм чʹәʹв бьдьнә Паԝлос, әв чәтьнайи ԝе мәрʹа бьбьн мәщал, сәва дәсте Йаһоԝа бьвиньн, кӧ әԝ ԝе ча бь һʹьзкьрьн али мә бькә.

16. Һәрге жи һун сьһʹәт-ԛәԝатеда сьст ьн, йәкә һун чь дькарьн бькьн?

¹⁶ Дьбәкә һун нәхԝәше нав щи-ньвина нә, йан жи сәԛәт ьн. Йан дьԛәԝьмә чокед ԝә сьст ьн, йан чʹәʹвада бәләнгаз ьн. Һәрге ӧса нә, гәло һун дькарьн тʹәви щаһьла у тʹәви йед кӧ сьһʹәт-ԛәԝат ьн, бьрʹәвьн? Бәле, дькарьн! Гәләк хушк-бьред әʹмьрда мәзьн у йед бетʹаԛәт рʹийа жийинеда дьрʹәвьн, ле нә пе ԛәԝата хԝә. Әԝана ԛәԝате жь Йаһоԝа дьстиньн бь ве йәке, кӧ пе тʹеле гӧһ дьдьнә щьвата йан жи пе видео стриминге дьньһерʹьн. У әԝана хьзмәт дькьн бь ве йәке, кӧ шәʹдәтийе дьдьнә һʹәкима, бәрдәстийед һʹәкима у мәрьвед хԝәйи незик.

17. Йаһоԝа ча нә һьндава ԝан, йед кӧ сьһʹәт-ԛәԝатеда сьст ьн?

¹⁷ Һәрге һун бона Йаһоԝа нькарьн һаԛаси  бькьн чьԛас дьхԝазьн, дьлшкәсти нәбьн у нәфькьрьн ԝәки һуне нькарьбьн һʹәта хьлазийе рʹийа жийинеда бьрʹәвьн. Йаһоԝа ԝә һʹьз дькә бона баԝәрийа ԝә һьндава ԝи у бона һʹәму кьред ԝә, кӧ һун нава гәләк салада бона ԝи дькьн. Ԝәрʹа илаһи ньһа аликʹарийа ԝи лазьм ә, у әԝ ԝе тʹӧ щар ԝә нәһелә (Зәб. 9:10). Ле дәԝсе әԝ ԝе дьһа незики ԝә бә. Дина хԝә бьдьн мәсәла хушкәке йа кӧ сьһʹәт-ԛәԝатеда сьст ә. Әԝ дьбежә: «Сьһʹәт-ԛәԝата мьн һе хьраб у хьраб дьбә, ләма жи әз ида һаԛас мәрьва навиньм сәва ԝанрʹа шәʹдәтийе бьдьм. Ле әз заньм кӧ һәла һе щәфед мьни бьчʹук жи дьле Йаһоԝа ша дькьн, у әз хԝәха жи шабуне дьстиньм». Чахе һун дьлтәнг ьн, бир нәкьн кӧ һун тʹәне ниньн. Бьфькьрьн сәр мәсәла Паԝлос, у биньн бира хԝә ԝан гьлийед ԝи кӧ дьлбинийе дьдьнә мә: «Әз . . . сьстийа . . . бәгәм дькьм, чьмки гава әз сьст дьбьм, һьнге ԛәԝат дьбьм» (2 Корн. 12:10).

18. Илаһи чәтьнайа кʹижан мәрьва гьран ә?

¹⁸ Һьнәк жи йед кӧ рʹийа жийинеда дьрʹәвьн, рʹасти чәтьнайед майин тен. Проблемед ԝан, мәрьварʹа найенә кʹьфше у ләма мәрьв ԝана фәʹм накьн. Мәсәлә, депресийа ԝан һәйә, йан жи тʹьме бинтәнг у нәрʹьһʹәт ьн. Илаһи һʹале ван хьзмәткʹаред Йаһоԝа чәтьн ә. Чьрʹа? Чьмки чахе кәсәк мьле хԝә дьшкенә йан жи сәԛәт ә, әв проблема ԝи гьшк дьвиньн, у жь дьлшәԝатийе дьхԝазьн али ԝи бькьн. Ле сәр ԝан, йед кӧ емосйалида сьст ьн йан жи депресийа ԝан һәйә, найе кʹьфше кӧ әԝана дьчәрчьрьн. Бь рʹасти әԝана жи дәрәща чәтьнда ньн чаԝа йе мьлшкәсти, ле әԝана ԝәкә ԝи дьлбинийе у һʹьзкьрьне настиньн, чьмки сәр ԝан найе кʹьфше, кӧ әԝана һʹәԝще аликʹарийе нә.

19. Әм жь сәрһатийа Мәфибошәт чь һин дьбьн?

¹⁹ Һәрге сьһʹәт-ԛәԝата ԝә хьраб ә у һун нькарьн һаԛас бона Йаһоԝа бькьн чьԛас дьхԝазьн, у дьфькьрьн кӧ тʹӧ кәс ԝә фәʹм накә, сәрһатийа Мәфибошәт дькарә дьлбинийе бьдә ԝә (2 Сам. 4:4). Бьдьнә бәр чʹәʹве хԝә, дәрде ԝи бәси ԝи нибу кӧ әԝ сәԛәт бу, сәрда жи Даԝьд Пʹадша нәһәԛи ԝи кьр. Мәфибошәт нәһәԛ нибу ве йәкеда чь кӧ һатә сәре ԝи. Ле әԝи изьн нәда, ԝәки әв чәтьнайи ԝи бькьн зӧлм. Әԝ әʹмьре хԝәда рʹази бу бона тьштед ԛәнщ, у ԛәнщийа кӧ Даԝьд бәре һьндава ԝида кьрьбу, әԝи дьшекьранд (2 Сам. 9:6-10). Чахе Даԝьд һьндава ԝида нәһәԛи кьр, әԝи һәр тьшт һьлда һʹәсаб. Ләма әԝ жь бо шашийа Даԝьд һерс нәкʹәт. У әԝи нә жи Йаһоԝа нәһәԛ дькьр, кӧ чьрʹа Даԝьд ӧса сәре ԝи кьр. Мәфибошәт дькʹәтә һʹәйра пʹадша, демәк бьжартийе Йаһоԝа, у дьфькьри кӧ ча әԝ  дькарә али ԝи бькә (2 Сам. 16:1-4; 19:24-30). Йаһоԝа рʹебәри кьр, ԝәки сәрһатийа Мәфибошәт бона кʹара мә Хәбәра Ԝида бе ньвисаре (Рʹом. 15:4).

20. Проблемед алийе емосйалида ча сәр һьнәка һʹӧкӧм дьбьн, ле әԝана гәрәке чьда дӧдьли нәбьн?

²⁰ Һьнә хушк-бьред мә, йед кӧ емосйалида һʹаләки гьранда ньн, чахе жийина һәррʹожида тʹәви мәрьва нә, тʹәвһәв дьбьн у нәрʹьһʹәт ьн. Ԝанрʹа чәтьн ә һәрʹьнә ԝан щийа, кʹидәре гәләк мәрьв ьн, ле йәкә әԝана диса жи тенә щьвата у щьватед мәзьн. Ԝанрʹа нәһеса йә тʹәви мәрьвед нәнас бькʹәвьнә хәбәрдане, ле йәкә әԝана хьзмәтийеда тʹәви мәрьва хәбәр дьдьн, демәк шәʹдәтийе дьдьн. Һәрге тӧ жи ԝи һʹалида ни, бир нәкә тӧ тʹәне нини, чьмки гәләк хушк-бьра жи һʹаләки ӧсада ньн. Дӧдьли нәбә, дьле Йаһоԝа ша дьбә, кӧ тӧ чьԛас дькари бь дьл у щан жерʹа хьзмәт дьки. Әԝ йәк кӧ тӧ жь бо ԝан проблема нәшкәсти, избат дькә ԝәки Йаһоԝа тә кʹәрәм дькә у ԛәԝате дьдә тә * (Фили. 4:6, 7; 1 Пәт. 5:7). Һәрге сьһʹәт-ԛәԝата тәйә физики йан емосйали хьраб ә, у тӧ бәрдәԝам дьки Йаһоԝарʹа хьзмәт дьки, баԝәр бә ԝәки Йаһоԝа жь тә рʹази йә.

21. Пе аликʹарийа Йаһоԝа әм чь дькарьн бькьн?

²¹ Чьԛас баш ә, ԝәки әв ләщ дәрһәԛа кʹижани Паԝлос гот, щӧдә дьбә жь ләща бәре. Бәре ләща рʹәведа тʹәне мәрьвәк сәрдькʹәт у хәлат дьстанд. Ле ләща жийина Мәсиһитида һәр кәсе кӧ һʹәта хьлазийе амьн бьминә, ԝе хәлата жийина һʹәта-һʹәтайе бьстинә (Йуһʹн. 3:16). Ләщмәйданеда рʹәви гәрәке сьһʹәт-ԛәԝат буна, йан на ԝе сәрнәкʹәтана, ле ләща мәда, фьрԛи тʹӧнә сьһʹәт-ԛәԝата мә баш ә йан на, йәкә әм бәрдәԝам дькьн дьрʹәвьн (2 Корн. 4:16). Пе аликʹарийа Йаһоԝа әм гьшк жи дькарьн һʹәта финише бьрʹәвьн!