«Ԝе тʹәхтәк ль әʹзмен һәбу у йәк ль сәр тʹәхт рʹуньшти бу. У шәԝԛа диндара йе рʹуньшти мина йа кәвьре йаспис у сардийон бу. У кʹәскәсоре жи дора тʹәхт гьртьбу, мина ишьԛа зьмруде» (Әʹйанти 4:2, 3).

«Хӧйабуна ԝи дитьм кӧ ԝәк агьр бу у дора ԝи шәԝԛ дьда. Рʹожа баране кʹәскәсор дь әԝрада чаԝа йә, бьрьԛандьна шәԝԛе жи ӧса бу. Әв бу тьштәки ԝәк хӧйабуна бьльндайа Хԝәде» (Һәзәԛел 1:27, 28, ДТʹ).

Әԝ хәԝьн-хәйалед кӧ Йуһʹәннайе шанди у Һәзәԛел пʹехәмбәр дитьн, у ӧса жи һьнә тьшт, мәсәлә шәԝԛдайин, кәвьред ԛимәт, кʹәскәсор у бәдәԝийа тʹәхте ԝи, мәрʹа һеса дькьн бьдьнә бәр чʹәʹве хԝә һьмзорийа Йаһоԝа Хԝәде. Әԝана мәрʹа әʹйан дькьн кӧ щийе Йаһоԝа, щики бәдәԝ, рʹьһʹәт у бь әʹдьлайе тʹьжә йә.

Әԝ шьроԝәкьрьна дәрһәԛа Хԝәде, анәгори гьлийе зәбурбеж ьн, йе кӧ ньвиси: «Жь бәр кʹӧ Йаһоԝа мәзьн ә у пʹьр шайани [һежайи] пәснайан ә. У жь тʹәваһийа хӧданен дьн зедәтьр бь тьрсәһез ә. Жь бәр кʹӧ тʹәваһийа хӧданен гәлан [щьмәʹта] . . . тʹәне, пʹутен беԛимәт ьн; ле Йаһоԝа, әʹзман әʹфьрандьнә. Рәԝнаԛи у бьльндаһи ль бәр рʹуйе ԝи нә; һез у бәдәԝи дь Пʹарьстгәһа ԝийә Пирозда нә» (Зәбур 96:4-6, ДО).

Рʹаст ә Йаһоԝа йәки Һьмзор ә, ле йәкә әԝ мә тʹәглиф дькә бь дӧа незики ԝи бьн у һьм жи мә дьдә баԝәркьрьне, кӧ әԝ гӧһ дьдә дӧайед мә (Зәбур 65:2). Хԝәде һаԛас мә һʹьз дькә у бона мә хәм дькә, кӧ Йуһʹәннайе шанди бь баԝәрбунәкә мәзьн ньвиси: «Хԝәде һʹьзкьрьн ә» (1 Йуһʹәнна 4:8).

«[Стәйфане шанди] бь Рʹӧһʹе Пироз тʹьжи бәре хԝә әʹзменда кьр, рʹумәта Хԝәде у Иса ль мьле Хԝәдейи рʹасте сәкьни дит у гот: ‹Ва йә әз әʹзмана вәбуйи дьбиньм у Кӧрʹе Инсан ль мьле Хԝәдейи рʹасте сәкьни!›» (Кʹаред Шандийа 7:55, 56).

Пешийа кӧ Стәйфан әв хәйал бьдита, әԝи тʹәви сәрԝеред Щьһуйа хәбәр дьда, йед кӧ Иса кӧштьн. Жь ве дитьноке зәлал бу, кӧ Иса һатә сахкьрьне у рʹумәткьрьне. Дәрһәԛа ве йәке Паԝлосе шанди ӧса ньвиси: «Әԝ [Йаһоԝа] жь нава мьрийа [Иса]  рʹакьр у ль дийаре әʹзмана кʹеләка хԝәйә рʹасте да рʹуньштандьне, әԝ дани сәр һʹәму сәрԝертийа, һʹӧкӧмәтийа, ԛәԝата, хӧдантийа у ӧса жи сәр һʹәму навед кӧ тенә һьлдане, нә кӧ тʹәне ль ве дьне, ле ԝе дьне жи» (Әфәси 1:20, 21).

Ньвисаред Пироз дьдьнә кʹьфше кӧ Иса мина Йаһоԝа бона мәрийа гәләк хәм дькә у ԝана һʹьз дькә. Чахе Иса ль сәр әʹрде бу, әԝи йед нәхԝәш ԛәнщ дькьр у һәла һе мьри жи сах дькьрьн. Әԝ йәк кӧ Иса жийина хԝә кьрә ԛӧрбан, әʹйан дькә һʹьзкьрьна ԝийә мәзьн һьндава Хԝәде у инсанәте (Әфәси 2:4, 5). Ньһа Иса ль әʹзмана йә у ль мьле Хԝәдейи рʹасте сәкьнийә, у зутьрәке әԝе һʹӧкӧмдарийа хԝә у һьм жи гәләк кʹәрәма бинә сәр әʹрде.

Данийел пʹехәмбәр дьбежә: «Һʹәта кӧ тʹәхт һатьн авакьрьн у һʹәта кӧ йе рʹожен ԝи кәвьн ьн [Йаһоԝа] рʹуньшт ньһертьм. . . . Бь һʹәзаран һʹәзар жерʹа хьзмәте дькьрьн у бь дәһ һʹәзаран дәһ һʹәзар ль бәр ль сәр льнган дьсәкьнин» (Данийел 7:9, 10).

Дь ве хәԝн-хәйалед хԝәда Данийел нә кӧ тʹәне мьлийакʹәтәк дитьбу, ле бь һәзар у һʹәзара. Бь рʹасти жи әв дитьнокәкә чьԛас ԛайим ә! Мьлйакʹәт кәсед рʹӧһʹани нә у әԝана һьм аԛьл ьн, һьм жи ԛәԝи нә. Нав ԝанда һәнә мьлийакʹәтед сәраф у херуб. Дь Кʹьтеба Пирозда дәрһәԛа мьлийакʹәта 250 щара зедәтьр те готьне.

Мьлийакʹәт мәрьв ниньн, йед кӧ бәре ль сәр әʹрде дьжитьн у пәй мьрьнерʹа бунә мьлийакʹәт. Хԝәде, әԝана һе пешийа мәрьва әʹфьрандьбун. Ԝәʹде әʹфьрандьна әʹрде, мьлийакʹәт жи бәр Хԝәде бун, дьньһерʹин кӧ чаԝа әԝи һʹәму тьшт чедькьр, у ԝана бь шабун банг дькьр (Ибо 38:4-7).

Мьлийакʹәт Хԝәдерʹа хьзмәт дькьн бь ԝе йәке, кӧ кʹар дькьн шьхӧләкә лапә фәрзда, чь кӧ ньһа ль сәр әʹрде те кьрьне. Әв һәйә шьхӧле бәлакьрьна мьзгинийа хере дәрһәԛа Пʹадшатийа Хԝәде (Мәтта 24:14). Жь хәйала Йуһʹәннайе шанди әв йәк рʹьнд те кʹьфше. Әԝ дьбежә: «Мьн дина хԝә дайе, ва мьлйакʹәтәки дьн кӧ әʹзменда дьфьрʹи у Мьзгинийа ԝийә һʹәта-һʹәтайе һәбу, ԝәки ԝе Мьзгинийе бьдә йед рʹубари дьне, аԝа готи һʹәму мьләта, бәрәка, зьмана у щьмәʹта» (Әʹйанти 14:6). Рʹаст ә  ньһа мьлйакʹәт мәрийарʹа хәбәр надьн, чаԝа кӧ ԝана бәре дькьр, ле әԝана диса жи аликʹари у рʹебәрийе дьдьнә мәрьвед дьлсоз, йед кӧ мьзгинийа хере бәла дькьн.

«Һьнге ль әʹзмен шәрʹ дәст пе бу. Мьхайил мьлйакʹәтед хԝәва тʹәви зийе шәрʹ кьр, зийе жи мьлйакʹәтед хԝәва тʹәви ԝан шәрʹ кьр. Ле зийе да дәр, әʹзменда жи иди щи дәст ԝан нәкʹәт, әԝ зийайе мәзьн жорда һатә авитьне. Әва әԝ мәʹре бәре бу, кӧ жерʹа Мирещьн у Шәйтʹан дьбежьн, йе кӧ тʹәмамийа дьне хальфандийә. Әԝ мьлйакʹәтед хԝәва жорда һатьнә авитьне сәр рʹуйе әʹрде» (Әʹйанти 12:7-9).

Ль сәр әʹзмана тʹьме әʹдьлайи нибу. Дәстпека тʹәрихийа инсанәте, мьлйакʹәтәки хԝәст кӧ мәрьв ԝи бьһʹәбиньн. Ләма әԝ мьԛабьли Хԝәде рʹабу у бу Шәйтʹан, чь кӧ те һʹәсабе «Дьжмьн». Һьнә ԝәʹдә шунда мьлйакʹәтед дьн жи тʹәви ԝи бунә йәк у ӧса бунә щьн. Әԝана гәләк зӧлм ьн у һьмбәри Йаһоԝа рʹадьбьн. Хенщи ԝе йәке әԝана гәләк мәрийа дьхәльфиньн, сәва кӧ мәрьв жь рʹийа Йаһоԝа Хԝәде дуркʹәвьн.

Шәйтʹан щьнед хԝәва гәләк хьраб у зӧлм ьн. Әԝана дьжмьнед мәрийа нә у сәбәбе чәрчьрандьна ԝан ьн. Соз мәсәлә, Шәйтʹан кәрийед пәзе Ибо у хӧламед ԝи кӧштьн. Паше әԝи баки мәзьн рʹакьр у ԝеран кьр әԝ мал, кʹидәре кӧ зарʹед Ибо щьвийа бун. Ӧса әԝи зарʹед Ибо жи кӧшт. Пәйрʹа Шәйтʹан ӧса кьр, кӧ Ибо «жь пәнийа льнга, һʹәта сәри» ԛӧнеред хьрабва нәхԝәш кʹәт (Ибо 1:7-19; 2:7).

Зутьрәке Шәйтʹан ԝе бе кʹӧтакьрьне. Жь ԝи ԝәʹдәйи чахе кӧ әԝ һатә авитьне ль сәр әʹрде, әԝ занә кӧ «ԝе һьндьки бьминә» (Әʹйанти 12:12). Кʹӧтасийа Шәйтʹан ида бәр шемике йә у әв мьзгинийа баш ә!

«Тә [Иса] мәрьв жь һәр бәрәке, жь һәр зьмани, жь һәр щьмәʹте у жь һәр мьләти кʹьрʹин бона Хԝәде, тә әԝ кьрьн пʹадшатийа кʹаһина бона хьзмәткʹарийа Хԝәде у әԝе ль сәр дьнйайе пʹадшатийе бькьн» (Әʹйанти 5:9, 10).

Анәгори ԝе йәке чаԝа кӧ Иса жь әʹрде һатә сахкьрьне у чу ль әʹзмен, тʹәви йед дьнена жи ԝе ӧса бә. Иса готә шагьртед хԝәйи амьн: «Әз ньһа дьчьм ԝәрʹа щи һазьр кьм». Сәрда жи зедә кьр: «Әзе диса бем у ԝә бьбьмә щәм хԝә, ԝәки әз ль кʹӧ бьм, һун жи ль ԝе дәре бьн» (Йуһʹәнна 14:2, 3).

 Мәʹни һәйә, кӧ чьма һьнәк ԝе һәрʹьнә ль әʹзман. Әԝана тʹәви Иса дькʹәвьнә Пʹадшатийа Хԝәде, йе кӧ ԝе һʹәта-һʹәтайе сәр тʹәмамийа әʹрдерʹа сәрԝертийе бькә у гәләк кʹәрәма жи бьбаринә. Әв әԝ Пʹадшати йә, дәрһәԛа кʹижани кӧ Иса готә шагьртед хԝә, ԝәки әԝана дӧайед хԝәда бежьн: «Баве мәйи әʹзмана! Наве тә пироз бә. Пʹадшатийа тә бе, әʹмьре тә бә, чаԝа ль әʹзмен, ӧса жи ль сәр әʹрде» (Мәтта 6:9, 10).

«Мьн жь тʹәхт дәнгәки бьльнд бьһист кӧ дьгот: ‹Ва коне Хԝәде нава мәрьвада йә. Әԝе жь чʹәʹвед ԝан һʹәму һесьред ԝан паԛьж кә у иди мьрьне тʹӧнәбә, нә шин, нә гьри, нә еш-ешук, чьмки тьштед бәре дәрбаз бун›» (Әʹйанти 21:3, 4).

Әв дитьнок дина мә дьдә ль сәр ԝи ԝәʹдәйи чахе Пʹадшатийа Хԝәде бьн сәрԝертийа Иса у мәрьвед дьн кӧ ԝе һәʹрьнә ль әʹзман, ԝе кʹӧтасийа сәрԝертийа Шәйтʹан биньн у әʹрде бькьнә щьнәʹт. Тьштед кӧ иро дьбьнә сәбәбед еш у шина мәрийа, ԝе ида тʹӧнә бьн. Һәла һе мьрьн жи ԝе тʹӧнә бә.

Ле чь әм дькарьн бежьн дәрһәԛа ԝан һʹәму мәрийа, йед кӧ мьрьн ә у ԝе нә сәва әʹзмана бенә сахкьрьне? Ль ахьрийе, әԝана ԝе бенә сахкьрьне, сәва кӧ һәрһәйи ль сәр әʹрде щьнәʹте бьжин (Луԛа 23:43).