ӘЗ МӘЗЬН бумә Гратседа, (Австрйа). Чахе әз һʹәфт сали бум, мьн шандьнә мәкʹтәбе, кʹижанеда бона хьзмәтийа дереда һин дькьрьн. Ле әз әʹщебмайи мам чахе мьн ԝедәре ортʹа кʹәшиша у хьзмәткʹаред дереда бенамуси дит. Дийа мьн нава саләкеда әз жь ве мәкʹтәбе дәрхьстьм.

Паше әз чумә мәкʹтәбәкә дьн, кʹидәре кӧ зарʹ шәв ԝедәре дьман. Щарәке еваре, баве мьн ләзә-ләз һатә мәкʹтәбе, сәва зу мьн дәрхә у бьвә сьтʹаргәһәке, чьмки бомба давитьнә сәр шәһәре мә Гратсе. Һәма чаԝа кӧ әм сәр пʹьрерʹа дәрбаз бун, әв пʹьра дәрберʹа тʹәԛандьн. Мә щи-сьтʹар шәһәре Шладмингеда дит. Щарәкә жи ӧса ԛәԝьми кӧ тәйар ньмьз дьфьрʹийан, у һʹәйата мәда гӧлә бәрʹдан мьн у пирька мьн. Чахе шәрʹ хьлаз бу, әшкәрә бу ԝәки тʹалаша дере у дәԝләте әм ниньн.

Сала 1950, Шәʹдәки Йаһоԝа дийа мьнрʹа мьзгинийа жь Кʹьтеба Пироз гьли кьр. Мьн гӧһ дьда хәбәрдана ԝан у һәла һе жи тʹәви дийа хԝә дьчумә щьвате. Дийа мьн баԝәр кьр ԝәки рʹасти бал Шәʹдед Йаһоԝа йә, у сала 1952 әԝ һатә ньхӧмандьне.

Һьнге әв щьвата кӧ әм дьчун, бона мьн ча бежи щьвина пирька бу. Ле паше чахе әм чунә щьватәкә дьн, ԝедәре тʹьжә щаһьл бун, у әԝ ида бона мьн щьвина пирька нибу. Чахе әм вәгәрʹийанә Гратсе, мьн дәстпекьр бемә сәр һʹәму щьвата, у зутьрәке әз жи ида дӧдьли нибум кӧ мьн рʹасти дитийә. Әз ӧса жи пеһʹәсийам, ԝәки Йаһоԝа һәйә Хԝәдайе рʹаст, у пьштоване амьн бона хьзмәткʹаред хԝә. Чахе ԝәʹде чәтьнда әм дьфькьрьн кӧ тʹәне манә, әԝ тʹьме кʹеләка мә йә у али мә дькә (Зәб. 3:5, 6).

Мьн дьхԝәст мәрьвед дьнрʹа дәрһәԛа рʹастийе гьли кьм. Пешийе мьн дәстпекьр хушк-бьре хԝәрʹа бежьм. Чар хушкед мьнә мәзьн, йед кӧ ида малда нәдьжитьн, ча  дәрсдар дьхәбьтин. Мьн тʹьме тʹәсәлийа ԝан дькьр щурʹә-щурʹә гӧндада кʹидәре әԝана дьман, у мьн әԝана һелан дькьрьн, ԝәки һинбуна Кʹьтеба Пироз дәстпекьн. Ахьрийеда, һʹәму хушкед мьн у бьре мьн бунә Шәʹдед Йаһоԝа.

Мәһа Нисане сала 1954, мьн хԝә тʹәсмили Йаһоԝа кьр у һатьмә ньхӧмандьне. Ча мьн дәстпекьр мал бь мал хьзмәт кьм, һʹәфтийа дӧда әз рʹасти жьнькәке һатьм, кӧ ԝәкә 30 сали бу, у мьн тʹәви ԝе һинбуна Кʹьтеба Пироз дәстпекьр. Ԝәʹдә шунда әԝ һатә ньхӧмандьне, у паше мере ԝе у ӧса жи дӧ кӧрʹед ԝе. Әԝе һинбуне гәләк баԝәрийа мьн ԛәԝи кьр. Чьрʹа? Чьмки бона һинбуне мьн хԝә рʹьнд һазьр дькьр, тʹӧ кәси тʹәви мьн һинбуна Кʹьтеба Пироз дәрбаз нәкьрьбу. Бь рʹасти мьн пешийе хԝәха хԝә һин дькьр, сәва кӧ паше ида бькарьбьм йед дьн һин кьм! Ԝи щурʹәйи мьн рʹасти һе зәʹф фәʹм кьр у ԛимәт кьр.

Сала 1955, әз чумә сәр щьвата мәзьнә һʹәмдьнйайе Алманйайеда, Франсайеда у Инглистанеда. Лондонеда әз рʹасти Алберт Шредер һатьм, кʹижан кӧ һьнге дәрсдаре мәкʹтәба Гиләд бу, ле паше бу әндәме Кʹома Рʹебәрийе. Чахе Мйузейа Британйайеда мәрʹа екскурсийа дәрбаз дькьрьн, Шредер бьра дина мә да сәр һьнә манускриптед Кʹьтеба Пироз. Ԝан манускриптада бь һʹәрфед Ибрани наве Хԝәде ньвисар бу, у әԝи мәрʹа шьровәкьр кӧ әԝ манускрипт чьԛас фәрз ьн. Әԝе йәке гәләк дьле мьн гьрт, әз рʹӧһʹанида шьдандьм у һелан кьрьм, ԝәки һе зедә рʹастийа Хәбәра Хԝәде бәла кьм.

Мьн пешәнгти дәстпекьр 1 Чьләйе, сала 1956. Чар мәһ шунда, әз һатьм тʹәглифкьрьне кӧ Австрйайеда хьзмәт кьм ча пешәнга мәхсус. Һьнге шәһәре Мистелбахеда, кʹидәре әз һатьмә кʹьфшкьрьне, Шәʹдед Йаһоԝа тʹӧнә бун. Ԝедәре чәтьнайикә мьн әԝ бу, кӧ әз у хушкәкә пешәнг кӧ тʹәви мьн дьжит, мина һәв нибун. Әз ԝәкә 19 сали бум у жь шәһәр бум, ле әԝ 25 сали у жь гӧнд бу. Шәбәԛа әз дәрәнг рʹадьбум, ле әԝ зу, еваре әз дәрәнг рʹадьзам, ле әԝ зу рʹадьза. Рʹаст ә әм жь һәв щӧдә дьбун, ле әм тʹьфаԛ бун, чьмки мә ширәтед жь Кʹьтеба Пироз дьда хәбате.

Ле әм рʹасти чәтьнайед дьн жи дьһатьн. Һәла һе пәй мә жи дькʹәтьн, ле йәкә тʹӧ щар әм тʹәне нибун (2 Корн. 4:7-9). Щарәке, чахе мә гӧндәкида мьзгини бәла дькьр, хәлԛе кучʹькед хԝә бәри мә дан. Әԝан кучʹька дора мьн у һәвалхьзмәткʹара мьн гьртьн, дькьрьнә мьрʹә-мьр у дьране хԝә һәв дьхьстьн. Мә дәстед һәвдӧ гьрт, у мьн дӧада Йаһоԝарʹа һәла һе жи гот: «Йаһоԝа, һиви тә дькьм, чахе әԝана бьгьһижьнә мә, бьра әм зу бьмьрьн!». Ле чахе ида гавәк мабу әԝ кучʹьк бьгьһиштана мә, ньшкева сәкьнин, почʹа хԝә ба кьрьн у чун. Һьнге мә тʹәхмин кьр кӧ Йаһоԝа әм хԝәй кьрьн. Паши ве йәке, нав тʹәмамийа ви гӧндида мә хьзмәт кьр, у әм гәләк ша бун кӧ әԝан мәрьва әм баш ԛәбул кьрьн. Дьԛәԝьмә әԝана әʹщебмайи ман кӧ кучʹька зийан нәданә мә, йан жи әʹщебмайи ман кӧ әм нәтьрсийан у мә шьхӧле хԝә бәрдәԝам кьр. Һьнәк жь ԝан мәрьва, ахьрийеда бунә Шәʹдед Йаһоԝа.

 Диса әм рʹасти чәтьнайикә хоф һатьн. Щарәке хԝәйе мале кʹидәре мә дьжит, гәләк ичʹкә вәхԝарьбу. Әԝи әм дьданә тьрсандьне кӧ ԝе мә бькӧжә, у шәрʹ авитә мә йанчь әм щинара әʹщьз дькьн. Жьна ԝи дьхԝәст ԝи бьдә сәкьнандьне, ле әԝ нәдьсәкьни. Әԝ йәк мә жь отʹаха жорьнва дьбьһист. Мә дәрберʹа кʹӧрси да бәр дәре отʹаха хԝә, у зускава дәстпекьр һур-муред хԝә тʹоп кьн. Гава кӧ мә дәри вәкьр, хԝәйе мале ида сәр пʹепәлука жоре бу, у дәсте ԝида кʹерәкә мәзьн бу. Әм пе һур-муред хԝә дәре пьштева дәркʹәтьн у рʹийа бахчәрʹа рʹәвин, у тʹӧ щар вәнәгәрʹийанә ԝедәре.

Әм чунә отеле у мә отʹах хԝәст. Ӧса бу кӧ әм ԝедәре ԝәкә саләке ман, у әԝ йәк бона хьзмәтийа мә баш бу. Чьрʹа? Әв отел сентра шәһәрда бу, у ԝан мәрьварʹа йед кӧ Кʹьтеба Пироз һин дьбун, дәстдьда отʹаха мәда һинбуне дәрбаз бьн. Зутьрәке, мә ида отʹаха мәда щьват дәрбаз дькьрьн, у ԝәкә 15 мәрьв дьһатьн.

Әм саләке зедәтьр Мистелбахеда ман. Паше, әз һатьмә кʹьфшкьрьне кӧ хьзмәт кьм Фелдбахеда, әԝ алийе Гратса башура-рʹоһлате йә. Һәвалхьзмәткʹара мьн ида йәкә дьн бу, у ԝи щийида жи щьват тʹӧнә бу. Мә ханики жь дар ԛәте дӧда, отʹахәкә бьчʹукда дьжит. Диԝаред отʹаха мәда гәләк ԛәлш һәбун, у мә пе кʹахаза әԝ ԛәлш дадьдан сәва сӧр нәкʹәвә отʹахе. Ав мә жь бире һьлдьда. Ле һежа бу кӧ әм ԝедәре ман, чьмки нава чәнд мәһада, кʹомәк саз бу. Ахьрийеда, ԝәкә 30 мәрьв тʹәви кʹе жи мә һинбуна Кʹьтеба Пироз дәрбаз дькьр һатьнә сәр рʹийа рʹастийе!

Әԝ һʹәму ԛәԝьмандьн дьле мә һе зәʹф бь рʹазибуне һьндава Йаһоԝа тʹьжә кьр, чьмки әԝи тʹьме аликʹари дьда ԝан, йед кӧ Пʹадшатийа ԝи дьгәрʹийан. Һәрге жи мәрьв нькарьн али мә бькьн у кʹеләка мә ниньн, Йаһоԝа тʹьме кʹеләка мә йә у һазьр ә али мә бькә (Зәб. 121:1-3).

Сала 1958-да, Нийу Йоркеда сәр стадиона «Йанке» у «Поло Граундс», щьвата мәзьнә һʹәмдьнйайе дәрбаз дьбу. Мьн хԝә пешда да ньвисаре, ԝәки дьхԝазьм һәрʹьм сәр щьвата мәзьн, у филиала Австрйайе жь мьн пьрси кӧ һәла әз дьхԝазьм ԝәки Мәкʹтәба Гиләд дәрбаз  бьм. Мьне ча әв ԛәдьре мәзьн жь дәсте хԝә бәрʹда, мьн дәрберʹа гот: «Әре!».

Гиләдеда, әз кʹеләка Мартин Поетсингер рʹуньштьбум. Әԝ алийе Натсистада гьртигәһеда гәләк чәрчьри. Ԝәʹдә дәрбаз бу, паше әԝ бу әндәме Кʹома Рʹебәрийе. Ԝәʹде һинбуна Гиләдеда, әԝи щара дькьрә пʹьстә-пʹьст: «Ерика, сәр зьмане Алмани әв чь те һʹәсабе?»

Чахе һинбун нивида дәрбаз бу, Нейтан Нор кʹьфшкьрьнед мә әʹлам кьр. Әз Парагӧԝайеда һатьмә кʹьфшкьрьне. Һьнге әз гәләк щаһьл бум, у лазьм бу баве мьн ԛайил бә ԝәки әз дәрбази ԝәлатәки дьн бьм. Гава кӧ баве мьн ԛайил бу, Адареда сала 1959 әз чумә Парагӧԝайе. Әз Асунсйонеда мала бона мисйонерада һатьмә кʹьфшкьрьне, тʹәви һәвалхьзмәткʹара тʹәзә.

Зутьрәке әз рʹасти Ԝолтер Брайт һатьм, йе кӧ мәкʹтәба Гиләд хьлаз кьрьбу у бьбу мисйонер. Ԝәʹдә шунда, мә һәв станд у тʹәвайи рʹасти чәтьнайа дьһатьн. Чахе әм рʹасти тәнгасийа дьһатьн, мә созе Йаһоԝа дьхԝәнд кӧ Ишайа 41:10-да ньвисар ә: «Тӧ нәтьрсә жь бәр кӧ әз бь тәрʹа мә; ль дора хԝә нәньһерʹә, жь бәр кӧ Хԝәдайе тә әз ьм; әзе тә зәхм [хԝәй] бькьм». Әԝ гьли мә ԛәԝи кьрьн кӧ һʹәта әм Хԝәдерʹа амьн дьминьн, у пʹадшатийа ԝи датиньн щийе пешьн, әԝ ԝе тʹӧ щар мә нәһелә.

Ԝәʹдә шунда, әм һатьнә кʹьфшкьрьне незики синоре Бразилйайе. Ԝедәре кʹәшиша нав щаһьла дьдан ԝәки кәвьра бавежьн мала мә, кʹижан кӧ ида һʹаләки хьрабда бу. Паше Ԝолтер тʹәви сәроке полиса һинбуна Кʹьтеба Пироз дәстпекьр. Әԝи сәроки ӧса кьр ԝәки офисеред полисе һʹәфтеки бәр мала мә бьсәкьньн, у паши ве йәке ида тʹӧ кәси әм ащьз нәдькьрьн. Һьнә ԝәʹдә шунда, бәр синоре Бразилйайе әм дәрбази маләкә һе баш бун. Әԝ йәк гәләк баш бу, чьмки мә дькарьбу щьвин дәрбаз кьра һьн Парагӧԝайеда һьн жи Бразилйайеда. Һʹәта әм жь ԝи щийи бьчуна, ԝедәре ида 2 щьватед бьчʹук һәбун.

Һʹәкима мьнрʹа готьн, ԝәки әзе нькарьбьм зарʹа биньм, ле сала 1962 әм әʹщебмайи ман чахе пеһʹәсийан кӧ әз гьран ьм. Ахьрийеда әм дәрбази Һолиԝуде, Флоридайе бун, незики малбәта Ԝолтер. Бь сала, мә тʹәви Ԝолтер нькарьбу ча пешәнг хьзмәт кьра, чьмки әм гәрәке мьԛати нәфәред хԝә буна. Ле йәкә һьнге жи Пʹадшатийа Хԝәде әʹмьре мәда щийе пешьн дьгьрт (Мәт. 6:33).

Сала 1962, мәһа Мьждаре, әм һатьнә Флоридайе. Әм әʹщебмайи ман кӧ щьмәʹта ԝедәре хԝәш найе кӧ хушк-бьред бь чʹәрме рʹәш у чʹәрме сьпи тʹәвайи тʹоп бьн. Әԝан хушк-бьра щурʹә-щурʹә мьһалада хьзмәт дькьрьн. Ле Йаһоԝа тʹӧ щар фьрԛийе накә ортʹа раса, ләма жи ԝәʹдә шунда әԝ щьват бунә йәк. Ве йәкеда әшкәрә дәсте Йаһоԝа дьһатә хане, у ньһа ԝедәре гәләк щьват һәнә.

Йазьх, ле Ԝолтер сала 2015 жь рәԛе мьр. Әԝ малхеки гәләк баш бу, мә тʹәвайи 55 сала жит. Әԝи Йаһоԝа гәләк һʹьз дькьр у али хушк-бьра дькьр. Әз гәләк һивийа ԝи ԝәʹдәйи мә кӧ диса ԝи бьвиньм чахе әԝ жь мьрьне рʹабә (Кʹар. Шанд. 24:15).

Әз бәхтәԝар ьм кӧ 40 сала зедәтьр ча хьзмәткʹара һәртʹьм хьзмәт дькьм, у гәләк шабун у кʹәрәма жи һʹәта ньһа дьвиньм. Мәсәлә, мьн у Ԝолтер пе чʹәʹве хԝә дит кӧ чаԝа 136 мәрьв, тʹәви кʹижана мә һинбуна Кʹьтеба Пироз дәрбаз дькьр, һатьнә ньхӧмандьне. Бәле, мә чәтьнайед гьран жи дит, ле бона ве йәке мә тʹӧ щар хьзмәтийа хԝә Хԝәдайе амьнрʹа нәда сәкьнандьне. Дәԝсе, әм һе незики ԝи дьбун у мә итʹбарийа хԝә ԝи дьани, кӧ әԝ ԝе ԝәʹдәда чәтьнайед мә сафи кә. У тʹьме ӧса жи дьбу (2 Тимтʹ. 4:16, 17).

Әз гәләк бира Ԝолтер дькьм, у хьзмәтийа пешәнгти али мьн дькә сәбьр кьм. Дьле мьн ша дьбә чахе әз мәрьва һин дькьм, илаһи чахе дәрһәԛа рʹабуна мьрийа гьли дькьм. Бь рʹастийе мьн гәләк дәрәщада дьдит, ԝәки Йаһоԝа тʹӧ щар мьн наһелә у нә жи ԝе бьһелә. Әԝ ль гора созе хԝә али мьн дькә, мьн хԝәй дькә у «бь дәсте рʹасте» дәсте мьн дьгьрә (Иша. 41:10).