ӘМ ДЬЖИН дьнйакә гәләк чәтьнда, у ләма әм алийе хԝәда һәр тьшти дькьн, ԝәки дьлрʹьһʹәтийе бьстиньн. Ле чахе әм дьлрʹьһʹәт ьн жи, йәкә әм дьхәбьтьн ԝәки әве әʹдьлайе ӧнда нәкьн. Хԝәде дьбежә, кӧ әм ча дькарьн әʹдьлайа рʹаст у дьреж бьстиньн. Ле гәло әм ча дькарьн ве йәкеда али мәрьвед дьн жи бькьн?

Сәва кӧ әʹдьлайа мә һәбә, лазьм ә әм хԝә бехоф тʹәхмин кьн у дьлрʹьһʹәт бьн. Әм ӧса жи гәрәке бьхәбьтьн ԝәки һәләԛәтийа мә тʹәви мәрьва баш бә. Ле йа лапә фәрз кӧ ча әʹдьлайа дьреж бьстиньн әԝ ә, кӧ бьбьнә достед Йаһоԝайи незик. Ча әм дькарьн ве йәке бькьн?

Чахе әм гӧһ дьдьнә тʹәми у принсипед Йаһоԝа, бь ве йәке әм дьдьнә кʹьфше, ԝәки әм баԝәрийа хԝә ԝи тиньн у дьхԝазьн тʹәви ԝи әʹдьлайеда бьн (Йерәм. 17:7, 8; Аԛуб 2:22, 23). Әԝ жи алийе хԝәда незики мә дьбә, мә кʹәрәм дькә у дьлрʹьһʹәтийе дьдә мә. Ишайа 32:17-да те готьне: «Ԝе кʹаре рʹастийе бьбә сьламәт у ԝе бәра рʹастийе һьшбуна абадин у әԝләбун бә». Бәле, чахе әм бь дьл гӧрʹа Йаһоԝа дькьн, һьнге әм бь рʹасти дьлрʹьһʹәт дьбьн (Иша. 48:18, 19).

Ӧса жи рʹӧһʹе Хԝәдейи пироз, кӧ пʹешкʹеша жь Баве мәйи әʹзмана йә, дькарә әʹдьлайе бьдә мә (Кʹар. Шанд. 9:31).

Паԝлосе шанди чахе һʹӧнӧред бәре рʹӧһʹе пироз рʹез дькә, рʹезеда йа сьсийа әʹдьлайи йә (Галт. 5:22, 23). Бәле, әʹдьлайи бь сайа рʹӧһʹе Хԝәдейи пироз пешда те, ләма жи әм гәрәке бьһельн рʹӧһʹе пироз сәр мә һʹӧкӧм кә. Ԝәрә дӧ дәрәща шеԝьр кьн, кӧ чаԝа рʹӧһʹе Хԝәдейи пироз дькарә али мә бькә.

Йа пешьн, чахе әм һәр рʹож Хәбәра Хԝәде дьхуньн, әԝ йәк али мә дькә кӧ әʹдьлайи дьле  мәда һәбә (Зәб. 1:2, 3). Чахе әм дьфькьрьн сәр хԝәндьна Кʹьтеба Пироз, рʹӧһʹе Хԝәдейи пироз али мә дькә, ԝәки әм ньһерʹандьна Йаһоԝа сәр гәләк тьшта, фәʹм кьн. Мәсәлә, әм педьһʹәсьн кӧ әԝ ча әʹдьлайе хԝәй дькә у чьрʹа бона ԝи әʹдьлайи гәләк фәрз ә. Гава әм дәрсед ԝи щурʹәйи жь Хәбәра Хԝәде һин дьбьн, әм һе зедә әʹдьлайе дьстиньн (Мәтʹлк. 3:1, 2).

Йа дӧда, әм гәрәке дӧа бькьн, ԝәки рʹӧһʹе Хԝәдейи пироз бьстиньн (Луԛа 11:13). Һәрге әм аликʹарийе жь Йаһоԝа дьхԝазьн, әԝ мәрʹа соз дьдә, ԝәки «әʹдьлайийа Хԝәде кӧ жь һәр һʹьш-аԛьли дәрбазтьр ә, ԝе дьл у фькьред [мә] йәктийа Мәсиһ Исада хԝәй кә» (Фили. 4:6, 7). Гава әм тʹьме дӧа дькьн у рʹӧһʹе пироз жь Йаһоԝа дьхԝазьн, Хԝәде дьлрʹьһʹәтийе дьдә мә. Әʹдьлайа ԝи щурʹәйи Йаһоԝа тʹәне дьдә ԝан, йед кӧ достийа тʹәви ԝи ԛимәт дькьн (Рʹом. 15:13).

Ԝәрә әм ньһа чәнд сәрһатийед хушк-бьра шеԝьр кьн, йед кӧ ширәтед жь Кʹьтеба Пироз данә хәбате у нав хԝәда гӧһастьн кьрьнә сәва кӧ дьлрʹьһʹәтийе бьстиньн, ӧса жи тʹәви Йаһоԝа у мәрьва әʹдьлайеда бьн.

Щьвата Мәсиһитида һәнә хушк-бьред ӧса, йед кӧ бәре «һерс» бун, ле ньһа әԝана һьндава мәрьва фәсал, ширьн, бь сәбьр у бь әʹдьлайе бунә * (Мәтʹлк. 29:22). Дина хԝә бьдьнә мәсәла хушкәке у бьраки, йед кӧ һерса хԝә тәмьрандьнә у тʹәви мәрьва әʹдьлайе хԝәй дькьн.

Девид, хәбәрданеда йәки сәрт бу, чьмки ньһерʹандьна ԝи нәрʹаст бу. Пешийа кӧ әԝи хԝә тʹәсмили Хԝәде кьра, әԝи ԛәрф мәрьва дькьр у һьндава нәфәред хԝә хәбәред нәщайиз дьда хәбате. Ԝәʹдә дәрбаз бу Девид фәʹм кьр, ԝәки әԝ гәрәке әви хәйсәте хԝә бьгӧһезә у тʹәви мәрьва әʹдьлайеда бә. Ле гәло чь али ԝи кьр бе гӧһастьне? Әԝ гьли дькә: «Мьн дәстпекьр принсипед Кʹьтеба Пироз биньм сери, у бь сайа ве йәке әз у нәфәред мьн һе ԛәдьре һәв дьгьрьн».

Рейчел, малбәтәкә ӧсада мәзьн буйә кӧ сәр ньһерʹандьна ԝе һʹӧкӧм буйә. Әԝ дьбежә:  «Һәла һе ньһа жи әз сәр хԝә дьхәбьтьм, ԝәки һерса хԝә бьгьрьм, чьмки әз малбәтәкә ӧсада мәзьн бумә, кʹидәреда гьшк һерс бун». Ле гәло чь али ԝе кьр, ԝәки әԝ тʹәви мәрьва әʹдьлайе хԝәй дькә? Әԝ дьбежә: «Мьн тʹьме Йаһоԝарʹа дӧа дькьр у аликʹари жь ԝи дьхԝәст».

Мә тʹәне дӧ мәсәлә шеԝьр кьр, кӧ ча принсипед Кʹьтеба Пироз у ӧса жи дӧакьрьна бона рʹӧһʹе пироз, али мәрьва дькә бь әʹдьлайи бьн. Әшкәрә йә, кӧ рʹаст ә әм ве дьнйа хьрабда дьжин, ле йәкә әм дькарьн дьлрʹьһʹәтийе бьстиньн, кʹижан кӧ баш һʹӧкӧм дькә һьн сәр нәфәред мә, һьн жи сәр хушк-бьра. Йаһоԝа мәрʹа дьбежә, ԝәки әм «тʹәви һʹәму мәрьва әʹдьлайеда бьн» (Рʹом. 12:18). Ле гәло әԝ йәк дьбә, у әме чь кʹаре бьстиньн һәрге тʹәви мәрьва әʹдьлайеда бьн?

Бь сайа хьзмәтийа хԝә, әм мәрьварʹа мьзгинийа Пʹадшатийа Хԝәде бәла дькьн у әԝ мьзгини дькарә әʹдьлайе бьдә ԝан (Иша. 9:6, 7; Мәт. 24:14). Ча баш ә кӧ гәләк мәрьва әв мьзгини ԛәбул кьрьнә. Әԝ мәрьв ида дьлшкәсти ниньн у нә жи һерс дькʹәвьн сәр ве йәке кӧ чь дьԛәԝьмә ве дьнеда. Дәԝсе, әԝана һивийа ахьрийа баш ьн, у алийе хԝәда әʹдьлайе хԝәй дькьн (Зәб. 34:14).

Сәд һʹәйф, нә һʹәму мәрьв перʹа-перʹа мьзгинийа мә ԛәбул дькьн (Йуһʹн. 3:19). Ле рʹӧһʹе Хԝәдейи пироз али мә дькә, ԝәки әве мьзгинийе нәрм у бь ԛәдьр ԝанрʹа гьли кьн. Бь ԝи щурʹәйи әм пәй рʹебәрийа Иса дьчьн, кӧ Мәтта 10:11-13-да ньвисар ә: «Гава һун һәрʹьнә мале, сьлаве бьдьнә ԝе у бежьн: ‹Әʹдьлайи ве малерʹа›. У һәгәр әԝ мал һежа йә, бьра сьлава ԝә ль сәр ԝе бә, ле һәгәр нә һежа йә, бьра сьлава ԝә ль ԝә вәгәрʹә». Чахе әм пәй ширәтед Иса дьчьн, әм дьлрʹьһʹәт дьминьн у щарәкә майин әԝана дькарьн гӧһ бьдьн мьзгинийе.

Ӧса жи чахе әм тʹәви мәрьвед дәԝләте бь ԛәдьр хәбәр дьдьн, әм әʹдьлайе чедькьн тʹәви ԝан, у һәла һе тʹәви ԝан жи, йед кӧ мьԛабьли мә нә. Мәсәлә, сәрԝертийа ԝәлатәки Африкайе изьн нәда, ԝәки әм Одед Щьвата ава кьн, чьмки дәрһәԛа мә нәрʹаст дьфькьрин. Сәва кӧ әве чәтьнайе бь әʹдьлайе сафи кьн, бьраки кӧ бәре ԝи ԝәлатида ча мисйонер хьзмәт дькьр, һатә кʹьфшкьрьне ԝәки Лондонеда тʹәви ԛасьде ԝи ԝәлате Африкайе хәбәр дә. Әԝи гәрәке дәрһәԛа шьхӧле Шәʹдед Йаһоԝа ԝирʹа гьли кьра, кӧ ԝәлате ԝи ԛасьдида те кьрьне. Гәло әԝ рʹастһатьн ча дәрбаз бу?

Әԝ бьра гьли дькә: «Чахе әз кʹәтьмә һӧндӧрʹ, мьн дит ԝәки әԝ ԛизька кӧ мәрьва ԛәбул дькә, кʹьнщед ве бәрәке ле нә, зьмане кʹижани әз һин дьбум. Ләма жи мьн сәр зьмане ԝе жерʹа сьлав да. Әԝ әʹщебмайи ма у жь мьн пьрси: ‹Чьрʹа һун һатьнә ԝьра?› Мьн бь ԛәдьр жерʹа гот, ԝәки әз дьхԝазьм ԛасьд бьвиньм. Әԝе ԝирʹа тʹелехьст, әԝ ԛасьд һат у сәр зьмане ԝи бәрәки мьнрʹа сьлав да. Паши ве йәке, әԝи рʹьнд гӧһ да мьн чахе мьн жерʹа шьровәдькьр дәрһәԛа шьхӧлед Шәʹдед Йаһоԝа, кӧ әʹдьлайе хьраб накьн».

Әви бьрайи ӧса бь ԛәдьр ԝи ԛасьдирʹа шьровәкьр, ԝәки әԝи ԛасьди ньһерʹандьна хԝә гӧһаст у ида сәр шьхӧле мә баш дьньһерʹи. Һьнә ԝәʹдә шунда, сәрԝере ԝи ԝәлате Африкайе изьн да, ԝәки әм Одед Щьвата ава кьн. Рʹасти жи хушк-бьра чьԛас ша бунә кӧ ӧса бь әʹдьлайи әԝ чәтьнайи сафи бу. Бәле, чахе әм һьндава мәрьва бь ԛәдьр ьн, әм гәләк кʹаре у әʹдьлайе дьстиньн.

Иро щьмәʹта Йаһоԝа щьнәта рʹӧһʹанида нә кӧ бь әʹдьлайе тʹьжә йә. Һун жи алийе хԝәда дькарьн әве әʹдьлайе зедә кьн, гава ԝи һʹӧнӧре бәре рʹӧһʹе пироз нав хԝәда пешда биньн у әʹмьре хԝәда бьдьнә хәбате. Ле йа лапә фәрз әԝ ә, кӧ һуне ԛәбулкьрьна Йаһоԝа бьстиньн у дьнйа тʹәзәда һʹәта-һʹәтайе әʹдьлайеда бьн (2 Пәт. 3:13, 14).