ЧАХЕ әз мәкʹтәбеда һин дьбум, шәһәре мәда гәләк тьшт нәһатә гӧһастьне. Ве мәкʹтәбеда, зарʹед кӧ кʹома йәкеда һин дьбун, диса жи әԝан зарʹа тʹәвайи мәкʹтәб хьлаз дькьрьн. Ләма жи ԝи шәһәрида һʹәчʹи зәʹф мәрьва наве һәв заньбун.

Дор бәре шәһәре Либертʹи, кʹарханед бьчʹук һәбун, кʹижан кӧ һʹәчʹи зәʹф гәньме мьсьре дьчандьн. Чахе әз һатьмә буйине, баве мьн кʹарханәкеда дьхәбьти. Щаһьлтийеда әз һин бум тракторе бажом, у ӧса жи тьштед дьн кӧ хәбата кʹарханева гьредайи бун.

Мьн баве хԝә щаһьлтийа ԝида нәдитийә, чьмки чахе әз һатьмә буйине, әԝ ида 56 сали бу, дийа мьн жи 35 сали. Ле баве мьн йәки жар, сьһʹәт-ԛәԝат у ԛәԝи бу. Әԝ гәләк хәбатһʹьз бу у әԝи әм жи һин дькьрьн ԝәки хәбатһʹьз бьн. Әԝи гәләк пʹәрә нәдьстанд, ле йәкә щи-сьтʹара мә һәбу, кʹьнщ у хԝарьн жи мә кем нибу. Әԝ 93 сали бу чахе мьр, ле дийа мьн 86 сали бу мьр. Һәрдӧ жи Шәʹдед Йаһоԝа нибун. Ле бьраки мьн, жь сала 1972 бь амьни ча рʹуспи хьзмәт дькә.

Дийа мьн йәкә баԝәрмәнд бу. Һәр Ләʹд әԝе әм дьбьрьнә дера Бабтиста. Чахе әз 12 сали бум,  әз щара пешьн дәрһәԛа Сейәканә пеһʹәсийам. Һьнге мьн жь дийа хԝә пьрси: «Ча Иса дькарә һьн Кӧрʹ һьн жи Бав бә?» Щаба ԝе һʹәта иро те бира мьн: «Кӧрʹе мьн, әԝ сӧрʹ ә. Әм нькарьн ве йәке фәʹм кьн». Рʹасти жи әԝ йәк бона мьн фәʹмдари нибу. Ле йәкә чахе әз ԝәкә 14 сали бум, әз һатьмә ньхӧмандьне чʹәме бьчʹукда, ль гора Сейәканә се щара мьн кьрьнә аве!

Чахе әз мәкʹтәбеда һин дьбум, һәваләки мьн боксор бу у әԝи әз һелан дькьрьм, ԝәки әз жи бьбьм боксор. Ләма жи мьн дәстпекьр һин бьм у әз бум әндәме тʹәшкиләтәкә боксе йа бь наве Голден Главз. Әз рʹьнд һин нәдьбум, ләма жи паши чәнд шәрʹе боксе, әз жь ве тʹәшкиләте дәркʹәтьм. Паше, гази мьн кьрьн әскәрийе. Жь ԝедәре әз шандьмә Алманйайе. У чахе мьн ԝедәре ԛӧльх дькьр, сәрока әз шандьмә академийа офисера (Noncommissionеd Officеrs Acadеmy), чьмки дьфькьрин ԝәки әзе бьбьмә сәрокәки баш. Ԝана дьхԝәст ԝәки әз әскәрийеда пешда һәрʹьм. Ле мьн әв йәк нәдьхԝәст, ләма жи чахе дӧ салед ԛӧльхкьрьна мьн тʹәмам бун, сала 1956 ида әз жь әскәрийе чум. Паши ве йәке, әз кʹәтьмә ордикә дьн, демәк нав щьмәʹта Хԝәде.

Һʹәта мьн рʹасти нас кьра, фькьред мьн нәрʹаст бун дәрһәԛа ԝе йәке, кӧ мер гәрәке бь рʹасти чь щурʹәйи бә. Филм у мәрьвед дор бәре мьн сәр ньһерʹандьна мьн хьраб һʹӧкӧм бьбун. Һьн жи әз дьфькьрим, ԝәки меред кӧ дәрһәԛа рʹелигийе хәбәр дьдьн, әԝана мерани ниньн. Ле паше мьн дәстпекьр тьштед ӧса һин бьм, кӧ әʹмьре мьн лаптә гӧһастьн. Рʹожәке, чахе әз пе авта хԝәйә сор нав шәһәррʹа дьчум, дӧ кәчʹька дәстед хԝә мьнрʹа һәжандьн сьлав данә мьн. Мьн әԝана нас дькьрьн, әԝ балтʹузед хушка мьнә мәзьн бун. Әԝ дӧ кәчʹьк Шәʹдед Йаһоԝа бун. Пешийа ве йәке, ԝана журналед «Бьрща Ԛәрәԝьлийе» у «Һʹьшйар бьн!» дабунә мьн, мьн тʹьре кӧ «Бьрща Ԛәрәԝьлийе» бона мьн гәләк чәтьн ә. Ле ве рʹоже, ԝана әз тʹәглифи щьвате кьрьм, кӧ мала ԝанда дәрбаз дьбу. Мьн ԝанрʹа гот кӧ әзе бьфькьрьм. Ԝана бь бәшәра хԝәш мьн пьрсин: «Соз дьди?» Мьн жи гот: «Әре, әз соз дьдьм».

Рʹаст бежьм әз һьнәки пʹошман бум кӧ мьн ԝанрʹа соз да, ле мьн хԝәст хԝәйе созе хԝә бьм. Ләма жи ве еваре әз чум сәр щьвате. Әз гәләк әʹщебмайи мам кӧ зарʹа ча рʹьнд Кʹьтеба Пироз заньбун. Чахе әз бәре тʹәви дийа хԝә һәр Ләʹд дьчумә дере, мьн дәрһәԛа Кʹьтеба Пироз гәләк һьндьк заньбу. Ле ньһа мьн хԝәст һе зедә пебьһʹәсьм. Әз ԛайил бум һинбуна Кʹьтеба Пироз дәстпекьм. Пешийа ве йәке әз пеһʹәсийам, ԝәки наве Хԝәдейе Һьмзор, Йаһоԝа йә. Гәләк сал пешда, мьн жь дийа хԝә пьрсибу кӧ кʹе нә Шәʹдед Йаһоԝа, щаба ԝе ӧса бу: «Әԝана мерәки әʹмьрда мәзьн бь наве Йаһоԝа дьһʹәбиньн». Ле ньһа мьн фәʹм кьр кӧ чʹәʹвед мьн вәбунә.

Әз рʹӧһʹанида зу пешда дьчум, чьмки мьн заньбу ԝәки мьн рʹасти дитийә. Паши щьвата мьнә пешьн, нава нәһ мәһада әз һатьмә ньхӧмандьне, мәһа Адаре сала 1957. Ньһерʹандьна мьн сәр әʹмьр һатә гӧһастьне. Чахе дьһатә бира мьн, ԝәки бәре әз нәрʹаст дьфькьрим, кӧ мер гәрәке чь щурʹәйи бә, әз ша дьбум ԝәки әз пеһʹәсийамә кӧ Кʹьтеба Пироз чь дьбежә дәрһәԛа ве йәке. Иса мәрьвәки бекемаси бу. Ԛәԝата ԝи ӧса мәзьн бу, кӧ тʹәви ԛәԝата тʹӧ мери найе бәрамбәркьрьне. Йәкә әԝ тʹӧ щар нәдькʹәтә нав шәрʹ-дәʹԝа, ле әԝи һишт ԝи бьдьнә щәфе, чаԝа һатьбу пʹехәмбәртикьрьне  (Иша. 53:2, 7). Әз пеһʹәсийам ԝәки шагьртед Иса гәрәке «һьндава һʹәмуйада бәрбьһер» бьн (2 Тимтʹ. 2:24).

Саләк шунда, демәк сала 1958, мьн пешәнгти дәстпекьр. Ле һьнә ԝәʹдә шунда мьн пешәнгтийа хԝә да сәкьнандьне. Чьрʹа? Чьмки мьн сафи кьр ԝәки Глориайе бьстиньм, әԝ балтʹуза хушка мьн ә, йа кӧ тʹәви хушка хԝә әз тʹәглифи щьвате кьрьм. Әз тʹӧ щар пʹошман набьм кӧ мьн әԝ станд. Глориа һьнге бона мьн кәвьре ԛимәт бу, у һʹәта иро жи бона мьн гәләк ԛимәт ә. Әԝ бона мьн жь алмазәки лапи бьһа ԛимәттьр ә, у әз гәләк бәхтәԝар ьм кӧ әԝ бу жьна мьн! Ньһа әԝе ԝәрʹа һьнәки дәрһәԛа хԝә гьли кә:

«Әм 17 хушк-бьра бун. Дийа мьн Шәʹде Йаһоԝайә амьн бу. Чахе әз 14 сали бум әԝ мьр. Паши мьрьна ԝе, баве мьн дәстпекьр Кʹьтеба Пироз һин бә. Баве мьн тʹәви директоре мәкʹтәбе хәбәр да, ԝәки әԝ изьне бьдә кӧ рʹожәке әз нәчьмә мәкʹтәбе, рʹожа дьн жи хушка мьнә мәзьн, йа кӧ ида кʹома хьлазийеда бу. Әԝи ӧса дьхԝәст сәва кӧ рʹоже йәк жь мә малда бьминә бәр зарʹа бә, у бона нәфәра хԝарьне һазьр кә, һʹәта баве мә жь хәбате бе. Директоре мәкʹтәбе ԛайил бу, у әԝ йәк ӧса бу һʹәта кӧ әԝе хушка мьн мәкʹтәб хьлаз кьр. Дӧ малбәтед Шәʹдед Йаһоԝа тʹәви мә һинбуна Кʹьтеба Пироз дәрбаз дькьрьн, у жь мә 11 зарʹ бунә Шәʹдед Йаһоԝа. Рʹаст ә әз йәкә шәрмокә бум, ле мьн хьзмәти гәләк һʹьз дькьр. Ве йәкеда Сем ида гәләк сал ә али мьн дькә».

Мьн у Глориайе сала 1959, мәһа Сьбате һәв станд. Мә тʹәвайи ча пешәнг хьзмәт дькьр. Ве сале мәһа Тирмәһе, мә бланка хьзмәтийа Бәйтʹәле тʹьжә кьр, чьмки мә гәләк дьхԝәст офиса сәрәкәда хьзмәт кьн. Бьраки мәйи дәлал бь наве Симон Кракер кӧ Бәйтʹәледа хьзмәт дькьр у бланка мә дит, дәрһәԛа хьзмәтийа Бәйтʹәле тʹәви мә хәбәр да. Әԝи готә мә ԝәки Бәйтʹәл ньһа щотед зәԝаще һе ԛәбул накә. Ле әԝ нет жь дьле мә тʹӧ щар дәрнәдькʹәт, у һежа бу ԝәки әм гәләк ԝәхт һивийе бьн!

Мә ньвиси филиала сәрәкәра ԝәки әԝана мә бьшиньн ԝи щийи, кʹидәре кӧ һʹәԝщәти һәйә. Мәрʹа щаб ӧса дан: Һәрʹьнә шәһәре Пайн Блаф, Аркансас. Һьнге, ԝедәре тʹәне дӧ щьват һәбун, йәкида мьзгинванед бь чʹәрме спи хьзмәт дькьрьн, йа дьнда мьзгинванед бь чʹәрме рʹәш. Әм һатьнә кʹьфшкьрьне щьвата мьзгинванед бь чʹәрме рʹәшда, кʹидәре кӧ тʹәне 14 мьзгинван һәбун.

Дьбәкә һун дьфькьрьн, ԝәки щьвата Шәʹдед Йаһоԝада чьрʹа сегрегасийа * һәбу. Рʹекә дьн тʹӧнә бу. Ԛанун һәбун кӧ изьн нәдьдан ԝәки мәрьвед жь щурʹә-щурʹә раса тʹәвайи тʹоп бьн. Бь рʹасти әԝ йәк гәләк хоф бу, чьмки шәрʹ-дәʹԝед мәзьн дькарьбун пешда бьһатана. Гәләк щийада, хушк-бьра дьтьрсийан, ԝәки дӧ раса тʹәвайи тʹоп бьн, чьмки ԝе Ода Щьвате кʹӧтакьрана. Тьштед ӧса бь рʹасти ида ԛәԝьмибун. Һәрге Шәʹдед Йаһоԝа йед бь чʹәрме рʹәш, мал бь мал хьзмәт дькьрьн у хԝәйе мале чʹәрме спи бу, әԝана дькарьбун бьһатана гьртьне у дьбәкә бьһатана кʹӧтане жи. Ләма жи сәва бәрдәԝам кьн хьзмәт кьн, мә әԝ ԛанун нәдьтʹәрʹьбандьн, у әм һивийе бун ԝәки әԝ дәрәщә алийе башда бе гӧһастьне.

Хьзмәтийа хԝәда әм рʹасти чәтьнайа дьһатьн. Мә хьзмәт дькьр мьһала мәрьвед бь чʹәрме рʹәшда, ле щара мә дәри дьхьст у дьдит ԝәки әԝана мәрьвед бь чʹәрме спи нә. Һьнге мә гәрәке дәрберʹа сафи кьра кӧ чь бькьн, йан пешанине бежьн у рʹезәке бьхуньн, йан жи бежьн ԝәки мә шаш кьрийә, у пашда һәрьн. Һьнә щийада, мә ӧса хьзмәт дькьр.

Әм пешәнг бун, ле мәрʹа лазьм бу бьхәбьтьн сәва әʹбура хԝә бькьн. Мә бона һьнә хәбатед хԝә рʹоже 3 долар дьстанд. Глориа чәнд малада дьхәбьти. Щики мьнрʹа изьн дан, ԝәки али ԝе бькьм, сәва әԝ шьхӧле хԝә зу хьлаз кә. Рʹоже щарәке хԝарьн дьданә мә. Глориайе һәр һʹәфти малбәтәкеда утʹи дькьр. Ле әз бахчәда дьхәбьтим, мьн агушкә дьшуштьн, у диса щурʹә-щурʹә хәбатед дьн дькьр. Малбәтәкеда кӧ мәрьвед бь чʹәрме спи бун, мә агушкә дьшушт, Глориайе алийе һӧндӧрʹва дьшушт, ле мьн алийе дәрвава. Бона ве йәке тʹәмам рʹож лазьм бу, ләма жи ԝана хԝарьн дьданә мә. Глориайе мала ԝанда башԛә дьхԝар, нә тʹәви нәфәред ԝан, ле мьн  гаражеда дьхԝар. Бона мьн әԝ йәк проблем нибу. Хԝарьнәкә гәләк баш ԝана дьда мә. Әԝ малбәт бь рʹасти баш бу, тʹәне ньһерʹандьна ԝан нәрʹаст бу, чьмки дькʹәтьнә бәр байе мәрьвед дор бәр, демәк фьрԛи дькьрьнә ортʹа раса. Те бира мьн щарәке әм сәкьнибун, ԝәки бензине бәри авта хԝә дьн. Чахе мә бензин дагьрт, мьн жь хәбатчи пьрси кӧ изьнә Глориа бькʹәвә дәставе. Әԝи авьрʹ да мьн у гот: «Дадайә».

Ле мә ԝәʹдәки баш дәрбаз дькьр тʹәви хушк-бьред хԝә, у мә хьзмәтийа хԝә һʹьз дькьр! Чахе әм щара пешьн һатьнә Пайн Блафе, мә тʹәви бьраки дьжит, кʹижан кӧ һьнге хьзмәткʹаре щьвате бу. Жьна ԝи һьнге нәбаԝәр бу, у Глориайе дәстпекьр тʹәви ԝе һинбуне дәрбаз кә. Ле мьн тʹәви ԛиза ԝан у мере ԝе дәстпекьр һинбуна Кʹьтеба Пироз дәрбаз кьм. Ахьрийеда әԝ жьньк у ԛиза ԝе һатьн сәр рʹийа Йаһоԝа у һатьнә ньхӧмандьне.

Һәвалед мәйә баш һәбун жь щьвата хушк-бьред чʹәрме спи. Ԝана әм тʹәглифи мала хԝә дькьрьн, ле әм һьнге дьчунә мала ԝан чахе тәʹри дькʹәтә әʹрде, сәва тʹӧ кәс мә тʹәвайи нәвинә. Ԝи ԝәʹдәйи тʹәшкиләт бь наве «Ку Клукс Клан» (ККК), кʹижан кӧ пьштгьрийа расизме у зорбәтийе дькьр, гәләк навдар бу. Те бира мьн щарәке, мерькәк бәр мала хԝә ԛӧрʹә-ԛӧрʹә рʹуньштьбу, у кʹьнщед мина йе әндәмед ККК ле бу. Ле хушк-бьра нәдьһиштьн, ԝәки тьштед ӧса рʹе ԝан бьгьрә ԛәнщийе һәвдӧрʹа бькьн. Щарәке һавине, мәрʹа пʹәрә лазьм бу сәва һәрʹьнә щьвата серʹожи, у бьраки мә ԛайил бу ԝәки авта мә бькʹьрʹә, сәва әм һәрʹьнә щьвата мәзьн. Мәһәк дәрбаз бу, рʹожәке чахе әм ԛьжә-ԛьжә гәрмеда жь хьзмәтийа мал бь мал тенә мала хԝә, бәр мала хԝә пʹешкʹешәке дьвиньн! Әԝ авта мә бу. Сәр шуша авте кʹахаз һәбу у сәр ньвисар бу: «Әԝе авта хԝә жь мьн пʹешкʹеш һьлдьн. Бьре ԝә».

Ԛәнщик жи һʹәта иро бира мьн начә. Сала 1962, мьн тʹәглифи Мәкʹтәба Хьзмәтийе кьрьн ль Лансинга Башуре, (Нийу Йорк). Әԝ курс мәһәке бу бона бьред щабдар щьватада, ӧса жи бона бәрпьрсийаред мьһале у нәһийе бу. Чахе мьн тʹәглифкьрьн станд, әз бехәбат бум у алийе пʹәрәда чәтьнайед мә һәбун. Ле Пайн Блафеда компанийәкә тʹела гази мьн кьрьн, ԝәки тʹәви мьн хәбәр дьн дәрһәԛа хәбате. Һәрге ԝана әз ԛәбул кьрама сәр ве хәбате, әзе ве компанийайеда мәрьве бь чʹәрме рʹәш йе пешьн бума. Ахьрийеда ԝана мьнрʹа гот, ԝәки ԛайил ьн әз ԝедәре бьхәбьтьн. Ле мьн чь кьр? Һьнге пʹәре мьн тʹӧнә бу сәва һәрʹьм Нийу Йорке курсе дәрбаз бьм. Мьн дьхԝәст бьхәбьтьм ԝи щийи у әз фькьрим нәчьмә мәкʹтәбе. У чахе әз ида һазьр бум ԝәки нәʹмә бьньвисьм кӧ әз нькарьм һәрʹьм мәкʹтәбе, ньшкева тьштәки ӧса ԛәԝьми кӧ әзе тʹӧ щар бир нәкьм.

Хушкәк жь щьвата мә, мере кʹижане нәбаԝәр бу, шәбәԛе зу дәре мала мә хьст у конвертәк да мә, теда тʹьжә пʹәрә бу. Әԝ шәбәԛе тʹәви чәнд зарʹед хԝә, чәнд рʹожа рʹадьбу дьчу чоле,  нава пәмбу зиԝан дәрдьхьст, сәва кӧ пʹәра тʹоп кә, ԝәки әз һәрʹьм Нийу Йорке. Әԝе готә мьн: «Һәрʹә мәкʹтәбе, у чьԛас дькари рʹьнд һин бә, ԝәки вәгәрʹи у паше мә һин ки!». Паше, мьн жь ве компанийа тʹеле пьрси һәла әз дькарьм ԝедәре хәбате дәстпекьм пенщ һʹәфти шунда. Щаб гәләк сәрт бу: «На». Ле әз бәрхԝә нәкʹәтьм. Мьн сафикьрьна хԝә кьр, у әз пʹошман набьм ԝәки әз нәкʹәтьмә ве хәбате!

Глориа тинә бира хԝә ԝәʹде хьзмәтийа мә Пайн Блафеда: «Мьн әԝ щи гәләк һʹьз кьр. Ԝедәре мьн 15 һʹәта 20 һинбуна Кʹьтеба Пироз дәрбаз дькьр. Ләма жи әм шәбәԛе дьчунә хәбате, у паше тʹәмамийа рʹоже мә һинбунед Кʹьтеба Пироз дәрбаз дькьр. Щара әм еваре сьһʹәта 11 дьһатьнә мал. Хьзмәти гәләк һʹәԝас бу! Мьн дьхԝәст диса ԝи щийида бьмама. Әз рʹаст бежьм, мьн нәдьхԝәст ԝәки кʹьфшкьрьна мә бе гӧһастьне у шьхӧле бәрпьрсийартийе бькьн, ле Йаһоԝа бона мә диса тьштәк һазьр дькьр». У рʹасти жи ӧса бу.

Чахе мә Пайн Блафеда ча пешәнг хьзмәт дькьр, мә бланк тʹьжә кьр сәва бьбьнә пешәнгед мәхсус. Әм дьфькьрин ԝәки әме әʹсә бенә кʹьфшкьрьне, чьмки бәрпьрсийаре нәһийе дьхԝәст, ԝәки әм ча пешәнгед мәхсус хьзмәт кьн сәва али щьвата шәһәре Техасда бькьн. У әԝ йәк гәләк мә хԝәш дьһат, ләма жи әм гәләк ԝәхт һивийа щаба жь филиале бун, ле щаб нәдьһат. Ахьрийеда, щарәке нәʹмә һат, у әм һатьнә кʹьфшкьрьне шьхӧле бәрпьрсийартийе бькьн. Әԝ сала 1965 бу, мәһа Чьләйе. Бьрак бь наве Леон Ԝивер, кӧ ньһа кординаторе Комитейа филиала Дәԝләтед Йәкбуйи йә, әԝ жи һьнге һатә кʹьфшкьрьне ча бәрпьрсийаре мьһале.

Әз бәрхԝә дькʹәтьм кӧ әз дьбумә бәрпьрсийаре мьһале. Саләк пешда йан дьбәкә һе зедә, бәрпьрсийаре нәһийе бь наве Щеймс А. Томсон, ньһерʹи һәла әз дькарьм бьбьмә бәрпьрсийаре мьһале. Әԝи бь нәрми мьнрʹа нишан кьр, кӧ әз кʹижан тьштада гәрәке хԝә бьгӧһезьм, у гот кӧ кʹижан фәрәсәт лазьм ьн бона бәрпьрсийаред мьһале. Һьнә ԝәʹдә шунда паши ве кʹьфшкьрьне мьн фәʹм кьр, кӧ ширәтед ԝи чьԛас мьнрʹа лазьм бун. Щара әʹԝльн мьн тʹәви Томсон бьра хьзмәт дькьр, йе кӧ бәрпьрсийаре нәһийе бу. Әз жь ԝи бьре рʹӧһʹани у амьн, гәләк тьшт һин бум.

Һьнге, бәрпьрсийаред мьһале зәʹф нәдьһатьнә һинкьрьне. Мьн һʹәфтеке дина хԝә да бәрпьрсийаре мьһале гава әԝи тʹәсәлийа щьвате дькьр. Паше әԝи һʹәфтеке дина хԝә да мьн, чахе мьн тʹәсәлийа щьвата дьн дькьр у әԝи ширәт у рʹебәри да мьн. Паши ве йәке, әм ида хԝәха сәри хԝә бун. Те бира мьн чахе Глориайе мьнрʹа гот: «Һежа йә әԝ ньһа бьһелә һәрʹә?» Ԝәʹдә дәрбаз бу, мьн тьштәки фәрз фәʹм кьр. Тʹьме ԝе һәбьн  бьра кӧ дькарьн али тә бькьн, ле тʹәне һәрге тӧ бьһели али тә бькьн. Әз гәләк дьшекьриньм кӧ мьн аликʹари станд жь бьред щерʹьбанди, мәсәлә жь Щ. Р. Браԝн кʹижан кӧ һьнге бәрпьрсийаре нәһийе бу, у Фред Раск кӧ әндәме Бәйтʹәле бу.

Расизм ԝи ԝәʹдәйи гәләк бәлабуйи бу. Щарәке ККК нав шәһәре Теннесида кӧ әм ԝедәре бун, дьчун-дьһатьн. Ӧса жи те бира мьн чахе әм ԝәʹде хьзмәтийе кʹәтьнә ресторане сәва хԝарьне бьхԝьн. Гава әз дьчумә дәставе, мьн тедәрхьст кӧ пәй мьн мәрьвәк һерсә-һерс те дькʹәвә дәставе, жь татуировкед ԝийи сәр бәдәне дьһатә кʹьфше, кӧ әԝ мьԛабьли мәрьвед бь чʹәрме рʹәш ә. Ле гава бьраки мә бь чʹәрме спи әԝ йәк дит, кʹижан кӧ жь мьн у жь ԝи мерьки гьртьр бу, пәй мә һат. Әԝи жь мьн пьрси: «Һӧрд бьра, һʹәму тьшт баш ә?» Әԝ мерьк жи кʹәрба зузу жь дәставә дәркʹәт, дәстав нә жи да хәбате. Нава гәләк салада әз дьвиньм, ԝәки мәʹнийа расизме нә кӧ рʹәнге чʹәрме мәрьва йә, ле мәʹни гӧнә йә, кӧ мә һʹәмушка жь Адәм стандийә. У әз заньм ԝәки бона хушк-бьра фьрԛи тʹӧнә чʹәрме тә чь рʹәнги йә, әԝана һазьр ьн, һәрге лазьм бә, әʹмьре хԝә жи бона тә бьдьн.

Әз 12 сала бәрпьрсийаре мьһале бум, у 21 сала жи бәрпьрсийаре нәһийе бум. Әԝ бона мә ԝәʹдәки гәләк хԝәш бу, бь кʹәрәма тʹьжә, у ӧса жи гәләк ԛәԝьмандьнед һʹәԝас һәбун. Ле диса кʹәрәмәк жи мә станд. Сала 1997, мәһа Тʹәбахе, нета мә кӧ зудава дьле мәда бу, һатә сери. Мә тʹәглифи Бәйтʹәла Амәрикайе кьрьн. Бьдьнә һʹәсабе хԝә, нета мә һатә сери 38 сал паши ве йәке, гава мә щара пешьн бланк тʹьжә кьр. Мәһәк дәрбаз бу у мә хьзмәтийа хԝәйә Бәйтʹәледа дәстпекьр. Мьн тʹьре бьред щабдар дьхԝазьн, ԝәки әз Бәйтʹәледа ԝәʹдәлу али ԝан бькьм, ле ӧса нибу ча әз дьфькьрим.

Әз Идара Хьзмәтийеда һатьмә кʹьфшкьрьне. Ве идареда әз гәләк тьшт һин бум. Бьред ве идареда пьрсед гәләк чәтьн дьстиньн. Әԝ пьрс жь кʹома рʹуспийа у жь бәрпьрсийаред мьһале нә, нав тʹәмамийа ԝәлатда. Мьн гәләк дьшекьранд сәбьр у аликʹарийа ԝан, чахе ԝан бьра әз һин дькьрьм. Ньһа һәрге мьн диса ве идареда кʹьфш кьн, әзе диса жи чаԝа мәрьве тʹәзә гәләк тьшт ԝедәре һин бьм.

Әз у Глориа жийина Бәйтʹәле гәләк һʹьз дькьн. Әм тʹьме шәбәԛе зу рʹадьбьн у әԝ хәйсәт Бәйтʹәледа гәләк кери мә те. Паши ԝәкә саләке, мьн дәстпекьр хьзмәт кьм ча аликʹарчийе Комитейа Хьзмәтийе йа Кʹома Рʹебәрийе. Паше, сала 1999-да, әз һатьмә кʹьфшкьрьне ча әндәме Кʹома Рʹебәрийе. Әз ве кʹьфшкьрьнеда гәләк тьшт һин бум, ле бона мьн дәрсәкә лапә мәзьн әԝ ә, кӧ сәре щьвата Мәсиһити, әԝ һәйә нә кӧ мәрьв, ле Иса Мәсиһ.

Чахе әз дәрһәԛа әʹмьре хԝәйи бәре дьфькьрьм, щара хԝә мина пʹехәмбәр Амос тʹәхмин дькьм. Йаһоԝа дина хԝә да ԝи шьване мьлук, кʹижан кӧ шьхӧләкә бьчʹук дькьр һәжир тʹоп дькьр. Һьнге һәжир һʹәсаб дькьрьн ча хԝарьна кʹәсиба. Ле Хԝәде Амос бьжарт, ԝәки әԝ бьбә пʹехәмбәре ԝи, у әԝ щабдари рʹасти жи гәләк мәхсус у ԛимәт бу (Амс. 7:14, 15). Йаһоԝа ӧса жи дина хԝә да мьн, кӧрʹе мәрьвәки кʹәсиб кӧ кʹарханеда дьхәбьти, у гәләк кʹәрәм сәр мьнда баранд, һаԛас кӧ нькарьм һʹәсаб кьм жи! (Мәтʹлк. 10:22). Әз тʹәхмин дькьм кӧ рʹаст ә әʹмьре мьн жь кʹәсибийе дәстпебу, ле ахьрийа мьн дәԝләтийа рʹӧһʹани йә, чь кӧ һәбукәкә мәзьн ә, кʹижан кӧ ԛә сәре мьнрʹа жи дәрбаз нәдьбу!