1, 2. а) Иса пешийа мьрьна хԝә дәрһәԛа чь шеԝьр кьр тʹәви шагьртед хԝә? (Бьньһерʹә шькле әʹԝльн.) б) Чьрʹа әм гәрәке бир нәкьн мәʹнийа бәлакьрьна мьзгинийе? в) Әме ве готареда чь шеԝьр кьн?

ИСА евара пешийа мьрьна хԝә, тʹәви шандийед хԝә дәрһәԛа гәләк тьшта хәбәр дьда. Әԝи ԝана дьлгәрм кьр у гот кӧ гәләк ԝана һʹьз дькә. Иса ӧса жи ԝанрʹа мәсәла дәрһәԛа кʹола тьрийе ани, кʹижан кӧ мә готара пешийа веда шеԝьр кьр. Бь сайа ԝе мәсәле Иса шагьртед хԝә шьданд, ԝәки әԝана «гәләк бәрдайине бьдьнә кʹьфше», демәк бь сәбьр мьзгинийа Пʹадшатийе бәла кьн (Йуһʹн. 15:8).

² Ле Иса нә кӧ тʹәне гот кӧ чь лазьм ә әԝана бькьн, ле әԝи ӧса жи гот кӧ чьрʹа әԝана гәрәке ве йәке бькьн. Әԝи ԝанрʹа чәнд мәʹни гот кӧ чьрʹа әԝана гәрәке бәрдәԝам кьн мьзгинийе бәла кьн. Чьрʹа фәрз ә әм ван мәнʹийа шеԝьр кьн? Чьмки чахе әм заньн кӧ чьрʹа гәрәке мьзгинийе бәла кьн, әм һелан дьбьн бь сәбьр «һʹәму мьләтарʹа» шәʹдәтийе бьдьн (Мәт. 24:13, 14). Ве готареда әме чар мәʹнийа шеԝьр кьн, кӧ чьрʹа әм гәрәке хьзмәт кьн. Ӧса жи әме шеԝьр кьн чар пʹешкʹешед жь Йаһоԝа, кʹижан кӧ али мә дькьн бь сәбьр бәр бьдьн.

3. а) Ль гора Йуһʹәнна 15:8, кʹижан ә мәʹнийа лапә мәзьн кӧ чьрʹа әм мьзгинийе бәла дькьн? б) Мәсәла Исада чь те һʹәсабе тьри, у чьрʹа әԝ бәрамбәрикьрьн лайиԛ ә?

³ Мәʹнийа лапә мәзьн кӧ чьрʹа әм мьзгинийе бәла дькьн әԝ ә, кӧ әԝ шьхӧл Йаһоԝа рʹумәт дькә у наве ԝи бәр һʹәму мәрьва пироз дькә. (Бьхунә Йуһʹәнна 15:1, 8.) Дина хԝә бьдьн кӧ Иса Баве хԝә Йаһоԝа бәрамбәри рʹәзван кьр, йе кӧ тьрийа дьчинә, хԝә бәрамбәри кʹола тьрийе кьр, ле шагьртед хԝә бәрамбәри чʹьԛьла кьр. Ле тьри те һʹәсабе бәре Пʹадшатийе, кӧ шагьртед Иса дьдьн. Әԝи готә шандийед хԝә: «Бь ве йәке Баве мьне бе рʹумәткьрьне, гава һун . . . гәләк бәрдайине бьдьнә кʹьфше». Чаԝа тьрийед баш йа кʹола тьрийе рʹумәте дьдьнә рʹәзван, ӧса жи әм рʹумәте дьдьнә Йаһоԝа гава чьԛас дәсте мә те, мьзгинийа Пʹадшатийе бәла дькьн (Мәт. 25:20-23).

4. а) Чь щурʹә әм наве Хԝәде пироз дькьн? б) Чьрʹа бона ԝә ԛәдьр ә кӧ наве Хԝәде пироз кьн?

⁴ Ча бәлакьрьна мьзгинийе наве Хԝәде пироз дькә? Бь рʹасти наве Хԝәде бь тʹәмами пироз ә, зедә әм нькарьн наве ԝи пироз кьн. Ле дина хԝә бьдьне, Ишайа пʹехәмбәр гот, кӧ әм гәрәке пирозийа Йаһоԝа ԛәбул кьн (Иша. 8:13). Әм наве Хԝәде пироз дькьн бь ԝе йәке, кӧ наве ԝи нава һʹәму навада башԛә дькьн у чахе али мәрьва дькьн, ԝәки әԝана жи ԛәбул кьн кӧ наве ԝи пироз ә (Мәт. 6:9). Бәʹса хәбәре, чахе әм дәрһәԛа һʹӧнӧред Йаһоԝа у ԛьрара ԝи һьндава инсанәте мәрьварʹа гьли дькьн, бь ве йәке избат дькьн, кӧ гьлийед Шәйтʹан дәрһәԛа Хԝәде дәрәԝ у ԛәлп ьн (Дәстп. 3:1-5). Ӧса жи, чахе әм мьһала хԝәда али мәрьва дькьн, ԝәки әԝана бьвиньн кӧ тʹәне Йаһоԝа һежа йә «рʹумәт, һӧрмәте у ԛәԝате» бьстинә, бь ве йәке жи әм наве ԝи пироз дькьн (Әʹйан. 4:11). Бьраки мә бь наве Рине, йе кӧ 16 сала пешәнг ә дьбежә: «Әз гәләк дьшекьриньм ԝе йәке кӧ дькарьм шәʹде Әʹфьрандаре гәрдуне бьм. Әԝ йәк ԛәԝате дьдә мьн, ԝәки бәрдәԝам кьм мьзгинийе бәла кьм».

5. а) Йуһʹәнна 15:9, 10-да дәрһәԛа кʹижан мәʹнийе те готьне, ԝәки мьзгинийе бәла кьн? б) Иса ча да кʹьфше ԝәки сәбьр лазьм ә?

⁵ Бьхунә Йуһʹәнна 15:9, 10. Һʹьзкьрьна мә һьндава Йаһоԝа у Иса, мәʹнийа фәрз ә кӧ мьзгинийе бәла кьн (Марԛ. 12:30; Йуһʹн. 14:15). Иса готә шагьртед хԝә, ԝәки әԝана нә кӧ тʹәне һʹьзкьрьна ԝида бьн, ле ӧса жи һʹьзкьрьна ԝида бьминьн. Ле гәло чьрʹа әԝи ӧса гот? Чьмки әԝи заньбу шагьртед ԝирʹа сәбьр лазьм ә, ԝәки бьжин чаԝа Мәсиһийед рʹаст. Йуһʹәнна 15:4-10-да Иса гәләк щар хәбәра «бьминьн» да хәбате сәва бьдә кʹьфше, ԝәки шагьртед ԝирʹа ԝе сәбьр лазьм бә.

6. Әм ча дьдьнә кʹьфше, кӧ әм дьхԝазьн һʹьзкьрьна Исада бьминьн?

⁶ Әм ча дьдьнә кʹьфше кӧ дьхԝазьн һʹьзкьрьна Исада бьминьн у ԛәбулкьрьна ԝи ӧнда нәкьн? Әм гәрәке тʹәмийед ԝи биньн сери, демәк гӧрʹа ԝи бькьн. Иса хԝәст кӧ әм ве йәке бькьн, чь кӧ әԝи хԝәха дькьр. Әԝи гот: «Мьн тʹәмийед Баве хԝә хԝәй кьрьн у һʹьзкьрьна ԝида дьминьм». Бәле, ԝе йәкеда Иса мәрʹа мәсәлә һишт (Йуһʹн. 13:15).

7. Чаԝа гӧһдари у һʹьзкьрьн һәвва гьредайи нә?

⁷ Иса гот кӧ гӧһдари у һʹьзкьрьн һәвва гьредайи нә. Әԝи готә шандийед хԝә: «Әԝе кӧ тʹәмийед мьн ԛәбул дькә у ԝан хԝәй дькә, әԝ ә йе кӧ мьн һʹьз дькә» (Йуһʹн. 14:21). Хенщи ԝе йәке тʹәмийа Иса кӧ мьзгинийе бәла кьн, жь Баве ԝи йә, ләма жи чахе әм әве тʹәмийа Иса  тиньн сери, әм ӧса жи һʹьзкьрьна хԝә һьндава Йаһоԝа дьдьнә кʹьфше (Мәт. 17:5; Йуһʹн. 8:28). Чахе әм һʹьзкьрьна хԝә һьндава Йаһоԝа у Иса дьдьн кʹьфше, әԝана жи мә нава һʹьзкьрьна хԝәда хԝәй дькьн.

8, 9. а) Диса кʹижан мәʹни һәйә кӧ әм мьзгинийе бәла дькьн? б) Чьрʹа гьлийед Йаһоԝа кӧ Һәзәԛел 3:18, 19 у 18:23-да ньвисар ьн, һелане дьдьнә мә ԝәки бәрдәԝам кьн мьзгинийе бәла кьн?

⁸ Мәнийа дьн кӧ чьрʹа әм мьзгинийе бәла дькьн әԝ ә, кӧ әм мәрьварʹа пешда әʹлам дькьн дәрһәԛа рʹожа Йаһоԝа кӧ гәләк незик ә. Кʹьтеба Пирозда дәрһәԛа Нӧһ те готьне, ԝәки әԝи «даннасин дькьр». (Бьхунә 2 Пәтрус 2:5.) Әԝи мәрьварʹа пешда әʹлам дькьр ԝәки Селав ԝе рʹабә. Ле чьрʹа әм дькарьн ӧса бежьн? Дина хԝә бьдьне Иса чь гот: «Чаԝа кӧ ԝан рʹожед бәри тофане мәрьва дьхԝарьн, вәдьхԝарьн, дьзәԝьщин у мер дькьрьн, һʹәта ԝе рʹожа кӧ Нӧһ кʹәтә гәмийе у мәрьв пе нәһʹәсийан, һʹәта кӧ лейи рʹабу у һʹәму жи хәньԛандьн. Һатьна Кӧрʹе Инсан жи ԝе ӧса бә» (Мәт. 24:38, 39). Рʹаст ә гәләк мәрьв әʹламәтийа Нӧһ пьшт гӧһе хԝәва дьавитьн, йәкә әԝи бь амьни бәрдәԝам дькьр әʹламәтийа Хԝәде бәла кә.

⁹ Иро әм мьзгинийа Пʹадшатийе бәла дькьн, сәва мәрьв пебьһʹәсьн ԛьрара Хԝәде һьндава инсанәте. Әм жи мина Йаһоԝа дьхԝазьн мәрьв гӧһ бьдьнә ве әʹламәтийе у бьжин (Һәзԛл. 18:23). Хенщи ве йәке чахе әм мал бь мал у щийед кӧ гәләк мәрьв һәнә, хьзмәт дькьн, әм мәрьварʹа пешда әʹлам дькьн дәрһәԛа Пʹадшатийа Хԝәде, кʹижан кӧ ԝе бе у ԛьрʹа ве дьнйа хьраб бинә (Һәзԛл. 3:18, 19; Дан. 2:44; Әʹйан. 14:6, 7).

10. а) Ль гора Мәтта 22:39 диса чь мәʹни һәйә кӧ мьзгинийе бәла кьн? б) Гьли кьн кӧ чаԝа Паԝлос у Силас Филипийайеда али сәрԝере кәле кьрьн.

¹⁰ Диса мәʹникә фәрз һәйә кӧ чьрʹа әм бәрдәԝам дькьн мьзгинийе бәла дькьн, әԝ һәйә һʹьзкьрьна мә һьндава мәрьва (Мәт. 22:39). Әԝ һʹьзкьрьн али мә дькә бь сәбьр ԝи шьхӧли бәрдәԝам кьн, чьмки әм фәʹм дькьн кӧ ньһерʹандьна мәрьва жь бо дәрәщед ԝан дькарә бе гӧһастьне. Биньн бира хԝә кӧ чь ԛәԝьми тʹәви Паԝлосе шанди у һәвалхьзмәткʹаре ԝи Силас. Шәһәре Филипйайеда мәрьв мьԛабьли ԝан дәркʹәтьн у ԝана кьрьнә кәле. Ниве шәве әʹрдһәжәкә ӧса ԛайим ԛәԝьми, кӧ дәред кәле вәбун. Сәрԝере кәле тьрсийа кӧ гьрти ԝе бьрʹәвьн у хԝәст хԝә бькӧжә. Ле Паԝлос ԝи да сәкьнандьне у ԝирʹа гот: «Тʹӧ зийане нәдә әʹмьре хԝә». Сәрԝере кәле жерʹа гот: «Әз чь гәрәке бькьм кӧ хьлаз бьм?» Паԝлос у Силас щаба ԝи дан: «Баԝәрийа хԝә Хӧдан Иса бинә, те . . . хьлаз би» (Кʹар. Шанд. 16:25-34).

11, 12. а) Чаԝа сәрһатийа дәрһәԛа сәрԝере кәле хьзмәтийа мәва гьредайи йә? б) Чьрʹа әм дьхԝазьн бәрдәԝам кьн мьзгинийе бәла кьн?

¹¹ Әв мәсәла сәрԝере кәле чь мә һин дькә дәрһәԛа хьзмәтийа мә? Бьфькьрьн: Сәрԝере кәле тʹәне паши әʹрдһәже ньһерʹандьна  хԝә гӧһаст у аликʹари хԝәст. Иро жи чахе һʹале мәрьва ньшкева те гӧһастьне, әԝана һьнге дькарьн гӧһ бьдьнә мьзгинийе у бьхԝазьн аликʹарийе бьстиньн. Бәʹса хәбәре, һьнә мәрьв мьһала мәда дьбәкә ньшкева хәбата хԝә ӧнда кьрьнә у ньзаньн чь бькьн. Һьнәк жи дьбәкә жь мер йан жьна хԝә ԛәтийанә. Һьнәк жи бинтәнг дьбьн, чьмки пеһʹәсийанә кӧ нәхԝәшийа ԝанә гьран һәйә, йан жи дьлшкәсти нә, чьмки мәрьве хԝәйи незик ӧнда кьрьнә. Чахе тьштед ӧса дьԛәԝьмьн, бал ԝан мәрьва пьрсед нета әʹмьрва гьредайи пешда тен, дәрһәԛа кʹижани кӧ бәре нә жи фькьринә. Дьԛәԝьмә әԝана һәла һе жи дьфькьрьн: «Әз гәрәке чь бькьм ԝәки хьлаз бьм?» Гава әм рʹасти ԝан мәрьва тен, әԝана дькарьн гӧһ бьдьнә мьзгинийа мәйә ша, кӧ ԝана әʹмьре хԝәда тʹӧ щар нәбьһистийә.

¹² Ләма жи һәрге әм бь амьни бәрдәԝам кьн мьзгинийе бәла кьн, әме бькарьбьн бәрдьлийе бьдьнә мәрьва, гава әԝана һазьр бьн гӧһ бьдьнә мә у бәрдьлийа мә ԛәбул кьн (Иша. 61:1). Хушкәкә мә бь наве Шарлот, йа кӧ ида 38 сал ә пешәнг ә, дьбежә: «Мәрьв иро ӧндабуйи нә. Әԝана һʹәԝщә нә кӧ мьзгинийе пебьһʹәсьн». Ле Евор кӧ 34 сал ә пешәнг ә, дьбежә: «Иро ԝәʹдәки ӧса һатийә, кӧ мәрьв емосиалида гәләк сьст ьн. Әз гәләк дьхԝазьм али ԝан бькьм у әԝ йәк мьн һелан дькә ԝанрʹа мьзгинийе гьли кьм». Һʹьзкьрьн һьндава мәрьва мәʹнийа мәзьн ә, ԝәки бәрдәԝам кьн мьзгинийе бәла кьн!

13, 14. а) Йуһʹәнна 15:11-да дәрһәԛа кʹижан пʹешкʹеше те готьне? б) Шабуна Иса ча дькарә бьбә йа мә? в) Шабун ча һʹӧкӧм дькә сәр хьзмәтийа мә?

¹³ Иса евара пешийа мьрьна хԝә, шандийед хԝәрʹа ӧса жи дәрһәԛа чәнд пʹешкʹеша гот, кʹижан кӧ ԝе али ԝан бькьра бь сәбьр бәр бьдана. Гәло әԝ чь пʹешкʹеш ьн, у чаԝа әԝ пʹешкʹеш дькарьн али мә жи бькьн?

¹⁴ Шабун. Гәло бәлакьрьна мьзгинийе барәки гьран ә? Тʹӧ щар на. Чахе Иса гьли кьр мәсәла дәрһәԛа кʹола тьрийе, әԝи гот кӧ жь бәлакьрьна мьзгинийе әме шабунәкә мәзьн бьстиньн. (Бьхунә Йуһʹәнна 15:11.) Бь рʹасти әԝи гот кӧ шабуна ԝи дькарә дьле мәда бә жи. Ле ча? Чаԝа мә ида жоре гот, Иса хԝә бәрамбәри кʹола тьрийе кьр, ле шагьртед хԝә бәрамбәри чʹьԛьла кьр. Кʹола тьрийе чʹьԛьла хԝәй дькә. Һʹәта кӧ әԝ чʹьԛьл кʹола тьрийева ньн, әԝана ав у тьштед дьн дькʹьшиньнә хԝә. Ӧса жи әм, һʹәта кӧ тʹәви Мәсиһ йәктийеда ньн у пәй ԝи дьчьн, әм шабунәкә мәзьн дьстиньн, чаԝа әԝ дьстинә чахе ԛьрара Баве хԝә тинә сери (Йуһʹн. 4:34; 17:13; 1 Пәт. 2:21). Хушкәкә мә бь наве Һана, йа кӧ 40 сали зедәтьр пешәнг ә, дьбежә: «Әԝ шабуна кӧ әз хьзмәтийеда дьстиньм, һелане дьдә мьн ԝәки бәрдәԝам кьм Йаһоԝарʹа хьзмәт кьм». Бәле, шабун ԛәԝате дьдә мә, ԝәки бәрдәԝам кьн мьзгинийе бәла кьн һәрге жи һьндьк мәрьв гӧһ дьдьнә мә (Мәт. 5:10-12).

15. а) Йуһʹәнна 14:27-да дәрһәԛа кʹижан пʹешкʹеше те готьне? б) Чьрʹа әʹдьлайи али мә дькә кӧ бәрдәԝам кьн бәр биньн?

¹⁵ Әʹдьлайи. (Бьхунә Йуһʹәнна 14:27.) Иса бәре еваре пешийа мьрьна хԝә, готә шандийа: «Әз . . . әʹдьлайийа хԝә дьдьмә ԝә». Ле чаԝа әԝ пʹешкʹеш, демәк әʹдьлайа ԝи, али мә дькә кӧ бәр биньн? Чахе әм бь сәбьр ьн, дьле хԝәда әм әʹдьлайе тʹәхмин дькьн, чьмки  заньн ԝәки Йаһоԝа у Иса мә ԛәбул дькьн (Зәб. 149:4; Рʹом. 5:3, 4; Колс. 3:15). Бьраки мә бь наве Улф, йе кӧ 45 сал ә хьзмәткʹаре һәртʹьм ә, дьбежә: «Рʹаст ә хьзмәтийеда әз дьԝәстьм, ле  хьзмәти дьлрʹьһʹәтийе у нета жийине дьдә мьн». Әм гәләк рʹази нә ԝәки мә дьлрʹьһʹәтийа рʹаст дитийә!

16. а) Йуһʹәнна 15:15-да дәрһәԛа кʹижан пʹешкʹеше те готьне? б) Шанди ча дькарьбун достийа ԝида бьмана?

¹⁶ Достийа тʹәви Иса. Паши ве йәке чахе Иса готә шандийед хԝә кӧ дьхԝазә шабуна ԝан «тʹәмам бә», әԝи ԝанрʹа шьровәкьр, ԝәки чьԛас фәрз ә һʹьзкьрьна һʹәлал бьдьнә кʹьфше. Паше әԝи гот: «Мьн һун дост һʹәсаб кьрьн». Рʹасти жи әԝ пʹешкʹешәкә чьԛас ԛимәт ә кӧ бьбьнә достед Иса! Ле шандийа чь гәрәке бькьрана, ԝәки достийа ԝида бьмана? Иса ԝанрʹа гот: «Һәрʹьн бәр бьдьн». (Бьхунә Йуһʹәнна 15:14-16.) Ԝәкә 2 сал пешда, Иса рʹебәри да шандийед хԝә: «Гава һун һәрʹьн, даннасин кьн у бежьн: ‹Пʹадшатийа Әʹзмана незик буйә›» (Мәт. 10:7). Ле ве евара хьлазийе Иса ԝана ԛәԝи кьр, ԝәки әԝана ԝи шьхӧле кӧ ԝана дәстпекьр, бь сәбьр бәрдәԝам кьн (Мәт. 24:13; Марԛ. 3:14). Әве тʹәмийа Иса биньн сери шьхӧләкә һеса нибу, ле ԝана әԝ шьхӧл рʹьнд анинә сери у достийа ԝида ман. Ча? Пе аликʹарийа пʹешкʹешәкә дьн.

17, 18. а) Йуһʹәнна 15:16-да дәрһәԛа кʹижан пʹешкʹеше те готьне? б) Ча әԝе пʹешкʹеше али шагьртед Иса дькьр? в) Кʹижан пʹешкʹеш иро мә ԛәԝи дькьн?

¹⁷ Щаба дӧа. Иса гот: «Һун чь кӧ пе наве мьн жь Баве бьхԝазьн, әԝе бьдә ԝә» (Йуһʹн. 15:16). Бь рʹасти әԝи сози ԝе шанди гәләк бьшьданда! * Рʹаст ә ԝана бь тʹәмами фәʹм нәдькьр, ԝәки зутьрәке гәрәке Иса бьмьрә, ле әԝана ԝе бе аликʹари нәмана. Йаһоԝа тʹьме һазьр бу кӧ щаба дӧайед ԝан бьдә, гава ԝанрʹа аликʹари лазьм буйа сәва ве тʹәмийе биньн сери кӧ мьзгинийе бәла кьн. У бь рʹасти ԝәʹдә шунда ԝана тʹәхмин кьр, кӧ ча Йаһоԝа щаба дӧайед ԝан да (Кʹар. Шанд. 4:29, 31).

¹⁸ Иро жи ӧса нә. Чахе әм бь сәбьр бәр дьдьн, әм достийа Исада дьминьн. Хенщи ве йәке, әм дькарьн дӧдьли нәбьн, ԝәки гава әм хьзмәтийеда рʹасти чәтьнайа бен у жь Йаһоԝа аликʹарийе бьхԝазьн, әԝ ԝе әʹсә щаба дӧайед мә бьдә (Фили. 4:13). Әм чьԛас рʹази нә кӧ Хԝәде щаба дӧайед мә дьдә у кӧ әм достед Иса нә! Әв пʹешкʹешед жь Йаһоԝа мә ԛәԝи дькьн сәва әм бь сәбьр бәр бьдьн (Аԛуб 1:17).

19. а) Чьрʹа әм бәрдәԝам дькьн мьзгинийе бәла кьн? б) Чь али мә дькә кӧ әм шьхӧле Хԝәде һʹәта хьлазийе биньн сери?

¹⁹ Чаԝа мә ве готареда дит, әм бәрдәԝам дькьн мьзгинийе бәла кьн сәва Йаһоԝа рʹумәт кьн, наве ԝи пироз кьн, һʹьзкьрьна хԝә ԝирʹа у Исарʹа бьдьнә кʹьфше, мәрьварʹа пешда әʹлам кьн дәрһәԛа рʹожа Хԝәде, у һьндава мәрьва һʹьзкьрьне бьдьнә кʹьфше. Хенщи ве йәке, әԝ пʹешкʹеш демәк, шабун, әʹдьлайи, дости, у щаба дӧайед мә, мә ԛәԝи дькьн сәва әм шьхӧле Хԝәде һʹәта хьлазийе биньн сери. Йаһоԝа ԝе мәрʹа гәләк ша бә чахе бьвинә кӧ әм бь дьл у щан бәрдәԝам дькьн «бәр» дьдьн!