1, 2. Хьзмәткʹаред Йaһоwа мьqабьли чь чәтьнайа шәрʹ дькьн?

ЖЬ ҺАБИЛ дәстпебуйи һʹәта рʹожа иройин, һʹәму хьзмәткʹаред амьн шәрʹе рʹöһʹанида ньн. Паwлос нәʹма хwәда Мәсиһийед Ибранирʹа ньвиси, кö әwана сәва qәбулкьрьна Йaһоwа у кʹәрәма wи qазанщ кьн, «шәрʹәки гьран» бь щәфа дькʹшандьн (Ибрн. 10:32-34). Паwлос әw шәрʹе Мәсиһийа бәрамбәри ләще кьр, кʹижан кö Йунаньстанеда һәбун, мәсәлә рʹәв, гöлаш, у шәрʹе бь кʹöлма (Ибрн. 12:1, 4). Әм дькарьн бежьн wәки иро әм жи «дьрʹәвьн» рʹийа жийинеда, у хернәхwазе мә гәләк ьн, йед кö дьхwазьн мә бьхальфиньн, шаш кьн, сәва кö әм жь ве рʹе дәрен. Хенщи ве йәке, әwана дьхwазьн wәки әм шабуна хwә öнда кьн у нәгьһижьнә дьнйа тʹәзә.

² Ле гәло әw кʹе нә кö дьхwазьн мә жь ве рʹе дәрхьн? Әw һәйә Шәйтʹан у дьнйа wийә хьраб, ләма әм тʹьме мьqабьли wан шәрʹ дькьн (Әфәс. 6:12). Гәләк фәрз ә wәки әм хwә жь тьштед ве дьнйайе хwәй кьн. Әw дьнйа тʹьжә йә бь һинкьрьнед qәлп, философийе у тьштед хьраб, мәсәлә бенамуси, кʹьшандьна щьхаре, зедә вәхwарьна ичʹке у хәбьтандьна наркотикайе. Хенщи wе йәке, әм гәрәке бәрдәwам кьн мьqабьли qьсуред хwә шәрʹ кьн у шабуне öнда нәкьн (2 Корн. 10:3-6; Колс. 3:5-9).

3. Хwәде бь чь мә һин дькә, кö мьqабьли дьжмьнед хwә шәрʹ кьн?

 ³ Дьжмьнед мә qәwи нә. Ле гәло әм дькарьн wана алт кьн? Бәле әм дькарьн, ле әв йәк нәһеса йә. Паwлос хwә бәрамбәри wи мәрьви кьр, кö бь кʹöлма шәрʹ дькә. Әwи дәрһәqа хwә гот: «Жь бо ве йәке әз беарманщ набәзьм, әз бадиһәwа кʹöлма хwә навежьм һәwайе» (1 Корн. 9:26, ИМ). Чаwа мәрьве кö хwә жь дьжмьн хwәй дькә бь кʹöлма, öса жи әм гәрәке шәрʹ кьн мьqабьли дьжмьнед хwә. Ве йәкеда Йaһоwа али мә дькә. Әw мә һин дькә кö ча дьжмьнед хwә алт кьн. Хәбәра хwәда әw рʹебәрийа дьдә мә, кʹижан кö дькарьн әʹмьре мә хьлаз кьн. Хенщи wе йәке, Йaһоwа бь әʹдәбйәтед кö әм дьстиньн, бь щьвата у щьватед мәзьн али мә дькә у мә ширәт дькә. Бәле, әм гәрәке гöһ бьдьнә һʹәму ширәт у рʹебәрийед Йaһоwа. Һәрге әм öса нәкьн, дькарьн бежьн әм бь тʹәмами дьжмьнед хwә алт накьн, у «бадиһәwа кʹöлма хwә» давежьнә һәwайе.

4. Әм ча дькарьн нәһельн кö хьраби сәр мә кʹәвә?

⁴ Дьжмьнед мә дькарьн һʹöщöми сәр мә кьн, чахе әм qә һивийе ниньн у чахе әм сьст ьн. Ләма гәләк фәрз ә, кö әм тʹьме сәр хwә бьн у фәсал бьн. Кʹьтеба Пироз мә ширәт дькә: «Нәһелә хьраби сәр тә кʹәвә, ле бь qәнщийе тö сәр хьрабийе кʹәвә» (Рʹом. 12:21). Гьлийед «нәһелә хьраби сәр тә кʹәвә», дьдә кʹьфше кö әм дькарьн хьрабийе алт кьн. Әме сәр хьрабийе кʹәвьн, һәрге әм бәрдәwам кьн шәрʹ кьн мьqабьли хьрабийе. Ле һәрге әм сәр хwә нибьн у шәрʹда сьст бьн, wи чахи Шәйтʹан, дьнйа wийә хьраб, у кемасийед мә wе мә алт кьн. Шәйтʹан һәма әве йәке жи дьхwазә. Ләма тʹö щар дьлтәнг нәбьн у бьра дәстед wә сьст нәбьн! (1 Пәт. 5:9).

5. а) Чь дькарә али мә бькә кö әм шәрʹда сьст нәбьн, wәки кʹәрәма Хwәде бьстиньн? б) Ве тʹемайеда әме дәрһәqа кʹижан сәрһатийед жь Кʹьтеба Пироз шеwьр кьн?

⁵ Сәва wи шәрʹида сәр кʹәвьн, әм гәрәке бир нәкьн кö әм чьрʹа шәрʹ дькьн. Бәле, әм дьхwазьн qәбулкьрьн у кʹәрәма Хwәде qазанщ кьн. Ибрани 11:6-да ньвисар ә: «Әwе кö незики Хwәде дьбә, гәрәке баwәр бькә, кö Хwәде һәйә у wе wан хәлат кә, кʹижан кö ль wи дьгәрʹьн». Хәбәра Йунани кö сәр зьмане мә һатә wәлгәрʹандьне ча хәбәра «дьгәрʹьн», те һʹәсабе кö әм гәрәке гьран бьхәбьтьн сәва qәбулкьрьн у кʹәрәма Хwәде qазанщ кьн (Кʹар. Шанд. 15:17). Кʹьтеба Пирозда һәнә гәләк сәрһатийед wан мәрьва, кʹижан дьхәбьтин кö кʹәрәма Хwәде бьстиньн. Мәсәлә, Аqуб, Рʹаһел, Усьв у Паwлос. Әwана рʹасти чәтьнайа дьһатьн, у емосйалида һьм жи физикида wанрʹа гәләк чәтьн бу. Ле йәкә wана бәрдәwам дькьр шәрʹ кьн, сәва кʹәрәма Хwәде бьстиньн. Ча әм дькарьн чʹәʹв бьдьнә wан чар мәрьва?

6. Чь али Аqуб кьр кö бәрдәwам кә шәрʹ бькә, у әw ча һатә кʹәрәмкьрьне? (Бьньһерʹә шькле әʹwльн.)

⁶ Аqубе амьн гәләк Йaһоwа һʹьз дькьр. Әwи һәләqәтийа хwә тʹәви Йaһоwа гәләк qимәт дькьр. Йaһоwа соз дабу wи, кö wе зöрʹәта wи бәрәкʹәт кә, у Аqуб бь тʹәмами баwәрийа хwә созе Йaһоwа дьани. Ләма Аqуб сьст нәдьбу у шәрʹ дькьр, сәва кʹәрәма Хwәде бьстинә (Дәстп. 28:3, 4). Чахе Аqуб wәкә 100 сали бу, чьqас qәwата wи һәбу, һʹәму тьшт кьр сәва кʹәрәма Хwәде бьстинә. Әwи һәла һе жи гöлаш гьрт тʹәви мьлйакʹәте кö wе дәме бьбу мәрьв. (Бьхунә Дәстпебун 32:24-28.) Ле гәло Аqуб пе qәwата хwә тʹәви мьлйакʹәте qәwи гöлаш гьртьбу? На! Ле Аqуб йа хwә кьр у мерхас бу. Әwи да кʹьфше кö wе һʹәта хьлазийе шәрʹ бькә! Ләма жи Йaһоwа әw кʹәрәм кьр. Йaһоwа навәки зедә да сәр Аqуб, Исраел, (чь кö те һʹәсабе «Гöлашгьр тʹәви Хwәде» йан  «Хwәде Гöлаш Дьгьрә»). Аqуб хәлата мәзьн станд, кʹижан кö әм жи дьхwазьн бьстиньн, әw һәйә qәбулкьрьна Йaһоwа у кʹәрәма wи.

7. а) Рʹаһел рʹасти кʹижан чәтьнайе һат? б) Ве чәтьнайеда Рʹаһеле ча хwә да кʹьфше у ахьрийеда әw ча һатә кʹәрәмкьрьне?

⁷ Рʹаһел жьна Аqубә һʹьзкьри, гәләк һивийе бу кö бьвинә, һәла ча созе кö Йaһоwа дабу мере wе, wе бе сери. Ле дәрдәки wе һәбу, кʹижан кö öса дьһатә хане, кö wе нәйе сафикьрьне. Әw безöрʹәт бу. Бәре безöрʹәти кöл-дәрдәки гәләк мәзьн бу бона жьна, ләма Рʹаһел гәләк дьлтәнг дьбу. Әwе нькарьбу әв проблем сафи кьра. Ле гәло әwе жь кʹö дьлбини у qәwат дьстанд, сәва кö wи һʹале чәтьнда тәйах кә? Әwе тʹö щар баwәрийа хwә öнда нәдькьр. Әwе бь дьле хwәйи сах Хwәдерʹа гәләк дöа дькьр. Ле гәло Хwәде дöайе wе бьһист? Бәле, Йaһоwа Рʹаһел кʹәрәм кьр, у wерʹа зарʹ бу. Рʹаһеле гот, кö әwе һʹöщәтеда алт кьр (Дәстп. 30:8, 20-24).

8. Усьв рʹасти кʹижан чәтьнайа һат у әм жь wи чь дькарьн һин бьн?

⁸ Бәле, Аqуб у Рʹаһел амьн бун һьндава Хwәде. У әw мәсәла wанә баш, сәр кöрʹе wан Усьв баш һʹöкöм бу, илаһи wәʹде щерʹьбандьна. Чахе Усьв 17 сали бу, әʹмьре wи бь тʹәмами һатә гöһастьне. Бьред wи әw дилти фьротьн, чьмки һʹәвсуди wи дькьрьн. Паше әw кәла Мьсьреда бь сала бесущ у бадиһәwа рʹуньшт (Дәстп. 37:23-28; 39:7-9, 20, 21). Wи wәʹде чәтьнда, Усьв бина хwә тәнг нәдькьр у нәбу йәки хьраб. Һьн жи, әwи тʹö щар нә дьхwест һʹәйфа хwә һьлдә жь мәрьвед кö һьмбәри wи нәһәqи кьрьн. Гәло чьрʹа? Чьмки Усьв гәләк qимәт дькьр һәләqәтийа хwә тʹәви Йaһоwа у бь тʹәмамийа дьле хwә дьшьрмиш дьбу сәр ве йәке (Qан. Кʹаһ. 19:18; Рʹом. 12:17-21). Жь ве сәрһатийа Усьв, әм дькарьн хwәрʹа дәрсе һьлдьн. Мәсәлә, һәрге зарʹотийа мә хьраб дәрбаз буйә, йан ньһа әм тәнгасийада ньн у дьфькьрьн кö нькарьн жь wан тәнгасийа дәрен, әм жи гәрәке минани Усьв дьлтәнг нәбьн у сьст нәбьн, у öса жи дöдьли нәбьн кö Йaһоwа wе мә әʹсә кʹәрәм кә. (Бьхунә Дәстпебун 39:21-23.)

9. Әм гәрәке мина Аqуб, Рʹаһеле, у Усьв, чь бькьн сәва кʹәрәма Хwәде бьстиньн?

⁹ Иро әм рʹасти щурʹә-щурʹә чәтьнайа тен. Мәсәлә, дьбәкә һьмбәри мә нәһәqийе дькьн, йан хьраб сәр мә дьфькьрьн, йан жи qәрфе хwә мә дькьн. Ле гәрәке әм дьлтәнг нәбьн, у тʹьме бира хwәда хwәй кьн кö ча Аqуб, Рʹаһеле у Усьв шабуна хwә öнда нәдькьрьн. Хwәде жи алийе хwәда wана qәwи кьр у кʹәрәм кьр, чьмки wана һәләqәтийа хwә тʹәви wи гәләк qимәт дькьрьн. Wана бәрдәwам дькьр шәрʹ кьн у ль гора дöайед хwә бьжин. Хьлазийа ве дьнйа хьраб, бәр шемике йә. Ләма әм гәрәке баwәрийа хwә öнда нәкьн у һивийа созед Йaһоwа бьн! Ле һун һʹәму тьшти дькьн, демәк шәрʹ дькьн, сәва кʹәрәма Йaһоwа бьстиньн?

10, 11. а) Сәва qәбулкьрьна Хwәде бьстиньн дьбәкә әм мьqабьли чь шәрʹ кьн? б) Чь дькарә али мә бькә wәки әм тьштед рʹаст бькьн у сәр рʹийа рʹаст бьминьн?

¹⁰ Ле гәло чьрʹа әм гәрәке «шәрʹ кьн», сәва qәбулкьрьна Хwәде бьстиньн? Чьмки әм гьшк гöнәкʹар ьн. Ләма дьqәwьмә һьнәк жь мә мьqабьли хwәстьнед хwәйә хьраб шәрʹ дькьн. Йан жи дьбәкә сәва хьзмәтийеда шабуне хwәй кьн. Йан жи дьбәкә сьһʹәт-qәwата мә нәбаш ә, йан әм тʹәне нә. Һьнәк жи дьбәкә жь кәсәки хәйидинә у wанрʹа чәтьн ә бьбахшиньн. Йaһоwа кʹәрәма хwә дьдә wан, йед кö бь амьни жерʹа хьзмәт дькьн. У фьрqи тʹöнә әм чьqас сал Йaһоwарʹа хьзмәт дькьн, әм гьшк жи гәрәке шәрʹ кьн мьqабьли wан тьшта, чь кö рʹийа мә дьгьрьн сәва хьзмәт кьн.

 ¹¹ Бь рʹастийе щара гәләк чәтьн ә кö тьштед нәрʹаст нәкьн у сәр рʹийа рʹаст бьминьн. Илаһи әw йәк чәтьн ә, чахе дьле мә, мә дькʹьшинә бәрбь хьрабийе (Йерәм. 17:9). Һәрге тö сәр хwә öса тʹәхмин дьки, дәрберʹа Хwәдерʹа дöа бькә. Дöа у рʹöһʹе Хwәдейи пироз дькарьн qәwате бьдьнә тә, сәва сәр рʹийа рʹаст бьмини. Öса тöйе бькарьби кʹәрәма Йaһоwа бьстини. Бьжи анәгори дöайед хwә. Бьхәбьтә wәки һәр рʹож Кʹьтеба Пироз бьхуни, у wәʹдә бьвини сәва леколина бьки у Qöльхкьрьна тʹәви Малбәте. (Бьхунә Зәбур 119:32.)

12, 13. Чь али дö Мәсиһийа кьр кö хwәстьнед хwәйә хьраб алт кьн?

¹² Бәле, Хәбәра Хwәде, рʹöһʹе wийи пироз, у әʹдәбйәтед мә али гәләк Мәсиһийа кьрьнә кö хwәстьнед хьраб алт кьн. Wәрә һьнә мәсәла шеwьр кьн. Бьраки мәйи щаhьл, жь журнала «Һʹьшйар Бьн!» йа 8 Кануна Пешьн, сала 2003, тʹема хwәнд бь наве «Тö Ча Дькари Хwәстьнед Хьраб Алт ки?» Гәло әwе тʹемайе wирʹа кʹар ани? Әw гьли дькә: «Әз шәрʹ дькьм сәва фькьред хьраб жь сәре хwә дәрхьм. Чахе ве тʹемайеда мьн хwәнд, wәки гәләк хушк у бьра шәрʹ дькьн мьqабьли хwәстьнед хwәйә хьраб, мьн тʹәхмин кьр кö әз һәмә пʹарәк жь бьратийа мә. Мьн фәʹм кьр кö әз тʹәне ниньм». Әwи бьрайи öса жи кʹар сьтанд жь тʹема бь наве «Жийина кö Хwәде Qәбул Накә», жь журнала «Һʹьшйар Бьн!» йа 8 Щотмәһе, сала 2003. Әwи дина хwә да, кö wе тʹемайеда те готьне wәки бона һьнәка, шәрʹ кьн мьqабьли хwәстьнед хwәйә хьраб те  һʹәсабе ча бежи «дәрзик qальбе» wанда (2 Корн. 12:7). Бәле, әw хушк-бьра шәрʹ дькьн тʹәви хwәстьнед хwәйи нәрʹаст, ле йәкә әwана бь баwәрийе дьфькьрьн сәр ахьрийе. Әw бьра бәрдәwам дькә дьбежә: «Мьн фәʹм кьр кö һәрге әз рʹож бь рʹож нете дайньм кö Хwәдерʹа амьн бьминьм, әзе бькарьбьм һәр рʹож амьнийе хwәй кьм. Әз гәләк рʹази мә жь Йaһоwа, кö әw бь сайа тʹәшкиләта хwә али мә дькә, кö һәр рʹож wе дьнйа зöлмда амьн бьминьн».

¹³ Бьньһерʹьн öса жи мәсәла хушкәке, йа кö дьжи Дәwләтед Йәкбуйида. Әwе нәʹмәк ньвиси офиса сәрәкәрʹа: «Әз дьхwазьм рʹазибуна хwә бьдьмә кʹьфше сәва хwарьна рʹöһʹани, кʹижан кö әм тʹьме дьстиньн. Әм һʹәwще ве хwарьне нә у әм тʹьме wәʹде лазьмда дьстиньн. Щәм мьн һәйә хwәстьна öса, кö бәр чʹәʹве Йaһоwа рʹәш ә. Бь сала әз ‹шәрʹ дькьм› сәва әве хwәстьна хьраб алт кьм. Щара әз дьлтәнг дьбьм у ида те бежи нькарьм ‹шәрʹ кьм›. Әз баwәр дькьм кö Йaһоwа рʹәʹм ә у дьбахшинә, ле чьмки әз ве хwәстьна хьраб кʹокева дьле хwәда дәрнахьм, ләма дьфькьрьм кö әз һежайи аликʹарийа Йaһоwа ниньм. Әw ‹шәрʹе› мьqабьли хwәстьна хьраб, һʹәму алийава сәр әʹмьре мьн һʹöкöм бу. . . . Щарәке, мьн жь ‹Бьрща Qәрәwьлийе› йа 15 Адаре, сала 2013 тʹема хwәнд бь наве ‹Гәло Дьле Тә Йaһоwа Нас Дькә?› Паши хwәндьна ве тʹемайе, дьле мьн рʹьһʹәт бу, чьмки мьн тʹәхмин кьр кö Йaһоwа дьхwазә али мьн бькә».

14. а) Паwлос чь гот дәрһәqа «шәрʹе» тʹәви qьсуред хwә? б) Әм ча дькарьн сәркʹәвьн, чахе мьqабьли qьсуред хwә шәрʹ дькьн?

¹⁴ Бьхунә Рʹомайи 7:21-25. Паwлос рʹьнд заньбу кö чьqас чәтьн ә мәрьв мьqабьли хwәстьнед хьраб шәрʹ кә. Ле әw öса жи сәд сәләфи баwәр бу, кö әw дькарә wи «шәрʹида» сәркʹәвә, һәрге бона аликʹарийе Йaһоwарʹа дöа бькә у баwәрийа хwә qöрбана Иса бинә. Ле гәло әм жи дькарьн сәркʹәвьн, чахе мьqабьли qьсуред хwә шәрʹ дькьн? Бәле, әме бькарьбьн сәркʹәвьн, һәрге мина Паwлос бь тʹәмами итʹбарийа хwә Йaһоwа тиньн, нә кö хwә, у баwәрийа хwә qöрбана Иса тиньн.

15. Ча дöа дькарә али мә бькә кö баwәрийа хwә хwәй кьн у wәʹде тәнгасийа сәбьр кьн?

¹⁵ Щара Йaһоwа дәрберʹа щаба дöайед мә надә, чьмки дьхwазә бьвинә һәла әм бь тʹәмами итʹбарийа хwә wи тиньн йан на. Мәсәлә, һәрге нәхwәшийа мәйә гьран йан йа мәрьвед мәйи незик һәйә, йан жи һьмбәри мә нәһәqийе дькьн, ча әм хwә кʹьфш дькьн? Әм гәрәке бь тʹәмами итʹбарийа хwә Йaһоwа биньн. Әм гәрәке тʹьме wирʹа дöа бькьн сәва әw qәwате бьдә мә, wәки баwәрийа хwә хwәй кьн у шабуне öнда нәкьн. Öса жи, дöа дькарә али мә бькә wәки әм рʹöһʹанида нәкʹәвьн (Фили. 4:13). Сәрһатийед хьзмәткʹаред амьн, wәʹде бәре у ньһа, избат дькьн wәки дöа бь рʹастийе qәwате дьдә мә у мә qәwи дькә, сәва әм тәнгасийада сәбьр кьн.

16, 17. Жь ве тʹемайе wә чь кʹар станд?

¹⁶ Шәйтʹан wе гәләк ша бә, һәрге бьвинә кö әм сьст бунә у дьлтәнг бунә. Ләма гәләк фәрз ә wәки әм хwә qәwи «тьштед qәнщ» бьгьрьн (1 Тʹеслн. 5:21). Тʹьме баwәр бьн кö һун дькарьн Шәйтʹан, дьнйа wийә хьраб, у qьсуртийа хwә алт кьн. Бәле, һун дькарьн сәркʹәвьн һәрге итʹбарийа хwә Хwәде тиньн, кö әw wе али wә бькә у wә qәwи кә (2 Корн. 4:7-9; Галт. 6:9).

¹⁷ Тʹö щар сьст нәбьн! Бәрдәwам кьн шәрʹ кьн мьqабьли хьрабийе. Баwәрийа хwә Йaһоwа биньн, кö әw wе әʹсә кʹәрәмед хwә сәр wә бьбаринә! (Малх. 3:10).