ԜӘКӘ сала 1935-да, де-баве мьн Щеймс у Щеси Синклер жь Скотләндайе дәрбази шәһәре Бронксе бьбун, (Нийу Йорк). Йәк жь насе ԝани тʹәзә Ԝили Снедон бу, у әԝ жи жь Скотләндайе бу. Чахе әԝана тʹәви һәв бьбунә нас, һьнге дәрһәԛа малбәтед хԝә гьли кьрьбун. Әԝ йәк чәнд сал пешийа буйина мьн бу.

Дийа мьн Ԝилирʹа гьли кьрьбу ԝәки пешийа кӧ Шәрʹе Һʹәмдьнйайе дәстпебуйа, баве ԝе у бьре ԝейи мәзьн мьрьбун, чьмки Бәʹра Бакʹуреда ԛәйька ԝана тʹәԛандьбун у әԝана хәньԛибун. Һьнге Ԝили дьбежә ԝе: «Баве тә щәʹньмеда йә!». * Дийа мьн зәндәгьрти дьминә. Ԝили Шәʹде Йаһоԝа бу, у ӧса дийа мьн рʹастийе жь ԝи педьһʹәсә.

Гьлийед Ԝили дьле дийа мьн дешиньн, чьмки баве ԝе мәрьвәки һʹәйф буйә. Ле паше Ԝили жерʹа дьбежә: «Ле ԝе дьле тә рʹьһʹәт бә һәрге әз тәрʹа бежьм кӧ Иса чу щәʹньме?» Һьнге дькʹәвә бира дийа мьн кӧ дереда һин дькьрьн ԝәки Иса чу щәʹньме у рʹожа сьсийа сах бу. Дийа мьн хԝәрʹа фькьрибу: «Һәрге щәʹньм әԝ щи йә кʹидәре кӧ мәрьвед хьраб нава агьрда дьчәрчьрьн, ле чьрʹа Иса чу ԝедәре?». Паши ве йәке дийа мьн хԝәстьбу һе зедә дәрһәԛа рʹастийе пебьһʹәсә. Әԝ дәстпедькә һәрʹә щьвата Бронксе у сала 1940-да те ньхӧмандьне.

Ԝи ԝәʹдәйи, де-бавед кӧ Мәсиһи бун, нәдьһатьнә һеланкьрьне кӧ тʹәви зарʹед хԝә һинбуна Кʹьтеба Пироз дәрбаз бьн. Чахе әз бьчʹук бум, дийа мьн шәʹми у ләʹде дьчу щьвата у хьзмәт дькьр, ле һʹәта әԝ бьһата, баве мьн мьԛати мьн дьбу. Паши чәнд сала мә тʹәви дийа мьн дәстпекьр бенә сәр щьвате. Әԝ хьзмәтийеда гәләк хирәт бу, у тʹәви чәнд мәрьва һинбуна Кʹьтеба Пироз дәрбаз дькьр. Щара ӧса дьбу кӧ әԝе тʹәви чәнд мәрьва тʹәвайи һинбуна Кʹьтеба Пироз дәрбаз дькьр, чьмки әԝана незики һәв дьман. Ԝәʹде һесабуне йа мәкʹтәбе әз тʹәви ԝе дьчумә хьзмәтийе. Ӧса әз һе зедә тьшт жь Кʹьтеба Пироз пеһʹәсийам у ӧса жи һин бум кӧ чаԝа мәрьва һин кьм.

 Сәд һʹәйф чахе әз бьчʹук бум, мьн рʹасти бь тʹәмами ԛимәт нәдькьр. Ле чахе әз ида бум ԝәкә 12 сали, әз бумә хьзмәткʹаре нәньхӧманди у мьн тʹьме хьзмәт дькьр. Чахе әз 16 сали бум, мьн хԝә тʹәсмили Йаһоԝа кьр, у 24 Тирмәһе сала 1954-да һатьмә ньхӧмандьне сәр щьвата мәзьн Торонтойеда (Канада).

Һьнә бьред жь щьвата мә Бәйтʹәледа хьзмәт дькьрьн. Әԝана гәләк ԛәԝи сәр мьн һʹӧкӧм дьбун. Әз әʹщебмайи дьмам кӧ әԝана ча ԝәʹде хьзмәтийе у чахе готар дьхԝәндьн, рʹастийа Кʹьтеба Пироз шьровәдькьрьн. Дәрсдаред мәкʹтәба мьн гәләк дьхԝәстьн ԝәки әз хԝәндьна бьльнд бьстиньм, ле мьн гәләк дьхԝәст Бәйтʹәледа хьзмәт кьм. Ләма жи сәр ԝе щьвата мәзьн Торонтойеда мьн бланка Бәйтʹәле тʹьжә кьр. Сала 1955 мьн сәр щьвата мәзьн кӧ сәр стадийона Йанки бу (Нийу Йорк), щара дӧда әв бланк тʹьжә кьр. Ве сале, 19 Илоне мьн тʹәглифи Бәйтʹәла Бруклине кьрьн, һьнге әз 17 сали бум. Рʹожа дӧда Бәйтʹәледа мьн дәстпекьр бьхәбьтьм сәр мәкʹина кӧ бәлге кʹьтеба тʹоп дькьр у пʹар-пʹар һазьр дькьр, сәва кӧ мәкʹина дьн һәвва бьдьру у бькә кʹьтеб.

Паши ԝәкә мәһәке, мьн шандьнә Идара Журнала, чьмки мьн нәшьркьрьн заньбу. Һьнге хушк-бьра сәр һʹәсьнед бьчʹук у пәʹн, нав у адреса ԝан мәрьва нәшьр дькьрьн, йед кӧ сьфарәш дькьрьн «Бьрща Ԛәрәԝьлийе» у «Һьшйар бьн!». Әв адрес бь ван һʹәсьна сәр журнала дьһатьнә моркьрьне. Чәнд мәһ шунда, мьн Идара Шандьна Әʹдәбйәтада хьзмәт дькьр. Клаус Щенсен кӧ сәркʹаре ве идаре бу, мьнрʹа гот кӧ әз гәрәке тʹәви ажован һәвкʹарийе бькьм, йе кӧ ԛӧтʹийед әʹдәбйәта пе әʹрәба баркʹеш дьбьрә щийе сәкьнандьна гәмийа, сәва паше нав тʹәмамийа дьнйайе бенә шандьне. Ӧса жи һәбун тʹорбед бь  журнала тʹьжә кӧ гәрәке бьвьрана пʹоштәйе (нәʹмәкханә), сәва кӧ нав тʹәмамийа Амәрикайе щьватарʹа бьһатана шандьне. Щенсен бьра гот кӧ әв хәбата физики ԝе бона сьһʹәт-ԛәԝата мьн баш бә. Һьнге гьранийа мьн ԝәкә 57 кило бу у әз ӧса жар бум ча чʹәрм һәсту. Әз гәләк рʹе дьчум-дьһатьм щийед сәкьнандьна гәмийа у пʹошта, у рʹасти жи сьһʹәт-ԛәԝата мьн ԛәԝи бу. Щенсен бьра рʹасти жи заньбу бона мьн чь һе баш ә!

Идара Журнала щабдар бу сәва бьньвисә кӧ кʹижан щьват чьԛас журнал дьхԝазә. Ԝи щурʹәйи әз пеһʹәсийам кӧ Бруклин сәр кʹижан зьмана журналед мә нәшьр дькә у ԝәлатед дьнрʹа дьшинә. Мьн ԛә нә жи бьһистьбу дәрһәԛа гәләк зьмана, ле әз гәләк ша дьбум кӧ бь дәһа һʹәзара журналед мә дьһатьнә шандьне ль гәләк ԝәлатед дур. Һьнге мьн ньзаньбу кӧ әзе ахьрийеда ԛәдьрәки ӧса бьстиньм, ԝәки тʹәсәлийа гәләк жь ԝан ԝәлата бькьм.

Сала 1961-да, әз һатьм кʹьфшкьрьне Офиса Һʹәсабе Пʹәрада, кʹидәре кӧ Грант Суитер сәркʹарти дькьр. Паши чәнд сала, гази мьн кьрьн ль офиса Нейтан Нор, кʹижани кӧ һьнге рʹебәрийа шьхӧле мәйи һʹәмдьнйайе дькьр. Әԝи шьровәкьр кӧ бьрак, кʹижан офиса ԝида дьхәбьти, гәрәке һәрʹә Мәкʹтәба Хьзмәтийе у паше хьзмәт кә Идара Хьзмәтийеда. Мьн дәԝса ԝи бьрайи кʹьфш кьрьн у әз тʹәви Дон Адамс бьра дьхәбьтим. Ӧса һʹәԝас бу кӧ Дон һәма әԝ бьра бу, кʹижан кӧ сала 1955 сәр щьвата мәзьн, бланка мьнә Бәйтʹәле ԛәбул кьр. Дӧ бьра Роберт Ԝолен у Чарлз Молоһан ида ԝе идареда дьхәбьтин. Мә һәрчар бьра тʹәвайи 50 сала зедәтьр хьзмәт кьр. Әз бәхтәԝар бум кӧ мьн тʹәви ԝан бьред рʹӧһʹанида ԛәԝи у амьн, хьзмәт дькьр! (Зәб. 133:1).

 Дәстпека сала 1970, мьн щабдари станд, ԝәки һәр сал йан дӧ сала щарәке, чәнд һʹәфтийа тʹәсәлийа щурʹә-щурʹә филиала бькьм. Шьхӧле мьн әԝ бу кӧ әндәмед Бәйтʹәла у мисйонерʹа рʹӧһʹанида ԛәԝи кьм, у ӧса жи һʹәсаб у документед филиала бьщерʹьбиньм. Әз гәләк ша дьбум ԝан хушк-бьра бьвиньм, йед кӧ Мәкʹтәба Гиләд хьлаз кьрьбун у диса жи бь амьни хьзмәт дькьрьн ԝәлатед хәрибда кʹидәре кӧ әԝана һатьбун кʹьфшкьрьне. Әԝ шабун у ԛәдьрәки мәзьн ә бона мьн, кӧ бь сайа ве кʹьфшкьрьне мьн 90 ԝәлатада зедәтьр тʹәсәлийа хушк-бьра кьр.

Һʹәму әндәмед Бәйтʹәла Бруклине кʹьфшкьри бун щьватед Нийу Йоркеда. Әз һатьмә кʹьфшкьрьне щьвата Бронкседа. Щьвата пешийе ԝи шәһәре бьчʹукда, зу мәзьн бу у паше пʹарәвәбу. Наве ве щьвата пешийе, Щьвата Бронксейә Жорьн бу, у әз дьчумә ве щьвате.

Ԝәкә сала 1965-да, малбәтәкә Латвйайи кӧ Бронкса башуреда бунә Шәʹдед Йаһоԝа, дәрбази ԝе щьвате бун. Ливйа, кӧ ве малбәтеда ԛиза мәзьн бу, гава кӧ мәкʹтәб хьлаз кьр пешәнгти дәстпекьр. Чәнд мәһ шунда, әԝ дәрбази Мәсашусәтсе бу, кʹидәре кӧ һʹәԝщәтийа мьзгинвана һәбу. Мьн жерʹа дьньвиси дәнг-бәʹсед щьвата мә, у әԝе жи мьнрʹа дьньвиси кӧ алийе Бостоне хьзмәтийа ԝе ча нә.

Чәнд сал шунда, Ливйа һатә кʹьфшкьрьне ча пешәнга мәхсус. Әԝе гәләк дьхԝәст хьзмәтийеда һе зәʹф бькә, ләма әԝе бланка Бәйтʹәле тʹьжә кьр у сала 1971-да әԝ тʹәглифи Бәйтʹәле кьрьн. Те бежи әԝ жь Йаһоԝа нишан бу бона мьн! Сала 1973-да 27 Щотмәһе, мә һәв станд у мә ԛәдьрәки мәзьн станд кӧ Нор бьра готар бона зәԝаща мә хԝәнд. Мәтʹәлок 18:22-да те готьне: «Кʹи жьне дьбинә, хер у хьзне дьбинә у жь Хӧдан рʹәʹм-кʹәрәме дьстинә». Әз тʹәви Ливйайе ида 40 сала зедәтьр ә Бәйтʹәледа хьзмәт дькьм, у әм Бронкседа диса аликʹарийе дьдьнә щьвата ԝе мьһале.

Һәвкʹари тʹәви Нор бьра рʹасти жи ԝәʹдәки хԝәш бу. Әԝ гәләк хәбатһʹьз бу, у мисйонеред нав тʹәмамийа дьнйайе гәләк ԛимәт дькьр. Гәләк жь ԝан мисйонера һатьбунә кʹьфшкьрьне ԝан ԝәлатада, кʹидәре кӧ Шәʹдед Йаһоԝа тʹӧнә бун. Сәд һʹәйф кӧ сала 1976-да Нор бьра жь нәхԝәшийа рʹәԛе дьчәрчьри. Щарәке чахе әԝ нав щи-ньвинада бу, әԝи мьнрʹа гот кӧ жерʹа һьнә готара бьхуньм, кʹижан кӧ гәрәке бьһатана нәшьркьрьне. Әԝи ӧса жи гот ԝәки гази Фредерик Франс бькьм сәва әԝ жи бе у хԝәндьне бьбьһе. Паше әз пеһʹәсийам ԝәки Нор бьра тʹьме Фредерик Франсрʹа әԝ готар дьхԝәндьн, чьмки Фредерик бьра чʹәʹвада бәләнгаз бу.

Нор бьра сала 1977 мьр. Хушк-бьред кӧ ԝи нас дькьрьн у һʹьз дькьрьн дьле ԝан дешийа, ле әԝана дьлгәрм дьбун, чьмки әԝ амьн ма ԝәʹде жийина хԝәйә сәр әʹрде (Әʹйан. 2:10). Паши ԝи, Франс  бьра дәстпекьр рʹебәрийа шьхӧле мәйи һʹәмдьнйайе бькә.

Һьнге әз аликʹарчийе Милтон Һеншел бум, кʹижан кӧ бь дәһа сала тʹәви Нор бьра хәбьти бу. Һеншел бьра мьнрʹа гот кӧ щабдарийа мьнә сәрәкә Бәйтʹәледа әԝ ә, ԝәки аликʹарийе бьдьмә Франс бьра чьда кӧ лазьм ә. Мьн тʹьме жерʹа готар дьхԝәндьн кʹижан кӧ гәрәке бьһатана нәшьркьрьне. Франс бьра һәр тьшт бира хԝәда хԝәй дькьр у тʹьме гәләк кʹур гӧһе хԝә дьда сәр хԝәндьне. Әԝ ԝәʹдәки гәләк баш бу бона мьн, кӧ мьн али ԝи дькьр һʹәта жийина ԝийә сәр әʹрде. Әԝ сала 1992 мәһа Кануна Пешьнда мьр.

Әз ида Бәйтʹәледа 61 сал ә хьзмәт дькьм, ле әԝ ԝәʹдә бона мьн гәләк зу дәрбаз бу. Де-баве мьн һʹәта мьрьне Йаһоԝарʹа амьн ман, у әз бь дьл у щан һивийа ԝи ԝәʹдәйи мә чахе диса ԝана бьвиньм (Йуһʹн. 5:28, 29). Әв дьнйа нькарә мәрʹа тьштәки ӧса бьдә, ԝәки ԛимәттьр бә жь ԝи ԛәдьри кӧ хьзмәт кьн тʹәви хушк-бьред амьн. Әԝ хушк-бьра бона щьмәʹта Хԝәде нав тʹәмамийа дьнйайе ԛәԝата хԝә хәрщ дькьн. Бь рʹасти бежьм нава ԝан салед хьзмәтийа һәртʹьмда шабуна Йаһоԝа ԛәԝата мьн у Ливйа бу (Нәһәм. 8:10).

Тʹәшкиләта Йаһоԝада мәрьвәки ӧса тʹӧнә йә, кӧ бей ԝи шьхӧле бәлакьрьна мьзгинийа Пʹадшатийе пешда нәчә. Нава ԝан салада бона мьн ԛәдьрәки мәзьн бу кӧ тʹәви хушк-бьред ԛәԝи у амьн һәвкʹарийе бькьм. Гәләк йед бьжарти тʹәви кʹе жи мьн һәвкʹари дькьр, ньһа ида сәр әʹрде ниньн. Ле әз гәләк рʹази мә кӧ мьн тʹәви ԝан мәрьвед рʹӧһʹанида ԛәԝи у Хԝәдерʹа амьн, хьзмәт кьрийә.