1. Чьрʹа хьзмәткʹаред Йаһоwа мәрьвнә бәхтәwар ьн? (Бьньһерʹә шькле әʹwльн.)

ШӘʹДЕД ЙАҺОWА мәрьвнә бәхтәwар ьн. Чахе әwана тʹәвайи сәр щьвата, щьватед мәзьн йан жи щики дьн тʹоп дьбьн, тʹьме ша нә у тʹәви һәв хwәш хәбәр дьдьн у дькʹәньн. Ле чьрʹа әwана öса бәхтәwар ьн? Мәʹнийа сәрәкә әw ә, кö әwана «Хwәдейе хwәзьли» Йаһоwа нас дькьн, жерʹа хьзмәт дькьн у чʹәʹв дьдьнә wи (1 Тимтʹ. 1:11; Зәб. 16:11). Йаһоwа Канийа бәхтәwарийе йә, ләма әw дьхwазә әм бәхтәwар бьн у әw гәләк мәʹни дьдә мә wәки әм ша бьн (Qан. Дщр. 12:7; Wаиз 3:12, 13).

2, 3. а) Бәхтәwари чь йә? б) Чьрʹа чәтьн ә бәхтәwар бьминьн?

² Ле хут дәрһәqа хwә һун чь дькарьн бежьн? Һун бәхтәwар ьн? Бәхтәwари әw ә, чахе мәрьв хwә баш тʹәхмин дькә, әʹмьре хwәрʹа рʹази йә, ша дьбә у дьхwазә wәки әw йәк кʹöта нәбә. Кʹьтеба Пироз дьдә кʹьфше, wәки мәрьв бь рʹасти һьнге бәхтәwар ә, чахе һәләqәтийа wи тʹәви Йаһоwа баш ә. Ле йәкә ве дьнйайеда чәтьн ә бәхтәwар бьминьн у шабуна хwә öнда нәкьн. Чьрʹа?

³ Чахе әм дькʹәвьнә тәнгасийа, мәсәлә һәрге мәрьве мәйи незик мьрийә, йан жи мәрьвәки мә жь щьвате һатийә  дәрхьстьне, йан әм жь мер йан жьна хwә qәтийанә, йан жи мә хәбата хwә öнда кьрийә, әw йәк дькарә шабуне жь мә бьстинә. Öса жи чәтьн ә бәхтәwар бьминьн чахе малда әʹдьлайи тʹöнә, чьмки һәр гав шәрʹ-дәʹw ә. Һьн жи чахе сәр хәбате йан мәкʹтәбеда qәрфа мә дькьн, пәй мә дькʹәвьн, йан мә дькьнә кәле, чәтьн ә бәхтәwар бьн. Хенщи ве йәке, сьһʹәт-qәwата хьраб, нәхwәшийед кʹроники, у депресийа жи сәр мә хьраб дькарә һʹöкöм бә. Ле Иса Мәсиһ һʹьз дькьр, wәки бәр дьле мәрьвада бе у wана бәхтәwар кә (1 Тимтʹ. 6:15; Мәт. 11:28-30). Иса wәʹде Даннасинкьрьна хwәйә сәр Чʹийе, бәʹса wан һʹöнöра кьр, кʹижан кö дькарьн али мә бькьн кö әм бәхтәwар бьминьн ве дьнйа Шәйтʹанда, кö бь тәнгасийа тʹьжә йә.

4, 5. Чаwа бәхтәwар бьминьн?

⁴ Чахе Иса дәрһәqа бәхтәwарийе хәбәр дьда, пешийе бәʹса тьштәки гәләк фәрз кьр. Әwи гот: «Бәхтәwар ьн әw, йед кö фәʹм дькьн һʹәwщәтийа хwәйә рʹöһʹани, чьмки Пʹадшатийа Әʹзмана йа wан ә» (Мәт. 5:3, ДТʹ). Ле гәло әм ча дькарьн бьдьнә кʹьфше, wәки әм фәʹм дькьн кö һʹәwщәтийа мәйә рʹöһʹани һәйә? Ве йәке әм дьдьнә кʹьфше, гава хwарьна рʹöһʹани дьхwьн, фәʹм дькьн wәки гәрәке Хwәде нас кьн у öса жи аликʹари у рʹебәрийа wи дьгәрʹьн. Һәрге әм öса бькьн, әме һе бәхтәwар бьн. Баwәрийа мә жи wе һе qәwи бә һьндава созед Хwәде. У әме һе qәwи бьн һьндава «һевийа хwәзьли», кö Хәбәра Хwәде соз дьдә хьзмәткʹаред рʹаст (Тито 2:13, ДТʹ).

⁵ Сәва әм бәхтәwар бьминьн, гәләк фәрз ә һәләqәтийа мә тʹәви Йаһоwа qәwи бә. Паwлосе шанди ньвиси: «Тʹьме пе Хöдан [Йаһоwа] ша бьн, диса дьбежьм тʹьме ша бьн!» (Фили. 4:4). Сәва әм достийа хwәрʹа тʹәви wи ша бьн, әм гәрәке биланийа жь Хwәде qазанщ кьн. Хәбәра Хwәде дьбежә: «Хwәзи ль wи мәрьви кö сәрwахтийе дьбинә у ль wи мәрьви кö билантийе дьстинә! Әw бона йед кö wе дәст тиньн дара жийине йә, йед кö wе qәwин дьгьрьн бәхтәwар дьбьн!» (Мәтʹлк. 3:13, 18).

6. Бәхтәwарийа мә чьва гьредайи йә?

⁶ Ле сәва бәхтәwар бьминьн, бәс нинә тʹәне Хәбәра Хwәде бьхуньн, фәрз ә биньн сери wан тьшта чь кö әм педьһʹәсьн. Иса да кʹьфше кö әw йәк гәләк фәрз ә, чахе гот: «Һәгәр һун ве йәке заньн, һуне хwәзьли бьн гава бьqәдиньн». (Йуһʹн. 13:17; бьхунә Аqуб 1:25.) Бәле, әw йәк гәләк фәрз ә һәрге әм дьхwазьн рʹöһʹанида һʹәwщәтийа хwә рʹази кьн у бәхтәwар бьминьн. Ле ча әм дькарьн бәхтәwар бьн, чахе дор бәре мә һаqас тьшт дьqәwьмьн, кö шабуне жь мә дьстиньн? Wәрә әм шеwьр кьн кö Иса паше чь гот wәʹде Даннасинкьрьна хwәйә сәр Чʹийе.

7. Чаwа әwед кö шине дькьн дькарьн бәхтәwар бьн?

⁷ «Хwәзи ль һʹәзнийа, чьмки бәр дьлед wанда wе бе һатьне» (Мәт. 5:4). Дьбәкә һьнәк дьфькьрьн wәки «Мәрьвед кö шине дькьн ча дькарьн бәхтәwар бьн?» Wьра Иса дәрһәqа һʹәму мәрьва нәгот, кʹижан кö бона щурʹә-щурʹә мәʹнийа, һʹәзнийе дькьн. Һәла һе мәрьвед хьраб жи кöл-дәрда дькʹьшиньн, чьмки зәманед хьрабда дьжин (2 Тимтʹ. 3:1). Ле wәʹде тәнгасийа әwана тʹәне дәрһәqа хwә дьфькьрьн, нә кö дәрһәqа Йаһоwа,  чьмки һәләqәтийа wан тʹәви wи незик нинә у әwана нькарьн бәхтәwар бьн. Ча те кʹьфше һьнге Иса дәрһәqа wан мәрьва дьгот, йед кö фәʹм дькьн һʹәwщед хwәйи рʹöһʹани. Әw мәрьв һʹәзнийе дькьн бона ве йәке, кö дьнйа алийе рʹöһʹанида һʹаләки гәләк хьрабда нә. Әwана öса жи фәʹм дькьн, wәки мәрьв гöнәкʹар ьн у дьвиньн кö жь бо ве йәке чьqас тьштед хьраб дьqәwьмьн. Йаһоwа дина хwә дьдә wан һʹәзнийа йед кö дьлсах ьн, у wана кʹәрәм дькә бь ве йәке кö бәрдьлийе дьдә wан бь Хәбәра хwә, әʹмьре wан ша дькә у ахьрийеда wе жийина һʹәта-һʹәтайе бьдә wан. (Бьхунә Һәзәqел 5:11; 9:4.)

8. Шьровәкьн кö чаwа шкәстибун бәрбь бәхтәwарийе дьбә.

⁸ «Хwәзи ль шкәстийа, чьмки дьнйайе пʹара wан бә» (Мәт. 5:5). Ле һәрге әм шкәсти нә, әм ча дькарьн бәхтәwар бьн? Мәрьвед кö рʹастийе педьһʹәсьн, тенә гöһастьне. Пешийа ве йәке, дьбәкә әwана һерс, шәрʹуд у сәрт бун, ле ньһа әwана «мәрьве ну» ль хwә кьрьнә у «дьлшәwатийе, qәнщийе, мьлуктийе, бәрбьһерийе у сәбьре» дьдьнә кʹьфше (Колс. 3:9-12). Ләма әwана әʹдьлайеда ньн, һәләqәтийа баш тʹәви мәрьва хwәй дькьн у бәхтәwар ьн. Хенщи ве йәке, Хәбәра Хwәде соз дьдә wан мәрьва, wәки «дьнйайе пʹара wан бә» (Зәб. 37:8-10, 29).

9. а) Чь щурʹәйи «дьнйайе пʹара» шкәстийа бә? б) Чьрʹа әwед кö «тʹи у бьрʹчийе рʹастиqәдандьне нә» дькарьн бәхтәwар бьн?

⁹ Ле чь щурʹәйи «дьнйайе пʹара» шкәстийа бә? Дьнйа wе бьбә пʹара Мәсиһийед бьжарти, чахе әwана сәрwертийа әʹрде бькьн чаwа пʹадша у кʹаһин (Әʹйан. 20:6). Бь милйона мәрьвед дьн кö wе сәр әʹрде бьжин, дьнйа wе пʹара wан бә жи бь wи щурʹәйи, кö wе сәр әʹрде һʹәта-һʹәтайе бьжин. Әwана wе беqьсур бьн, у әʹдьлаийе у бәхтәwарийеда бьжин. Әwана жи дькʹәвьнә нава wан мәрьва, йед кö бәхтәwар ьн, чьмки «тʹи у бьрʹчийе рʹастиqәдандьне нә» (Мәт. 5:6). Бьрчибуна wанә алийе рʹöһʹанида у тʹибуна wанә рʹастиqәдандьнеда, wе бь тʹәмами бьшке дьнйа тʹәзәда (2 Пәт. 3:13). Чахе Хwәде ахьрийеда хьрабийе бь тʹәмами бьдә һьлдане, бәхтәwарийа мәрьвед рʹаст wе тʹö щар сәва хьрабийе у зöлмийе нәкʹәвә зийане (Зәб. 37:17).

10. Чь те һʹәсабе рʹәʹм бьн?

¹⁰ «Хwәзи ль дьлрʹәʹма, чьмки әwе рʹәʹме бьбиньн» (Мәт. 5:7). Хәбәра Ибрани кö те һʹәсабе рʹәʹмти, әw һәйә дьловани, ширьнайи у чахе гöне хwә wан тиньн, йед кö чәтьнайа дькʹьшиньн. Ле әw хәбәр бь зьмане Йунани öса жи те һʹәсабе, кö дьле мерьв сәр кәсәки дьшәwьтә. Ле йәкә рʹәʹмти тʹәне дьлшәwати найе һʹәсабе. Кʹьтеба Пироз дьбежә wәки әw һәйә шьхöл кö бона wан мәрьва дькьн, гöне хwә кʹижана тиньн.

11. Әм чь дькарьн һин бьн жь рʹәʹма мәрьве Самәри?

¹¹ Бьхунә Луqа 10:30-37. Мәсәла Иса дәрһәqа мәрьве Самәри әшкәрә дьдә кʹьфше кö чь те һʹәсабе рʹәʹм бьн. Дьле йе Самәри сәр wи мәрьви йе кö кʹәтьбу һʹале хьраб, öса шәwьти, кö әwи һәр тьшт кьр сәва дәрде wи сьвьк кә. Паше чахе Иса әw мәсәлә гьли кьр, әwи гот: «Һәрʹә тö жи öса бькә». Дьбәкә әм жи пьрсе бьдьнә хwә: «Ле әз мина wи мәрьве Самәри дьлшәwат ьм? Әз дькарьм һе зедә рʹәʹм бьм у qәнщийе бькьм wан мәрьварʹа, йед кö тәнгасийеда ньн? Мәсәлә, әз дькарьм аликʹарийе бьдьм хушк-бьред әʹмьрда мәзьн, жьнәбийа, йан wан зарʹа де-баве кʹижана нәбаwәр ьн? Әз дькарьм дьл бьдьмә бәр wан мәрьва, йед  кö дьлшкәсти нә у депресийеда ньн?» (1 Тʹеслн. 5:14; Аqуб 1:27).

12. Чь щурʹәйи әм бәхтәwар ьн чахе рʹәʹм ьн?

¹² Ле чь щурʹәйи әм бәхтәwар ьн чахе рʹәʹм ьн? Чахе әм һьндава мәрьва рʹәʹм ьн, әм бәхтәwар дьбьн, чьмки мәрʹданийе дьдьнә кʹьфше. Хенщи ве йәке, әм заньн, wәки әм öса дьле Йаһоwа ша дькьн. (Кар. Шанд. 20:35; бьхунә Ибрани 13:16.) Даwьд дәрһәqа мәрьве дьлрʹәʹм, гот: «Хöдане wи хwәй кә у әʹмьр бьдә, әwе ль сәр дьне хwәзьли бә» (Зәб. 41:1, 2). Чахе әм дьлшәwат ьн һьндава мәрьва, Йаһоwа жи wе һьндава мәда рʹәʹм бә у һʹәта-һʹәтайе бәхтәwарийе бьдә мә (Аqуб 2:13).

13, 14. Чаwа дьлтʹәмьзи гьредайи йә тʹәви бәхтәwарийе?

¹³ «Хwәзи ль дьлпаqьжа», Иса гот, «чьмки әwе Хwәде бьбиньн» (Мәт. 5:8). Сәва әм дьле хwә паqьж, демәк тʹәмьз хwәй кьн, гәрәке фькьр у хwәстьнед мә тʹәмьз бьн. Әw йәк гәләк фәрз ә, чьмки wи щурʹәйи әм дькарьн бәр чʹәʹве Йаһоwа тʹәмьз бьн, сәва әw хьзмәтийа мә qәбул кә. (Бьхунә 2 Корьнтʹи 4:2; 1 Тимтʹ. 1:5.)

¹⁴ Әwед кö дьлда тʹәмьз ьн, дькарьн баwәр бьн, wәки әwана бәр чʹәʹве Йаһоwа qимәт ьн у һәләqәтийа wан тʹәви wи баш ә. Йаһоwа гот: «Хwәзи ль wан, йед кö чöхед хwә шуштьнә» (Әʹйан. 22:14). Ле чь те һʹәсабе кö әwана «чöхед хwә» дьшон? Бона Мәсиһийед бьжарти әw те һʹәсабе, wәки әwана бәр чʹәʹве Йаһоwа тʹәмьз ьн у wе һʹәта-һʹәтайе сәр әʹзмана бәхтәwар бьжин. Әʹлаләта мәзьн жи йа кö wе һʹәта-һʹәтайе сәр әʹрде бьжи, дькарә бәр чʹәʹве Хwәде рʹаст бе һʹәсабе чаwа досте wи. Әwана һәла һе ньһа жи «чöхед хwә пе хуна wи Бәрхи» дьшон, у «чил-qәрqаш» дькьн (Әʹйан. 7:9, 13, 14).

15, 16. Чь щурʹәйи йед дьлпаqьж дькарьн «Хwәде бьвиньн»?

¹⁵ Ле чь щурʹәйи мәрьвед дьлпаqьж wе «Хwәде бьбиньн», нә мәрьв нькарә [Хwәде] бьбинә у сах бьминә? (Дәркʹ. 33:20). Хәбәра Йунани кö һатә wәлгәрʹандьне ча «бьвиньн», дькарә öса жи бе һʹәсабе «бь һʹьш бьвиньн, фәʹм кьн, бьзаньбьн». Әwед кö Хwәде дьвиньн бь чʹәʹве дьле хwә, бь рʹасти wи нас дькьн у һʹöнöред wи qимәт дькьн (Әфәс. 1:18). Иса хәйсәте Хwәде бь тʹәмами әʹйан кьр, ләма жи әwи гот: «Йе кö әз дитьмә, Бав дитийә» (Йуһʹн. 14:7-9).

¹⁶ Хенщи кö һʹöнöред Хwәде нас бькьн, хьзмәткʹаред рʹаст дькарьн Хwәде «бьвиньн» чахе әʹмьре хwәда дәсте wи дьвиньн (Иб. 42:5). Әwана öса жи һʹьш-аqьле хwә дьдьн сәр кʹәрәмед Хwәде. Бәле, әw кʹәрәм һивийа wан ә, йед кö хwә тʹәмьз хwәй дькьн у  бь амьни Йаһоwарʹа хьзмәт дькьн. Ле фәʹмдари йә кö Мәсиһийед бьжарти чахе жь мьрьне рʹабьн у хәлата хwәйә әʹзмани бьстиньн, wе рʹастә-рʹаст Йаһоwа бьвиньн (1 Йуһʹн. 3:2).

17. Чаwа хwәйкьрьна әʹдьлаийе бәхтәwарийе тинә?

¹⁷ Иса паше гот: «Хwәзи ль wан, кö әʹдьлайийе дькьн» (Мәт. 5:9). Чахе әм алийе хwәда һәр тьшти дькьн сәва әʹдьлайе хwәй кьн, әм бәхтәwар дьбьн. Аqуб ньвиси: «Бәре рʹастийе жь алийе йе кö бь әʹдьлайийе дьчинә те чьнине» (Аqуб 3:18). Чахе һәләqәтийа мә ортʹа хушк йан бьра, йан жи ортʹа нәфәра хьраб дьбә, әм дькарьн аликʹарийе жь Хwәде һиви кьн, wәки али мә бькә әм әʹдьлайе хwәй кьн. Öса рʹöһʹе Йаһоwайи пироз wе али wә бькә хwә рʹаст бьдьн кʹьфше, у һуне бәхтәwар бьн. Иса әʹйан кьр кö сәва әʹдьлайе хwәй кьн чьqас фәрз ә, wәки пешийе әм гава бавежьн. Әwи гот: «Һәгәр тö һʹәдийа хwә бини сәр горигәһе у ль wьр бе бира тә, кö дьле бьре тә жь тә майә, һʹәдийа хwә wе дәре ль бәр горигәһе бьһелә у пешийе һәрʹә бьре хwәрʹа ль һәв wәрә у паше wәрә һʹәдийа хwә бьдә» (Мәт. 5:23, 24).

18, 19. Чьрʹа Мәсиһи дькарьн ша бьн гава рʹасти пәйкʹәтьна тен?

¹⁸ «Хwәзи ль wә, гава бона наве мьн wә беһöрмәт кьн, бьзериньн у һәр щурʹә бöхдан ль wә бькьн». Бь wан гьлийа Иса чь дьхwәст бьгота? Әwи гот: «Әшq у ша бьн, чьмки һәqе wә ль әʹзмана гәләк ә. Бь ви щурʹәйи пʹехәмбәред кö бәри wә һәбун, зерандьн» (Мәт. 5:11, 12). Чахе шанди һатьнә кʹöтане у wанрʹа һатә готьне wәки ида хьзмәт нәкьн, әwана «жь щьвина гьрәгьра чун, ша дьбун». Фәʹмдари йә, әwана кʹöтанерʹа ша нәдьбун, ле ша дьбун, чьмки «бона наве Иса һежайи рʹәзилкьрьне бунә» (Кʹар. Шанд. 5:41).

¹⁹ Wәʹде мәда жи, щьмәʹта Йаһоwа бь шабуне сәбьр дькә, гава бона наве Иса те зерандьне йан жи чахе рʹасти чәтьнайа те. (Бьхунә Аqуб 1:2-4.) Мина шандийа, әм жи wан тәнгасийарʹа ша набьн, ле чахе әм wәʹде wан чәтьнайа амьнийа хwә Хwәдерʹа хwәй дькьн, Йаһоwа али мә дькә әм сәбьр кьн у qәwи бьминьн. Мәсәлә, сала 1944 мәһа Тʹәбахе бьраки мә бь наве Һенрик Дорник у бьре wи кʹәтьнә гьртигәһе. Ле мәрьвед кö wана гьртьн, тьштәки öса готьн: «Бадиһәwа йә зоре бьдьнә wан кö тьштәки бькьн. Әwана ша дьбьн чахе wана дьчәрчьриньн». Дорник бьра шьровәкьр: «Рʹаст ә мьн нәдьхwәст wәки мьн бьчәрчьриньн, ле әw йәк кö мьн бь мерхаси сәбьр дькьр у qәwи дьмам сәва Йаһоwарʹа амьн бьминьм, мьнрʹа шабун дьани. . . . Дöа-дьрозга әз һе незики Йаһоwа кьрьм, у әw бь рʹасти бу Пьштоване мьн».

20. Чьрʹа әм бәхтәwар ьн, кö Хwәдейе хwәзьлирʹа хьзмәт дькьн?

²⁰ Һәрге жи пәй мә дькʹәвьн, нәфәред мә мьqабьли мә нә, әм нәхwәш ьн йан әʹмьрда мәзьн ьн, ле «Хwәдейе хwәзьли» мә qәбул дькә, йәкә әм дькарьн бәхтәwар бьн (1 Тимтʹ. 1:11). Әм öса жи бәхтәwар ьн, чьмки һивийа созед Хwәдайе хwә нә, йе кö «хwәйе готьна хwә» йә (Тито 1:2). Чахе созед Йаһоwа бенә сери, әме нә жи биньн бира хwә wан чәтьнайа у тәнгасийа кö иро рʹасти мә тен. Щьнәтеда Йаһоwа wе кʹәрәмед öса сәр мәда бьбаринә, кö әм нә жи дькарьн бьдьнә бәр чʹәʹве хwә. Һьнге әʹмьре мә wе бь тʹәмами бәхтәwар бә у әме «хер-хwәшийева . . . хьне бьн у ша бьн» (Зәб. 37:11).