НАВ тʹәмамийа дьнйайеда рʹуспи дьшекьриньн, кö нава щьмәʹта Хwәдеда щабдарийед wан һәнә. Бәле, рʹуспи гьшк бона мә гәләк qимәт ьн. Wан пʹела, гöһастьнәк һатә кьрьне. Рʹуспийед әʹмьрда мәзьнрʹа һатә әʹламкьрьне, wәки щабдарийед хwәйә мәзьн бьдьнә рʹуспийед щаһьл. Ле әw чь те һʹәсабе?

Әw гöһастьна тʹәзә те һʹәсабе, wәки бәрпьрсийаред мьһале у бьред кö мәкʹтәбед тʹәшкиләта мә дәрбаз дькьн, чахе бьгьһижнә 70 сали, wе ида wи щурʹә кʹьфшкьрьнада хьзмәт нәкьн. Öса жи рʹуспийед кö 80 сали нә, wе щурʹә-щурʹә щабдарийед хwә бьдьнә рʹуспийед щаһьл. Мәсәлә, һәрге әwана кординаторе филиале нә, йан жи щьватеда кординаторе кʹома рʹуспийа нә, wе ида әве щабдарийе бьдьнә рʹуспийед щаһьл. Ле рʹуспийед әʹмьрда мәзьн ча хwә данә кʹьфше һьндава wе гöһастьне? Әwана һьндава Йаһоwа у тʹәшкиләта wи амьн ман!

Кен кö wәкә 49 сал кординаторе филиаләке бу, дьбежә: «Әз бь тʹәмами qайил бум тʹәви ве сафикьрьне. Бь рʹастийе, ве шәбәqе һʹәта кö әз пеһʹәсийам дәрһәqа wе йәке,  мьн Йаһоwарʹа дöа кьр у гот кö хwәзьл бьраки щаһьл бьбуйа кординатор». Гәләк бьред әʹмьрда мәзьн, нав тʹәмамийа дьнйайеда, мина Кен хwә данә кʹьфше. Ле әwан бьра щабдарийед хwә һʹьз дькьрьн, чьмки али хушк-бьра дькьрьн, ләма пешийе wанрʹа һьнәки чәтьн бу.

Есперандио, йе кö щьвата хwәда кординаторе кʹома рʹуспийа бу, дьбежә: «Әз һьнәки бәрхwә кʹәтьм». Ле әwи паше гот: «Әз гәрәке мьqати сьһʹәт-qәwата хwә бума, чьмки чьqас дьчу һе хьраб дьбу». Иро Есперандио бәрдәwам дькә бь амьни Йаһоwарʹа хьзмәт кә у щьватеда гьшк wи һʹьз дькьн.

Ле бәрпьрсийаред рʹеwи ча хwә данә кʹьфше, йед кö гәләк wәхт ве кʹьфшкьрьнеда бун, ле ньһа ида кʹьфшкьрьна wан һатә гöһастьне? Алан, йе кö 38 сала бәрпьрсийаре рʹеwи бу, дьбежә: «Чахе әз дәрһәqа ве кʹьфшкьрьне пеһʹәсийам, әз мәтʹал мам». Ле йәкә әwи бьрайи фәʹм кьр, кö чахе бьред әʹмьрда мәзьн wи шьхöли бьред щаһьл һин дькьн, әw йәк кʹарәкә мәзьн тинә.

Расел, йе кö 40 сала ча бәрпьрсийаре рʹеwи хьзмәт дькьр у мәкʹтәбәкә тʹәшкиләте дәрбаз дькьр, дьбежә, wәки пешийе әw жьна хwәва дьлтәнг дьбун. Әw гьли дькә: «Мә гәләк qимәт дькьр кʹьфшкьрьна хwә у әм дьфькьрин, wәки сьһʹәт-qәwата мә һе дьһелә кö әм бәрдәwам кьн ве кʹьфшкьрьнеда хьзмәт кьн». Расел у жьна wи щьватеда дьдьнә хәбате әwе һинкьрьне у щерʹьбандьне кö wана станд, у хушк-бьред щьватеда ша дьбьн тʹәви wан хьзмәт кьн.

Һәрге wә мина wан бьра хwә öса тʹәхмин нәкьрийә, сәрһатийа жь 2 Самуйел дькарә али wә бькә фәʹм кьн фькьред wан.

Wәрә биньн бира хwә чахе кöрʹе Даwьд Пʹадша Абшалом мьqабьли wи рʹабу. Даwьд жь Оршәлиме рʹәвийа Маһанайиме, алийе рʹоһьлата Чʹәме Урдöне. Һьнге Даwьдрʹа у мәрьвед тʹәви wирʹа, тьштед һәррʹожи лазьм бун. Те бира wә wи чахи чь qәwьми?

Се мер жь wи щийи бь мәрʹдани wанрʹа ньвин, щурʹә-щурʹә хwарьн, у һур-муред кö wанрʹа лазьм бун, анин. Барзиллай йәк жь wан се мера бу (2 Сам. 17:27-29). Гава кö Даwьд ида жь Абшалом нәдьрʹәвийа, әw ида вәдьгәрʹийа Оршәлиме, у Барзиллай һʹәта Урдöне wи вәре кьр. Даwьд жерʹа гот, wәки тʹәви wи бе Оршәлиме. Рʹаст ә Барзиллай мәрьвәки гәләк дәwләти бу у һʹәwще хwарьне нибу, ле Даwьд жерʹа гот wәки әw wе жь сьфьра wи хwарьне бьхwә (2 Сам. 19:31-33). Дьqәwьмә Даwьд хәйсәте Барзиллай бәгәм кьр у заньбу wәки әw дькарә ширәткʹарәки баш бә. Бона Барзиллай рʹасти жи qәдьрәки гәләк мәзьн бу кö qәсьра пʹадшада бьжи у бьхәбьтә!

Барзиллай мәрьвәки реалист у мьлук бу, ләма жи әwи Даwьдрʹа дәрһәqа әʹмьре хwә гот, wәки әw 80 сали йә. Паше әwи зедә кьр: «Ма әз дькарьм йе qәнщ у хьраб жь  һәврʹа щöда бькьм?». Бь wан гьлийа әwи чь дьхwәст бьгота? Барзиллай нава әʹмьре хwәйи дьрежда билани qазанщ кьрьбу. У әwи дькарьбу диса жи ширәтед баш бьда, мина wан меред әʹмьрда мәзьн, йед кö паше Пʹадша Рʹәһобоwам ширәт кьрьн (1 Пʹадш. 12:6, 7; Зәб. 92:12-14; Мәтʹлк. 16:31). Ләма жи чахе Барзиллай дәрһәqа фьрqийа qәнщийе у хьрабийе гот, ча те кʹьфше әwи дәрһәqа сьһʹәт-qәwата хwә, йан жи дәрһәqа синоред хwә анәгори әʹмьре хwәйи мәзьн дьхwәст бьгота. Әwи гот кö калбуна wи ида хьраб һʹöкöм буйә сәр тәʹма дәве wи у бьһистьна wи (Wаиз 12:4, 5). Ләма Барзиллай Даwьдрʹа гот, wәки мерәки щаһьл, наве кʹижани Кимһам бу, тʹәви хwә бьвә Оршәлиме, йе кö дьбәкә кöрʹе Барзиллай бу (2 Сам. 19:35-40).

Әw гöһастьна пашwәхтийе, дьдә кʹьфше ньһерʹандьна мина йа Барзиллай. Фәʹмдари йә кö әw гöһастьн һатә кьрьне нә тʹәне бона дәрәща мәрьвәки, чаwа йа Барзлиллай бу. Лазьм бу рʹьнд шеwьр кьрана, кö чь wе баш бә бона рʹуспийед нав тʹәмамийа дьнйайеда.

Бьред әʹмьрда мәзьн дьвиньн, wәки бона пешдачуйина тʹәшкиләта Йаһоwа, баш ә wан шьхöла кö әwана дькьн, бьдьнә бьред щаһьл. Гәләк щар, әw бьред әʹмьрда мәзьн, мина Барзиллай, йе кö дьбәкә кöрʹе хwә һин дькьр, у мина Паwлосе шанди, йе кö Тимотʹейо һин дькьр, бьред щаһьл һин дькьрьн (1 Корн. 4:17; Фили. 2:20-22). У иро әw бьред щаһьл избат дькьн, wәки әwана ньһа «пʹешкʹеш бь щурʹе мәрьва» нә, йед кö аликʹарийе дьдьн «бона авабуна бәдәна Мәсиһ» (Әфәс. 4:8-12, ДТʹ; бәрамбәр кьн тʹәви Жьмар 11:16, 17, 29).

Нав тʹәмамийа дьнйайеда, бьред кö щабдарийед хwә данә щаһьла, дькарьн гәләк мәщала бьдьнә хәбате, сәва шьхöле Йаһоwада һе зедә бькьн.

Марко йе кö 19 сала бәрпьрсийаре рʹеwи бу, дьбежә: «Бь сайа дәрәща хwәйә тʹәзә, әз дькарьм щьвата хwәда али меред хушкед мә бькьм, йед кö нәбаwәр ьн».

Гералдо кö 28 сала бәрпьрсийаре рʹеwи бу, гьли дькә: «Нета мәйә тʹәзә әw ә wәки аликʹарийе бьдьнә хушк-бьред кö рʹöһʹанида сьст бунә, у һе зедә һинбунед Кʹьтеба Пироз дәрбаз кьн». Әw дьбежә wәки әw жьна хwәва тʹәви 15 мәрьва һинбуна Кʹьтеба Пироз дәрбаз дькьн у һьнә хушк-бьред кö рʹöһʹанида сьст бьбун, ньһа тенә сәр щьвате.

Алан, бәʹса кʹижани мә жоре кьр, дьбежә: «Ньһа һе зедә wәʹде мә дьминә сәва бь тʹәмами нава шьхöле хьзмәтийеда бьн. Әм һʹьз дькьн хьзмәт кьн щийе кö гәләк мәрьв тʹоп дьбьн, щийе хәбата мәрьва, у öса жи щинарарʹа шәʹдәтийе бьдьн. Һәла һе дö щинаред мә жи һатьнә Ода Щьвате».

Һәрге wә нава щьмәʹта Хwәдеда кʹьфшкьрьна тʹәзә стандийә, һун дькарьн щурʹәки майин жи кʹомәке бьдьн. Мәсәлә, щьватеда бьред щаһьлрʹа гьли кьн һун чь һин бунә нава гәләк салада. Расел бәʹса кʹижани мә жоре кьр, дьбежә: «Йаһоwа бьред щаһьл кö сәрwахт ьн у сәр хwә нә, һин дькә у дьдә хәбате. Бьратийа мә гәләк кʹаре дьстинә жь һинкьрьн у жь шьвантийа wан бьред щаһьл» (Бьньһерʹә чаргошә « Аликʹарийе Бьдьнә Бьред Щаһьл Фәрәсәтед Хwә һе Баш кьн»).

Гәли бьред әʹмьрда мәзьн, шабуна хwә öнда нәкьн, чьмки wә бь шьхöл у щәфе хwә ида гәләк мәрьв qәwи кьрьнә, у һун дькарьн диса жи бәрдәwам кьн ве йәке бькьн. Хушк-бьра wә гәләк һʹьз дькьн.

Йа лапә фәрз чь кö wә кьрийә әw ә, кö wә дьле Йаһоwа гәләк ша кьрийә у һун бира wида ньн. Әw йәки öса нинә wәки «кьред wә у әw һʹьзкьрьна кö wә бона наве wи да кʹьфше бир бькә, йа кö wә щьмәʹта Хwәдерʹа хьзмәткʹари кьр у дькьн жи» (Ибрн. 6:10). Әw рʹез дьл дьдә мә һʹәмуйа, wәки созе wи жь һʹәму шьхöлед мә зедәтьр ә. Һун öса бәр  чʹәʹве Йаһоwа qимәт ьн, wәки Әw wе тʹö щар кьред wә у ве йәке кö һун диса бәрдәwам дькьн дьле wи ша дькьн, бир нәкә!

Ле һәрге әw гöһастьн бона wә нинә, йәкә һун жи дькарьн тьшта һин бьн. Ле чь щурʹәйи?

Һәрге ньһа һун һәвкʹарийе дькьн тʹәви бьре әʹмьрда мәзьн, щабдарийа кʹижани һатийә гöһастьне, һун дькарьн кʹаре бьстиньн жь щерʹьбандьна wи у гьһиштибуна wи, кö әwи нава гәләк салада qазанщ кьрийә. Ширәта жь wи һьлдьн у фькьред wи пебьһʹәсьн. У дина хwә бьдьне кö әw чаwа кʹьфшкьрьна хwәйә тʹәзәда бь амьни wан тьшта дьдә хәбате, чь кö нава гәләк салада һин буйә.

Фьрqи тʹöнә тö бьре әʹмьрда мәзьн и, кʹижан кö кʹьфшкьрьна тʹәзә стандийә, йан жи хушк йан бьра йи щьватеда, бир нәкә, wәки Йаһоwа гәләк qимәт дькә амьнийа wан хьзмәткʹара, йед кö гәләк сала жерʹа хьзмәт кьрьнә у бәрдәwам дькьн хьзмәт кьн.