1. Ча хwәһʹьзийа ве дьнйайе дькарә сәр мьлуктийа мә һʹöкöм бә?

ЧЬРʹА чәтьн ә wан тьшта биньн сери, кʹижан кö әм жь Хәбәра Хwәде һин дьбьн? Мәʹник әw ә кö әм гәрәке шькәсти бьн сәва тьштед рʹаст бькьн. Ле әw йәк нәһеса йә, чьмки wан «рʹожед ахьрийеда» мәрьвед дор бәре мә «хwәһʹьз, пʹәрәһʹьз, кʹöбар, бабах» у «тәмсьст» ьн (2 Тимтʹ. 3:1-3). Әм чаwа хьзмәткʹаред Хwәде заньн, wәки әw хәйсәт-һʹöнöр хьраб ьн, ле йәкә щара мәрʹа дьбәкә бе кʹьфше кö мәрьвед öса, пешдачуйи нә у бәхтәwар ьн (Зәб. 37:1; 73:3). Дьбәкә әм һәла һе жи пьрсе бьдьнә хwә: «Һежа йә wәки әз пешийе кʹара мәрьвед майин бьгәрʹьм, дәwса кö кʹара хwә? Һәрге әз йәки мьлук бьм, qә мәрьв wе qәдьре мьн бьгьрьм?» (Луqа 9:48). Һәрге әм фәсал нибьн, у мина wе дьнйайе бьбьнә хwәһʹьз, öса һәләqәтийа мә тʹәви хушк-бьра wе хьраб бә, у ида нә жи wе бе кʹьфше, wәки әм Мәсиһи нә. Ле чахе әм сәрһатийед хьзмәткʹаред амьн, дәрһәqа кʹижана Кʹьтеба Пирозда те гьликьрьне, леколин бькьн у чʹәʹв бьдьнә wан, һьнге әме кʹәрәма бьстиньн.

2. Әм чь дькарьн һин бьн жь хьзмәткʹаред Хwәдейә бәре?

² Сәва әм чʹәʹв бьдьнә wан хьзмәткʹаред амьн, әм гәрәке  леколин бькьн, кö ча әwана бунә достед Хwәде, ча дьле Хwәде ша дькьрьн, у жь кʹö qәwат дьстандьн, кö qьрарʹа wи дьанинә сери. Һәрге әм wи щурʹәйи леколина бькьн, әме баwәрийеда бьшьдьн.

3, 4. а) Әм жь кʹö һинкьрьна рʹöһʹани дьстиньн? б) Чьрʹа хwарьна рʹöһʹани әw тʹәне стандьна занәбуне нинә?

³ Әм гәләк ширәта дьстиньн у һин дьбьн бь сайа Кʹьтеба Пироз, әʹдәбйәтед мә, малпәред мә, JW Бродкастинг, у öса жи щьват у щьватед мәзьн. Ле ль гора гьлийед Иса кö әм Йуһʹәнна 4:34-да дьхуньн, хwарьна рʹöһʹани әw тʹәне стандьна занәбуне нинә. Диса лазьм ә тьштәки бькьн. Иса гот: «Хwарьна мьн әw ә, кö әз хwәстьна йе кö әз шандьмә бькьм у шьхöлед wи биньмә сери».

⁴ Бона Иса хwарьна рʹöһʹани әw бу жи, кö qьрара Хwәде бинә сери. Ле чь щурʹәйи әw мина хwарьне бу? Чахе әм хwарьна баш дьхwьн, әм ләзәте дьстиньн у бәдәна мә qәwи дьбә. Wи щурʹәйи, чахе әм qьрара Хwәде тиньн сери, әм шабуне дьстиньн у баwәрийа мә жи qәwи дьбә. Мәсәлә, биньн бира хwә кö һун чәнд щара чахе wәстийайи чунә хьзмәтийе, һун ча дьлша у гәш вәгәрʹийабун мале.

5. Һәрге әм биланийе дьдьн кʹьфше, әм чь кʹаре дьстиньн?

⁵ Чахе әм кьред кö Йаһоwа хwәш тен дькьн, әw йәк бь билани йә (Зәб. 107:43). Бь рʹасти әм гәләк кʹаре дьстиньн чахе биланийе дьдьнә кʹьфше. Дәрһәqа биланийе Кʹьтеба Пироз дьбежә: «Һәр тьште кö дьле тә дькʹьшинә wәкә wе набьн . . . Әw бона йед кö wе [биланийе] дәст тиньн дара жийине йә, йед кö wе qәwин дьгьрьн бәхтәwар дьбьн» (Мәтʹлк. 3:13-18). Иса гот: «Һәгәр һун ве йәке заньн, һуне хwәзьли бьн гава бьqәдиньн» (Йуһʹн. 13:17). Шагьртед Иса wе бәхтәwар буна, һәрге тʹьме гьлийед wи бьанийана сери. У wана öса жи кьр, әwана ль гора һинкьрьн у мәсәла wи дьжитьн.

6. Чьрʹа әм гәрәке бәрдәwам кьн wан тьшта бьдьнә хәбате чь кö һин дьбьн?

⁶ Иро әм жи чь кö заньн у һин дьбьн, гәрәке бәрдәwам кьн әʹмьре хwәда биньн сери. Бәʹса хәбәре, бьфькьрьн сәр мәсәла һостәйе әʹрәба. Бал wи һәнә һащәт, материал у öса жи занәбун кö чь бькә, у ча бькә. Ле һәрге әw wан тьшта нәдә хәбате, әw тьшт wе кʹаре нәдьнә wи. Һәрге әw пʹеше хwәда щерʹьбанди йә, йәкә әw гәрәке диса бәрдәwам кә бьдә хәбате wан тьшта чь кö һин буйә, сәва кö диса жи һостәки баш бьминә. Мина ве йәке, әм жи пешийе чахе һатьнә нава рʹастийе, мә дьда хәбате әw һʹәму тьшт, чь кö әм жь Кʹьтеба Пироз педьһʹәсийан. Ле сәва кö әм бәхтәwар бьминьн, лазьм ә әм һәр рʹож бь мьлукти ль гора wан тьшта бьжин, йед кö Йаһоwа мә һин дькә.

7. Әм гәрәке чь бькьн, сәва жь мәсәлед Кʹьтеба Пироз дәрса һин бьн?

⁷ Wәрә әм чәнд дәрәща шеwьр кьн, кʹижанада мьлуктийа мә дькарә бе щерʹьбандьне. Әме öса жи чәнд мәсәлед мәрьвед амьнә бәре шеwьр кьн, йед кö дәрәщед öсада мьлук манә. Ле ча мә ида гот, бәс нинә тʹәне бьзаньбьн, ле фәрз ә әм сәр wан мәсәла у дәрса бьфькьрьн у öса жи әʹмьре хwәда бьдьнә хәбате.

8, 9. Жь Кʹаред Шандийа 14:8-15 әм чь педьһʹәсьн дәрһәqа мьлуктийа Паwлос? (Бьньһерʹә шькле әʹwльн).

⁸ Хwәде дьхwазә wәки «һʹәму мәрьв хьлаз бьн у рʹастийе нас кьн» (1 Тимтʹ. 2:4). Ле һун ча дьньһерʹьн сәр wан мәрьва, йед кö һе рʹастийе пенәһʹәсийанә?  Паwлосе шанди кʹьништада wан Щьһуйарʹа мьзгини бәла дькьр, йед кö ида дәрһәqа Хwәде заньбун. Ле әwи öса жи wан мәрьварʹа гьли дькьр, йед кö хöданед qәлп дьһʹәбандьн, у һьнге мьлуктийа wи һатә щерʹьбандьне.

⁹ Мәсәлә, wәʹде рʹеwитийа Паwлосә мисйонерти йа пешьн, мәрьвед Лукайони wи у Барнабас һʹәсаб кьрьн жь әʹзман һати у нав кьрьн Зәwс у Һәрмес дьлqе мәрьвада, йед кö хöданед wани qәлп бун. Ле гәло әw йәк дьле Паwлос у Барнабас һат, кö wана öса һöрмәт у бьльнд кьрьн? Нә пешийа wе йәке, әwана жь бо хьзмәтийе шәһәред дьнда һатьбунә зерʹандьне? Гәло дьбәкә әwана фькьрин, wәки сәва мьзгинийе бәла кьн, әw мәщаләкә баш ә, кö Лукайонийа wана бь щурʹәки мәхсус qәбул кьрьн? На! Әw йәк wана хwәш нәһат, wана дәрберʹа кʹьнще сәр хwә qәлашт у кьрьнә qарини: «Һун чьма ве йәке дькьн? Әм жи бьнйатʹа хwәда мәринә мина wә нә» (Кʹар. Шанд. 14:8-15).

10. Чьрʹа Паwлос у Барнабас хwә сәр Лукайонийарʹа нәдьгьртьн?

¹⁰ Чахе Паwлос у Барнабас готьн кö әwана жи мина wан мәрьвнә гöнәкʹар ьн, бь wан гьлийа wана нәдьхwәст бьгота, кö щурʹе хьзмәтийа wан мина йа Лукайонийа бу, йед кö пʹутпʹарьст бун. Хwәде Паwлос у Барнабас шандьбу wедәре ча мисйонер (Кʹар. Шанд. 13:2). Әwана бь рʹöһʹе пироз кʹьфшкьри бун у һевийа wан һәбу кö бьжин сәр әʹзмана. Ле йәкә wана хwә сәр Лукайонийарʹа нәдьгьртьн. Паwлос у Барнабас фәʹм дькьрьн кö Лукайони жи дькарьн һевикә öса qазанщ кьн, һәрге мьзгинийе qәбул кьн.

11. Әм wәʹде хьзмәтийе ча дькарьн мьлуктийеда чʹәʹв бьдьнә Паwлос?

¹¹ Әм ча дькарьн мьлуктийеда чʹәʹв бьдьнә Паwлос? Бәре әʹwльн, әм гәрәке тʹö щар һивийе нибьн, wәки мә һöрмәт-рʹумәт кьн, йан жи бьльнд кьн сәва шьхöлед мә, кʹижан кö әм бь сайа qәwата Йаһоwа дькьн. Wе баш бә әм wан пьрса бьдьнә хwә: «Әз дәрһәqа wан мәрьва чь дьфькьрьм, кʹижанарʹа мьзгинийе гьли дькьм? Гәло әз фьрqийе дькьмә ортʹа мәрьва?» Шәʹдед Йаһоwа нав тʹәмамийа дьнйайеда wан мәрьва дьгәрʹьн, йед кö һʹәwще мьзгинийа Хwәде нә. Щара бона wе йәке мәрʹа лазьм ә зьман у әʹйд-qәйде wан мәрьва һин бьн, кʹижана алийе гәләк мәрьвада тенә ньмьзкьрьне. Әм тʹö щар нафькьрьн кö wан мәрьва баштьр ьн, кʹерʹа мьзгинийе гьли дькьн. Ле дәwсе, әм һʹәму тьшти дькьн сәва wана фәʹм кьн, wәки али wан бькьн, кö мьзгинийа дәрһәqа Пʹадшатийе бьгьһижә дьле wан.

12. Епафрас ча да кʹьфше кö бона йед дьн хәм дькә?

¹² Диса щурʹәки кö әм ча дькарьн мьлуктийе бьдьнә кʹьфше, әw ә чахе әм бона хушк-бьра дöа дькьн, йед кö «баwәрийа хwәйиqимәт стандьн, чаwа мә станд» (2 Пәт. 1:1). Епафрас һәма öса жи дькьр. Кʹьтеба Пирозда дәрһәqа wи тʹәне се щара те готьне, у әв һәр се щар жи ньвисаред Паwлосда ньн. Чахе Паwлос Рʹомеда гьртийе малда бу, әwи Мәсиһийед Колосирʹа ньвиси, кö Епафрас «һәр гав бь дьл у щан бона [wан] дöа дькә» (Колс. 4:12). Епафрас хушк-бьра рʹьнд нас дькьр, у бона wан гәләк хәм дькьр. Дәрәща wи жи мина йа Паwлос бу, әw жи «гьрти» бу. Ле әw йәк рʹе wи нәдьгьрт, wәки бона рʹöһʹанийа wана хәм бькә (Фьльмн. 23). Әwи бона хушк-бьра дöа дькьр у һәла һе жи дöада наве wан һьлдьда. Әм жи дькарьн ве йәкеда чʹәʹв бьдьнә wи. Qәwата дöайед öса гәләк мәзьн ә,  илаһи гава әм дöада наве хушк-бьра һьлдьдьн (2 Корн. 1:11; Аqуб 5:16).

13. Ча һун дькарьн чʹәʹв бьдьнә Епафрас, гава дöа дькьн?

¹³ Бьфькьрә дәрһәqа wан мәрьва, бона кʹижана тöйе дöа ки у дöада наве wан һьлди. Мина Епафрас, гәләк хушк-бьред мә жи дöа дькьн бона wан, йед кö щьвата wанда ньн, бона малбәтед кö рʹасти чәтьнайа тен, йан жи бона wан, йед кö рʹасти сафикьрьнед чәтьн йан жи щерʹьбандьна тен. Гәләк жи дöа дькьн бона wан хушк-бьра, дәрһәqа кʹижана jw.org-да те готьне, пʹара бь наве «Шәʹдед Йаһоwа Кәледа ньн сәва Баwәрийа Хwә» (Бьньһерʹьн НУЧӘ > ӘʹЛАМӘТИЙЕД QАНУНЕВА ГЬРЕДАЙИ). Хенщи ве йәке, wе баш бә һәрге әм дәрһәqа wан жи дöа кьн, кʹижана мәрьве хwәйи незик öнда кьрьнә, йан жи йед кö рʹасти чәтьнайед гьран у шәрʹа һатьнә, у йед кö тʹöнәбунеда ньн. Бәле, гәләк хушк-бьред мә һәнә, дәрһәqа кʹижана әм дькарьн дöа кьн у бь wе йәке кʹаре wанрʹа биньн. Чахе әм öса дькьн, әм дьдьнә кʹьфше, wәки әм нә кö тʹәне дәрһәqа хwә дьфькьрьн, ле öса жи дәрһәqа йед дьн (Фили. 2:4). Йаһоwа дöайед öса дьбьһе.

14. Йаһоwа ча мәсәләкә баш һишт ве йәкеда, кö гöһ бьдьнә йед дьн?

¹⁴ Әw йәк кö ча әм гöһ дьдьнә мәрьва, әʹйан дькә кö әм чьqас мьлук ьн. Кʹьтеба Аqубда 1:19-да те готьне: «Бьһистьнеда сәрхwә бә». Ве йәкеда Йаһоwа хwәха мәсәләкә баш һиштийә (Дәстп. 18:32; Йешу 10:14). Бьфькьрьн кö әм чь дькарьн һин бьн жь ве дәрәще, йа кö ньвисар ә кʹьтеба Дәркʹәтьнда 32:11-14. (Бьхунә.) Йаһоwа мәщал да Муса wәки фькьред хwә бежә, ле Әwи дькарьбу нәһишта жи. Гәло һуне бькарьбьн гöһ бьдьнә фькьред wи мәрьви, кʹижан кö ньһерʹандьна нәрʹаст да кʹьфше, у паше жи пәй гьлийед wи һәрʹьн? Йаһоwа йәкә тʹьме бь сәбьр гöһ дьдә wан мәрьва, йед кö бь баwәрийе жерʹа дöа дькьн.

15. Чаwа әм дькарьн qәдьргьртьнеда чʹәʹв бьдьнә Йаһоwа?

¹⁵ Wе баш бә һәр кәс хwә бьщерʹьбинә у wан пьрса бьдә хwә: «Һәрге Йаһоwа хwә мьлук дькә һьндава щьмәʹта хwә у гöһ дьдә wан, мәсәлә чаwа әwи гöһ дьда Бьраһим, Рʹаһел, Муса, Йешу, Маноаһ, Елйас у Һьзqийа, ле әз гәрәке öса нәкьм? Әз ча дькарьм һе зәʹф qәдьре хушк-бьред хwә бьгьрьм, wана qимәт кьм, гöһ бьдьмә фькьр у ширәтед wан, у һәла һе жи ширәтед wани баш биньм сери? Щьвата хwәда йан жи малбәтеда, лазьм ә әз һе зедә дина хwә бьдьмә сәр кʹе? Әз чь гәрәке бькьм бона wан?» (Дәстп. 30:6; Һʹакьм. 13:9; 1 Пʹадш. 17:22; 2 Дир. 30:20).

16. Чаwа Даwьд хwә да кʹьфше, гава Шимәи wи беһöрмәт дькьр?

¹⁶ Мьлукти öса жи али мә дькә кö чахе кәсәк һерса мә тинә, әм хwә бьгьрьн (Әфәс. 4:2). Дәрһәqа ве йәке мәсәләкә баш һәйә 2 Самуйел 16:5-13-да. (Бьхунә.) Даwьд у бәрдәстийед wи сәбьр кьрьн, гава Шимәи мәрьве Шаwул Пʹадша, әwана беһöрмәт кьрьн у мьqабьли wан дәркʹәт. Рʹаст ә qәwата Даwьд һәбу wәки wи бьдә сәкьнандьне, ле йәкә әwи бәр ве йәке тәйах кьр. Ле чь али Даwьд кьр wәки әwи хwә гьрт у һерса хwә тәмьранд? Зәбура сьсийада әм дькарьн дәрһәqа ве йәке пебьһʹәсьн.

17. Чь али Даwьд кьр кö һерс нәкʹәт, у ча әм дькарьн чʹәʹв бьдьнә wи?

¹⁷ Дәстпека Зәбура сьсийа дьдә кʹьфше, wәки Даwьд әw Зәбур һьнге ньвисийә,  чахе «жь бәр кöрʹе хwә Абшалом рʹәви». Рʹеза 1 у 2 әʹйан дькә qәwьмандьнед жь кʹьтеба 2 Самуйел сәре 16. Паши wан рʹеза Зәбур 3:4-да Даwьд итʹбарийа хwә һьндава Хwәде дьдә кʹьфше: «Мьн дәнг һьлда, ль Хöдан кьр гази, Әwи щаб да жь чʹийайе Хwәйи пирози». Бәле, әм жи дькарьн Хwәдерʹа дöа бькьн, чахе кәсәк мьqабьли мә дәрте. Һьнге Йаһоwа рʹöһʹе хwәйи пироз дьдә мә, сәва әм бькарьбьн бәр ве йәке тәйах кьн. Бьфькьрьн, һәла кʹижан дәрәщада wәрʹа лазьм ә һе зәʹф хwә бьгьрьн, йан жи бь дьл бьбахшиньн wан, кʹе һьндава wә һʹәмде хwә нәһәqи дькә? Һун баwәр ьн wәки Йаһоwа дьвинә әwе нәһәqийе, у wе әʹсә али wә бькә у wә кʹәрәм кә?

18. Әме чь кʹаре бьстиньн һәрге тʹьме ширәтед Хwәде биньн сери?

¹⁸ Чахе әм заньн чь рʹаст ә у ве йәке дькьн, әм гәләк кʹәрәма дьстиньн. Бешьк әw йәк сәрwахтийа мә дьдә кʹьфше, чаwа Мәтʹәлок 4:7-да ньвисар ә «сәри сәрwахти йә». Рʹаст ә сәрwахти сәр һʹиме занәбуне йә, ле әw те кʹьфше пе шьхöла у сафикьрьна. Һәла һе мурстанг жи сәрwахтийе дьдьнә кʹьфше. Биланийа wана те кʹьфше ве йәкеда, кö һавине хwәрʹа хöрәк тʹоп дькьн (Мәтʹлк. 30:24, 25). «Сәрwахтийа Хwәде», демәк Мәсиһ, тʹьме тьштед öса дькә, кö Баве wи хwәш те (1 Корн. 1:24; Йуһʹн. 8:29). Хwәде дьхwазә wәки әм нә кö тʹәне бьжартьнед рʹаст бькьн, ле öса жи ль гора wан бьжартьна бькьн. Йед кö бь мьлукти сәбьр дькьн у wан тьшта дькьн чь кö заньн рʹаст ә, Йаһоwа wана кʹәрәм дькә. (Бьхунә Мәтта 7:21-23.) Ләма жи wәрә әм сәр хwә бьхәбьтьн, wәки мьлук бьминьн. Һәрге әм öса бькьн, әме дьл бьдьнә хушк-бьра, wәки әwана жи бь мьлукти Йаһоwарʹа хьзмәт кьн. Бәле, лазьм ә wәʹдә у сәбьр сәва кö әм wан тьшта биньн сери, чь кö әм заньн рʹаст ьн, ле әw йәк мьлуктийа мә дьдә кʹьфше, кʹижан кö мә бәхтәwар дькә һьн ньһа, һьн жи ахьрийеда wе бәхтәwар кә.