1. Иса шәва пашьн пешийа мьрьна хwә, бәʹса кʹижан тьште фәрз кьр?

ИСА шәва хwәйә пашьнда, шагьртед хwәрʹа wәкә 30 щара бәʹса һʹьзкьрьне кьр. Әwи готә wан, wәки гәләк фәрз ә әwана «һәвдö һʹьз бькьн» (Йуһʹн. 15:12, 17). Әw һʹьзкьрьна wан гәрәке бьбуйа нишана ве йәке, кö әwана шагьртед wийи рʹаст ьн (Йуһʹн. 13:34, 35). Әw щурʹе һʹьзкьрьне тʹәне емосийа нинә. Әw һʹьзкьрьна öса йә, кö кʹара хwә нагәрʹә у һазьр ә qöрбана бькә. Иса гот: «Тʹö һʹьзкьрьн сәр wе һʹьзкьрьнерʹа тʹöнә, кö йәк әʹмьре хwә бәр достед хwәва бьдә. Һун достед мьн ьн, һәгәр һун wан тʹәмийед кö әз дьдьмә wә хwәй дькьн» (Йуһʹн. 15:13, 14).

2. а) Хьзмәткʹаред Хwәде иро пе чь әʹйан ьн? б) Ве готареда әме кʹижан пьрса шеwьр кьн?

² Һʹьзкьрьна һʹәлал у йәктийа нава хьзмәткʹаред Хwәде, wана әʹйан дькә ча щьмәʹта wи (1 Йуһʹн. 3:10, 11). Әм рʹасти жи гәләк рʹази нә, wәки һʹьзкьрьна wи щурʹәйи нава хьзмәткʹаред Йаһоwада һәйә, у фьрqи тʹöнә кʹе жь кʹижан мьләти йан бәрәки йә, йан жи сәр чь зьмани хәбәр дьдә! Ле чьрʹа илаһи иро әw һʹьзкьрьн гәләк фәрз ә? Йаһоwа у Иса ча мә пе һʹьзкьрьна хwә qәwи дькьн? Ча һәр кәс жь мә дькарә әwе һʹьзкьрьне кʹижан кö «ава дькә», бьдә кʹьфше? (1 Корн. 8:1).

3. Чаwа «зәманед хьраб» сәр мәрьва һʹöкöм дькьн?

³ Әм дьжин «зәманед» хьрабда, ләма жи әʹмьр «бь зәʹмәт» у «кʹәдәр» тʹьжә йә, у гәләк мәрьв емосийалида сьст дьбьн у дькʹәвьнә депресийе (Зәб. 90:10; 2 Тимтʹ. 3:1-5). Гәләк мәрьв öса дьwәстьн, кö ида нахwазьн бьжин. Һʹәсаб нишан дькьн, wәки һәр сал 800 000 мәрьва зедәтьр хwә дькöжьн, дәрте кö һәр 40 сәнида wәкә мәрьвәк дьмьрә. Йазьх, һәла һе һьнә Мәсиһи жи, йед кö емосийалида сьст бьбун, хwә кöштьн.

4. Кʹижан хьзмәткʹаред бәре wәʹдәки нәдьхwәстьн бьжин?

⁴ Wәʹде бәре жи, һьнә хьзмәткʹаред Хwәде жь бо тәнгасийа, хwәрʹа мьрьн дьхwәстьн. Мәсәлә, Ибо öса бин тәнг бьбу wәки гот: «Әз жь жийана хwәва дькәрьһьм: һʹәта-һʹәтайе жийане нахwазьм» (Иб. 7:16; 14:13). Уньс жи чахе гәләк дьлшькәсти бу, гот: «Ньһа йа Хöдан, рʹәща дькьм рʹöһʹе мьн жь мьн бьстинә, чьмки мьрьна мьн жь жийина мьн четьр ә» (Унс. 4:3). Пʹехәмбәре амьн Елйас жи öса хwә бетʹаqәт тʹәхмин кьр, wәки гот: «Бәс ә, йа Хöдан, ньһа щане мьн бьстинә» (1 Пʹадш. 19:4). Ле Йаһоwа wан хьзмәткʹаред амьн һʹьз дькьр у дьхwәст wәки әwана бьжин. Әwи бона ве йәке тʹö щар wана нәһәq нәдькьр, дәwсе али wан дькьр, wәки әwана бьхwазьн диса бьжин. Йаһоwа бь һʹьзкьрьн wана дьшьданд, сәва әwана бәрдәwам кьн бь амьни жерʹа хьзмәт кьн.

5. Чьрʹа илаһи иро хушк-бьред мәрʹа, һʹьзкьрьна мә лазьм ә?

⁵ Иро гәләк хушк-бьред мә рʹасти гәләк чәтьнайа у стресе тен, у ләма wанрʹа һʹьзкьрьна мә лазьм ә. Һьнәк бона баwәрийе рʹасти пәйкʹәтьна тен йан жи мәрьв qәрфа wан дькьн. Һьнәк жи сәр хәбате бәр бöхдан у гәвәстийе тәйах дькьн. Бал һьнәка жи малда проблем һәнә, мәсәлә мер йан жьна нәбаwәр тʹьме wан беһöрмәт дькә. Сәва wан проблема, гәләк хушк-бьра һьн физикида һьн жи емосийалида сьст дьбьн у дьwәстьн. Ле кʹе дькарә али wан хушк-бьред дьлтәнг бькә?

6. Йаһоwа ча пе һʹьзкьрьна хwә хьзмәткʹаред хwә дьшьдинә?

⁶ Йаһоwа хьзмәткʹаред хwә qәwи дькә бь ве йәке, кö wана дьдә баwәркьрьне wәки wе тʹьме wана һʹьз бькә. Бьдьнә бәр чʹәʹве хwә, кö дьле Исраелийед амьн чьqас рʹьһʹәт бу, гава wана әw гьлийед Йаһоwа бьһистьн: «Тö дь чʹәʹве мьнда бьрумәт у бьрез и у жь бәр кö әз тә һʹьз дькьм . . . Нәтьрсә; жь бәр кö әз бь тәрʹа мә» (Иша. 43:4, 5). Һун хьзмәткʹаред Йаһоwа нә, ләма жи тʹö щар дöдьли нәбьн, wәки әw wә гәләк һʹьз дькә. * Хәбәра Хwәде соз дьдә: «Йе qәwат, wе тә хьлаз кә. Әwе тәрʹа ша бә» (Сефн. 3:16, 17, ДТʹ).

7. Чь щурʹәйи һʹьзкьрьна Йаһоwа мина һʹьзкьрьна де йә, йа кö һьндава зарʹа хwәйә вьрʹни дьдә кʹьфше? (Бьньһерʹә шькле әʹwльн.)

⁷ Щьмәʹта Йаһоwа рʹасти чь чәтьнайа жи бе, әw соз дьдә wәки wе wана qәwи кә у дьл бьдә wан. Әwи бь wан гьлийа да кʹьфше, кö һьндава щьмәʹта хwә әw ча нә: «Wе wә һʹәмеза хwәда бьвьн у сәр чока тʹимар кьн. Чаwа кö де бәрдьлийе дьдә кöрʹе хwә, öса жи әзе бәрдьлийе бьдьмә wә» (Иша. 66:12, 13, ДТʹ). Бьфькьрьн, әw мәсәләкә чьqас qәwи йә. Бьдьнә бәр чʹәʹве хwә, де кö зарʹа хwәйә вьрʹни дьдә бәр дьле хwә у зарʹ хwә ча хwәйкьри тʹәхмин дькә.  Йаһоwа wи щурʹәйи һʹьзкьрьна хwәйә назьк һьндава хьзмәткʹаред хwә әʹйан дькә. Тʹö щар дöдьли нәбьн, wәки хут һун бона Йаһоwа qимәт ьн у дәлал ьн (Йерәм. 31:3).

8, 9. Һʹьзкьрьна Иса ча дькарә мә qәwи кә?

⁸ Диса мәʹник һәйә, кö әм чьрʹа гәрәке һʹьзкьрьна Йаһоwада дöдьли нәбьн. «Хwәде öса дьнйа һʹьз кьр, кö Кöрʹе хwәйи тайе тʹәне бәрва да, wәки һәр кәсе кö wи баwәр бькә öнда нәбә, ле жийина wийә һʹәта-һʹәтайе һәбә» (Йуһʹн. 3:16). Иса жи һʹьзкьрьнәкә мәзьн да кʹьфше, кö әʹмьре хwә да бона мә! Әw һʹьзкьрьна wи рʹасти жи чьqас мә дьшьдинә! Хәбәра Хwәде дьбежә кö һәла һе «дәрд-кöл» у «тәʹли-тәнги» жи, нькарә «һʹьзкьрьна Хwәде сәр мә сар кә» (Рʹом. 8:35, 38, 39).

⁹ Щара әм рʹасти чәтьнайед öса тен, кö әм физикида, емосийалида йан жи рʹöһʹанида qöдум дькʹәвьн у шабуна хwә öнда дькьн. Һьнге лазьм ә әм биньн бира хwә, wәки Мәсиһ чьqас мә һʹьз дькә, у әw йәк дькарә qәwате бьдә мә сәва бәр wан чәтьнайа тәйах кьн. (Бьхунә 2 Корьнтʹи 5:14, 15.) Һʹьзкьрьна Иса qәwата мәзьн дьдә мә, wәки әм дәстед хwә сьст нәкьн у qәwи бьминьн чахе әм рʹасти тәнгасийа тен, мәсәлә тʹәшqәлед тʹәбийәте, пәйкʹәтьн, дьлшькәстибун у бәрхwәкʹәтьн.

10, 11. Кʹе борщдар ә wәки хушк-бьред дьлтәнг qәwи кә? Шьровәкьн.

¹⁰ Йаһоwа öса жи бь сайа щьвате пе һʹьзкьрьна хwә мә qәwи дькә. Һәрге әм хушк-бьред хwә һʹьз дькьн у qәwи дькьн, һьн рʹöһʹанида һьн жи емосийалида, öса әм избат дькьн һʹьзкьрьна хwә һьндава Йаһоwа (1 Йуһʹн. 4:19-21). Паwлосе шанди ширәт да Мәсиһийа: «Дьл бьдьнә һәв у аликʹарийа һәвдö бькьн, чаwа һун дькьн жи» (1 Тʹеслн. 5:11). Бәле, щьватеда нә кö тʹәне рʹуспи, ле гьшк жи гәрәке чʹәʹв бьдьнә Йаһоwа у Иса, кö дьл бьдьнә хушк-бьра у wана qәwи кьн. (Бьхунә Рʹомайи 15:1, 2.)

¹¹ Һьнә хушк-бьред щьватеда, йед кö депресийеда ньн у гәләк емосийали нә, дьбәкә һʹәwще аликʹарийа һʹәким ьн (Луqа 5:31). Рʹуспи у хушк-бьред  дьн фәʹм дькьн, wәки әwана мина һʹәким нькарьн сьһʹәт-qәwата wан хушк-бьра qәнщ кьн. Ле йәкә әwана дькарьн аликʹарийа мәзьн бьдьн ве йәкеда, кö дьл бьдьнә бәр йед кö депресийеда ньн, кери кʹәтийа бен у һьндава һʹәмуйада бь сәбьр бьн (1 Тʹеслн. 5:14). Һʹәму Мәсиһи гәрәке дьлшәwат у бь сәбьр бьн, у тʹәви хушк-бьред кö дьлтәнг ьн, ширьн хәбәр дьн у бәр дьле wанда бен. Ле һун дьл дьдьнә хушк-бьра у wана дьшьдиньн? Һун чь гәрәке бькьн сәва wана дьлгәш кьн?

12. Мәсәла хушке гьли кьн, кö чаwа әw бь сайа һʹьзкьрьна щьватеда qәwи бу.

¹² Чаwа һʹьзкьрьна мә дькарә йен емосийалида wәстийайи, бьшьдинә? Хушкәк жь Әwропайе дьбежә: «Щара фькьред öса тенә һʹьше мьн, wәки дьхwазьм хwә бькöжьм. Ле әз аликʹарийа мәзьн дьстиньм. Щьвата мьн әʹмьре мьн хьлаз дькә. Хушк-бьра тʹьме бәр дьле мьнда тен у дьлован ьн һьндава мьн. Рʹаст ә нә һʹәмушк заньн wәки депресийа мьн һәйә, ле щьват мьн тʹәне наһелә. Щьватеда һәнә жьн-мерәки кö бона мьн де-баве рʹöһʹани нә. Әwана бона мьн хәм дькьн, у дькарьм бежьм wәки рʹоже 24 сьһʹәта әwана тʹәви мьн ьн». Рʹаст ә гьшк нькарьн аликʹарийа öса бьдьн, ле һәр кәс жь мә дькарә хәм бькә у чьqас дькарә аликʹарийе бьдә хушк-бьред кö депресийеда ньн. *

13. Һәрге әм дьхwазьн кәсәки бьшьдиньн, чь гәләк фәрз ә бькьн?

¹³ Рʹьнд гöһ бьдьн wан (Аqуб 1:19). Әw йәк бь һʹьзкьрьн ә чахе һун бь дьлшәwати гöһ дьдьнә мәрьва. Wәʹде хәбәрдане һун дькарьн бь мәʹрифәти пьрса бьдьнә wан, сәва кö еша wан фәʹм кьн. Wи щурʹәйи һуне бькарьбьн бәрдьлийе бьдьнә wан у wана qәwи кьн. Бәшәра wәва жи гәрәке бе кʹьфше, кö һун бона wан хәм дькьн у дьхwазьн али wан бькьн. Һәрге хушк йан бьрак дьхwазә дьле хwә wәрʹа вәкә у һур бь һур кöла хwә wәрʹа гьли дькә, бь сәбьр гöһ бьдьне у гьлийед wи нәбьрʹьн. Öса һуне бькарьбьн wи һе рʹьнд фәʹм кьн. Ле әw wе алийе хwәда итʹбарийа хwә wә бинә у чахе ида һун хәбәр дьн сәва wи бьшьдиньн, әw жи wе бьхwазә гöһ бьдә wә. Чахе әw бьвинә кö һун бь рʹасти дькʹәвьнә һәйрʹа wи, чьмки wи һʹьз дькьн, әw wе гәләк qәwи бә у дьлбинийе бьстинә.

14. Чьрʹа әм гәрәке зьмане хwә бькарьбьн?

¹⁴ Сәрт нибьн у зьмане хwә бькарьбьн. Һәрге әм тʹәви мәрьвед кö депресийеда ньн, сәрт бьн у wана нәһәq кьн, әме дәрде wан һе зедә кьн у әw йәк wе рʹе мә бьгьрә сәва бь һʹьзкьрьне wана qәwи кьн. Кʹьтеба Пироз дьбежә: «Һьнәк бь хәбәра мина шур мерьв бьриндар дькьн, ле зьмане сәрwахта дәрмане дьла йә» (Мәтлк. 12:18). Фәʹмдари йә, әм бь һʹәмде хwә нахwазьн кәсәки пе гьлийа «бьриндар» кьн, ле һәрге бе һʹәмде хwә жи бькьн, әw йәк дькарә гәләк хьраб сәр wан һʹöкöм бә. Сәва кö бь һʹьзкьрьне wана ава бькьн у бьшьдиньн, лазьм ә әм дьлшәwат бьн у хwә дайньн дәwса wан (Мәт. 7:12).

15. Диса кʹижан һащәта qимәт дькарә али мә бькә кö пе һʹьзкьрьне мәрьва qәwи кьн?

¹⁵ Пе Хәбәра Хwәде дьлбинийе бьдьнә хушк-бьра. (Бьхунә Рʹомайи 15:4, 5.) Кʹьтеба Пироз әw һәйә хьзна qимәт,  жь кʹидәре мәрьв дькарә дьлбинийе у бәрдьлийе бьстинә. Әw кʹьтеб жь «Хwәдейе сәбьре» у бәрдьлийе йә. Хенщи рʹезед жь Кʹьтеба Пироз, диса һәнә һащәт, кö дькарьн аликʹарийе бьдьнә мә. Бәʹса хәбәре, әм дькарьн бьдьнә хәбате «Индекса Әʹдәбйәта Бьрща Qәрәwьлийе» у «Рʹебәрийа Леколинкьрьне бона Шәʹдед Йаһоwа». Бь сайа wан әʹдәбйәта әм дькарьн жь Хәбәра Хwәде бьвиньн wан фькьра, кʹижан кö али мәрьва дькьн кö бәр һʹәму щурʹә чәтьнайа тәйах кьн. Әw һащәт дькарьн мә һазьр кьн wәки фькьред öса бежьнә wан, кö әwана бәрдьлийе бьстиньн, у öса аликʹарийа мә wе дьһа кʹаре бьдә wан.

16. Кʹижан һʹöнöр мәрʹа лазьм ьн сәва дьл бьдьнә дьлшкәстийа?

¹⁶ Дьлован у нәрм бьн. Әw йәк гәләк фәрз ә чахе әм дьхwазьн кәсәки бьшьдиньн у дьлгәрм кьн. Йаһоwа «Баве дьлшәwатийе у Хwәдейе һʹәму бәрдьлийе» йә, у әw һьндава хьзмәткʹаред хwә гәләк рʹәʹм ә. (Бьхунә 2 Корьнтʹи 1:3-6; Луqа 1:78; Рʹом. 15:13) Паwлос ве йәкеда мәсәләкә баш мәрʹа һиштийә. Әwи ньвиси: «Әм нава wәда рʹунәрм бунә, чаwа кәваник кö зарʹед хwәрʹа дьрʹьщьфә. Öса жи дьле мә сәр wә дьшәwьти, һʹәта кö мә дьхwәст нә кö тʹәне Мьзгинийа Хwәде бьда wә, ле әʹмьре хwә жи, чьмки һун бьбунә дәлалийед мә» (1 Тʹеслн. 2:7, 8). Чахе әм һьндава мәрьвед дьлшкәсти ширьн у нәрм ьн, әм ве бәрдьлийе дьдьнә wан, бона кʹижани дьбәкә wана дöа кьрьбу.

17. Кʹижан ньһерʹандьна һьндава хушк-бьра, wе али мә бькә wана пе һʹьзкьрьне бьшьдиньн?

¹⁷ Жь хушк-бьра гәләк дәʹwа нәкьн. Һәрге әм жь хушк-бьра гәләк дәʹwа бькьн у һивийе бьн wәки әwана тʹö щар шашийа нәкьн, әме бина хwә тәнг кьн у wе дьле мә бьшке (Wаиз 7:21, 22). Бир нәкьн, wәки Йаһоwа жь хьзмәткʹаред хwә дәʹwа накә wан тьшта чь кö жь qәwата wан дәр ә. Һәрге әм чʹәʹв бьдьнә Йаһоwа, әме бь сәбьр бьн һьндава кемасийед хушк-бьра (Әфәс. 4:2, 32). Һьнге әме нә кö дина хwә бьдьн сәр шашийед wан, ле сәр кьред wани баш, у пʹайе wан бьдьн. Öса әwана wе бьшьдьн у дьлгәрм бьн. Чахе әм бь дьле хwәйи сах пʹайе wан бьдьн, нә кö wана бәрамбәри кәсәки дьн бькьн, әwана wе бьвиньн кö хьзмәтийа wанда мәʹнийа шабуне һәйә. У әw йәк wе дьһа кʹаре wанрʹа бинә (Галт. 6:4).

18. Чь мә һелан дькә, wәки пе һʹьзкьрьне һәвдö бьшьдиньн?

¹⁸ Һәр хьзмәткʹарәки Йаһоwа qимәт ә бона wи у Иса, йе кö әʹмьре хwә да ча кʹьрʹин сәва мә (Галт. 2:20). Әм хушк-бьред хwәйә рʹöһʹани гәләк һʹьз дькьн у дьхwазьн бона wан бь дьл у щан хәм бькьн. Сәва кö wана гәш кьн, әм гәрәке «һьндава һәвда сәр нета әʹдьлайийе у баwәри авакьрьне бьн» (Рʹом. 14:19). Әм гьшк гәләк һивийа wи wәʹдәйи нә чахе дьнйа бьбә Щьнәт, у әме тʹö щар ида бона тʹö тьшти дьлтәнг нәбьн! Wедәре нә нәхwәши, нә шәрʹ, нә мьрьн, нә пәйкʹәтьн, нә чәтьнайед малбәтеда, нә жи дьлшькәстибун wе тʹöнәбә. Чахе Һʹәзарсалийа Пʹадшатийа Иса дәрбаз бә, инсанәт wе бьгьһижә кʹамьлбуне. Әwед кö щерʹьбандьна хьлазийеда амьн бьминьн, wе бьбьнә зарʹед Йаһоwа Хwәде сәр әʹрде у «тʹәви азайи у рʹумәта зарʹед Хwәде бьн» (Рʹом. 8:21). Ләма wәрә әм гьшк пе һʹьзкьрьне һәвдö бьшьдиньн у али һәвдö бькьн бьгьһижьнә нета баш кö кʹәрәма тинә.