1, 2. а) Йаһоwа ча щöдә дьбә жь мәрьвед хwәйиһʹöкöм? б) Әме ве готареда дәрһәqа чь шеwьр кьн?

ИРО мәрьвед qәwат у навдар, һʹәчʹи зәʹф «сәрwерийе» мәрьвед дьн дькьн, һәла һе жи хwә сәр wанрʹа дьгьрьн (Мәт. 20:25; Wаиз 8:9). Ле Йаһоwа чьqас жь wана щöдә дьбә! Рʹаст ә әw Һьмзор ә, йәкә әw гәләк хәм дькә бона мәрьвед гöнәкʹар. Әw qәнщ ә у дьлован ә. Әw һьлдьдә һʹәсаб нет-фькьред мә у һʹәwщед мә. Әw тʹö щар жь мә дәʹwа накә тьштед öса кö жь qәwата мә дәр ьн, чьмки «бир тинә кö әм хали нә» (Зәб. 103:13, 14).

² Кʹьтеба Пирозда гәләк сәрһати һәнә, кʹидәре те кʹьфше ча Йаһоwа бона хьзмәткʹаред хwә хәм дькә. Ве готареда әме дина хwә бьдьн сәр се сәрһатийа. Йа пешьн, Хwәде ча али Самуйел кьр, wәки әw Әли Сәрәккʹаһинрʹа дәрһәqа диwане әʹлам кә. Йа дöда, чаwа Йаһоwа бь сәбьр али Муса кьр гава әw дьфькьри, wәки wе нькарьбә рʹебәрийе Исраеле бькә. У йа сьсийа, Хwәде чь щурʹәйи хәм кьр бона Исраелийа, гава әwана жь Мьсьре дәркʹәтьн. Wәʹде шеwьркьрьне, бьфькьрьн әw сәрһати чь мә һин дькьн дәрһәqа Йаһоwа у әм чь дәрса дькарьн хwәрʹа һьлдьн.

3. Чь qәwьмандьна мәхсус qәwьми тʹәви Самуйел, у кʹижан пьрс пешда те? (Бьньһерʹә шькле әʹwльн.)

³ Самуйел коне пирозда дәстпекьр «хьзмәте» Йаһоwарʹа бькә, чахе һе бьчʹук бу (1 Сам. 3:1). Еварәке чахе Самуйел дьчу рʹазе, тьштәки мәхсус qәwьми. * (Бьхунә 1 Самуйел 3:2-10.) Әwи дәнге кәсәки бьһист, кö дькә гази у наве wи һьлдьдә. Самуйел тʹьре кö әw дәнге Әли Сәрәккʹаһин ә, рʹәви бал у гот: «А вай әз, жь бәр кö тә банги [гази] мьн кьр». Әли гот wәки әwи гази wи нәкьрийә. Чахе диса дö щара әw йәк qәwьми, Әли фәʹм кьр wәки әw Хwәде йә кö гази Самуйел дькә. Ләма жи әwи готә гәдә, кö әw ча щаба Хwәде бьдә, у гәдә гöрʹа wи кьр. Ле чьрʹа Йаһоwа бь сайа мьлйакʹәте хwә, дәрберʹа хwә Самуйелрʹа әʹйан нәкьр? Кʹьтеба Пирозда дәрһәqа ве йәке найе готьне, ле йәкә жь ве qәwьмандьне те кʹьфше кö әwи хәм кьр бона Самуйеле щаһьл, чьмки дәрәща wи һьлда һʹәсаб. Ле чь щурʹәйи?

4, 5. а) Самуйел ча хwә да кʹьфше чахе Хwәде әʹламәти жерʹа гот, у паше чь qәwьми? б) Әw сәрһати дәрһәqа Йаһоwа чь мә һин дькә?

⁴ Бьхунә 1 Самуйел 3:11-18. Qануна Йаһоwа тʹәми дьда зарʹа, wәки qәдьре йед әʹмьрда мәзьн бьгьрьн, илаһи йед кö хwәйиһʹöкöм бун (Дәркʹ. 22:28; Qан. Кʹаһ. 19:32). Һун qә дькарьн баwәр кьн, кö Самуйеле бьчʹук шәбәqе зу рʹабә у хwәха бь мерхаси Әлирʹа диwана Хwәде әʹлам кә? Фәʹмдари йә, әwи wе öса нәкьра. Кʹьтеба Пироз дьбежә, wәки Самуйел «тьрсийа кö хәwн у хәйале Әлирʹа бежә». Ле Хwәде Әлирʹа әʹйан кьр, wәки Әw гази Самуйел дькә. Әли әв йәк фәʹм кьр, ләма жи готә Самуйел: «Жь мьн вәнәшерә . . . һʹәму тьштед кö жь тәрʹа готьнә, йәки жи». Самуйел гöрʹа wи кьр у һʹәму тьшт жерʹа гьли кьр.

⁵ Әw әʹламәти кö Самуйел жерʹа гьли кьр, дьбәкә Әли әʹщебмайи нәкьр, чьмки пешийа ве йәке «зьламәки Хwәде» жерʹа әʹламәтикә öса готьбу (1 Сам. 2:27-36). Әw qәwьмандьн кö тʹәви Самуйел у Әли qәwьми, дьдә кʹьфше wәки Йаһоwа ча һәр тьшти һьлдьдә һʹәсаб у чьqас билан ә.

6. Әм чь дәрса дькарьн һин бьн жь ве йәке, кö Хwәде чаwа али Самуйеле щаһьл кьр?

⁶ Һәрге тö щаһьл и, әw сәрһатийа Самуйел тәрʹа дьдә кʹьфше, wәки Йаһоwа рʹьнд занә кö тö рʹасти чь чәтьнайа тей у чь тʹәхмин дьки. Дьбәкә тö шәрмокә йи у тәрʹа чәтьн ә тʹәви мәрьвед әʹмьрда мәзьн дәрһәqа мьзгинийе хәбәр ди, йан жи тö нава щаһьлада щöдә дьби. Дöдьли нәбә кö Йаһоwа дьхwазә али тә бькә. Ләма жи дöада тʹьме дьле хwә жерʹа вәкә (Зәб. 62:8). Кʹур бьфькьрә сәр мәсәлед Кʹьтеба Пироз дәрһәqа щаһьла, мәсәлә дәрһәqа Самуйел. Öса жи тʹәви wан хушк-бьра хәбәр дә, йед кö тәйах дькьн бәр проблемед мина йед тә, фьрqи тʹöнә әwана щаһьл ьн йан әʹмьрда мәзьн ьн. Әwана дькарьн тәрʹа гьли кьн, wәки ча Йаһоwа али wан кьрийә, дьqәwьмә öса кö wана нә жи дабу бәр чʹәʹве хwә.

7, 8. Йаһоwа һьндава Муса хwә ча кʹьфш кьр, у бона wи хәм кьр?

⁷ Чахе Муса 80 сали бу, Йаһоwа щабдарийа мәзьн да wи. Муса гәрәке щьмәʹта Исраел жь дилтийа Мьсьре дәрхьста (Дәркʹ. 3:10). Дьбәкә әw йәк wи гәләк әʹщебмайи кьр, чьмки әwи 40 сала Мьдйанеда шьванти дькьр. Ләма әwи гот: «Әз кʹи мә кö һәрʹьмә щәм Фьрәwьн у зарʹед Исраел жь Мьсьре дәрхьм?». Ле Хwәде дьл да wи у гот: «Әзе тʹәви тә бьм»  (Дәркʹ. 3:11, 12). Йаһоwа öса жи дәрһәqа рʹуспийед Исраеле соз да Муса: «Әwе гöрʹа тә бькьн». Һәла һе сәр ве йәке жи Муса гот: «Ле һәрге әwана . . . мьн баwәр нәкьн?» (Дәркʹ. 3:18; 4:1, ДТʹ). Жь гьлийед Муса öса дәрдькʹәт кö Йаһоwа шаш дьбә! Ле йәкә Йаһоwа диса жи һьндава Муса бь сәбьр бу. Әwи һәла һе жи qәwат да Муса, wәки кʹәрәма бькә. Бь рʹасти Кʹьтеба Пирозда Муса мәрьве пешьн бу, qәwата кʹижани һәбу кö кʹәрәма бькә (Дәркʹ. 4:2-9, 21).

⁸ Ле йәкә Муса диса мәʹни гьрт, у гот кö әw зьманда гьран ә. Ле Хwәде щаба wи да: «Әзе тʹәви дәве тә бьм у тә һин кьм, чь кö тö гәрәке бежи». Ле гәло Муса дьлрʹьһʹәт бу? Ча те кʹьфше на, чьмки әwи паши ве йәке жи жь Хwәде һиви кьр, кö дәwса wи кәсәки дьн бьшинә. Сәр ве йәке һерса Йаһоwа рʹабу, у фәʹмдари йә чьрʹа. Йәкә Хwәде сәр йа хwә нәсәкьни, әwи диса жи бона Муса хәм кьр. Әwи фькьред Муса һьлда һʹәсаб, ләма Һарун кʹьфш кьр, wәки дәwса wи хәбәр дә (Дәркʹ. 4:10-16).

9. Йаһоwа ча һьндава Мусада сәбьр у нәрми да кʹьфше?

⁹ Әw сәрһати чь мә һин дькә дәрһәqа Йаһоwа? Йаһоwа Хwәдейе Һьмзор ә, у әwи дькарьбу Муса бьда тьрсандьне у зоре wи бькьра, кö гöрʹа wи бькә. Ле Хwәде öса нәкьр, әw һьндава wи бь сәбьр у нәрм бу. Һьн жи Хwәде готә Муса кö әw тʹәви wи йә, у бь ве йәке дьл да хьзмәткʹаре хwәйи мьлук у шкәсти. Ле гәло әwе йәке тьштәкида кʹар ани? Бәле! Муса ахьрийеда бу рʹебәре гәләк баш, у һьндава щьмәʹтеда бь сәбьр у нәрм бу, чаwа Хwәде тʹәви wи бу (Жьмар 12:3).

10. Чахе әм хәмкьрьнеда чʹәʹв дьдьнә Йаһоwа, әм чь кʹаре дьстиньн?

¹⁰ Жь ве йәке әм дькарьн гәләк дәрса хwәрʹа һьлдьн. Һәрге һун малхе мале нә, де йан бав ьн, йан жи рʹуспи нә, фәʹмдари йә wәки һʹöкöме wә һәйә. Ле гәләк фәрз ә, wәки һун чʹәʹв бьдьнә Йаһоwа кö бь фәʹмдарийе, нәрм у бь сәбьр бьн һьндава wанда, бона кʹе жи һун щабдар ьн (Колс. 3:19-21; 1 Пәт.  5:1-3). Һәрге һун чʹәʹв бьдьнә Йаһоwа у Иса Мәсиһ, мәрьв wе бьхwазьн тʹәви wә һәвалтийе бькьн у тʹәви wә незик бьн. Öса һуне бькарьбьн wана гәш кьн (Мәт. 11:28, 29). Хенщи ве йәке, һуне öса жи бьбьнә мәсәла баш у йед дьн wе чʹәʹв бьдьнә wә (Ибрн. 13:7).

11, 12. Чахе Йаһоwа Исраели жь Мьсьре дәрдьхьст, ча әwи дьле wан рʹьһʹәт кьр у әwана хwәй дькьрьн?

¹¹ Чахе сала 1513 Б.Д.М., Исраелийа Мьсьр һиштьн, әwана дьбәкә һьнге wәкә се милйона зедәтьр бун. Нава wанда зарʹ, кал-пир у дьбәкә öса жи йед нәхwәш у сәqәт жи һәбун. Фәʹмдари йә, wанрʹа лазьм бу Рʹебәре фәʹмкʹар, кʹижани кö бона wан хәм кьра. Йаһоwа бь сайа Муса буйә һәма рʹебәрәки öса. Ләма чахе Исраелийа малед хwә һиштьн у чун, дьлрʹьһʹәт бун у хwә хwәйкьри тʹәхмин дькьрьн (Зәб. 78:52, 53).

¹² Ле чь щурʹәйи Йаһоwа али щьмәʹта хwә кьр, wәки дьлрʹьһʹәт бьн у нәтьрсьн? Әwи бь организә щьмәʹта хwә «сильһʹкьри» жь Мьсьре дәрхьст (Дәркʹ. 13:18). Әwе йәке wе әʹсә Исраелийа qәwи кьра, чьмки әwана дьдитьн кö чʹәʹве Хwәдейе wан сәр wан ә у рʹебәрийа wан дькә. Хенщи ве йәке, Йаһоwа öса кьр, wәки әwана баwәр бьн кö әw тʹәви wан ә, «рʹоже пе әʹwьр», ле «шәве пе рʹонайийа егьр» (Зәб. 78:14). Бь ве йәке Йаһоwа ча бежи wанрʹа дьгот: «Нәтьрсьн, чьмки әз тʹәви wә мә. Әзе wә хwәй кьм у рʹебәрийе бьдьмә wә». Бь рʹасти әw дьлдайин wанрʹа гәләк лазьм бу, чьмки паше тьштед дьн qәwьмин.

13, 14. а) Йаһоwа бәр Бәʹра Сор чь кьр бона Исраелийа? б) Йаһоwа ча сәр Мьсьрийа qәwата хwә нишан кьр?

¹³ Бьхунә Дәркʹәтьн 14:19-22. Һәла хwә дайньн дәwса wан Исраелийа, йед кö кʹәтьнә тʹәльке, чьмки алики ордийа Фьрәwьн ә, алийе дьн жи Бәʹра Сор. Һун дьвиньн кö Хwәде дькʹәвә нава wи шьхöли. Әw öса дькә, wәки стуна әʹwьр пьшт зома wә дьсәкьнә. Бона Мьсьрийа әʹwрайи у шәвәрʹәш ә, ле зома wәда рʹонайи йә! Паше һун дьвиньн ча Муса дәсте хwә дьрежи сәр бәʹре дькә, у байе рʹоһьлатейи qайим бәʹреда рʹекә фьрә вәдькә. У бь тʹәрбәти һун, нәфәред wә, у һʹәйwанед wәйи мале, öса жи Исраелийед дьн, сәр халийа бьне бәʹрерʹа дәрбаз дьбьн. Ле һун мәтʹал дьминьн, чьмки дьвиньн wәки әв хали, нә кö шьл у һʹәри йә, йан жи qәрьми йә, ле әw зьһа у нәрм ә, у һеса йә рʹе һʹәри. Һәла һе йед сьст жи һеса у сах-сьламәт дәрбази алийе дьн дьбьн.

¹⁴ Бьхунә Дәркʹәтьн 14:23, 26-30. Wи wәʹдәйи Фьрәwьне qöрʹә у сәрһʹьшк, пәй wә дькʹәвә сәва бьгьһижә wә. Һьнге Муса диса дәсте хwә дьрежи сәр бәʹре дькә. Ле ньһа бәʹр ида жь һәрдö алийава те һәв у Фьрәwьн ордийа хwәва педа дькʹәвьнә бьн аве, у qә йәк жь wан сах наминә (Дәркʹ. 15:8-10).

15. Әw сәрһати дәрһәqа Йаһоwа чь мә һин дькә?

¹⁵ Жь ве сәрһатийе әм дьвиньн кö Йаһоwа һәйә Хwәдейе пʹәргалийе у тʹәрбәтийе. Әw һʹöнöред wи али мә дькьн, wәки әм хwә хwәйкьри тʹәхмин кьн (1 Корн. 14:33). Йаһоwа öса жи мина шьване һʹьзкьри хәм дькә бона щьмәʹта хwә у мьqати wан дьбә. Әw wана жь дьжмьна хwәй дькә. Әw йәк рʹасти жи чьqас мә qәwи дькә, чьмки әм гәләк незики ахьрийа ве дьнйайе нә (Мәтʹлк. 1:33).

16. Әм чь кʹаре дьстиньн чахе дьфькьрьн, кö Йаһоwа ча щьмәʹта Исраел хьлаз кьр?

¹⁶ Иро жи Йаһоwа бь тʹәмами бона щьмәʹта хwә хәм дькә, чаwа рʹöһʹанида  öса жи физикида. Wәʹде тәнгасийа мәзьн жи, кö ида бәр шемике йә, әw wе öса бькә (Әʹйан. 7:9, 10). Wи wәʹдәйи, фьрqи тʹöнә щаһьл йан әʹмьрда мәзьн, сьһʹәт-qәwат йан жи сәqәт, щьмәʹта Хwәде wе нәкʹәвә панике у wе нәтьрсә. * Һьнге әв гьлийед Иса Мәсиһ wе бькʹәвә бира wан: «Рʹабьн сәре хwә бьльнд кьн, чьмки азабуна wә иди незик ә» (Луqа 21:28). Öса жи әме баwәрийа хwә öнда нәкьн кö Хwәде wе мә хьлаз кә, гава Гог, демәк коалисйа дәwләта, кö жь Фьрәwьн һе qәwаттьр бә, wе пәй мә кʹәвә (Һәзqл. 38:2, 14-16). Ле чьрʹа щьмәʹта Хwәде wе öса дьлрʹьһʹәт бә? Чьмки әwана заньн кö Йаһоwа найе гöһастьне. Әwе диса жи бьбә Хьлазкʹаре qәнщ, кʹижан кö wе хәм бькә бона щьмәʹта хwә (Иша. 26:3, 20).

17. а) Чаwа әм дькарьн кʹаре бьстиньн чахе Кʹьтеба Пирозда wан сәрһатийа дьхуньн, кö чаwа Йаһоwа бона щьмәʹта хwә хәм дькьр? б) Әме готара дьнда дәрһәqа чь шеwьр кьн?

¹⁷ Диса гәләк сәрһати һәнә, кö дьдьнә кʹьфше, wәки Йаһоwа һьндава щьмәʹта хwә чьqас qәнщ, фәʹмкʹар у нәрм ә, у бона wан хәм дькә, рʹебәрийе дьдә wан у wана хьлаз дькә. Чахе һун бьфькьрьн сәр wан сәрһатийа, дина хwә бьдьнә сәр тьштед һур жи, кö һʹöнöред Йаһоwа әʹйан дькьн. Wи щурʹәйи әw һʹöнöред wи wе сәр һʹьш у дьле wә кʹур һʹöкöм бьн, öса жи wе һʹьзкьрьн у баwәрийа wә һьндава Хwәде һе qәwи бә. Готара дьнда әме шеwьр кьн чаwа әм дькарьн чʹәʹв бьдьнә Йаһоwа, кö һьндава мәрьва фәʹмкʹар бьн у бона wан хәм бькьн. Әме дина хwә бьдьне кö чаwа малбәтеда, щьватеда у хьзмәтийеда әм дькарьн ве йәке бькьн.