1. Чахе әм кʹьлама дьстьрен әԝ ча сәр мә һʹӧкӧм дькә?

МӘРЬВӘКИ навдар кӧ кʹьлама дьньвисә, гот: «Бь сайа хәбәра, һʹьше мәда фькьр пешда тен. Бь сайа мьԛаме, дьле мәда һәст пешда тен. Ле бь сайа кʹьламе, һәрдӧ тʹәвайи пешда тен у хәбәр дьгьһижьнә дьла». Пе кʹьлама әм пәсьна дьдьнә Йаһоԝа у һʹьзкьрьна хԝә жерʹа әʹйан дькьн. Рʹасти жи чьԛас хԝәш ә гава әм бона ԝи дьстьрен у һе незики ԝи дьбьн! Фьрԛи тʹӧнә әм тʹәне дьстьрен йан тʹәви хушк-бьред хԝә, йәкә тʹьме кʹьлам хьзмәткьрьна Хԝәдеда щийе фәрз дьгьрә.

2, 3. а) Һьнәк чьрʹа нькарьн бь дәнге бьльнд щьватеда бьстьрен? б) Ве готареда әме кʹижан пьрса шеԝьр кьн?

² Ле һун щьватеда бь дәнге бьльнд дьстьрен, йан шәрм дькьн? Нав һьнә мьләтада мер шәрм дькьн бәр мәрьвед дьн бьстьрен. Әԝ йәк дькарә сәр тʹәмамийа щьвате жи һʹӧкӧм кә, илаһи һәрге рʹуспи шәрм дькьн бьстьрен, йан жи чахе щьват кʹьлама дьстьре, ле әԝана шьхӧлед дьн дькьн (Зәб. 30:12).

³ Һәрге әм бь рʹастийе стьрандьна кʹьлама һʹәсаб дькьн ча пʹара хьзмәтийа хԝә, щьватеда ԝәʹде кʹьлама әме нәчьн-нәйен. Ләма һәр кәс жь мә гәрәке пьрсәкә ӧса бьдә хԝә: «Гәло ԝәʹде щьвате стьрандьна кʹьлама бона мьн фәрз ә? Әз ча дькарьм чәтьнайа алт кьм ԝәки аза у бь дәнге бьльнд щьватеда бьстьрем? У ча әз дькарьм кʹьлама бь дьл бьстьрем?»

4, 5. Бона Исраелийа һʹәбандьнеда стьрандьн чь щи дьгьрт?

⁴ Бәреда хьзмәткʹаред Йаһоԝа пе кʹьлама пәсьн у шькьри дьданә Йаһоԝа. Дина хԝә бьдьне, кӧ чахе Исраели бь амьни Йаһоԝарʹа хьзмәт дькьрьн, стьрандьн һʹәбандьна ԝанда щийе фәрз дьгьрт. Бәʹса хәбәре, чахе Даԝьд Пʹадша бона хьзмәтийа пʹарьстгәһеда кʹар дькьр, әԝи 4 000 Леԝи бьжарт сәва бь кʹьлама пәсьн у шькьрийе бьдьнә Йаһоԝа. Нава ԝанда 288 мәрьв һинкьри бун, ԝәки бона Йаһоԝа бьстьрен, у әԝ һʹәмушк жи ԝе йәкеда һостә бун (1 Дир. 23:5; 25:7).

⁵ Чахе пʹарьстгәһ тʹәсмили Йаһоԝа дькьрьн, һьнге жи мьԛам у кʹьлама щийе фәрз дьгьртьн. Кʹьтеба Пирозда те готьне: «Гава кӧ боривана у дәнгбежа бь һәврʹа пәсьн у шькьри дьданә Йаһоԝа, у гава кӧ дәнге борийе у шьнгинийа болма у саза шькьри дьданә Йаһоԝа . . . рʹумәта Йаһоԝа, мала Хԝәдейе рʹаст тʹьжә кьрьбу». Бьдьнә бәр чʹәʹве хԝә, ԝәки әԝе ԛәԝьмандьне чьԛас баԝәрийа Исраелийа ԛәԝи кьр (2 Дир. 5:13, 14, ДТʹ; 7:6).

6. Нәһәмийа диса чь кьр чахе диԝаред Оршәлиме һатьнә тʹәсмилкьрьне?

⁶ Нәһәмийа рʹебәри дькьр ԝәки диԝаред Оршәлиме тʹәзәда бенә данине. Хенщи ве йәке, әԝи ӧса жи рʹебәри кьр, ԝәки Леԝийед дәнгбеж мьԛама лехьн у кʹьлама бежьн. Чахе диԝаред Оршәлиме тʹәсмил дькьрьн, бона ве йәке кʹьлама мәхсус ледьхьстьн, у шабуна Исраелийа һе зедә дьбу. Һьнге һәбун «дӧ льԛед [кʹомед] мәзьн кӧ шькьрийе дькьн». Әԝана щурʹә-щурʹә алийава дьчун, у паше незики диԝаред пʹарьстгәһе рʹасти һәв дьһатьн, сәва кӧ дурва дәнг бе бьһистьне (Нәһәм. 12:27, 28, 31, 38, 40, 43). Бешьк, Йаһоԝа гәләк ша дьбу гава дьбьһист дәнге хьзмәткʹаред хԝә, йед кӧ бь дьл у щан бь кʹьлама шькьри дьданә ԝи.

7. Иса ча нишан кьр кӧ бона Мәсиһийа стьран гәрәке щийе фәрз бьгьрә?

⁷ Ԝәʹде Исада жи һʹәбандьна рʹастда кʹьлама щийе фәрз дьгьртьн. Биньн бира хԝә еварәкә мәхсус нав тʹәмамийа тʹәрихийа инсанәтеда. Гава Иса Шива Хӧдан дәрбаз кьр, әԝи шагьртед хԝәва бь кʹьлама пәсьн данә Йаһоԝа. (Бьхунә Мәтта 26:30.)

8. Мәсиһийед ԛьрʹна йәкеда чь мәсәлә һиштьнә стьранеда?

⁸ Мәсиһийед ԛьрʹна йәке тʹәвайи бь кʹьлама пәсьне Хԝәде дьдан. Әԝ бона мә мәсәлә йә. Гәләк щар әԝана дьзикава малада тʹоп дьбун, ле әԝе йәке рʹе ԝан нәдьгьрт, ԝәки пәсьне Йаһоԝа бьдьн. Паԝлос пе рʹебәрийа Хԝәде бьред Мәсиһирʹа гот: «Бь һʹәму сәрԝахтийе ль һәв һин кьн у ширәт кьн, зәбура у һәр щурʹә стьранед рʹӧһʹани бь шькьрдари дьле хԝәда бона Хԝәде бьстьрен» (Колс. 3:16). Кʹьламед кӧ кʹьтеба мәйә кʹьламада һәнә, рʹасти жи «стьранед рʹӧһʹани» нә, кʹижан кӧ гәрәке «бь шькьрдари» бенә стьране. Әв һәйә пʹарәкә хԝарьна рʹӧһʹани кӧ «хӧламе амьн у сәрԝахт» дьдә мә (Мәт. 24:45).

9. а) Чь дькарә бьбә мәʹни кӧ щьватеда йан щьватед мәзьнда бь дьл у щан нәстьрен? б) Әм ча гәрәке бьстьрен кʹьламед пәсьндайине Йаһоԝарʹа, у пешийе кʹе гәрәке ве йәкеда мәсәла баш бә? (Бьньһерʹә шькле әʹԝльн.)

⁹ Дьбәкә малбәта ԝәда йан нав мьләте ԝәда әʹдәт нинә кӧ бьстьрен. Йан жи дьԛәԝьмә һун пе телевисйоне йан радиойе дәнге дәнгбежа дьбьһен  кӧ гәләк рʹьнд дьстьрен у һун дәнге хԝә бәрамбәри дәнге ԝан дькьн. Һьнге һун дькарьн бәрхԝә кʹәвьн кӧ мина ԝан нькарьн бьстьрен. Ле йәкә әв тьшт гәрәке нәбьнә мәʹни кӧ щабдарийа хԝә нәйньн сери, демәк бь кʹьлама пәсьна нәдьн Йаһоԝа. Дәԝсе, кʹьтеба хԝәйә кʹьлама бьльнд бьгьрьн, сәре хԝә бьльнд кьн, у бь дьл у щан бьстьрен! (Әзр. 3:11; бьхунә Зәбур 147:1.) Иро гәләк Одед Щьватада, хәбәред кʹьлама сәр мониторе тенә нишанкьрьне, у әԝ йәк али мә дькә бь дәнге бьльнд бьстьрен. Ӧса жи ԝәʹде Мәкʹтәба Хьзмәтийе кӧ рʹуспи дәрбаз дьбьн, кʹьлам жи кʹәтьнә нава бәрнама ве мәкʹтәбе. Әв йәк дьдә кʹьфше кӧ чьԛас фәрз ә рʹуспи щьватеда бьстьрен у ве йәкеда бьбьнә мәсәлә.

10. Һәрге әм хԝә дьгьрьн кӧ бь дәнге бьльнд нәстьрен, әм чь гәрәке биньн бира хԝә?

¹⁰ Мәʹник кӧ чьрʹа гәләк хԝә дьгьрьн у бь дәнге бьльнд настьрен, әв һәйә тьрс. Бәʹса хәбәре, һьнәк дьтьрсьн кӧ йед дьн әʹщьз бьн һәрге бь дәнге бьльнд бьстьрен. Һьнәк жи дьфькьрьн кӧ дәнге ԝан нә хԝәш ә, у шәрм дькьн бьстьрен. Ле дина хԝә бьдьн сәр ве йәке, кӧ хәбәрданеда «әм һʹәму жи гәләки шашийа дькьн» (Аԛуб 3:2). Ле әв йәк рʹе мә нагьрә кӧ әм ида хәбәр нәдьн. Ләма жи чьрʹа әм гәрәке сәва дәнге хԝәйи бь ԛьсур, хԝә бьгьрьн у пе кʹьлама пәсьна нәдьнә Йаһоԝа?

11, 12. Чаԝа әм дькарьн сәва стьрандьне дәнге хԝә баш кьн?

¹¹ Дьбәкә әм шәрм дькьн бьстьрен чьмки ньзаньн ча бьстьрен. Ле ԝәрә әм чәнд ширәта шеԝьр кьн, кʹижан кӧ ԝе али мә бькьн әм һе рʹьнд бьстьрен. *

¹² Һәрге һун һин бьн кӧ ча рʹаст бина хԝә бькʹьшиньн, ԝе дәнге ԝә һе бьльнд бә у ԛайим бә. Ча ток кӧ  ԛәԝате дьдә сәва лус бьшьхӧлә, бинкʹьшандьн жи ԛәԝате дьдә дәнге мә ԝәʹде хәбәрдане у стьране. Һун гәрәке бь дәнге ӧса бьстьрен, чаԝа һун хәбәр дьдьн, йан һәла һе бь дәнге дьһа бьльнд жи (Кʹьтеба «Мәкʹтәба Даннасинкьрьнеда» сәр рʹупʹелед 181-184, бьнсәрийа бь наве «Чаԝа Пʹьшкед Хԝәда Һәԝе Контрол Бькьн», дәрһәԛа ве йәке һәнә ширәт). Кʹьтеба Пирозда жи чәнд щийада хьзмәткʹаред Йаһоԝарʹа те готьне кӧ «әшԛ» бьстьрен (Зәб. 33:1-3).

13. Шьровәкьн кӧ чаԝа әм дькарьн бона стьрандьне дәнге хԝә һе баш кьн.

¹³ Ԝәʹде ԛӧльхкьрьна тʹәви малбәте, йан жи чахе һун тʹәне нә, әван ширәта бьдьнә хәбате: Кʹьтеба кʹьламада бьжберьн кʹьламәке кʹижане һун һʹьз дькьн. Пешийе педа кʹьламе бь дәнге бьльнд бьхуньн. Паше, һәма бь ви дәнге бьльнд һәр щьмләке бинәкерʹа бьхуньн. Паше диса жи бь ԝи дәнги әве щьмле бьстьрен (Иша. 24:14). Ӧса ԝе дәнге ԝә һе ԛәԝи бә у баш бә. Дәнге хԝә нәгьрьн у тʹӧ щар шәрм нәкьн бьстьрен!

14. а) Чахе ԝәʹде стьрандьне дәве мә фьрә вәкьри йә, әԝ йәк чьда али мә дькә? (Бьньһерʹьн чаргошә « Чаԝа Дьһа Баш Бьстьрен».) б) Кʹижан ширәт али ԝә дькьн кӧ дәнге хԝә һе баш кьн?

¹⁴ Сәва кӧ бь дәнге ԛәԝи бьстьрен, лазьм ә дәве хԝә фьрә вәкьн. Демәк, чахе һун дьстьрен дәве хԝә һьнәки зедә вәкьн, нә кӧ чахе һун хәбәр дьдьн. Ле һун чь гәрәке бькьн һәрге дәнге ԝә гәләк ньмьз ә йан жи гәләк бьльнд ә? Дәрһәԛа ве йәке бьхуньн Кʹьтеба «Мәкʹтәба Даннасинкьрьнеда», рʹупʹела 184, чаргошеда бь наве «Чаԝа Чәтьнайед кӧ Дәнгва Гьредайинә Сафи кьн».

15. а) Сәр щьвата һәрсали йа сала 2016-да чь һатә әʹламкьрьне? б) Чьрʹа кʹьтеба кʹьлама һатә гӧһастьне?

¹⁵ Сала 2016-да сәр щьвата һәрсали  йа Шәʹдед Йаһоԝа, әʹламәтийа мәхсус һатә готьне. Стивен Лет бьра, әʹлам кьр дәрһәԛа дәрхьстьна кʹьтеба кʹьлама йа тʹәзә, бь наве «Бь Дьл у Щан бона Йаһоԝа Бьстьрен». Әԝи шьровәкьр кӧ мәʹнийа дәрхьстьна ве кʹьтебе әԝ ә, кӧ ль гора ԝәлгәрʹандьна «Дьнйа Тʹәзә» бә, кʹижан кӧ сала 2013-да һатә тʹәзәкьрьне. Ләма жи лазьм бу ԝәки кʹьламада һьнә гьли бенә дәрхьстьне йан жи бенә гӧһастьне, кʹижан кӧ ԝәлгәрʹандьна «Дьнйа Тʹәзә»-да тʹӧнә нә. Хенщи ве йәке, кʹьламед тʹәзә дәрһәԛа хьзмәтийа мә у рʹазибуне сәва кʹьрʹине һатьнә зедәкьрьне. Һьн жи, чьмки стьрандьн әԝ һәйә пʹара хьзмәтийа мә, Кʹома Рʹебәрийе хԝәст кӧ әв кʹьтеб бь матерйалед баш бе чекьрьне у һьн жи рʹуйе кʹьтебе бьбә мина йа Кʹьтеба Пирозә ԝәлгәрʹандьна «Дьнйа Тʹәзә», йа тʹәзәкьри.

16, 17. Чь гӧһастьн һатьнә кьрьне кʹьтеба кʹьламайә тʹәзәда?

¹⁶ Сәва кӧ һеса бә әве кʹьтеба тʹәзә бьдьнә хәбате, кʹьлам пе тʹема һатьнә пʹарәвәкьрьне. Мәсәлә, 12 кʹьламед пешийе дәрһәԛа Йаһоԝа нә, паше 8 кʹьлам дәрһәԛа Иса у кʹьрʹине нә у диса йед майин. Ӧса жи ве кʹьтебеда һәйә индекса һʹәму кʹьлама, кʹижан кӧ али готарвана дькә һеса кʹьлама бьжберьн.

¹⁷ Кʹьламада һьнә хәбәр һатьнә гӧһастьне, сәва кӧ фькьр һе зәлал бенә фәʹмкьрьне. Ӧса жи хәбәред чәтьн у кʹижан кӧ мәрьв ида надьнә хәбате һатьнә дәрхьстьне. Әԝ гӧһастьн һатьнә кьрьне сәва кӧ һәр кәс бькарьбә бь дьл бьстьре. Хәбәред кʹьламада ӧса һатьнә бьжартьне, ԝәки дьле мә бьгьрә. У һьнә навед кʹьлама у хәбәред теда, кʹижан кӧ һьнәки сәрт дьһатьнә кʹьфше, әԝ жи һатьнә гӧһастьне. Әԝ йәк аликʹарийе дьдә, ԝәки сәр щьвата у щьватед мәзьн меван, йед кӧ Кʹьтеба Пироз һин дьбьн, щаһьл, у ӧса жи хушк бькарьбьн аза бьстьрен.

18. Чьрʹа лазьм ә әм һин бьн кʹьламед мәйи тʹәзә? (Бьньһерʹә спартьн.)

¹⁸ Ве кʹьтеба тʹәзәда гәләк кʹьлам мина дӧа нә. Бь ван кʹьлама һун дькарьн дьле хԝә Йаһоԝарʹа вәкьн. Кʹьламед дьн жи ԝе али ԝә бькьн кӧ «һʹьзкьрьне у ԛәнщикьрьнеда һелана бьдьнә» һәв (Ибрн. 10:24). Бәле, әм дьхԝазьн гьли, мьԛам у ритмед кʹьламед мә һин бьн. Малпәра мә jԝ.org-да бьбьһен кӧ хушк-бьра ча ԝан кʹьлама дьстьрен, у әԝ йәк ԝе али ԝә бькә кӧ һун рʹьнд бьстьрен. Чахе һун малда ԝан кʹьлама бьстьрен, һуне һе аза у бь дьл у әшԛ бьстьрен. *

19. Чь щурʹәйи тʹәмамийа щьвате дькарә Йаһоԝа бьһʹәбинә?

¹⁹ Бир нәкьн кӧ стьрандьн хьзмәтийа мәда щийе фәрз дьгьрә. Әв мәщала мәзьн дьдә мә, ԝәки һʹьзкьрьн у рʹазибуна хԝә Йаһоԝарʹа нишан кьн. (Бьхунә Ишайа 12:5.) Һәрге һун бь дьл у щан бьстьрен, йед дьн жи ԝе чʹәʹв бьдьнә ԝә кӧ аза у бь дьл бьстьрен. Һәр кәс щьватеда, фьрԛи тʹӧнә щаһьл, йан мәзьн, йан йед кӧ Кʹьтеба Пироз һин дьбьн, дькарьн бь ве йәке Йаһоԝа бьһʹәбиньн. Ләма жи шәрм нәкьн у хԝә нәгьрьн ԝәки бьстьрен. Дәԝсе, гӧһ бьдьнә ве ширәте кӧ зәбурбеж ньвиси: «Бьстьрен әшԛи Хӧдан». Бәле, ԝәрә әм тʹьме бь шабуне бьстьрен! (Зәб. 96:1).