1, 2. а) Чьрʹа ԝәʹде Паԝлосе шандида щьмәʹте дәрһәԛа азайе у хӧламтийе хәбәр дьда? б) Паԝлос сәр кʹе гот кӧ әԝ Канийа азайе йә?

ЩЬМӘʹТА Империйа Рʹомеда, кʹидәре кӧ Мәсиһи жи дьжитьн, гәләк ԛӧрʹә дьбун чьмки ԝәлате ԝанда ԛанун, система һʹакьмтийе, у азайи һәбу. Ле йәкә һʹәчʹи зәʹф бь сайа хӧлама бу кӧ ԝәлат ӧса нав у дәнг бу. Ԝәʹдәке, ԝедәре жь бьнәлийа ԝәкә 30 сәләф хӧлам бун. Фәʹмдари йә, ԝәки щьмәʹта ԝедәре у ӧса жи Мәсиһи, гәләк щар дәрһәԛа азайе у хӧламтийе хәбәр дьдан.

² Паԝлос нәʹмед хԝәда гәләк щар бәʹса азайе дькьр. Ле нета ԝи әԝ нибу кӧ бькʹәвә нав политикайе чаԝа мәрьвед дьн, йед кӧ дьхԝәстьн проблемед дәԝләтеда сафи кьн у һʹале дьнйайе баш кьн. Дәԝсе, Паԝлос у Мәсиһийед дьн аликʹари дьданә мәрьва сәва мьзгинийа дәрһәԛа Пʹадшатийа Хԝәде у ԛимәте ԛӧрбана Иса Мәсиһ пебьһʹәсьн. Паԝлос дина хушк-бьра да сәр Канийа азайа рʹаст. Әԝи нәʹма хԝәйә дӧдада, Мәсиһийед Корьнтʹирʹа ньвиси: «Хӧдан Рʹӧһʹ ә у рʹӧһʹе Хӧдан ль кʹӧ дәре бә, ль ԝе дәре жи азайи һәйә» (2 Корн. 3:17).

3, 4. а) Пешийа рʹеза жь 2 Корьнтʹи 3:17, Паԝлос бәʹса чь кьр? б) Әм гәрәке чь бькьн сәва азайа кӧ Йаһоԝа дьдә, бьстиньн?

 ³ Паԝлос нәʹма хԝәда Корьнтʹийарʹа дәрһәԛа Муса гьли кьр. Әԝи гот кӧ чахе Муса паши хәбәрдана тʹәви мәләке Йаһоԝа жь чʹийайе Синайе бәржер бу, у незики щьмәʹте дьбу, әԝана тьрсийан, чьмки рʹуйе ԝи дьчʹурьси у әԝи «хели авит ль сәр рʹуйе хԝә» (Дәркʹ. 34:29, 30, 33; 2 Корн. 3:7, 13). Ле Паԝлос шьровәкьр кӧ «гава йәк ль Хӧдан вәгәрʹә, һьнге әԝ хели те һьлдане» (2 Корн. 3:16). Гәло бь ԝан гьлийа Паԝлос чь дьхԝәст бьгота?

⁴ Чаԝа мә готара дьнда дит, азайа Йаһоԝа, Әʹфьрандаре һәр тьшти, бесинор ә. Демәк, фәʹмдари йә кӧ «рʹӧһʹе Хӧдан ль кʹӧ дәре бә», ԝе дәре азайи һәйә. Ле сәва кӧ әве азайе бьстиньн, әм гәрәке вәгәрʹьн бал Йаһоԝа, демәк һәләԛәтийа мә тʹәви ԝи гәрәке незик бә. Исраели йед кӧ бәрʹийеда бун, бь ньһерʹандьна хԝә сәр тьшта дьньһерʹин, нә кӧ пе ньһерʹандьна Йаһоԝа. Бь симболик дьле ԝан у һʹьше ԝан дадайи бу у һʹьшк бьбу, чьмки ԝана дьхԝәст азайа хԝә кӧ тʹәзәда сьтандьбун, бьдьнә хәбате сәва хԝәстьнед хԝә биньн сери (Ибрн. 3:8-10).

5. а) Рʹӧһʹе Йаһоԝа кʹижан щурʹә азайе дьдә? б) Әм жь кʹӧ заньн кӧ мәрьве гьрти йан хӧлам жи, дькарә азайа жь Йаһоԝа бьстинә? с) Әме ве готареда кʹижан пьрса шеԝьр кьн?

⁵ Азайа кӧ жь рʹӧһʹе Йаһоԝа йә, һе бьльнд ә, нә кӧ азабуна жь хӧламтийа физики. Әԝ рʹӧһʹ азайикә ӧса тинә кӧ мәрьв тʹӧ щар нькарә бинә. Әԝ жь хӧламтийа гӧнә, мьрьне, у ӧса жи жь хӧламтийа һʹәбандьна ԛәлп у кьред ԝе аза дькә (Рʹом. 6:23; 8:2). Рʹасти жи әԝ азайикә чьԛас баш ә! Мәрьв дькарә ве азайе бьстинә һәла һе жи һәрге әԝ гьрти йә йан жи хӧлам ә (Дәстп. 39:20-23). Сәрһатийед хушка Ненси Йуен у бьре Һаролд Кинг, ве йәке рʹьнд дьдьнә кʹьфше. Әԝана нава гәләк салада бона баԝәрийа хԝә кәледа бун. Һун дькарьн сәрһатийа ԝан бьвиньн JԜ Library-да (Бьньһерʹьн ИНТЕРВИУ У СӘРҺАТИ > СӘБЬРКЬРЬН ТӘНГАСИЙАДА). Ԝәрә әм ньһа шеԝьр кьн ԝан дӧ пьрса: Ча әм дькарьн нишан кьн, ԝәки әм азайа хԝә ԛимәт дькьн? У әм чь дькарьн бькьн сәва әве азайа хԝә бь билани бьдьнә хәбате?

6. Исраелийа ча нишан кьрьн ԝәки нәшекьрандьн азайа кӧ Йаһоԝа дабу ԝан?

⁶ Чахе кәсәк мәрʹа пʹешкʹешәкә бьһа дьдә, әм дьшекьриньн у жь ԝи гәләк рʹази дьбьн. Ле Исраелийа азайа хԝә ԛимәт нәкьрьн чахе Йаһоԝа ԝана жь хӧламтийа Мьсьре аза кьр. Чахе әԝана аза бун, паши чәнд мәһа, ԝана бира хԝарьна Мьсьре дькьрьн, у сәр хԝарьна кӧ Йаһоԝа дьда ԝан, дькьрьнә чʹурʹә-чʹур. Ԝана һәла һе жи дьхԝәстьн диса вәгәрʹьнә Мьсьре. Бьдьнә һʹәсабе хԝә, бона ԝан «хийар, зәвәш, пивазок, пиваз у сир» дьһа фәрз бу, нә кӧ азайи кӧ Хԝәдейе рʹаст, Йаһоԝа да ԝан. Ләма жи әʹщебмайи нинә кӧ һьнге һерса Йаһоԝа рʹабу сәр щьмәʹта ԝи (Жьмар 11:5, 6, 10; 14:3, 4). Әԝ дәрсәкә гәләк фәрз ә бона мә!

7. Паԝлос ча хԝәха ширәт дьда хәбате кʹижан кӧ 2 Корьнтʹи 6:1-да әԝи ньвисийә, у әм жи ча дькарьн әве ширәте бьдьнә хәбате?

⁷ Паԝлосе шанди һʹәму Мәсиһи ширәт кьрьн, ԝәки бьшекьриньн ве азайе кӧ Йаһоԝа дьдә бь сайа Кӧрʹе хԝә Иса Мәсиһ. (Бьхунә 2 Корьнтʹи 6:1.) Биньн бира хԝә кӧ Паԝлос гәләк дьлтәнг дьбу, чьмки мәрьвәки гӧнәкʹар бу у хӧламе гӧнә у мьрьне бу. Ле әԝи гот: «Шькьр жь Хԝәдерʹа, бь  сайа Хӧдане мә Иса Мәсиһ!» Чьрʹа Паԝлос әԝ гьли гот? Әԝи шьровәкьр: «Чьмки ԛануна рʹӧһʹе кӧ жийине дьдә, бь сайа Мәсиһ Иса әз жь ԛануна гӧна у мьрьне хьлаз кьрьм» (Рʹом. 7:24, 25; 8:2). Бәле, әм жи гәрәке чʹәʹв бьдьнә Паԝлос, у бьшекьриньн ве йәке кӧ Йаһоԝа мә жь хӧламтийа гӧнә у мьрьне аза кьр. Бь сайа ԛӧрбана Иса, әм дькарьн бь исафа тʹәмьз Хԝәдерʹа хьзмәт кьн у шабуне жь ве йәке бьстиньн (Зәб. 40:8).

8, 9. а) Пәтрус чь ширәт да дәрһәԛа азайе? б) Кʹижан хоф иро һәйә?

⁸ Бәле, әм гәрәке әве азайа жь Хԝәде ԛимәт кьн. Ле ӧса жи фәрз ә әм бир нәкьн, ԝәки әве азайе рʹаст бьдьнә хәбате. Пәтрусе шанди ширәтәкә фәрз да Мәсиһийа, ԝәки азайа хԝә нәдьнә хәбате сәва хԝәстьнед хԝәйә нәрʹаст биньн сери у хԝә һәԛ дәрхьн бона кьред хԝәйи нәрʹаст. (Бьхунә 1 Пәтрус 2:16.) Әв ширәта Пәтрус тинә бира мә кӧ бәрʹийеда чь ԛәԝьми тʹәви Исраелийа, у әԝ сәрһатийа ԝан бона мә дәрсәкә фәрз ә. Шәйтʹан у дьнйа ԝи мәрьва һелан дькьн кӧ пәй хԝарьн-вәхԝарьне, кʹьнща, һесабуне, у ԝәʹдәдәрбазкьрьне у диса тьштед дьн кʹәвьн. Әԝед кӧ реклама дькьн, мәрьвед бәрбьчʹәʹв дьдьнә хәбате, сәва мә һелан кьн ԝан тьшта бькʹьрʹьн, кʹижан кӧ бь рʹасти мәрʹа нәлазьм ьн. Мәрьв гәләк һеса дькарә бькʹәвә ԝан тʹәлька у азайа хԝә нәрʹаст бьдә хәбате.

⁹ Ширәта Пәтрус ӧса жи әм дькарьн бьдьнә хәбате сафикьрьнед шәхсида кӧ әм әʹмьре хԝәда дькьн, мәсәлә бона хԝәндьна бьльнд, хәбате у кариере. Бәʹса хәбәре, щаһьл иро тенә һеланкьрьне ԝәки һәр тьшти бькьн сәва университета башда хԝәндьна бьльнд бьстиньн, чьмки әԝ рʹе вәдькә кӧ хәбата баш бьстиньн у гәләк пʹәра ԛазанщ кьн. Һʹәсаба нишани ԝан щаһьла дькьн, ԝәки йед кӧ хԝәндьна бьльнд дьстиньн дьһа зәʹф пʹәра ԛазанщ дькьн у пешдачуйи нә, нә кӧ әԝед кӧ тʹәне мәкʹтәбе хьлаз дькьн. Чахе щаһьл гәрәке ԝан бьжартьна бькьн кʹижан кӧ дькарьн сәр әʹмьре ԝан һʹӧкӧм бьн, ԝанрʹа хԝәндьна бьльнд дькарә бе кʹьфше ча нетәкә гәләк баш. Ле гәло һьнге щаһьл у де-бавед ԝан гәрәке чь бир нәкьн?

10. Әм чь гәрәке бир нәкьн чахе әʹмьре хԝәда бьжартьнед шәхси дькьн?

¹⁰ Һьнәк дьфькьрьн, кӧ әԝ бьжартьнед шәхси нә бәʹса кʹижана мә жоре кьр, у һәрге исафа ԝан дьһелә, азайа ԝан һәйә чь дьхԝазьн ве бьжберьн. Дьбәкә әԝана әв гьлийед Паԝлос дьбежьн: «Чьма гәрәке азайийа мьн бона . . . исафа йәки майин бе ломәкʹаркьрьне?» (1 Корн. 10:29). Әв рʹаст ә кӧ азайа мә һәйә бьжартьнед шәхси бькьн мәсәлә, бона хԝәндьна бьльнд у хәбате. Ле әм гәрәке ӧса жи бир нәкьн, ԝәки азайа мә бь синор ә у һʹәму сафикьрьнед мә сәр әʹмьре мә һʹӧкӧм дьбьн. Әԝ йәк Паԝлос рʹьнд да кʹьфше чахе гот: «‹Һәр тьшт әʹдәт ә›, бәле, ле һәр тьшт нә кʹар ә. ‹Һәр тьшт әʹдәт ә›, ле һәр тьшт ава накә» (1 Корн. 10:23). Әв рʹез рʹьнд нишан дькә ԝәки йа лапә фәрз хԝәстьнед мә ниньн чахе әм әʹмьре хԝәда бьжартьна дькьн, чьмки һәнә тьштед һе фәрз кӧ әм гәрәке һьлдьнә һʹәсабе хԝә.

11. Нета Йаһоԝа чь бу чахе әԝи әм аза кьрьн?

¹¹ Чахе Пәтрус гот ԝәки азайа хԝә хьрабийеда нәдьнә хәбате, паше әԝи  шьровәкьр кӧ чаԝа азайа хԝә рʹаст бьдьнә хәбате. Әԝи гот кӧ әм гәрәке азайа хԝә бьдьнә хәбате «чаԝа хӧламед Хԝәде». Чахе Йаһоԝа бь сайа Иса мә жь хӧламтийа гӧнә у мьрьне аза кьр, нета ԝи әԝ бу, кӧ паше әм ида әʹмьре хԝә тʹәсмили Ԝи кьн, демәк бьжин «чаԝа хӧламед Хԝәде».

12. Жь Нӧһ у малбәта ԝи әм чь дькарьн һин бьн?

¹² Йа лапә баш кӧ чаԝа әм азайа хԝә дькарьн бьдьнә хәбате әԝ ә, һәрге әм һʹьш-аԛьле хԝә бь тʹәмами дайньн сәр нетед рʹӧһʹани, демәк сәр хьзмәтийе. Ԝи щурʹәйи әме нәбьнә хӧламед хԝәстьнед нәрʹаст у нәкʹәвьнә пәй нетед ве дьнйайе (Галт. 5:16). Дина хԝә бьдьнә мәсәла Нӧһ у малбәта ԝи. Әԝана дьнйакә гәләк зӧлм у хьрабда дьжитьн, ле ԝана тʹӧ щар чʹәʹв нәдьданә мәрьвед дор бәре хԝә. Чьрʹа? Чьмки әԝана бь тʹәмами нав шьхӧле Йаһоԝада бун кӧ әԝи ԝанрʹа дабу, демәк гәми ава дькьрьн, хԝарьн тʹоп дькьрьн һьн бона хԝә һьн жи бона һʹәйԝана, у дәрһәԛа Селаве мәрьварʹа әʹлам дькьрьн. «Нӧһ һәр тьшт кьр, Хԝәде чаԝа тʹәми дабу ԝи, әԝи ӧса жи кьр» (Дәстп. 6:22). Ле ахьрийа ве йәке чь бу? Нӧһ малбәта хԝәва жь кʹӧтакьрьна ԝе дьнйайе хьлаз бун (Ибрн. 11:7).

13. Йаһоԝа чь тʹәми дайә мә?

¹³ Ле иро Йаһоԝа чь тʹәмийе дьдә мә? Әм шагьртед Иса нә у тʹәмийа Хԝәде рʹьнд заньн, ԝәки әм гәрәке мьзгинийе бәла кьн. (Бьхунә Луԛа 4:18, 19.) Иро Шәйтʹан чʹәʹве һʹәчʹи зәʹф мәрьва кор кьрийә. Әԝана нә жи тедәрдьхьн ԝәки хӧламед религийа ԛәлп, һәбуке, у политике нә (2 Корн. 4:4). Бона мә ԛәдьрәки гәләк мәзьн ә, кӧ мина Иса али мәрьва бькьн сәва әԝана дәрһәԛа Йаһоԝа пебьһʹәсьн у жерʹа хьзмәт кьн (Мәт. 28:19, 20). Әԝ шьхӧләкә нәһеса йә, у гәләк чәтьнайи жи һәнә. Һьнә щийада, мәрьв дьбьнә бетʹалаш у һәла һе жи гәләк һерс. Ле һәр кәс жь мә гәрәке пьрсәкә ӧса бьдә  хԝә: «Гәло әз дькарьм азайа хԝә ӧса бьдьмә хәбате сәва һе зедә Йаһоԝарʹа хьзмәт кьм?».

14, 15. Иро щьмәʹта Хԝәде ча дьньһерʹә сәр бәлакьрьна мьзгинийе? (Бьньһерʹә шькле әʹԝльн.)

¹⁴ Әм ԛәԝи дьбьн чахе дьвиньн кӧ гәләк хьзмәткʹаред Хԝәде тедәрдьхьн, ԝәки ахьри гәләк незик ә у әʹмьре хԝә сьвьк дькьн сәва хьзмәтийа һәртʹьм дәстпекьн (1 Корн. 9:19, 23). Һьнәк мьһала хԝәда хьзмәт дькьн, һьнәк жи дәрбази щики дьн дьбьн кʹидәре һʹәԝщәти һәйә. Нава пенщ салед пашԝәхтийеда, һʹәсаба нишан кьрьн кӧ ԝәкә 250 000 пешәнг зедә бунә у иро һәжмара пешәнгед һәртʹьм буйә 1 100 000 зедәтьр. Рʹасти жи чьԛас баш ә кӧ гәләк хушк-бьра азайа хԝә бь билани дьдьнә хәбате, у Йаһоԝарʹа хьзмәт дькьн (Зәб. 110:3).

¹⁵ Ле гәло чь али ԝан хушк-бьра кьр, кӧ азайа хԝә бь билани данә хәбате? Дина хԝә бьдьнә мәсәла Щон у Щуди, йед кӧ ида 30 сал ә щурʹә-щурʹә ԝәлатада хьзмәт дькьн. Ԝана гьли кьр кӧ чахе сала 1977-да Мәкʹтәба сәва Пешәнга дәстпебу, пешәнг дьһатьнә һеланкьрьне кӧ дәрбази ԝан щийа бьн кʹидәре һʹәԝщәти һәйә. Щон дьбежә кӧ сәва әве нете биньн сери, әԝи гәләк щар хәбата хԝә гӧһаст, сәва әʹмьре хԝә һеса кә. Ахьрийеда чахе әԝана дәрбази ԝәлате хәриб бун, ԝана тедәрхьст кӧ дӧа у итʹбарийа һьндава Йаһоԝа, али ԝан кьр кӧ ԝана чәтьнайада тәйах кьр, мәсәлә зьмане тʹәзә һин бун, һини әʹдәт у култура тʹәзә бун у ӧса жи климата чәтьнда тәйах кьрьн. Ле әԝана чь дьбежьн дәрһәԛа ԝан салед хьзмәтийа хԝә? Щон дьбежә: «Мьн шьхӧләкә лапә баш дькьр у мьн нә жи заньбу кӧ әзе шабунәкә ӧса бьстиньм. Йаһоԝа бона мьн һе реали буйә, чаԝа баве һʹьзкьри. Ньһа әз һе кʹур фәʹм дькьм гьлийед жь Аԛуб 4:8: ‹Хԝә ль Хԝәде бьгьрьн, Хԝәде жи ԝе хԝә ль ԝә бьгьрә›. Мьн фәʹм кьр ԝәки мьн әԝ йәк дит чь кӧ дьгәрʹийам, демәк нета әʹмьре мьн һәйә».

16. Чаԝа бь һʹәзара хушк-бьра азайа хԝә бь билани дьдьнә хәбате?

¹⁶ Мина Щон у Щуди, хушк-бьред дьн жи чахе дәрәща ԝан дьһелә, сәр ԝәʹдәки кьн хьзмәт дькьн ча хьзмәткʹаред һәртʹьм. Нав тʹәмамийа дьнйайе гәләк хушк-бьра бь рʹәзәдьли хьзмәт дькьн шьхӧле авакьрьнеда. Бәʹса хәбәре, чахе Ԝорԝикеда (Нийу Йорк), филиала сәрәкә дьһатә авакьрьне, ԝәкә 27 000 хушк-бьра бь рʹәзәдьли һатьн аликʹарийе бьдьн. Һьнәк һатьн сәр чәнд һʹәфтийа, чәнд мәһа, һьнәк сәр саләке йан жи һе зедә. Гәләк жь ԝана гәлә тьшт жь хԝә кем кьрьн, ԝәки ԝедәре хьзмәт кьн. Әԝ хушк-бьра рʹасти жи мәсәлед гәләк баш ьн, чьмки әԝана азайа хԝә дьдьнә хәбате сәва Йаһоԝа, кӧ Хԝәдейе азайе йә, һӧрмәт у рʹумәт кьн.

17. Һәрге әм азайа хԝә бь билани бьдьнә хәбате, әме чь кʹәрәма бьстиньн?

¹⁷ Әм гәләк дьшекьриньн ве йәке, кӧ әм Йаһоԝа нас дькьн у азайа мә һәйә кʹижан кӧ хьзмәти тинә. Ԝәрә әм пе бьжартьн у сафикьрьнед хԝә нишан кьн, ԝәки әм әве азайе гәләк ԛимәт дькьн. Дәԝса кӧ әԝе азайе алийе хьрабда бьдьнә хәбате, ԝәрә әм һәр тьшти бькьн, сәва һе зедә Йаһоԝарʹа хьзмәт кьн. Һәрге әм ӧса бькьн, әме кʹәрәмед Йаһоԝа бьстиньн кʹижан кӧ соз дайә: «Әʹфьрине хԝәха жи жь ԝе хӧламтийа пʹучʹ аза бьн у тʹәви азайи у рʹумәта зарʹед Хԝәде бьн» (Рʹом. 8:21).