Әԝ йәк кӧ хәбәред Ибрани щьмледа ча тенә ньвисаре, щурʹә-щурʹә фәʹмкьрьна дьдә. Ле һәнә факторед ӧса кӧ али мә дькьн рʹаст фәʹм бькьн дәрһәԛа кʹе ԝедәре те готьне:

1. Дина хԝә бьдьнә пʹара дьн йа ве зәбуре. Әԝ кʹәрәм, дәрһәԛа кʹижана рʹезед 12 һʹәта 14-да те гьликьрьне, дьдә кʹьфше ԝәки әԝ дәрһәԛа ԝан мәрьвед рʹаст те готьне, йед кӧ һиви дькьн, ԝәки жь дәсте мәрьвед хьраб аза бьн у хьлаз бьн (рʹеза 11). Әв фькьр ӧса жи әʹйан дьбә рʹеза 15-да, кʹидәре кӧ дӧ щара әԝ хәбәр те хәбьтандьне «хԝәзи», у әԝ гьли һәма диса дәрһәԛа ԝан мәрьва те хәбьтандьне, Хӧдане кʹижана жи Йаһоԝа йә!

2. Әԝ фәʹмкьрьн ль гора рʹезед дьнә Кʹьтеба Пироз ә, кӧ соз дьдьн ԝәки кʹәрәмед Хԝәде ԝе сәр щьмәʹта ԝийә амьн бәла бә. Әв зәбур баԝәрийа Даԝьд һьндава ви созе Хԝәде дьда кʹьфше, кӧ паши азабуна Исраелийа жь дьжмьна, Хԝәде ԝе щьмәʹта хԝә бь бәхтәԝарийе у бь пешдачуйине кʹәрәм кьра (Ԛан. Каһ. 26:9, 10; Ԛан. Дщр. 7:13; Зәб. 128:1-6). Мәсәлә, Ԛануна Дӧщари 28:4-да те готьне: «Дӧайе ль бәре зьке тә, бәре әʹрде тә, бәре һʹәйԝане тә, зайина пәз у дәԝаред тә бә». Бь рʹасти ԝәʹде сәрԝертийа Сьлемане кӧрʹе Даԝьд, щьмәʹт рʹасти әʹдьлайеда бу у пешда дьчу. Хенщи ве йәке, щурʹед сәрԝертийа Сьлеман дьданә кʹьфше сәрԝертийа Мәсиһе ахьрийе (1 Пʹадш. 4:20, 21; Зәб. 72:1-20).

Хьлазийеда, фәʹмкьрьна Зәбура 144 әʹйан дькә, ԝәки әв зәбур бь тʹәмами зәлал дьдә кʹьфше баԝәрийа хьзмәткʹаред Йаһоԝайә ԛәԝи, демәк кӧ Хԝәде ԝе диԝана хьраба бькә, у паше әʹдьлайи ԝе һʹәта-һʹәтайе һәбә у мәрьвед рʹаст ԝе бәхтәԝарийеда бьжин (Зәб. 37:10, 11).