1. Чьрʹа Йаһоԝа йә хԝәйе һәр тьшти? (Бьньһерʹә шькле әʹԝльн.)

ЙАҺОԜА хԝәйе һәр тьшти йә! «Әʹзман у әʹзмане әʹзмана, әʹрд у һʹәму чь ль сәр ә», йед ԝи нә (Ԛан. Дщр. 10:14; Әʹйан. 4:11). Һʹәму мәрьв жи йед ԝи нә, чьмки әԝи әԝана әʹфьрандьн (Зәб. 100:3). Ле йәкә нава тʹәмамийа тʹәрихийа инсанәтеда, Хԝәде һьнә мәрьв башԛә кьрьнә, йед кӧ бь щурʹе мәхсус пʹара ԝи нә.

2. Ль гора Кʹьтеба Пироз, Йаһоԝа кʹе бьжарт бь щурʹе мәхсус ча щьмәʹта хԝә?

² Мәсәлә, Зәбура 135-да сәр хьзмәткʹаред Йаһоԝа ԝәʹде Исраела бәре, те готьне ча «мьлкʹе» ԝи (Зәб. 135:4). Ӧса жи кʹьтеба Һосәйада һатьбу пʹехәмбәртикьрьне ԝәки мәрьвед жь нә мьләте Исраели жи ԝе бьбьнә щьмәʹта Йаһоԝа (Һос. 2:23). Әԝ пʹехәмбәртийа Һосәйа һатә сери чахе Йаһоԝа мәрьвед жь нә мьләте Щьһу бьжарт, сәва тʹәви Иса пʹадшатийе бькьн (Кʹар. Шанд. 10:45; Рʹом. 9:23-26). Әԝ «мьләте бӧһӧрти» мьлкʹе Йаһоԝайи мәхсус ә. Әԝана бь рʹӧһʹе пироз кʹьфшкьри нә у һатьнә бьжартьне бона жийина сәр әʹзмана (1 Пәт. 2:9, 10). Ле әм чь дькарьн бежьн дәрһәԛа Мәсиһийед иройин, йед кӧ һивийа жийина һʹәта-һʹәтайе сәр әʹрде нә? Йаһоԝа ԝана жи һʹәсаб дькә ча щьмәʹта хԝә у бьжартийед хԝә (Иша. 65:22).

3. а) Иро кʹе тʹәви Йаһоԝа һәләԛәтийа мәхсусда нә? б) Ве готареда әме дәрһәԛа чь шеԝьр кьн?

 ³ Иро «кәрийе пези бьчʹук», демәк йед кӧ ԝе сәр әʹзмана бьжин, у «пәзед . . . дьн», йед кӧ ԝе сәр әʹрде бьжин, тʹәвайи «кәрик» ьн, кʹижан кӧ Йаһоԝа ча щьмәʹта хԝә һʹәсаб дькә (Луԛа 12:32; Йуһʹн. 10:16). Бешьк, әм дьхԝазьн бьшекьриньн ве йәке кӧ Йаһоԝа мәрʹа ԛәдьрәки ӧса дайә, ԝәки һәләԛәтийа мәйә мәхсус тʹәви ԝи һәйә. Ве готареда әме шеԝьр кьн кӧ әм ча дькарьн Йаһоԝарʹа бьдьнә кʹьфше, ԝәки әви ԛәдьре мәхсус ԛимәт дькьн.

4. Ча әм дькарьн рʹазибуна хԝә Йаһоԝарʹа нишан кьн, ԝәки изьн дайә мә тʹәви ԝи достийе бькьн? У Иса ча рʹазибуна хԝә да кʹьфше?

⁴ Чахе әм хԝә тʹәсмили Йаһоԝа дькьн бь тʹәмамийа дьле хԝә, әм рʹазибуна хԝә жерʹа дьдьнә кʹьфше. Пе ньхӧмандьне әм гьшкарʹа шәʹдәтийе дьдьн, ԝәки әм пʹара Йаһоԝа нә у кӧ әм һазьр ьн тʹьме гӧрʹа ԝида бьн (Ибрн. 12:9). Чахе Иса һатә ньхӧмандьне, әԝи жи тьштәки ӧса кьр. Дькарьн бежьн әԝи Йаһоԝарʹа гот: «Әз дьхԝазьм хԝәстьна Тә бьԛәдиньм йа Хԝәде» (Зәб. 40:7, 8). Рʹаст ә чахе Иса һатә буйине ида жь ԝи мьләти бу кʹижан кӧ тʹәсмилкьрийе Хԝәде бу, ле йәкә әԝи Йаһоԝарʹа да кʹьфше ԝәки әԝ һазьр ә ԛьрара ԝи бинә сери.

5, 6. а) Йаһоԝа чь гот чахе Иса һатә ньхӧмандьне? б) Мәсәле биньн кӧ Йаһоԝа ча дьньһерʹә сәр тʹәсмилбуйина мә ԝирʹа.

⁵ Йаһоԝа ча ньһерʹи сәр ньхӧмандьна Иса? Кʹьтеба Пироз дьбежә: «Һәма чаԝа Иса һатә ньхӧмандьне у жь аве дәркʹәт, әʹзман вәбун у әԝи дит кӧ рʹӧһʹе Хԝәде мина кәвоткәке һатә хԝаре у сәр ԝи дани. У дәнгәки жь әʹзмана гот: ‹Әв ә Кӧрʹе мьни дәлал, кӧ әз жь ԝи рʹази мә›» (Мәт. 3:16, 17). Рʹаст ә Иса ида пʹара Баве хԝәйи әʹзмана бу, йәкә дьле Йаһоԝа гәләк ша бу, чахе дит кӧ Кӧрʹе ԝи дьхԝазә у һазьр ә әʹмьре хԝәда ԛьрара Ԝи бинә сери. Чахе әм хԝә тʹәсмили Йаһоԝа дькьн, һьнге жи дьле ԝи ша дьбә, у әԝ ԝе әʹсә мә кʹәрәм кә (Зәб. 149:4).

⁶ Бьдьнә бәр чʹәʹве хԝә, мәрьвәки гәләк кӧлиркед бәдәԝ бахче хԝәда чандийә. Рʹожәке ԛиза ԝийә бьчʹук жь бахчә кӧлиркәке дьԛәтинә у пʹешкʹеш дьдә баве хԝә. Фәʹмдари йә әв кӧлирк йа баве ԝе йә. Ле баве һʹьзкьри, нә жи ԝе бьфькьрә сәр ве йәке, чьмки занә ԝәки ԛиза ԝи жь һʹьзкьрьне әԝ кӧлирк да ԝи у әԝ ԝе бь дьл әве пʹешкʹеша ԝе һьлдә. Әԝ бав ԝе нава һʹәму кӧлиркед хԝәда, кӧлирка жь ԛиза хԝә ԛимәт кә. Әԝ мәсәлә дьдә кʹьфше, ԝәки дьле Йаһоԝа жи гәләк ша дьбә, чахе әм бь дьл әʹмьре хԝә тʹәсмили ԝи дькьн (Дәркʹ. 34:14).

7. Малахи чаԝа да кʹьфше кӧ Йаһоԝа ча дьньһерʹә сәр ԝан, йед кӧ бь дьл у щан жерʹа хьзмәт дькьн?

⁷ Бьхунә Малахи 3:16. Һәрге ԝә һе хԝә тʹәсмили Йаһоԝа нәкьрийә у ньхӧманди ниньн, дәрһәԛа ве йәке бьфькьрьн. Рʹаст ә һун ча дьне кʹәтьнә, ида йед Йаһоԝа бунә, чаԝа һʹәму мәрьв. Ле бьфькьрьн ԝәки Йаһоԝа ԝе чьԛас ша бә, һәрге һун ԝи ԛәбул кьн ча Сәрԝере хԝә у әʹмьре хԝә тʹәсмили ԝи кьн (Мәтʹлк. 23:15). Йаһоԝа ԝана нас дькә йед кӧ бь дьл жерʹа хьзмәт дькьн, у наве ԝан «кʹьтеба биранинеда, ДТʹ» дьньвисә.

8, 9. Йаһоԝа чь дәʹԝа дькә жь ԝана, наве кʹижана кʹьтеба ԝийә биранинеда ньвисар ә?

⁸ Ле сәва кӧ наве мә кʹьтеба Йаһоԝайә биранинеда ньвисар бә, у әм  нава щьмәʹта ԝида бьн, әм борщдар ьн тьштәки бькьн. Малахи рʹастә-рʹаст гот, ԝәки әм гәрәке жь Йаһоԝа бьтьрсьн у сәр наве ԝи бьфькьрьн. Һәрге әм хенщи Йаһоԝа хԝә тʹәсмили кәсәки йан тьштәки дькьн, ахьрийеда наве мә ԝе кʹьтеба ԝийә жийинеда бе һьлдане (Дәркʹ. 32:33; Зәб. 69:28).

⁹ Бәс нинә тʹәне соз бьдьнә Йаһоԝа кӧ әме ԛьрара ԝи бьԛәдиньн, у бенә ньхӧмандьне. Әԝе йәке әм тʹәне щарәке дькьн, ле паше ида тʹәмамийа әʹмьре хԝә жерʹа хьзмәт дькьн. Әԝ йәк кӧ әм алийе Йаһоԝа нә чаԝа щьмәʹта ԝи, әм гәрәке тʹьме пе жийина хԝә избат кьн. Әм гәрәке ча иро ӧса жи ахьрийеда, у һʹәта кӧ әм сах ьн, гӧрʹа ԝида бьн (1 Пәт. 4:1, 2).

10. Чь фьрԛи гәрәке һәбә ортʹа хьзмәткʹаре Хԝәде у йе кӧ Хԝәдерʹа хьзмәт накә?

¹⁰ Готара пешийа веда, мә сәрһатийа дәрһәԛа Ԛайин, Сьлеман у Исраелийа шеԝьр кьр. Әԝана гьшк жи дьготьн йанчь Йаһоԝа дьһʹәбиньн, ле бь рʹасти жерʹа амьн нибун. Әԝ мәсәлед ԝан әшкәрә дьдьнә кʹьфше, ԝәки әԝед кӧ хԝәйе ԝан бь рʹасти Йаһоԝа йә, гәрәке мьԛәрʹм хԝә ль рʹастийе бьгьрьн у мьԛабьли хьрабийе бьн (Рʹом. 12:9). Дина хԝә бьдьн кӧ кʹьтеба Малахида Йаһоԝа гот кӧ ԝе әшкәрә бе кʹьфше «фьрԛийа ортʹа мәрьве рʹаст у мәрьве хьраб, ортʹа хьзмәткʹаре Хԝәде у йе кӧ Хԝәдерʹа хьзмәт накә» (Малх. 3:18, ДТʹ).

11. Чьрʹа мәрьварʹа гәрәке әʹйан бе кʹьфше, ԝәки мә хԝә тʹәсмили Йаһоԝа кьрийә?

¹¹ Диса мәщаләкә дьн һәйә кӧ әм дькарьн Йаһоԝарʹа бьдьнә кʹьфше, ԝәки әм ԛимәт дькьн кӧ әԝи әм ча щьмәʹта хԝә бьжартьн. Пешдачуйина мә алийе рʹӧһʹанида гәрәке «һʹәмуйава әʹйан бә» (1 Тимтʹ. 4:15; Мәт. 5:16). Хԝә бьпьрсьн: «Гәло мәрьварʹа әʹйан ә ԝәки әз бь тʹәмами Йаһоԝарʹа амьн ьм? Гәло әз фьрнаԛ дьбьм гава дьвежьмә мәрьва кӧ әз Шәʹде Йаһоԝа мә?» Дьле Йаһоԝа ԝе бешә һәрге паши ԝе йәке чахе әԝи әм бьжартьн ча щьмәʹта хԝә, әм шәрм дькьн мәрьварʹа бежьн кӧ әԝ хԝәйе мә йә. (Зәб. 119:46; бьхунә Марԛос 8:38.)

12, 13. Чьрʹа сәр һьнәка найе кʹьфше ԝәки әԝана Шәʹдед Йаһоԝа нә?

 ¹² Йазьх, ле һәла һе һьнә Шәʹдед Йаһоԝа жи чʹәʹв дьдьнә «рʹӧһʹе ве дьнйайе». Бона ԝе йәке зәлал ида найе кʹьфше фьрԛийа ортʹа хьзмәткʹаре Хԝәде у йе кӧ хьзмәткʹаре Хԝәде нинә (1 Корн. 2:12). Рʹӧһʹе ве дьнйайе мәрьва һелан дькә пәй «дьлһавьжийед бьнйатʹа мәрьвайе» кʹәвьн (Әфәс. 2:3). Мәсәлә, рʹаст ә гәләк ширәт мәрʹа тенә дайинә дәрһәԛа кʹьнщхԝәкьрьн у хәмьландьне, йәкә һьнәк диса жи нәщайиз хԝә дькьн. Әԝана кʹьнще тәнг у вәкьри хԝә дькьн, һәла һе сәр щьвате жи. Һьнәк жи пе пʹоре хԝә дина мәрьва дькʹьшиньнә сәр хԝә (1 Тимтʹ. 2:9, 10). Ләма жи чахе әԝана нав мәрьвада ньн, ида чәтьн ә тедәрхьн кӧ кʹе йә хьзмәткʹаре Йаһоԝа у кʹе йә һәвале дьнйайе (Аԛуб 4:4).

¹³ Һәнә хушк-бьред ӧса жи, кӧ хԝә ӧса дьдьнә кʹьфше, ча мәрьвед ве дьнйайе. Мәсәлә, чахе әԝана ԝәʹде хԝә дәрбаз дькьн, рәԛас у рʹабун-рʹуньштьна ԝан ӧса нә, кӧ нәщайиз ьн бона Мәсиһийа. Әԝана шькле хԝә дькьн интернете у теда тьштед ӧса дьньвисьн, кӧ те кʹьфше ԝәки әԝана мәрьвнә рʹӧһʹани ниньн. Дьбәкә щьватеда әԝ Мәсиһи гӧнәки гьран накьн ԝәки бенә ширәткьрьне, ле йәкә әԝана дькарьн хьраб һʹӧкӧм бьн сәр ԝан хушк-бьра, йед кӧ дьхԝазьн рʹабун-рʹуньштьна хԝә тʹәмьз хԝәй кьн, чаԝа щьмәʹта Хԝәдерʹа дькʹәвә. (Бьхунә 1 Пәтрус 2:11, 12.)

14. Әм жь чь гәрәке хԝә хԝәй кьн, ԝәки һәләԛәтийа хԝә тʹәви Йаһоԝа ӧнда нәкьн?

¹⁴ Һәр тьшт ве дьнйайеда мәрьва һелан дькьн бәрбь «дьлһавьжи, чʹәʹвһавьжи» у кʹӧбар-бабахийе (1 Йуһʹн. 2:16). Ле әм пʹара Йаһоԝа нә, у ләма жи әм чʹәʹв надьнә ве дьнйайе. Әм гәрәке «нәпʹакийе у дьлһавьжийед дьнйайе инкʹар кьн» у «аԛьлда гьран, бь рʹастийе у хԝәденасийе бьжин ль ве дьне» (Тито 2:12). Әм ча хәбәр дьдьн, ча дьхԝьн-вәдьхьн, ча ль хԝә дькьн, дьхәмьлиньн, у дьхәбьтьн, әԝ һәр тьшт гәрәке мәрьварʹа әʹйан нишан кә, ԝәки әм тʹәсмилбуйед Йаһоԝа нә. (Бьхунә 1 Корьнтʹи 10:31, 32.)

15. Чьрʹа әм гәрәке хушк-бьрарʹа һʹәйф у бь һʹьзкьрьн бьн?

¹⁵ Әԝ йәк кӧ әм ча ньн һьндава хушк-бьра дьдә кʹьфше, ԝәки әм чьԛас ԛимәт дькьн достийа хԝә тʹәви Йаһоԝа. Әԝана жи пʹара Йаһоԝа нә, у һәрге әм ве йәке бир нәкьн, әме тʹьме хушк-бьрарʹа һʹәйф у бь һʹьзкьрьн бьн (1 Тʹеслн. 5:15). Иса готә шагьртед хԝә: «Бь ве йәке һʹәмуйе заньбьн һун шагьртед мьн ьн, һәгәр һун һәвдӧ һʹьз бькьн» (Йуһʹн. 13:35).

16. Кʹижан мәсәлә жь Ԛануна Муса дьдә кʹьфше, кӧ Йаһоԝа ча нә һьндава щьмәʹта хԝә?

¹⁶ Ԝәрә пе мәсәла бьвиньн кӧ әм гәрәке һьндава хушк-бьред щьватеда чаԝа бьн. Бәре, пʹарьстгәһа Йаһоԝада һәбун тьшт, кӧ башԛә дькьрьн бона һʹәбандьне у дьһатьнә һʹәсабе пироз. Ԛануна Мусада дьһатә готьне, ԝәки чаԝа мьԛати ԝан тьшта бьн, у әԝед кӧ әв тʹәми нәанийана сери, гәрәке бьһатана кӧштьне (Жьмар 1:50, 51). Һәрге Йаһоԝа әԝ тьштед кӧ һʹәбандьна ԝида дьданә хәбате хԝәй дькьр, илаһи әԝ ԝе чьԛас хԝәй кә ԝан хьзмәткʹаред хԝәйә амьн, кӧ әԝи жьбарт ча щьмәʹта хԝә! Щарәке чахе Йаһоԝа тʹәви щьмәʹта хԝә хәбәр дьда, әʹлам кьр: «Йе дәсте хԝә ль ԝә дьхә, әԝ ль бибока чʹәʹве мьн дьхә!» (Зәкәр. 2:8, ДТʹ).

17. Йаһоԝа гӧһ дьдә чь?

¹⁷ Малахи гот ԝәки Йаһоԝа гӧһ дьдә у дьбьһе кӧ чаԝа щьмәʹта Ԝи тʹәви һәв хәбәр дьдьн (Малх. 3:16). Бәле, Йаһоԝа «йед пʹара хԝә нас дькә» (2 Тимтʹ. 2:19). Әԝ һаш жь һәр кьред мә у гьлийед мә һәйә (Ибрн. 4:13). Чахе әм хушк-бьрарʹа һʹәйф ниньн, Йаһоԝа әве йәке дьвинә у мә дьбьһе. Ле әԝ ӧса жи дьвинә гава әм һьндава ԝанда меванһʹьз, дәствәкьри у һʹәйф ьн у ӧса жи һәвдӧ дьбахшиньн (Ибрн. 13:16; 1 Пәт. 4:8, 9).

18. Ча әм дькарьн Йаһоԝарʹа бьдьнә кʹьфше, ԝәки әм ԛимәт дькьн кӧ щьмәʹта ԝи нә?

¹⁸ Бешьк, әм дьхԝазьн Йаһоԝарʹа нишан кьн, ԝәки дьшекьриньн ԝи ԛәдьри кӧ әм нава щьмәʹта ԝи нә. Әм заньн ԝәки әԝ сафикьрьнәкә билан бу кӧ мә хԝә тʹәсмили ԝи кьрийә. Рʹаст ә әм иро нав «ньсьле нәһәԛ у хальфида» дьжин, ле әм дьхԝазьн «беләкʹә у беԛӧсур» бьминьн у «шәԝԛ бьдьн мина рʹонайед әʹзмана» (Фили. 2:15). Әм хԝә жь һәр хьрабийе дур дьгьрьн (Аԛуб 4:7). У әм хушк-бьред хԝә һʹьз дькьн у ԛәдьре ԝан дьгьрьн, чьмки әԝана жи пʹара Йаһоԝа нә (Рʹом. 12:10).

19. Йаһоԝа чь кʹәрәма дьдә ԝан, йед кӧ пʹара ԝи нә?

¹⁹ Кʹьтеба Пироз соз дьдә: «Хӧдан щьмәʹта Хԝә жь бәр Хԝә навежә» (Зәб. 94:14). Бәле, чь жи әʹмьре мәда бьԛәԝьмә, Йаһоԝа ԝе тʹьме тʹәви мә бә. Һәла һе мьрьн жи нькарә мә жь һʹьзкьрьна Йаһоԝа бьԛәтинә (Рʹом. 8:38, 39). «Һәгәр әм дьжин, бона Хӧдан дьжин у һәгәр әм дьмьрьн бона Хӧдан дьмьрьн. Аԝа һәгәр әм бьжин йан бьмьрьн, пʹара Хӧдан ьн» (Рʹом. 14:8). Әм гьшк гәләк һивийа ве рʹоже нә, гава Йаһоԝа һʹәму достед хԝәйә амьн йед кӧ мьрьнә, жь мьрьне рʹакә (Мәт. 22:32). Ле әм иро жи гәләк кʹәрәмед ԝи дьвиньн. Чаԝа кӧ Кʹьтеба пироз дьбежә, «хԝәзи ль ԝи мьләти, Хԝәдейе кʹижани Йаһоԝа йә у ль ԝе щьмәʹте, кʹижан бьжарт кьрә ԝаре Хԝә» (Зәб. 33:12, ДТʹ).