1, 2. Чь те һʹәсабе чʹәʹве мә сәр Йаһоԝа бә?

ӘМ «Зәманед хьрабда» дьжин кӧ гәләк чәтьн ә. Һʹәта әм һивийа дьнйа тʹәзә нә, әʹмьр ԝе һе зор у чәтьн бә (2 Тимтʹ. 3:1). Ләма жи ԝе баш бә әм пьрсе бьдьнә хԝә: «Әз аликʹари у рʹебәрийе кʹидәре дьгәрʹьм?». Дьԛәԝьмә дәрберʹа әм бежьн, «Бал Йаһоԝа», у әв щабәкә лапә рʹаст у баш ә.

² Ле чь те һʹәсабе итʹбарийа хԝә Йаһоԝа биньн? У ча әм дькарьн тедәрхьн кӧ ԝәʹде чәтьнайед гьранда жи, чʹәʹве мә ль сәр ԝи йә? Бь ԛьрʹна пешда, зәбурбеж шьровәкьр кӧ ԝәʹде тәнгасийа чʹәʹве мә ль Йаһоԝа бә, демәк аликʹарийе жь ԝи бьхԝазьн. (Бьхунә Зәбур 123:1-4.) Әԝи бь мәсәла шьровәкьр кӧ чахе чʹәʹве мә сәр Йаһоԝа йә, әв мина ве йәке йә, ча чʹәʹве хӧлам сәр ахайе ԝи йә. Ле әԝ чь те һʹәсабе? Хӧлам ль ахайе хԝә дьньһерʹә, ԝәки әԝ хԝарьне бьде у ԝи хԝәй кә. Ле ӧса жи хӧлам гәрәке чʹәʹве ахайе хԝә бьньһерʹә, ԝәки тедәрхә һәла әԝ чь жь ԝи дәʹԝа дькә у әԝе йәке бькә. Ԝи щурʹәйи әм жи гәрәке һәр рʹож Хәбәра Хԝәде леколин бькьн, һәла Йаһоԝа хут жь мә чь дәʹԝа дькә, у ве йәке бькьн. Һәрге әм ӧса бькьн, әме дӧдьли нәбьн, ԝәки Йаһоԝа ԝе али мә бькә гава әм һʹәԝщә бьн (Әфәс. 5:17).

3. Чь дькарә бьбә мәʹни кӧ чʹәʹве мә ида сәр Йаһоԝа нибә?

 ³ Рʹаст ә әм заньн чьԛас фәрз ә һәр гав чʹәʹве мә сәр Йаһоԝа бә, ле щара дина мә дькарә һәрʹә сәр тьштед дьн. Һәма әԝ йәк ԛәԝьми тʹәви һәвала Исайә незик Мәртʹайе. Әԝ «гәләк тʹьвдарәкдитьнева гиро бу» (Луԛа 10:40-42). Һәрге әԝ йәк ԛәԝьми тʹәви мәрьвәкә ӧса амьн, кʹижан кӧ ве дәме тʹәви Иса бу, ле илаһи әм гәрәке чьԛас мьԛати хԝә бьн, ԝәки әԝ йәк тʹәви мә нәԛәԝьмә. Ле гәло чь дькарә дина мә бьрʹәвинә, кӧ чʹәʹве мә ида сәр Йаһоԝа нибә? Ве готареда әме шеԝьр кьн чаԝа кьред мәрьвед дьн, дькарьн дина мә бьрʹәвиньн. Әме ӧса жи пебьһʹәсьн кӧ чь бькьн, ԝәки чʹәʹве мә тʹьме ль Йаһоԝа бә.

4. Чьрʹа әм дькарьн әʹщебмайи бьминьн кӧ Муса нәкʹәтә Әʹрде Создайи?

⁴ Муса рʹебәри бал Йаһоԝа дьгәрʹийа. Кʹьтеба Пироз дьбежә ԝәки Муса «әԝе кӧ нәдьһатә кʹьфше дьдит у сәр йа хԝә ма». (Бьхунә Ибрани 11:24-27.) Ӧса жи сәр ԝи те готьне ԝәки «пʹехәмбәрәки мина Муса ль нава Исраелда тʹӧнә бу, йе кӧ Хӧдан рʹу бь рʹу нас дькьр» (Ԛан. Дщр. 34:10). Ле бьдьнә һʹәсабе хԝә, һәла һе Муса жи, һәләԛәтийа кʹижани тʹәви Йаһоԝа гәләк незик бу, ӧнда кьр әԝ ԛәдьре кӧ бькʹәта Әʹрде Создайи (Жьмар 20:12). Ле гәло чьрʹа ӧса ԛәԝьми?

5-7. Чахе Исраели жь Мьсьре дәркʹәтьн, рʹасти чь чәтьнайе һатьн, у Муса ве дәрәщеда хԝә ча да кʹьфше?

⁵ Чахе Исраели жь Мьсьре дәркʹәтьн, дӧ мәһ жи дәрбаз нәбу, пешийа кӧ әԝана бьгьһиштана Чʹийайе Синайе, чәтьнайик пешда һат. Щьмәʹте дәстпекьр бькә кӧтә-кӧт, чьмки ав тʹӧнәбу. Әԝана мьԛабьли Муса рʹабун, у һʹал ӧса хьраб бу кӧ һерса ԝи рʹабу у әԝи готә Йаһоԝа: «Әз хԝә ль ве щьмәʹте чаԝа бькьм? Һьндьк майә кӧ мьн бьдьнә ль бәр кәвьра!» (Дәркʹ. 17:4). Йаһоԝа щаба Муса да бь ԝе йәке, кӧ рʹебәрийа зәлал да ԝи. Муса Һʹоребеда пе шьвдара хԝә гәрәке ԛәйе хьста, демәк зьнар хьста, у паше жь ԛәйе гәрәке ав бькʹьшийа. Кʹьтеба Пирозда әм дьхуньн: «Муса ль бәр чʹәʹве рʹуспийед Исраел ӧса кьр». Ав кʹьшийа, у Исраелийа ав тʹер вәхԝарьн у ӧса әԝ чәтьнайи сафи бу (Дәркʹ. 17:5, 6).

⁶ Кʹьтеба Пироз паши ве йәке гьли дькә, ԝәки Муса «наве ԝи щийи дани Массаһ у Мерибаһ, чьмки зарʹед Исраел ԝьр кʹәтьнә дәʹԝе, Хӧдан щерʹьбандьн у готьн: ‹Гәло Хӧдан нав мәда йә йан на?›» (Дәркʹ. 17:7). Әԝ нав рʹасти жи ԝи щийи дьһатьн, чьмки әԝ те һʹәсабе «Щерʹьбандьн» у «Дәʹԝ».

⁷ Ле Йаһоԝа ча хԝә да кʹьфше һьндава ве йәке, кӧ чь ԛәԝьми Мерибаһеда? Әԝи һʹәсаб кьр кӧ Исраели нә кӧ мьԛабьли Муса рʹабун, ле мьԛабьли Ԝи у һʹӧкӧмтийа ԝи ча Хԝәде. (Бьхунә Зәбур 95:8, 9.) Бәле, Исраелийа нәрʹасти кьрьн. Ле Муса ве дәрәщеда тьштед рʹаст кьр, чʹәве ԝи сәр Йаһоԝа бу у әԝ пәй рʹебәрийа ԝи чу.

8. Паши 40 салед рʹеԝитийа бәрʹийеда чь чәтьнайи пешда һат?

⁸ Ԝәкә 40 сал дәрбаз бу, чахе рʹеԝитийа Исраелийайә бәрʹийеда ида хьлаз дьбу, һьнге диса чәтьнайикә ӧса пешда һат. Исраели ида незики  Кадәше бун, кʹижан кӧ незики синоре Әʹрде Создайи бу. Әԝ щи жи паше һатә навкьрьне Мерибаһ. * Ԝедәре Исраелийа диса бона аве кьрьнә кӧтә-кӧт (Жьмар 20:1-5). Ле ве дәрәщеда Муса ида щурʹәки майин хԝә да кʹьфше.

9. Муса чь рʹебәри станд, ле әԝи ча хԝә да кʹьфше? (Бьньһерʹә шькле әʹԝльн.)

⁹ Ле Муса ча хԝә да кʹьфше, чахе щьмәʹт мьԛабьл рʹабун? Чʹәʹве ԝи диса жи сәр Йаһоԝа у рʹебәрийа ԝи бу. Ле ве щаре Йаһоԝа нә готә Муса ԝәки ԛәйайе хә. Әԝи гот ԝәки Муса шьвдара хԝә һьлдә, щьмәʹте бәр ԛәйайе бьщьвинә, у паше бәр чʹәʹве ԝан ԛәйайерʹа хәбәр дә (Жьмар 20:6-8). Ле Муса әв йәк нәкьр, әԝи ԛәйайерʹа хәбәр нәда. Дәԝсе әԝи һерса хԝә рʹакьр у бь дәнге бьльнд щьмәʹтерʹа гот: «Бьбьһен гәли рʹабәрикʹара, дьбә кӧ әм жь ви ԛәйайи ԝәрʹа аве дәрхьн?». Паши ԝан гьлийа әԝи нә кӧ щарәке, ле дӧ щара ԛәйайе хьст (Жьмар 20:10, 11).

10. Йаһоԝа сәр кьред Муса ча хԝә да кʹьфше?

¹⁰ Йаһоԝа сәр Муса гәләк һерс кʹәт (Ԛан. Дщр. 1:37; 3:26). Ле чьрʹа? Әм дькарьн бежьн гәләк мәʹни һәбун. Чаԝа мә жоре гот, Йаһоԝа дьбәкә сәр Муса һерс кʹәт, чьмки әԝ пе рʹебәрийа Йаһоԝайә тʹәзә нәчу.

11. Чьрʹа жь бо кьре Муса кӧ әԝи ԛәйайе хьст, Исраели дькарьбун бьфькьрийана ԝәки әԝ кʹәрәмәта Йаһоԝа нибу?

¹¹ Ле дьбәкә Йаһоԝа жь бо мәʹникә дьн жи сәр ԝи һерс кʹәт. Дорбәре Мерибаһ пешьнда ԛәйа жь гранита ԛайим ьн. Мәрьв чьԛас ԛайим жи ве граните хә, тʹӧ кәс нә жи ԝе һивийе бә ԝәки жь ԝедәре ав бькʹьшә. Ле әԝ ԛәйайед ԛӧл-ԛӧлки кӧ Мерибаһа дӧдада һәнә, һʹәчʹи зәʹф жь кәвьре кʹьлсини нә. Әԝ кәвьрәки нәрм ә, у ләма жи гәләк щар аве дькʹьшинә хԝә у жера ве, әʹрдеда ав тʹоп дьбә. Мәрьв дькарьн ве ԛәйеда ԛӧле чекьн сәва аве бькʹьшиньн. Чахе Муса дӧ щара ԛәйайе хьст, нә кӧ тʹәви ԛәйе хәбәр да, у ав кʹьшийа, дьбәкә Исраели фькьрин ԝәки әԝ тьштәки тʹәбийәти йә, нә кӧ кʹәрәмәта Йаһоԝа бу. * Ле әм ве йәке сәд сәләфи нькарьн бежьн.

12. Бона кʹижан мәʹникә дьн дьбәкә Йаһоԝа сәр Муса у Һарун һерс кʹәт?

¹² Диса һәйә мәʹник, кӧ чьрʹа Йаһоԝа сәр Муса у Һарун ӧса һерс кʹәт. Дина хԝә бьдьне кӧ Муса щьмәʹтерʹа чь гот: «Дьбә кӧ әм жь ви ԛәйайи ԝәрʹа аве дәрхьн?» Чахе Муса гот «әм», дьԛәԝьмә әԝи сәр хԝә у Һарун дьгот. Әԝ гьлийед Муса дьданә кʹьфше, ԝәки ԛәдьр у һӧрмәт Йаһоԝарʹа нәда кʹьфше, демәк Ԝирʹа, кʹе кӧ әԝ кʹәрәмәт кьр. Әве йәке әм дьвиньн жь Зәбур 106:32, 33: «Ԝан Хӧдан һерс хьстьн ль бәр авед Мерибане, рʹуйе ԝанда сәре Муса бәржер бу. Ԝана дьле ԝи ешандьн у ԝи бь дәве хԝә зедәзьмани кьр» * (Жьмар 27:14). Чь  жи һәбу, кьред Муса һӧрмәт нәданә Йаһоԝа, йе кӧ һежа бу. Чахе Йаһоԝа тʹәви Муса у Һарун хәбәр да, әԝи ԝанрʹа гот: «Готьнед мьн инкʹар кьрьн» (Жьмар 20:24). Бь рʹасти жи әԝ гӧнәки гәләк гьран бу!

13. Чьрʹа әԝ йәк кӧ Йаһоԝа Муса щәза кьр бь рʹасти у һәԛи бу?

¹³ Муса у Һарун һе зедә бәр Йаһоԝа щабдар бун, чьмки әԝана рʹебәред щьмәʹта ԝи бун, у әԝ йәк щабдарийа мәзьн бу (Луԛа 12:48). Пешийа ве йәке, Йаһоԝа изьн нәда тʹәмамийа рʹькʹьнйата Исраел кӧ бькʹәвьнә Әʹрде Создайи, чьмки әԝана мьԛабьли ԝи рʹабун (Жьмар 14:26-30, 34). Ләма жи әв йәк лайиԛ у рʹаст бу, кӧ Йаһоԝа Муса жи щәза кьр бона кьред ԝийи нәрʹаст. Бәле, Йаһоԝа чаԝа изьн нәда рʹабәра кӧ бькʹәвьнә Әʹрде Создайи, ӧса жи изьн нәда Муса.

14, 15. Чь бу мәʹни кӧ Муса мьԛабьл рʹабу?

¹⁴ Ле гәло чьрʹа Муса ӧса нәрʹаст хԝә да кʹьфше? Ԝәрә әм диса дина хԝә бьдьнә Зәбур 106:32, 33: «Ԝан Хӧдан һерс хьстьн ль бәр авед Мерибане, рʹуйе ԝанда сәре Муса бәржер бу. Ԝана дьле ԝи ешандьн у ԝи бь дәве хԝә зедәзьмани кьр». Рʹаст ә Исраелийа һьнге һерса Йаһоԝа дьанин, ле дәԝсе Муса һерс кʹәт. Әԝи хԝә нәгьрт у гьлийед зедә хәбәр да, у нә жи фькьри кӧ хәбәрдана ԝи ԝе чь ахьрийе бинә.

¹⁵ Щара пешьн Муса хԝә рʹаст да кʹьфше чахе щьмәʹт мьԛабьл рʹабу. Ле щара дӧда әԝи ида чʹәʹве хԝә сәр Йаһоԝа һьлда, чьмки кьред мәрьвед дьн сәр ԝи һʹӧкӧм бун (Дәркʹ. 7:6). Дьԛәԝьмә әԝ һаԛас гәләк сал тʹәви ԝан Исраелед рʹабәр бу, кӧ ида жь ԝана вәстийа у әʹщьз бу. Дьԛәԝьмә Муса дәԝса кӧ һӧрмәте бьдә Йаһоԝа, һьнге тʹәне дәрһәԛа хԝә дьфькьри.

16. Чьрʹа лазьм ә әм сәр кьред Муса бьфькьрьн?

¹⁶ Һәрге мәрьвәки ӧса амьн ча Муса һʹьш-аԛьле хԝә да сәр тьштед дьн у гӧнә кьр, әм жи дькарьн бькʹәвьнә ве тʹәльке. Мина Муса, әм жи бәр шемика дьнйа тʹәзә сәкьнинә, кʹижан кӧ Йаһоԝа соз дайә (2 Пәт. 3:13). Фәʹмдари йә тʹӧ кәс жь мә нахԝазә әве мәщале ӧнда кә. Ләма жи әм гәрәке итʹбарийа хԝә Йаһоԝа биньн, ԝәки чʹәʹве мә сәр ԝи бә у тʹьме ԛьрара ԝи биньн сери (1 Йуһʹн. 2:17). Ле әм жь шашийа Муса чь дькарьн һин бьн?

17. Чь ԝе али мә бькә һерса хԝә бьгьрьн?

¹⁷ Хԝә бьгьрьн гава кәсәк ԝә һерс дьхә. Һәрге әм жь проблемәке хьлаз набьн, ԝәрә әм «жь ԛәнщикьрьне . . . ащьз нәбьн, чьмки әме ԝәхтда бьчьньн һәгәр әм нәдьнә дәр» (Галт. 6:9; 2 Тʹеслн. 3:13). Чахе тьштәк мә әʹщьз дькә, йан жи кьред кәсәки мә һерс дьхьн, гәло әм дькарьн зьмане хԝә у һерса хԝә бьгьрьн? (Мәтʹлк. 10:19; 17:27; Мәт. 5:22). Гава кәсәк һʹәмде хԝә дьле мә дешинә, әм гәрәке «щи бьдьнә һерса» Йаһоԝа. (Бьхунә Рʹомайи 12:17-21.) Һәрге чʹәʹве мә ль Йаһоԝа йә, әме ԛәдьре ԝи бьгьрьн бь ве йәке кӧ щи бьдьнә һерса ԝи, демәк бь сәбьр һивийе бьн һʹәта әԝ ԝәʹде лазьмда чәтьнайа мә сафи кә. Ле һәрге әм щурʹәки майин бькьн у һʹәйфе һьлдьн, әԝ ԝе бе һʹәсабе кӧ әм ԛәдьре Йаһоԝа нагьрьн.

18. Чахе әм рʹебәрийед тʹәзә дьстиньн әм чь гәрәке бькьн?

 ¹⁸ Пәй рʹебәрийед тʹәзә һәрʹьн. Чахе Йаһоԝа рʹебәрийед тʹәзә дьдә мә, гәло әм дәрберʹа пәй ԝан рʹебәрийа дьчьн? Һәрге әре, әме сәр хԝә итʹбар нибьн, у ӧса нәкьн чаԝа мә бәре дькьр. Әме дәрберʹа пәй рʹебәрийа тʹәзә һәрʹьн кӧ Йаһоԝа бь тʹәшкиләта хԝә дьдә мә (Ибрн. 13:17). Әме ӧса жи мьԛати хԝә бьн, ԝәки «жь ньвисаре дәрнәйен» (1 Корн. 4:6). Ӧса әме нишан кьн кӧ чʹәʹве мә сәр Йаһоԝа йә.

19. Ча һәләԛәтийа мә тʹәви Йаһоԝа, дькарә жь бо шашийед мәрьвед майин хьраб бә?

¹⁹ Изьне нәдә ԝәки шашийед кәсәки, һәләԛәтийа тә тʹәви Йаһоԝа хьраб кьн. Һәрге чʹәʹве мә сәр Йаһоԝа дьминә, әме тʹӧ щар жь бо кьред мәрьвед майин нәбьнә мәрьвед һерс у ӧса жи һәләԛәтийа хԝә тʹәви Йаһоԝа хьраб нәкьн. Әԝ йәк гәләк фәрз ә илаһи һәрге тʹәшкиләта Хԝәдеда щабдарийед мә һәнә. Бәле, әм гьшк жи гәрәке «бона хьлазбуна хԝә бь хоф у тьрс бьхәбьтьн», ле әм ӧса жи гәрәке бир нәкьн кӧ һәр гав гӧрʹа Йаһоԝа бькьн (Фили. 2:12). Чьԛас һе зәʹф щабдарийа мә һәйә, һаԛас һе зедә жь мә те хԝәстьне у әм бәр Хԝәде щабдар ьн (Луԛа 12:48). Ле һәрге әм бь рʹасти Йаһоԝа һʹьз дькьн, тʹӧ тьшт ԝе мә нәлькʹӧминә у жь һʹьзкьрьна Йаһоԝа нәԛәтинә (Зәб. 119:165; Рʹом. 8:37-39).

20. Нета дьле мә гәрәке чь бә?

²⁰ Ԝан рʹожед гәләк чәтьнда, чʹәʹве мә бьра һәр гав ль Йаһоԝа бә, «йе ль әʹзмен рʹуньшти», сәва кӧ ԛьрара ԝи фәʹм кьн. Ԝәрә әм тʹӧ щар нәһельн, ԝәки кьред мәрьва һәләԛәтийа мә тʹәви Йаһоԝа хьраб кьн. Чь кӧ тʹәви Муса ԛәԝьми, дьдә кʹьфше кӧ әм гәрәке рʹьнд мьԛати хԝә бьн. Дәԝса ве йәке кӧ сәр шашийед мәрьва һерс кʹәвьн, ԝәрә әм дьле хԝәда сафи кьн ԝәки «чʹәʹве мәйе ль Хӧдан, Хԝәдейе мә бә, һʹәта Әԝ ль мә бе рʹәʹме» (Зәб. 123:1, 2).