ӘԜ КʹЬТЕБ бь тʹәвайи дьһатьнә навкьрьне кʹәскәсор. Чахе мьн әԝ кʹьтеб дьхԝәндьн, ԝедәре шькьл һәбун кӧ гәләк сәр мьн һʹӧкӧм бун. Ӧса әз бьчʹуктайеда жь ԝан кʹьтеба дәрһәԛа Кʹьтеба Пироз пеһʹәсийам, у мьн дьхԝәст һе зедә пебьһʹәсьм.

Һьнге гава Шәрʹе Һʹәмдьнйайе йа II гьһиштә Һьндьстане, әʹмьре мьн жи алийе хьрабда дьһатә гӧһастьне. Де-баве мьн жь һәв ԛәтийан. Мьн нькарьбу фәʹм кьра кӧ чьрʹа әԝ дӧ мәрьв, кʹижана мьн һʹьз дькьр һәвдӧ дьһельн. Әз гәләк бәрхԝә дькʹәтьм у мьн хԝә тʹәне тʹәхмин дькьр. Һьнге әз гәләк һʹәԝще аликʹарийе бум. Ле әз зарʹа тайе тʹәне бум, у тʹӧ кәс тʹӧнә бу бәр дьле мьнда бьһата у али мьн бькьра.

Әз у дийа хԝә, мә шәһәре Кәрачийеда дьжит. Щарәке һʹәкимәки әʹмьрда мәзьн кӧ наве ԝи Фред Һардакер бу, һатә мала мә. Әԝ Шәʹде Йаһоԝа бу. Баԝәрийа ԝи жи мина йа ԝи мисйонери бу, кʹижан кӧ әԝ кʹьтеб дабунә малбәта мә. Әԝи жь дийа мьн пьрси һәла әԝ нахԝазә Кʹьтеба Пироз һин бә. Дийа мьн хԝәха нәхԝәст, ле дәрһәԛа мьн жерʹа гот  ԝәки дьбәкә мьнрʹа ԝе һʹәԝас бә. У Һардакер бьра һʹәфтийа дьн дәстпекьр тʹәви мьн һинбуне дәрбаз кә.

Чәнд һʹәфти дәрбаз бун, әз ида дьчум сәр щьвине кʹижан кӧ ода медисина Һардакерда дәрбаз дьбу. Ве щьватеда ԝәкә 12 Шәʹдед Йаһоԝа бун, кӧ әʹмьрда мәзьн бун. Әԝана бәр дьле мьнда һатьн у мина кӧрʹе хԝә бона мьн хәм дькьрьн. Чахе дькʹәвә бира мьн кӧ ча әԝана тʹәви мьн рʹудьньштьн, у чаԝа һәвалед незик тʹәви мьн хәбәр дьдан, әз дьлгәрм дьбьм. Һьнге мьнрʹа һәма әԝ йәк лазьм бу.

Һьнә ԝәʹдә шунда Һардакер бьра, мьн тʹәви хԝә бьрә хьзмәтийе. Әԝи мьн һин кьр кӧ чаԝа фонографа дәста бьдьмә хәбате, сәва ԝәʹде хьзмәтийе әм готаред кьн кӧ сәр һʹиме Кʹьтеба Пироз бун, вехьн. Чәнд готар һьнәки сәрт бун, ләма жи әԝ готар һьнә хԝәйед мале хԝәш нәһатьн. Ле мьн хьзмәти гәләк һʹьз дькьр у мьн шабун дьстанд. Әз һьндава рʹастийа Кʹьтеба Пироз гәләк хирәт бум у мьн һʹьз дькьр дәрһәԛа рʹастийе мәрьварʹа гьли кьм.

Чахе Жапонйа һазьр дьбу ԝәки мьԛабьли Һьндьстане дәре, сәрԝеред Британйайе һе зедә пәй Шәʹдед Йаһоԝа дькʹәтьн. Сала 1943 мәһа Тирмәһе, әԝ йәк сәр мьн жи һʹӧкӧм бу. Директоре мәкʹтәба мьн, кʹижан кӧ хьзмәткʹаре дере бу, шәрʹ авитә мьн йанчь әз нәлайиԛ ьм ԝәки мәкʹтәбеда һин бьм, чьмки сәр шагьртед дьн хьраб һʹӧкӧм дькьм. Әԝи дийа мьнрʹа гот кӧ әз тʹәви Шәʹдед Йаһоԝа һәвалтийе дькьм, ләма мәсәла хьраб ьм бона шагьрта. Дийа мьн гәләк һерс кʹәт у ида нәдьһишт, ԝәки әз тʹәви Шәʹдед Йаһоԝа һәвалтийе бькьм. Ахьрийеда, әԝе әз шандьмә бал баве мьн шәһәре Пешавареда, кʹижан кӧ ԝәкә 1 370 километр дур ә, у алийе бакʹуре йә. Әз һеди-һеди рʹӧһʹанида кʹәтьм, чьмки бей хԝарьна рʹӧһʹани у бей һәвал мабум.

Сала 1947 әз вәгәрʹийамә шәһәре Кәрачийе, сәва бьхәбьтьм. Чахе әз ԝедәре бум, әз чум тʹәсәлийа Һардакер бьра бькьм щийе хәбата ԝи. Әԝ бь дьл у щан рʹасти мьн һат у мьн ԛәбул кьр.

Әԝи мьн пьрси: «Һәла бежә кʹидәра тә дешә?». Әԝ дьфькьри кӧ әз һатьм, чьмки дәрәкә мьн дешә.

Мьн жи щаба ԝи да: «Һʹәкимо, әз сьһʹәт-ԛәԝатеда нәхԝәш ниньм. Әз рʹӧһʹанида нәхԝәш ьм. Мьнрʹа һинбуна Кʹьтеба Пироз лазьм ә».

Әԝи жи жь мьн пьрси: «Тӧ кʹәнге дьхԝази дәстпеки?».

Мьн жерʹа гот: «Чьԛас зу һаԛас баш».

Мә һәма ве еваре дәстпекьр һинбуна Кʹьтеба Пироз. Мьн хԝә ӧса тʹәхмин дькьр те бежи һатьмә мала хԝә. Дийа мьн дьхԝәст рʹе мьн бьгьрә, ԝәки әз тʹәви Шәʹдед Йаһоԝа нәчьм-нәйем. Ле мьн ида дьле хԝәда сафи кьрьбу, ԝәки рʹастийе ԛәбул кьм у Йаһоԝарʹа хьзмәт кьм. Ләма жи 31 Тʹәбахе, сала 1947-да мьн хԝә тʹәсмили Йаһоԝа кьр у һатьмә ньхӧмандьне. Ԝәʹдә шунда, мьн 17 салийа хԝәда хьзмәтийа пешәнгти дәстпекьр.

Кʹьфшкьрьна мьнә пешьн шәһәре Кветайеда бу. Сала 1947, Һьндьстан у Пакьстан жь һәв башԛә бун. * Пәй ве йәкерʹа, нава щьмәʹтеда бона религийайе шәрʹ пешда һат, жь бо кʹижани гәләк мәрьв жь ԝәлат рʹәвин. Нава тʹәрихийеда әԝ миграсийа, йәк жь миграсийед лапә мәзьн бу. Ԝәкә 14 милйон мәрьв кʹәтьнә хәрибийе. Мьсьлманед Һьндьстане рʹәвинә Пакьстане, ле Һьнду у Сикхи жь Пакьстане дәрбази Һьндьстане бун. Һьнге, әз пе трена Кәрачийе кӧ бь мәрьва тʹьжә бу, дьчумә Кветайе. Трен ӧса тʹьжә бу, ԝәки ниве рʹе зедәтьр мьн хԝә бәр дәре трене гьртьбу.

Кветеда, әз рʹасти Щорщ Сингх һатьм, кʹижан кӧ ԝәкә 25 сали бу у пешәнге мәхсус бу. Әԝи бисиклетәкә кәвьн да мьн, ԝәки мьнрʹа һеса бә сәр територийед чʹәʹл-кʹортрʹа һәрʹьм. Мьн дьһа зәʹф тʹәне хьзмәт дькьр. Нава шәш мәһада, бал мьн 17 һинбунед Кʹьтеба Пироз һәбун, у һьнәк жь ԝан һатьнә сәр рʹийа рʹаст. Йәк жь ԝан офисере әскәра бу, наве ԝи Садик Маси бу. Әԝи али мә кьр ԝәки һьнә әʹдәбйәта сәр зьмане Урду ԝәлгәрʹиньн. Әв зьмане мьләте Пакьстане йә. Ахьрийеда Садик бу мьзгинванәки хирәт.

Ԝәʹдә шунда, әз вәгәрʹийамә Кәрачийе, у мьн тʹәви Һенри Финч у Һари Форест хьзмәт дькьр. Әԝана мисйонер бун у Мәкʹтәба Гиләд тʹәзә хьлаз кьрьбун. Әз жь ԝана гәләк тьшт һин бум! Щарәке әз тʹәви Финч бьра чумә хьзмәтийе алийе Пакьстана бакʹуре. Мә нав чʹийада гәләк мәрьвед гӧнди дитьн,  кӧ мьлук бун у рʹӧһʹанида бьрчи бун. Паши дӧ сала, әз чумә Мәкʹтәба Гиләд; жь ԝедәре әз вәгәрʹийамә Пакьстане у мьн ԝәʹдәлу ча бәрпьрсийаре мьһале хьзмәт дькьр. Мьн шәһәре Лахорда дьжит мала мисйонерада, тʹәви 3 бьра кӧ мисйонер бун.

Йазьх, сала 1954-да, мисйонеред Лахореда һәврʹа шәрʹ кьрьн, у филиал мәщбур бу гӧһастьна бькә. Мьн тьштәки бефәʹмти кьр кӧ кʹәтьмә нава ԝи шәрʹ-дәʹԝи, ләма жи мьн ширәтәкә сәрт станд. Әз гәләк дьлтәнг бум, чьмки әз дьфькьрим, ԝәки мьн кʹьфшкьрьна хԝә нәани сери. Әз вәгәрʹийамә Кәрачийе у паше чумә Лондоне (Инглистан), сәва ԝедәре диса рʹӧһʹанида пешда һәрʹьм.

Лондонеда щьвата мьнда гәләк әндәмед жь Бәйтʹәле һәбун. Прис Һйус, бьраки ԛәнщ кӧ филиаледа хьзмәт дькьр, әз кьрьмә бьн пʹәре хԝә. Щарәке, әԝи дәрһәԛа хԝә мьнрʹа гьли кьр, ԝәки чаԝа Щозеф Рутерфорд ԝи сәрт ширәт кьр. Һьнге Рутерфорд щабдар бу бона шьхӧле һʹәмдьнйайе йа бәлакьрьна мьзгинийе. Чахе Һйус бәр Рутерфорд хԝәстьбу хԝә һәԛ дәрхә, әԝ гәләк сәрт ԝи һьлатьбу. Әз ӧса әʹщебмайи мам кӧ Һйус ӧса һʹәԝас әԝ йәк гьли дькьр. Әԝи гот кӧ һьнге дьле ԝи дешийа кӧ әԝи ширәткьрьна ӧса станд. Ле паше әԝи фәʹм кьр, ԝәки әԝ ширәт жерʹа лазьм бу у әԝ йәк әʹйанкьрьна һʹьзкьрьна Йаһоԝа бу (Ибрн. 12:6). Гьлийед ԝи гәләк дьле мьн гьртьн у али мьн кьрьн рʹӧһʹанида диса ԛәԝи бьм.

Ԝи ԝәʹдәйи, дийа мьн дәрбази Лондоне бу у әԝе жь Щон Бар һинбуна Кʹьтеба Пироз ԛәбул кьр, кʹижан кӧ паше Кʹома Рʹебәрийеда хьзмәт дькьр. Әԝ гәләк зу рʹӧһʹанида пешда чу у сала 1957-да һатә ньхӧмандьне. Ԝәʹдә шунда, әз пеһʹәсийам ԝәки баве мьн пешийа мьрьна хԝә тʹәви Шәʹдед Йаһоԝа һинбун дәрбаз буйә.

Сала 1958-да, мьн Лене станд, кӧ жь Дәнмарке бу, ле дәрбази Лондоне бьбу. Саләк шунда, ԛиз мәрʹа бу у әм гәләк ша бун. Мә наве ԝе дани Щейн. Ӧса жи ԛәдьрәки мәзьн мьнрʹа һатә дайин, мьн щьвата Фулемеда щабдари стандьн. Ле ԝәʹдә дәрбаз бу, у жь бо сьһʹәт-ԛәԝата жьна мьн, әм гәрәке дәрбази щики дьн буна, кʹидәре кӧ климата гәрм бу. Ләма жи сала 1967, әм дәрбази Аделаидайе бун, (Австралйа).

Аделаидайеда щьвата мәда 12 Мәсиһийед бьжарти һәбун кӧ әʹмьрда мәзьн бун. Әԝана хьзмәтийеда гәләк хирәт бун. Әм жи зу пәй графика хԝәйә тʹәзә йа хьзмәтийе чун.

Сала 1979-да, мәрʹа зарʹа 5 һатә буйине, мә наве ԝи дани Данийел. Әԝ бь нәхԝәшийа Даун * һатә  буйине, у мә заньбу ԝәки әԝе дьреж нәжи. Һʹәта иро мьнрʹа чәтьн ә чахе әве еше тиньм бира хԝә. Мә алийе хԝәда һәр тьшт дькьр бона ԝи, у ӧса жи мә дина хԝә дьда 4 зарʹед хԝәйә дьне жи. Данийел щара шин дьбу, чьмки бина ԝи дьма жь бо дӧ ԛӧлед кӧ дьле ԝида һәбун, у мә дәрберʹа ԝи дьбьрә нәхԝәшхане. Рʹаст ә сьһʹәт-ԛәԝата ԝи хьраб бу, ле әԝ йәки аԛьл у һʹәйф бу. Әԝи Йаһоԝа гәләк һʹьз дькьр. Чахе мә тʹәвайи малбәтеда дӧа дькьр ԝәʹде нанхԝарьне, әԝи дәстед хԝәйи бьчʹук дькьрә һәв, сәре хԝә бәржер дькьр, у бь дьл дьгот: «Амин!» Тʹәне паши ве йәке мә хԝарьна хԝә дьхԝар.

Чахе Данийел 4 сали бу, леикемийа ԝи дәстпебу. Әз у Лене һьн физикида һьн емосийалида шкәсти бун. Мьн тʹәхмин дькьр, ԝәки әзе ида тәйах нәкьм. Ле чахе әм гәләк дьлтәнг бун, бәрпьрсийаре мьһале Невил Брамич һатә мала мә. Ве шәве, әԝи бь һесьра мә һʹәмез дькьр, у әм гьшк дьгьрийан. Әԝ һʹьзкьрьн у гьлийед ԝийи дьлшәԝати ӧса дьле мә рʹьһʹәт кьрьн, кӧ әм нә жи дькарьн пе гьлийа бежьн. Әԝ нивро ԝәкә сьһʹәта йәке жь мала мә чу. Һьнә ԝәʹдә шунда Данийел мьр. Әԝ йәк әʹмьре мәда дәрдәки лапи мәзьн бу. Ле мә сәбьр кьр ԝи дәрде хԝәда, чьмки әм баԝәр бун ԝәки тʹӧ тьшт, нә жи мьрьн, нькарә Данийел жь һʹьзкьрьна Йаһоԝа дур хә (Рʹом. 8:38, 39). Әм гәләк һивийа ԝи ԝәʹдәйи нә, кʹәнге әԝ дьнйа тʹәзәда жь мьрьне рʹабә у әм ԝи бьвиньн (Йуһʹн. 5:28, 29).

Дӧ щара инсулте мьн хьст, ле әз йәкә диса жи ча рʹуспи хьзмәт дькьм. Ԛәԝьмандьнед кӧ әʹмьре мьнда ԛәԝьмин, мьн һелан кьрьн кӧ һе дьлшәԝат бьн у бәрдьлийе бьдьмә мәрьва, илаһи ԝан йед кӧ чәтьнайада ньн. Әз тʹӧ щар мәрьва нәһәԛ накьм чахе әԝана дькʹәвьнә проблема, ле дәԝсе әз пьрса дьдьмә хԝә: «Гәло ԛәԝьмандьнед әʹмьре ԝанда ча һʹӧкӧм бунә сәр ньһерʹандьн у фькьред ԝан? Ча әз дькарьм ԝанрʹа бьдьмә кʹьфше, ԝәки әз ԝана һʹьз дькьм у бона ԝан хәм дькьм? Ча әз дькарьм дьл бьдьмә ԝан кӧ сәр рʹийа Йаһоԝа бьминьн?». Әз һʹьз дькьм щьватеда сәрледана шьвантийе бькьм! Бь рʹасти чахе әз хушк-бьра дьлгәрм дькьм у алийе рʹӧһʹанида ԝана дьшьдиньм, әз тʹәхмин дькьм ԝәки әз хԝәха дьлгәрм дьбьм у ԛәԝи дьбьм.

Әз хԝә тʹәхмин дькьм мина зәбурбеж, йе кӧ гот: «Дәма дәрд-кӧл дьле мьнда зедә дьбьн, барьстанийед Тә нәфса мьн ша дькьн» (Зәб. 94:19). Ԝәʹде чәтьнайед малбәтеда, пәйкʹәтьна, дьлшкәстибуне у депресийе, Йаһоԝа тʹьме кʹеләка мьн бу у али мьн дькьр. Йаһоԝа бона мьн бь рʹасти жи Бав ә!