Баве Рʹәһобоԝам Сьлеман бу, кʹижан кӧ 40 сала сәр Исраеле пʹадшати дькьр (1 Пʹадш. 11:42). Сьлеман сала 997 Б.Д.М., мьр, у һьнге Рʹәһобоԝам жь Оршәлиме чу Шәкәме сәва ԝи бькьнә пʹадша (2 Дир. 10:1). Дьԛәԝьмә Рʹәһобоԝам дьтьрсийа кӧ дьбә пʹадша, чьмки баве ԝи Сьлеман навдар бу пе биланийа хԝә, ле ньһа ида әԝи гәрәке биланийа хԝә избат кьра ԝәʹде сафикьрьна чәтьнайа.

Рʹәһобоԝам тʹәхмин дькьр, ԝәки Исраеледа тьштәки нәбаш ԝе бьԛәԝьмә. Һьнә ԝәʹдә дәрбаз бу, щьмәʹт һат бал ԝи у газьне хԝә ԝи кьрьн: «Баве тә нире мә дьжԝар кьр у хьзмәта баве тәйи дьжԝар у нире ԝи йе гьране кӧ данийә сәр мә, ньһа тӧ сьвьк бькә у әме тәрʹа кʹоләтийе [бәрдәстийе] бькьн» (2 Дир. 10:3, 4).

Рʹәһобоԝам тʹәвһәвбу, у ньзаньбу чь бькьра. Һәрге әԝи хԝәстьна щьмәʹте бьанийа сери, әԝи малбәта хԝәва у йед кӧ ԛәсьра ԝида бун, дькарьбун һәбук у тьштед ԛимәт ӧнда кьрана. Алики дьнва жи, һәрге әԝи хԝәстьна ԝан пьшт гӧһе хԝәва бьавита, щьмәʹт ԝе мьԛабьли ԝи рʹабуйа. Ле гәло әԝи чь кьр? Әԝ пешийе чу бал ширәткʹаред баве хԝә, йед кӧ әʹмьрда мәзьн бун. Ле паше әԝ чу бал щаһьлед кӧ әʹмьрда ԛаси ԝи бун. Әԝи ширәтед ԝан щаһьла ԛәбул кьр, у сафи кьр ԝәки тʹәви щьмәʹте сәрт бә. Әԝи щаба ԝан ӧса да: «Баве мьн нире ԝә гьран кьр; ле бәле әзе бь сәр ԝева бьхьм; баве мьн ԝә бь ԛамчийан пʹәрԝәрдә кьр; ле бәле әзе ԝә бь тупьшканва пʹәрԝәрдә бькьм!» (2 Дир. 10:6-14).

Ве йәкеда әм дькарьн хԝәрʹа дәрсе һин бьн. Әшкәрә йә кӧ әме һе зәʹф кʹаре бьстиньн, һәрге гӧһ бьдьнә мәрьвед әʹмьрда мәзьн, йед кӧ рʹӧһʹанида гьһишти нә. Әԝ мәрьв әʹмьрда щерʹьбанди нә, ләма жи әԝана дькарьн бежьн, ԝәки кʹижан сафикьрьн ԝе чь ахьрийе бинә, у әԝана ԝе сәр һʹиме ве йәке ширәтед баш бьдьн (Иб. 12:12).

Рʹәһобоԝам ордийа хԝә һазьр кьр, ԝәки мьԛабьли щьмәʹта рʹабәр дәркʹәвә. Ле Йаһоԝа  кʹәтә нава ԝи шьхӧли у бь Шәмайа пʹехәмбәр жерʹа гот: «Һуне дәрнәкʹәвьн у ль дьжи бьрайед хԝә лаԝед Исраелрʹа щәнге [шәрʹ] нәкьн; вәгәрʹьн, бьра һәр кәс һәрʹә мала хԝә! Жь бәр кӧ әв тьшт жь мьн бу!» (1 Пʹадш. 12:21-24). *

Бьдьнә бәр чʹәʹве хԝә, Рʹәһобоԝам дьбәкә чьԛас бәрхԝә кʹәт, чахе әԝ йәк бьһист. Дьԛәԝьмә әԝ хԝәрʹа дьфькьри кӧ щьмәʹт ԝе чь бежә, нә әԝи әԝана данә тьрсандьне кӧ ԝе ԝана пе ԛамчийа щәза кә, ле ньһа жи тьштәки нькарә бькә (Бәрамбәр кьн 2 Дирок 13:7.) Йәкә Рʹәһобоԝам ордийа хԝәва «готьна Хӧдан гӧһдари кьрьн у ль гор готьна Хӧдан вәгәрʹийан у рʹийа хԝәва чун».

Әм жь ве йәке чь дәрсе һин дьбьн? Ԝе аԛьлайи бә, ԝәки әм тʹьме гӧрʹа Хԝәде бькьн, һьнге жи һәрге бона ве йәке мәрьв ԝе ԛәрфа мә бькьн. Чахе әм гӧрʹа Хԝәде дькьн, әм ԛәбулкьрьн у кʹәрәмед ԝи дьстиньн (Ԛан. Дщр. 28:2).

Ле Рʹәһобоԝам чь кʹәрәм сьтанд кӧ гӧрʹа Хԝәде кьр? Әԝи диса жи пʹадшатийа хԝә бәрдәԝам кьр сәр бәрәка Щьһуда у Бьнйамина. Хенщи ве йәке, әԝи дәстпекьр територийа хԝәда шәһәред тʹәзә ава кә. Әԝи әԝ шәһәр «бь зедәйи зәхьманд [ԛәԝи кьр]» (2 Дир. 11:5-12). Йа лапә фәрз әԝ бу, кӧ һьнге әԝи гӧрʹа ԛанунед Йаһоԝа дькьр. Чахе пʹадшатийа дәһ бәрәки дәстпекьр хӧданед ԛәлп бьһʹәбинә, жь ԝедәре гәләк мәрьв чунә Оршәлиме, сәва һʹәбандьна рʹастда пьштгьрийа Рʹәһобоԝам бькьн (2 Дир. 11:16, 17). Рʹәһобоԝам гӧрʹа Йаһоԝа кьр у ләма жи пʹадшатийа ԝи ԛәԝи бу.

Чахе Пʹадшатийа ԝи ԛәԝи бу, әԝи шашикә мәзьн бәрʹда. Әԝи ԛануна Йаһоԝа пьшт гӧһе хԝәва авит у дәстпекьр хӧданед ԛәлп бьһʹәбинә. Ле чьрʹа? Дьԛәԝьмә әԝ кʹәтә бәр байе дийа хԝә йа кӧ Амони бу (1 Пʹадш. 14:21). Фьрԛи тʹӧнә мәʹни чь бу кӧ әԝи ӧса кьр, ле йазьх тʹәмамийа щьмәʹте чʹәʹв да ԝи. Ләма жи Йаһоԝа ӧса кьр, ԝәки пʹадше Мьсьре Шишак гәләк шәһәред Щьһуда зәфт кә. Рʹаст ә Рʹәһобоԝам шәһәред хԝә ԛәԝи кьрьбу, ле әԝе йәке рʹе Шишак нәгьрт (1 Пʹадш. 14:22-24; 2 Дир. 12:1-4).

Һʹале Рʹәһобоԝам һе хьраб бу гава Шишак гьһиштә Оршәлиме, кʹидәре Рʹәһобоԝам пʹадшати дькьр. Һьнге Шәмайа пʹехәмбәр әʹламәтийа Хԝәде, Рʹәһобоԝамрʹа у сәрокед ԝирʹа гот: «Ԝә мьн бәрда, жь бәр вейа йә кӧ мьн жи ԝә бь дәсте Шишаква бәрда». Ле гәло ча Рʹәһобоԝам хԝә да кʹьфше гава әԝ гьли бьһист? Әԝ пʹошман бу. Кʹьтеба Пирозда те готьне: «Сәрокед Исраеле у ԛьрал хԝә ньмьз кьрьн у: Хӧдан бь дади йә! готьн». Ләма жи Йаһоԝа Рʹәһобоԝам хьлаз кьр у Оршәлим жи ԝеран нәбу (2 Дир. 12:5-7, 12).

Паши ве йәке, Рʹәһобоԝам бәрдәԝам дькьр пʹадшатийе бькә сәр пʹадшатийа башуре. Гәләк кӧрʹед Рʹәһобоԝам һәбун, у паши мьрьна хԝә әԝи ԝанрʹа гәләк пʹешкʹеш бәла кьр. Әԝи дьбәкә ӧса кьр, чьмки дьхԝәст ԝәки әԝана мьԛабьли бьре хԝә Әбийа дәрнәкʹәвьн, кʹижан кӧ гәрәке бьбуйа пʹадша (2 Дир. 11:21-23). Әԝ йәк алийе ԝида һе аԛьлайи бу, нә кӧ чаԝа әԝи щаһьлтийеда кьр.

Рʹаст ә Рʹәһобоԝам һьнә тьштед ԛәнщ кьр, йәкә әԝи ԛәбулкьрьна Хԝәде ӧнда кьр. Кʹьтеба Пироз дьбежә: «[Әԝи] тьште кӧ хьраб ә кьр». Ле чьрʹа? Чьмки әԝи дьле хԝәда Йаһоԝа нәдьгәрʹийа (2 Дир. 12:14).

Бьфькьрьн кӧ әм чь дькарьн һин бьн жь сәрһатийа Рʹәһобоԝам. Әԝи щара гӧрʹа Хԝәде дькьр у һьнә тьштед баш жи бона щьмәʹта Йаһоԝа кьр. Ле һәләԛәтийа ԝи тʹәви Йаһоԝа сьст бу у хԝәстьна ԝи ԛайим нибу, ԝәки дьле Хԝәде ша кә. Ләма жи әԝи тьштед нәрʹаст кьр у кʹәтә нава пʹутпʹарьстийе. Дьԛәԝьмә һун пьрсе дьдьнә хԝә: «Чахе Рʹәһобоԝам гӧрʹа Хԝәде дькьр, гәло мәʹни әԝ бу кӧ әԝ бь дьл пʹошман дьбу бона шашийед хԝә у дьхԝәст дьле Хԝәде ша кә, йан чьмки мәрьва жерʹа дьгот?» (2 Дир. 11:3, 4; 12:6). Рʹәһобоԝам мина кальке хԝә Даԝьд Пʹадша нибу. Әԝи әʹмьре хԝәда паше диса тьштед нәрʹаст кьр. Бәле, Даԝьд жи әʹмьре хԝәда шаши бәрʹдан. Ле йәкә әԝи тʹәмамийа жийина хԝәда бь дьл у щан Йаһоԝа у һʹәбандьна рʹаст һʹьз дькьр, у һʹәлал  гӧнед хԝә дьани рʹуйе хԝә (1 Пʹадш. 14:8; Зәб. 51:1, 17; 63:1).

Жь сәрһатийа Рʹәһобоԝам әм дькарьн рʹасти жи гәләк тьшта һин бьн. Әм гьшк гәрәке мьԛати нәфәред хԝә бьн у шьхӧләки һежа бькьн. Ле сәва кӧ Йаһоԝа жь мә рʹази бә, тʹәне әԝ йәк бәс нинә. Лазьм ә әм ԝи ӧса бьһʹәбиньн ча дьле ԝи дьхԝазә у гәрәке һәләԛәтийа мә тʹәви ԝи ԛәԝи бә.

Әԝе йәке әм дькарьн бькьн һәрге ԛайим Йаһоԝа һʹьз бькьн. Чаԝа кӧ дар наһелә ԝәки агьр весә, ӧса жи әм гәрәке һʹьзкьрьна хԝә һьндава Йаһоԝа ԛәԝи хԝәй кьн бь ве йәке кӧ Хәбәра ԝи леколин бькьн, сәр бьфькьрьн у дӧа кьн (Зәб. 1:2; Рʹом. 12:12). Әԝ һʹьзкьрьна ԛайим ԝе мә һелан кә, ԝәки бь дьл у щан ԝан тьшта бькьн, кʹижан кӧ дьле ԝи ша дькьн. Ӧса жи әԝ һʹьзкьрьн ԝе али мә бькә, ԝәки чахе әм шашийа дькьн һʹәлал тʹобә кьн. Ӧса әме нәбьнә мина Рʹәһобоԝам, ле әме һʹәта хьлазийе амьн бьминьн Йаһоԝарʹа (Щьһуд. 20, 21).