1. Чьрʹа ньхӧмандьн гавәкә гәләк фәрз ә? (Бьньһерʹә шькле әʹԝльн.)

ҺӘР САЛ һʹәзара мәрьв тенә ньхӧмандьне. Гәләк жь ԝана зарʹ у щаһьл ьн, йед кӧ нава рʹастийеда мәзьн бунә. Дьбәкә тӧ жи мина ԝан рʹастийеда мәзьн буйи. Һәрге ӧса нә, тӧ һежайи пʹайа йи. Ньхӧмандьн әԝ һәйә дәʹԝакьрьн бона Мәсиһийа, у гавәкә гәләк фәрз ә сәва хьлаз бьн (Мәт. 28:19, 20; 1 Пәт. 3:21).

2. Чьрʹа тӧ гәрәке тʹәсмилбуйине нәтьрси?

² Ньхӧмандьн гәләк кʹәрәма тинә, ле әԝ ӧса жи щабдарийед тʹәзә тинә. Чь щабдари? Рʹожа ньхӧмандьна хԝә, тә гот «бәле» сәр щаба ве пьрсе: «Ль сәр һʹиме ԛӧрбанбуна Мәсиһ, тә гӧне хԝә тʹобә кьрийә у хԝә тʹәсмили Хԝәде кьрийә, сәва кӧ ԛьрара ԝи бьԛәдини?» Ньхӧмандьна тә нишан дькә, кӧ тә ида хԝә тʹәсмили Хԝәде кьрийә. Тә соз да Йаһоԝа кӧ ԝи һʹьз бьки у ԛьрара ԝи сәр һәр тьштирʹа бьгьри. Әв соз щабдарийа мәзьн ә. Ле гәло гәрәке тӧ пʹошман би, ԝәки тә созәки ӧса дайә? На! Тӧйе тʹӧ щар пʹошман  нәби, ԝәки тә хԝә дайә дәсте Йаһоԝа. Бьфькьрә сәр ве йәке: Мәрьвед кӧ Йаһоԝа нас накьн, бьн һʹӧкӧме Шәйтʹанда ньн. У бь рʹастийе ԛә тʹалаша Мире-щьна тӧ нини у әԝ нахԝазә тӧ хьлаз би. Хенщи ве йәке, әԝ ԝе гәләк ша бә һәрге тӧ әʹмьре хԝәйи һʹәта-һʹәтайе ӧнда ки, бь ве йәке кӧ алийе ԝи бьгьри у пьшта хԝә бьди Йаһоԝа.

3. Әԝед кӧ хԝә тʹәсмили Йаһоԝа дькьн, кʹижан кʹәрәма дьстиньн?

³ Дина хԝә бьде, кӧ тә чь кʹәрәм стандийә паши тʹәсмилбуйин у ньхӧмандьна хԝә. Тә әʹмьре хԝә дайә дәсте Йаһоԝа, у ләма тӧ дькари бей дӧдьлибуне бежи: «Хӧдан тʹәви мьн ә, әз натьрсьм, инсане чь ль мьн бькә?» (Зәб. 118:6). Бәле, алийе Хԝәде бьгьри у ԛәбулкьрьна ԝи бьстини, әԝ ԛәдьрәки һәри мәзьн ә.

4, 5. а) Чьрʹа әм хԝәха щабдар ьн бона тʹәсмилбуйина хԝә? б) Һʹәму Мәсиһи рʹасти чь чәтьнайа тен?

⁴ Чаԝа Мәсиһийе ньхӧманди, һәләԛәтийа тә тʹәви Йаһоԝа, де-баве тәва гьредайи нинә. Тӧ хԝәха бона хьлазбуна хԝә щабдар и, һәрге жи тӧ һе тʹәви де-баве хԝә дьжийи. Чьрʹа фәрз ә ве йәке бир нәки? Чьмки тӧ ньзани ахьрийеда тӧйе рʹасти кʹижан щерʹьбандьна бейи. Мәсәлә, һәрге тӧ зарʹ буйи гава һати ньхӧмандьне, паше чахе ида мәзьн дьби, рʹасти щерʹьбандьнед тʹәзә тейи. Ԛизькәкә щаһьл әв йәк ӧса шьровәкьр: «Һәрге зарʹ мәкʹтәбеда кәри тотька кӧ бона рʹожа буйине йә, нәхԝә, әԝ ԝе бина хԝә тәнг нәкә кӧ әԝ Шәʹде Йаһоԝа йә у ләма нахԝә. Ле паши чәнд сала чахе әԝ мәзьн дьбә у хԝәстьна сексуали ԛәԝи дьбә, һьнге әԝ гәрәке ԛә дӧдьли нәбә, ԝәки сафикьрьна лапә баш әԝ ә, кӧ гӧрʹа ԛанунед Йаһоԝа бькә».

⁵ Бәле, тʹәне щаһьл ниньн кӧ рʹасти щерʹьбандьнед тʹәзә тен. Йед мәзьн жи кӧ һатьнә ньхӧмандьне, рʹасти щерʹьбандьнед ӧса һатьнә кӧ нә жи һивийе бун. Бәʹса хәбәре, рʹасти чәтьнайед зәԝащеда тен, проблемед сьһʹәт-ԛәԝатева гьредайи, йан жи хәбатеда. Әм чәнд сали бьн жи, йәкә әме рʹасти чәтьнайа бен, кʹидәреда ԝе лазьм бә амьнийа хԝә Йаһоԝарʹа хԝәй кьн (Аԛуб 1:12-14).

6. а) Чьрʹа созе кӧ тә дайә Йаһоԝа, найе гӧһастьне? б) Жь Филипи 4:11-13 тӧ чь дькари һин би?

⁶ Сәва кӧ һәр дәрәщада амьн бьмини Йаһоԝарʹа, тӧ гәрәке бир нәки, ԝәки созе кӧ тә дайә Йаһоԝа, найе гӧһастьне. Әв те һʹәсабе кӧ тә Кәсе Һәри бьльндрʹа гот, ԝәки тӧйе тʹьме жерʹа хьзмәт ки, һәрге жи һәвал йан жи де-баве тә хьзмәтийа хԝә бьһельн (Зәб. 27:10). Һʹәму дәрәщада тӧ дькари аликʹарийе жь Йаһоԝа бьстини, ԝәки бьжи ль гора тʹәсмилбуйина хԝә. (Бьхунә Филипи 4:11-13.)

7. Чь те һʹәсабе «бь хоф у тьрс» бона хьлазбуна хԝә бьхәбьтьн?

⁷ Йаһоԝа дьхԝазә тӧ бьби досте ԝи. Ле лазьм ә әве достийе хԝәй ки у бьхәбьти бона хьлазбуна хԝә. Филипи 2:12-да те готьне: «Бона хьлазбуна хԝә бь хоф у тьрс бьхәбьтьн». Әв гьли тенә һʹәсабе кӧ тӧ гәрәке бьфькьри, кӧ чаԝа достийа хԝә у амьнийа хԝә Йаһоԝарʹа хԝәй ки ԝәʹде чәтьнайа. Ле тӧ гәрәке хԝәда баԝәр ниби, ԝәки дькари пе ԛәԝата хԝә ве йәке бьки. Һәла һе хьзмәткʹаред щерʹьбанди жи жь рʹийа рʹаст дәркʹәтьнә. Ле чь дькарә али тә бькә ԝәки бона хьлазбуна хԝә бьхәбьти?

8. Чь те һʹәсабе һинбуна шәхси, у чьрʹа әв йәк фәрз ә?

⁸ Сәва кӧ бьбьнә достед Йаһоԝа, әм гәрәке гӧһ бьдьнә ԝи у тʹәви ԝи хәбәр дьн. Чахе әм шәхси Кʹьтеба Пироз леколин дькьн, ӧса әм гӧһ дьдьнә Йаһоԝа. Әв ӧса жи те һʹәсабе кӧ әм гәрәке Хәбәра Хԝәде у ӧса жи әʹдәбйәтед мәйә сәр һʹиме Кʹьтеба Пироз, бьхуньн у сәр бьфькьрьн. Ӧса әм занәбуне дьстиньн. Ле бир нәкьн кӧ һинбуна Кʹьтеба Пироз ӧса нинә кӧ әзбәри һин би, чаԝа ԝәʹде екзамина. Һинбуна керһати мина ве йәке йә, чахе тӧ тьштәки леколин дьки у тьштед тʹәзә педьһʹәси дәрһәԛа хәйсәт-һʹӧнӧред Йаһоԝа. Һинбуна ӧса ԝе али тә бькә кӧ незики Хԝәде би, у паше әԝ жи ԝе незики тә бә (Аԛуб 4:8).

9. Кʹижан һащәт али тә дькьн һинбуна тәйә шәхсида?

⁹ Тʹәшкиләта Йаһоԝа гәләк һащәт дьдә, кʹижан кӧ дькарьн али тә бькьн һинбуна тәйә шәхсида. Мәсәлә, jԝ.org-да һәйә «Дәрсед Кʹьтеба Пирозва Гьредайи», кӧ рʹеза «Щаһьлада» нә. Жь ԝан дәрса тӧ дькари пебьһʹәси, кӧ жь сәрһатийед Кʹьтеба Пироз тӧ чь дькари һин би. Ӧса жи jԝ.org-да һәнә рʹебәрийед бона леколинкьрьне, бь наве «Чь Һин Дькә Кʹьтеба Пироз?». Әԝ рʹебәри дькарьн али тә бькьн, ԝәки бькарьби дәрһәԛа баԝәрийа хԝә мәрьвед дьнрʹа шьровәки. Һинбуна тәйә шәхсида, ӧса жи дькарә али тә бькә готар бь наве «Щаһьл Дьпьрсьн . . . Чаԝа Әз Дькарьм Хԝәндьна Кʹьтеба Пироз һе Һʹәԝас кьм?». Әв готар жь журнала «Һʹьшйар Бьн!» йа мәһа Нисане йә, сала 2009. Леколинкьрьн у фькьрандьн сәр Хәбәра Хԝәде, роләкә фәрз дьлизьн ԝәки бона хьлазбуна хԝә бьхәбьти. (Бьхунә Бьхунә Зәбур 119:105.)

10. Чьрʹа бона Мәсиһийа дӧа гәләк фәрз ә?

¹⁰ Бь сайа һинбуна шәхси тӧ гӧһ дьди Йаһоԝа, ле бь сайа дӧа тӧ хәбәр дьди тʹәви ԝи. Бона Мәсиһи дӧа гәрәке ритуал нибә, йан жи чаԝа тәлисмә, кʹижан кӧ бона ве йәке йә, сәва һʹәму тьшт тәрʹа ләв бе. Дӧа әв һәйә хәбәрдана реали тʹәви Әʹфьрандаре мә. Йаһоԝа дьхԝазә бьбьһе, кӧ тӧ чь дьхԝази жерʹа бежи. (Бьхунә Филипи 4:6.) Чахе тӧ бона  тьштәки бәрхԝә дькʹәви, Кʹьтеба Пирозда ширәт те дайине кӧ «баре хԝә бьдә Хӧдан» (Зәб. 55:22). Ле тӧ баԝәр дьки кӧ әв ширәт дькарә хут али тә бькә? Бь милйона хушк-бьра һәнә, йед кӧ дькарьн тәрʹа гьли кьн чаԝа әԝе ширәте али ԝан кьрийә. Әԝ дькарә али тә жи бькә!

11. Чьрʹа тӧ гәрәке тʹьме шькьрийе бьди Йаһоԝа?

¹¹ Әм гәрәке тʹәне бона аликʹарийе Йаһоԝарʹа дӧа нәкьн. Кʹьтеба Пироз дьбежә: «Шекьрдар бьн» (Колс. 3:15). Щара әм ӧса дькʹәвьн һʹәйра чәтьнайед хԝә, кӧ кʹәрәмед хԝә бир дькьн. Ләма жи ԝе баш бә кӧ һәр рʹож бьфькьрьн, мәсәлә сәр се тьшта кӧ әм дьшекьриньн, у паше дӧада рʹазибуна хԝә Йаһоԝарʹа бьдьнә кʹьфше. Хушкәкә мәйә щаһьл бь наве Абигаел йа кӧ 12 салийа хԝәда һатә ньхӧмандьне, дьбежә: «Әз дьфькьрьм кӧ жь һәр кәси нава дьнйайеда Йаһоԝа һежайи шькьрийе йә. Әм гәрәке һәр гав жь ԝи рʹази бьн бона һәр пʹешкʹешед кӧ әԝ дьдә мә. Һәрге бал мә тʹәне әԝ тьшт бьминьн бона кʹижана мә Йаһоԝарʹа рʹазибуна хԝә дайә кʹьфше, гәло ԝе чьԛас тьшт бал мә бьминьн?

12, 13. Чьрʹа фәрз ә бьфькьри сәр ԛәнщийа Йаһоԝа хут һьндава хԝә?

¹² Даԝьд Пʹадша гәләк тәнгаси дит. Ле чахе әԝи дәрһәԛа әʹмьре хԝә гьли дькьр, гьлийед ӧса гот: «Тәʹм кьн у бьзаньбьн кӧ Хӧдан ча ԛәнщ ә! Хԝәзи ԝи мәрьви, йе кӧ хԝә дайә бьн сийа Ԝи» (Зәб. 34:8). Әв рʹез дьдә кʹьфше, ԝәки әм дькарьн ԝәʹде чәтьнайа ԛәнщийа Йаһоԝа һьндава хԝә бьвиньн. Чахе әм Кʹьтеба Пироз у әʹдәбйәтед мә дьхуньн, у ӧса жи тенә щьвата, әм педьһʹәсьн дәрһәԛа гәләк сәрһатийа кӧ чаԝа Хԝәде али хьзмәткʹаред хԝә кьрийә, ԝәки жерʹа амьн бьминьн. Чахе тӧ рʹӧһʹанида мәзьн би, тӧ ида хԝәха гәрәке бьвини, кӧ Йаһоԝа ча хут али тә дькә. Ле тә әʹмьре хԝәда сәр хԝә тʹәхмин кьрийә ԛәнщийа Йаһоԝа?

¹³ Һәр Мәсиһи ԛәнщийа Йаһоԝа һьндава хԝә дитийә. Хԝәде мә һәр кәс незики хԝә у Кӧрʹе хԝә кьрийә. Иса гот: «Тʹӧ кәс нькарә бе щәм мьн, һʹәта Баве кӧ әз шандьмә, ԝи бәрбь мьн нәкʹьшинә» (Йуһʹн. 6:44). Гәло тӧ һʹәсаб дьки ԝәки Йаһоԝа хут тӧ незики хԝә кьри? Йан тӧ ӧса дьфькьри: «Йаһоԝа де-баве мьн незики хԝә кьрийә, у әз жи пәй ԝан дьчьм». Ле бир нәкә, кӧ чахе тә хԝә тʹәсмили Йаһоԝа кьр у һати ньхӧмандьне, һьнгева һәләԛәтийа тә тʹәви Йаһоԝа дәстпебу, чь кӧ ԛәдьрәки гәләк мәзьн ә. Кʹьтеба Пироз мәрʹа дьбежә: «Һәгәр йәк Хԝәде һʹьз дькә, әԝ жь алийе ԝива наскьри йә» (1 Корн. 8:3). Тʹьме ԛимәт кә у бьшекьринә щийе хԝә тʹәшкиләта Йаһоԝада.

14, 15. Хьзмәти ча дькарә баԝәрийа тә ԛәԝи кә?

¹⁴ Чахе тӧ дәрһәԛа баԝәрийа хԝә мәрьвед дьнрʹа гьли дьки, һьнге жи тӧ дькари аликʹарийа Йаһоԝа бьвини. Мәсәлә, чахе тӧ хьзмәт дьки йан жи мәкʹтәбеда шәʹдәтийе дьди, әԝ дькарә мерхасийе бьдә тә. Дьбәкә тәрʹа чәтьн ә һәвалед дәрсхана хԝәрʹа шәʹдәтийе бьди, чьмки ньзани әԝана ԝе чь бежьн у хԝә ча бьдьнә кʹьфше. Ле һе чәтьн ә дәрһәԛа баԝәрийа хԝә гьли ки бәр гәләк мәрьва, нә кӧ бәр йәке. Ле чь дькарә али тә бькә?

¹⁵ Пешийе бьфькьрә кӧ тӧ чьрʹа баԝәрийа хԝәда дӧдьли нини. Һәрге jԝ.org-да сәр зьмане тә һәйә рʹебәрийед бона һинбуне кӧ бона щаһьла йә, әԝан рʹебәрийа бьдә хәбате. Әԝ рʹебәри ԝе али тә бькьн, ԝәки бьфькьри кӧ чьрʹа  тӧ баԝәрийа хԝәда дӧдьли нини у ча йед дьнрʹа баԝәрийа хԝә шьровәки. Чахе тӧ баԝәрийеда ԛәԝи би у рʹьнд һазьр би, тӧйе хԝәха бьхԝази бь мерхаси дәрһәԛа Йаһоԝа шәʹдәтийе бьди (Йерәм. 20:8, 9).

16. Чь дькарә мерхасийе бьдә тә кӧ дәрһәԛа баԝәрийа хԝә хәбәр ди?

¹⁶ Һәрге жи тӧ рʹьнд һазьр и, дьбәкә һьнге жи тәрʹа чәтьн ә дәрһәԛа баԝәрийа хԝә хәбәр ди. Хушкәкә мә кӧ 18 сали йә, у 13 салийа хԝәда һатийә ньхӧмандьне дьбежә: «Әз заньм әз чь баԝәр дькьм, ле йәкә щара мьнрʹа чәтьн ә фькьред хԝә бь гьлийа бежьм». Гәло әԝе әԝ чәтьнайи ча сафи кьр? Әԝ дьбежә: «Әз нә офисйали у аза хәбәрдане дәстпедькьм. Һәвалдәрсханед мьн гәләк аза хәбәр дьдьн дәрһәԛа ишед хԝә. У әз жи гәрәке ӧса бькьм. Ләма жи әз щара чахе тьштәки гьли дькьм, хәбәрданеда гьлики ӧса бәррʹа давежьм мәсәлә, ‹Ве рʹоже мьн Кʹьтеба Пироз һин дькьр, у . . . Паши ве йәке әз вәдьгәрʹьм гьлийед хԝә. Рʹаст ә дьбәкә хәбәрдана мьн рʹастә-рʹаст дәрһәԛа Кʹьтеба Пироз нибә жи, ле щара йед дьн дьхԝазьн пебьһʹәсьн кӧ әз ча Кʹьтеба Пироз һин дькьм. Щара дәрһәԛа ве йәке пьрса жи дьдьнә мьн. Әз чьԛас зәʹф метода ӧса дьдьмә хәбате, һаԛас хәбәрдан һеса дьбә мьнрʹа, у дьле мьн гәләк ша дьбә».

17. Диса чь дькарә али тә бькә аза хәбәр ди дәрһәԛа баԝәрийа хԝә?

¹⁷ Чахе тӧ бь ԛәдьр и һьндава мәрьва у бона ԝан хәм дьки, әԝана ԝе һьн ԛәдьре тә, һьн жи ԛәдьре баԝәрийа тә бьгьрьн. Оливиа кӧ 17 сали йә, чахе зарʹ бу һатә ньхӧмандьне. Әԝе гот: «Тʹьме тьрса мьн һәбу кӧ һәрге әз хәбәрданеда Кʹьтеба Пироз бьдьмә хәбате, ԝе мьн ча фанатик һʹәсаб кьн». Ле паше Оливиайе фькьред хԝә гӧһаст. Әԝ дәԝса кӧ һʹьш-аԛьле хԝә бьдә сәр тьрса хԝә, әԝ фькьри: «Гәләк щаһьл дәрһәԛа Шәʹдед Йаһоԝа тьштәки ньзаньн. Тʹәне әм ьн Шәʹдә, рʹасти кʹижана әԝана тен. Ләма әԝ йәк кӧ әм ча хԝә дьдьн кʹьфше, ԝе һʹӧкӧм бә сәр ԝе йәке кӧ әԝана ча ԝе гӧһ бьдьнә мә. Һәрге әм шәрм дькьн у дьтьрсьн дәрһәԛа баԝәрийа хԝә бежьн, йан жи хәбәрданеда дькӧльн, гәло әԝана ԝе чь бьфькьрьн? Әԝана ԝе бьфькьрьн, кӧ әм шәрм дькьн ԝәки әм Шәʹдед Йаһоԝа нә. Һәла һе жи әԝана дькарьн һерс тʹәви мә хәбәр дьн, һәрге әм гьлийед хԝәда дӧдьли бьн. Ле һәрге әм баԝәрийа хԝәда дӧдьли ниньн у аза тʹәви ԝан хәбәр дьдьн, әԝана ԝе һе ԛәдьре мә бьгьрьн».

18. Чь те һʹәсабе кӧ бьхәбьти бона хьлазбуна хԝә?

¹⁸ Чаԝа мә дит, бона хьлазбуна хԝә бьхәбьтьн, әԝ щабдарийа мәзьн ә. Сәва ве йәке әм гәрәке Хәбәра Хԝәде бьхуньн у сәр бьфькьрьн, дӧа бькьн Йаһоԝарʹа, у бьфькьрьн дәрһәԛа кʹәрәмед кӧ Йаһоԝа хут дьдә мә. Һәрге тӧ ԝан тьштада пешда һәрʹи, тӧйе дьһа баԝәр би, ԝәки Йаһоԝа досте тә йә. Әԝ йәк ԝе тә һелан кә кӧ бь мерхаси хәбәр ди дәрһәԛа баԝәрийа хԝә. (Бьхунә Зәбур 73:28.)

19. Чьрʹа һежа йә кӧ тӧ бона хьлазбуна хԝә бьхәбьти?

¹⁹ Иса гот: «Һәгәр йәк дьхԝазә ль пәй мьн бе, бьра хԝә инкʹар кә, стуна щәфайе хԝә һьлдә у ль пәй мьн бе» (Мәт. 16:24, ДТʹ). Әʹйан ә кӧ тʹәсмилбуйин у ньхӧмандьн, әв борщдарийа тә йә, чьмки тӧ Мәсиһи йи. Бь сайа ве йәке тӧ дькари беһʹәсаб кʹәрәма бьстини ньһа, у дьнйа тʹәзәда жийина һʹәта-һʹәтайе. Бәле, мәʹнийед тә һәнә ԝәки бона хьлазбуна хԝә бьхәбьти!