ЧАХЕ мәрьв һьндава һәвда ширьн ьн, әԝ йәк ԝана гәш дькә у дьлбинийе дьдә ԝан. Әм чахе дьвиньн кӧ кәсәк бона мә хәм дькә, әм гәләк дьшекьриньн. Бәле, дьле һәр кәси хԝәш те чахе һьндава ԝида ширьн у һʹәйф ьн. Ле гәло әм ча дькарьн әви һʹӧнӧре бәдәԝ нав хԝәда пешда биньн?

Мәрьве бь ԝи һʹӧнӧри дькʹәвә һʹәйра һʹалхԝәшийа мәрьва, у әԝе йәке пе хәбәрдан у шьхӧлед хԝә дьдә кʹьфше. Бәле, әԝ һʹӧнӧр пе шьхӧла те кʹьфше, нә кӧ тʹәне чахе мәрьв мәʹрифәт ә у бь ԛәдьр ә тʹәви мәрьва. Һʹьзкьрьна мәзьн у дьлшәԝати дькʹәвә нава ԝи һʹӧнӧри. У һе зедә, әԝ һʹӧнӧр дькʹәвә нава бәре рʹӧһʹе Хԝәдейи пироз, кʹижан кӧ Мәсиһи гәрәке нав хԝәда пешда биньн (Галт. 5:22, 23). Демәк, әм гәрәке ширьнайе бьдьнә кʹьфше, ләма ԝәрә әм леколин бькьн кӧ чаԝа Йаһоԝа у Кӧрʹе ԝи, әԝи һʹӧнӧри дьдьнә кʹьфше, у чаԝа әм дькарьн чʹәʹв бьдьнә ԝан.

Ширьнайи ԛәнщийева * гьредайи йә, у Йаһоԝа һьндава һʹәмуйада ԛәнщ ә, һьндава «бешекьра» у «нәрʹаста» жи (Луԛа 6:35). Бәʹса хәбәре, Йаһоԝа «тәʹва хԝә дәрдьхә һьн сәр ԛәнща, һьн жи сәр хьраба у баране дьбаринә һьн сәр рʹаста, һьн жи сәр нәрʹаста» (Мәт. 5:45). Бәле, һәла һе әԝед кӧ Йаһоԝа ԛәбул накьн ча Әʹфьрандаре хԝә, пе чекьрьнед дәсте ԝи дьжин у әʹмьре хԝәрʹа ша дьбьн.

Әм дьвиньн кӧ Йаһоԝа әԝ һʹӧнӧр да кʹьфше һьндава Адәм у Һеԝайеда. Чахе ԝана гӧнә кьр, паши ве йәке «бәлгед һежире дьрутьн у пе хԝә сьтʹар кьрьн». Ле Йаһоԝа заньбу ԝәки ԝанрʹа кʹьнщәкә дьн лазьм ә, чьмки әԝана гәрәке жь Щьнәте дәр бьжитана, кʹидәре бь «стьрийа у дьрʹийа» тʹьжә бу. Ләма Йаһоԝа жь ширьнайи у дьлованийа хԝә, ԝанрʹа «кʹьнщед чʹәрмин чекьрьн у ль ԝан кьрьн» (Дәстп. 3:7, 17, 18, 21).

Рʹаст ә Йаһоԝа һʹәйф ә һьндава «ԛәнща, һьн жи . . . хьраба», ле илаһи әԝ ширьн ә һьндава хьзмәткʹаред хԝәйи амьн. Мәсәлә, ԝәʹде Зәкәрйа пʹехәмбәр, мьлйакʹәтәк бәрхԝә дькʹәт чахе дьдит кӧ авакьрьна пʹарьстгәһа Оршәлиме һатийә сәкьнандьне. Йаһоԝа рʹьнд гӧһ да ԝи мьлйакʹәти, у бь «гьлийед ширьн у дьлбини» щаба ԝи да (Зәкәр. 1:12, 13, ДТʹ). Йаһоԝа һьндава Елйас жи ширьнайи да кʹьфше. Ԝәʹдәки әԝ пʹехәмбәр ӧса дьлшькәсти бу, кӧ һәла һе жи жь Йаһоԝа мьрьн хԝәст. Йаһоԝа хәм кьр бона Елйас, у мьлйакʹәте хԝә шандә бал ԝи сәва ԝи ԛәԝи кә. Хенщи ве йәке, Хԝәде ԝи шьданд гава гот кӧ әԝ тʹәне нинә. Паши ве йәке ча Елйас әԝ гьлийед ширьн бьһист у аликʹарийа лазьм станд, әԝи ида дькарьбу шьхӧле хԝә бинә сери, кʹижан кӧ Хԝәде  дабу ԝи (1 Пʹадш. 19:1-18). Ле гәло нава хьзмәткʹаред Хԝәдеда, кʹе әԝ һʹӧнӧр лапә баш да кʹьфше?

Чахе Иса сәр әʹрде хьзмәт дькьр, әԝ бь ширьнайа хԝә нас бу у хәм дькьр бона мәрьва. Әԝ тʹӧ щар сәрт у һʹӧкӧмһʹьз нибу. Жь дьлшәԝатийа хԝә гот: «Ԝәрьнә щәм мьн һʹәмуйед ԝәстийайи у баргьран у әзе рʹьһʹәтийе бьдьмә ԝә. . . . Чьмки нире мьн рʹьһʹәт ә» (Мәт. 11:28-30). Мәрьва жи чахе әԝ һʹӧнӧр нав ԝида дьдитьн, пәй ԝи дьчун кʹӧда жи әԝ дьчу. Иса гӧне хԝә ԝана дьани, хԝарьн дьда ԝан, йед нәхԝәш у сәԛәт ԛәнщ дькьрьн у «гәләк тьшт» дәрһәԛа Баве хԝә ԝана һин дькьр (Марԛ. 6:34; Мәт. 14:14; 15:32-38).

Иса жь мәрьва фәʹм дькьр у һәр тьшт һьлдьда һʹәсаб. Әԝ йәк дьдә кʹьфше, ԝәки әԝ һьндава ԝанда ширьн бу. Фьрԛи тʹӧнә жерʹа һеса бу йан на, әԝи һʹәмушк ԛәбул дькьрьн, йед кӧ дьлсах бун у жь ԝи аликʹари дьхԝәстьн (Луԛа 9:10, 11). Бәʹса хәбәре, чахе жьнька кӧ сәр хуне вәбьбу у нәтʹәмьз дьһатә һʹәсабе, дәсте хԝә да кʹьнще ԝи, чьмки дьхԝәст ԛәнщ буйа, Иса бона ве йәке ле сущдар нәкьр (Ԛан. Кʹаһ. 15:25-28). Гӧне ԝи ԝе жьньке һат кӧ 12 сала дьчәрчьри жь нәхԝәшийа хԝә, у әԝи жерʹа гот: «Әʹвде! Баԝәрийа тә тӧ ԛәнщ кьри. Бь хер у сьламәт һәрʹә у жь еша хԝә ԛәнщ бә» (Марԛ. 5:25-34). Рʹасти жи әԝ кьре чьԛас дьлованийе дьдә кʹьфше!

Мә жь мәсәлед жоре дит, ԝәки ширьнайи пе шьхӧла әʹйан дьбә. Иса мәтʹәлока дәрһәԛа мәрьве Самәрида, әԝ йәк зәлал да кʹьфше. Рʹаст ә Самәрийа у Щьһуйа һәв һʹьз нәдькьрьн, ле әԝ мәрьве Самәри гӧне хԝә мәрьве Щьһу ани, чьмки ԛачаха әԝ тʹалан кьрьбун, кʹӧта бун у сәр рʹе ԝи нивкӧшти һиштьбун. Әԝ Самәри ширьнайи да кʹьфше пе шьхӧле хԝә. Әԝи бьринед ԝи мерьки дәрман кьр у ԝи бьрә меванхане. Паше әԝи пʹәрә да хԝәйе меванхане сәва мьԛати ԝи мерьки бә у гот кӧ чь жи зедә сәр ԝи хәрщ кә әԝе ԝан пʹәра бьдә ԝи (Луԛа 10:29-37).

Ширьнайи пе хәбәрдан у гьлийед дьлдайине жи әʹйан ә. Кʹьтеба Пироз дьбежә, ԝәки «кӧл-дәрд дьле мерьв дьһʹәлинә», ле паше зедә дькә готьнәкә ширьн «ԝи ша дькә» (Мәтʹлк. 12:25). Бәле, чахе әм һьндава мәрьвада ширьн у һʹәйф ьн, ӧса әм дькарьн дьл бьдьнә ԝан у али ԝан бькьн кӧ гәш бьн. Гьлийед мәйи ширьн ԝе нишан кьн, ԝәки әм бона ԝан хәм дькьн. Әԝ йәк ԝе али ԝан бькә бәр тәнгасийа тәйах кьн (Мәтʹлк. 16:24).

Әм «дьлԛе Хԝәдеда» һатьнә әʹфьрандьне, ләма жи һʹәму мәрьв дькарьн әԝи һʹӧнӧри нав хԝәда пешда биньн (Дәстп. 1:27). Бәʹса хәбәре, Йулйо кӧ сәроке ордийа Рʹоме бу, йе кӧ ԛәрәԝьлийа Паԝлос дькьр Рʹомеда, «ԛәнщи Паԝлосрʹа кьр, изьн да кӧ һәрʹә щәм достед хԝә, ԝәки бона ԝи хәм бькьн» (Кʹар. Шанд. 27:3). Һьнә ԝәʹдә шунда, бьнәлийед гьрава Малтайе гәләк ԛәдьр-һӧрмәт данә кʹьфше һьндава Паԝлос у йед кӧ тʹәви ԝи бун ԝәʹде гәми һурдәхԝәши бу. Бьнәлийед гьраве бона ԝан «агьр вехьстьн» у бь дьл у щан ԝана ԛәбул кьрьн (Кʹар. Шанд. 28:1, 2). Әԝ кьре ԝан рʹасти жи һежайи пʹайа йә. Ле әԝи һʹӧнӧри әм гәрәке нә тʹәне щарәке әʹйан кьн, ле һәр гав.

Сәва бь тʹәмами дьле Хԝәде ша кьн, әм гәрәке әԝи һʹӧнӧри хԝәрʹа бькьнә хәйсәт. Ле әԝ йәк һеса нинә, у һәнә тьштед ӧса кӧ ве йәкеда рʹе мә дьгьрьн. Щара дьбәкә әм хԝә дьгьрьн, чьмки шәрмокә нә, йан хԝәда баԝәр ниньн, йан рʹасти пәйкʹәтьна тен, йан  жи хԝәһʹьзийе дьдьнә кʹьфше. Ле һәрге әм итʹбарийа хԝә рʹӧһʹе пироз биньн, у чʹәʹв бьдьнә Йаһоԝа, әме дина хԝә нәдьнә сәр ԝан чәтьнайа у һьндава мәрьвада ширьн бьн (1 Корн. 2:12).

Ле һун дькарьн тедәрхьн, кʹидәре ԝәрʹа лазьм ә һе зедә ширьнайе бьдьнә кʹьфше? Әм гәрәке пьрсед ӧса бьдьнә хԝә: «Гәло әз бь дьлшәԝати гӧһ дьдьмә мәрьва? Әз зу тʹәхмин дькьм кʹерʹа аликʹари лазьм ә? Кʹәнге щара пашьн әз һьндава кәсәки ширьн бумә, йед кӧ нәфәред мьн у һәвалед мьни незик ниньн?» Паши ве йәке, әм дькарьн нете хԝәрʹа дайньн, мәсәлә һе зедә пебьһʹәсьн дәрһәԛа мәрьвед дор бәре хԝә, илаһи йед кӧ щьвата мәда ньн. Ԝи щурʹәйи әме дина хԝә бьдьнә дәрәща ԝан у тедәрхьн кӧ әԝана чьда һʹәԝщә нә. Паше, ида һьндава ԝанда ширьнайе бьдьнә кʹьфше, ӧса чаԝа кӧ мәйе хԝәха бьхԝәста кӧ һьндава мәда буна (Мәт. 7:12). Һәрге һун аликʹарийе жь Йаһоԝа дьхԝазьн сәва әви һʹӧнӧри бьдьнә кʹьфше, ахьрийеда, әԝ ԝе әʹсә ԝә кʹәрәм кә (Луԛа 11:13).

Чахе Паԝлосе шанди рʹез кьр, кӧ чь ԝи әʹйан дькә ча хьзмәткʹаре Хԝәде, әԝи һьнге бәʹса «ширьнайе» жи кьр (2 Корн. 6:3-6). Мәрьва дьхԝастьн тʹәви Паԝлос незик буна, чьмки ԝана дьдит кӧ әԝ бона ԝана хәм дькә, у әԝ йәк әԝи пе хәбәрдан у кьред хԝә дьда кʹьфше (Кʹар. Шанд. 28:30, 31). Һәрге әм жи әԝи һʹӧнӧри бьдьнә кʹьфше, мәрьв ԝе бьхԝазьн тʹәви мә һәвалтийе бькьн. Һьн жи һәрге әм һьндава ԝан жи йед кӧ мьԛабьли мә дәртен, һʹәйф ьн, әме бь ве йәке дьле ԝан нәрм кьн у әԝана ԝе кем һерс кʹәвьн (Рʹом. 12:20). У ԝәʹдә дәрбаз бә дьбәкә әԝана бьхԝазьн дәрһәԛа мьзгинийа жь Кʹьтеба Пироз пебьһʹәсьн.

Чахе әʹрд бьбә щьнәт, беһʹәсаб мьри ԝе жь мьрьне рʹабьн. Бешьк, әԝана ԝе гәләк ша бьн гава һьндава хԝәда, дьбәкә щара пешьн, ԛәнщи у ширьнайа һʹәлал тʹәхмин кьн. Жь рʹазибуне әԝана жи ԝе бьхԝазьн һьндава йед майинда ӧса бьн. Ле һәр кәсе кӧ нәхԝазьбә әви һʹӧнӧри бьдә кʹьфше у рʹе йед майин жи бьгьрә, ԝе бьн сәрԝертийа Пʹадшатийа Хԝәдеда һʹәта-һʹәтайе нәжи. Ле әԝед кӧ һьндава һәвдӧда бь һʹьзкьрьн у ширьн ьн, ԝе алийе Хԝәдеда бенә ԛәбулкьрьне у жийина һʹәта-һʹәтайе бьстиньн (Зәб. 37:9-11). Рʹасти жи һьнге әʹмьр ԝе чьԛас хԝәш, бехоф у рʹьһʹәт бә! Ле һʹәта әԝ ԝәʹдә бе, әм ча дькарьн иро кʹаре бьстиньн, һәрге әԝи һʹӧнӧри хԝәрʹа бькьнә хәйсәте хԝә?

«Мәрьве рʹәʹм ԛәнщийе ль хԝә дькә» (Мәтʹлк. 11:17). Бәле, мәрьв дьхԝазьн незики ԝан бьн, йед кӧ һьндава мәрьвада ширьн у рʹәʹм ьн. Иса гот: «Бь чь чапе һун бьпивьн, бь ԝе жи ԝәрʹа ԝе бе пиване» (Луԛа 6:38). Бәле, мәрьве бь ви хәйсәт-һʹӧнӧри һеса дькарә һәвала хԝәрʹа бьвинә у һәвалтийе хԝәй кә.

Паԝлосе шанди ширәт да хушк-бьред щьвата Әфәсида, ԝәки «һәврʹа ширьн у дьлшәԝат бьн, ль һәв бьбахшиньн» (Әфәс. 4:32). Рʹасти жи щьват кʹарәкә мәзьн дьстинә чахе гьшк һьндава һәвда дьлшәԝат ьн у аликʹарийе дьдьнә һәвдӧ. Мәрьвед ԝи щурʹәйи ԝе гьлийед сәрт, беһӧрмәт, у гьлийед кӧ дьле мәрьва дешиньн, нәбежьн. Әԝ мәрьв ԝе тʹӧ щар гәвәстийе бәла нәкьн, ле дәԝсе пе гьлийед хԝә али хушк-бьра бькьн (Мәтʹлк. 12:18). Бь сайа ве йәке, щьват рʹӧһʹанида гәш дьбә.

Бәле, ширьнайи пе гьли у шьхӧла әʹйан дьбә. Чахе әм һьндава мәрьвада ширьн ьн, әм чʹәʹв дьдьнә хәйсәте Йаһоԝа Хԝәде (Әфәс. 5:1). Ԝи щурʹәйи әме щьвата хԝә ԛәԝи кьн у мәрьва бәрбь рʹастийе бькʹьшиньн. Ԝәрә әм гьшк ӧса нас бьн, ча мәрьве ширьн!