Иса еваре пешийа мьрьна хԝә шагьртед хԝә ширәт кьр, ԝәки нава хушк-бьрада хԝә бьльнд нәкьн у наве хԝә нәгәрʹьн. Әԝи ԝанрʹа гот: «Пʹадшайед мьләта щьмәʹта хԝә бьндәст дькьн у әԝед сәр ԝан һʹӧкӧм дькьн херхԝазед ԝан тенә готьне. Ле һун ӧса нәбьн» (Луԛа 22:25, 26).

Ле гәло кʹе бун әԝ Херхԝаз дәрһәԛа кʹижана Иса гот? Ньвисаред сәр тьштед бәре, сәр пʹәре пол у ньвисаред дьн, әʹйан дькьн ԝәки бал щьмәʹта Йунани у Рʹомайи әʹдәт бу кӧ һʹӧрмәте бьдьнә меред навдар у сәрԝера, у ԝанрʹа дьготьн «Әуергетес», демәк Херхԝаз. Әԝ мәрьв ӧса һʹӧрмәт дькьрьн, чьмки әԝана бона щьмәʹте тьштед баш дькьрьн.

Һьнге сәр гәләк пʹадша жи дьготьн Херхԝаз. Нава ԝанда сәрԝеред Мьсьре бун, йед кӧ әʹйан бун ча Птолемейе III Әуергетес (ԝ.247- 222 Б.Д.М.) у Птолемейе VIII Әуергетес II (ԝ. 147-117 Б.Д.М.). Сәрԝеред Рʹоме Ийули Сезар (48-44 Б.Д.М.) у Аугустос жи (31 Б.Д.М.–14 Д.М.) ӧса нав дькьрьн, чаԝа кӧ Һеродәсе Мәзьн, пʹадше Щьһустане. Ча те кʹьфше дьбәкә Һеродәс әԝ һӧрмәт хԝәрʹа ԛазанщ кьр, чьмки ԝәʹде хәлайе щьмәʹтерʹа гәньм у кʹьнщ бәла кьрьбу.

Гьлийед Адолф Дисмене Алмани, кӧ зандаре Кʹьтеба Пироз ә, нишан дькьн кӧ әԝ сәрнав «Херхԝаз» гәләк бәлабуйи бу. Әԝи гот: «Һәрге һьнә ԝәʹдә башԛә кьн сәва ньвисаред бәре бьньһерʹьн, һуне бьвиньн кӧ сәд щари зедәтьр әв сәрнав һатийә хәбьтандьне».

Ԝәки ӧса нә, Иса чь дьхԝәст бьгота чахе шагьртед хԝәрʹа гот: «Ле һун ӧса нәбьн»? Гәло әԝи дьхԝәст, ԝәки әԝана тʹәне бона хԝә бьфькьрьн, у бона һʹалхԝәшийа мәрьвед дор бәре хԝә хәм нәкьн? Тʹӧ щар на. Бь рʹасти Иса дьхԝәст, ԝәки әԝана фәʹм кьн, кӧ чь гәрәке ԝана һелан кә сәва әԝана мәрʹд бьн.

Ԝәʹде Исада мәрьвед дәԝләти дьхԝәстьн наве баш хԝәрʹа ԛазанщ кьн, ләма жи пʹәрә дьдан бона щурʹә-щурʹә шоу у листька, авакьрьна парка у пʹарьстгәһа, у диса бона тьштед дьн. Ле ԝана ӧса дькьр, чьмки нета ԝан әԝ бу, кӧ мәрьв ԛәдьр-һʹӧрмәте бьдьнә ԝан, наве ԝан бьльнд бә, йан жи сәва щьмәʹт ԝәʹде бьжартьна дәнг бьдә ԝан. Кʹьтебәкеда те готьне: «Рʹаст ә әԝ кьред ԝан алийе ԝанда бь рʹасти мәрʹдани йә, ле йәкә ԝана гәләк щар ӧса дькьр, сәва политикайеда пешда һәрʹьн». Иса дьхԝаст, ԝәки шагьртед ԝи жь ве ньһерʹандьне у хԝәһʹьзийе дур бьн.

Чәнд сал дәрбаз бу, Паԝлосе шанди жи да кʹьфше, ԝәки гәләк фәрз ә бь нетед баш мәрʹданийе бьдьнә кʹьфше. Әԝи хушк-бьред Корьнтʹирʹа ньвиси: «Дьле һәр кәсирʹа чьԛас дәрбаз дьбә, бьра һаԛаси жи бьдә, нә кӧ бьдә ле дьле ԝи пәй бә йан бь борщдарийе бә, чьмки Хԝәде йе бь дьл у әшԛ дьдә һʹьз дькә» (2 Корн. 9:7).