1, 2. а) Чь йә бона мә тьште лапи ԛимәт? б) Әм кʹижан рʹастийа ԛимәт дькьн, у чьрʹа? (Бьньһерʹә шьклен әʹԝльн.)

ӘʹМЬРЕ ԝәда тьште лапи ԛимәт чь йә? Һуне ԝи тьшти тʹәви тьштәки нә ӧса ԛимәт, бьгӧһезьн? Хьзмәткʹаред Йаһоԝа щаба ве пьрсе дькарьн һеса бьдьн. Тьште мәйи лапи ԛимәт, әԝ һәйә һәләԛәтийа мә тʹәви Йаһоԝа, кʹижан кӧ әм тʹәви тʹӧ тьшти нагӧһезьн. Әм ӧса жи гәләк ԛимәт дькьн рʹастийа жь Кʹьтеба Пироз, чьмки әм бь сайа ве незики Баве хԝәйи әʹзмана дьбьн (Колс. 1:9, 10).

² Бьфькьрьн кӧ Йаһоԝа Мамостайе Мәзьн чь мә һин дькә бь сайа Хәбәра хԝә, демәк Кʹьтеба Пироз! Әԝ мәрʹа наве хԝә әʹйан дькә, кʹижан кӧ гәләк фәрз ә, у ӧса жи дәрһәԛа һʹӧнӧред хԝәйи баш. Әԝ ӧса жи мәрʹа дьбежә кӧ чьԛас мә һʹьз дькә, чьмки Кӧрʹе хԝәйи тайе тʹәне Иса, бона мә бәрва да. Йаһоԝа ӧса жи мә һин дькә дәрһәԛа Пʹадшатийа Мәсиһити. Хенщи ве йәке, әԝ соз дьдә Мәсиһийед бьжарти, кӧ ԝе жийина сәр әʹзмана бьдә ԝан, ле «пәзед . . . дьн» жийина Щьнәтеда сәр әʹрде (Йуһʹн. 10:16). Әԝ мә ширәт дькә кӧ әм ча гәрәке бьжин. Әм ԝан рʹастийа гәләк ԛимәт дькьн, чьмки әԝана мә һе  незики Әʹфьрандаре мә дькьн у әʹмьре мә бәхтәԝар дькьн.

3. Гәло сәва рʹастийе ԛазанщ кьн, пʹәрә лазьм ә?

³ Йаһоԝа Хԝәдейе дәствәкьри йә. Әԝ ԛәнщийе дькә бона ԝан, йед кӧ рʹастийе дьгәрʹьн. Йаһоԝа һәла һе жи Кӧрʹе хԝәйи дәлал беһәԛ, ча пʹешкʹеш бона мә бәрва да. Хԝәде жь мә пʹәра нахԝазә, ԝәки әм рʹастийе ԛазанщ кьн. Биньн бира хԝә, чахе мәрьвәки бь наве Шьмһʹун, дьхԝәст пʹәрә бьда Пәтрусе шанди, ԝәки һʹӧкӧм бьдә ԝи, сәва әԝ бькарьбә рʹӧһʹе пироз бьдә мәрьва. Пәтрус жерʹа шьровәкьр, ԝәки әԝ йәк нәрʹаст ә у готе: «Зиве тә бьра тʹәви тә бьтʹәрʹьбә! Тә тʹьре пʹешкʹеша Хԝәде пʹәрәти те стандьне!» (Кʹар. Шанд. 8:18-20). Ԝәки ӧса нә, чь те һʹәсабе «рʹастийе бькʹьрʹьн»?

4. Ве готареда, әме дәрһәԛа рʹастийе чь пебьһʹәсьн?

⁴ Бьхунә Мәтʹәлок 23:23. Сәва әм Хәбәра Хԝәдеда рʹастийе бьгәрʹьн, лазьм ә һьнәки щәфе бькʹьшиньн. Әм ӧса жи гәрәке һазьр бьн тьшта ԛӧрбан кьн, ԝәки рʹастийе ԛазанщ кьн. Чаԝа Мәтʹәлокда те готьне, чахе әм рʹастийе «дькʹьрʹьн», демәк ԛазанщ дькьн, әм гәрәке фәсал бьн, ԝәки «нәфьрошьн», демәк ӧнда нәкьн. Ԝәрә әм ньһа шеԝьр кьн, чь те һʹәсабе рʹастийе «бькʹьрʹьн» у пебьһʹәсьн баһе ԝе чьԛас ә. Әԝ шеԝьркьрьн ԝе али мә бькә, ԝәки һе зедә рʹастийе бьшекьриньн у һәр тьшти бькьн сәва кӧ ве «нәфьрошьн». Ԝи щурʹәйи әме фәʹм бькьн, ԝәки әԝ рʹастийа кӧ әм жь Хԝәде дькʹьрʹьн, жь һʹәму ԛӧрбанкьрьна ԛимәттьр у четьр ә.

5, 6. а) Ча әм дькарьн бе пʹәрә рʹастийе бькʹьрʹьн? б) Рʹасти чь кʹаре мәрʹа тинә?

⁵ Тьште кӧ бе пʹәрә йә жи, йәкә дькарә баһе ԝе һәбә. Хәбәра Ибрани кӧ Мәтʹәлок 23:23-да һатийә ԝәлгәрʹандьне «бькʹьрʹә», дькарә ӧса жи бе һʹәсабе «ԛазанщ кә». Әԝ һәрдӧ хәбәр жи дьдьнә кʹьфше, ԝәки лазьм ә тьштәки бькьн, йан жи тьштәки жь хԝә кем кьн, сәва кӧ ве ԛазанщ кьн. Әве йәке әм пе мәсәла банана дькарьн һе рʹьнд фәʹм кьн. Бәʹса хәбәре, дькʹанеда әʹлам дькьн, ԝәки банана дькарьн бе пʹәрә һьлдьн. Фәʹмдари йә, банан ԝе хԝәха бь хԝә нәйенә сәр сьфьра мә. Әм гәрәке һьнәки щәфе бькʹьшиньн, у һәрʹьн дькʹане ԝан банана һьлдьн. Ӧса жи сәва әм рʹастийе бькʹьрʹьн, рʹаст ә мәрʹа пʹәрә нәлазьм ә, ле әм гәрәке алийе хԝәда тьштәки бькьн.

⁶ Бьхунә Ишайа 55:1-3. Гьлийед Йаһоԝа жь ԝан рʹеза әʹйан дькьн, кӧ чь те һʹәсабе рʹастийе бькʹьрʹьн. Ван рʹезада, Йаһоԝа хәбәра хԝә бәрамбәри аве, шир у шәраве дькә. Рʹастийа хәбәра Хԝәде, мина ава сар у тʹәмьз, мә гәш дькә. Ӧса жи чаԝа шир ԛәԝате дьдә мә у али зарʹа дькә, ԝәки мәзьн бьн, гьлийед Йаһоԝа жи мә ԛәԝи дькьн у али мә дькьн рʹӧһʹанида мәзьн бьн. Хәбәред Йаһоԝа ӧса жи мина шәраве нә. Ле чь щурʹәйи? Кʹьтеба Пирозда дәрһәԛа шәраве те готьне, ԝәки әԝ дьле мәрьв ша дькә (Зәб. 104:15). Ләма жи чахе Йаһоԝа дьбежә, ԝәки «шәраве бькʹьрʹьн», бь ве йәке әԝ мә дьдә баԝәркьрьне, ԝәки һәрге әм анәгори гьлийед ԝи бьжин, әме шабуне бьстиньн (Зәб. 19:8). Рʹасти жи чьԛас бь һʹәԝас те шьровәкьрьне, кӧ әм чь кʹаре дьстиньн, чахе гьлийед Хԝәде педьһʹәсьн у әʹмьре хԝәда дьдьнә хәбате! Ле ньһа ԝәрә әм пенщ тьшта шеԝьр кьн, кʹижана дьбәкә әм гәрәке ча һәԛ бьдьн, сәва рʹастийе бькʹьрʹьн.

7, 8. а) Чьрʹа лазьм ә әм ԝәʹдә хәрщ кьн, сәва рʹастийе бькʹьрʹьн? б) Ԛизькәкә щаһьл һазьр бу чь һәԛ бьдә, сәва рʹастийе бькʹьрʹә, у әԝе сәва ве йәке чь кʹар станд?

⁷ Ԝәʹдә. Һәр кәс ԝәʹдә ча һәԛ дьдә, сәва рʹастийе бькʹьрʹә. Бәле, ԝәʹдә лазьм ә сәва  мьзгинийа Пʹадшатийе бьбьһен, Кʹьтеба Пироз у әʹдәбйәтед сәр һʹиме Кʹьтеба Пироз бьхуньн, һинбуна шәхси дәрбаз кьн, һазьр бьн бона щьвате у бен сәр щьвате. Әм гәрәке «дәст бьдьнә бәр ԝәхт», демәк ԝәʹде хԝә кем хәрщ кьн сәр тьштед нәфәрз. (Бьхунә Әфәси 5:15, 16.) Ле гәло чьԛас ԝәʹдә мәрʹа лазьм ә, сәва әм занәбуна рʹаст йа һинкьрьнед Кʹьтеба Пирозә сәрәкә ԛазанщ кьн? Әԝ йәк дәрәщед мәва гьредайи йә. Синор тʹӧнә кӧ әм чьԛас дькарьн дәрһәԛа билани, принсип у шьхӧлед Йаһоԝа пебьһʹәсьн (Рʹом. 11:33). Дәрхьстьна «Бьрща Ԛәрәԝьлийе» йа пешьнда, рʹасти бәрамбәри «кӧлирка бьчʹук» дьбу. Ԝедәре дьһатә готьне: «Тʹәне бь ве кӧлиркәкә рʹастийе, тʹер нәбьн. Һәрге тʹәне кӧлиркәк бәс буйа, Хԝәде һе зедә рʹасти ԝе нәда мә. Кӧлиркед дьн бьгәрʹьн, нәсәкьньн һе зедә тʹоп кьн». Ԝе баш бә әм пьрсе бьдьнә хԝә: «Гәло кӧлиркед мьнә рʹастийе гәләк ьн?». Һәла һе жи гава әм һʹәта-һʹәтайе бьжин, әме тʹьме һе зедә дәрһәԛа Йаһоԝа пебьһʹәсьн. Ле иро гәләк фәрз ә, ԝәки ԝәʹде хԝә бь билани хәрщ кьн, сәва кӧ чьԛас дькарьн һе зедә рʹастийе бькʹьрʹьн. Ԝәрә әм мәсәлед чәнд мәрьва шеԝьр кьн, йед кӧ әԝ йәк кьрьнә.

⁸ Марико, * ԛизькәкә щаһьл кӧ жь Жапонйайе йә, һатә Нийу Йорке, сәва мәкʹтәба косметоложида һин бә. Һьнге әԝ нава ве рʹелигийеда бу, кʹижан Жапонйайеда сала 1959-да пешда һат. Щарәке хушкәкә пешәнг, чахе мал бь мал хьзмәт дькьр, рʹасти Марико һат. Гава Марико дәрһәԛа рʹастийа Кʹьтеба Пироз пеһʹәсийа, әԝ ӧса ша бу, ԝәки хԝәст кӧ әԝ хушк һʹәфтийе дӧ щара тʹәви ԝе һинбуна Кʹьтеба Пироз дәрбаз кә. Рʹаст ә Марико һьн мәкʹтәбеда һин дьбу, һьн жи дьхәбьти, ле йәкә әԝе дәрберʹа дәстпекьр бе сәр щьвата. Әԝе ӧса жи ԝәʹде хԝә бона һесабуне кем хәрщ дькьр, сәва кӧ һе зедә ԝәʹде ԝе бьминә, ԝәки дәрһәԛа Йаһоԝа дьһа зәʹф пебьһʹәсә. Марико тьштед ԝи щурʹәйи жь хԝә кем дькьр, у әԝе йәке али ԝе кьр рʹӧһʹанида пешда һәрʹә. Саләк шунда әԝ һатә ньхӧмандьне. Паши шәш мәһа, сала 2006-да, әԝ бу пешәнг, у һʹәта иро әԝ ча пешәнг хьзмәт дькә.

9, 10. а) Чахе әм рʹасти дькʹьрʹьн, ча әԝ йәк сәр ньһерʹандьна мә һьндава һәбуке һʹӧкӧм дькә? б) Ԛизькәкә щаһьл чь тʹәрьканд, у әԝ дәрһәԛа ве йәке чь дьбежә?

⁹ Һәбук. Сәва әм рʹастийе бькʹьрʹьн, дьбәкә әм хәбата баш йан жи кариерайе жь дәсте хԝә бәрдьн. Мәсәлә, чахе Иса гази Пәтрус у Әндраԝьсе мәʹсигьр кьр, ԝәки бьбьнә «нечʹирванед мәрьва», ԝана «тʹорʹед хԝә һьштьн» (Мәт. 4:18-20). Фәʹмдари йә, ԝәки гәләкед кӧ рʹастийе педьһʹәсьн, нькарьн хәбата хԝә бьһельн, чьмки ль гора Кʹьтеба Пироз борщдарийа ԝан һәйә (1 Тимтʹ. 5:8). Ле әԝана гәрәке ньһерʹандьна хԝә һьндава пʹәра у һәбуке бьгӧһезьн, у тьште лапи фәрз дайньн сәр щийе пешьн. Иса әԝ йәк зәлал да кʹьфше, гава гот: «Ль сәр дьне хьзне хԝәрʹа нәщьвиньн. . . . Ле хьзне хԝәрʹа ль әʹзмен бьщьвиньн» (Мәт. 6:19, 20). Дина хԝә бьдьнә мәсәла ԛизькәкә щаһьл.

¹⁰ Мариайе жь бьчʹуктайе һʹьз дькьр голф бьлизә. Әԝ чахе ида мәкʹтәбеда һин дьбу ве йәкеда һе щерʹьбанди бу у ахьрийеда әԝе бона ве пешдачуйина хԝә, изьн станд кӧ бе пʹәрә университетеда һин бә. Голф бьбу нета әʹмьре ԝе. Әԝе дьхԝәст бьбә професионала навдар у пе ве йәке дәԝләти бә. Паше Мариайе дәстпекьр һинбуна Кʹьтеба Пироз, у әԝе әԝ рʹастийед кӧ пеһʹәсийа, бь дьл һʹьз кьр. Әԝ ша бу ԝәки рʹастийе али ԝе кьр, у әԝе жийина хԝәда гӧһастьн кьр. Әԝе гьли кьрийә: «Чьԛас зәʹф мьн  ньһерʹандьн у рʹабун-рʹуньштьна хԝә анәгори принсипед Кʹьтеба Пироз дьгӧһаст, һаԛас әз һе зедә бәхтәԝар дьбум». Мариайе фәʹм кьр, ԝәки әԝе нькарьбу һʹьш-аԛьле хԝә бьдә һьн сәр тьштед рʹӧһʹани, һьн жи сәр һәбуке (Мәт. 6:24). Әԝе рʹасти кʹьрʹи бь ԝи һәԛи, кӧ нәхԝаст бьбә професионал, дәԝләти бә у навдар бә. Ньһа әԝ ча пешәнг хьзмәт дькә у әʹмьре хԝәрʹа ша дьбә, чьмки гәләк бәхтәԝар буйә у нета ԝейә жийине жи һәйә.

11. Чахе әм рʹастийе дькʹьрʹьн, тʹәви кʹе дьбәкә һәләԛәтийа мә бе гӧһастьне?

¹¹ Һәләԛәти тʹәви мәрьва. Чахе әм дәстпедькьн анәгори рʹастийа Кʹьтеба Пироз бьжин, һәләԛәтийа мә тʹәви һәвал у мәрьвед мәйи незик дькарә бе гӧһастьне. Ле чьрʹа? Иса дәрһәԛа ве йәке гот, чахе бона шагьртед хԝә дӧа кьр: «Ԝан бь рʹастийа хԝә бӧһӧрти-жьбарә кә. Хәбәра тә рʹасти йә» (Йуһʹн. 17:17). Әв гьли «бӧһӧрти-жьбарә кә», дькарә ӧса жи бе һʹәсабе «ԝана башԛә кә». Бәле, чахе әм рʹастийе ԛәбул дькьн, әм жь ве дьнйайе башԛә дьбьн, чьмки ида накʹәвьнә бәр байе ԝе. Мәрьв сәр мә щурʹәки майин дьньһерʹьн, чьмки әм ида пе принсипед Кʹьтеба Пироз дьжин. Һьнә һәвал у нәфәред мә жи дьбәкә хԝә жь мә дур бьгьрьн, йан һәла һе жи мьԛабьли баԝәрийа мәйә тʹәзә бьн. Ле әм әʹщебмайи наминьн чахе әԝ йәк дьԛәԝьмә. Иса гот: «Дьжмьнед мерьв ԝе жь мала ԝи бьн» (Мәт. 10:36). Ле Иса ӧса жи соз да кӧ чь жи әм бона рʹастийе ӧнда кьн, әме һе зедә тьшт дәԝсе ԛазанщ кьн. (Бьхунә Марԛос 10:28-30.)

12. Мәрьвәки Щьһу чь һәԛ да сәва рʹастийе бькʹьрʹә?

¹² Бизнесменәки Щьһу бь наве Аарон, жь бьчʹуктайе дьһатә һинкьрьне, ԝәки изьн тʹӧнә наве Хԝәде һьлдьн. Ле Аарон рʹасти дьгәрʹийа. Щарәке Шәʹдәки Йаһоԝа жерʹа нишан кьр, ԝәки һәрге сәр чар һʹәрфед наве Хԝәдеда, кʹижан кӧ нәдәнгани нә, зедә кьн һʹәрфед дәнгани, наве ԝи ԝе бе готьне «Йаһоԝа». Әԝ мәтʹал ма, у жь шабуне чу кʹьниште, сәва әве әʹламәтийа баш, рабинарʹа, демәк дәрсдаред Щьһурʹа гьли кә. Ле ԝана ԝи ӧса ԛәбул нәкьр, ча әԝ һивийе бу. Дәԝса кӧ тʹәви ԝи ша бьн, чьмки әԝ дәрһәԛа наве Хԝәде рʹастийе пеһʹәсийа, ԝана тʹуйи ԝи кьр у бәри ԝи дан. Һьн жи һәләԛәтийа ԝи тʹәви нәфәред ԝи жи сар бу. Ле Аарон йәкә бәрдәԝам дькьр рʹастийе бькʹьрʹә у һʹәта мьрьне бь мерхаси Йаһоԝарʹа хьзмәт кьр. Мина Аарон, әм жи һазьр ьн һәԛ бьдьн сәва рʹастийе бькʹьрʹьн, һәрге жи бона ве йәке һәләԛәтийа мә тʹәви мәрьва бе гӧһастьне.

13, 14. Ньһерʹандьнеда у рʹабун-рʹуньштьнеда чь гӧһастьн лазьм ә бькьн, сәва рʹастийе бькʹьрʹьн? Мәсәле биньн.

¹³ Ньһерʹандьн у рʹабун-рʹуньштьна кӧ Хԝәде хԝәш найе. Сәва рʹастийе ԛәбул кьн у бьжин ль гора принсипед Кʹьтеба Пироз, әм гәрәке һазьр бьн фькьр у рʹабун-рʹуньштьна хԝә бьгӧһезьн. Дина хԝә бьдьне Пәтрус дәрһәԛа ван гӧһастьна чь гот: «Мина зарʹед гӧһдар бьн, нәбьнә мина ԝи ԝәхте дьлхԝәстьнед хԝәйә нәзанийа хԝәда. Ле . . . пироз бьн нава һʹәму рʹабун-рʹуньштьна хԝәда» (1 Пәт. 1:14, 15). Мәрьвед кӧ Корьнтʹида дьжитьн, гәрәке әʹмьре хԝәда гӧһастьнед мәзьн бькьрана сәва рʹасти бькʹьрʹийана, чьмки әԝ шәһәр бь бенамусийе тʹьжи бу (1 Корн. 6:9-11). Иро жи гәләка бона рʹастийе пьшта хԝә данә кьред кӧ Хԝәде хԝәш найен. Пәтрус готә Мәсиһийед кӧ ԝәʹде ԝида дьжитьн: «Бәси ԝә йә, кӧ ԝә ԝәхте жийина хԝәйә бьһӧрида ль гора хԝәстьна пʹутпʹарьста  дәрбаз кьрийә, һун пәй һʹәрамийе, тәмхԝәстьнед хьраб, пәй-вәхԝарьне, кучʹьксантийе, сәрхԝәшийе у пʹутпʹарьстийа кʹьрет кʹәтьбун» (1 Пәт. 4:3).

¹⁴ Гәләк сала Девин у Жасмин кӧ тʹәвайи дьжитьн, ичʹькә вәдьхԝарьн. Рʹаст ә професийа Девин гәләк баш бу, ле чьмки ичʹькә вәдьхԝар, әԝи гәләк щар хәбата хԝә ӧнда дькьр. Ле Жасмин бь хәйсәтәкә гьран әʹйан бу, әԝ йәкә һерс бу. Рʹожәке чахе Жасмин вәхԝари кʹуче дьгәрʹийа, рʹасти дӧ Шәʹдед Йаһоԝа һат, йед кӧ мисйонер бун. Мисйонера готьн, ԝәки әԝана дькарьн һʹәфтийа дьн бен мала ԝе, сәва һинбуна Кʹьтеба Пироз дәстпекьн. Ле гава мисйонер һатьн мала ԝан, Девин у Жасмин һәрдӧ жи вәхԝари бун. Әԝана нә жи дьфькьрин, ԝәки әԝ мисйонер ԝе бона ԝан хәм бькьн у бенә мала ԝан. Ле щарәкә дьн чахе әԝана һатьн, ида дәрәщәкә дьн бу. Жь дәстпека һинбуна Кʹьтеба Пироз, Девин у Жасмин бь дьл у щан Кʹьтеба Пироз һин дьбун, у дәстпекьрьн бьдьнә хәбате ԝан тьшта чь кӧ педьһʹәсийан. Нава се мәһада, ԝана тʹәрька ичʹьке дан, у ахьрийе зәԝаща хԝә ԛануни кьрьн. Бәле, әԝана гәләк һатьнә гӧһастьне. Гӧндийед ԝан әԝ йәк дитьн, гәләк әʹщебмайи ман у һелан бун Кʹьтеба Пироз һин бьн.

15. Кʹижан тьшт дьбәкә һьнәкарʹа гәләк чәтьн ә бьтʹәрькʹиньн, сәва рʹастийе бькʹьрʹьн?

¹⁵ Әʹдәт у шьхӧл кӧ Хԝәде хԝәш найен. Сәва рʹастийе бькʹьрʹьн дьбәкә тьштед лапә чәтьн кӧ әм гәрәке бьтʹәрькиньн, әԝ һәнә әʹдәт у шьхӧлед кӧ Хԝәде хԝәш найен. Һьнәкарʹа гәләк чәтьн ә ве йәке бькьн, чьмки бәрхԝә дькʹәвьн кӧ нәфәр, һәвалхәбатчи у һәвалед ԝани незик ԝе чь бежьн. Илаһи чәтьн ә бьтʹәрькиньн ԝан әʹдәта, кʹижан кӧ бона мьрийа дькьн (Ԛан. Дщр. 14:1). Мәсәлед ԝан мәрьва кӧ бь мерхаси әԝ гӧһастьн кьрьнә, дькарьн али мә жи бькьн. Дина хԝә бьдьне кӧ ԛьрʹна йәкеда һьнә бьнәлийед Әфәсе, ча бь мерхаси әԝ тьшт кьрьн.

16. Һьнә Әфәсийа чь кьрьн, сәва рʹастийе бькʹьрʹьн?

¹⁶ Шәһәре Әфәс бь сербазийе у кʹочʹәктийе навдар бу. Гәло әԝед кӧ кʹочʹәкти дькьрьн у паше бунә Мәсиһи, чь кьрьн сәва рʹастийе бькʹьрʹьн? Кʹьтеба Пироз дьбежә: «Йед сербазийева жи кӧ мьжул дьбун, гәләка кʹьтебед хԝә тʹоп дькьрьнә щики у ль бәр һʹәмуйа дьшәԝьтандьн. Ԛимәте ԝан һʹәсаб кьрьн, пенщи һʹәзар зив дәркʹәт. Бь ви аԝайи хәбәра Хӧдан пешда дьчу у ԛәԝат дьбу» (Кʹар. Шанд. 19:19, 20). Әԝ Мәсиһийед амьн ԛӧрбанед мәзьн кьрьн у кʹәрәмед пʹьрʹ ԛимәт ԛазанщ кьрьн.

17. а) Кʹижан тьшта әм дькарьн бьтʹәрькиньн сәва рʹастийе бькʹьрʹьн? б) Готара дьнда әме кʹижан пьрса шеԝьр кьн?

¹⁷ Ле тә чь һәԛ дайә, сәва рʹастийе бькʹьрʹи? Әм гьшк ԝәʹде хԝә хәрщ дькьн, сәва кӧлиркед рʹастийе тʹоп кьн. Һьнәка жь мә, бона рʹастийе нәхԝәстьн дәԝләти бьн. Һәләԛәтийа һьнәка жи, тʹәви мәрьвед мәйи незик сар бу. Гәләка жи ньһерʹандьн у рʹабун-рʹуньштьна хԝә гӧһастьн, ӧса жи әʹдәт у шьхӧлед кӧ Хԝәде хԝәш найен, тʹәрькандьн. Ле чьԛас бьһа жи сәр мә рʹуньшт, әм дӧдьли ниньн ԝәки рʹастийа Кʹьтеба Пироз жь ԝан һʹәму тьшта ԛимәттьр у четьр ә, чь кӧ мә ԛӧрбан кьрийә. Әԝ тьштәки беһʹәсаб ԛимәт дьдә мә, әԝ һәйә һәләԛәтийа незик тʹәви Йаһоԝа. Чахе әм дәрһәԛа ԝан һʹәму кʹәрәма дьфькьрьн, кʹижан әм жь рʹастийе дьстиньн, ԛә һʹьше мәрʹа жи дәрбаз набә, ԝәки кәсәк бьхԝазә рʹастийе бьфьрошә. Ле гәло ча әԝ йәк дькарә бьԛәԝьмә? У ча әве шашийа мәзьн нәкьн? Әԝан пьрса әме готара дьнда шеԝьр кьн.