1, 2. Чахе әм рʹӧһʹанида пешда дьчьн, әм чь һин дьбьн? Мәсәле биньн.

БЬДЬНӘ бәр чʹәʹве хԝә кәсәк пʹешкʹешәки дьдә зарʹа бьчʹук у де-баве ԝи дьбежьне: «Бежә зәʹф рʹази мә». Зарʹ гӧрʹа де-баве хԝә дькә у әԝан гьлийа дьбежә. Ле чахе әԝ мәзьн дьбә, ида ньһерʹандьна де-бава фәʹм дькә, кӧ чьрʹа ԝана дьхԝәст әԝ йәки шекьр бә у һьндава мәрьвада һʹәйф бә. Ахьрийеда, әԝ ида хԝәха рʹазибуна хԝә мәрьварʹа дьдә кʹьфше, чьмки ӧса һин буйә у жерʹа буйә хәйсәт.

² Дәрәща мә жи мина ве йәке йә. Чахе әм тʹәзә һатьнә сәр рʹийа рʹаст, әм пеһʹәсийан кӧ чьԛас фәрз ә гӧрʹа тʹәмийед сәрәкә бькьн, кӧ Йаһоԝа дьдә мә. Ле чахе әм ида рʹӧһʹанида мәзьн бун, әм һе зедә пеһʹәсийан дәрһәԛа хәйсәт у фькьред Йаһоԝа, мәсәлә чь ԝи хԝәш те у чь на, у ӧса жи ча әԝ сәр щурʹә-щурʹә тьшта дьньһерʹә. Чахе әм дьһельн ԝәки фькьред Йаһоԝа сәр сафикьрьн у кьред мә һʹӧкӧм кьн, әм дәстпедькьн ида мина ԝи бьфькьрьн.

3. Чьрʹа һеса нинә һин бьн мина Йаһоԝа бьфькьрьн?

³ Мә хԝәш те чахе әм дәрһәԛа фькьред Йаһоԝа педьһʹәсьн, ле әм гӧнәкʹар ьн у ләма щара һеса нинә, ԝәки әм жи мина ԝи бьфькьрьн. Бәʹса хәбәре, әм заньн кӧ Йаһоԝа ча дьньһерʹә сәр бенамусийе, пʹәрәһʹьзийе, шьхӧле  бәлакьрьна мьзгинийе, бәридайина хуне, у диса тьштед дьн. Ле дьбәкә мәрʹа чәтьн ә фәʹм кьн ньһерʹандьна ԝи сәр ԝан тьшта. Һьнге чь әм гәрәке бькьн? Чаԝа әм дькарьн һин бьн мина Йаһоԝа бьфькьрьн? У чаԝа әԝ йәк али мә дькә ча ньһа ӧса жи ахьрийеда сафикьрьнед баш бькьн?

4. Чь те һʹәсабе әԝ гьлийед Паԝлос: «Һʹьш-аԛьле хԝә ну кьн»?

⁴ Бьхунә Рʹомайи 12:2. Ве рʹезеда Паԝлосе шанди шьровәкьр, кӧ чь те һʹәсабе һин бьн мина Йаһоԝа бьфькьрьн. Готара пешийа ве, али мә кьр ԝәки әм фәʹм кьн кӧ әм гәрәке инкʹар кьн фькьр у ньһерʹандьнед ве дьнйайе, сәва «нәкʹәвьнә кьрасе бәнде ве дьнйайе». Ле Паԝлос ӧса жи гот кӧ әм гәрәке «һʹьш-аԛьле хԝә ну кьн, ДТʹ». Әԝ те һʹәсабе, ԝәки әм гәрәке Хәбәра Хԝәде леколин бькьн, сәва фькьред ԝи тедәрхьн у сәр дьшьрмиш бьн, сәва бь ньһерʹандьна Хԝәде сәр тьшта бьньһерʹьн.

5. Шьровәкьн фьрԛийа ортʹа хԝәндьна сәрʹа-бәрʹа у леколинкьрьне.

⁵ Леколинкьрьн хԝәндьна сәрʹа-бәрʹа у тʹәне кʹьфшкьрьна щабед пьрса нинә. Чахе әм леколина дькьн, әм педьһʹәсьн дәрһәԛа Йаһоԝа, рʹейед ԝи у фькьред ԝи. Паше, әм дьхԝазьн тедәрхьн у фәʹм кьн, чьрʹа Йаһоԝа фьлан тʹәмийе дьдә йан жи фьлан тьшти ԛәдәхә дькә. Әм ӧса жи дьфькьрьн, кӧ гәрәке әʹмьр у фькьред хԝәда чь гӧһастьна бькьн. Рʹаст ә ԝәʹде леколинкьрьне дьбәкә әме һәма щарәкерʹа нькарьбьн сәр ԝан һʹәму тьшта бьфькьрьн, ле йәкә әме кʹаре бьстиньн, һәрге ԝәʹде леколине ниве ԝәʹдә хәрщ кьн, сәва бьфькьрьн сәр хԝәндьна хԝә (Зәб. 119:97; 1 Тимтʹ. 4:15).

6. Чь дьԛәԝьмә гава әм дьфькьрьн сәр ньһерʹандьна Йаһоԝа?

⁶ Чахе әм тʹьме сәр Хәбәра Хԝәде дьфькьрьн, тьштәки мәхсус дьԛәԝьмә. Әм дәстпедькьн фәʹм кьн у дӧдьли нәбьн, ԝәки фькьр у ньһерʹандьна Йаһоԝа сәр тьшта беԛьсур ә. Әм ида сәр тьшта пе чʹәʹве ԝи дьньһерʹьн у ньһерʹандьна ԝи ԛәбул дькьн. Һʹьш-аԛьле мә «ну» дьбә у щурʹе фькьрандьна мә те гӧһастьне. Ӧса һеди-һеди фькьред Йаһоԝа дьбьнә фькьред мә.

7, 8. а) Йаһоԝа сәр дәԝләтийе ча дьньһерʹә? (Бьньһерʹә шьклед әʹԝльн.) б) Һәрге ньһерʹандьна мә мина йа Йаһоԝа бә, ԝе бона мә тьште лапи фәрз чь бә?

⁷ Фькьрандьн нә тʹәне сәр һʹьш-аԛьле мә һʹӧкӧм дькә, ле ӧса жи сәр кьред мә (Марԛ. 7:21-23; Аԛуб 2:17). Сәва әм әве йәке һе рʹьнд фәʹм кьн, ԝәрә чәнд мәсәла шеԝьр кьн. Мәсәлә, Кʹьтеба Пирозда әм зәлал дьвиньн ньһерʹандьна Йаһоԝа сәр дәԝләтибуне у һәбуке. Йаһоԝа бона Кӧрʹе хԝә, де-бавәки ӧса бьжарт жь мәрьва, йед кӧ нәдәԝләти бун (Ԛан. Кʹаһ. 12:8; Луԛа 2:24). Чахе Иса һатә буйине, Мәрйәме «әԝ пʹечʹәкеда пʹечʹа у афьрʹда дани, чьмки меванханеда бона ԝан щи тʹӧнәбу» (Луԛа 2:7). Һәрге Йаһоԝа бьхԝаста, дькарьбу ӧса бькьра, ԝәки Иса щики һе башда бьһата буйине. Ле бона Йаһоԝа йа лапә фәрз әԝ бу, ԝәки Кӧрʹе ԝи малбәтәкә ӧсада мәзьн бә, бона кʹижана Хԝәде щийе пешьн дьгьрт.

⁸ Жь сәрһатийа буйина Иса, әм педьһʹәсьн кӧ чаԝа Йаһоԝа дьньһерʹә сәр һәбуке. Һьнә де-бав зарʹед хԝә һелан дькьн, ԝәки пәй тьштед лапи баш кʹәвьн, һәрге жи әԝ йәк рʹӧһʹанида ԝанрʹа зийане бинә. Ле әшкәрә йә кӧ бона Йаһоԝа йа лапә фәрз рʹӧһʹанийа мә йә, демәк һәләԛәтийа мә тʹәви  ԝи. Ле ньһерʹандьна ԝә жи мина йа Йаһоԝа йә? Пе кьред ԝә чь те кʹьфше? (Бьхунә Ибрани 13:5.)

9, 10. Чаԝа әм дькарьн нишан кьн ньһерʹандьна Йаһоԝа һьндава лькʹӧмандьне?

⁹ Диса мәсәләкә дьн кӧ Йаһоԝа ча дьньһерʹә сәр ԝан кәса кʹижан кӧ мәрьва дьлькʹӧминьн. Иса гот: «Кʹи кӧ жь ван бьчʹука йәки, йе кӧ баԝәрийа хԝә мьн тинә жь рʹе дәрхә, ԝирʹа һе ԛәнщ ә, кӧ бәрашәк стуйе ԝива бе гьредане у бе авитьне нава бәʹре» (Марԛ. 9:42). Әшкәрә те кʹьфше, Иса сьвьк нәдьньһерʹи сәр ве йәке! Әм заньн ԝәки Иса бь тʹәмами хәйсәте Баве хԝә әʹйан кьр, у ләма әм дӧдьли набьн, ԝәки Йаһоԝа жи ӧса дьньһерʹә сәр һәр кәси, кʹе кӧ пе кьред хԝә шагьртед Иса дьлькʹӧминә (Йуһʹн. 14:9).

¹⁰ Ле гәло ве йәкеда ньһерʹандьна мә жи мина йа Йаһоԝа у Иса йә? Әм жи мина ԝан дьфькьрьн? Гәло кьред мә чь әʹйан дькьн? Бәʹса хәбәре, мә хԝәш те стиләкә кʹьнщхԝәкьрьне йан жи щурʹәки хәмьландьне, кʹижан кӧ щьватеда хушк-бьра әʹщьз дькә, йан жи нав мәрьвада тәме хьраб у фькьред хьраб пешда тинә. Гәло һʹьзкьрьна һьндава хушк-бьра ԝе мә һелан кә жь стилед ӧса хԝә дур бьгьрьн? (1 Тимтʹ. 2:9, 10).

11, 12. Чаԝа сәр хьрабийе мина Йаһоԝа бьньһерʹьн, у хԝәгьрти бьн сәва хьрабийе нәкьн?

¹¹ Мәсәла сьсийа: Хьраби бәр чʹәʹве Йаһоԝа рʹәш ә (Иша. 61:8). Әԝ занә ԝәки әм гӧнәкʹар ьн у ләма мәрʹа һеса нинә хԝә жь хьрабийе дур бьгьрьн. Ле йәкә әԝ дьхԝазә, ԝәки әм чʹәʹв бьдьнә ԝи, у хьрабийе нәфьрʹәт кьн. (Бьхунә Зәбур 97:10.) Чахе әм бьфькьрьн кӧ чьрʹа хьраби бәр чʹәʹве Йаһоԝа рʹәш ә, әме жи мина ԝи сәр ве йәке бьньһерʹьн, у ԛәԝате бьстиньн сәва хԝә жь һәр нәрʹастийе дур бьгьрьн.

¹² Һәрге әм сәр хьрабийе пе чʹәʹве Йаһоԝа бьньһерʹьн, әԝ йәк ԝе али мә бькә тедәрхьн ԝан тьштед нәрʹаст жи, дәрһәԛа кʹижана Кʹьтеба Пирозда рʹастә-рʹаст найе готьне. Мәсәлә, иро ве дьнйайеда гәләк бәлабуйи йә рәԛаса сәр чокед мәрьва, чь кӧ бенамуси, рʹобәти у һʹәрам ә. Һьнәк хԝә һәԛ дәрдьхьн дьбежьн, кӧ нә әԝ һәма секс нинә. * Ле гәло Йаһоԝа жи ӧса дьньһерʹә сәр ве йәке? На! Бәр чʹәʹве Йаһоԝа һәр хьраби рʹәш ә. Ләма ԝәрә әм жи жь һәр хьрабийе дур бьн, хԝәгьрти бьн у нәфьрʹәт кьн ԝан тьшта чь кӧ Йаһоԝа хԝәш найен (Рʹом. 12:9).

13. Чьрʹа әм ньһада гәрәке бьзаньбьн дәрһәԛа ньһерʹандьна Йаһоԝа сәр щурʹә-щурʹә тьшта?

¹³ Чахе әм ньһерʹандьна Йаһоԝа леколин дькьн, әԝ йәк али мә дькә ахьрийеда сафикьрьнед билан бькьн. У гава әм бькʹәвьнә дәрәщәкә ӧса кӧ әм гәрәке зузу сафикьрьне бькьн, әме ида бьзаньбьн чь у ча бькьн (Мәтʹлк. 22:3). Ԝәрә чәнд мәсәлед Кʹьтеба Пироз шеԝьр кьн.

14. Әм чь һин дьбьн жь щаба Усьв жьна Потифаррʹа?

¹⁴ Чахе жьна Потифар дьхԝәст Усьв тʹәви ԝе рʹазе, Усьв дәрберʹа инкʹар кьр. Бь ве йәке һатә кʹьфше, кӧ әԝ пешда дьфькьри сәр ньһерʹандьна Йаһоԝа, дәрһәԛа амьнийа һьндава мер у жьн. (Бьхунә Дәстпебун 39:8, 9.) Һьн жи щаба Усьв жьна Потифаррʹа дьдә  кʹьфше, кӧ фькьред ԝи мина фькьред Йаһоԝа бун. Әԝи ԝерʹа гот: «Әзе чаԝа ве хьрабийа мәзьн бькьм у ль бәр Хԝәде гӧнә бькьм?». Ле әм ча дьньһерʹьн сәр бенамусийе? Бәʹса хәбәре, һуне чь бькьн һәрге һәвалхәбатчийед ԝә тʹәви ԝә дәстпедькә флирте бькә? Йан жи һәрге кәсәк пе тʹеле гьлийед бенамуси ԝәрʹа дьньвисә йан жи шькла дьшинә? * Һәрге мә ньһерʹандьна Йаһоԝа сәр ԝан тьшта пешда леколин кьрийә у әм жи пе чʹәʹве ԝи сәр ԝан тьшта дьньһерʹьн, һьнге ԝе мәрʹа дьһа һеса бә жерʹа амьн бьминьн.

15. Чаԝа әм мина се гәде Ибрани, дькарьн Йаһоԝарʹа амьн бьминьн?

¹⁵ Биньн бира хԝә сәрһатийа се гәде Ибрани бь наве Шәдрак, Мәшак, у Абәднәго. Чахе Нәбукәднәсәр Пʹадша фәрман да кӧ сәре хԝә бәр пʹуте зерʹ дайньн, ԝана инкʹар кьр ве йәке бькьн. Щаба ԝан дьдә кʹьфше, кӧ әԝана ида пешда фькьринә кӧ чь гәрәке бькьн сәва Йаһоԝарʹа амьн бьминьн (Дәркʹ. 20:4, 5; Дан. 3:4-6, 12, 16-18). Бьдьнә бәр чʹәʹве хԝә, мәзьне хәбата ԝә дьбежә, ԝәки пʹәрә те тʹопкьрьне бона щәжьне, йа кӧ рʹелигийа ԛәлпва гьредайи йә. Һуне чь бькьн? Дәԝса кӧ һивийе бьн кʹәнге әԝ дәрәщә рʹасти ԝә бе, һе баш ә ньһа ида пешда бьфькьрьн һәла Йаһоԝа ча дьньһерʹә сәр ԝан тьшта. Һәрге һун ӧса бькьн, һьнге рʹасти чь дәрәща жи бен, ида һуне бьзаньбьн ча рʹаст бькьн у ча рʹаст бежьн, чаԝа се гәде Ибрани кьрьн.

16. Чахе әм ньһерʹандьна Йаһоԝа рʹьнд фәʹм дькьн, ча әԝ йәк али мә дькә кӧ пешда һазьр бьн, гава аликʹарийа һʹәкима лазьм ә?

¹⁶ Һәрге әм пешда сәр ньһерʹандьна Йаһоԝа бьфькьрьн, әԝ йәк ԝе ӧса жи али мә бькә гава мәрʹа ләз аликʹарийа һʹәким лазьм бә. Фәʹмдари йә әм инкʹар дькьн кӧ хуне у чар фраксийед ԝе бәри хԝә дьн. Ле дәрһәԛа хуне һәнә дәрәщед ӧса жи, кӧ Мәсиһи гәрәке сәр һʹиме принсипед Кʹьтеба Пироз хԝәха сафикьрьне бькә (Кʹар. Шанд. 15:28, 29). Сәр ԝан пьрса әм гәрәке нә кӧ нәхԝәшханеда бьфькьрьн, чахе мәсәлә әм бетʹаԛәт ьн у зоре мә дькьн  зузу сафикьрьне бькьн. Әм ньһада ида гәрәке ԝәʹдә хԝәрʹа бьвиньн кӧ леколина бькьн, документа хуне тʹьжә кьн, кʹидәре һур бь һур те готьне әм чь дьхԝазьн, у тʹәви һʹәкиме хԝә хәбәр дьн. *

17-19. Чьрʹа фәрз ә ида ньһада бьзаньбьн дәрһәԛа ньһерʹандьна Йаһоԝа сәр щурʹә-щурʹә тьшта? Мәсәле биньн кӧ чь дәрәщада әм гәрәке хԝә пешда һазьр кьн.

¹⁷ Диса бьфькьрьн дәрһәԛа щаба Иса сәр ве ширәта Пәтрус: «Һьндава хԝәда ԛәнщ бә, Хӧдан!, (ДТʹ)». Әшкәрә йә, кӧ Иса пешда дьфькьри сәр ԛьрара Хԝәде һьндава хԝә у сәр ԝан пʹехәмбәртийа, йед кӧ дәрһәԛа әʹмьре ԝи сәр әʹрде у мьрьна ԝи бун. Әԝе йәке ԛәԝат да ԝи, ԝәки амьн бьминә Йаһоԝарʹа, у бь дьл у щан әʹмьре хԝә бьдә бона мәрьва. (Бьхунә Мәтта 16:21-23.)

¹⁸ Иро ԛьрара Хԝәде һьндава щьмәʹта ԝи әԝ ә, кӧ достийе тʹәви ԝи бькьн у һʹәта ԝан һәйә шьхӧле бәлакьрьна мьзгинийеда кʹар бькьн (Мәт. 6:33; 28:19, 20; Аԛуб 4:8). Чаԝа мина дәрәща Иса, иро жи мәрьв бь дьле хԝәйи сах дькарьн мә жь шьхӧле Хԝәде дур хьн. Мәсәлә, һуне чь бькьн һәрге мәзьне хәбата ԝә, ԝәрʹа хәбата һе баш дьдә, кʹидәре һуне пʹәре мәзьн бьстиньн, ле әԝ хәбат ԝе ԝәʹдә жь ԝә бьстинә у һуне кем һәрʹьнә щьвате у хьзмәтийе? Йан жи һәрге мәкʹтәбеда ԝәрʹа мәщала дьдьн кӧ дәрбази щики дьн бьн, сәва һе зедә хԝәндьне бьстиньн? Һәрге һун рʹасти дәрәщед ӧса бен, һьнге ԝе ԝәрʹа лазьм бә дӧа бькьн, леколина бькьн, йан жи пешийа сафикьрьне тʹәви де-бава йан жи рʹуспийа хәбәр дьн. Ле һе баш нинә ида ньһада леколина бькьн, у пебьһʹәсьн Йаһоԝа ча дьньһерʹә сәр ԝан пьрса у чʹәʹв бьдьнә ньһерʹандьна ԝи? Һәрге һун ӧса бькьн, һуне нәкʹәвьнә щерʹьбандьна гава рʹасти ԝан дәрәща бен, чьмки ԝә дьле хԝәда ида пешда сафи кьрийә, кӧ дьхԝазьн һʹьш-аԛьле хԝә бьдьнә сәр хьзмәтийа Йаһоԝа.

¹⁹ Ӧса жи пешда бьфькьрьн, кӧ ньшкева һун дькарьн рʹасти кʹижан щерʹьбандьна бен. Рʹаст ә әм нькарьн хԝә пешда һазьр кьн бона һәр дәрәща. Ле һәрге әм ԝәʹде леколинкьрьна шәхси дьфькьрьн дәрһәԛа ньһерʹандьна Йаһоԝа сәр щурʹә-щурʹә тьшта, әм чь кӧ һин бьн ԝе бе бира мә, гава әм рʹасти дәрәща бен. Әԝ йәк ԝе али мә бькә сафикьрьнед билани бькьн. Ләма ԝәрә әм һәр гав тедәрхьн фькьред Йаһоԝа дәрһәԛа тьшта, һин бьн мина ԝи бьфькьрьн, у дьшьрмиш бьн кӧ әԝ йәк ча дькарә һьн ньһа али мә бькә һьн жи ахьрийеда.

20, 21. а) Чьрʹа дьнйа тʹәзәда әме азайа хԝәрʹа ша бьн? б) Иро әм ча дькарьн шабуне бьстиньн?

²⁰ Әм гьшк гәләк һивийа дьнйа тʹәзә нә у ԝе һʹәчʹи зәʹф жь мә сәр әʹрде һʹәта-һʹәтайе бьжин. Бьн Пʹадшатийа Хԝәдеда, дәрд-кӧлед мә кӧ иро әм дькʹьшиньн, ԝе тʹӧнә бьн. Ле һәла һе дьнйа тʹәзәда жи ԝе азайа мәйә бьжартьне һәбә. Һәр кәс жь мә ԝе сафикьрьна у бьжартьна ӧса бькә, ча дьле мә дьхԝазә у ча әм бәгәм дькьн.

²¹ Ле әԝ найе һʹәсабе, ԝәки азайа мә ԝе бе синор бә. Дьнйа тʹәзәда чахе мәрьвед мьлук гәрәке бьжберьн рʹасти у хьрабийе, ԝе сәр һʹиме ԛанун у ньһерʹандьна Йаһоԝа сафикьрьне бькьн. Әԝ йәк ԝе шабуне у әʹдьлайе бинә (Зәб. 37:11). Ле һʹәта әԝ ԝәʹдә бе, ньһада жи шабуна мә дькарә һәбә, һәрге фькьред мә мина йед Йаһоԝа бьн.