ОРШӘЛИМЕДА әw щьвинәкә гәләк фәрз у мәхсус бу. Даwьд Пʹадша гази һʹәму сәрока, бәрдәстийед пʹадша, у меред әʹгид кьр, у әʹламәтик wанрʹа гот, жь бо кʹижане әwана гәләк әʹщебмайи ман. Даwьд гот wәки Йaһоwа, кӧрʹе wи Сьлеман кʹьфш кьр, wәки әw авайе мәзьн у мәхсус ава кә у тʹәсмили Хwәдайе рʹаст кә, сәва теда wи бьһʹәбиньн. Пʹадша Даwьд кӧ ида кал бу, жь бина бәр Хwәде нәхше авайи станд, у әwи әw нәхш да кӧрʹе хwә Сьлеман. Даwьд гот: «Кʹар мәзьн ә; жь бәр кӧ әв qәсьр [пʹарьстгәһ] нә бона мьрован, ле бона Хӧдан Хwәде йә» (1 Дир. 28:1, 2, 6, 11, 12; 29:1).

Паше Даwьд пьрсәкә ӧса да: «Wе кʹи иро бь дьле хwәва пʹешкʹешийе бьдә?» (1 Дир. 29:5). Һәрге һун жи wедәре буна, wәйе ча хwә кʹьфш кьра? Гәло wәйе бьхwәста пьштгьрийа wи шьхӧле мәзьн бькьн? Исраелийа дәрберʹа хwә ви шьхӧли гьртьн. Бь рʹастийе әwана «бь дьле хwәва пʹешкʹеш кьрьн кʹефхwәш бун, жь бәр кӧ бь һʹәмуйа дьле хwә жь Хӧданрʹа пʹешкʹеш кьрьн» (1 Дир. 29:9).

Qьрʹнә дәрбаз бун, у Йaһоwа тьштәки жь пʹарьстгәһе һе мәстьр саз кьр. Әwи пʹарьстгәһа рʹӧһʹани йа мәзьн саз кьр, сәва кӧ мәрьв незики wи бьн у wи бьһʹәбиньн сәр һʹиме qӧрбана Иса (Ибрн. 9:11, 12). Ле гәло ча иро Йaһоwа али мәрьва дькә кӧ әwана незики wи бьн? Бь сайа шьхӧле бәлакьрьна мьзгинийе (Мәт. 28:19, 20). Бь сайа wи шьхӧли, һәр сал тʹәви милйона мәрьв һинбуна Кʹьтеба Пироз дәрбаз дькьн, бь һʹәзара мәрьв тенә ньхӧмандьне, у бь сәда щьватед тʹәзә тенә сазкьрьне.

Гәләк мәрьв зедә дьбьн, ләма жи һʹәwщәти һәйә, wәки һе зедә әʹдәбйәтед сәр һʹиме Кʹьтеба Пироз бенә нәшьркьрьне, Одед Щьвата бенә авакьрьне у хwәй кьрьне, у ӧса жи лазьм ьн һе зедә одед сәва щьватед мәзьн. Бәле, әм дьвиньн wәки әw шьхӧле бәлакьрьна мьзгинийе чьqас шьхӧләкә мәзьн ә у чьqас кʹәрәма тинә (Мәт. 24:14).

Һʹьзкьрьн һьндава Хwәде у мәрьва, у ӧса жи фәʹмкьрьна ве йәке кӧ шьхӧле бәлакьрьна мьзгинийе гәләк фәрз ә, һелан дькә щьмәʹта Хwәде wәки «бь дьле хwәва пʹешкʹешийе» бьдьнә Йaһоwа пе qӧрбанкьрьна рʹәзәдьли. Әм чьqас ша дьбьн кӧ «бь һәбуна хwә» Йaһоwа рʹумәт дькьн у дьвиньн wәки әw хәрщ ча рʹаст у бь билани тенә хәбьтандьне, сәва шьхӧле мәзьн бькьн, кʹижан нава тʹәрихийа инсанәтеда тʹӧ щар тʹӧнә буйә! (Мәтʹлк. 3:9).