ХЬЗМӘТКʹАРЕД Йaһоwа гәләк qимәт дькьн Хәбәра wи, демәк Кʹьтеба wийә Пироз. Кʹьтеба wида әм дькарьн ширәте у рʹасткьрьне бьстиньн, у әw йәк мәрʹа гәләк лазьм ә чьмки әм гьшк гӧнәкʹар ьн. Ле һун ширәтед Хwәде qәбул дькьн? Wәрә шеwьр кьн дәрһәqа чәтьнайикә ортʹа дӧ хушка, Әйодийа у Сьнтиха, йед кӧ qьрʹна йәкеда дьжитьн. Ле гәло ортʹа wанда чь чәтьнайи һәбу? Әwе йәке Кʹьтеба Пироз набежә, ле wәрә бьдьнә бәр чʹәʹве хwә кӧ әw чәтьнайи чь дькарьбу бьбуйа.

² Бьдьнә бәр чʹәʹве хwә, йанчь Әйодийайе һьнә хушк-бьра тʹәглифи мала хwә кьр, wәки тʹәвайи wәʹдә дәрбаз кьн, ле Сьнтихайе тʹәглиф нәкьр. Әwе пеһʹәсийа wәки хушк-бьра мала Әйодийайе хwәрʹа wәʹдәки хwәш дәрбаз кьрьнә. Дьбәкә Сьнтихайе дьле хwәда гот: «Әз баwәр накьм! Әйодийайе ча гази мьн нәкьр. Нә әм һәвалед гәләк незик бун?» Паши ве йәке, Сьнтихайе ида итʹбарийа хwә Әйодийайе нәдьани у һәла һе жи хwә жь wе дур дьгьрт. Ләма Сьнтиха  һәма әw хушк-бьра тʹәглифи мала хwә кьрьн, wәки wәʹдә дәрбаз кьн, ле Әйодийайе тʹәглиф нәкьр! Әw чәтьнайа ортʹа Сьнтихайе у Әйодийайе дькарьбу әʹдьлайа щьвате хьраб кьра. Кʹьтеба Пирозда найе готьне кӧ әwана ча һәв һатьн, ле дьqәwьмә әw дӧ хушк ширәта Паwлосе шанди qәбул кьрьнә (Фили. 4:2, 3).

³ Иро щара чәтьнайед ӧса дькарьн щьватеда нава хушк-бьрада жи һәбьн. Ле һәрге әм ширәтед Хәбәра Хwәде биньн сери, әме бькарьбьн wан чәтьнайа сафи кьн у һәла һе жи ӧса бькьн кӧ әw чәтьнайи пешда нәйен. Һәрге әм qимәт кьн Кʹьтеба Йaһоwа, әме әʹмьре хwәда тʹьме гӧһ бьдьнә ширәтед wи (Зәб. 27:11).

4, 5. Хәбәра Хwәде чь ширәте дьдә мә, кӧ ча һерсе у хәйде бал хwә бьтәмьриньн?

⁴ Чахе кәсәк дьле мә дешинә йан нәһәqийе мә дькә, чәтьн ә хwә бьгьрьн кӧ һерс нәкʹәвьн у нәхәйидьн. Дьле мә дешә чахе мәрьв һьндава мә нәбаш ьн, сәва ве йәке кӧ әм нә жь мьләте wан ьн, йан жи рʹува нә мина wан ьн. Ле гәләк чәтьн ә, чахе әw мәрьве кӧ дьле мә дешинә, хушк йан бьре мә йә! Гәло Хәбәра Хwәде чь ширәте дьдә мә дәрһәqа ве йәке?

⁵ Йaһоwа хәйсәте мәрьва рʹьнд занә. Әw занә wәки чахе әм һерс дькʹәвьн, чь тʹәхмин дькьн у ча хwә кʹьфш дькьн. Чахе әм һерс ьн, әм дькарьн тьштед ӧса бежьн у бькьн, сәва кʹижана паше әм пʹошман дьбьн. Ле Кʹьтеба Пироз мә ширәт дькә wәки әм һерсе бьтәмьриньн у дьлмайи нәминьн. (Бьхунә Мәтʹәлок 16:32; Wаиз 7:9.) Бәле әм гьшк гәрәке сәр хwә бьхәбьтьн wәки зу нәхәйидьн у һәвдӧ бьбахшиньн. Йaһоwа у Иса һʹәсаб дькьн wәки бахшандьн гәләк фәрз ә, чьмки һәрге әм нәбахшиньнә йед дьн Хwәде жи wе нәбахшинә мә (Мәт. 6:14, 15). Ле дәрһәqа хwә тӧ чь дькари бежи, тӧ дькари һерса хwә бьтәмьрини у бьбахшини йед дьн?

6. Чьрʹа әм гәрәке һерса хwә бьтәмьриньн?

⁶ Мәрьвед кӧ хәйде жь дьле хwә дәрнахьн, гәләк щар ӧса дьбә кӧ әwана һерс дьбьн у кʹине дажон. У ахьрийеда мәрьвед дьн wе хwә дури wан бьгьрьн. Мәрьве ӧса дькарә сәр щьвате хьраб һʹӧкӧм кә. Дьбәкә әw һерса хwә у нәфрәтийа хwә вәшерә, ле йәкә бәр щьвате wе «хьрабийа wи әшкәрә» бьбә (Мәтʹлк. 26:24-26). Рʹуспи пе Кʹьтеба Пироз дькарьн wи мәрьви ширәт кьн, wәки әw һерса хwә бьтәмьринә у qәлпийе жь дьле хwә дәрхә, чьмки әw һʹӧнӧр Хwәде хwәш найен (Qан. Кʹаһ. 19:17, 18; Рʹом. 3:11-18). Ле һәрге мәрʹа ширәтед ӧса бьдьн, гәло әме qәбул кьн?

7, 8. а) Йaһоwа ча рʹебәрийа пʹара тʹәшкиләта хwәйә сәр әʹрде дькә? б) Хәбәра Хwәде чь һьнә тʹәми у ширәта дьдә, у чьрʹа әм гәрәке гӧһ бьдьнә wе йәке?

⁷ Йaһоwа рʹебәрийа пʹара тʹәшкиләта хwәйә сәр әʹрде дькә. Әw мә һин дькә у ширәт дькә бь аликʹарийа «хӧламе амьн у сәрwахт», кʹижан кӧ бьн рʹебәрийа «сәре щьвине» Иса Мәсиһда нә (Мәт. 24:45-47; Әфәс. 5:23). Әw хӧламе амьн, мина кʹома рʹебәрийе йа qьрʹна йәке, Хәбәра Хwәде гәләк qимәт дькә. (Бьхунә 1 Тʹесалоники 2:13.) Wәрә бьвиньн һьнә ширәт у тʹәмийед жь Кʹьтеба Пироз кӧ бона кʹара мә нә.

⁸ Кʹьтеба Пироз тʹәмийе дьдә, wәки әм тʹьме бенә щьвате (Ибрн. 10:24, 25). Әw ӧса жи тʹәмийе дьдә wәки фәʹмкьрьна мә һьндава һинкьрьнед Кʹьтеба Пироз йәк бә (1 Корн. 1:10). Хәбәра Хwәде мә ширәт  дькә, кӧ әм гәрәке Пʹадшатийа Хwәде әʹмьре хwәда дайньн щийе пешийе (Мәт. 6:33). Хенщи ве йәке, Хәбәра Хwәде мәрʹа дьбежә wәки әм гәрәке мал бь мал у wан щийа кӧ гәләк мәрьв ьн, мьзгинийе бәла кьн (Мәт. 28:19, 20; Кʹар. Шанд. 5:42; 17:17; 20:20). Хәбәра Хwәде ӧса жи рʹуспийа ширәт дькә, wәки әwана мьqат бьн кӧ щьват рʹӧһʹанида тʹәмьз бьминьн (1 Корн. 5:1-5, 13; 1 Тимтʹ. 5:19-21). У ӧса жи Йaһоwа мә һʹәмуйа ширәт дькә wәки әм хwә физики у рʹӧһʹанида тʹәмьз хwәй кьн (2 Корн. 7:1).

9. Иса кʹе кʹьфш кьр сәва али мә бькә, wәки әм Хәбәра Хwәде фәʹм кьн?

⁹ Һьнәк дьфькьрьн wәки әwана бейи аликʹари дькарьн Кʹьтеба Пироз фәʹм кьн. Ле Иса «хӧламе амьн» кʹьфш кьрийә сәва әw хwарьна рʹӧһʹани бәла кә. Жь сала 1919, Иса бь сайа хӧламе амьн али шагьртед хwә дькә, wәки әwана Кʹьтеба Хwәде фәʹм кьн у пәй рийа wи һәрʹьн. У чахе әм гӧрʹа тʹәмийед Кʹьтеба Хwәде дькьн, әм щьватеда тʹәмьзайе, әʹдьлайе у йәктийе хwәй дькьн. Һәр кәс жь мә гәрәке пьрсе бьдә хwә: «Ле әз гӧрʹа Иса дькьм у пәй рʹебәрийа хӧламе амьн дьчьм?»

10. Кʹьтеба Һәзәqел ча шьровәдькә дәрһәqа пʹара тʹәшкиләта Йaһоwа сәр әʹзмана?

¹⁰ Әм жь Хәбәра Йaһоwа педьһʹәсьн дәрһәqа пʹара тʹәшкиләта wийә сәр әʹзмана. Мәсәлә, Һәзәqел пʹехәмбәр дитьнокеда дит пʹара тʹәшкиләта Хwәдейә сәр әʹзмана (Һәзqл. 1:4-28). Йaһоwа әʹрәбе рʹастәрʹе дькә, у әw әʹрәбә, wи алида дьчә кʹи алида кӧ рʹӧһʹе Хwәде дьбә. Әw пʹара тʹәшкиләта ль әʹзмана, һʹӧкӧм дькә сәр пʹара тʹәшкиләта ль әʹрде. Рʹасти жи әw әʹрәбә гәләк зу пешда дьчә! Бьфькьрьн дәрһәqа гәләк гӧһастьнед кӧ тʹәшкиләта Хwәде кьр нава дәһ салед пашwәхтийеда. Тʹьме бира хwәда хwәй кьн, wәки Йaһоwа рʹебәрийе дькә, wәки әw гӧһастьн бенә кьрьне. Зутьрәке Иса wе тʹәви мьлйакʹәта qьрʹа ве дьнйа зӧлм бинә, у ләма жи әʹрәба Йaһоwа зу дьчә wәки сәрwертийа Хwәде избат кә у наве wи пироз кә!

11, 12. Чьда тʹәшкиләта Йaһоwа пешда чу?

¹¹ Ньһа wәрә бьфькьрьн кӧ тʹәшкиләта Хwәде чьда пешда чу wан рʹожед ахьрийеда. Авакьрьн. Бь сәда хушк-бьра дьл у щан дьхәбьтьн сәр авакьрьна филиала сәрәкә йа Шәʹдед Йaһоwа, Нийу Йоркеда шәһәре Wорвикеда. Ӧса жи бь һʹәзара хушк-бьра бьн рʹебәрийа Идара Проектед Авакьрьне йа Һʹәмдьнйайе, бь рʹәзәдьли хәбата гьран дькьн сәва Одед Щьвата у филиала ава кьн. Әм гәләк рʹази нә, wәки хушк-бьред мә бь дьл у щан у бь рʹәзәдьли дьхәбьтьн сәр wан проекта! Ӧса жи бир нәкьн, wәки Йaһоwа кʹәрәм дькә wан хьзмәткʹаред амьн, йед кӧ бь мьлукти чьqас дькарьн пʹәра qӧрбан дькьн сәва авакьрьна wан авайа (Луqа 21:1-4).

 ¹² Һинкьрьн. Дина хwә бьдьне wәки чьqас мәкʹтәб һәнә, кʹидәре кӧ Йaһоwа щьмәʹта хwә һин дькә (Иша. 2:2, 3). Бал мә һәйә Мәкʹтәба сәва Пешәнга, Мәкʹтәба сәва Мьзгинванед Пʹадшатийе, Мәкʹтәба Гиләд, Мәкʹтәба бона Хьзмәткʹаред Бәйтʹәле, Мәкʹтәба сәва Бәрпьрсийаред Мьһале у Жьнед Wан, Мәкʹтәба сәва Рʹуспийед Щьвате, Мәкʹтәба Хьзмәтийе, у Мәкʹтәба сәва Әндәмед Комитейа Филиала у Жьнед Wан. Бәле әм дьвиньн wәки Йaһоwа чьqас һʹьз дькә щьмәʹта хwә һин кә! Хенщи wан мәкʹтәба, ӧса жи һәйә малпәра мә jw.оrg, бь сайа кʹижани әм дькарьн әʹдәбйәта сәр гәләк зьмана бьхуньн. Сәр малпәре һәнә тʹемед башqә сәва зарʹа, малбәта, у ӧса жи дәнг у бәʹсед тʹәзә. Ле гәло wә qә дайә хәбате малпәра jw.оrg хьзмәтийеда у qӧльхкьрьна тʹәви малбәтеда?

13. Ча хьзмәткʹаред Йaһоwайи амьн, чь щабдари бал мә һәйә?

¹³ Чьqас qәдьрәки мәзьн ә wәки әм нава тʹәшкиләта Йaһоwада ньн! Әм заньн дәрһәqа дәʹwакьрьнед Хwәде у принсипед wи, ләма әм борщдар ьн, wәки wе йәке бькьн чь кӧ чʹәʹве wида рʹаст ә. Әв дьнйа һе хьраб у хьраб дьбә, ле әм гәрәке хьрабийе «нәфрʹәт бькьн» чаwа кӧ Йaһоwа нәфрʹәт дькә (Зәб. 97:10). Әм гәрәке тʹӧ щар мина wан мәрьва нибьн йед кӧ «жь хьрабра дьбежьн qәнщ, жь qәнщрʹа дьбежьн хьраб» (Иша. 5:20). Әм гәләк дьхwазьн дьле Хwәде ша кьн, ләма әм физикида, намусийеда у рʹӧһʹанида тʹәмьз дьминьн (1 Корн. 6:9-11). Әм Йaһоwа һʹьз дькьн у итʹбарийа хwә wи тиньн. Әм дьжин пе тʹәмийед wи, кӧ Кʹьтеба wийә qимәтда ньвисар ьн. Әw тʹәми у ширәтед wи әм дьдьнә хәбате, малда, щьватеда, хәбатеда, мәкʹтәбеда, демәк һʹәму щийа (Мәтʹлк. 15:3). Ле wәрә әм ньһа шеwьр кьн дәрһәqа һьнә тьшта, бь кʹижана әм дькарьн амьнийа хwә Хwәдерʹа избат кьн.

14. Де-баве кӧ Мәсиһи нә ча дькарьн нишан кьн кӧ амьн ьн Хwәдерʹа?

¹⁴ Мәзьнкьрьна зарʹа. Де-бав кӧ Мәсиһи нә, амьнийа хwә Йaһоwарʹа избат дькьн чахе зарʹед хwә ль гора Хәбәра wи мәзьн дькьн. Де-бавед хwәдехоф, зарʹед хwә пе әʹдәтед ве дьнйайе мәзьн накьн (Әфәс. 2:2). Бав кӧ Мәсиһи йә тʹӧ щар wе ӧса нәфькьрә: «Wәлате мәда, жьн зарʹа һин дькьн у ширәт дькьн». Кʹьтеба Пироз зәлал дьбежә дәрһәqа ве йәке: «Бавно, зарʹед хwә . . . бь ширәт у һинкьрьна Хӧдан мәзьн кьн» (Әфәс. 6:4). Де-бав кӧ Хwәде һʹьз дькьн, дьхwазьн wәки зарʹед wан мина Самуйел бьн, чьмки Йaһоwа тʹьме тʹәви wи бу (1 Сам. 3:19).

15. Әм ча амьнийа хwә Йaһоwарʹа избат дькьн, чахе сафикьрьна дькьн?

¹⁵ Чахе сафикьрьна дькьн. Әм дьхwазьн wәки сафикьрьнед мә Йaһоwа хwәш бен. Ләма чахе әм жь Хәбәра wи у тʹәшкиләта wи аликʹарийе дьгәрʹьн, бь ве йәке әм амьнийа хwә Йaһоwарʹа дьдьнә кʹьфше. Мәсәлә, шеwьр кьн дәрһәqа пьрсәки кӧ гәләк бәлабуйи йә. Һьнә де-бавед кӧ чунә wәлате хәриб бьжин, зарʹед хwәйә тʹәзәбуйи дьшиньн бал мәрьвед хwә, сәва әwана зарʹа wан мәзьн кьн. Әwана ӧса дькьн сәва wәлате хәрибда диса бәрдәwам кьн бьхәбьтьн у пʹәра чекьн. Рʹаст ә әw сафикьрьна шәхси йә, ле әм гәрәке бира хwәда хwәй кьн, wәки әме бона сафикьрьнед хwә бәр Хwәде щаба хwә бьдьн. (Бьхунә Рʹомайи 14:12.) Гәло wе аqьлайи бә һәрге әм бейи ширәта Кʹьтеба Пироз, сафикьрьна бькьн дәрһәqа малбәта хwә у хәбата хwә? На! Мәрʹа лазьм ә  аликʹарийа Баве мәйи әʹзмана, чьмки әм хwәха нькарьн рʹебәрийе гавед хwә бькьн (Йерәм. 10:23).

16. Жьнькәке чь сафикьрьн кьр чахе кӧрʹ жерʹа бу, у чь али wе кьр сафикьрьна рʹаст бькә?

¹⁶ Кʹӧлфәтәкерʹа кӧ wәлате хәрибда дьжи, кӧрʹ һатә буйине. Әwе дьхwәст зарʹа хwә бьшинә wәлате хwә сәва кӧ де-баве wе зарʹа wе хwәй кьн. Ле wи wәʹдәйи әwе жьньке тʹәви Шәʹдед Йaһоwа дәстпекьр Кʹьтеба Пироз һин бә, у рʹӧһʹанида гәләк зу пешда чу. Әw пеһʹәсийа wәки Хwәде жерʹа борщдари дайә кӧ әw хwәха зарʹа хwә мәзьн кә у дәрһәqа Хwәде һин кә (Зәб. 127:3; Мәтʹлк. 22:6). Әwе жьньке дӧада дьле хwә Йaһоwарʹа вәкьр, чаwа кӧ Кʹьтеба Пироз мә ширәт дькә (Зәб. 62:7, 8). Әwе жьньке дәрһәqа дәрәща хwә хушкерʹа гьли кьр кʹижан кӧ һинбуна Кʹьтеба Пироз тʹәви wе дәрбаз дькьр, у ӧса жи хушк-бьред дьнра. Мәрьвед wейи незик у һәвалед wе әw дьдәʹфандьн wәки зарʹа хwә бьшинә бал кальк у пирька зарʹе, ле йәкә әw дьфькьри, wәки әw йәк нәрʹаст ә. Мере wе гәләк әʹщебмайи ма кӧ ча хушк-бьред щьватеда сәва wе у зарʹа wе хәм дькьн, у әwи дәстпекьр Кʹьтеба Пироз һин бә у тʹәви жьн-зарʹа хwә һәрʹә сәр щьвате. Бәле әw жьньк гәләк ша бу, чахе фәʹм кьр кӧ Йaһоwа дӧайе wейи бь дьле сах бьһист у али wе кьр.

17. Чь ширәт мә станд жь тʹәшкиләте, кӧ чаwа һинбуна Кʹьтеба Пироз дәрбаз кьн?

¹⁷ Пәй рʹебәрийе һәрʹьн. Чахе әм пәй рʹебәрийа тʹәшкиләта Хwәде дьчьн, бь ве йәке жи әм амьнийа хwә Йaһоwарʹа избат дькьн. Мәсәлә, wәрә шеwьр кьн ширәтәке кӧ тʹәшкиләте да мә дәрһәqа wан мәрьва, тʹәви кʹе әм Кʹьтеба Пироз дәрбаз дькьн. Ширәт әw бу кӧ чахе әм кәсәки пе кʹьтеба «Чь Һин Дькә Кʹьтеба Пироз?» һин дькьн, паши һинбуне чәнд дәqа wирʹа гьли кьн дәрһәqа тʹәшкиләта мә. Мәсәлә, әм дькарьн wанрʹа нишан кьн видео бь наве «Чь Дьqәwьмә Ода Щьватеда?» у брошура «Кʹи Иро Qьрара Йaһоwа Дьqәдинә?» Чахе тʹәви кәсәки һинбуне хьлаз дькьн пе кʹьтеба «Чь Һин Дькә Кʹьтеба Пироз?», мәрʹа ширәт һатә дайине, wәки паше дәстпекьн тʹәви wи дәрбаз кьн кʹьтеба «Хwә Нава Һʹьзкьрьна Хwәдеда Хwәй кә», һәла һе wи чахи жи һәрге әw мәрьв ида һатийә ньхӧмандьне. Тʹәшкиләт әwе ширәте дьдә мә сәва йед тʹәзә «баwәрийеда шьдийайи һʹимгьрти бьн» (Колс. 2:7). Ле тӧ пәй рʹебәрийа тʹәшкиләта Йaһоwа дьчи?

18, 19. Чь мәʹни һәнә кӧ әм гәрәке жь Йаһоwа рʹази бьн?

¹⁸ Гәләк мәʹнийед мә һәнә жь бо чь жи әм гәрәке жь Йaһоwа рʹази бьн! Сәва әʹмьре хwә әм wирʹа борщдар ьн, чьмки бейи wи әме тʹӧнә буна у нәжитана (Кʹар. Шанд. 17:27, 28). Әwи ӧса жи кʹьтеба хwә дайә мә, әw һәйә Кʹьтеба Пироз. Чаwа кӧ Мәсиһийед Тʹесалоникида Хәбәра Хwәде qәбул кьрьн, мә жи әw кʹьтеб qәбул кьр ча әʹламәтийа Хwәде (1 Тʹеслн. 2:13).

¹⁹ Кʹьтеба Пироз али мә кьрийә кӧ әм незики Йaһоwа бунә, у әwи хwәха жи әм незики хwә кьрьн (Аqуб 4:8). Баве мәйи әʹзмана qәдьрәки мәзьн дайә мә кӧ әм нава тʹәшкиләта wида ньн. Бәле, әм гәләк qимәт дькьн әwан һʹәму кʹәрәма, кӧ әw дьдә мә! Зәбурбеж жи Хwәдерʹа гәләк рʹазибуна хwә дьда кʹьфше. Әwи гот: «Жь Хwәдерʹа спас бькьн, чьмки әw qәнщ ә; кʹәрәма wи һәр у һәр ә» (Зәб. 136:1; ИМ). Әw готьн «кʹәрәма wи һәр у һәр ә» Зәбура 136-да бист шәш щара те wәкʹьландьне. Һәрге әм амьн ьн Йaһоwарʹа у пәй рʹебәрийа тʹәшкиләта wи дьчьн, әw wе жийина һʹәта-һʹәтайе бьдә мә у кʹәрәма wи жи wе һәр у һәр бә!