1, 2. а) Чьда баwәрийа Мәсиһийа щöдә дьбә жь баwәрийа мәрьвед ве дьнйайе? б) Кʹижан пьрсед фәрз ньһа әме шеwьр кьн?

ҺʹӘМУ Мәсиһийед рʹаст гәләк һивийе нә, чахе пе чʹәʹве хwә бьвиньн кö qьрара Йаһоwа бе сери у наве wи бе рʹумәткьрьне (Йуһʹн. 10:16; Мәт. 6:9, 10). Рʹасти жи әw wәʹдә wе чьqас хwәш бә у жь ве четьр ида чь һәйә! Йаһоwа öса жи мәрʹа соз да, кö wе жийина һʹәта-һʹәтайе бьдә мә, йед рʹункьрийарʹа сәр әʹзмана, ле йед дьнрʹа сәр әʹрде (2 Пәт. 3:13). Ле һʹәта әw wәʹдә бе, әм дьхwазьн бьвиньн кö чаwа щьмәʹта Йаһоwа рʹöһʹанида һе пешда һәрʹә.

² Һәрге баwәрийа мә рʹаст ә, әме тʹö щар «дöдьли» нибьн, wәки «чь кö әм һивийе нә, wе бе сери». Әw те һʹәсабе кö әме сәд сәләфи баwәр бьн, wәки созед Йаһоwа wе бенә сери (Ибрн. 11:1, ДТʹ). Гәләк мәрьвед ве дьнйайе жи һивийа тьштәки нә, ле йәкә дöдьли нә һәла әw йәк wе бе сери йан на. Мәсәлә, гәләк мәрьвед хöмарбаз һивийе нә кö пʹәрʹе qальм qазанщ кьн, ле сәд сәләфи баwәр ниньн wе qазанщ кьн йан на. Дьбәкә һун дьфькьрьн, гәло һун ча дькарьн qә дöдьли нәбьн, wәки чь кö һун һивийе нә, wе әʹсә бе сери? У чь кʹаре һуне бьстиньн, һәрге баwәрийа wә qәwи йә һьндава созед Хwәде?

3. Чьрʹа әм баwәр дькьн wәки созед Хwәде wе бенә сери?

 ³ Баwәри жь зькмакийе найе, чьмки баwәри әw һәйә бәре рʹöһʹе Хwәдейи пироз, кʹижан кö һʹöкöм дькә сәр мәрьвед дьлнәрм (Галт. 5:22). Ле Кʹьтеба Пирозда найе готьне кö баwәрийа Йаһоwа һәйә, йан жи кö жерʹа лазьм ә баwәри. Чьмки Йаһоwа һьмзор ә у лапи билан ә, у тʹö тьшт нькарә рʹийа wи бьгьрә сәва qьрара хwә бинә сери. Йаһоwа һьндава созед хwәда öса баwәр ә, кö әw һʹәсаб дькә wәки созед wи ида һатьнә сери. Кʹьтеба Пирозда әw гьлийед öса дьбежә: «Һәр тьшт һатә сери». (Бьхунә Әʹйанти 21:3-6.) Һʹиме баwәрийа мә әw ә, кö әм заньн wәки Йаһоwа «Хwәдейе амьн ә», йе кö тʹьме созед хwә тинә сери (Qан. Дщр. 7:9, ПКʹМ).

4. Хьзмәткʹаред Хwәде кö бәри дәwрана мә дьжитьн, һивийа чь wәʹдәйи бун?

⁴ Ибрани сәре 11-да, наве 16 жьн у мера ньвисар ә, йед кö созед Хwәде qайим баwәр дькьрьн. Wи сәрида öса жи те готьне дәрһәqа мәрьвед дьн, йед кö «баwәрийа хwәда бәрбьчʹәʹв бун» (Ибрн. 11:39). Әw һʹәмушк һивийа «зöрʹәт» бун, кʹижан кö Хwәде соз да, кö әw «зöрʹәт» wе бе у Шәйтʹан бьһʹьнщьрʹинә, у öса жи qьрара Йаһоwа йа пешийе бинә сери (Дәстп. 3:15). Әw мәрьвед амьн пешийа һатьна «зöрʹәте» создайи мьрьнә, демәк пешийа Иса Мәсиһ, йе кö рʹе вәкьр сәва мәрьв бьжин сәр әʹзмана. Ләма әwана һивийе нибун кö wе бьжин сәр әʹзмана (Галт. 3:16). Ле созед Йаһоwа тʹö щар найенә гöһастьне, у әw wе wан мәрьва жь мьрьне рʹакә. Әwана wе бьбьнә беqьсур у һʹәта-һʹәтайе сәр әʹрде бьжин (Зәб. 37:11; Иша. 26:19; Һос. 13:14).

5, 6. Бьраһим у малбәта wи һивийа чь wәʹдәйи бун у ча wана баwәрийа хwә qәwи хwәй дькьрьн? (Бьньһерʹә шькле әʹwльн.)

⁵ Ибрани 11:13-да дәрһәqа хьзмәткʹаред бәре те готьне: «Әв һʹәму жи кö баwәрийеда мьрьн, ле созед Хwәде нәстандьн. Әwана тʹәне әw соз дурва дитьн, ша бун». Йәк жь wан мәрьвед амьн Бьраһим бу. Ле гәло әw һивийе бу, кö wе әʹмрәки баш бьстинә, чахе «зöрʹәта» создайи wе сәрwертийе бькә? Иса рʹастә-рʹаст щаба wе пьрсе да: «Баве wә Бьраһим һʹәйра wе рʹожа мьнда бу, wи дит у ша бу» (Йуһʹн. 8:56). Сәра, Исһаq, Аqуб у мәрьвед дьн жи һивийа wи wәʹдәйи бун, чахе Пʹадшати, кʹижан кö «әʹфьрандар у авакьре wе Хwәде йә», сәр тʹәмамийа әʹрде сәрwертийе бькә (Ибрн. 11:8-11).

⁶ Ле гәло чьрʹа баwәрийа Бьраһим у йа малбәта wи qәwи бу? Әwана тʹьме дәрһәqа Хwәде педьһʹәсийан, мәсәлә жь мәрьвед әʹмьрда мәзьн кö Хwәдерʹа амьн бун, йан дьqәwьмә бь хәwьн у хәйала, йан жи дьбәкә жь ньвисаред бәре. Әwана чь кö педьһʹәсийан дәрһәqа Йаһоwа у созед wи, бира хwәда хwәй дькьрьн у сәр дьфькьрин. У чьмки wана баwәр дькьр кö созед Йаһоwа wе әʹсә бенә сери, әwана тәнгасийада Хwәдерʹа амьн дьман.

7. Йаһоwа бь сайа чь али мә дькә, wәки баwәрийа мә qәwи бьминә, у әм алийе хwәда гәрәке чь бькьн?

⁷ Сәва кö баwәрийа мә qәwи бьминә, Йаһоwа Хәбәра хwә дайә мә, демәк Кʹьтеба Пироз. Хәбәра хwәда әw мәрʹа дьбежә кö әм ча дькарьн бәхтәwар бьн. Ләма жи әм гәрәке һәр рʹож Кʹьтеба Пироз бьхуньн. (Зәб. 1:1-3; бьхунә Кʹаред Шандийа 17:11.) Хенщи wе йәке, Йаһоwа бь сайа «хöламе амьн у сәрwахт», мәрʹа хwарьна рʹöһʹани тʹер-тʹьжә дьдә (Мәт. 24:45). Һәрге әм жи мина хьзмәткʹаред бәре, тʹьме бьфькьрьн сәр созед Хwәде у гöрʹа тʹәмийед wи бькьн, баwәрийа мә wе qәwи бә у әме һивийа һатьна Пʹадшатийа Хwәде бьн.

8. Ча дöа дькарә баwәрийа мә qәwи кә?

 ⁸ Гәло диса чь али хьзмәткʹаред бәре дькьр кö баwәрийа wан qәwи бу? Дöа али wан дькьр. Чахе wана дьдит кö Хwәде ча щаба дöайед wан дьдә, баwәрийа wан qәwи дьбу (Нәһәм. 1:4, 11; Зәб. 34:4, 15, 17; Дан. 9:19-21). Әм жи гәрәке дöада дьле хwә Йаһоwарʹа вәкьн у хәмед хwә жерʹа гьли кьн. Ле әм гәрәке баwәр бьн, кö әw дöайе мә дьбьһе у wе qәwате бьдә мә, wәки әм wәʹде тәнгасийа шабуна хwә öнда нәкьн. Чахе әм бьвиньн кö Йаһоwа ча щаба дöайед мә дьдә, баwәрийа мә wе һе qәwи бә. (Бьхунә 1 Йуһʹәнна 5:14, 15.) Баwәри әw һәйә бәре рʹöһʹе пироз, ләма чаwа кö Иса гот, әм гәрәке тʹьме дöа бькьн, wәки Хwәде рʹöһʹе хwәйи пироз бьдә мә (Луqа 11:9, 13).

9. Хенщи кö бона хwә дöа бькьн, диса дәрһәqа кʹе әм гәрәке дöа бькьн?

⁹ Чахе әм Хwәдерʹа дöа дькьн, әм гәрәке тʹәне сәва хwә дöа нәкьн. Бе һʹәсаб тьшт һәнә, сәва чь жи әм дькарьн рʹазибуна хwә Йаһоwарʹа бьдьнә кʹьфше у шькьрийе бьдьнә wи! (Зәб. 40:5) Әм дöайед хwәда гәрәке öса жи «гьртийа бир биньн, һʹәсаб кьн кö чаwа [әм] жи тʹәви wан гьрти нә». У öса жи әм гәрәке дöа бькьн сәва хушк-бьред мә нав тʹәмамийа дьнйайе, илаһи сәва «рʹебәред хwә». Чахе әм бьвиньн кö Йаһоwа ча щаба дöайед мә дьдә, әw йәк wе дьле мә бьгьрә у әме һе незики wи бьн (Ибрн. 13:3, 7).

10. Гьли кьн мәсәлед хьзмәткʹаред Хwәде, йед кö амьн манә, у чь али wан кьр кö әwана амьн ман?

¹⁰ Ибрани сәре 11-да Паwлос гьли дькә дәрһәqа гәләк хьзмәткʹаред Хwәде, йед кö рʹасти тәнгасийа һатьнә у Хwәдерʹа амьн манә. Мәсәлә, әwи гот дәрһәqа жьнед амьн, кöрʹед кʹижана мьрьбун, ле паше һатьнә сахкьрьне. Wана баwәр дькьр созе Хwәде кö мьри wе рʹабьн. Паше, Паwлос гьли кьр дәрһәqа әwед кö «азайи нәхwәстьн у нава щәфада мьрьн, wәки жь мьрьне рʹабьн бьгьһижьнә жийинәкә һе qәнщ» (Ибрн. 11:35). Дьqәwьмә Паwлос дьгот дәрһәqа Набот у Зәкәрйа, кʹижан кö данә бәр кәвьра, чьмки wана гöрʹа Хwәде дькьр (1 Пʹадш. 21:3, 15; 2 Дир. 24:20, 21). Данийел у һәвалед wи жи бәр бьжартьне бун, һәла Хwәдерʹа амьн бьминьн, йан жи сәре хwә бәр хöданед qәлп дайньн. Wана дькарьбу «азайи» бьжбарта, ле wана баwәрийа хwә Хwәде дьанин у сәва wирʹа амьн бьминьн һазьр бун әʹмьре хwә жи бьдьн. Данийел авитьнә нав шерʹа, ле һәвалед wи авитьнә нава агьр. Йәкә wана qайим баwәр дькьр, кö Хwәде wе qәwате бьдә wан у али wан бькә сәбьр кьн wан чәтьнайада (Ибрн. 11:33, 34; Дан. 3:16-18, 20, 28; 6:13, 16, 21-23).

11. Пʹехәмбәред амьн рʹасти кʹижан тәнгасийа дьһатьн?

¹¹ Гәләк пʹехәмбәред амьн, мәсәлә Миха у Йерәмйа, кәлада дьһатьнә «зерандьне», у һьн жи мәрьва qәрфе хwә wана дькьрьн. Һьнәк жи мина Елйас, «ль бәрʹи у чʹийа дьгәрʹийан, шкәфт у нәʹлада дьман». Һәр кәс жь wан Хwәдерʹа амьн ман, чьмки дöдьли нибун wәки созед Хwәде wе әʹсә бенә сери (Ибрн. 11:1, 36-38; 1 Пʹадш. 18:13; 22:24-27; Йерәм. 20:1, 2; 28:10, 11; 32:2).

12. Кʹе qайим сәбьр кьр тәнгасийада у чь али wи кьр ве йәкеда?

¹² Чахе Паwлос гьли кьр дәрһәqа щурʹә-щурʹә мер у жьнед амьн, әwи паше гьли кьр дәрһәqа wи кәси, кʹижан бу мәсәләкә лапә qәwи. Әw һәбу Иса Мәсиһ. Ибрани 12:2-да Паwлос гот, wәки Иса «бона wе шабуна пешийа хwә», стуна щәфайе һьлда, «шәрм бәр тьштәки һʹәсаб нәкьр, паше кʹеләка Хwәдейә рʹасте сәр тʹәхт рʹуньшт». Иса щәфе гьран кʹьшанд у Хwәдерʹа амьн ма чьмки баwәрийа  wи qайим бу, у әм гәрәке кʹур бьфькьрьн сәр мәсәла wи. (Бьхунә Ибрани 12:3.) Гәләк Мәсиһийед qьрʹна йәкеда әʹмьре хwә öнда кьрьн, чьмки мина Иса амьн ман Хwәдерʹа. Мәсәлә жь wана йәк Антипас бу (Әʹйан. 2:13). Ле әw һʹәму Мәсиһийед амьн, хәлата хwә ида стандьнә. Әwана жи, мина хьзмәткʹаред бәре, һивийе бун «wәки жь мьрьне рʹабьн бьгьһижнә жийинәкә һе qәнщ» (Ибрн. 11:35). У әw һʹәму Мәсиһийед амьн, паши сала 1914, чахе Пʹадшатийа Хwәде саз бу, һатьнә сахкьрьне wәки бьжин сәр әʹзмана у тʹәви Иса сәрwертийе әʹрде бькьн (Әʹйан. 20:4).

13, 14. Рудолф Грикен рʹасти чь тәнгасийа һат, у чь али wи кьр кö сәбьр кә?

¹³ Иро бь милйона хьзмәткʹаред Хwәде чʹәʹв дьдьнә Иса. Әwана жи һивийа созед Хwәде нә, у wирʹа амьн дьминьн wәʹде тәнгасийа. Wәрә мәсәла бьраки мә бьньһерʹьн, наве wи Рудолф Грикен ә. Әw сала 1925 Алманйайеда һатийә буйине. Әwи дьани бира хwә wәки мала wида, сәр диwара шьклед qәwьмандьнед жь Кʹьтеба Пироз һәбун. Әwи ньвиси: «Сәр шькләки гöр тʹәви бәрхьке бу, пьльнг тʹәви карьке, гольк тʹәви шер, һʹәмушк әʹдьлайеда бун, у гәде бьчʹук wана дажот  . . . Шькьлед wи щурʹәйи һʹьше мьнда гәләк кʹур ман» (Иша. 11:6-9). Нава гәләк салада Рудолф qайим дьһатә зерандьне, пешийе Гестапойа Натсиста wи дьзерандьн, паше жи Комунист «Стаси» йа Алманйа Рʹоһлате. Wәʹде wан тәнгасийа, әwи әw шькьл у щьнәт дьда бәр чʹәʹве хwә, у öса әw баwәрийа хwә qәwи хwәй кьр.

¹⁴ Рудолф гәләк чәтьнайед дьн жи дит. Дийа wи гьртигәһа натсистада жь нәхwәшикә гьран мьр. Баве wи рʹöһʹанида сьст бу, у документ тʹьжә кьр wәки әw ида нахwазә бьбә Шәʹде Йаһоwа. Ле йәкә Рудолф баwәрийа хwә öнда нәкьр. Чахе әw жь кәле дәркʹәт, әw бу бәрпьрсийаре мьһале у паше Мәкʹтәба Гиләд хьлаз кьр. Паши мәкʹтәбе әw Чилистанеда һатә кʹьфшкьрьне ча мисйонер, у паше wедәре диса ча бәрпьрсийаре мьһале хьзмәт дькьр. Паше әw зәwьщи тʹәви хушкәкә мисйонер Патси. Саләк дәрбаз бу, qиза wанә вьрʹни мьр. Паше, жьна wийә 43 сали мьр, кʹижан кö әw гәләк һʹьз дькьр. Рудолф бәр wан тәнгасийа тәйах кьр, у бәрдәwам дькьр Йаһоwарʹа хьзмәт кә. Чахе әw әʹмьрда мәзьн бу у нәхwәш бу, һьнге жи әw пешәнг бу у ча рʹуспи хьзмәт дькьр. Сәрһатийа wи әм дькарьн бьхуньн жь «Бьрща Qәрәwьлийе», йа 1 Тʹәбахе, сала 1997, сәр рʹупʹелед 20-25. ^[1]

15. Мәсәла һьнә хушк-бьред иройин биньн, йед кö рʹасти зерандьна тен ле йәкә шабуна хwә хьзмәтийеда öнда накьн.

¹⁵ Иро гәләк пәй хушк-бьред мә дькʹәвьн у wан дьзериньн, ле йәкә әwана бәрдәwам дькьн бь шабуне Хwәдерʹа хьзмәт дькьн. Мәсәлә, гәләк жь wан, Әритрейа, Сингапур, у Корейа Башуреда кәледа ньн, чьмки тʹәвнәбуйине хwәй дькьн у «шур» һьлнадьн дәсте хwә (Мәт. 26:52). Нава wан гьртийада ньн Есак, Негеде у Паулос, йед ида 20 сала зедәтьр кәла Әритрейайеда ньн. Wедәре wана гәләк дьзериньн. Хенщи ве йәке, әwана нә дькарьн бьзәwьщьн, нә жи мьqати де-баве хwә бьн, йед кö әʹмьрда мәзьн ьн. Ле йәкә әwана амьн дьминьн Йаһоwарʹа у баwәрийа хwә qайим хwәй дькьн. Һәла һе нобәдаред кәледа жи qәдьре wан дьгьрьн. Сәр сьфәте wан бьра те кʹьфше кö әwана шабуна хwә öнда накьн. Шьклед wан әм дькарьн сәр малпәра мә jw.org бьвиньн.

16. Баwәрийа qәwи дькарә wә жь чь хwәй кә?

¹⁶ Гәләк хушк-бьред мә дьбәкә рʹасти wан зерандьна нәһатьнә, ле баwәрийа wан бь щурʹәки майин те щерʹьбандьне. Гәләк тәʹли-тәнгийада ньн жь бо кʹәсиббуне, шәрʹа, йан жь бо хәзаба. Һьнәк жи, мина Муса у пʹехәмбәред дьн, нәкʹәтьнә һʹәйра наве хwә. Әwана мина ве дьнйайе ниньн, кö пәй һәбуне кʹәвьн у тʹәне сәва хwә бьфькьрьн. Ле гәло чь али wан дькә кö әwана амьн дьминьн Хwәдерʹа? Әwана Йаһоwа гәләк һʹьз дькьн. Әwана qайим баwәрийа хwә созед wи тиньн, кö әw wе һʹәму хьрабийе кʹöта кә у дьнйа тʹәзәда wе жийина һʹәта-һʹәтайе бьдә хьзмәткʹаред хwәйи амьн. (Бьхунә Зәбур 37:5, 7, 9, 29.)

17. Һун ча дьхwазьн баwәрийа хwә qәwи хwәй кьн, у тʹемайа дьнда әме дәрһәqа чь шеwьр кьн?

¹⁷ Ве тʹемайеда, мә дит кö чаwа фькьрандьн сәр созед Хwәде у дöа, баwәрийа мә qәwи дькә. Чахе баwәрийа мә qәwи йә, әм дькарьн тәнгасийа сәбьр кьн. Тʹема дьнда әме хәбәрдьн, кö диса чь те һʹәсабе баwәри.