1. Баwәри чьрʹа һʹöнöрәки qимәт ә?

БАWӘРИ, һʹöнöрәки гәләк qимәт ә, у әw һʹöнöр нә бал һʹәму мәрьва һәйә (2 Тʹеслн. 3:2). Ле Йаһоwа баwәри дайә һʹәму хьзмәткʹаред хwә (Рʹом. 12:3; Галт. 5:22). Әм гьшк гәрәке жь Йаһоwа рʹази бьн, кö әwи баwәри дайә мә.

2, 3. а) Чь кʹәрәма wе бьстиньн әw мәрьв, баwәрийа кʹе жи һәйә? б) Кʹижан пьрса иро әме шеwьр кьн?

² Иса гот wәки Баве wийи әʹзмана, бь сайа wи мәрьва незики хwә дькә (Йуһʹн. 6:44, 65). Чахе әм баwәрийа хwә Иса тиньн, әм дькарьн бона гöне хwә бахшандьне бьстиньн. У әв йәк рʹе вәдькә кö әм дькарьн бьбьнә достед Йаһоwа у ахьрийеда жийина һʹәта-һʹәтайе бьстиньн (Рʹом. 6:23). Ле мә чь кьрийә кö кʹәрәмед öса баш бьстиньн? Бь рʹастийе, әм һежа ниньн кö wан кʹәрәма бьстиньн, чьмки әм гöнәкʹар ьн у һежайи мьрьне нә (Зәб. 103:10). Ле йәкә Йаһоwа нав мәда тьштед баш дитийә, у ләма бь qәнщийа хwәйә кö әм һежа ниньн, дьле мә вәкьр wәки әм мьзгинийе qәбул кьн. У мә баwәрийа хwә Иса у qöрбана wи ани, ләма әм дькарьн һивийа жийина һʹәта-һʹәтайе бьн. (Бьхунә 1 Йуһʹәнна 4:9, 10.)

 ³ Ле бь рʹастийе чь йә баwәри? Һәрге әм заньн дәрһәqа кʹәрәмед Хwәде кö әwи мәрʹа соз да, гәло әw те һʹәсабе кö баwәрийа мә һәйә? У ча әм дькарьн тедәрхьн wәки баwәрийа мә һәйә?

4. Шьровәкьн кö чьрʹа баwәри әw тʹәне занәбун нинә.

⁴ Баwәри тʹәне әw йәк нинә кö әм дәрһәqа qьрара Хwәде заньн. Ле öса жи әw ә кö әм дьхwазьн öса бьжин, чаwа Хwәде хwәш те. Баwәри мә һелан дькә wәки әм али мәрьвед дьн жи бькьн, кö пебьһʹәсьн мьзгинийа Хwәде. Паwлосе шанди гот: «Һәгәр тö бь дәве хwә иqрар бьки, кö Иса Хöдан ә у дьле хwәда баwәр бьки, кö Хwәде әw жь нава мьрийа рʹакьрийә, те хьлаз би. Чьмки бь дьл йәк баwәр дькә, рʹаст те һʹәсабе у бь дәв иqрар дькә, хьлаз дьбә» (Рʹом. 10:9, 10; 2 Корн. 4:13).

5. Чьрʹа баwәри гәләк фәрз ә, у ча әм дькарьн баwәрийа хwә qәwи кьн? Мәсәле биньн.

⁵ Бәле, сәва кö жийина һʹәта-һʹәтайе бьстиньн, баwәрийа qәwи лазьм ә. Ле гәло чьрʹа фәрз ә кö баwәрийа мә qәwи бә? Wәрә мәсәла шинкайе шеwьр кьн. Сәва шинкайи шин бә у мәзьн бә, жерʹа ав лазьм ә. Һәрге ав кем бә, ахьрийеда әw wе бьчʹьлмьсә у һʹьшк бә. Баwәрийа мә жи öса нә, һәрге әм ле хwәй нәкьн, ахьрийеда әw wе сьст бә у кʹöта бә (Луqа 22:32; Ибрн. 3:12). Ле һәрге әм мьqати баwәрийа хwә бьн, әw wе сахләм бьминә у тʹьме мәзьн бә (2 Тʹеслн. 1:3; Тито 2:2).

6. Ча Ибрани 11:1 шьровәдькә кö чь йә баwәри?

⁶ Ибрани 11:1 шьровәдькә кö баwәри чь йә. Ве рʹезеда әм дьхуньн: «Баwәри әw ә, чахе әм дöдьли ниньн, wәки чь кö әм һивийе нә, wе бе сери, у чахе бь сайа избатийа, әм дöдьли ниньн wан тьштада йед кö найенә дитьн, ле бь рʹастийе һәнә, ДТʹ». Жь ве рʹезе әм педьһʹәсьн кö баwәри дö тьштада те кʹьфше, 1) Чахе һивийа wан тьшта нә, чь кö баwәр дькьн, бәса хәбәре, әм һивийа wан qәwьмандьна нә, кö Хwәде мәрʹа соз да, ле әw соз һе нәһатьнә сери. Мәсәлә, әм һивийе нә, чахе Хwәде wе һʹәму зöлми кʹöта кә, у дьнйа тʹәзә wе бе. 2) Әм баwәр дькьн тьштед кö һәнә, ле найенә дитьн. Ве рʹезеда хәбәра Йунани кö һатә wәлгәрʹандьне ча «избатийа» wан тьшта, те һʹәсабе чахе мәрьв сәд сәләфи баwәр дькә тьштәки, чь кö әw навинә. Мәсәлә, әw баwәр дькә кö Йаһоwа Хwәде һәйә, Иса Мәсиһ, мьлйакʹәт, у öса жи Пʹадшатийа әʹзмана (Ибрн. 11:3). Ле гәло wе чьда бе кʹьфше кö әм бь рʹастийе созед Хwәде баwәр дькьн у öса жи тьштед кö әм нькарьн бьвиньн? Әw wе бе кʹьфше пе хәбәрдана мә у кьред мә. Бей wан тьшта, баwәрийа мә пʹучʹ ә.

7. Мәсәла Нöһ ча али мә дькә wәки әм фәʹм кьн чь йә баwәрийа рʹаст? (Бьньһерʹә шькле әʹwльн.)

⁷ Ибрани 11:7-да әм дьхуньн дәрһәqа баwәрийа Нöһ, йе кö «бона тьштед кö һе нәдьһатьнә кʹьфше фәрман жь Хwәде станд у бь хофа Хwәде рʹабу бона хьлазбуна мала хwә гәми чекьр». Нöһ гьлийед Йаһоwа баwәр кьр, у гәмийа мәзьн чекьр. У әм дькарьн бежьн кö мәрьвед дор-бәре wи же дьпьрсин, кö һәла чьрʹа әw гәмийа öса мәзьн чедькә. Ле Нöһ хwә кәр нәдькьр. Баwәрийа wи гәләк qәwи бу, ләма әwи бь мерхаси шәʹдәти дьда у wанрʹа дьгот дәрһәqа диwана Хwәде. Дьqәwьмә Нöһ һәма рʹастә-рʹаст гьлийед Йаһоwа wанрʹа  дьwәкʹьланд, чахе Йаһоwа жерʹа гот: «Qьрʹа һʹәмуйед хwәйибәдән һатийә ль бәр чʹәʹве мьн, чьмки рʹуйе ванда әʹрд хьрабийава тʹьжи буйә . . . Ва әзе ава тофане ль сәр дьне рʹакьм, wәки һәр бәдәна кö бин ль бәр һәйә бьн пʹәрʹе әʹзменда qьрʹ бә у ль сәр рʹуйе әʹрде жи чь кö һәйә öнда бә». Дьбәкә öса жи Нöһ wанрʹа шьровәдькьр кö әwана дькарьн хьлаз бьн, тʹәне һәрге бькʹәвьнә гәмийе, чаwа Хwәде фәрман дабу. Öса Нöһ баwәрийа хwә да кʹьфше, чьмки «рʹасти даннасин дькьр» (Дәстп. 6:13, 17, 18, ПКʹМ; 2 Пәт. 2:5).

8. Аqуб ча шьровәкьр кö чь те һʹәсабе баwәрийа рʹаст?

⁸ Аqуб жи кʹьтеба хwәда дәрһәqа баwәрийе ньвиси. Әwи жи гот wәки баwәрийа рʹаст гәрәке кьред мәрьвада бе кʹьфше. Әwи ньвиси: «Кʹа баwәрийа хwә бе кьрьна нишани мьн кә, әзе жи баwәрийе бь кьрьнед хwәва нишани тә кьм» (Аqуб 2:18). Бәле, тʹәне баwәри бәс нинә, чьмки щьн жи баwәр дькьн wәки Хwәде һәйә, ле баwәрийа wан qәлп ә. Әwана мьqабьли Йаһоwа у qьрара wи дьчьн (Аqуб 2:19, 20). Ле мәрьве кö баwәрийа wи рʹаст ә, пе  кьре хwә әве йәке дьдә кʹьфше. Бьраһим пʹехәмбәр һәма йәки öса бу. Аqуб дәрһәqа wи ньвиси: «Нә Бьраһиме баве мә бь кьра рʹаст һатә һʹәсабе, гава кöрʹе хwә Исһаq дани сәр горигәһе, кö бькә qöрбан? Тö дьбини кö баwәрийе тʹәви кьред wи йа хwә кьр у бь wан кьра баwәрийе рʹийа хwә qәданд?» Паше wан гьлийа, Аqуб диса да кʹьфше кö баwәри бей шьхöл пʹучʹ ә. Әwи гот: «Чаwа qальб бе рʹöһʹ мьри йә, öса жи баwәри бейи кьра мьри йә» (Аqуб 2:21-23, 26).

9, 10. Чь те һʹәсабе Кöрʹ баwәр бькьн?

⁹ Паши 30 сала зедәтьр, Йуһʹәннайе шанди кʹьтеба хwә у се нәʹмә ньвиси. Ле гәло әwи жи мина ньвискʹаред дьнә Кʹьтеба Пироз, рʹьнд фәʹм дькьр кö чь йә баwәрийа рʹаст? Кʹьтеба хwәда әwи гәләк щар да хәбате гьлийе Йунани, кö щара те wәлгәрʹандьне ча «баwәркьрьн».

¹⁰ Йуһʹәнна шьровәкьр: «Әwе кö Кöрʹ баwәр дькә, жийина wийә һʹәта-һʹәтайе һәйә. Әwе кö гöрʹа Кöрʹ накә, әw жийине набинә, ле хәзәба Хwәде ль сәр wи дьминә» (Йуһʹн. 3:36). Бәле, һәрге әм баwәрийа хwә Иса тиньн, әм гәрәке гöрʹа тʹәмийед wи бькьн. У Йуһʹәнна гәләк щар гьлийед Иса дьwәкʹьланд, кö гәләк фәрз ә тʹьме баwәрийа хwә бьдьнә кʹьфше (Йуһʹн. 3:16; 6:29, 40; 11:25, 26; 14:1, 12).

11. Әм ча дькарьн рʹазибуна хwә бьдьнә кʹьфше Хwәдерʹа кö әм рʹастийе заньн?

¹¹ Әм чьqас жь Йаһоwа рʹази нә, wәки әwи бь рʹöһʹе хwәйи пироз мәрʹа рʹастийе әʹйан кьр у али мә кьр wәки әм мьзгинийе баwәр кьн. (Бьхунә Луqа 10:21.) Әм гәрәке тʹьме рʹази бьн кö әwи әм незики хwә кьрьн бь Кöрʹе хwә, йе кö «Пешикʹеш у Кʹамьлкьре» баwәрийа мә йә. Ле әм ча дькарьн рʹазибуна хwә бьдьнә кʹьфше, сәва һʹәму тьштед кö Йаһоwа бона мә кьрийә? (Ибрн. 12:2) Әм гәрәке бь сайа дöа у хwәндьна Хәбәра wи, тʹьме баwәрийа хwә qәwи кьн (Әфәс. 6:18; 1 Пәт. 2:2).

12. Чьда гәрәке бе кʹьфше wәки баwәрийа мә һәйә?

¹² Әм бь кьред хwә дькарьн әʹйан кьн, wәки әм созед Йаһоwа qайим баwәр дькьн. Мәсәлә, әм гәрәке бәрдәwам кьн мьзгинийа дәрһәqа Пʹадшатийа Хwәде бәла кьн у али мәрьва бькьн кö бьбьнә шагьртед Иса. Әм öса жи гәрәке һʹәмуйарʹа «qәнщийе бькьн, илаһи нәфәред мала Хwәдерʹа» (Галт. 6:10). Öса жи, әм дьхәбьтьн wәки «мәрьве кәвьн кьред wива жь сәр хwә» бехьн, wәки тʹö тьшт достийа мә тʹәви Йаһоwа хьраб нәкә (Колс. 3:5, 8-10).

13. Баwәри һьндава Хwәде чьрʹа фәрз ә у Кʹьтеба Пироз баwәрийе бәрамбәри чь дькә?

¹³ Кʹьтеба Пироз дьбежә: «Бе баwәри тʹö щар набә кö инсан ль Хwәде хwәш бе, чьмки әwе кö незики Хwәде дьбә, гәрәке баwәр бькә, кö Хwәде һәйә у wе wан хәлат кә, кʹижан кö ль wи дьгәрʹьн» (Ибрн. 11:6). Кʹьтеба Пироз дьдә кʹьфше, кö гәләк фәрз ә wәки бал Мәсиһийед рʹаст баwәри һьндава Хwәде һәбә, чьмки Кʹьтеба Пироз баwәрийе бәрамбәри һʹиме авайи дькә (Ибрн. 6:1). Ле хенщи баwәрийе, һʹöнöред дьн жи гәрәке һәбьн щәм Мәсиһийа, сәва хwә нава һʹьзкьрьна Хwәдеда хwәй кьн. (Бьхунә 2 Пәтрус 1:5-7; Щьһуд. 20, 21.)

14, 15. Чьрʹа һʹьзкьрьн һе фәрз ә нә кö баwәри?

¹⁴ Ньвискʹаред Кʹьтеба Пироз кö  Пәймана Ну ньвисинә, данә кʹьфше wәки баwәри гәләк фәрз ә, чьмки бь сәда щара дәрһәqа баwәрийе ньвисинә, ле дәрһәqа һʹöнöред дьн, кем ньвисинә. Ле гәло әw те һʹәсабе wәки баwәри һʹöнöре лапи фәрз ә бона Мәсиһийа?

¹⁵ Дәрһәqа баwәрийе у һʹьзкьрьне Паwлос гот: «Һәгәр баwәрийа мьн жи һаqас һәбә, һʹәта чʹийа жи жь щи бьгöһезьм, ле һʹьзкьрьн дьле мьнда тʹöнәбә, әз нә тʹö тьшт ьм» (1 Корн. 13:2). Иса жи да кʹьфше кö һʹьзкьрьн гәләк фәрз ә. Әwи гот qанунеда «тʹәмийа һәрә мәзьн», әw һәйә һʹьзкьрьн һьндава Хwәде (Мәт. 22:35-40). Һʹьзкьрьн али мә дькә нә кö тʹәне баwәрийе нав хwәда пешда биньн, ле һʹöнöред дьн жи. Кʹьтеба Пирозда öса жи те готьне wәки һʹьзкьрьн «һәр гав баwәр дькә». Демәк, һʹьзкьрьн али мә дькә wәки чь кö Хwәде бь Кʹьтеба Пироз мәрʹа дьбежә, әм һәр тьшти баwәр кьн (1 Корн. 13:4, 7).

16, 17. Кʹьтеба Пироз ча дьдә кʹьфше wәки баwәри у һʹьзкьрьн фәрз ьн, у жь wан һәрда кʹижан һе фәрз ә у чьрʹа?

¹⁶ Ньвискʹаред Кʹьтеба Пироз гәләк щар баwәри у һʹьзкьрьн нава щьмледа тʹәвайи ньвисинә, сәва кö бьдьнә кʹьфше wәки әw һәрдö һʹöнöр гәләк фәрз ьн. Wәрә бьньһерʹьн һьнә мәсәла. Паwлос бьра ширәт кьр, wәки әwана «зьрьһʹа баwәрийе у һʹьзкьрьне ль хwә wәргьрьн» (1 Тʹеслн. 5:8). Пәтрус дәрһәqа Иса ньвиси: «Wә әw нәдитийә, ле һун wи һʹьз дькьн, ньһа жи набиньн, ле wи баwәр дькьн» (1 Пәт. 1:8). Аqуб жи бьред рʹункьрирʹа гот: «Нә Хwәде бәләнгазед ве дьне бьжартьн, wәки бь баwәрийе дәwләти бьн у wаред wе Пʹадшатийе бьн, кʹижан кö Хwәде wанрʹа соз дайә, йед кö wи һʹьз дькьн?» (Аqуб 2:5). Йуһʹәнна жи ньвиси: «Әв ә тʹәмийа [Хwәде], кö әм баwәрийа хwә наве Кöрʹе wи Иса Мәсиһ биньн у әм һәвдö һʹьз бькьн» (1 Йуһʹн. 3:23).

¹⁷ Рʹаст ә баwәри һьндава созед Хwәде фәрз ә, ле чахе әw һʹәму соз бенә сери, әw һʹöнöр ида wе мәрʹа лазьм нәйе. Ле мәрʹа лазьм ә һʹьзкьрьна хwә һьндава Хwәде у мәрьва мәзьн кьн, чьмки әw һʹöнöр wе тʹö щар кʹöта нәбә. Ләма Паwлос гьлийед öса ньвиси: «Ижар, әв һәр се дьминьн: Баwәри, һеви, һʹьзкьрьн. У жь wан йа һәри мәзьн һʹьзкьрьн ә» (1 Корн. 13:13, ИМ).

18, 19. Әм жь бо баwәрийа хwә чь кʹәрәма иро дьвиньн, у бона ве йәке кʹе һежайи рʹумәте йә?

¹⁸ Рʹожа иройин, щьмәʹта Йаһоwа баwәрийа хwә Пʹадшатийа Хwәде тинә у пьштгьрийа Пʹадшатийе дькә. Әwана щьнәта рʹöһʹанида ньн у һәвдö һʹьз дькьн, чьмки әwана бәре рʹöһʹе Хwәдейи пироз дьдьнә кʹьфше (Галт. 5:22, 23). Ле ахьрийа wе йәке чь йә? Һʹәйшт милйон хушк у бьра әʹдьлайе у йәктийеда ньн. Рʹасти жи баwәри у һʹьзкьрьна Мәсиһийед рʹаст рʹьнд әʹйан дьбә!

¹⁹ Ле бей аликʹарийа Хwәде әw йәкти wе тʹö щар тʹöнәбуйа. Әw йәкти Йаһоwа рʹумәт дькә, у әw рʹумәткьрьн wе бәрдәwам бә һʹәта-һʹәтайе (Иша. 55:13). Щьнәта мәйә рʹöһʹани wе һе мәзьн у гәш бә, чахе тʹәмамийа әʹрде wе бь мәрьвед рʹаст, беqьсур у бәхтәwар тʹьжә бә. Әwана wе һʹәта-һʹәтайе шькьрийе бьдьнә наве Йаһоwа. Чьqас пʹешкʹешәкә мәзьн Хwәде дайә мә, кö «пе баwәрийе» әм дькарьн хьлаз бьн (Әфәс. 2:8). Дә wәрә әм тʹьме баwәрийа хwә созед Баве мә Йаһоwа биньн!