ҺӘР сал, ль Жапоне, шәш милион мәрьва зедәтьр тенә ль зийарәте, йе кӧ ль сәр нивгьрава Шемайе нава мешәда нә. Әԝана ԝәкә дӧ һʹәзар сал ә кӧ тенә ль Пʹарьстгәһа Мәзьн, дь Иседа у сәре хԝә датиньн бәр хӧдайед тәʹве Аматәрасу Омекаме йед религийа Шинто. Хьзмәткʹаре ԝе религийайе пешийа ԝе йәке кӧ бькʹәвьнә пʹарьстгәһе, хԝә тʹәмьз дькьн бь ԝе йәке кӧ дәсте хԝә у дәве хԝә дьшон. Паше әԝана дьсәкьньн бәр ода бона хьзмәткьрьне у ретуала тиньн сери бь ԝе йәке, кӧ сәре хԝә бәржер дькьн, дәсте хԝә һәв дьхьн, у дӧа дькьн. * Баԝәрмәндед Шинторʹа найе ԛәдәхәкьрьне ретуалед баԝәрмәндед дьн биньнә сери. У ләма жи һәр кәсе кӧ дьһатә пʹарьстгәһа Шинто, дьхԝази Будист, Мәсиһи йан баԝәрмәндед дьн, дькарьбун ретуалед Шинто биньнә сери.

Дьнйайеда гәләк рʹелигийед мәзьнда, щийед пироз йан жи зийарәт һәнә, * у бь милиона мәрьв тенә ль ԝан щийа. Ԝәлатед Мәсиһийада, гәләк дер у пʹарьстгәһ һәнә, кʹижан һатьнә тʹәсмилкьрьне Исарʹа, Мәрйәмерʹа у йед пирозрʹа. Гәләк пʹарьстге мина ԝан, һатьбун авакьрьне ԝан щийа, кʹидәре кӧ сәрһатийед жь Кʹьтеба Пироз ԛәԝьмин, йан жи кʹидәре кӧ тьштед пироз һатьбун дитьне у хԝәйкьрьне, йан жи чаԝа һьнәк дьбежьн «кʹәрәмәтед» ԝәʹде иро һатьбун сери. Гәләк мәрьв дьчьнә пʹарьстгәһа чьмки әԝана баԝәр дькьн, кӧ һәрге әԝана щийед пирозда дӧа бькьн дӧайед ԝан ԝе бенә бьһистьне. Һьнәк жи дьчьнә зийарәта, у щийед ӧса кʹижани әԝана һʹәсаб дькьн щийе пироз, чьмки бь ԝе йәке дьхԝазьн амьнийа хԝә Хԝәдерʹа бьднә кʹьфше.

Һәрге һун пʹарьстгәһада дӧа бькьн, гәло Хԝәде дӧайед ԝә ԝе бьбьһе у щаба дӧайед ԝә ԝе бьдә? Гәло Хԝәде жь амьнийа ԝан кʹе дьчьнә зийарәта у щийед пироз рʹази йә? Ле гәло лазьм ә мәрьв пʹарьстгәһада сәре хԝә бәр Хԝәде дайньн? Щабед ԝан пьрса ԝе нә кӧ тʹәне шьровәкьн ча әм гәрәке бьньһерʹьн ль сәр чуйина ль пʹарьстгәһада, ле ӧса жи ԝе али мә бькьн фәʹм кьн чь щурʹә һʹәбандьн Хԝәде хԝәш те.

Чахе Иса Мәсиһ тʹәви кʹӧлфәта Самәри хәбәр да, әԝи әʹйан кьр кӧ ча Хԝәде дьньһерʹә сәр дӧакьрьнед ль пʹарьстгәһа у щийед пирозда. Чахе Иса Самәрйайерʹа дәрбаз дьбу әԝ сәкьни бәр бира аве незики бажаре Сухар, сәва кӧ һеса бә. Ԝедәре әԝи тʹәви кʹӧлфәтәке хәбәр да, кʹижан кӧ һатьбу бәр бира аве ԝәки аве бькʹьшинә. Ԝәʹде хәбәрдана хԝә, кʹӧлфәте да кʹьфше фьрԛийа мәзьн ортʹа дине  Щьһуйийа у Самәрийа. Әԝе гот: «Кал у бавед мә ль сәре ви чʹийайи Хԝәде һʹәбандьнә, ле һун дьбежьн щийе Хԝәде һʹәбандьне гәрәке ль Оршәлиме бә» (Йуһʹәнна 4:5-9, 20).

Әԝе кʹӧлфәте дәрһәԛа Чʹийайе Гәризим дьгот, кʹижан кӧ алийе бакуре ԝәкә 50 км., незики Оршәлиме бу. Ԝедәре пʹарьстгәһа Самәрйа һәбу, кʹидәре кӧ әԝана щәжьн дәрбаз дькьрьн, мәсәлә Щәжьна Дәрбазбуне. Ле дәԝса кӧ дина хԝә бьдә сәр фьрԛийа ортʹа дӧ мьләта, Иса кʹӧлфәтерʹа гот: «Әʹвде, мьн баԝәр бькә, ԝәхтәке бе, кӧ һуне нә ль ви чʹийайи у нә жи ль Оршәлиме Баве бьһʹәбиньн» (Йуһʹәнна 4:21). Әԝ кʹӧлфәт жь ԝе щабе гәләк әʹщебмайи бу, илаһи чьмки әԝ щаб жь мәрьве Щьһу бу! Ле гәло чьрʹа һʹәбандьн дь пʹарьстгәһа Оршәлимеда гәрәке бьһата һьлдане?

Иса бәрдәԝам кьр: «Ле бәле ԝәхте бе, иди перʹа гьһиштийә жи, кӧ йед рʹаст дьһʹәбиньн ԝе бь рʹӧһʹ у рʹастийе Баве бьһʹәбиньн, чьмки Бав йед аһа дьһʹәбиньн дьгәрʹә» (Йуһʹәнна 4:23). Нава Ԛьрʹнада, Щьһуйа һʹәсаб дькьрьн кӧ щийе лапә сәрәкә бона һʹәбандьне әԝ һәйә пʹарьстгәһа Оршәлиме. Әԝана сале се щара дьчунә ԝедәре ԝәки Хԝәдайе хԝә Йаһоԝарʹа ԛӧрбана биньн (Дәркʹәтьн 23:14-17). Ле Иса гот ԝәки әԝ һʹәму тьшт ԝе бе гӧһастьне, у «йед рʹаст» ԝе «бь рʹӧһʹ у рʹастийе» бьһʹәбиньн у хьзмәт кьн.

Пʹарьстгәһа Щьһуйа сәр әʹрде бу у дьһатә дитьне. Ле рʹӧһʹ у рʹасти найнә дитьн у нә жи щийед ԝанә сәр әʹрде һәйә. Бь ԝи щурʹәйи Иса шьровәкьр кӧ щийе һʹәбандьна рʹаст ԝе гьредайи нибә бь тьштед кӧ тен дитьн, мәсәлә Чʹийайе Гәризимева, пʹарьстгәһа Оршәлимева, у нә жи щийед пироз ә дьнва.

Ԝәʹде хәбәрдана тʹәви кʹӧлфәта Самәри, Иса ӧса жи кʹьфш кьр кӧ «ԝәхте бе», чахе һʹәбандьна Хԝәдерʹа ԝе бе гӧһастьн. Ле әԝ йәк кʹәнге гәрәке бьһата сери? Ԝи чахи, гава Иса хԝә кьрә ԛӧрбан, у бь ԝе йәке щурʹе һʹәбандьна Щьһуйа, йа кӧ сәр һʹиме ԛануна Муса бу, да һьлдане (Рʹомайи 10:4). Иса ӧса жи гот кӧ әԝ ԝәхт «иди перʹа гьһиштийә». Иса дәрһәԛа кʹижан ԝәхти дьгот? Әԝ дәрһәԛа ԝи ԝәхти дьгот, чахе кӧ әԝи шагьрте хԝә ида тʹоп дькьр, кʹижан кӧ гәрәке гӧһдарийа хԝә бьдана кʹьфше һьндава тʹәмийа кӧ әԝи гот: «Хԝәде рʹӧһʹ ә у йед кӧ ԝи дьһʹәбиньн жи гәрәке бь рʹӧһʹ у рʹастийе ԝи бьһʹәбиньн» (Йуһʹәнна 4:24). Демәк чь те һʹәсабе бьһʹәбиньн бь рʹӧһʹ у рʹастийе?

Чахе Иса дьгот дәрһәԛа һʹәбандьна бь рʹӧһʹ, әԝи дьхԝәст бьгота кӧ мәрьв гәрәке бь рʹебәрийа рʹӧһʹе Хԝәдейи пироз бьжи, кʹижан кӧ али мә дькә Ньвисаре фәʹм кьн (1 Корьнтʹи 2:9-12). Ле рʹастийа  дәрһәԛа кʹижани Иса дьгот, әԝ һәйә занәбуна рʹаст жь Кʹьтеба Пироз. Ләма жи һʹәбандьна мәйә сәр һʹиме Кʹьтеба Пироз у бь рʹебәрийа рʹӧһʹе ԝийи пироз, ԝе Хԝәде хԝәш бе.

Чаԝа әм гәрәке бьньһерʹьн сәр чуйина пʹарьстгәһа бона һʹәбандьне? Чахе әм дьдьн һʹәсабе тʹәмийа Иса дәрһәԛа ԝе йәке, кӧ шагьрте ԝи бь рʹӧһʹ у рʹастийе гәрәке Хԝәде бьһʹәбиньн, фәʹмдари йә кӧ һʹәбандьна пʹарьстгәһада у щийе пирозда бона Баве мәйи әʹзмана, пʹучʹ те һʹәсабе. Хенщи ԝе йәке жь Кʹьтеба Пироз әм педьһʹәсьн кӧ ча Хԝәде дьньһерʹә сәр һʹәбандьна пʹута: «Жь пʹутпʹарьстийе бьрʹәвьн» у «хԝә жь пʹутпʹарьстийе хԝәй кьн» (1 Корьнтʹи 10:14; 1 Йуһʹәнна 5:21). Ләма жи хьзмәткʹаред Хԝәде йед рʹаст сәре хԝә бәр Хԝәде данайньн ль ԝан щийа, кʹижан кӧ тенә һʹәсабе щийед пироз йан щийед бона һʹәбандьна пʹута.

Ле әԝ йәк найе һʹәсабе ԝәки Хәбәра Хԝәде наһелә ԝәки щийе бона дӧакьрьне, һинбуне, у дьшьрмишбуне һәбьн. Щийед бона щьвине кʹижан кӧ тʹәрбәт у хәмлә нә, лайиԛ ьн бона һинбуне у шеԝьркьрьна тьштед рʹӧһʹани. Ӧса жи һәла бьфькьрьн, һәгәр мәрьв кәвьр датиньн сәр мәзәле мәрьве хԝәйи незик бона биранине, ԝе йәкеда тьштәки хьраб тʹӧнә, ӧса нинә. Һьнәк әԝе йәке дькьн, сәва бьдьнә кʹьфше кӧ мәрьвед хԝәйи мьри бир накьн, у ԝана һʹьз дькьн. Ле һәрге щийе ӧса һʹәсаб кьн ча щийе пироз йан щийед кӧ сәре хԝә бәр пʹута дайньн, бь ԝе йәке әме пешбәри хәбәра Иса бьчуна.

Ча те кʹьфше нәлазьм ә һәрʹьнә пʹарьстгәһа бь ве нете, кӧ тʹәне ԝедәре Хԝәде ԝе һе зедә гӧһ бьдә дӧайед ԝә. У ӧса жи нәфькьрьн кӧ һәгәр һун рʹеԝитийа дьреж бькьн у һәрʹьн пʹарьстгәһе, һәма бона хатьре ԝе йәке Хԝәде ԝе жь ԝә рʹази бә у кʹәрәма бьдә ԝә. Кʹьтеба Пироз дьбежә ԝәки Йаһоԝа Хԝәде «Хӧдане әʹрд у әʹзмен ә у пʹарьстгәһед бь дәста чекьрида наминә». Ле әԝ йәк мә жь Хԝәде дур нахә. Әм дькарьн ԝирʹа дӧа бькьн у дӧайед мә ль һʹәму щийа ԝе бенә бьһистьн, чьмки «Хԝәде жь мә һәр кәси нә дур ә» (Кʹаред Шандийа 17:24-27).