1, 2. Ча бьраки тедәрхьст кӧ алийе рʹӧһʹанида кемасийа ԝи һәйә, у бона ве йәке әԝи чь кьр?

БЬРАКИ мә бь наве Роберт щаһьлтийеда һатийә ньхӧмандьне, ле бона ԝи хьзмәти Хԝәдерʹа щийе фәрз нәдьгьрт. Әԝ гьли дькә: «Мьн тʹӧ щар хьраби нәдькьр, ле хьзмәтийа мьн бе һʹәмде мьн бу. Аликива дьһатә кʹьфше кӧ әз рʹӧһʹанида ԛәԝи мә, чьмки әз тʹьме дьһатьмә щьвате у сале чәнд щара мьн ча пешәнге кʹомәкдар хьзмәт дькьр. Ле тьштәк әʹмьре мьнда кем бу».

² Роберт фәʹм нәкьр кӧ чь ԝи кем бу, һʹәта кӧ әԝ нәзәԝьщи. Әԝи у жьна ԝи гәләк щар листькәк дьлистьн, кʹижан кӧ пьрсед Кʹьтеба Пирозва гьредайи дьданә һәв. Жьна ԝи рʹӧһʹанида йәкә ԛәԝи бу у һеса щаба ԝан пьрса дьда. Ле Роберт тедәрхьст кӧ әԝ нә жи занә ча щаба хԝә бьдә у тʹьме шәрм дькьр. Әԝ дьбежә: «Мьн хԝә ӧса тʹәхмин дькьр кӧ әз ԛә тьштәки ньзаньм. Мьн дьле хԝәда гот, ‹Һәрге әз дьхԝазьм малхеки рʹӧһʹани бьм, әз гәрәке гӧһастьна бькьм›». У Роберт һәма ӧса жи кьр. Әԝ гьли дькә: «Мьн Кʹьтеба Пироз леколин дькьр, һе зедә у зедә, у һеди-һеди бал мьн һәр тьшт щиԝар бу. Мьн фәʹмкʹари ԛазанщ кьр, у йа лапә фәрз әԝ ә кӧ әз һе незики Йаһоԝа бумә».

3. а) Жь сәрһатийа Роберт әм чь дькарьн һин бьн? б) Кʹижан пьрсед сәрәкә әме ньһа шеԝьр кьн?

 ³ Жь сәрһатийа Роберт әм дәрсәкә фәрз хԝәрʹа һин дьбьн. Дьбәкә занәбуна мә һәйә у әм тʹьме тенә щьвата, ле тʹәне әԝ тьшт мә накьнә мәрьве рʹӧһʹани. Йан жи дьбәкә әм рʹӧһʹанида пешда чунә, ле чахе әм хԝә дьщерʹьбиньн, әм тедәрдьхьн ԝәки һәнә тьшт кʹижанада әм гәрәке диса пешда һәрʹьн (Фили. 3:16). Сәва кӧ әм бәрдәԝам кьн рʹӧһʹанида пешда һәрʹьн, әме ве готареда щаба се пьрсед сәрәкә шеԝьр кьн: 1) Чь ԝе али мә бькә, кӧ әм тедәрхьн рʹӧһʹанида әм ча ньн? 2) Ча әм дькарьн рʹӧһʹанида ԛәԝи бьн? 3) Чахе әм рʹӧһʹанида ԛәԝи нә, ча әԝ йәк дькарә жийина мәда али мә бькә?

4. Ширәта жь Әфәси 4:23, 24 бона кʹе йә?

⁴ Чахе әм бунә хьзмәткʹаред Хԝәде, әм гәләк тьштада һатьнә гӧһастьне. Әԝ йәк һʹәму алийава сәр жийина мә һʹӧкӧм бу. Ле паши ньхӧмандьне жи мә бәрдәԝам дькьр бенә гӧһастьне. Кʹьтеба Пироз дьбежә, ԝәки әм гәрәке бәрдәԝам кьн «бь рʹӧһʹ у фькьред хԝәда нуйәжийин бьн» (Әфәс. 4:23, 24). Әм гьшк гӧнәкʹар ьн, ләма әм гәрәке тʹьме гӧһастьна бькьн. Һәла һе хьзмәткʹаред Йаһоԝа йед кӧ гәләк сала жерʹа хьзмәт дькьн, әԝ жи гәрәке мьԛати рʹӧһʹанийа хԝә бьн (Фили. 3:12, 13).

5. Кʹижан пьрс дькарьн али мә бькьн рʹӧһʹанийа хԝә бьщерʹьбиньн?

⁵ Сәва рʹӧһʹанида пешда һәрʹьн у рʹӧһʹанийа хԝә хԝәй кьн, әм гәрәке һʹәлал хԝә бьщерʹьбиньн. Фьрԛи тʹӧнә әм щаһьл ьн йан әʹмьрда мәзьн ьн, һәр кәс жь мә дькарә пьрсед ӧса бьдә хԝә: «Гәло әз рʹӧһʹанида һе пешда дьчьм, йан на? Гәло хәйсәт-һʹӧнӧрада әз дьбьмә мина Мәсиһ? Гәло ньһерʹандьна мьн у рʹабун-рʹуньштьна мьн щьватеда, дәрһәԛа мьн чь әʹйан дькьн? Гәло хәбәрдана мьн дәрһәԛа хԝәстьнед мьн чь дьдә кʹьфше? Һинбуна шәхси, кʹьнщхԝәкьрьн, хәмьландьн, у әԝ йәк кӧ әз ча ԛәбул дькьм ширәта, чь әʹйан дькьн дәрһәԛа мьн? Чахе әз рʹасти щерʹьбандьна тем, әз ча хԝә дьдьмә кʹьфше? Гәло әз бумә Мәсиһийе гьһишти?» (Әфәс. 4:13). Чахе әм кʹур бьфькьрьн сәр щабед ԝан пьрса, әԝ йәк ԝе али мә бькә фәʹм кьн кӧ рʹӧһʹанида әм чьԛас пешда чунә.

6. Сәва әм фәʹм кьн кӧ рʹӧһʹанида әм ча ньн, диса чь дькарә али мә бькә?

⁶ Сәва әм тедәрхьн кӧ рʹӧһʹанида әм гьһишти нә йан на, щара аликʹарийа мәрьвед дьн мәрʹа лазьм ә. Паԝлосе шанди гот кӧ мәрьве нәрʹӧһʹани, йане йе бәдәни, фәʹм накә кӧ әԝ бәр Хԝәде чь тьштед нәрʹаст дькә. Ле мәрьве рʹӧһʹани фәʹм дькә ньһерʹандьна Хԝәде дәрһәԛа тьшта у дьвинә кӧ Хԝәде һʹьз накә жийина кӧ мәрьве бәдәни дьжи (1 Корн. 2:14-16; 3:1-3). Рʹуспи чʹәʹв дьдьнә нет-фькьра Иса, зу тʹәхмин дькьн чахе нав хушк-бьрада фькьред бәдәни пешда тен. Һәрге әԝана ве йәке нав мәда бьвиньн у незики мә бьн сәва аликʹарийе бьдьнә мә, гәло әме ширәта ԝан ԛәбул кьн? Һәрге әм ӧса бькьн, әме нишан кьн кӧ әм дьхԝазьн рʹӧһʹанида мәрьвнә ԛәԝи бьн (Ԝаиз 7:5, 9).

7. Чьрʹа сәва бьбьнә мәрьвнә рʹӧһʹани, тʹәне занәбун бәс нинә?

⁷ Бир нәкьн кӧ занәбуна Кʹьтеба Пироз бәс нинә сәва әм бьбьнә мәрьвед рʹӧһʹани. Сьлеман Пʹадша гәләк тьшт заньбу дәрһәԛа Йаһоԝа. Готьнед ԝи һәла һе жи бунә пʹара Кʹьтеба Пироз. Ле хьлазийеда әԝи рʹӧһʹанийа хԝә ӧнда кьр у Йаһоԝарʹа амьн нәма (1 Пʹадш. 4:29, 30; 11:4-6). Демәк, хенщи занәбуна Кʹьтеба Пироз, диса чь лазьм ә? Лазьм ә әм бәрдәԝам кьн рʹӧһʹанида пешда һәрʹьн (Колс. 2:6, 7). Ле чаԝа ве йәке бькьн?

8, 9. а) Чь ԝе али мә бькә баԝәрийа хԝә ԛәԝи кьн? б) Нета мә гәрәке чь бә чахе әм леколина дькьн у дьфькьрьн? (Бьньһерʹә шькле әʹԝльн.)

 ⁸ Паԝлосе шанди Мәсиһийед ԛьрʹна йәке ширәт кьр ԝәки бьбьнә «гьһишти» (Ибрн. 6:1). Ле әве ширәте әм ча дькарьн бьдьнә хәбате? Гавәкә фәрз әԝ ә, кӧ кʹьтеба «Хԝә Нава Һʹьзкьрьна Хԝәдеда Хԝәй кьн» хԝәрʹа леколин бькьн. Әв кʹьтеб ԝе али ԝә бькә принсипед Кʹьтеба Пироз жийина хԝәда бьдьнә хәбате. Һәрге ԝә әв кʹьтеб ида хьлаз кьрийә, ԝе баш бә һун әʹдәбйәтед дьн леколин бькьн, кʹижан кӧ ԝе али ԝә бькьн баԝәрийа хԝә ԛәԝи кьн (Колс. 1:23). Ӧса жи һун гәрәке бьфькьрьн сәр ԝан тьшта чь кӧ һин дьбьн, у Йаһоԝарʹа дӧа бькьн, ԝәки али ԝә бькә ԝан тьшта әʹмьре хԝәда бьдьнә хәбате.

⁹ Бир нәкьн кӧ чахе әм леколина дькьн у дьфькьрьн, нета мә гәрәке әԝ бә ԝәки хԝәстьна мә ԛәԝи бә кӧ дьле Йаһоԝа ша кьн у гӧрʹа ԛанунед ԝи бькьн (Зәб. 40:8; 119:97). Хенщи ве йәке, әм гәрәке инкʹар кьн һәр тьшти чь кӧ дькарә рʹе мә бьгьрә рʹӧһʹанида пешда һәрʹьн (Тито 2:11, 12).

10. Щаһьл чь дькарьн бькьн сәва рʹӧһʹанида ԛәԝи бьн?

¹⁰ Һәрге тӧ щаһьл и, гәло нетед тәйә рʹӧһʹани һәнә? Бьраки мә йе кӧ Бәйтʹәледа хьзмәт дькә, хԝәрʹа кьрә хәйсәт ԝәки ԝәʹде щьвата мәзьн хәбәр дә тʹәви ԝан, йед кӧ гәрәке бенә ньхӧмандьне. Гәләк жь ԝан щаһьл ьн. Әв бьра жь ԝана дьпьрсә кӧ чь нетед ԝанә рʹӧһʹани һәнә. Щаба гәләка әʹйан дькә кӧ әԝана пешда фькьринә кӧ чаԝа әԝана дьхԝазьн Йаһоԝарʹа хьзмәт кьн, мәсәлә бьбьнә пешәнг йан жи дәрбази ԝи щийи бьн кʹидәре һʹәԝщәтийа мьзгинвана һәйә. Ле щара һәнә щаһьлед ӧса, йед кӧ ньзаньн ча щаба хԝә бьдьн. Гәло әв те һʹәсабе кӧ әԝана дьфькьрьн ԝәки нетед рʹӧһʹани ԝанрʹа нәлазьм ьн? Һәрге тӧ щаһьл и, пьрсед ӧса бьдә хԝә: «Гәло әз сәва хатре де-баве хԝә хьзмәт дькьм у темә щьвате? Гәло әз һе незики Хԝәде дьбьм у һәләԛәтийа хԝәйә шәхси тʹәви Йаһоԝа ԛәԝи дькьм?» Фәʹмдари йә кӧ нетед рʹӧһʹани бал мә һәр кәси гәрәке һәбьн, нә кӧ тʹәне бал щаһьла. Әв нет ԝе али мә бькьн кӧ рʹӧһʹанийа хԝә ԛәԝи кьн (Ԝаиз 12:1, 13).

11. а) Әм гәрәке чь бькьн сәва рʹӧһʹанида пешда һәрʹьн? б) Әм дькарьн чʹәʹв бьдьнә кʹижан хьзмәткʹаре Хԝәде?

¹¹ Чахе әм кемасийа нав хԝәда дьвиньн, әм гәрәке дәрберʹа сәр хԝә бьхәбьтьн у гӧһастьна бькьн. Гәләк фәрз ә ԝәки әм мәрьвнә рʹӧһʹани бьн, чьмки әԝ әʹмьре мәва гьредайи йә (Рʹом. 8:6-8). Ле бьбьнә мәрьвнә рʹӧһʹанида гьһишти, найе һʹәсабе кӧ бекемаси бьн. Фәрз ә әм алийе хԝәда һәр тьшти бькьн сәва рʹӧһʹанида пешда һәрʹьн. Ве йәкеда рʹӧһʹе Йаһоԝайи пироз дькарә али мә бькә. Бьраки мә бь наве Щон Бар кӧ бәре әндәме Кʹома Рʹебәрийе бу дәрһәԛа рʹеза жь Луԛа 13:24 гот: «Гәләк нькарьн ве йәке бькьн, чьмки әԝана епʹещә сәр хԝә нахәбьтьн сәва ԛәԝи бьн». Әм гәрәке чʹәʹв бьдьнә Аԛуб, кʹижан кӧ тʹәви мьлйакʹәт кʹәтә һʹӧщәте һʹәта кӧ кʹәрәм нәстанд (Дәстп. 32:26-28). Хԝәндьна Кʹьтеба Пироз һʹәԝас ә, ле бона мә әԝ гәрәке ча мьжулбун нибә. Әм гәрәке кʹур леколин бькьн сәва кӧ хьзнед рʹӧһʹани бьвиньн кʹижан кӧ ԝе кери мә бен.

12, 13. а) Чь ԝе али мә бькә сәва ширәта жь Рʹомайи 15:5 бьдьнә хәбате? б) Чаԝа мәсәлә у ширәта Пәтрусе шанди дькарә али мә бькә? в) Һун чь дькарьн бькьн сәва рʹӧһʹанида пешда һәрʹьн? (Бьньһерʹә чаргошә « Гав кӧ Әм Дькарьн Бавежьн сәва Рʹӧһʹанида Пешда Һәрʹьн».)

¹² Һәрге әм рʹӧһʹанийа хԝә ԛәԝи кьн, рʹӧһʹе пироз ԝе ԛәԝате бьдә мә сәва әм фькьред хԝә бьгӧһезьн. У бь сайа рʹӧһʹе пироз әме бькарьбьн сәр нет-фькьред Мәсиһ бьн (Рʹом. 15:5). Хенщи ве йәке, әԝ йәк ԝе али мә бькә хԝәстьнед бәдәни кʹокева нав хԝә дәрхьн у хәйсәт-һʹӧнӧред ӧса нав хԝәда пешда биньн кӧ Хԝәде хԝәш тен (Галт. 5:16, 22, 23). Һәрге ԝә тедәрхьстийә кӧ һʹьш-аԛьле ԝә дьчә  сәр һәбуке йан жи хԝәстьнед бәдәни, хԝә әглә нәкьн, сәр хԝә бьхәбьтьн. Тʹьме жь Йаһоԝа рʹӧһʹе пироз бьхԝазьн, у әԝ ԝе али ԝә бькә, ԝәки һун ньһерʹандьна хԝә бьгӧһезьн у һʹьш-аԛьле хԝә дайньн сәр тьштед фәрз (Луԛа 11:13). Биньн бира хԝә Пәтрусе шанди. Чәнд щара әԝи тьштед ӧса кьр ча мәрьвәки нәрʹӧһʹани (Мәт. 16:22, 23; Луԛа 22:34, 54-62; Галт. 2:11-14). Ле әԝ дьлтәнг нәбу, у Йаһоԝа али ԝи кьр. Һеди-һеди Пәтрус һин бу мина Иса бьфькьрә у әԝи ньһерʹандьна хԝә гӧһаст. Әм жи гәрәке ӧса бькьн.

¹³ Пәтрус паше дәрһәԛа чәнд һʹӧнӧра гот, кʹижан кӧ дькарьн али мә бькьн. (Бьхунә 2 Пәтрус 1:5-8.) Һәрге әм «һәр алийава хирәт кьн» сәва һʹӧнӧред ӧса нав хԝәда пешда биньн ча хԝәгьртьн, сәбьр, у һʹьзкьрьн һьндава хушк-бьра, әме рʹӧһʹанида һе пешда һәрʹьн. Ԝе баш бә әм һәр рʹож пьрсәкә ӧса бьдьнә хԝә: «Иро әз сәр кʹижан һʹӧнӧри дькарьм бьхәбьтьм сәва рʹӧһʹанида пешда һәрʹьм?»

14. Һәрге әм мәрьвнә рʹӧһʹани нә, әԝ йәк ԝе ча һʹӧкӧм бә сәр жийина мәйә һәррʹожи?

¹⁴ Һәрге әм мина Мәсиһ бьфькьрьн, әԝ йәк ԝе һʹӧкӧм бә сәр хәбәрдан, рʹабун-рʹуньштьна мә хәбатеда йан жи мәкʹтәбеда, ӧса жи сәр сафикьрьнед мәйә һәррʹожи. Әԝ сафикьрьнед мә ԝе әʹйан кьн, ԝәки әм дьхԝазьн чʹәʹв бьдьнә Иса. Чаԝа мәрьвнә рʹӧһʹани, әм нахԝазьн тьштәк һәләԛәтийа мә тʹәви Баве мәйи әʹзмана хьраб кә. Чахе әм рʹасти щерʹьбандьна бен, ньһерʹандьна мина йа Мәсиһ ԝе али мә бькә кӧ амьн бьминьн Хԝәдерʹа. У ӧса жи чахе әм сафикьрьна бькьн, әме ләз нәкʹәвьн у бьфькьрьн сәр ван пьрса: «Кʹижан принсипед Кʹьтеба Пироз ве сафикьрьнеда ԝе али мьн бькьн? Гәло Мәсиһ ве дәрәщеда ԝе чь бькьра? Кʹижан сафикьрьн ԝе Йаһоԝа хԝәш бе?» Әм гәрәке хԝәрʹа бькьн хәйсәт кӧ ӧса бьфькьрьн. Ԝәрә әм дәрһәԛа ве йәке чәнд дәрәща шеԝьр кьн. Һәр дәрәщәкеда, әме бьвиньн кӧ кʹижан принсипа Кʹьтеба Пироз ԝе али мә бькә сафикьрьна рʹаст бькьн.

15, 16. Мәсәле биньн кӧ чаԝа нет-фькьред мина йед Мәсиһ, дькарьн али мә бькьн сафикьрьнеда ԝәʹде а) бьжартьна һәвалзәԝащ. б) бьжартьна һәвала.

¹⁵ Бьжартьна һәвалзәԝащ. Дәрһәԛа ве йәке Кʹьтеба Пирозда принсип һәйә 2 Корьнти 6:14, 15-да. (Бьхунә.) Гьлийед Паԝлос әʹйан дьдьнә кʹьфше, кӧ мәрьве рʹӧһʹани гәләк щӧдә дьбә жь мәрьве бь һʹьш-аԛьле бәдәни. Гәло чаԝа әв принсип дькарә али ԝә бькә, кӧ һәвалзәԝащ рʹаст бьжберьн?

¹⁶ Һәвалти. Дина хԝә бьдьн принсипа жь 1 Корьнтʹи 15:33. (Бьхунә.) Мәрьве рʹӧһʹани ԝе тʹәви ԝан мәрьва һәвалтийе нәкә, йед кӧ дькарьн рʹӧһʹанийа ԝи сьст кьн. Ле кʹижан пьрс дькарьн али ԝә бькьн бь аԛьлайи һәвала бьжберьн? Мәсәлә, чаԝа һун интернете дьдьнә хәбате? Йан жи ча әԝ принсип дькарә али ԝә бькә, чахе һун тʹәви мәрьвед нәнас листькед онлайн дьлизьн?

17-19. Чаԝа рʹӧһʹанийа мә дькарә али мә бькә а) шьхӧле бекер нәкьн? б) нетед баш дайньн пешийа хԝә? в) чәтьнайед ортʹа хԝә у мәрьва сафи кьн?

¹⁷ Шьхӧлед кӧ рʹе мә дьгьрьн рʹӧһʹанида  мәзьн бьн. Паԝлосе шанди Мәсиһи пешда ширәт кьрьн, ԝәки әԝана фәсал бьн. (Бьхунә Ибрани 6:1) Ле гәло әм гәрәке жь кʹижан «кьрьнед кӧ дьбьнә бәрбь мьрьне» хԝә дур хԝәй кьн? Әԝ һәнә нет у шьхӧлед пʹучʹ кӧ тʹӧ кʹаре мәрʹа найньн. Әв принсип дькарә али мә бькә кӧ әм хԝә бьщерʹьбиньн, мәсәлә ван пьрса бьдьнә хԝә: «Гәло әв шьхӧл кӧ әз дьхԝазьм бькьм, шьхӧле бәдәни йә? Гәло лазьм ә әз бькʹәвьмә нава ԝи шьхӧли, кʹижан кӧ тʹәне сәва пʹәрәчекьрьне йә? Чьрʹа әз гәрәке нәкʹәвьмә нав ԝан кʹома, йед кӧ дьхԝазьн һʹале дьнйайе бьгӧһезьн?»

¹⁸ Нетед рʹӧһʹани. Иса ԝәʹде даннасинкьрьна сәр чʹийе, дәрһәԛа нетед рʹӧһʹани рʹебәрийа зәлал да (Мәт. 6:33). Бәле, мәрьве рʹӧһʹани нетед рʹӧһʹани датинә пешийа хԝә. У әв принсип али мә дькә щаба ԝан пьрса бьдьн: «Гәло лазьм ә әз паши мәкʹтәбе хԝәндьна бьльнд бьстиньм? Гәло гәрәке әз әве хәбате ԛәбул кьм?»

¹⁹ Һәвнәфәʹмкьрьн. Чаԝа ширәта Паԝлосе шанди дькарә али мә бькә чахе кәсәк мә дьдә хәйдандьне? (Рʹом. 12:18) Чаԝа шагьртед Мәсиһ, әме һәр тьшти бькьн сәва «тʹәви һʹәму мәрьва әʹдьлайийеда бьн». Чахе чәтьнайи ортʹа мә у кәсәкида пешда те, гәло әм ча хԝә дьдьнә кʹьфше? Мәрʹа чәтьн ә бәр һәв дахьн? Гәло әм тенә наскьрьне ча мәрьве кӧ әʹдьлайе чедькә? (Аԛуб 3:18).

20. Чьрʹа һун дьхԝазьн рʹӧһʹанида пешда һәрʹьн?

²⁰ Әв тʹәне чәнд мәсәлә нә кӧ дьдьнә кʹьфше, ԝәки чаԝа принсипед Хԝәде дькарьн али мә бькьн кӧ сафикьрьнед рʹаст бькьн. Һәрге әм рʹӧһʹанида ԛәԝи бьн, әме һе бәхтәԝар у дьлрʹьһʹәт бьн. Роберт бәʹса кʹижани мә жоре кьр, дьбежә: «Чахе һәләԛәтийа мьн тʹәви Йаһоԝа ԛәԝи бу, әз бумә малхе у баве һе баш. Әз дьлрʹьһʹәт у бәхтәԝар бумә». Әм жи дькарьн кʹәрәмед ӧса бьстиньн, һәрге рʹӧһʹанида пешда һәрʹьн. Чаԝа мәрьвед рʹӧһʹани, әме һе бәхтәԝар бьн, һьн ньһа, һьн жи чахе «жийина кӧ рʹасти жийин ә» ԛазанщ кьн (1 Тимтʹ. 6:19).