ИРО wан «рʹожед ахьрийеда» әʹмьр һе чәтьн буйә, у щьмәʹта Йаһоwарʹа һе зедә сәбьр лазьм ә (2 Тимтʹ. 3:1-5). Ве дьнйайеда дор бәре мә гәләк мәрьвед хwәһʹьз, берʹәʹм у тәмсьст һәнә. Сәбьра мәрьвед бь хәйсәт-һʹöнöред wи щурʹәйи кем ә. Ле һәр Мәсиһи гәрәке пьрсе бьдә хwә: «Дьбә кö әз жи мина мәрьвед ве дьнйайе бумә йәки бесәбьр? Чь те һʹәсабе бь рʹасти бь сәбьр бьн? У ча әз дькарьм әви һʹöнöре qимәт, бал хwә пешда биньм, кö әw бьбә пʹарәкә хәйсәте мьн?».

Кʹьтеба Пирозда хәбәра сәбьр найе һʹәсабе тʹәне әw йәк, чахе мәрьв проблемада тәйах дькә. Мәрьве бь сәбьр пе нете тәйах дькә, әw баwәр дькә wәки һәр тьшт wе баш бә. Әw тʹәне дәрһәqа хwә нафькьрә, ле öса жи дәрһәqа һалхwәшийа wан мәрьва, йед кö һерса wи тиньн йан жи нәһәqийе wи дькьн. Мәрьве бь сәбьр зәʹф бәрхwә накʹәвә, чьмки баwәрийа хwә öнда накә, кö һәләqәтийа wи тʹәви wан мәрьва wе алийе башда бе гöһастьне. Хәбәра Хwәде дьбежә кö сәбьр жь һʹьзкьрьне пешда те * (1 Корн. 13:4). «Сәбьркьрьн» öса жи дькʹәвә нава бәре рʹöһʹе пироз (Галт. 5:22, 23). Ле ча әwи һʹöнöри нав хwәда пешда биньн?

Сәва нав хwәда сәбьре пешда биньн, мәрʹа аликʹарийа рʹöһʹе Йаһоwайи пироз лазьм ә, кʹижан кö Хwәде дьдә wана, йед кö баwәри у итʹбарийа хwә wи тиньн (Луqа 11:13). Рʹаст ә qәwата рʹöһʹе Хwәдейи пироз мәзьн ә, ле йәкә әм жи ль гора дöайед хwә гәрәке алийе хwәда тьштәки бькьн (Зәб. 86:10, 11). Әw те һʹәсабе кö әм гәрәке сәр хwә бьхәбьтьн, wәки һәр рʹож бь сәбьр бьн, сәва әw һʹöнöр кʹокед хwә дьле мәда кʹур бәрʹдә. Ле һьнге жи лазьм ә әм һе зедә бькьн, сәва кö сәбьр бьбә хәйсәте мә. Ве йәкеда чь дькарә али мә бькә?

Әм дькарьн сәбьре нав хwәда пешда биньн, һәрге сәрһатийа Иса леколин бькьн у чʹәʹв бьдьнә wи. Паwлос ль гора мәсәла Иса шьровәкьр, wәки сәбьр жи дькʹәвә нав «мәрьве нуда». Паши ве йәке, әwи һелан кьр, wәки «әʹдьлайийа Мәсиһ сәрwертийе нет-фькьред» мә бькә (Колс. 3:10, 12, 15). Сәва әw әʹдьлайи «сәрwертийе» дьле мә бькә, әм гәрәке чʹәʹв бьдьнә баwәрийа Исайә qәwи у баwәр бьн wәки Хwәде wе wәʹдәда wан дәрәща кö мә дьлтәнг дькьн, рʹаст кә. Чахе әм чʹәʹв дьдьнә Иса, ида чь жи бьqәwьмә, әме сәбьра хwә öнда нәкьн (Йуһʹн. 14:27; 16:33).

Әм гьшк дьхwазьн дьнйа тʹәзә зу бе. Ле чахе әм дьфькьрьн дәрһәqа сәбьра Йаһоwа һьндава хwә, әм һин дьбьн сәбьр  кьн. Кʹьтеба Пироз дьбежә мә: «Хöдан созе хwә дәрәнги найехә, чаwа һьнәк дьфькьрьн. Әw бь думька дьреж ль wә сәбьр дькә, нахwазә тʹö кәс öнда бә, ле дьхwазә wәки һʹәму жь гöнәкьрьне вәгәрʹьн» (2 Пәт. 3:9). Һәрге әм бьфькьрьн кö Йаһоwа чьqас бь сәбьр ә һьндава мә, әме жи һьндава мәрьва бь сәбьр бьн (Рʹом. 2:4). Кʹижан дәрәщед дьнда жи мәрʹа сәбьр лазьм ә?

Һәр рʹож әм рʹасти wан дәрәща тен, кʹидәре кö сәбьра мә те щерʹьбандьне. Мәсәлә, һәрге кәсәк тʹәви wә хәбәр дьдә, ле һун дьхwазьн wирʹа тьштәки фәрз бежьн, wәрʹа wе сәбьр лазьм бә сәва хәбәрдана wи нәбьрʹьн (Аqуб 1:19). Дьбәкә wәрʹа öса жи сәбьр лазьм бә һәрге һун жь бо хәйсәтәки хушк йан бьраки әʹщьз дьбьн. Дәwса кö һерс кʹәвьн, wе һе аqьлайи бә бьфькьрьн кö Йаһоwа у Иса ча сәр кемасийед мә дьньһерʹьн. Әwана нав мәда шашийа нагәрʹьн, дәwсе әwана һʹöнöред баш дьгәрʹьн у бь сәбьр һивийе нә, wәки әм алийе башда бенә гöһастьне (1 Тимтʹ. 1:16; 1 Пәт. 3:12).

Сәбьр мәрʹа һьнге жи лазьм ә, гава кәсәк мәрʹа дьбежә wәки мә тьштәки нәрʹаст кьрийә йан жи готийә. Дьбәкә һьнге әм зу бьхәйдьн йан жи дәстпекьн хwә һәq дәрхьн. Ле Хәбәра Хwәде щурʹәки дьн ширәте дьдә мә. Wаизда әм дьхуньн: «Йе кö дь рʹöһʹда бь сәбьр ә, жь йе кö дь рʹöһʹда qöррәйи qәнщтьр ә. Бьра дь хәйдеда рʹöһʹе тә нә бь ләз бә, жь бәр кö хәйд дь синга беаqьланда бьщиһ буйә» (Wаиз 7:8, 9). Öса жи гава дәрһәqа мә тьштед дәрәw дьбежьн, һьнге жи әм гәрәке бь сәбьр бьн у пешийа кö тьштәки бежьн йан жи бькьн, рʹьнд бьфькьрьн. Иса әв принсип дьани сери, чахе мәрьва qәрфе хwә wи дькьрьн у wи дькʹәнийан (Мәт. 11:19).

Де-баварʹа илаһи һьнге лазьм ә сәбьр, чахе нав зарʹед хwәда фькьр, хwәстьн йан хәйсәте нәрʹаст дьвиньн. Дина хwә бьдьнә мәсәла Матиас, кʹижан кö Бәйтʹәла Скандинавйайеда хьзмәт дькә. Әw чахе щаһьл бу мәкʹтәбеда сәбьр дькьр, гава жь бо баwәрийа wи сәр wи дькʹәнийан. Пешийе, де-баве wи дәрһәqа ве йәке ньзаньбун, у дьдитьн кö кöрʹе wан дәстпекьрийә рʹастийеда бькʹәвә шьке. Баве Матиас, Гилис, тинә бира хwә: «Һьнге мәрʹа гәләк сәбьр лазьм бу. Матиас пьрс дьда: ‹Кʹи йә Хwәде? Дьбә кö Кʹьтеба Пироз Хәбәра Хwәде нинә? Әм жь кʹö заньн wәки бь рʹасти Хwәде фьлан тьшти жь мә дәʹwа дькә?›». Матиас öса жи дьготә баве хwә: «Һәрге баwәрийа мьн мина йа тә нинә, чьрʹа әз гәрәке бемә диwанкьрьне?».

Гилис дьбежә: «Щара, кöрʹе мә һерсәһерс пьрс дьда мә. Әw нә кö сәр мьн йан дийа хwә һерс дькʹәт, ле сәр рʹастийе, чьмки әwи тʹьре рʹасти жийина wи гьран дькә». Ле Гилис ве дәрәщеда ча хwә да кʹьфше? Әw дьбежә: «Әз бь сьһʹәта тʹәви кöрʹе хwә рʹудьньштьм у мә тʹәвайи хәбәр дьда. Һʹәчʹи зәʹф мьн гöһ дьда wи у щара пьрс дьданә wи, wәки әз бь тʹәмами фәʹм кьм әw чь тʹәхмин дькә у чь дьфькьрә.  Щара чахе мьн жерʹа тьштәк шьровәдькьр, мьн wәʹдә дьда wи, мәсәлә рʹожәк йан һе зедә, сәва әw бьфькьрә у паше диса шеwьр кьн. Ле щара öса жи дьбу кö мьн жерʹа дьгот, wәки мьнрʹа чәнд рʹож лазьм ә, сәва бьфькьрьм сәр ньһерʹандьна wи. Бь сайа wан шеwьркьрьна у хәбәрдана, Матиас һеди-һеди ньһерʹандьна хwә гöһаст у qәбул кьр һинкьрьнед öса ча мәсәлә кʹьрʹин, сәрwертийа Хwәде, у һʹьзкьрьна Йаһоwа. Бона ве йәке wәʹдә лазьм бу у щара чәтьн бу жи, ле һеди-һеди һʹьзкьрьна һьндава Йаһоwа дьле wида мәзьн бу. Әз у жьна хwә гәләк бәхтәwар ьн, кö сәбьра мәйә һьндава кöрʹе мә бадиһәwа нәчу у али wи кьр».

Гилис у жьна wи һьндава кöрʹе хwә бь сәбьр бун, у бь ве йәке дьданә кʹьфше кö итʹбарийа хwә аликʹарийа Йаһоwа дьанин. Әw тинә бира хwә: «Мьн гәләк щар Матиасрʹа дьгот, wәки әм wи гәләк һʹьз дькьн, у ләма әм тʹьме бона wи жь Йаһоwа һиви дькьн, сәва һʹьше wи вәкә». Әw де-бав гәләк ша нә wәки һʹöнöрәкә öса фәрз, демәк сәбьр данә кʹьфше.

Мәсиһийарʹа сәбьр лазьм ә һьнге жи, гава мьqати нәфәр йан жи һәвалед хwәйи бь нәхwәшийа кроники дьбьн. Дина хwә бьдьнә мәсәла Елене, * йа кö Скандинавйайеда дьжи.

Wәкә һʹәйшт сал пешда, дö щара инсулте мере Елене хьст, у мәжуйе wи зийан станд. Паши ве йәке әw тьштәк тʹәхмин накә. Елен бона һʹале мере хwә гәләк бәрхwә дькʹәвә. Әw дьбежә: «Әз гәләк сәбьр дькьм у гәләк дöа дькьм. Әз рʹеза жь Филипи 4:13 гәләк һʹьз дькьм, кʹидәре кö те готьне: ‹Әз һәр тьшти бь сайа wи дькарьм, йе кö qәwате дьдә мьн›». Бь qәwат у аликʹарийа Йаһоwа Елен бь сәбьр тәйах дькә бәр ве чәтьнайа хwә (Зәб. 62:5, 6).

Алийе сәбьреда бона мә мәсәла лапә мәзьн Йаһоwа йә (2 Пәт. 3:15). Кʹьтеба Пирозда һәнә гәләк сәрһати, кʹидәре кö Йаһоwа сәбьра гәләк мәзьн дайә кʹьфше (Нәһәм. 9:30; Иша.30:18). Мәсәлә, биньн бира хwә Йаһоwа ча бь сәбьр бу һьндава Бьраһимда, гава тʹәви wи дәрһәqа кʹöтакьрьна Содоме хәбәр дьда. Йаһоwа хәбәрдана Бьраһим нәдьбьри, дәwсе Әwи бь сәбьр гöһ дьда һәр гьлийед Бьраһим. Паше Йаһоwа гьлийед Бьраһим wәкʹьланд, у бь ве йәке жерʹа да кʹьфше, wәки рʹьнд гöһ дьда wи. Һьн жи Йаһоwа wи да баwәркьрьне, wәки wе qьрʹа Содоме нәйнә, һәрге жи wедәре тʹәне 10 мәрьвед рʹаст һәбьн (Дәстп. 18:22-33). Әw мәсәләкә мәзьн ә бона мә, кö әм жи бь сәбьр гöһ бьдьн мәрьва у әʹщьз нәбьн.

Сәбьр һʹöнöрәкә гәләк фәрз ә бона мәрьве ну, кʹижан кö һʹәму Мәсиһи гәрәке ль хwә кьн. Һәрге әм алийе хwәда һәр тьшти дькьн сәва әw һʹöнöре qимәт у qәwат нав хwәда пешда биньн, бь ве йәке әме һöрмәте бьдьнә Баве хwәйи сәбьр-ськʹане, у әwе мә һʹәсаб кә чаwа «йед кö бь баwәрийе у сәбьре созед Хwәде wар дьбун» (Ибрн. 6:10-12).