1. Әм ча тʹәви Йаһоwа дьхәбьтьн?

ЧАХЕ Йаһоwа мәрьв әʹфьранд, әwи дьхwәст wәки әwана бьбьнә һәвалхәбаткʹаред wи. Һәла һе иро мәрьвед гöнәкʹар жи, йед кö жерʹа амьн ьн, дькарьн һәр рʹож тʹәви Йаһоwа бьхәбьтьн. Мәсәлә, әм «тʹәвайи бона Хwәде дьхәбьтьн» чахе мьзгинийа Пʹадшатийе бәла дькьн у шагьрта һазьр дькьн (1 Корн. 3:5-9). Бьфькьрьн кö әw qәдьрәки чьqас мәзьн ә, кö Әʹфьрандаре һьмзор әм һежа һʹәсаб кьрьн сәва тʹәви wи шьхöләкә лапә мәзьнда һәвкʹарийе бькьн! Ле хенщи wи шьхöли, әм öса жи щурʹәки майин жи дькарьн тʹәви Йаһоwа бьхәбьтьн. Ве готареда әме шеwьр кьн, кö ча әм ве йәке дькьн чахе аликʹарийе дьдьнә нәфәред хwә у хушк-бьра, меванһʹьзийе дьдьнә кʹьфше, бь рʹәзәдьли щурʹә-щурʹә проектада шьхöл дькьн, у һе зедә хьзмәт дькьн (Колс. 3:23).

2. Чьрʹа әм гәрәке хwә бәрамбәри кәсәки нәкьн, кö кʹе чьqас бона Йаһоwа дькә?

² Wәʹде шеwьркьрьна ве готаре, хwә бәрамбәри кәсәки нәкьн, кö кʹе чьqас бона Йаһоwа дькә. Бир нәкьн кö әʹмьрда, сьһʹәт-qәwатеда, дәрәщада у фәрәсәтда әм нә мина һәв ьн. Паwлосе шанди жь бина бәр Хwәде ньвиси: «Бьра һәр кәс кьрьнед хwә бьдә сәр мезине у паши һьнге жь хwә рʹази бә,  нә кö хwә һьмбәри һәвале хwә кә» (Галт. 6:4).

3. Чьрʹа әм дькарьн бежьн wәки чахе әм мьqати нәфәред хwә дьбьн, әм тʹәви Йаһоwа һәвкʹарийе дькьн?

³ Йаһоwа жь мә дәʹwа дькә, wәки әм мьqати нәфәред хwә бьн. Мәсәлә, дьбәкә һун дьхәбьтьн сәва әʹбура нәфәред хwә бькьн. Гәләк де малда дьминьн, сәва мьqати зарʹед хwәйә бьчʹук бьн. Һьнә зарʹед мәзьн жи де-бавед хwәйә әʹмьрда мәзьн хwәй дькьн. Бәле, әw шьхöл гәләк фәрз ьн. Хәбәра Хwәдеда әм дьхуньн: «Һәгәр мәрьвәк бона хwәхатийа хwә, илаһи бона мала хwә хәм накә, әwи баwәри инкʹар кьрийә у жь нәбаwәра жи хьрабтьр ә» (1 Тимтʹ. 5:8). Һәрге нәфәред wә стуйед wәда ньн, дьбәкә һун ида нькарьн шьхöле Йаһоwа гәләки бькьн. Ле бәрхwә нәкʹәвьн, дьле Йаһоwа ша дьбә гава һун хәм дькьн бона нәфәред хwә (1 Корн. 10:31).

4. Чаwа де-бав дькарьн Пʹадшатийе дайньн щийе пешьн, у чь кʹәрәма әwана дьстиньн?

⁴ Де-бав кö Мәсиһи нә, тʹәви Йаһоwа һәвкʹарийе дькьн, чахе али зарʹед хwә дькьн кö нетед рʹöһʹани дайньн пешийа хwә. Гәләка кö öса зарʹед хwә һелан дькьрьн, ахьрийеда зарʹед wан бунә хьзмәткʹаред һәртʹьм. Мәсәлә, һьнәк бунә мисйонер, һьнәк ча пешәнг хьзмәт дькьн щийед кö һʹәwщәти һәйә, һьнәк жи Бәйтʹәледа хьзмәт дькьн. Чахе де-бав жь зарʹа дур ьн, тʹьме найе стандьн wәки һәв бьвиньн. Ле йәкә әw де-бав дьл дьдьнә зарʹед хwә, wәки кʹьфшкьрьна хwәда бьминьн. Ле чьрʹа? Чьмки дьле wан ша дьбә у әwана дьлрʹьһʹәт ьн, кö зарʹед wан шьхöле Хwәде датиньн щийе пешьн (3 Йуһн. 4). Дьбәкә гәләк жь wан де-бава мина Һаннайе хwә тʹәхмин дькьн, чахе әwе гот кö кöрʹе хwә Самуйел «пʹешкʹеши» Йаһоwа дькә. Де-бав әwе йәке ча qәдьрәки мәхсус һʹәсаб дькьн, чьмки wи щурʹәйи тʹәви Йаһоwа һәвкʹарийе дькьн (1 Сам. 1:28).

5. Щьватеда һун ча дькарьн али хушк-бьра бькьн? (Бьньһерʹә шькле әʹwльн.)

⁵ Һәрге малда щабдарийед wәйә мәзьн тʹöнә нә, һун дькарьн аликʹарийе бьдьнә хушк-бьра. Мәсәлә, али wан кьн йед кö һʹәwщә нә, мьqати нәхwәша дьбьн, йед кö сьст ьн, йан жи әʹмьрда мәзьн ьн. Щьватеда дина хwә бьдьне кö кʹерʹа аликʹари лазьм ә. Мәсәлә, дьqәwьмә хушк дийа хwәйә әʹмьрда мәзьн хwәй дькә, у һун дькарьн бәр дийа wе бьн, һʹәта кö хушк шьхöлед дьн бькә. Йан жи дьбәкә кәсәк һʹәwщә йә кö wи бьвьнә щьвате, бона wи һәрʹьн дькʹане, щурʹә-щурʹә шьхöл бькьн, йан жи нәхwәшханеда тʹәсәлийа кәсәки бькьн. Чахе һун öса дькьн, һун тʹәви Йаһоwа һәвкʹарийе дькьн, чьмки әw бь сайа wә, щаба дöайед wан хушк-бьра дьдә. (Бьхунә 1 Корьнтʹи 10:24.)

6. Ча әм дькарьн меванһʹьз бьн?

⁶ Һәвалхәбаткʹаред Хwәде пе меванһʹьзийе әʹйан ьн. Кʹьтеба Пирозда хәбәра Йунани кö һатийә wәлгәрʹандьне «меванһʹьзи», рʹастә-рʹаст те һʹәсабе «qәнщи хәрибарʹа» (Ибрн. 13:2). Хәбәра Хwәдеда әм гәләк сәрһати дьхуньн, кö мә һин дькьн чаwа меванһʹьз бьн (Дәстп. 18:1-5). Әм һьн дькарьн у һьн жи гәрәке мәщала бьвиньн сәва меванһʹьзийе нишан кьн һʹәмуйарʹа, фьрqи тʹöнә әwана хушк-бьред мә нә, йан на (Галт. 6:10).

7. Чь кʹар ә һәрге әм һьндава хьзмәткʹаред һәртʹьм, кö тʹәсәлийа щьвата мә дькьн, меванһʹьзийе дьдьн кʹьфше?

⁷ Һун дькарьн тʹәви Йаһоwа бьхәбьтьн бь ве йәке жи, гава һьндава хьзмәткʹаред һәртʹьм, кö тʹәсәлийа щьвата wә дькьн,  меванһʹьзийе бьдьн кʹьфше. (Бьхунә 3 Йуһәнна 5, 8.) Әw йәк мәщале дьдә кö «дьл бьдьн бәр һәв» (Рʹом. 1:11, 12). Дина хwә бьдьнә qәwьмандьна бьраки мә бь наве Олаф. Әwи гьли кьр кö бь дәһа сала пешда, хушк-бьред щьвата wида нькарьбун бәрпьрсийаре мьһале, кʹижан кö нәзәwьщи бу, мала хwәда ча меван хwәй кьн. Олаф кö һьнге щаһьл бу, жь де-баве хwә, кö Шәʹдед Йаһоwа нибун, һиви кьр wәки бәрпьрсийаре мьһале мала wанда бьминә. Әwана qайил бун, ле Олафрʹа готьн кö әw гәрәке сәр диване рʹазе. Әw йәк һежа бу. Олаф тинә бира хwә: «Әw һʹәфти гәләк хwәш бу! Әз у бәрпьрсийаре мьһале һәр шәбәq зу рʹадьбун у wәʹде тәʹште мә дәрһәqа тьштед рʹöһʹани хәбәр дьда». Ида 40 сал ә кö Олаф щурʹә-щурʹә щийада ча мисйонер хьзмәт дькә.

8. Чь мәʹнийед мә һәнә мәрьварʹа qәнщийе бькьн, һәрге жи пешийе те кʹьфше кö әwана qәнщийа мә нашекьриньн? Мәсәле биньн.

⁸ Әм дькарьн хәрибарʹа бь гәләк щурʹа һʹьзкьрьне бьдьнә кʹьфше, һәрге жи пешийе әwана нашекьриньн qәнщийа мә. Дина хwә бьдьнә ве мәсәле. Хушкәкә мә жь Испанйайе тʹәви жьнькәкә бь наве Йесика кö жь Әкwадоре бу, һинбуна Кʹьтеба Пироз дәрбаз дькьр. Щарәке wәʹде һинбуне Йесика öса гьрийа бьһʹәщи. Хушке жь wе пьрси кö чьрʹа әw дьгьри. Йесикайе гьли кьр кö һʹәта әw дәрбази Испанйайе буйа, гәләк кʹәсиб бу. Рʹожәке хwарьн мала wеда тʹöнә бу, у әwе тʹәне дькарьбу ав бьда qиза хwә. Һьнге Йесикайе qиза хwә рʹадьзанд, у һьн жи Хwәдерʹа дöа дькьр wәки али wе бькә. Ньшкева 2 Шәʹдед Йаһоwа дәре wе хьстьн, у журнал данә wе. Ле Йесика жь һерсе әw журнал qәльшанд у жь wана пьрси: «Әва хwарьн ә кö һун дьхwазьн бьдьнә qиза мьн?» Әwан хушка хwәстьн wе һеса кьн, ле әwе нәхwәст гöһе хwә бьдә wан. Һьнә wәʹдә шунда, әwан хушка тʹорбәк тʹьжә хwарьн данин бәр дәре wе. Әw qәнщийа wан гәләк дьле Йесикайе гьрт, у әwе шәрм кьр wәки һьнге тʹәхмин нәкьр кö ча Хwәде щаба дöайе wе да. Йесикайе нет данийә, wәки бьбә хьзмәткʹара Йаһоwа. Рʹасти жи мәрʹдани дькарә чьqас бәред баш бинә! (Wаиз 11:1, 6).

9, 10. а) Wәʹде бәре нава щьмәʹта Хwәдеда, чьда аликʹарийа рʹәзәдьли лазьм бу? б) Чьда бьра дькарьн щьватеда аликʹарийе бьдьн?

⁹ Wәʹде бәре, Исраеледа щурʹә-щурʹә дәрәщада лазьм бу бь рʹәзәдьли шьхöл бькьн (Дәркʹ. 36:2; 1 Дир. 29:5; Нәһәм. 11:2). Иро жи гәләк мәщалед wә һәнә кö wәʹдә, һәбук, у фәрәсәтед хwә бь рʹәзәдьли бьдьнә хәбате, сәва аликʹарийе бьдьнә хушк-бьра. У һуне гәләк шабуне у кʹәрәма бьстиньн сәва хирәта хwә.

¹⁰ Хәбәра Хwәде бьра һелан дькә, wәки тʹәви Йаһоwа бьхәбьтьн бь ве йәке, кö щьватеда щабдарийа һьлдьнә сәр хwә (1 Тимтʹ. 3:1, 8, 9; 1 Пәт. 5:2, 3). Әwед кö öса дькьн, дьхwазьн щурʹә-щурʹә тьштада у öса жи рʹöһʹанида аликʹарийе бьдьнә хушк-бьра (Кʹар. Шанд. 6:1-4). Дьqәwьмә рʹуспийа wәрʹа готьнә кö аликʹарийа wә лазьм ә бона шьхöле әʹдәбйәтава у мьһалава гьредайи, бона тʹәзәкьрьна Одед щьвата йан жи шьхöлед дьн. Бьред кö wан тьштада аликʹарийе дьдьн, wе wәрʹа гьли кьн кö әwана чьqас шабуне дьстиньн.

11. Чаwа хушкәк кʹаре станд жь wан һәвала, йед кö әwе сәр проектед авакьрьне qазанщ кьр?

¹¹ Әwед кö бь рʹәзәдьли проектед тʹәшкиләта мәда дьхәбьтьн, һәвалед тʹәзә хwәрʹа дьвиньн. Дина хwә бьдьнә мәсәла хушкәке бь наве Марже, йа кö 18 сала авакьрьна Одед Щьватада  дьхәбьтә. Нава wан салада, әwе чәнд хушкед щаһьл кьрә бьн пʹәре хwә у wана һин дькьр. Әwе дит кö әw йәк мәщале дьдә, wәки алийе рʹöһʹанида дьл бьдьнә һәв (Рʹом. 1:12). Чахе Марже рʹасти тәнгасийа һат, әw һәвалед wе, кö wәʹде авакьрьне һәврʹа бунә нас, али wе дькьрьн у ле дьшьдандьн. Ле һун qә бь рʹәзәдьли хәбьтинә сәр проектед авакьрьне? Һәрге жи һун wан шьхöлада щерʹьбанди у һостә ниньн, йәкә дькарьн аликʹарийе бьдьн.

12. Wәʹде хәзәба һун чьда дькарьн аликʹарийе бьдьн?

¹² Әм öса жи тʹәви Хwәде дьхәбьтьн, гава аликʹарийе дьдьнә хушк-бьра wәʹде хәзәба. Мәсәлә, әм дькарьн пʹәра qöрбан кьн (Йуһʹн. 13:34, 35; Кʹар. Шанд. 11:27-30). Öса жи әм дькарьн али wан бькьн, кö паши хәзәбе авайа тʹәмьз кьн йан жи тʹәзә кьн. Мала хушкәкә жь Полонистане, наве кʹижане Габриела йә, wәʹде хәзәбе һатә һьлшандьне. Гава паши хәзәбе хушк-бьред жь щьватед дор бәр, һатьн али wе бькьн, әw гәләк шьдийа у ша бу. Әw гьли дькә: «Әз нахwазьм бежьм мьн чь öнда кьр, чьмки әw тʹәне тьштед материали нә. Дәwсе әз дьхwазьм бежьм, кö мьн чьqас тьштед баш qазанщ кьр. Әве qәwьмандьне али мьн кьр кö һе зедә бьшекьриньм wи qәдьри, кö әз щьвата Хwәдеда мә, кʹидәре кö шабуне дьстиньм у бәхтәwар ьм». Гәләк хушк-бьра, кö wәʹде хәзәба аликʹари стандьнә, дьбежьн wәки әwе йәке wана һе бәхтәwар кьрийә. Һьн жи әwед кö тʹәви Йаһоwа һәвкʹарийе дькьн, ша дьбьн кö аликʹарийе дьдьн хушк-бьра. (Бьхунә Кʹаред Шандийа 20:35; 2 Корьнтʹи 9:6, 7.)

13. Чаwа аликʹарийа бь рʹәзәдьли, һәләqәтийа мә тʹәви Йаһоwа qәwи дькә? Мәсәле биньн.

¹³ Стефани у хушк-бьред дьн шабунәкә мәзьн стандьнә, кö тʹәви Йаһоwа һәвкʹари кьрьнә ве йәкеда, кö аликʹари данә хәрибед кö жь бо шәрʹ рʹәвинә Амәрикайе. Wана али малбәта дькьр, wәки щи-сьтʹаре бьвиньн. Стефани гьли дькә: «Әм әʹщебмайи ман wәки әwана ча ша бун у рʹази бун, кö һʹьзкьрьна хушк-бьред нав тʹәмамийа дьнйайеда дитьн.  Әw малбәт дьфькьрин кö мә али wан кьр, ле бь рʹасти wана һе зәʹф али мә кьр. Әw һʹьзкьрьн, йәкти, баwәри у итʹбарийа wан һьндава Йаһоwа, кö мә пе чʹәʹве хwә дит, һʹьзкьрьна мә һьндава Wи һе qәwи кьр. Мә һе зәʹф qимәт кьр әw һʹәму тьшт, кö әм бь сайа тʹәшкиләта wи дьстиньн».

14, 15. а) Ишайа пʹехәмбәр кʹижан ньһерʹандьн да кʹьфше? б) Чаwа мьзгинван дькарьн чʹәʹв бьдьнә ньһерʹандьна Ишайа?

¹⁴ Һун дьхwазьн һе зедә тʹәви Йаһоwа бьхәбьтьн? Һун дькарьн дәрбази wи щийи бьн, кʹидәре һʹәwщәти һәйә? Рʹаст ә әʹсә нинә мәрʹданийа хwә бьдьнә кʹьфше бь ве йәке, кö дәрбази щийе дур бьн. Ле дәрәща һьнә хушк-бьра мәщал да wан, wәки дәрбази щийе дур бьн. Ньһерʹандьна wан жи мина йа Ишайа пʹехәмбәр ә. Чахе Йаһоwа жь wи пьрси кö «Әз кʹи бьшиньм у wе бо мә кʹи һәрʹә?», Ишайа щаба Йаһоwа да: «А вай әз, мьн бьшинә!» (Иша. 6:8). Ле һун дьхwазьн аликʹарийе бьдьнә тʹәшкиләта Йаһоwа? Дәрәща wә дьһелә ве йәке бькьн? Чьда һун дькарьн аликʹарийе бьдьн?

¹⁵ Иса дәрһәqа бәлакьрьна мьзгинийе у һазьркьрьна шагьрта гот: «Нандьрун гәләк ә, ле пʹалә һьндьк ьн. Аwа һиви жь хwәйе дьруне бькьн, wәки пʹала нандьруна хwәрʹа бьшинә» (Мәт. 9:37, 38). Һун дькарьн щийе кö һʹәwщәти һәйә хьзмәт кьн, мәсәлә ча пешәнг? Йан жи дьqәwьмә ве йәкеда һун дькарьн али кәсәки бькьн. Гәләк хушк-бьра дитьн, кö сәва һʹьзкьрьна хwә Хwәдерʹа у мәрьварʹа нишан кьн, щурʹе лапә баш әw ә кö хьзмәт кьн ча пешәнг wан щийада, кʹидәре һʹәwщәтийа мьзгинвана һәйә. Һәрге мәщале wә һәнә, бьдьнә хәбате сәва хьзмәтийеда һе зедә бькьн. Һәрге һун öса бькьн, һуне шабунәкә мәзьн бьстиньн.

16, 17. Диса чь мәщалед мә һәнә, һәрге әм дьхwазьн шьхöле Йаһоwада һе зедә бькьн?

¹⁶ Гәло һун дьхwазьн Бәйтʹәледа хьзмәт кьн, йан жи шьхöлед авакьрьнеда аликʹарийе бьдьн, фьрqи тʹöнә wәʹдәлу бенә кʹьфшкьрьне йан жи бь рʹәзәдьли хьзмәт кьн? Бь рʹасти тʹәшкиләтеда тʹьме һʹәwщәтийа wан хушк-бьра һәйә, йед кö һазьр ьн Йаһоwарʹа хьзмәт кьн, кʹидәре жи wана кʹьфш кьн у чь шьхöли жи wанрʹа бьдьн. Һәрге жи әwана шьхöләкида һостә ниньн, йәкә дькарьн аликʹарийе бьдьн щурʹә-щурʹә шьхöлед майинда. Йаһоwа дьшекьринә хирәта wан, йед кö һазьр ьн хьзмәт кьн wан щийада, кʹидәре һʹәwщәти һәйә (Зәб. 110:3).

¹⁷ Дьбәкә һун дьхwазьн һе зедә бенә һинкьрьне, сәва һе рʹьнд Йаһоwарʹа хьзмәт кьн. Һәрге öса нә, нете хwәрʹа дайньн, wәки Мәкʹтәба сәва Мьзгинванед Пʹадшатийе дәрбаз бьн. Wедәре тенә һинкьрьне хушк-бьред рʹöһʹанида qәwи кö хьзмәткʹаред һәртʹьм ьн, йед кö дьхwазьн у дькарьн шьхöле хьзмәтийеда һе зедә бькьн. Әwед кö дьхwазьн әwе мәкʹтәбе дәрбаз бьн, гәрәке һазьр бьн, wәки чахе мәкʹтәбе хьлаз дькьн, һәр щурʹә кʹьфшкьрьн qәбул кьн. Ле һун һазьр ьн бона Йаһоwа wи щурʹәйи һе зедә бькьн? (1 Корн. 9:23).

18. Әм чь кʹаре дьстиньн кö тʹәви Йаһоwа дьхәбьтьн?

¹⁸ Әм щьмәʹта Йаһоwа нә, у ләма дьхwазьн һәр рʹож мәрʹданийе бьдьнә кʹьфше, qәнщийе бькьн у бь һʹьзкьрьн бьн тʹәви мәрьва. Чахе әм ве йәке дькьн, әм шабуне, әʹдьлайе у ләзәте дьстиньн (Галт. 5:22, 23). Фьрqи тʹöнә дәрәща wә чь щурʹәйи йә, йәкә һун дькарьн бәхтәwар бьн кö чʹәʹв бьдьнә мәрʹданийа Йаһоwа у бьбьнә һәвалхәбаткʹаред wийә qимәт! (Мәтʹлк. 3:9, 10).