1, 2. Чь пʹехәмбәрти һәйә Кʹьтеба Пирозда, дәрһәqа зедәбуна щьмәʹта Йаһоwа?

ТʹӘШКИЛӘТА Хwәде йа сәр әʹрде, гәләк мәхсус ә. Ве тʹәшкиләтеда әw мәрьв ьн, йед кӧ Йаһоwа һʹьз дькьн у дьхwазьн wирʹа хьзмәт кьн. Әw мәрьв һәнә Шәʹдед Йаһоwа. Рʹаст ә әwана гӧнәкʹар ьн у кемасийед wан һәнә, ле йәкә Хwәде бь сайа рʹӧһʹе хwәйи пироз wана кʹәрәм дькә. Щьмәʹта wи пешда дьчә у зедә дьбә. Wәрә шеwьр кьн һьнә тьшт, кӧ ча Йаһоwа щьмәʹта хwә кʹәрәм дькьр.

² Чахе сала 1914 рʹожед ахьрийе дәстпебун, хьзмәткʹаред Хwәде гәләк һьндьк бун. Ле йәкә Йаһоwа шьхӧле бәлакьрьна мьзгинийе кʹәрәм дькьр. Сал дәрбаз бун, у ида милйона мәрьв пеһʹәсийанә рʹастийед Кʹьтеба Пироз у бунә Шәʹдед Йаһоwа. Йаһоwа дәрһәqа ве йәке пешда гьлийед ӧса гот: «Wе [жь] бьчʹуке wе һʹәзар кәс у йа һурьке wе бьбә нәтәwәйәк хӧрт [щьмәʹтәкә qәwи]. Әз, Хӧдан, дәма wәхта wе бе, әзе вейа бьләзиньм!» (Иша. 60:22). У wан рʹожед ахьрийеда, әм пе чʹәʹве хwә дьвиньн, кӧ әw пʹехәмбәрти ча те сери. Ньһа һәжмара щьмәʹта Хwәде гәләк мәзьн ә. Һәрге әм бәрамбәр кьн, һәжмара щьмәʹта Хwәде жь һежмара гәләк мьләта зедәтьр ә.

3. Wан рʹожед ахьрийеда, ча щьмәʹта Хwәде һʹьзкьрьн данә кʹьфше?

 ³ Wи wәʹдәйида, Йаһоwа ӧса жи али щьмәʹта хwә кьр, кӧ һʹьзкьрьна һьндава һәвдӧ qәwи кьн. Чьмки хwәха Хwәде һʹьзкьрьн ә, у әw дьхwазә кӧ әwана жи чʹәʹв бьдьнә wи (1 Йуһʹн. 4:8). Иса жи чʹәʹв дьда Баве хwә, у ләма готә пәйчуйед хwә: «Әз тʹәмикә ну дьдьмә wә: Һәвдӧ һʹьз бькьн . . . Бь ве йәке һʹәмуйе заньбьн һун шагьртед мьн ьн, һәгәр һун һәвдӧ һʹьз бькьн» (Йуһʹн. 13:34, 35). Әw йәк илаһи гәләк фәрз бу wан пашwәхтийада, чахе мәрьва шәрʹед һʹәмдьнйайеда һәвдӧ дькӧштьн. Мәсәлә, тʹәне Шәрʹе Һʹәмдьнйайейә II-да, wәкә 55 милйон мәрьв һатьнә кӧштьне. Ле щьмәʹта Йаһоwа тʹәви wи шәрʹи нибу, wана мәрьв нәдькӧштьн. (Бьхунә Миха 4:1, 3.) Әwе йәке али wан кьр, кӧ әwана «щабдаре хуна» тʹӧ кәси нибьн (Кʹар. Шанд. 20:26).

4. Әw йәк кӧ щьмәʹта Йаһоwа һе зедә дьбә, чьрʹа мә дьшьдинә?

⁴ Рʹаст ә әв дьнйа хьраб ә, чьмки Шәйтʹан «мире ве дьнйайе» һʹӧкӧм дькә сәр, ле йәкә хьзмәткʹаред Йаһоwа һе зедә дьбьн у пешда дьчьн (2 Корн. 4:4). Шәйтʹан система политика ве дьнйайе у медйайе дьдә хәбате, сәва шьхӧле бәлакьрьна мьзгинийе бьдә сәкьнандьне. Шәйтʹан занә кӧ wәʹде wи һьндьк ә, у гәләк тьшт дькә, сәва әм жь Йаһоwа дур кʹәвьн у wирʹа хьзмәт нәкьн. У әw ве йәке бь щурʹә-щурʹә метода дькә. Ле әw нькарә әwи шьхӧли бьдә сәкьнандьне! (Әʹйан. 12:12).

5. Чьрʹа щара йед дьн дьле мә дешиньн? (Бьньһерʹә шькьле әʹwльн.)

⁵ Хьзмәткʹаред Хwәде заньн, кӧ чьqас фәрз ә Хwәде у мәрьва һʹьз бькьн. Чахе жь Иса пьрсин кӧ кʹижан ә тʹәмийа һәрә мәзьн, әwи гот: «‹Хӧдан Хwәдейе хwә һʹьз бькә бь тʹәмамийа дьле хwә, бь тʹәмамийа щанийа хwә у бь тʹәмамийа һʹьше хwә›. Әв ә тʹәмийа пешьн у һәрә мәзьн. У йа дӧда жи мина ве йә: ‹Һәвале хwә wәкә хwә һʹьз бькә›» (Мәт. 22:35-39). Ле Кʹьтеба Пироз мәрʹа дьдә кʹьфше, кӧ жь бо гӧне Адәм, әм гьшк гӧнәкʹар һатьнә буйине. (Бьхунә Рʹомайи 5:12, 19.) Ләма щара дьбәкә ӧса бьqәwьмә, кӧ щьватеда кәсәк йан пе гьлийед хwә, йан пе кьред хwә мә бьхәйидинә. Wи чахи һʹьзкьрьна мә һьндава Йаһоwа у щьмәʹта wи дькарә бе щерʹьбандьне. Һәрге ӧса бьqәwьмә, әме ча хwә кʹьфш кьн? Кʹьтеба Пирозда те гьликьрьне дәрһәqа мәрьвед амьн, йед кӧ пе гьлийед хwә йан кьред хwәйи нәрʹаст дьле мәрьвед дьн дешанд. Wәрә шеwьр кьн, кӧ жь wан qәwьмандьна әм чь дәрса дькарьн хwәрʹа һьлдьн.

6. Әw йәк кӧ Ели кӧрʹед хwә щәза нәдькьр, ча дькарьбу һʹӧкӧм буйа сәр мәрьвед дьн?

⁶ Мәсәлә, дӧ кӧрʹед Сәрәккʹаһин Ели, qанунед Йаһоwа пьштгӧһе хwәва давитьн. Кʹьтеба Пирозда те готьне: «Лаwед Ели, зьламед берез [хьраб] бун; Хӧдан нас нәдькьрьн» (1 Сам. 2:12). Рʹаст ә баве wан һʹәбандьна рʹастда ча сәрәккʹаһин гәләк тьшт дькьр, йәкә кӧрʹед wи гӧнед гьран дькьрьн. Ели заньбу дәрһәqа ве йәке, ле йәкә әwи ча лазьм бу әwана ширәт нәдькьрьн. Ахьрийе, Йаһоwа Ели у кӧрʹед wи жи щәза кьр (1 Сам. 3:10-14). Паши ве йәке, жь зӧрʹәта Ели тʹӧ кәс нькарьбу ча сәрәккʹаһин хьзмәт кьра. Һәрге wә wи wәʹдәйи бьжита, у пе чʹәʹве хwә әw кьред wани нәбаш бьдита, wәйе ча хwә кʹьфш кьра? Һуне Хwәдерʹа амьн бьмана, йан бона wә wе бьбуйа лькʹӧмандьн у wәйе ида Хwәдерʹа хьзмәт нәкьра?

7. Даwьд кʹижан гӧне гьран кьр, у Хwәде һьндава wи чь кьр?

⁷ Йаһоwа Даwьд һʹьз дькьр, чьмки әwи дьдит кӧ «дьле» Даwьд тʹәмьз бу (1 Сам. 13:13, 14; Кʹар. Шанд. 13:22).  Ле һәла һе Даwьд жи гӧне мәзьн кьр. Әwи бенамуси кьр тʹәви Бат-Шәбайе, у әw жьньк гьран дәркʹәт. Әw йәк qәwьми, чахе мере wе Урийа әскәрийе бу. Ле чахе Урийа жь әскәрийе вәгәрʹийа, Даwьд әw һелан кьр, кӧ әw һәрʹә мала хwә, чьмки баwәр бу кӧ әw wе тʹәви жьна хwә рʹазе. Даwьд дьхwәст, кӧ Урийа баwәр бькә кӧ әw зарʹ жь wи йә, сәва гӧне wи бе вәшартьн. Ле Урийа нәчу мале. Ләма жи Даwьд ӧса кьр кӧ wәʹде шәрʹ Урийа бе кӧштьне. Ле Даwьд жь бо гӧне хwә, qәзийа ани сәр хwә у малбәта хwә (2 Сам. 12:9-12). Ле йәкә, Йаһоwа рʹәʹм бу һьндава Даwьд у бахшандә wи, чьмки Даwьд дьлсах бу (1 Пʹадш. 9:4). Һәрге wә wи wәʹдәйи бьжита, һуне чь бьфькьрийана дәрһәqа Даwьд? Гәло кьред wийи нәрʹаст, бона wә wе бьбуйа кәвьре лькʹӧмандьне?

8. а) Чьда Пәтрусе шанди шаши бәрʹда? б) Рʹаст ә Пәтрус шаши кьр, ле чьрʹа Йаһоwа диса жи һишт кӧ әw бәрдәwам кә шьхӧле wи бькә?

⁸ Wәрә ньһа шеwьр кьн дәрһәqа Пәтрусе шанди. Иса wи бьжарт ча шандийе хwә. Ле йәкә Пәтрус щара тьштед нәрʹаст дьгот у дькьр. Мәсәлә, чахе Иса чәтьнайа гьранда бу, Пәтрус пьшта хwә да wи. Пешийа ве йәке, Пәтрус Исарʹа гот кӧ һәрге жи һʹәмушк wи бьһельн, әw тʹӧ щар wи наһелә (Марq. 14:27-31, 50). Ле чахе Иса һатә гьртьне, һʹәму шандийа, ӧса жи Пәтрус, әw һиштьн. Әwи һәла һе се щара инкʹар жи кьр, кӧ Иса нас дькә (Марq. 14:53, 54, 66-72). Ле паше, Пәтрус гәләк пʹошман бу. У Йаһоwа бахшандә wи, у һишт кӧ әw диса шьхӧле wи бькә. Һәрге тӧ шагьрте Иса буйайи, у тә әw кьре Пәтрус бьдита, тӧйе диса Йаһоwарʹа амьн бьмайи?

9. Чьрʹа һун гәрәке дӧдьли нәбьн кӧ Йаһоwа тʹьме һәq ә?

⁹ Жь wан мәсәла әм дьвиньн, кӧ һьнә хьзмәткʹаред Йаһоwа кьред нәрʹаст  дькьрьн, у дьле мәрьвед дьн дешандьн. Иро жи, хьзмәткʹаред Йаһоwа дьбәкә кьред хьраб бькьн у дьле йед дьн бешиньн. Ле фәрз әw ә, һуне ча хwә бьдьнә кʹьфше? Һуне сәва шашийед wан, Йаһоwа у щьмәʹта wи бьһельн? Йан һуне фәʹм бькьн, кӧ Йаһоwа дьбәкә wәʹдә дьдә wи мәрьви, кӧ әw гӧне хwә бинә рʹуйе хwә, wәки Йаһоwа бь һәqи wи рʹаст кә у ширәт кә? Ле щара ӧса жи дьqәwьмә, кӧ йе гӧне мәзьн дькә, гӧне хwә найинә рʹуйе хwә. Ве дәрәщеда, һуне итʹбарийа хwә Йаһоwа биньн, кӧ әw wе wәʹдәда һәqе wи бьде, дьбәкә wи жь щьвате дәрхә жи?

10. Иса ча дьньһерʹи сәр шашийед Щьһуда Исхәрйоти у Пәтрус?

¹⁰ Кʹьтеба Пирозда те гьликьрьне дәрһәqа хьзмәткʹаред Хwәде, йед кӧ нав мәрьвада шашийед мәзьн дьдитьн, ле йәкә амьн ман Йаһоwарʹа у щьмәʹта wирʹа. Мәсәлә, чахе Иса гәрәке 12 шанди бьжбарта, әwи тʹәмамийа шәве Баве хwәрʹа дӧа дькьр. Щьһуда Исхәрйоти жи нава wан шандийада бу. Чахе Щьһуда нәмамийа Иса кьр, Иса нәһишт кӧ әw йәк һәләqәтийа wи тʹәви Баве wи Йаһоwа хьраб кә. Пәтрусе шанди жи дьле Иса ешанд, чахе гот кӧ әw Иса нас накә, ле йәкә Иса диса жи Хwәдерʹа амьн дьма (Луqа 6:12-16; 22:2-6, 31, 32). У пәйчуйед Иса жи дьле wи ешандьн, ле йәкә әw сәр щьмәʹта Йаһоwа у сәр Йаһоwа һерс нәкʹәт. Дәwсе, Иса бәрдәwам дькьр шьхӧле Хwәде бькә у wирʹа амьн бьминә. Йаһоwа wи кʹәрәм кьр, бь ве йәке кӧ wи жь мьрьне рʹакьр, у паше Пʹадшатийа әʹзманада әw кʹьфш кьр ча Пʹадша (Мәт. 28:7, 18-20).

11. Кʹьтеба Пироз чь пʹехәмбәрти кьрийә дәрһәqа хьзмәткʹаред Йаһоwа wәʹде мәда?

¹¹ Иса итʹбарийа хwә Йаһоwа у щьмәʹта wи дьани. Әм жи гәрәке ӧса бькьн. Wан рʹожед хьлазийеда, әм дьвиньн кӧ ча Йаһоwа рʹебәрийа щьмәʹта хwә дькә. Әw али wан дькә кӧ нав тʹәмамийа дьнйайе мьзгинийе бәла кьн, у йәктийеда бьн. Хенщи wан, тʹӧ кәс әwи шьхӧли накә. Ишайа 65:14-да Йаһоwа дәрһәqа щьмәʹта хwә дьбежә: «А вай, qулед [хьзмәткʹаред] мьн wе жь фьрәйа дьл бьстьрен».

12. Әм ча гәрәке бьньһерʹьн сәр шашийед йед майин?

¹² Дьле мә рʹасти жи бь шабуне тʹьжә йә, чьмки Йаһоwа рʹебәрийе мә дькә, у али мә дькә кӧ әм гәләк тьштед баш бькьн. Ле мәрьвед дьнйа Шәйтʹанда, бинтәнг ьн, чьмки һʹале дьнйайе һе хьраб дьбә, у баwәрийа wан бона ахьрийе тʹӧнә. Ләма wе нәбилани бә у нәрʹаст бә, һәрге әм сәва шашийед һьнә хушк-бьред хwә, жь Йаһоwа у щьмәʹта wи дур кʹәвьн. Дәwсе, әм гәрәке амьн бьминьн Йаһоwарʹа, у пәй рʹебәрийа wи һәрʹьн. Ӧса жи, әм гәрәке һин бьн, кӧ ча бьньһерʹьн сәр шашийед хушк-бьред хwә, у әм ча гәрәке хwә бьдьнә кʹьфше.

13, 14. а) Чьрʹа әм гәрәке һьндава һәвда сәбьр бьн? б) Әм гәрәке кʹижан сози бира хwәда хwәй кьн?

¹³ Әм чь гәрәке бькьн, һәрге хушк йан бьрак дьбежә йан дькә әве йәке, чь кӧ дьле мә дешинә? Кʹьтеба Пироз мәрʹа ширәтәкә баш дьдә: «Бьра хәйидеда рʹӧһʹе тә нә бь ләз бә, жь бәр кӧ хәйид дь синга беаqьландан щиһ буйә» (Wаиз 7:9). Әм гьшк гӧнәкʹар ьн, у ләма тʹӧ кәс жь шашийа хwәйкьри нинә. Ләма әм гәрәке жь хушк-бьра һивийе нибьн, кӧ әwана шашийа нәкьн. У wе нә баш бә кӧ әм гәләк дина хwә бьдьн сәр шашийед wан, чьмки ӧса әм дькарьн шабуне  ӧнда кьн хьзмәтийеда, илаһи wан рʹожед хьлазийеда. Лапә хьраб wе әw бә, һәрге шашийед хушк-бьред мә, мә бьлькʹӧминьн, у сәва wан шашийа әм һәла һе жи тʹәшкиләта Йаһоwа бьһельн. Һәрге ӧса бьqәwьмә, әме ида нькарьбьн qьрара Йаһоwа биньн сери, у жийина һʹәта-һʹәтайе бьстиньн.

¹⁴ Сәва кӧ әм шабун у баwәрийа хwә qәwи хwәй кьн, әм гәрәке рʹьнд бира хwәда хwәй кьн әw созе Йаһоwа: «А вай, әз әʹзманед ну у әʹрдед ну дьәʹфьриньм у wе биранина тьштед бәре нәйен кьрьн у нәйен рамане» (Иша. 65:17; 2 Пәт. 3:13). Wәрә әм изьне нәдьнә хwә, кӧ сәва шашийед мәрьвед дьн, әм wан кʹәрәмед баш ӧнда кьн.

15. Әм гәрәке кʹижан ширәта Иса һьлдьн һʹәсаб, чахе дьвиньн кӧ йед дьн шашийа дькьн?

¹⁵ Бәле ньһа әм дьнйа тʹәзәда ниньн. Ләма чахе кәсәк дьле мә дешинә, әм гәрәке бьфькьрьн сәр принсипед Хwәде. Мәсәлә, биньн бира хwә принсипәке кӧ Иса гот: «Һәгәр һун нәһәqийед мәрьвайә һьндава wәда кӧ дькьн бьбахшиньн, Баве wәйи Әʹзмана жи wе wә бьбахшинә. Ле һәгәр һун нәһәqийед мәрьва нәбахшиньн, Баве wә жи нәһәqийед wә набахшинә». Паши wан гьлийа, Пәтрус жь Иса пьрси, гәло гәрәке әм «һʹәта һʹәфт щара» бьбахшиньн? Иса щаба wи да: «Әз набежьмә тә һʹәта һʹәфт щара, ле һʹәта һʹәфте щара һʹәфт». Әʹйан ә, кӧ бь wан гьлийа Иса дьхwаст бьгота, кӧ әм тʹьме һазьр бьн бьбахшиньн (Мәт. 6:14, 15; 18:21, 22).

16. Әм жь Усьв кʹижан дәрса баш дькарьн һин бьн?

¹⁶ Усьв, мәсәләкә баш һишт, кӧ чаwа әм гәрәке хwә бьдьнә кʹьфше, чахе дьле мә дешиньн. Усьв кӧрʹе Аqуб у Рʹаһеле йе пешийе бу. Дәһ бьред Усьви нәһʹәлал, чʹәʹвнәбари wи дькьрьн, чьмки баве wан Аqуб гәләк wи һʹьз дькьр. Паше, wана Усьв ча дил фьротьн, у wи бьрьнә Мьсьре. Паши гәләк сала, Усьв сәва кьред хwәйи баш һатә кʹьфшкьрьне ча сәрwере дӧда Мьсьреда. Чахе wи wәлатида бьрчибун дәстпебу, бьред Усьв һатьнә Мьсьре сәва хwарьне бькʹьрʹьн. Ле wана Усьв нас нәкьр. Wи wәʹдәйи Усьв дькарьбу жь бьред хwә һʹәйфе һьлдә, сәва кьред wан һьндава хwә. Ле Усьв ӧса нәкьр. Дәwсе әwи бьред хwә щерʹьбандьн, сәва пебьһʹәсә һәла әwана һатьнә гӧһастьне йан на. У чахе әwи рʹасти дит кӧ бьред wи һатьнә гӧһастьне, әwи дәрберʹа хwә wанрʹа әʹйан кьр, у wана дьлгәрм кьр: «Нәтьрсьн, әзе wә у зарʹед wә нан-ав кьм». Паше Кʹьтеба Пирозда те готьне: «Аһа бь заре ширьн хәбәрдане, [Усьв] бәр дьле wанда һат» (Дәстп. 50:21, ПКʹМ).

17. Чахе тӧ шашийед йед майин дьвини, тӧ ча хwә кʹьфш дьки?

¹⁷ Бира хwәда хwәй кьн кӧ кемасийед мә гьшка һәнә, у щара әме жи йед дьн бьхәйидиньн. Һәрге мә тедәрхьст кӧ мә кәсәк хәйидандийә, Кʹьтеба Пироз мә ширәт дькә кӧ әм гәрәке һәрʹьн, у бахшандьне жь wи бьхwазьн у ль һәв бен. (Бьхунә Мәтта 5:23, 24.) Бәле, әм гәләк рʹази нә чахе йед дьн шашийед мә дьбахшиньн. У әм жи гәрәке һьндава wан ӧса бьн. Колоси 3:13 мә ширәт дькә: «Ль һәв сәбьр кьн у ль һәв бьбахшиньн, һәгәр газьне йәки ль һьндава йәкида һәбә». У чаwа кӧ 1 Корьнтʹи 13:5 дьбежә, һʹьзкьрьна рʹаст «йа хwә нагәрʹә». Һәрге әм бьбахшиньнә мәрьва, Йаһоwа жи wе бьбахшинә мә. Чахе әм дьвиньн кӧ мәрьв шашийа дькьн, wәрә әм рʹәʹм бьн һьндава wанда, чаwа Хwәдейе мә һьндава мә рʹәʹм ә. (Бьхунә Зәбур 103:12-14.)