. Әwана ӧса жи Һармәгәдонеда wе qьрʹа дьнйа Шәйтʹан биньн. Чьрʹа әw шьровәкьрьна тʹәзә аqьлайи йә?

Паше чахе Һәзәqел дитьнокеда дит, кӧ чь кьред хьраб мәрьве Оршәлиме дькьрьн, Хwәде ӧса жи wирʹа нишан кьр qәwьмандьнед кӧ сала 607 Б.Д.М., пешийа wеранкьрьна Оршәлиме гәрәке бьqәwьмийана. Һәзәqел шәш мер дит, дәсте кʹижанада чʹәк һәбун. Әwи ӧса жи мерәк дит кӧ тʹәви wан бу. Әw мер кʹьнщәки бь «кʹьтан» ль хwә кьрьбу, у «һурьнге [һащәте] ньвисакʹаран» щәм ви һәбу (Һәзqл. 8:6-12; 9:2, 3). Хwәде wи мәрьвирʹа гот кӧ һәрʹә шәһәре Оршәлиме, у «нишан ль әʹнийед зьламед кӧ жь бәр һʹәму кʹаред мәкруһе кӧ дь һьндӧре wеда чедькьн дьнальн у фихане дькьн». Ле шәш мерарʹа, чʹәке кʹижана кӧ һәбу, Хwәде гот кӧ шә­һәрда qьрʹа гьшка биньн, нишана кʹе жи тʹӧ­нәбу (Һәзqл. 9:4-7). Жь wе дитьноке әм чь дәр­се хwәрʹа һьлдьдьн, у кʹе те һʹәсабе әw мер, щәм кʹе һащәте ньвискʹарийе һәбу?

Әw дитьнока пʹехәмбәртийе сала 612 Б.Д.М., Һәзәqелрʹа һатә дайине. Пешийе әw һатә се­ри wәкә паши пенщ сала, чахе ордийа Бабилоне Оршәлим wеран кьр. Рʹаст ә ­Бабилонийед пʹутпʹарьст Оршәлим wеран кьрьн, ле бь рʹас­ти­йе Хwәде бь дәсте wан, щьмәʹта хwә йа рʹа­бәр щә­за кьр (Йерәм. 25:9, 15-18). Ле Бабило­нийа qьрʹа һʹәмушка нәанин. Чьмки Хwәде wе ­нә­һиш­та мәрьвед рʹаст тʹәви йед хьраб qьрʹ бьн. Йаһоwа бь һʹьзкьрьн хәм кьр, кӧ Щьһуйед амьн хьлаз бьн, сәр кʹижана һʹӧкӧм дьбу кьред хьраб шәһәрда.

Һәзәqелрʹа нәһатә готьне кӧ нишана бьдә мәрьва, йан жи qьрʹа хьраба бинә. Мьлйакʹәт щабдар бун сәва диwанкьрьна хьраба. Бь сайа wе пʹехәмбәртийе, әм дькарьн бьвиньн кӧ чь дьqәwьми сәр әʹзмана. Бь рʹебәрийа Йаһоwа мьлйакʹәт гәрәке нә кӧ тʹәне qьрʹа зӧлма бьанийана, ле ӧса жи мәрьвед рʹаст башqә кьрана, сәва әwана хьлаз буна. *

Әw пʹехәмбәрти ӧса жи ахьрийеда wе бе сери. Бәре әʹдәбйәтед мәда мә шьровәдькьр, кӧ әw мер щәм кʹижани һащәте ньвискʹарийе һәбу, дьһатә һʹәсабе рʹункьрийед кӧ сәр әʹрде манә. Ӧса жи әм дьфькьрин, wәки мәрьвед кӧ мьзгинийе qәбул дькьн, дәрберʹа нишана хьлазбуне дьстиньн. Ле wан пашwәхтийада әʹйан бу, кӧ әw шьровәкьрьн гәрәке бе гӧһастьне. Ль гора Мәтта 25:31-33, Иса диwана мәрьва дькә. Wәʹде тәнгасийа мәзьн, әw wе диwана хьлазийе бькә. Иса wе пез, демәк мәрьвед кӧ wе хьлаз бьн башqә бькә жь бьзьна, демәк жь мәрьвед кӧ wе бенә кʹӧтакьрьне.

Ль гора wе гӧһастьна фәʹмкьрьна дитьнока Һәзәqел, әм чь дәрсе хwәрʹа һьлдьдьн? Wәрә тʹәне пенщ тьшта шеwьр кьн:

1.  Пешийа һьлшандьна Оршәлиме, Һәзәqел у Йерәмйа qәрәwьл бун, чаwа кӧ Ишайа. Иро Йаһоwа бь сайа кʹомәкә бьчʹук йа рʹункьрийа, хwарьна рʹӧһʹани дьдә мәрьва, у гьшкарʹа пешда әʹлам дькә дәрһәqа дәстпебуна тәнгасийа мәзьн. У хӧламед мала Иса жи, гәләк али рʹункьрийа дькьн ве әʹламкьрьнеда (Мәт. 24:45-47).

2.  Һәзәqелрʹа нәдькʹәт кӧ сәр мәрьва нишан дайнә, йед кӧ хьлаз бьн. У иро хьзмәткʹаред Йаһоwа жи әве йәке накьн. Әwана тʹәне гьли­йед Йаһоwа әʹлам дькьн, кʹижан кӧ һәйә пʹара шьхӧле бәлакьрьна мьзгинийе. У мьлйакʹәт рʹебәрийа wи шьхӧли дькьн (Әʹйан. 14:6).

3.  Wәʹде Һәзәqел, тʹӧ кәс нишана реали нә­дьстанд. У иро жи ӧса нә. Ле гәло мәрьв чь гә­рә­ке бькьн сәва нишана симболик бьстиньн? Әwана хенщи шьхӧле бәлакьрьна мьзгинийе qәбул кьн, ӧса жи гәрәке һʹӧнӧред Мәсиһити нав хwәда пешда биньн, хwә тʹәсмили Йаһоwа бькьн, у бь амьни пьштгьрийа бьред Мәсиһ бькьн, демәк рʹункьри (Мәт. 25:35-40). Әwед кӧ әw тьшт дькьн, wе нишана хьлазбуне бьстиньн wәʹде һатьна тәнгасийа мәзьн.

4.  Рʹожа иройин, мәрьве пе һащәте ньвискʹарийе, те һʹәсабе Иса Мәсиһ, йе кӧ wе бь симболик нишан дайнә сәр wан, йед кӧ wе хьлаз бьн. Әʹлаләтәкә мәзьн wе нишана хwә бьстиньн, чахе бенә диwанкьрьне ча пез, wәʹде тәнгасийа мәзьнда. Ӧса wе wанарʹа мәщал бе дайине, кӧ дьнйа тʹәзәда һʹәта-һʹәтайе сәр әʹрде бьжин (Мәт. 25:34, 46). *

5.  Рʹожа иройин, шәш мер пе чʹәка, тенә һʹәсабе ордийа Иса сәр әʹзмана у хwәха Иса, ча сәроке wан. Әwана wе зутьрәке qьрʹа һʹәму хьраби у мәрьвед зӧлм биньн (Һәзqл. 9:2, 6, 7; Әʹйан. 19:11-21).

Занәбуна ве йәке мә дьдә баwәркьрьне, кӧ Йаһоwа wе тʹӧ щар мәрьвед рʹаст тʹәви мәрьвед хьраб кʹӧта накә (2 Пәт. 2:9; 3:9). Хенщи ве йәке, әм һе рʹьнд фәʹм дькьн кӧ иро чьqас фәрз ә шьхӧ­ле бәлакьрьна мьзгине. Һʹәта хьлази бе, һәр кәс гәрәке дәрһәqа ве йәке пебьһʹәсә! (Мәт. 24:14).