Һайкануш, жь Әрмәнистане, кʹижан кӧ хьзмәткʹаре нәньхӧманди йә, незики мала хwә паспортәк дитьбу. Нава ве паспортеда, картед банке у гәләк пʹәрә һәбун. Һайкануше дәрһәqа ве йәке мере хwәрʹа гьли кьр, кʹижан кӧ мина wе, хьзмәткʹаре нәньхӧманди бу.

Әw щоте зәwаще дәйндар бун, чьмки проблемед wанә пʹәрава гьредайи һәбун. Ле йәкә, wана сафи кьр кӧ әwе паспорте у пʹәра, һьлдьн у һәрʹьн wи щийе кӧ адрес паспортеда ньвисар бу. Мерьке кӧ әw паспорт ӧнда кьрьбу, у ӧса жи нәфәред wи, гәләк әʹщебмайи ман! Һайкануш у мере wе, wи мерькирʹа гьли кьрьн, кӧ wана ӧса кьр чьмки занәбуна жь Кʹьтеба Пироз сәр wан һʹӧкӧм кьрийә. У wана әw мәщал данә хәбате, wәки дәрһәqа Шәʹдед Йаһоwа хәбәрдьн, у wана һьнә әʹдәбйәт wе малбәтерʹа һиштьн.

Әwе малбәте дьхwаст һьнә пʹәрә бьдьнә Һайкануше, сәва рʹазибуна хwә бьдьнә кʹьфше. Ле Һайкануше һьлнәда әw пʹәрә. Рʹожа дьн, жьньк чу мала Һайкануше, у зоре wе дькьр кӧ гӧстила алмас һьлдә, чьмки дьхwаст рʹазибуна хwә бьдә кʹьфше.

Мәрьвед дьн жи wе мина ве малбәте әʹщебмайи бьмана жь бо дьлсахийа Һайкануше у мере wе. Ле гәло Йаһоwа wе әʹщебмайи бьма? Гәло Йаһоwа qимәт кьр дьлсахийа wан? Гәло һежа бу кӧ әwана дьлсах у нәqәлп бун?

Щаба wан пьрса чәтьн ниньн. Гәло чьрʹа? Чьмки хьзмәткʹаред Хwәде баwәр ьн кӧ чахе әwана чʹәʹв дьдьнә һʹӧнӧред Хwәде, әw йәк бона wи һе qимәт ә, нә кӧ алмас, зерʹ, йан тьштед дьн йед бьһа. Ньһерʹандьна Йаһоwа сәр тьштед qимәт, щӧдә дьбә жь ньһерʹандьна мәрьва (Иша. 55:8, 9). Хьзмәткʹаред Йаһоwа һʹәсаб дькьн, кӧ чахе әwана чʹәʹв дьдьнә һʹӧнӧред wи, әw һе гәләк qимәт ә.

Wәрә бьньһерʹьн кӧ Кʹьтеба Пироз чь дьбежә дәрһәqа сәрwахтийе у аqьлайе. Мәтʹәлокеда 3:13-15 те готьне: «Хwәзи ль йе кӧ гьһиштийә занийарийе [сәрwахтийе] у аqьле дитийә! Жь бәр кӧ qәзанщкьрьна wе, жь qәзанщкьрьна зиван qәнщтьр ә у феда wе жь зерʹан зедәтьр ә. Жь мӧчәвһәре [мьрщане] бь qимәттьр ә у һʹәму тьште кӧ тӧ дьхwази, бь wерʹа найе мьqйаси [бәрамбәри] кьрьн». Әʹйан ә, кӧ Йаһоwа һʹӧнӧред ӧса һе qимәт дькә, нә кӧ кәвьред бьһа.

Ле әм чь дькарьн бежьн дәрһәqа нәqәлпийе?

Йаһоwа нәqәлп ә, у әw «дәрәwа накә» (Тито 1:2, ИМ). Бь рʹебәрийа Хwәде Паwлос qьрʹна йәкеда Мәсиһийед Ибранирʹа ньвиси: «Бона мә дӧа бькьн. Әм әʹсәйи заньн кӧ исафа мә рʹьһʹәт ә у дьхwазьн кӧ һәр тьшти рʹаст бькьн» (Ибрн. 13:18).

Иса Мәсиһ нәqәлпийеда нәхшәки баш мәрʹа һишт. Мәсәлә, биньн бира хwә чахе Сәрәккʹаһин Qәйафа, гьлийе ӧса готә Иса: «Әз тә бь Хwәдейе сах дьдьмә сонде. Мәрʹа бежә, тӧ йи Мәсиһ, Кӧрʹе Хwәде?» Рʹаст ә Иса заньбу кӧ һәрге әw рʹастийе бежә, Щьвина Гьрәгьра wе wи нәһәq кьн кӧ йанчь әw кʹьфьрийа дькә, у сәва ве йәке wи щәза кьн, ле йәкә әwи рʹасти гот кӧ әw Мәсиһ йә (Мәт. 26:63-67).

Ле дәрһәqа хwә әм чь дькарьн бежьн? Һәнә дәрәщә, кʹидәреда мәрьв дькарә дәрәwа бькә, йан нә һʹәму тьшти рʹаст бежә, сәва кʹара материали бьстинә. Гәло wан дәрәщада мәйе ча хwә бьда кʹьфше, мәйе рʹасти хwәй кьра?

Бәле, wан рʹожед ахьрийеда, кʹидәре кӧ гәләк мәрьв «хwәһʹьз» у «пʹәрәһʹьз ьн», чәтьн ә рʹаст у нәqәлп бьминьн (2 Тимтʹ. 3:2). Чахе кризиса материали һәйә у хәбат чәтьн дәстдькʹәвә, мәрьв дәстпедькьн qәлпийе бькьн. Ләма гәләк хwә һәq дәрдьхьн, чахе дьдьзьн, фелбазийе дькьн, йан тьштед дьнә qәлп дькьн. Әw ньһерʹандьн ньһа ӧса бәлабуйи йә, кӧ гәләк дьфькьрьн wәки бейи qәлпийе, мәрьв материалида пешда начьн. У йазьх, һәла һе һьнә Мәсиһийа жи сафикьрьнед нәрʹаст кьрьнә, у «пәй кʹәда һʹәрам» кʹәтьнә, у щьватеда наве хwә хьраб кьрьнә (1 Тимтʹ. 3:8; Тито 1:7).

Ле һʹәчʹи зәʹф Мәсиһи, чʹәʹв дьдьнә Иса. Әwана фәʹм дькьн кӧ һʹӧнӧред Хwәде һе фәрз ьн, нә кӧ тʹӧ һәбук йан пешдачуйин. Ләма, Мәсиһийед щаһьл мәкʹтәбеда пе qәлпийе пәй һʹәсабед баш накʹәвьн (Мәтʹлк. 20:23). Бәле, дьбәкә мәрьв рʹастийе тʹьме qимәт накьн, мәсәлә ча кьре Һайкануше qимәт кьрьн. Ле йәкә, чахе әм бәр чʹәʹве Хwәде рʹаст ьн, у исафа мә тʹәмьз ә, жь ве qимәттьр у баштьр тʹӧ тьшт тʹӧнә.

Wәрә qәwьмандьна Гагик шеwьр кьн. Әw гьли дькә: «Пешийа кӧ әз бьбума Мәсиһи, әз компанйа мәзьнда ча менещере сәрәкә дьхәбьтим. Мәзьне ве компанйайе, вәдьшарт кӧ чьqас пʹәра әw чедькә, сәва кем пʹәра бьдә дәwләте. Шьхӧле мьн ӧса жи әw бу, кӧ әз рʹӧшәте бьдьмә хәрщгьра, сәва әwана чʹәʹве хwә дадьн сәр дәрәwийа компанйа мә. Ләма, ахьрийе наве мьн дәркʹәт ча мәрьвәки qәлп. Рʹаст ә сәва ве йәке мьн гәләк пʹәрә дьстанд, ле чахе әз рʹастийе пеһʹәсийам, мьн ида qәлпи нәдькьр. Мьн бизнеса хwә вәкьр. У һәма рʹожа пешьнда, мьн компанйа хwә бь qануни кьр, у жь ве рʹоже дәстпекьри һʹәму хәрща бь qануни дадьдьм» (2 Корн. 8:21).

Гагик дьбежә: «Чахе әз компанйайеда дьхәбьтим, чьqас пʹәра мьн дьстанд, ньһа әз ниве ве дьстиньм. Ләма нәһеса бу малбәта хwә хwәй кьм. Ле йәкә әз ньһа һе бәхтәwар ьм. Исафа мьн бәр Йаһоwа тʹәмьз ә. Әз бона дӧ кӧрʹед хwә мәсәла баш ьм, у щьватеда щабдарийед мьн һәнә. Нава мәрьвед кӧ һʹәсабе пʹәра дькьн, у тʹәви кʹе әз бизнеседа һәвкʹарийе дькьм, мьн нас дькьн ча мәрьве нәqәлп».

Йаһоwа һʹьз дькә wан, йед кӧ наве wи рʹумәт дькьн бь ве йәке, кӧ чʹәʹв дьдьнә һʹӧнӧред wи, мәсәлә нәqәлпи (Тито 2:10). Йаһоwа Даwьд Пʹадша һелан кьр, кӧ гьлийе ӧса бьньвисә: «Щьван [щаһьл] бум, у кал жи бум; ле бәле тʹӧ щари нәдитьм кӧ мьрове рʹаст һатийә тʹәрькандьн у нижада wи пʹарса нан дькә» (Зәб. 37:25).

Рʹастийа wан гьлийа, жь сәрһатийа Рʹутʹ те кʹьфше. Әw амьн ма хасийа хwә Наһомирʹа, йа кӧ пир бу, у әw тʹәне ле нәһишт. Рʹутʹ дәрбази Исраеле бу, кʹидәре кӧ әwе дькарьбу Хwәдайе рʹаст бьһʹәбинә (Рʹутʹ 1:16, 17). Рʹутʹ жьнькәкә намус у хәбатһʹьз бу. Әwе ль гор Qануне, тʹоп дькьр гәньме кӧ паши нандьруне дьма. Рʹутʹ у Наоми жийина хwәда дьдитьн кӧ ча Хwәде бона wан хәм дькьр, чаwа кӧ Даwьд жи дит (Рʹутʹ 2:2-18). Бәле, Йаһоwа хенщи аликʹарийа материалида, һе зедә бона wе кьр. Хwәде әw бьжарт, кӧ Иса Мәсиһе создайи, жь рʹькʹьнйата wе бе (Рʹутʹ 4:13-17; Мәт. 1:5, 16).

Һьнә хьзмәткʹаред Йаһоwарʹа, дьбәкә чәтьн ә хwә хwәй кьн, чьмки нькарьн һаqас пʹәрә qазанщ кьн сәва йолә һәрʹьн. Дәwса  кӧ бь qәлпийе у дәрәwийе хwә хwәй кьн, әwана гьран у бь исафа тʹәмьз дьхәбьтьн. Ӧса әwана дьдьнә кʹьфше, кӧ һʹӧнӧред Хwәде, мәсәлә нәqәлпи, бона wан жь тьштед материали qимәттьр ьн (Мәтʹлк. 12:24; Әфәс. 4:28).

Иро Мәсиһи мина Рʹутʹ, нав тʹәмамийа дьнйайеда, баwәр дькьн кӧ Йаһоwа дькарә али wан бькә. Әwана бь тʹәмами итʹбарийа хwә Хәбәра wи тиньн, кʹидәреда те готьне: «Әзе тʹӧ щар жь тә нәчьм у тʹӧ щар тә бәрʹнадьм» (Ибрн. 13:5). Йаһоwа избат кьр кӧ әw wе али бәләнгаза бькә, йед кӧ тʹьме рʹаст у нәqәлп ьн. Әw һʹәта ньһа жи хwәйе созе хwә йә, кӧ wе хәм бькә бона хьзмәткʹаред хwәйи амьн (Мәт. 6:33).

Бәр чʹәʹве мәрьва алмас у кәвьред дьнә бьһа гәләк qимәт ьн. Ле әм дькарьн баwәр бьн кӧ Баве мә Йаһоwа, qимәт дькә чахе әм дьлсах ьн у һʹӧнӧред wийә дьн әʹйан дькьн!