ӘЗ Һатьмә буйине сала 1934. Һьнге де-баве мьн Една у Фред Молоһан, ида 20 сал бу кӧ Мәсиһи бун. Әз гәләк рʹази мә, кӧ ԝана мьн ӧса мәзьн кьр, ԝәки әз Хԝәде һʹьз бькьм. Әԝана Леколинкʹаред Кʹьтеба Пироз бун (Шәʹдед Йаһоԝа), йед кӧ пе хирәта хԝә әʹйан бун. Малбәта мә Парсонседа, шәһәрәки бьчʹукда дьжит, кӧ Кансаса башура-рʹоһьлатеда йә. Щьвата мәда ниве зәʹф Мәсиһийед бьжарти бун. Малбәта мә тʹьме дьһатә сәр щьвате у хьзмәтийеда жи хирәт бу. Һәр Шәми мә дәʹне нивро башԛә дькьр бона хьзмәтийа кʹуче, һьнге мә әԝ щурʹә хьзмәти нав дькьр, хьзмәтийа щийе кӧ гәләк мәрьв тʹоп дьбьн. Щара әм гәләк дьԝәстийан, ле баве мьн тʹьме паши хьзмәтийе мәрʹа гӧлмаст дькʹьрʹи, ԝәки әм ша бьн.

Щьвата мәйә бьчʹук щабдар бу бона мьһаләкә мәзьн. Чәнд шәһәред бьчʹук у ӧса жи гәләк кʹарханә дькʹәтьнә нава ԝе мьһале. Чахе мә тʹәсәлийа хԝәйед кʹархане дькьр, гәләк щар ԝана дәԝса кӧ бона әʹдәбйәтед мә мәрʹа пʹәра бьдьн, тьштед мале дьдан, мәсәлә хԝарьна бостан, һекед мале (һәма жь һелуне), йан һәла һе жи мьришкед сах. Баве мьн бона ԝан әʹдәбйәта ида пешда пʹәрә ԛӧрбан дькьр, ләма жи әԝ хԝарьн чь мәрʹа дьдан, мә хԝәрʹа дьһишт, сәва әʹбура хԝә бькьн.

Де-баве мьн хԝәрʹа фонограф дәстхьстьбун, сәва хьзмәтийеда бьдьнә хәбате. Әз бьчʹук бум у мьн нькарьбу әв фонограф бьда хәбате, ле мьн шабунәкә мәзьн дьстанд кӧ али де-баве хԝә дькьр, чахе ԝана ԝәʹде сәрледанед дӧбарә у һинбунед Кʹьтеба Пироз, готаред Рутерфорд бьра ведьхьстьн.

Сала 1936-да, баве мьн жь әʹрәба хԝә, әʹрәба дәнги чекьр, демәк әԝи һащәте мәзьнә дәнгдәрхьстьне, бане әʹрәбева кьр. Әԝе әʹрәбе  гәләк кʹар дьани бона бәлакьрьна мьзгинийа Пʹадшатийе. Пешийе мә мьԛам ведьхьст, сәва дина мәрьва бькʹьшиньн, у паше мә готаред сәр һʹиме Кʹьтеба Пироз ведьхьст. Чахе готар хьлаз дьбу, мә мәрьварʹа һʹәԝаса кʹе жи дьһат, әʹдәбйәтед мә бәла дькьр.

Шәһәре бьчʹукда Череваледа (Кансас), полис баве мьнрʹа гот, ԝәки изьн тʹӧнә әԝ әʹрәба дәнги парка шәһәрда бьдә сәкьнандьне, чьмки Ләʹде гәләк мәрьв ԝедәре һеса дьбьн. Ле полис изьн да, ԝәки әʹрәбе жь парке дәр бьдьн сәкьнандьне. Баве мьн ԛайил бу, у әʹрәбә кʹуче да сәкьнандьне, кʹижан кӧ һәма пешбәри ве парке бу. Жь ԝедәре жи дәнг һеса дьһатә мәрьвед паркеда. Гәләк мьн хԝәш дьһат ԝи ԝәʹде һʹәԝасда тʹәви баве хԝә у бьре хԝәйи мәзьн Щери хьзмәт кьм.

Хьлазийа салед 1930-да, мә кампанийед мәхсус дәрбаз дькьр, ԝан мьһалада, кʹидәре мәрьв гәләк мьԛабьли мә бун. Әм ниве шәве рʹадьбун (чаԝа мә Жаплинеда дькьр), у һедика бәлавок дькьрә бәр дәред малед хәлԛе. Паше, әм жь шәһәр дәр рʹасти һәв дьһатьн, сәва баԝәр бьн кӧ полис тʹӧ кәс нәгьртийә.

Ԝан салада, мә бь щурʹе мәхсус жи хьзмәт дькьр, демәк пе плаката. Мә плакат сәр хԝәва дькьр у әм дькʹәтьнә рʹезе, ӧса әм нав шәһәрда дьгәрʹийан, сәва мьзгинийа Пʹадшатийе бәла кьн. Те бира мьн щарәке һәвалед мә плакат сәр хԝәва кьрьбун, кʹидәре ньвисибу «Религийа Тʹәльк у Дәрәԝи йә», у нав шәһәре мә дьгәрʹийан. Әԝана нав шәһәррʹа ԝәкә 1.6 километьр гәрʹийан у паше вәгәрʹийанә мала мә. Ча баш ә ԝәки әԝана ԝәʹде ве хьзмәтийа пе плаката, рʹасти мьԛабьлибуне нәһатьн, ле гәләк мәрьва пәй ԝан дьньһерʹин.

Малбәта мә гәләк щар жь шәһәре Кансасе дьчу Техасе сәр щьватед мәзьн. Баве мьн сәр рʹийа трене дьхәбьти, ләма жи мә дькарьбу бе пʹәрә пе трене һәрʹьн һьн мәрьвед хԝә бьвиньн у һьн жи һәрʹьн сәр щьватед мәзьн. Хале мьни мәзьн, Фред Ԝисмар, у жьна ԝи Йулайла, Техаседа дьжитьн. Фред щаһьлтийеда дәстпека салед 1900-да рʹастийе пеһʹәсийа, һатә ньхӧмандьне, у хушкед хԝәрʹа жи дәрһәԛа рʹастийе гьли кьр, демәк дийа мьнрʹа жи. Әԝ нав тʹәмамийа Техаса навинеда гәләкарʹа нас бу, чьмки әԝи ԝедәре хьзмәт дькьр ча бәрпьрсийаре мьһале. Әԝ мәрьвәки һʹәйф у бәшәрхԝәш бу, у мьнрʹа һʹәԝас бу тʹьме тʹәви ԝи бьм. Әԝ рʹастийеда гәләк хирәт бу, у щаһьлтийеда мәсәла ԝи гәләк баш сәр мьн һʹӧкӧм бу.

Сала 1941-да, малбәта мә пе трене чу Ст. Луисе (Мисури), сәр щьвата мәзьн. Һʹәму зарʹ у щаһьларʹа готьн, ԝәки тʹәвайи незики сене рʹунен сәва готара Рутерфорд бьбьһен бь наве «Зарʹед Пʹадша». Хьлазийа ве готаре, һәр зарʹәке пʹешкʹеш станд, әԝ кʹьтеба тʹәзә бу бь наве «Зарʹ», кʹижан кӧ Рутерфорд у аликʹарчийед ԝи бәла дькьрьн. Ԝедәре 15 000 зедәтьр щаһьл бун, йед кӧ әԝ пʹешкʹеш стандьн.

Мәһа Нисане, сала 1943 әм чунә сәр щьвата мәзьн кӧ гәләк фәрз бу. Наве ԝе щьвата мәзьн «Һелан бона Шьхӧлкьрьне» бу, кʹижан кӧ  Кофейвиледа (Кансас) дәрбаз бу. Һьнге һʹәму щьватарʹа һатә әʹламкьрьне, ԝәки щьватеда Мәкʹтәба Даннасинкьрьне дәрбаз кьн. Мә ӧса жи буклет станд, кʹидәре кӧ 52 дәрс һәбун, сәва ԝәʹде ве мәкʹтәбе бьдьнә хәбате. Әԝ щьвата мәзьн бона мьн мәхсус бу, чьмки әз һатьмә ньхӧмандьне тʹәви һьнәкед дьн, голәкә сарда кӧ бьчʹук бу у незики кʹарханәке бу.

Мьн сала 1951-да мәкʹтәб хьлаз кьр, у гәрәке әʹмьре хԝәда һьнә сафикьрьнед фәрз бькьра. Мьн гәләк дьхԝәст Бәйтʹәледа хьзмәт кьм, кʹидәре бьре мьн Щери хьзмәт дькьр, ләма мьн бланка Бәйтʹәле тʹьжә кьр. Әԝ сафикьрьна мьн ахьрийеда мьнрʹа алийе рʹӧһʹанида гәләк кʹар ани. Ԝәʹдәки кьнда, мьн тʹәглифи Бәйтʹәле кьрьн. Әԝ 10 Адаре бу, сала 1952-да.

Мьн дьхԝәст идара нәшьркьрьнеда бьхәбьтьм, кʹидәре журнал у әʹдәбйәтед мә дьһатьнә дәрхьстьне. Ле йазьх әз ча офисиант һатьмә кʹьфшкьрьне, у паше хԝарьнгәһеда. Әԝ шьхӧл мьн хԝәш дьһат у әз гәләк тьшт ԝедәре һин бум. Йазьх әз тʹӧ щар идара нәшьркьрьнеда нәхәбьтимә. Ле ве кʹьфшкьрьна мьнда, ԝәʹде мьни зедә һәбу, у мьн әԝ ԝәʹдә хәрщ дькьр сәва кʹьтебханәйа Бәйтʹәледа леколинкьрьна шәхси дәрбаз кьм. Әԝ йәк гәләк али мьн кьр рʹӧһʹанида пешда һәрʹьм у баԝәрийа мьн ԛәԝи бу. Әԝе мәщале ӧса жи али мьн кьр, ԝәки һʹәта кӧ мьн дькарьбу, хԝә хьзмәтийа Бәйтʹәлева бьгьрьм. Щери сала 1949-да жь Бәйтʹәле чу у зәԝьщи тʹәви Патрисйайе, ле әԝана незики Бруклине дьжитьн. Ԝәʹде дәстпека хьзмәтийа мьнә Бәйтʹәледа, ԝана гәләк али мьн дькьрьн у дьл дьданә мьн.

Ԝәʹдә шунда чахе әз һатьмә Бәйтʹәле, бьра һе зедә готарванед Бәйтʹәле дьгәрʹийан, сәва щурʹә-щурʹә щьватада готара бьхуньн. Әԝ бьред кӧ һатьнә бьжартьне, гәрәке нава саләкеда бьчуна ԝан щьвата, кʹижан кӧ жь Бруклине 322 километьр дур бун. Әԝ бьра гәрәке ԝан щьватада готар бьхԝәндана у тʹәви щьвате дәркʹәтана хьзмәтийе. Әз жи һатьмә бьжартьне тʹәви ԝан бьра, чь кӧ бона мьн ԛәдьрәки мәзьн бу. Ԝәʹде готара хԝәйә пешийе әз гәләк бәрхԝә дькʹәтьм, чьмки һьнге готарәк сьһʹәтәк дькʹьшанд. Әз тʹьме пе трене дьчумә ԝан щьвата. Щарәке те бира мьн сала 1954, зьвьстане рʹожа Ләʹде, әз пе трене чумә Нийу Йорке. Әз гәрәке ида еваре вәгәрʹийама Бәйтʹәле. Ле фьртона бәрфе рʹабу у жь бо ве йәке трен һьнәк ԝәхт нәдьхәбьти. Ләма жи әз шәбәԛе ԝәкә сьһʹәта пенща һатьмә щийе сәкьнандьна трена Нийу Йоркеда. Жь ԝедәре әз зу кʹәтьмә метройе кӧ дьчу Бруклине, у дәрберʹа чумә хԝарьнгәһе. Әз һьнәки дәрәнг һатьм у гәләк ԝәстийайи бум, чьмки тʹәмамийа шәве әз рʹанәзабум. Ле әԝ бона мьн баргьрани нибу, чьмки ԝе Шәмийе у Ләʹде мьн тʹәви гәләк хушк-бьра хьзмәт кьр у һәвалед тʹәзә хԝәрʹа дит.

Дәстпека хьзмәтийа мьнә Бәйтʹәледа, мьн ӧса жи һәр һʹәфти сәр радийо стансйа мә, бь наве ԜBBR, һәвкʹари дькьр бәрнама һинбуна Кʹьтеба Пирозда. Студийед мә һьнге сәр ԛәте дӧда бун, авайе 124 Колумбйа Һайтсда. А. Һ. Макмилан бьра, кʹижан кӧ гәләк сал Бәйтʹәледа хьзмәт дькьр, тʹьме бәрнамед радийойеда аликʹари дьда. Мә бь һʹьзкьрьне жерʹа дьгот Мак бьра. Әԝ бона мә бьред щаһьл, мәсәләкә ԛәԝи бу, чьмки нава гәләк тәнгасийада Йаһоԝарʹа амьн ма.

Сала 1958 кʹьфшкьрьна мьн һатә гӧһастьне. Әз щабдар бум, ԝәки али ԝан хушк-бьра бькьм, йед кӧ тʹәзә Мәкʹтәба Гиләд хьлаз кьрьбун, сәва виза бьстиньн у бьгьһижьнә ԝан ԝәлата, кʹидәре һатьнә кʹьфшкьрьне. Һьнге билетед тәйаре гәләк бьһа бун, ләма тʹәне һьнәк дькарьбун пе тәйаре һәрʹьн. Һʹәчʹи зәʹф йед кӧ дьчунә Африкайе у Асйа Рʹоһьлате, пе гәмийед баркʹеш дьчун. Һьнә сал дәрбаз бун, у байе билетед тәйаре әрзан бун, ләма ида һʹәчʹи зәʹф мисйонер пе тәйаре дьчун ԝан ԝәлата кʹидәре һатьбун кʹьфшкьрьне.

Сала 1960-да, мьн щабдари станд, ԝәки рейсед пе тәйаре жь Амәрикайе һʹәта Әԝропайе организә кьм, сәва ԝан хушк-бьра йед кӧ гәрәке сала  1961-да бьчуна сәр щьватед һʹәмдьнйайе. Әз хԝәха жи пе тәйаре жь Нийу Йорке чум, сәр щьвата мәзьн Һамбургеда (Алманйа). Мьн у се бьред жь Бәйтʹәле паши щьвата мәзьн, әʹрәбә кʹьре һьлдан у Алманйайерʹа чунә Италйайе, сәва тʹәсәлийа филиала Рʹоме бькьн. Жь ԝедәре әм Чʹийайед Пирәнейерʹа чун Франсайе һʹәта Испанйайе, кʹидәре шьхӧле мә ԛәдәхәкьри бу. Мә бьред Барселонерʹа әʹдәбйәт анин, кʹижан ча пʹешкʹеш пʹечʹайи бун. Чьԛас баш бу кӧ әм рʹасти һәв һатьн у мә һәв нас кьр! Паши ве йәке әм чунә Амстердаме у жь ԝедәре пе тәйаре вәгәрʹийанә Нийу Йорке.

Ԝәкә саләке, шьхӧле мьн Бәйтʹәледа әԝ бу, ԝәки аликʹарийе бьдьмә 583 хушк-бьра, сәва һәрʹьн щьватед һʹәмдьнйайейә мәхсус. Наве ве щьвате «Мьзгинийа Һʹәта-Һʹәтайе» бу кӧ сала 1963-да дәрбаз дьбу. Әԝ хушк-бьра гәрәке нав тʹәмамийа дьнйайе рʹеԝити бькьрана, сәва һәрʹьнә щьвата мәзьн Әԝропайе, Асйайе, у Окйануса Мәзьнә Башуре у паше бьчуна Һонолулу, Һаԝаи, у Пасаденайеда (Калифорнйа). Әԝана ӧса жи Лӧбнане у Урдӧнеда дьсәкьнин, сәва екскурсийа бькьн у бьньһерʹьн әʹрдед кӧ Кʹьтеба Пирозда те готьне. Идара мә нә кӧ тʹәне билетед тәйара у отел организә дькьр, ле ӧса жи щабдар бу бона һʹәму виза, кӧ лазьм бун чәнд ԝәлатада.

Сала 1963 ӧса жи бона мьн мәхсус бу, чьмки әз зәԝьщим тʹәви Лила Рощерсе, кӧ жь Мисурийе бу, йа кӧ се сал пешда бьбу әндәме Бәйтʹәле. Дәʹԝата мә 29 Һʹәзиране бу. Һʹәфтек шунда паши дәʹԝата мә, әз у Лила жи чун сәр ве щьвата мәзьн, у мә жи екскурсийа кьр Йунаньстанеда, Лӧбнанеда у Мьсьреда. Әм жь Беруте пе тәйаре чунә аеропорта Урдӧнейә гәләк бьчʹук. Ԝедәре шьхӧле мә ԛәдәхәкьри бу, у мәрʹа готьн ԝәки ԝе визайе нәдьн Шәʹдед Йаһоԝа, у мә ньзаньбу чахе әм бьгьһижьнә ԝи щийи, ԝе мә бәрʹдьн йан на. Ле әм чьԛас ша бун у мәтʹал ман чахе әм һатьн у мә дит кӧ аеропортеда әʹлаләтәк пе плакатәкә мәзьн сәкьни бу, сәр кʹижани ньвисибу «Сәр Чʹәʹварʹа Шәʹдед Йаһоԝа!». Һьн жи мә шабунәкә мәзьн станд, гава мә дит әԝ әʹрдед кӧ дәрһәԛа ԝан Кʹьтеба Пирозда те гьликьрьне. Әм чун ԝан щийа, кʹидәре бавәшир дьжитьн, у ӧса жи кʹидәре Иса у шандийед ԝи хьзмәт дькьрьн, у кʹидәре Мәсиһийа дәстпекьрьбун һʹәта сәре дьнйайе мьзгинийе бәла кьн (Кʹар. Шанд. 13:47).

Ида 55 сал ә кӧ Лила һʹәму щурʹед кʹьфшкьрьна мьнда һәвалхәбаткʹара мьнә амьн ә. Әм чәнд щара чунә Испанйайе у Португале, чахе ԝедәре шьхӧле мә ԛәдәхәкьри бу. Мә һәвалед хԝә дьшьданд, у ԝанрʹа әʹдәбйәт у тьштед майин дьанин, кӧ әԝана һʹәԝщә бун. Мә һәла һе жи тʹәсәлийа бьра кьр, йед кӧ кәла Кадиседа (Испанйа) бун. Әз гәләк әшԛ у ша бум, кӧ мьн карьбу ԝанрʹа готаре бьхуньм, кʹижан дьле ԝан гәрм кьр у ԛәԝи кьр.

Жь сала 1963 мьн организәкьрьна рʹеԝитийа щьватед мәзьнә һʹәмдьнйайеда аликʹари дьда. Мәсәлә, Африкайеда, Австралйайеда, Амәрикайа Навин у Башуреда, Әԝропайеда,  Рʹожһьлата Дурда, Һаԝаийеда, Зәланда Ну у Порто Рикода. Әԝ бона мьн ԛәдьрәки мәзьн бу. Лила у әз, әм тʹәвайи гәләк щар чунә сәр щьватед мәзьн, у йәк жь ԝан Ԝаршовада, (Полонистан) бу, сала 1989-да. Сәр ве щьвата мәзьн гәләк хушк-бьра жь Русйайе һатьн, у әԝана щара пешьн һатьбун сәр щьвата мәзьн! Чәнд хушк-бьра рʹасти кʹижана әм һатьн, Совийетеда бь сала бона баԝәрийа хԝә кәледа бун.

Мә ӧса жи нав тʹәмамийа дьнйайеда тʹәсәлийа филиала дькьр, сәва дьл бьдьнә әндәмед Бәйтʹәле у мисйонера у ԝана бьшьдиньньн. Әм хԝәха жи шабуне дьстиньн гава ве йәке дькьн. Мә щара пашьн тʹәсәлийа филиала Корейа Башуре кьр, у әм чунә шәһәре Сйусоне, сәва кәледа тʹәсәлийа 50 бьра бькьн. Әԝ һʹәму бьра шабуна хԝә ӧнда накьн у бь дьл һивийа ԝи ԝәʹдәйи нә, чахе диса бь азайе Хԝәдерʹа хьзмәт кьн. Әм гәләк шьдийан гава рʹасти ԝан һатьн! (Рʹом. 1:11, 12).

Әз нава гәләк салада дьвиньм кӧ Йаһоԝа ча щьмәʹта хԝә кʹәрәм дькә, кӧ әԝ һе мәзьн у һе пешда дьчә. Жь сала 1943 чахе әз һатьмә ньхӧмандьне, һʹәта рʹожа иро, жь 100 000 мәрьва гьһиштийә 8 000 000 зедәтьр кӧ Йаһоԝарʹа хьзмәт дькьн нав 240 ԝәлатада. Ве пешдачуйинеда, һʹәчʹи зәʹф мисйонера аликʹари данә, йед кӧ Мәкʹтәба Гиләд хьлаз кьрьбун. Дьле мьн гәләк ша дьбә кӧ мьн тʹәви ԝан гәләк мисйонера нава салада һәвкʹари дькьр, у али ԝан дькьр ԝәки бьгьһижьнә щийед кʹьфшкьрьна хԝә.

Әз тʹӧ щар пʹошман набьм, ԝәки щаһьлтийеда мьн сафи кьр әʹмьре хԝә тʹәсмили Йаһоԝа кьм у кӧ мьн хьзмәтийа Бәйтʹәле бьжарт. Йаһоԝа нава ԝан салада гәләк кʹәрәм сәр мьнда баранд. Хенщи ве йәке, бь дәһа сала мьн у Лилайе хьзмәт кьрийә щьватед Бруклинеда, кʹидәре мә һәвалед незик хԝәрʹа дитьн.

Әз һʹәта иро Бәйтʹәледа пе аликʹарийа Лилайе хьзмәт дькьм. Рʹаст ә әз ида 84 сали зедәтьр ьм, ле һʹәта иро дькарьм шьхӧл бькьм у аликʹарийе дьдьмә филиале, кӧ сәр нәʹма щаба хԝә дьдьм, у дьшиньм.

Әԝ ӧса баш ә, ԝәки әм нава тʹәшкиләта Йаһоԝада ньн у зәлал дьвиньн фьрԛийа ортʹа хьзмәткʹаред Йаһоԝа у йед кӧ жерʹа хьзмәт накьн. Әм иро һе рʹьнд фәʹм дькьн гьлийед жь Малахи 3:18, кʹидәре те готьне: «Һуне фьрԛийа ортʹа мәрьве рʹаст у мәрьве хьраб бьвиньн, ортʹа хьзмәткʹаре Хԝәде у йед кӧ жерʹа хьзмәт накьн», ДТʹ. Һәр рʹож әм пе чʹәʹве хԝә дьвиньн кӧ дьнйа Шәйтʹан һе хьраб дьбә, у гәләк мәрьв беһеви у бебәхт ьн. Ле әԝед кӧ Йаһоԝа һʹьз дькьн у жерʹа хьзмәт дькьн, һәла һе ԝан зәманед хьрабда жи, бәхтәԝар ьн у һивийа ахьрийа баш ьн. Бона мә рʹасти жи ԛәдьрәки гәләк мәзьн ә ԝәки мьзгинийа Пʹадшатийе бәла кьн (Мәт. 24:14). Әм һивийа ве рʹоже нә, кӧ зутьрәке ԝе бе, демәк чахе Пʹадшатийа Хԝәде ԝе ԛьрʹа ве дьнйа хьраб бинә у дьнйа тʹәзә ԝе бе, кʹидәре кӧ һʹәму созед ԝи бенә сери, демәк ӧса жи сьһʹәт-ԛәԝата мәрьва ԝе баш бә у бьжин һʹәта-һʹәтайе. Паше һʹәму хьзмәткʹаред Йаһоԝайи амьн, ԝе жийина хԝәйә һʹәта-һʹәтайерʹа ша бьн!