1, 2. Паши мьрьна Муса, Йешу кʹижан щабдарийа мәзьн станд?

ЙАҺОԜА готә Йешу: «Ԛуле [хьзмәткʹаре] мьн Муса мьр у ньһа рʹабә, тʹәви һʹәмуйа гәл [щьмәʹте] Чʹәме Урдӧне дәрбаз бьбә. Бькʹәвьн ԝәлате кӧ әзе бьдьм ԝә» (Йешу 1:1, 2). Йешу ԝәкә 40 сала бәрдәстийе Муса бу, ле ньшкева әԝ гӧһастьн бу, кӧ әԝ һивийе нибу.

² Муса гәләк сала рʹебәре Исраелийа бу, у ләма фәʹмдари йә кӧ Йешу дьбәкә бәрхԝә дькʹәт, кӧ гәло щьмәʹта Хԝәде ԝе ча ԝи ԛәбул кә (Ԛан. Дщр. 34:8, 10-12). Кʹьтебәкеда дәрһәԛа рʹеза жь Йешу 1:1, 2, те готьне: «Чаԝа бәре, ӧса жи иро гава сәрԝер йан һʹӧкӧмәти те гӧһастьне, бона щьмәʹте әԝ ԝәʹдәки лапи чәтьн ә».

3, 4. Әм жь кʹӧ заньн ԝәки бадиһәԝа нибу кӧ Йешу баԝәрийа хԝә Хԝәде дьани, у кʹижан пьрс бал мә дькарә пешда бе?

³ Фәʹмдари йә, ԝәки Йешу бәрхԝә дькʹәт, ле йәкә әԝи итʹбарийа хԝә Йаһоԝа ани, у дәрберʹа пәй рʹебәрийа ԝи чу (Йешу 1:9-11). Бадиһәԝа нибу кӧ әԝи баԝәрийа хԝә Хԝәде дьани. Кʹьтеба Пироз нишан дькә, ԝәки Йаһоԝа пе мәләке хԝә, рʹебәри Йешу у щьмәʹта хԝә дькьр. Әм дькарьн бежьн ԝәки әԝ  мәләк, Хәбәр бу, демәк Кӧрʹе Хԝәдейи тайе тʹәне (Дәркʹ. 23:20-23; Йуһʹн. 1:1).

⁴ Пе аликʹарийа Йаһоԝа, Исраели һини ве гӧһастьне бун, кӧ дәԝса Муса ида Йешу рʹебәрийа ԝан дькьр. Иро әм жи дьжин ԝи ԝәʹдәйида, чахе гәләк гӧһастьн тенә кьрьне. У дьбәкә бал мә пьрс пешда те: «Тʹәшкиләта Хԝәде зу-зу пешда дьчә, ле гәло мәʹнийед мә һәнә итʹбарийа хԝә Рʹебәре хԝә, демәк Иса биньн?» (Бьхунә Мәтта 23:10.) Сәва щаба ве пьрсе пебьһʹәсьн, ԝәрә әм шеԝьр кьн кӧ Йаһоԝа ча ԝәʹде бәре рʹебәри щьмәʹта хԝә дькьр.

5. Гава Йешу незики Әриһайе бу, әԝ рʹасти кʹе һат? (Бьньһерʹә шькле әʹԝльн.)

⁵ Зутьрәке паши ве йәке, чахе Исраели чʹәме Урдӧнерʹа дәрбаз бун, Йешу незики Әриһайе, рʹасти мерәки һат, дәсте кʹижанида шур һәбу. Йешу ньзаньбу әԝ мәрьве нәнас кʹе йә, ләма жь ԝи пьрси: «Тӧ жь мә йи йан жи жь алийе дьжмьне мә йи?». Йешу сәр щаба ԝи мерьки әʹщебмайи ма, чьмки әԝи гот ԝәки әԝ сәроке ордийа Йаһоԝа йә, кʹижани кӧ гәрәке щьмәʹта Хԝәде хԝәй кьра. (Бьхунә Йешу 5:13-15.) Рʹаст ә Кʹьтеба Пирозда рʹезед дьнда те готьне, ԝәки Йаһоԝа рʹастә-рʹаст тʹәви Йешу хәбәр дьда, ле бешьк әԝи бь сайа мәләке хԝә тʹәви ԝи хәбәр дьда, чаԝа бәре тʹәви хьзмәткʹаред дьн хәбәр дьда (Дәркʹ. 3:2-4; Йешу 4:1, 15; 5:2, 9; Кʹар. Шанд. 7:38; Галт. 3:19).

6-8. а) Һьнә рʹебәрийед Йаһоԝа чьрʹа бона мәрьва дьбәкә әʹщеб бьһатана хане? б) Ле чьрʹа әԝ рʹебәри һьн билани бун һьн жи ԝәʹдәда бун? (Бьньһерʹьн ӧса жи спартьн.)

⁶ Йешу жь ԝи мәләки рʹебәрийед зәлал станд, кӧ чаԝа Әриһайе һьлдә бьн дәсте хԝә. Жь ԝан рʹебәрийа һьнәк дьбәкә дьһатьнә кʹьфше кӧ нәлазьм у нәаԛьлайи нә. Мәсәлә, Йаһоԝа тʹәми да ԝан, ԝәки һʹәму мер бенә сьнәткьрьне. Әԝ дьһатә һʹәсабе, ԝәки чәнд рʹож әԝ мер ԝе беԛәԝат буна. Ле бь рʹасти ԛә ԝәʹде ԝе йәке бу, кӧ әԝана бенә сьнәткьрьне? (Дәстп. 34:24, 25; Йешу 5:2, 8).

⁷ Дьԛәԝьмә әԝ мер дьфькьрин, кӧ әԝана ԝе чаԝа малбәтед хԝә хԝәй кьн, һәрге дьжмьн бькʹәвьнә зома ԝан. Ле ньшкева, әԝана пеһʹәсийан, ԝәки жь тьрса Исраелийа дәред Әриһайе «зәхми [ԛайим] һатьбун гьртьн» (Йешу 6:1). Чахе Исраели әԝ йәк пеһʹәсийан, һьлбәт итʹбарийа ԝан һьндава рʹебәрийа Хԝәде һе мәзьн бу.

⁸ Хенщи ве йәке, Исраелийарʹа тʹәми һатьбу дайине, ԝәки тʹәви Әриһайе шәрʹ нәкьн, дәԝсе шәш рʹожа, рʹоже щарәке дора ԝи шәһәри бьзвьрьн, ле рʹожа һʹәфта һʹәфт щара. Дьԛәԝьмә әскәр хԝәрʹа дьфькьрин: «Әԝ йәк ԝе бадиһәԝа ԝәʹдә у ԛәԝате жь мә бьстинә!». Ле Рʹебәре Исраелийа, демәк Йаһоԝа, рʹьнд заньбу әԝ чь дькә. Исраелийа Әриһа зәфт кьрьн, чьмки пәй рʹебәрийед ԝи чун. У гава ԝана дит кӧ чьԛас аԛьлайи бу пәй ԝан рʹебәрийа һәрʹьн, баԝәрийа ԝана гәләк ԛәԝи бу (Йешу 6:2-5; Ибрн. 11:30). *

9. Чьрʹа әм гәрәке пәй рʹебәрийед тʹәшкиләта Хԝәде һәрʹьн? Мәсәле биньн.

⁹ Жь ве сәрһатийе әм чь һин дьбьн? Щара әм бь тʹәмами фәʹм накьн кӧ чьрʹа тʹәшкиләта Йаһоԝа фьлан гӧһастьн кьрийә. Мәсәлә, пешийе дьбәкә әм дьфькьрин, ԝәки чьрʹа һащәтед әләктроники бьдьнә хәбате ԝәʹде һинбуна шәхси, хьзмәтийе, йан жи сәр щьвата. Ле ԝәʹдә дәрбаз бу у ньһа әм фәʹм дькьн кӧ чьԛас кʹар ә, гава әм ԝан һащәта дьдьнә хәбате.  Чахе әм дьвиньн кӧ гӧһастьнед ԝи щурʹәйи чьԛас бәред баш тиньн, баԝәри у йәктийа мә дьшьдә.

10. Кʹе рʹебәри кьр ԝәки Оршәлимеда щьвина фәрз дәрбаз бә?

¹⁰ Ԝәкә 13 сал паши ве йәке чахе Корʹнелйойе нәсьнәткьри, бу Мәсиһи, һьнә Щьһуйед Мәсиһи диса жи дьготьн, ԝәки сьнәткьрьн лазьм ә бькьн (Кʹар. Шанд. 15:1, 2). Дәрһәԛа ве пьрсе Әнтакйайеда дәʹԝ пешда һат, ләма бьра Паԝлос шандьн Оршәлиме, сәва дәрһәԛа ве пьрсе тʹәви кʹома рʹебәрийе шеԝьр кә. Ле бь рʹасти кʹе рʹебәри кьр, ԝәки әԝ һәрʹә? Паԝлос гот кӧ жерʹа һатийә әʹйанкьрьне, ԝәки әԝ һәрʹә. Әшкәрә йә, ԝәки Иса ӧса рʹебәри кьр, сәва кʹома рʹебәрийе әве пьрсе сафи кә (Галт. 2:1-3).

11. а) Һьнә Мәсиһийед Щьһу дәрһәԛа пьрса сьнәткьрьне чь дьфькьрин? б) Чаԝа Паԝлос бь мьлукти нишан кьр, ԝәки пьштгьрийа рʹуспийед Оршәлиме дькә? (Бьньһерʹьн ӧса жи спартьн.)

¹¹ Пе рʹебәрийа Мәсиһ, кʹома рʹебәрийе әʹйан кьр, ԝәки нәлазьм ә Мәсиһийед нә жь мьләте Щьһу, бенә сьнәткьрьне (Кʹар. Шанд. 15:19, 20). Ле йәкә паши ве сафикьрьне жи, гәләк Мәсиһийед Щьһу бәрдәԝам дькьрьн зарʹед хԝә сьнәт кьн. Рʹуспийед Оршәлимеда бьһистьн, ԝәки дәрһәԛа Паԝлос гьли бәла дьбә, кӧ әԝ Ԛануна Муса найнә сери. Ләма ԝана рʹебәрийед ӧса данә ԝи, кʹижан кӧ һьнәки әʹщеб дьһатьнә хане * (Кʹар. Шанд. 21:20-26). Ԝана жерʹа гот, ԝәки тʹәви чар мера һәрʹә пʹарьстгәһе, сәва щьмәʹт бьвинә кӧ әԝ «пәй Ԛануна Муса» дьчә. Паԝлос дькарьбу әԝ сафикьрьна ԝан бькьра бьн шьке, у бьфькьрийа кӧ әԝ йәк нәлазьм ә. Әԝи дькарьбу бьгота кӧ проблем нава ԝан Мәсиһийед Щьһуда йә, чьмки әԝана рʹьнд фәʹм накьн пьрса дәрһәԛа сьнәткьрьне. Ле йәкә Паԝлос пьштгьрийа ԝан сафикьрьнед рʹуспийа кьр, сәва нава хушк-бьрада йәкти ӧнда нәбә, у ча ԝана жерʹа гот, әԝи бь мьлукти һәма ӧса жи кьр. Ньһа дьбәкә бал мә пьрс пешда те: «Чьрʹа Иса һаԛас  ԝәхт әԝ пьрс нәсафикьри һишт? Нә паши мьрьна ԝи Ԛануна Муса һатә һьлдане?» (Колс. 2:13, 14).

12. Чьрʹа дьбәкә Мәсиһ һишт, ԝәки һьнә ԝәʹдә дәрбаз бә, сәва пьрса сьнәткьрьне бь тʹәмами сафи бә?

¹² Һьнәкарʹа ԝәʹдә лазьм ә сәва һини фәʹмкьрьна тʹәзә бьн. Һьнә Щьһуйед Мәсиһирʹа лазьм бу ԝәʹдә, ԝәки фәʹм кьн кӧ әԝана ида бьн Ԛанунеда ниньн (Йуһʹн. 16:12). Ԝанрʹа чәтьн бу ԛәбул кьн ве йәке, кӧ һәләԛәтийа ԝанә мәхсус тʹәви Хԝәде, ида сьнәткьрьнева гьредайи нинә (Дәстп. 17:9-12). Һьнәк жи дьтьрсийан, ԝәки ԝе бенә зерʹандьне алийе Щьһуйед дьнда, чьмки бь ве йәке ԝе жь ԝана щӧдә бьн (Галт. 6:12). Ле һьнә ԝәʹдә дәрбаз бу, у Мәсиһ бь сайа нәʹмед Паԝлос һе зедә рʹебәри да (Рʹом. 2:28, 29; Галт. 3:23-25).

13. Иро чь ԝе али мә бькә пьштгьрийа рʹебәрийа Мәсиһ бькьн?

¹³ Щара әм бь тʹәмами фәʹм накьн ԝан гӧһастьна, кӧ тʹәшкиләта Хԝәдеда тенә кьрьне. Һәрге ӧса нә, ԝе баш бә әм бьфькьрьн, кӧ чаԝа бәре Мәсиһ рʹебәри дькьр. Чаԝа ԝәʹде Йешу у ԛьрʹна йәкеда жи, Мәсиһ тʹьме рʹебәрийед билан дьдә, сәва щьмәʹта Хԝәде хԝәй кә, баԝәрийа ԝан ԛәԝи кә, у йәкти нав ԝанда ӧнда нәбә (Ибрн. 13:8).

14-16. Чаԝа рʹебәрийед кӧ әм жь «хӧламе амьн у сәрԝахт» дьстиньн, дьдьнә кʹьфше ԝәки Иса бона рʹӧһʹанийа мә хәм дькә?

¹⁴ Рʹебәрийед кӧ «хӧламе амьн у сәрԝахт» мәрʹа дьдьн, әʹйан дькьн, кӧ Иса ча бона рʹӧһʹанийа мә хәм дькә (Мәт. 24:45). Марк, баве чар зарʹа, дьбежә: «Шәйтʹан дьхԝазә щьвата сьст кә бь ве йәке, кӧ пәй малбәта дькʹәвә. Ләма жи әԝ ширәт кӧ әм гәрәке ԛӧльхкьрьна тʹәви малбәте дәрбаз кьн, әшкәрә малхед малерʹа әʹйан дькә, ԝәки малбәта хԝә рʹӧһʹанида хԝәй кьн!».

¹⁵ Бәле, чахе әм дьвиньн, Иса ча рʹебәрийе мә дькә, әм фәʹм дькьн ԝәки әԝ али мә дькә, сәва әм баԝәрийеда ԛәԝи бьн. Рʹуспики бь наве Патрик дьбежә: «Пешийе һьнә хушк-бьрарʹа чәтьн бу бьһатана сәр щьвинед бьчʹук бона хьзмәтийе, кӧ Шәми у Ләʹде дәрбаз дьбьн. Ле әм заньн ԝәки һʹӧнӧрәки Иса әԝ ә, кӧ әԝ хәм дькә бона һʹәму мьлука, у ве щьвинеда әԝ йәк рʹьнд те кʹьфше. Хушк-бьред шәрмокә йан жи йед кӧ һьндьк хьзмәт дькьн, ньһа тʹәхмин дькьн кӧ ԛимәт ьн у дькарьн кʹаре биньн. Ԝи щурʹәйи әԝана рʹӧһʹанида гәш дьбьн у хьзмәтийеда жи хирәт дьбьн».

¹⁶ Мәсиһ ӧса жи али мә дькә, ԝәки һʹьш-аԛьле мә сәр бәлакьрьна мьзгинийе бә, демәк сәр ԝи шьхӧле һәри мәзьн у фәрз, кӧ нав дьнйайеда те кьрьне. (Бьхунә Марԛос 13:10.) Андре кӧ тʹәзә ча рʹуспи һатә кʹьфшкьрьне, тʹьме кʹур дьфькьрә сәр гӧһастьнед кӧ тʹәшкиләта Хԝәдеда тенә кьрьне. Әԝ дьбежә: «Ԝан пашԝәхтийада, гәләк хушк-бьред кӧ филиалада хьзмәт дькьрьн, дәштеда һатьнә кʹьфшкьрьне. Әԝ гӧһастьн диса жи тинә бира мә, ԝәки әм ԝәʹдәки чада дьжин у чьԛас фәрз ә ԛәԝата хԝә сәр бәлакьрьна мьзгинийе хәрщ кьн».

17, 18. Чьрʹа ԝе керһати бә, һәрге әм бьфькьрьн кӧ әм чь кʹаре дьстиньн, гава һини гӧһастьнед тʹәшкиләте дьбьн?

¹⁷ Рʹебәрийед кӧ Иса Мәсиһ, демәк Пʹадше мә, мәрʹа дьдә, ньһа али мә дькьн у ахьрийеда жи ԝе али мә бькьн. Ләма жи ԝәрә әм тʹьме дина хԝә бьдьнә сәр ве шабуне кӧ әм дьстиньн, гава гӧһастьна ԛәбул дькьн у кʹаре дьвиньн. Ԝе керһати бә кӧ һун ԝәʹде ԛӧльхкьрьна тʹәви малбәте, шеԝьр кьн, кӧ һун чь кʹаре дьстиньн жь гӧһастьнед щьватада у хьзмәтийеда.

¹⁸ Һәрге әм бир нәкьн, ԝәки гӧһастьнед  тʹәшкиләта Йаһоԝада тʹьме мәрʹа кʹаре тиньн, ԝе мәрʹа дьһа һеса бә, кӧ бь шабуне пәй ԝан рʹебәрийа һәрʹьн. Мәсәлә, әм ԛимәт дькьн ве йәке кӧ тʹәшкиләтеда пʹәрә кем хәрщ дьбә, чьмки ида әʹдәбйәтед мә кем тенә нәшьркьрьне, у һе зедә йед әләктроник тенә хәбьтандьне. Әԝ йәк али тʹәшкиләте дькә, сәва нав тʹәмамийа дьнйайеда мьзгинийе бьгьһиньнә һе зедә мәрьва. Ләма жи әм һелан дьбьн чьԛас дькарьн дьһа зәʹф бьдьнә хәбате әʹдәбйәтед әләктроник у видео. Бь ԝи щурʹәйи, әме пьштгьрийа ньһерʹандьна Мәсиһ бькьн, кӧ пʹәре тʹәшкиләте бь билани хәрщ бә.

19. Чьрʹа әм гәрәке пьштгьрийа рʹебәрийа Мәсиһ бькьн?

¹⁹ Чахе әм бь дьл у щан пәй рʹебәрийа Иса дьчьн, әм бь ве йәке баԝәрийа хушк-бьра ԛәԝи дькьн у йәктийе дькьнә щьвате. Андре бәʹса кʹижани мә жоре кьр, дьфькьри сәр ве гӧһастьне, кӧ нав тʹәмамийа дьнйайеда гәләк хушк-бьред Бәйтʹәле, дәштеда һатьнә кʹьфшкьрьне, у әԝ дьбежә: «Әԝ хушк-бьред кӧ ида Бәйтʹәледа хьзмәт накьн, бь дьл у щан әв гӧһастьн ԛәбул кьрьнә. Мәсәла ԝан, итʹбарийа мьн һьндава рʹебәрийед Мәсиһ, һе зедә дькә у әз гәләк ԛәдьре ԝан хушк-бьра дьгьрьм. Әԝана пәй әʹрәба Йаһоԝа дьчьн, гава һәр щурʹә кʹьфшкьрьнада шабуне ӧнда накьн».

20, 21. а) Чьрʹа әм дькарьн итʹбарийа хԝә Рʹебәре хԝә Мәсиһ биньн? б) Готара дьнда әме кʹижан пьрсе шеԝьр кьн?

²⁰ Рʹебәре мә Иса Мәсиһ, ԝе зутьрәке «сәркʹәвә», у «кьред һʹӧжмәкʹар бькә» (Әʹйан. 6:2; Зәб. 45:4). Һʹәта әԝ ԝәʹдә бе, әԝ щьмәʹта Хԝәде һазьр дькә бона жийина дьнйа тʹәзәда у бона шьхӧлед кӧ әм гәрәке ԝедәре бькьн, демәк мәрьвед кӧ жь мьрьне рʹабьн, һин кьн у әʹрде бькьнә щьнәт.

²¹ Һәрге әм итʹбарийа хԝә Пʹадше хԝә биньн, чь гӧһастьн жи һәбьн, әԝ ԝе мә бьвә бәрбь дьнйа тʹәзә. (Бьхунә Зәбур 46:1-3.) Бәле, щара чәтьн ә гӧһастьна ԛәбул кьн, илаһи гава ньшкева дьԛәԝьмьн у әʹмьре мәва гьредайи нә. Ле һьнге ча әм дькарьн дьлрʹьһʹәтийе хԝәй кьн у бь тʹәмами баԝәрийа хԝә Йаһоԝа биньн? Щаба ве пьрсе әме готара дьнда шеԝьр кьн.