1, 2. а) Әʹмьре Исада кʹижан шьхӧл щийе пешьн дьгьрт, у чьрʹа? б) Әм гәрәке чь бькьн, ԝәки бьбьнә һәвалхьзмәткʹаред Хԝәдейә баш?

ИСА МӘСИҺ нәщар у хьзмәткʹар бу (Марԛ. 6:3; Рʹом. 15:8). Әԝи һәрдӧ шьхӧл жи бь һостәти дькьр. Әԝ чаԝа нәщар, һин бу һащәтед бона ви пʹешәйи рʹьнд бьдә хәбате, сәва пе дара тьштед керһати чекә. У чаԝа дәрсдаре мьзгинийе, әԝи ӧса жи бь һостәти занәбуна Ньвисаред Пироз дьда хәбате, сәва али мәрьва бькә кӧ әԝана рʹастийед жь Хәбәра Хԝәде фәʹм кьн (Мәт. 7:28; Луԛа 24:32, 45). Иса чахе 30 сали бу ида нәщарти нәдькьр, чьмки заньбу кӧ хьзмәткьрьн шьхӧләкә һе фәрз ә. Әԝи гот, ԝәки бәлакьрьна мьзгинийа Пʹадшатийе жи мәʹни бу, кӧ Хԝәде әԝ шандә сәр әʹрде (Мәт. 20:28; Луԛа 3:23; 4:43). Бона Иса хьзмәти щийе пешьн дьгьрт, у әԝи дьхԝәст ԝәки бона мәрьвед дьн жи ӧса бә (Мәт. 9:35-38).

² Дьбәкә әм нәщар ниньн, ле әм гьшк жи хьзмәткʹар ьн, йед кӧ мәрьва мьзгинийе һин дькьн. Әԝ шьхӧл гәләк фәрз ә, чьмки Хԝәде нав ԝи шьхӧлида йә, у әм һәвалхәбаткʹаред ԝи нә (1 Корн. 3:9; 2 Корн. 6:4). Әм заньн, ԝәки «хәбәред [Йаһоԝа] тʹәмамийа хԝәва рʹасти нә» (Зәб. 119:159, 160, ДТʹ). Ләма жи әм дьхԝазьн баԝәр бьн, ԝәки әм «хәбәра рʹастийе» рʹаст шьровәдькьн. (Бьхунә 2 Тимотʹейо 2:15.) Бона ве йәке, әм сәр хԝә дьхәбьтьн, ԝәки һе бь һостәти Кʹьтеба Пироз бьдьнә хәбате, чьмки әԝ һащәта мәйә сәрәкә йә, кӧ әм дьдьнә хәбате сәва мәрьва дәрһәԛа Йаһоԝа, Иса у Пʹадшатийе һин кьн. Ле сәва кӧ әм хьзмәтийеда пешда һәрʹьн, тʹәшкиләта Йаһоԝа һащәтед дьн жи дәрхьст. Әм гәрәке һин бьн ԝан һащәта бь һостәти бьдьнә  хәбате. Әм ԝан һащәта нав дькьн Һащәтед Сәрәкә бона Һинкьрьне.

3. Жь бо ве йәке кӧ бона шәʹдәтийе ԝәʹдә һьндьк майә, әм гәрәке һе зәʹф дина хԝә бьдьнә сәр чь? У ль гора Кʹаред Шандийа 13:48 әм мәрьвед чь щурʹәйи дьгәрʹьн?

³ Дьбәкә һун ньһа дьфькьрьн, ԝәки чьрʹа әм дьбежьн Һащәтед бона Һинкьрьне, нә кӧ Һащәтед бона Бәлакьрьна Мьзгинийе. «Бәлакьрьн» әв те һʹәсабе чахе әʹламәтийе бәла дькьн, ле «һинкьрьн» әԝ те һʹәсабе, әԝе әʹламәтийе бьгьһиньнә һʹьш у дьле мерьв, сәва кӧ әԝ паше бьдә хәбате ԝан тьшта чь кӧ педьһʹәсә. Гәләк һьндьк ԝәʹдә майә сәва әм мәрьварʹа шәʹдәтийе бьдьн, ләма нета мә гәрәке әԝ бә, кӧ тʹәви мәрьва һинбунед Кʹьтеба Пироз дәстпекьн, у ԝана рʹастийе һин кьн. Әԝ те һʹәсабе, ԝәки әм гәрәке бь дьл у щан ԝан мәрьвед дьлсах бьгәрʹьн, йед кӧ һазьр ьн гӧһ бьдьнә мьзгинийе, ԝәки әԝана жийина һʹәта-һʹәтайе бьстиньн. (Бьхунә Кʹаред Шандийа 13:44-48.)

4. Әм ча дькарьн тедәрхьн һәла кʹе һазьр ә мьзгинийе ԛәбул кә, у ча әм дькарьн ԝан мәрьва бьвиньн?

⁴ Ле әм ча дькарьн тедәрхьн, һәла кʹе һазьр ә мьзгинийе ԛәбул кә? Чаԝа ԛьрʹна йәкеда, иро жи әм дькарьн ԝан мәрьва бьвиньн, гава шәʹдәтийе бьдьн. Иса готә шагьртед хԝә: «Чь бажар йан гӧнде кӧ һун бькʹәвьне, маләкә һежа бьбиньн» (Мәт. 10:11). Әм һивийе ниньн ԝәки мәрьвед дӧрʹу, ԛӧрʹә, йан жи йед кӧ нафькьрьн дәрһәԛа һәләԛәтийа хԝә тʹәви Хԝәде, ԝе гӧһ бьдьнә мьзгинийе. Әм мәрьвед дьлсах, мьлук у рʹӧһʹанида бьрʹчи дьгәрʹьн. Әԝе йәке әм дькарьн бәрамбәри пʹеше Иса бькьн. Мәсәлә, чаԝа нәщар, пешийе әԝи гәрәке дарәки баш бьжбарта, сәва тьштед навмал, дәри, нир, йан жи тьштед дьн чекьра. Гава әԝи дар ида дьжбарт, ԛӧтʹийа һащәтед хԝә һьлдьда, занәбуна хԝә дьда хәбате у дәстпедькьр тьшта чекә. Әм жи пешийе мәрьвед дьлсах дьгәрʹьн, паше ида һащәт, фәрәсәт у занәбуна хԝә дьдьнә хәбате, сәва али ԝан бькьн, кӧ бьбьнә шагьрт (Мәт. 28:19, 20).

5. Әм чь гәрәке бьзаньбьн дәрһәԛа Һащәтед бона Һинкьрьне? Мәсәле биньн. (Бьньһерʹә шькле әʹԝльн.)

⁵ Һәр һащәт бона нетәке йә. Бәʹса хәбәре, бьфькьрьн дәрһәԛа һащәтед кӧ Иса нәщартийеда дьда хәбате. * Әԝи гәрәке пе ԝан һащәта дар чапкьра, тьштед зедә бьбьрийа, рʹьндә кьра, у паше һәвва кьра. Мина ве йәке, Һащәтед Сәрәкә бона Һинкьрьне, сәва нетәкә конкрет мәрʹа һатьнә дайине. Ԝәрә ньһа әм шеԝьр кьн, кӧ чь дькʹәвә нава һащәтед мә, у бьвиньн ча әм ԝан һащәтед фәрз гәрәке бьдьнә хәбате.

6, 7. а) Һун ча дьдьнә хәбате картед малпәра мә? б) Тʹәглифкьрьна мәйә сәр щьвате, бона кʹижан дӧ нета йә?

⁶ Картед Малпәра мә. Әԝ картед бьчʹук гәләк һеса йә бьдьнә хәбате. Бь сайа ԝан карта мәрьв дәрһәԛа мә педьһʹәсьн кӧ әм кʹе нә у әԝана дина хԝә дьдьнә сәр малпәра мә. Чахе әԝана дькʹәвьнә малпәра мә, дькарьн дәрһәԛа мә һе зедә пебьһʹәсьн у һәла һе жи һинбуна Кʹьтеба Пироз бьхԝазьн. Һʹәта рʹожа иро 400 000 мәрьва зедәтьр сәр jԝ.оrg ньвисинә, ԝәки һинбуна Кʹьтеба Пироз дьхԝазьн, у бь сәда зедәтьр жи һәр рʹож дәрһәԛа ве йәке дьньвисьн. Ԝе баш бә кӧ чахе һун дьчьнә щики, әԝ картед малпәра мә тʹьме бал ԝә һәбьн, у гава мәщал һәбә, мәрьварʹа шәʹдәтийе бьдьн.

⁷ Тʹәглифкьрьн. Бәлге тʹәглифкьрьна сәр щьватед мә, бона дӧ нетед сәрәкә йә. Ԝедәре те готьне: «Әм ԝә тʹәглиф дькьн ԝәки тʹәви Шәʹдед Йаһоԝа Кʹьтеба Пироз һин бьн». Паше те готьне, ԝәки әԝана дькарьн сәр «щьвата мә» һин бьн, йан жи «һинбуна Кʹьтеба Пироз» шәхси тʹәви ԝан дькарьн дәрбаз кьн. Бь ве йәке әԝ  һащәт, нә кӧ тʹәне мә тʹәви мәрьва дькә нас, ле ӧса жи мәрьвед кӧ «фәʹм дькьн һʹәԝщәтийа хԝәйә рʹӧһʹани», тʹәглиф дькә Кʹьтеба Пироз тʹәви мә һин бьн (Мәт. 5:3, ДТʹ). Фьрԛи тʹӧнә мәрьве бьхԝазьн йан нәхԝазьн Кʹьтеба Пироз һин бьн, йәкә чахе әԝана тенә сәр щьватед мә, әм ԝана бь дьл у щан ԛәбул дькьн. Һәрге әԝана бенә сәр щьвинед мә, ԝе бьвиньн у бьбьһен кӧ чьԛас тьшт әԝана дәрһәԛа Кʹьтеба Пироз дькарьн пебьһʹәсьн.

8. Чьрʹа гәләк фәрз ә ԝәки мәрьв һәма щарәке бенә сәр щьвате? Мәсәле биньн.

⁸ Гәләк фәрз ә, ԝәки әм гоне щарәке мәрьва тʹәглиф кьн сәр щьвата мә. Чьрʹа әԝ йәк ӧса фәрз ә? Әԝана ԝе бивиньн, ԝәки әм мәрьва рʹастийа Кʹьтеба Пироз һин дькьн у ԝана тʹәви Хԝәде дькьнә нас, ле динед ԛәлп, демәк Бабилона Мәзьн ве йәке накә (Иша. 65:13). Жьн-мерәк, Линда у Рей кʹижан жь Амәрикайе нә, чәнд сал пешда әв фьрԛи дитьнә. Ԝана Хԝәде баԝәр дькьр у рʹӧһʹанида бьрʹчи бун, ләма дәстпекьрьн һәрʹьн һʹәму деред кӧ шәһәре ԝанда һәнә. Дәстпекеда ԝана хԝәрʹа ԛьрар кьр, ԝәки чахе дерәке бьжберьн, гәрәке дӧ тьшта һьлдьнә һʹәсаб. Йа пешьн, әԝана гәрәке ве дереда тьшта һин бьн, у йа дӧда, кʹьнщхԝәкьрьна әндәмед ве дере, гәрәке лайиԛи хьзмәткʹаред Хԝәде бә. Ԝана нава чәнд салада, тʹәсәлийа һʹәму деред шәһәре хԝәда кьрьн, ле дьлшькәсти ман. Әԝана ԝедәре нә тьштәки һин бун, нә жи әндәмед дере лайиԛ хԝә дькьрьн. Паши ве йәке чахе ԝана тʹәсәлийа дера пашьн кьр, Линда чу сәр хәбата хԝә, ле Рей чу мале. Рʹева Рей пе авте бәр Ода Щьватерʹа дәрбаз дьбу, у дьле хԝәда гот: «Бьсә әз бькʹәвьмә ԝедәре жи, у бьвиньм һәла ԝедәре чь дьԛәԝьмә». Һәмьки, әԝ рʹожәкә лапә хԝәш бу бона ԝи! Һәр кәси Ода Щьватеда ԝи бь дьл у щан ԛәбул кьрьн, ԝирʹа һʹәйф бун, у лайиԛ хԝәкьри бун. Рей сәр кʹӧрсийед пешьн рʹуньштьбу у чь бьһист, гәләк дьле ԝи гьрт. Әԝ йәк дькә бира мә гьлийед Паԝлос, чахе әԝи дәрһәԛа мәрьвәки гот, кʹижан щара пешьн те щьвате у дьбежә: «Хԝәде нав ԝәда йә!» (1 Корн. 14:23-25). Паши ве йәке, Рей һәртʹьм рʹоже Ләʹда дьчу щьвате, паше жи ида дәстпекьр ԝәʹде бәрнама щьвине жи һәрʹә. Линдайе жи дәстпекьр бе сәр щьвате, у ԝана ԝәкә 70 салийед хԝәда һинбуна Кʹьтеба Пироз дәстпекьрьн у һатьнә ньхӧмандьне.

9, 10. а) Чьрʹа һеса йә бәлавока бьдьнә хәбате? б) Шьровәкьн кӧ ча бьдьнә хәбате бәлавока бь наве «Чь йә Пʹадшатийа Хԝәде?».

⁹ Бәлавок. Һʹәйшт бәлавокед мә һащәтед баш ьн. Гәләк һеса йә ԝана бьдьнә хәбате, сәва хәбәрдане дәстпекьн. Әԝ бәлавок сала 2013 һатьнә дәрхьстьне, у ԝәкә 5 милиард һәв һатьнә нәшьркьрьне! Әԝ һащәт бь форматәке һатьнә дәрхьстьне, у ләма һәрге һун һин бьн кӧ жь ԝана йәке бьдьнә хәбате сәва хәбәрдане дәстпекьн, һуне бькарьбьн ԝи щурʹәйи йед майин жи бьдьнә хәбате. Ле чаԝа?

¹⁰ Мәсәлә, дьбәкә һун дьхԝазьн бьдьнә хәбате ве бәлавоке «Чь йә Пʹадшатийа Хԝәде?». Дина мәрьва бьдьнә сәр пьрса жь рʹуйе бәлавоке, у бьпьрсьн: «Һун ԛә фькьринә сәр ве йәке, кӧ чь йә Пʹадшатийа Хԝәде? Һьнәк дьфькьрьн ԝәки әԝ  . . .». Паше бьпьрсьн һәла әԝана ԝе жь ԝан се щаба кʹижане бьжберьн. Фьрԛи тʹӧнә, әԝе щаба рʹаст бьжберә йан на, бәлавоке вәкьн, кʹидәре ньвисар ә «Кʹьтеба Пироз Дьбежә», у бьхунә рʹеза жь Данийел 2:44 у Ишайа 9:6. Һәрге дьбә, хәбәрдане бәрдәԝам кьн. Хьлазийеда, сәр рʹупʹела пашьн бьхуньн әван бьнсәрийа «Дәрһәԛа ве йәке Бьфькьрьн»: «Бьн сәрԝерийа Пʹадшатийа Хԝәде жийина мә ԝе чаԝа бә?». Әԝ йәк ԝе һʹим дайнә, сәва щарәкә дьн хәбәрдане бәрдәԝам кьн. Чахе һун диса рʹасти һәв бен, дина мәрьв бьдьн сәр дәрса 7, жь брошура «Мьзгинийа Хԝәде сәва Мәрийа». Әԝ брошура жи йәк жь ԝан һащәта йә, бь сайа кʹижани әм дькарьн һинбуна Кʹьтеба Пироз тʹәви мәрьва дәстпекьн.

11. Журналед мә бона чь нете тенә дәрхьстьне, ле әм гәрәке дәрһәԛа ԝан чь бьзаньбьн?

¹¹ Журнал. «Бьрща Ԛәрәԝьлийе» у «Һʹьшйар бьн!» журналед гәләк бәлабуйи нә, кʹижан кӧ сәр гәләк зьмана тенә ԝәлгәрʹандьне! Әԝ журнал нав тʹәмамийа дьнйайе тенә бәлакьрьне, ләма жи рʹуйед ԝан журнала ӧса тенә сазкьрьне, ԝәки һʹәмуйарʹа һʹәԝас бә. Әм гәрәке әԝан һащәта бьдьнә хәбате, сәва дина мәрьва бьдьнә сәр тьштед лапә фәрз әʹмьрда. Ле сәва әван журнала рʹьнд бәла кьн, әм гәрәке бьзаньбьн һәр йәк жь ԝан бона чь щурʹә хԝәндәвана йә.

12. а) Журнала «Һʹьшйар бьн!» бона чь щурʹә хԝәндәвана те дәрхьстьне, у нета вейә сәрәкә чь йә? б) Ԝан пашԝәхтийа чь ԛәԝьмандьнед һʹәԝас һәбунә чахе ԝә әв журнал да хәбате?

¹² «Һʹьшйар бьн!» бона ԝан хԝәндәвана йә, йед кӧ дәрһәԛа Кʹьтеба Пироз һьнәки заньн йан жи ԛә ньзаньн. Әԝана дьбәкә ньзаньн дәрһәԛа һинкьрьнед Мәсиһити, у дьԛәԝьмә итʹбарийа хԝә тʹӧ религийа найньн, йан жи ньзаньн ԝәки Кʹьтеба Пироз дькарә ԝанрʹа кʹаре бинә. Ле нетәкә сәрәкә йа ве журнале әԝ ә, ԝәки мәрьва бьдә баԝәркьрьне кӧ Хԝәде һәйә (Рʹом. 1:20; Ибрн. 11:6). Ӧса жи әԝ али хԝәндәвана дькә баԝәр кьн, кӧ Кʹьтеба Пироз бь рʹасти «хәбәра Хԝәде» йә (1 Тʹеслн. 2:13). Се дәрхьстьнед ве журнале йед сала 2018, әԝ ьн: «Рʹийа кӧ Дьбә Бәрбь Бәхтәԝарийе», «12 Гавед Керһати бона Бәхтәԝарийа Малбәте», у «Аликʹари бона Ԝан, йед кӧ Мәрьвед Хԝә Ӧнда Кьрьнә».

13. а) «Бьрща Ԛәрәԝьлийе» бона бәлакьрьне, сәва чь щурʹә хԝәндәвана йә? б) Ԝан пашԝәхтийада чь ԛәԝьмандьна һʹәԝас бал ԝә һәбу дәрһәԛа ве һащәте?

¹³ «Бьрща Ԛәрәԝьлийе» бона бәлакьрьне, сәва ԝан хԝәндәвана йә, йед кӧ Хԝәде баԝәр дькьн у ԛәдьре Кʹьтеба Пироз дьгьрьн. Әԝ журнал дина ԝан дьдә сәр һинкьрьнед Кʹьтеба Пироз. Рʹаст ә әԝана дьбәкә дәрһәԛа Кʹьтеба Пироз һьнәки заньн, ле әԝана һинкьрьнед ԝе нәрʹаст фәʹм дькьн (Рʹом. 10:2; 1 Тимтʹ. 2:3, 4). Се дәрхьстьнед ве журнале йа сала 2018, щаба ԝан се пьрса дьдьн: «Гәло Кʹара Хԝәндьна Кʹьтеба Пироз Һәйә?», «Гәло Чь Ахьри Һивийа Мә йә?», у «Гәло Дьле Хԝәде сәр Тә Дьшәԝьтә?».

14. а) Чар видеойед мә бона чь нете нә? б) Ԝәʹде хьзмәтийе ԝә ча әԝ видео данә хәбате у ча әԝ йәк сәр мәрьва һʹӧкӧм буйә?

¹⁴ Видео. Ԝәʹде Исада нәщара тʹәне һащәтед дәста дьданә хәбате. Ле рʹожа иройин, нәщар һащәтед әләктрики дьдьнә хәбате, мәсәлә рʹьндәйа токе, дрел, бьрәкед токе у мәкʹинед дьн. Хенщи әʹдәбйәтед нәшьркьри, бал мә иро һәнә видеойед баш, жь ԝана чар һәв дькʹәвьнә нава һащәтед мәйә сәрәкә: «Чьрʹа Һин бьн Кʹьтеба Пироз?», «Ча Дәрбаз Дьбә Һинбуна Кʹьтеба Пироз», «Чь Дьԛәԝьмә Ода Щьватеда?», у «Шәʹдед Йаһоԝа бь Рʹасти Кʹи нә?». Әԝ видео кӧ 2 дәԛә кемтьр дькʹьшиньн, гәләк керһати нә бона сәрледана пешьн. Ле видеойед дьреж, ида әм дькарьн бьдьнә хәбате ԝәʹде сәрледана дӧда у ӧса жи тʹәви ԝан мәрьва ԝәʹде кʹижана һәйә. Әԝ һащәтед баш дькарьн мәрьва һелан кьн, ԝәки дәстпекьн Кʹьтеба Пироз һин бьн у бенә сәр щьватед мә.

15. Мәсәле биньн кӧ чахе мәрьв сәр зьмане хԝә видеойа дьньһерʹьн, ча сәр ԝан һʹӧкӧм дьбә.

¹⁵ Дина хԝә бьдьнә ԛәԝьмандьнәкә хушкәке, кӧ рʹасти жьнькәкә жь Микронесйайе һат, зьмане кʹижане Йапи бу. Хушка мә жерʹа сәр зьмане ԝе видео бь наве «Чьрʹа Һин бьн Кʹьтеба Пироз» нишан кьр. Гава видео векʹәт, жьньке гот: «Әԝ сәр зьмане мьн ә. Әԝ гәләк әʹщебмайи йә! Видеойеда аксента мерьк жи, мина аксента ве гьраве йә, жь кʹидәре кӧ әз һатьмә! Әԝ һәма сәр зьмане мьн хәбәр дьдә!». Паши ве йәке әԝе гот, ԝәки дьхԝазә малпәра мә jԝ.org-да, һәр тьшти сәр зьмане хԝә бьхунә у бьньһерʹә (Бәрамбәр кьн Кʹаред  Шандийа 2:8, 11.) Ньһа дина хԝә бьдьнә ԛәԝьмандьна дьн. Хушкәкә мә жь Амәрикайе, кӧрʹе бьре хԝәрʹа кӧ ԝәлате хәрибда дьжи, линка ве видеойе сәр зьмане ԝи шанд. Гава әԝи әв видео ньһерʹи, жерʹа пе емаиле ньвиси: «Әԝ пʹара кӧ те готьне, ԝәки дьнйа бьн һʹӧкӧме кәсе зӧлмда йә, һʹәԝаса мьн пешда ани. Мьн һинбуна Кʹьтеба Пироз хԝәст». Әԝ ԝи ԝәлатида дьжи, кʹидәре шьхӧле мә ԛәдәхәкьри йә!

16. Шьровәкьн нета ԝан һәр әʹдәбйәта: а) «Гӧһ Бьдә Хԝәде у Бьжи Һʹәта-Һʹәтайе». б) «Мьзгинийа Хԝәде сәва Мәрийа». в) «Кʹи Иро Ԛьрара Йаһоԝа Дьԛәдинә?».

¹⁶ Брошур. Ча һун дькарьн рʹастийе ԝан мәрьва һин кьн, йед кӧ хԝәндьне ньзаньн, йан жи сәр зьмане кʹижана әʹдәбйәт тʹӧнәнә? Сәва ԝан мәрьва брошура «Гӧһ Бьдә Хԝәде у Бьжи Һʹәта-Һʹәтайе» * һәйә. Сәва һинбуна Кʹьтеба Пироз дәстпекьн, һащәта гәләк баш, әԝ һәйә брошура «Мьзгинийа Хԝәде сәва Мәрийа». Һун дькарьн мәрьварʹа сәр рʹупʹела пашьн 14 пьрса нишан кьн, у бьра әԝ хԝәха бьжберә, кʹижан пьрс жерʹа һʹәԝас ә. Паше дәстпекьн тʹәви ԝи әве дәрсе шеԝьр кьн. Ле ԝә әԝ метʹод ԛә ԝәʹде сәрледана дӧбарә дайә хәбате? Брошура сьсийа кӧ дькʹәвә нава һащәтед мә, әԝ һәйә брошура «Кʹи Иро Ԛьрара Йаһоԝа Дьԛәдинә?». Әԝ брошура аликʹарийе дьдә ԝан, йед кӧ Кʹьтеба Пироз һин дьбьн, ԝәки дәрһәԛа тʹәшкиләта мә һе зедә пебьһʹәсьн. Сәва кӧ һин бьн ча әве брошуре ԝәʹде һинбуна Кʹьтеба Пироз бьдьнә хәбате, бьньһерʹьн бәрнама щьвине «Мина Иса Мәсиһ Бьжин у Хьзмәт кьн», йа мәһа Адаре, сала 2017.

17. а) Нета кʹьтебед бона һинбуне чь йә? б) Чь те дәʹԝакьрьне жь ԝан, йед кӧ дьхԝазьн бенә ньхӧмандьне, у чьрʹа?

¹⁷ Кʹьтеб. Чахе ԝә ида һинбуна Кʹьтеба Пироз пе брошуре дәстпекьр, ида чьчах дьхԝазьн, дькарьн кʹьтеба «Кʹьтеба Пироз Чь Дьбежә?» * дәрбаз бьн. Пе ве кʹьтебе, әԝ ԝе дәрһәԛа һинкьрьнед Кʹьтеба Пирозә сәрәкә, һе зедә занәбуне бьстинә. Паши ве йәке, чахе ԝә ида әԝ кʹьтеб хьлаз кьр, у һәрге әԝ мәрьв рʹӧһʹанида пешда дьчә, бәрдәԝам кьн һинбуне пе кʹьтеба «Чаԝа Нава Һʹьзкьрьна Хԝәдеда Бьминьн?». Әԝ һащәт ԝе ԝи мәрьви һин кә, кӧ чаԝа ширәт у принсипед Кʹьтеба Пироз әʹмьре хԝәда бьдә хәбате. Бир нәкьн, ԝәки һәла һе паши ньхӧмандьне жи, шагьртед тʹәзә гәрәке бәрдәԝам кьн һинбуне, һʹәта кӧ әԝ һәрдӧ кʹьтеба хьлаз кьн. Әԝ йәк ԝе али ԝан бькә баԝәрийеда ԛәԝи бьн. (Бьхунә Колоси 2:6, 7.)

18. а) 1 Тимотʹейо 4:16 чь мә һелан дькә сәва рʹастийе һин кьн, у кʹара ве йәке чь йә? б) Чахе әм Һащәтед бона Һинкьрьне дьдьнә хәбате, нета мә гәрәке чь бә?

¹⁸ Әм Шәʹдед Йаһоԝа, борщдар ьн «хәбәра мьзгинийейә рʹаст» мәрьва һин кьн, чьмки ӧса әԝана дькарьн жийина һʹәта-һʹәтайе бьстиньн. (Колс. 1:5; бьхунә 1 Тимотʹейо 4:16.) Сәва әм ԝи шьхӧли рʹьнд бькьн, бал мә һәнә Һащәтед бона Һинкьрьне, чь кӧ мәрʹа гәләк лазьм ьн. (Бьньһерʹьн « Һащәтед Сәрәкә бона Һинкьрьне».) Ԝәрә әм чьԛас дькарьн әԝан һащәта бь һостәти бьдьнә хәбате. Һәр кәс жь мә хԝәха дькарә сафи кә, кʹижан әʹдәбйәте бьдә хәбате у кʹәнге. Ле әм заньн, ԝәки нета мә әԝ нинә, кӧ тʹәне әʹдәбйәта бәла кьн, йан жи ԝан мәрьварʹа әʹдәбйәтед мә бьһельн, йед кӧ нахԝазьн гӧһ бьдьнә мә. Нета мә әԝ ә, ԝәки мәрьвед дьлсах, мьлук у рʹӧһʹанида бьрʹчи, демәк йед кӧ һазьр ьн мьзгинийе ԛәбул кьн, бькьнә шагьрт (Кʹар. Шанд. 13:48; Мәт. 28:19, 20).