КʹОМӘКӘ мәрьвед берʹәʹм пәй Стәйфан кʹәт. Әԝ щьвина гьрәгьра бу, демәк диԝана һәри мәзьн Исраеледа, жь 71 һʹакьма бу, һʹӧкӧме кʹижана сәр щьмәʹте зәʹф бу. Әԝана бал Ԛәйафайе Сәрәккʹаһин тʹоп бьбун, йе кӧ чәнд мәһа пешда рʹебәрийа диԝана Иса дькьр. Ԝедәре һатә әʹламкьрьне, ԝәки Иса гәрәке бе кӧштьне (Мәт. 26:57, 59; Кʹар. Шанд. 6:8-12). Чахе ԝана йәк пәй йәкерʹа бӧхдан дьавитьнә Стәйфан, әԝана мәтʹал ман, гава дина хԝә дане, ԝәки рʹәнг-рʹуйе Стәйфан «мина рʹәнг-рʹуйе мьлйакʹәта бу» (Кʹар. Шанд. 6:13-15).

Ле гәло чаԝа ԝи һʹале хофда, әԝ рʹьһʹәт у ԛәԝи ма? Пешийа кӧ щьвина гьрәгьра ԝи гьрт, әԝ пе рʹебәрийа рʹӧһʹе Хԝәдейи пироз, бь тʹәмами нав шьхӧле бәлакьрьна мьзгинийеда бу (Кʹар. Шанд. 6:3-7). У чахе әԝ ида бәр диԝане бу, рʹӧһʹе Хԝәде дьле ԝи рʹьһʹәт дькьр у рʹезед жь Ньвисаред Пироз дьани бира ԝи (Йуһʹн. 14:16). Кʹаред Шандийа сәре 7-да, те гьликьрьне кӧ чахе Стәйфан бь мерхаси шәʹдәти дьда, рʹӧһʹе пироз ԝәкә 20 рʹез йан һе зедә жь Ньвисаред Ибрани ани бира ԝи (Йуһʹн. 14:26). Ле паше баԝәрийа Стәйфан һе шьдийа, гава әԝи хәԝн-хәйаледа Иса дит кӧ ль мьле Хԝәдейи рʹасте сәкьни бу (Кар. Шанд. 7:54-56, 59, 60).

Рʹожәке дьбәкә әм жи рʹасти зерʹандьне у пәйкʹәтьна бен (Йуһʹн. 15:20). Һәрге әм иро тʹьме Хәбәра Хԝәде леколин дькьн у хьзмәтийеда хирәт ьн, әме рʹе бьдьнә рʹӧһʹе Йаһоԝайи пироз сәва сәр мә һʹӧкӧм кә. Әме ӧса жи ԛәԝате бьстиньн, ԝәки ԛәԝи бьминьн, тәйах кьн бәр мьԛабьлибуне у дьлрʹьһʹәтийе хԝәй кьн (1 Пәт. 4:12-14).