Баве мьн сала 1949-да, жь Австралйайе дәрбази Алманийе дьбә, сәва кӧ хәбате бьвинә. Ль ԝьр әԝ дәстпедькә чаԝа мәдәнчи (шахтиор) дьхәбьтә, әԝ ль щийе әләктроәнәржийе жи дьхәбьтә. У әԝ ль мьһала бь наве Викторийа щиԝар дьбә. Ль ԝьр әԝ дийа мьн дьстинә у сала 1953-да әз һатьмә буйине.

Чәнд сал шунда, дийа мьн тʹәви Шәʹдед Йаһоԝа һинбуна Кʹьтеба Пироз дәстпекьр. Ләма жи һинкьрьнед Кʹьтеба Пироз жь бьчʹуктайе бира мьнда мабун. Баве мьн тʹӧ религийәк ԛәбул нәдькьр. Әԝ йәки гәләк зӧлм бу, гьшк ԝи дьтьрсийан у дийа мьн жи. Әԝе дьзикава бәрдәԝам дькьр Кʹьтеба Пироз һин дьбу у һинкьрьнед ԝе ԛәбул дькьр. Чахе баве мьн малда нибу, дийа мьн мьнрʹа у хушка мьнрʹа гьли дькьр әԝ йәк, чь кӧ әԝ жь Кʹьтеба Пироз педьһʹәсийа. Әԝе мәрʹа гьли дькьр дәрһәԛа әʹрде щьнәте у ӧса жи ԝәки чаԝа әм дькарьн бәхтәԝар бьн, һәрге ль гора принсипед Кʹьтеба Пироз бьжин (Зәбур 37:10, 29; Ишайа 48:17).

Жь бо зӧлмийа баве хԝә, 18 салийа хԝәда әз мәщбур бум жь мале һәрʹьм. Рʹаст ә мьн баԝәр дькьр әԝ һʹәму тьшт, чь кӧ дийа мьн әз һин дькьрьм, ле ԛимәте ве мьн ньзаньбу. Ләма жи мьн нәдьжит ль гора ԝан һинкьрьна. Мьн дәстпекьр ль мәдәна кʹомьре ча әләктрик бьхәбьтьм. Чахе әз 20 сали бум, әз зәԝьщим. Се сал шунда ԛиз мәрʹа бу у мьн дәстпекьр бьфькьрьм, кӧ жийина мьнда тьште фәрз чь йә. Мьн заньбу кӧ Кʹьтеба Пироз дькарә али малбәта мьн бькә, ләма жи мьн дәстпекьр тʹәви Шәʹдед Йаһоԝа Кʹьтеба Пироз һин бьм. Ле жьна мьн гәләк мьԛабьли Шәʹдед Йаһоԝа бу. Чахе әз чумә ль сәр щьватәкә ԝан, жьна мьн мьнрʹа гот кӧ әз бьжберьм; йан һинкьрьна Кʹьтеба Пироз бьһельм йан жи малбәта хԝә. Әз кʹәтьмә бәр байе жьна хԝә у мьн һәләԛәтийа хԝә тʹәви Шәʹдед Йаһоԝа ԛәтанд. Ԝәʹдә шунда әз гәләк пʹошман бум, кӧ мьн нәжбарт әԝ, чь кӧ мьн заньбу ԝәки рʹаст ә.

Рʹожәке һәвал-хәбаткʹаред мьн, порнографи нишани мьн кьрьн. Әв йәк һьм һʹәԝас бу, һьм жи мьрʹдар. Кʹурайа дьле хԝәда мьн дәстпекьр хԝә сущдар кьм. Һинкьрьнед Кʹьтеба Пироз бира мьнда бун, у мьн заньбу кӧ Хԝәде ԝе мьн щәза кә. Дора мьн тʹьме шькьлед нәщайиз һәбун у сәва мьн әв ида тьштәки нормал бу. Ԝәʹдә шунда әз ида бь тʹәмами порнографийева һатьмә гьредане.

Нава 20 салед дьн, әз һе дур кʹәтьм жь принсипед кӧ дийа мьн әз һин дькьрьм. Жь рʹабун-рʹуньштандьна мьн дьһатә кʹьфше, ԝәки һʹьше мьн бь чь тʹьжә бу. Хәбәрдан у һʹәнәкед мьн жи нәщайиз  бун. Ньһерʹандьна мьн сәр сексе хьраб у нәрʹаст бу. Мьн тʹәви жьна хԝә дьжит, ле һәләԛәтийа мьн тʹәви кʹӧлфәтед дьн жи һәбу. Рʹожәке мьн ль нәйнике ньһерʹи у мьн хԝәрʹа гот: «Тӧ бәр чʹәʹве мьн рʹәш и». Мьн ида ԛәдьре хԝә ньзаньбу у хԝә нәфрʹәт дькьр.

Зәԝаща мьн һьлшийа у жийина мьн жи педа хьрав бу. Паше, мьн бь тʹәмамийа дьле хԝә Йаһоԝарʹа дӧа кьр. Мьн тʹәзәда дәстпекьр Кʹьтеба Пироз һин бьм, чь кӧ мьн 20 сал пешда дабу сәкьнандьне. Нава ԝи ԝәʹдәйида баве мьн мьр, дийа мьн жи һатә ньхӧмандьне у бу Шәʹде Йаһоԝа.

Фьрԛийа мәзьн һәбу ортʹа ԝе йәке чаԝа мьн дьжит у чаԝа кӧ Кʹьтеба Пироз һин дькьр. Ле ижар мьн дьхԝәст бьстиньм әʹдьлайа кӧ жь һәр һʹьш-аԛьли дәрбазтьр ә, дәрһәԛа кʹижани кӧ Кʹьтеба Пироз соз дьдә. Мьн сафи кьр хәбәрдана хԝә тʹәмьз кьм у хәйсәте хԝәйә хьраб жи бьгӧһезьм. Мьн ӧса жи сафи кьр жийина хԝәйә бенамуси бьһельм, хӧмаре нәлизьм у ичкʹе пʹьрʹ вәнәхԝьм. Хенщи ԝе йәке, мьн жь мәзьне хәбате ида дьзи нәдькьр.

Һәвал-хәбаткʹаред мьн фәʹм нәдькьрьн кӧ чьма мьн хԝәст жийина хԝәда гӧһастьнед ӧса мәзьн бькьм. Нава се салада ԝана тʹьме һʹәму тьшт дькьр, сәва кӧ әз ԝәгәрʹьм шьхӧле хԝәйи бәре. Щарна щәм мьн дәрнәдькʹәт хԝә бьгьрьм, мәсәлә әз ньшкева һерс дькʹәтьм йан жи гьлийед нәщайиз дәве мьнрʹа дәрдькʹәтьн. Һьнге һәвалед мьн дьготьн: «Аһан! Әв диса Щойе мәйи бәре йә». Әԝ гьли чьԛас дьле мьн дьешандьн! Әз тʹьме дьфькьрим, кӧ әзе тʹӧ щар нькарьбьм бемә гӧһастьне.

Щийе хәбата мьн тʹьжә порнографийа бу, чаԝа бь щурʹе әләктроник ӧса жи бь щурʹе нәшьркьри. Һәвал-хәбаткʹаред мьн, бь компотәред хԝә, шькьлед нәщайиз һәвдӧрʹа дьшандьн, чаԝа кӧ мьн бәре дькьр. Әз дьхәбьтим кӧ жь ԝе йәке хԝә дур бьгьрьм, ле ԝана һʹәму тьшт дькьр, сәва әз бькʹәвмә бәр байе ԝан. Мьн аликʹари хԝәст жь ԝи мәрьви, йе кӧ тʹәви мьн һинкьрьна Кʹьтеба Пироз дәрбаз дькьр. Чахе мьн дьле хԝә ԝирʹа ԝәдькьр, әԝи бь сәбьр гӧһ дьда мьн. Әԝи һьнә рʹезед жь Кʹьтеба Пироз нишани мьн кьр, ԝәки чаԝа әз дькарьм хԝәстьна хԝә алт кьм. Әԝи ӧса жи әз һелан кьрьм, ԝәки тʹьме Йаһоԝарʹа дӧа бькьм у аликʹарийе бьхԝазьм (Зәбур 119:37).

Рʹожәке мьн һʹәму һәвал-хәбаткʹаред хԝә тʹоп кьр. Чахе әԝана щьвийан, мьн гот ԝәки дӧ мәрьварʹа йед кӧ бәре гәләк ичʹке вәдьхԝарьн, бира (ава щәһ) бьдьн. Гьшк дәстпекьрьн бькьнә ԛарә-ԛар у готьн: «Тӧ нькари әве йәке бьки! Әв мәрьв дьхәбьтьн, сәва кӧ әви хәйсәти тʹәрк бьдьн!» Мьн жи гот: «Нә әз жи, сәр хәйсәте хԝә дьхәбьтьм». Жь ԝе рʹоже дәстпебуйи гьшка фәʹм кьрьн кӧ әз дьхәбьтьм сәва порнографийе тʹәрк бьдьм. У әԝана ида ль сәр мьн һʹӧкӧм нәдькьрьн, ԝәки әз ԝәгәрʹьм шьхӧле хԝәйә бәре.

Ԝәʹдә шунда у бь аликʹарийа Йаһоԝа, мьн карьбу алт кьм хԝәстьна хԝә кӧ порнографийе бьньһерʹьм. Дь сала 1999-да әз ԝәк Шәʹде Йаһоԝа һатьмә ньхӧмандьне. У әз гәләк рʹази бум кӧ мәщала дӧда мьнрʹа һатә дайине, сәва кӧ бь жийинәкә тʹәрбәт у бәхтәԝар бьжим.

Ньһа әз фәʹм дькьм, кӧ чьма Йаһоԝа нәфрәт дькә ԝан тьшта чь кӧ һаԛас ԝәхт мьн бәре һʹьз дькьр. Йаһоԝа чаԝа Бав кӧ зарʹед хԝә һʹьз дькә, дьхԝәст мьн дур хьста жь ԝе зийане, кӧ порнографийа дьдә. Бь рʹасти жи гьлийе жь Мәтʹәлок 3:5, 6 чьԛас рʹаст ьн! Ԝе дәре ньвисар ә: «Бь һʹәмуйа дьле хԝә, бь ХӦДАНВА әԝлә бьбә [итʹбарийа хԝә бинә] у пьшта хԝә нәсьперә аԛьле хԝә. Дь һәр кʹаре кӧ тӧ дьки . . . ԝи нас бькә у әԝ жи рʹейа тә, дәрхә рʹастийе». Принсипед Кʹьтеба Пироз нә кӧ тʹәне мә хԝәй дькьн, ле ӧса жи аликʹарийе дьдьн кӧ сәд сәләфи сәрфьраз бьн (Зәбур 1:1-3).

Бәре мьн хԝә нәфрәт дькьр, ле ньһа әз ԛәдьре хԝә заньм у дьле мьнда әʹдьлайи һәйә. Әз бь жийинәкә тʹәмьз дьжим у тʹәхмин дькьм кӧ Йаһоԝа бахшандийә мьн у пьштгьрийа мьн дькә. Дь сала 2000-да мьн Каролин станд, хушкәкә назьк, кʹижан кӧ мина мьн Йаһоԝа гәләк һʹьз дькә. Мала мә, щи-сьтʹара әʹдьлайе йә. Сәва мә бь рʹасти жи ԛәдьрәки мәзьн ә, бьбьнә пʹарәк бьратийа һʹәмдьнийайе. Әв бьрати тʹәмьз ә у нава ԝеда һʹьзкьрьн һәйә.