ТӦ ХԜӘ һʹәсаб дьки ча Мәсиһи? Һәрге әре, тӧ нава һәжмара дӧ милиарда мәрьва зәдәтьрда ни, йед кӧ әʹйан ԛәбул дькьн, ԝәки әԝана пәйчуйед Мәсиһ нә. Иро бь һʹәзара кʹом һәнә, йед кӧ хԝә нав дькьн ча Мәсиһи, у һәла һе ортʹа ԝанда жи фьрԛи һәйә чаԝа һинкьрьнеда ӧса жи ньһерʹандьнеда. Дьбәк баԝәрийа тә жи гәләк щӧдә дьбә жь баԝәрийа мәрьвед кӧ хԝә нав дькьн Мәсиһи. Гәло лазьм ә кʹур бьфькьрьн һәла әм чь баԝәр дькьн? Бәле, хут ԝи чахи һәрге тӧ дьхԝази ль гора баԝәрийа Мәсиһийа бьжий, у ӧса бьки чаԝа кӧ Кʹьтеба Пироз һин дькә.

Пәйчуйед Иса Мәсиһ йе пешьн әʹйан бун ча «мәсиһи» (Кʹаред Шандийа 11:26). Нәлазьм бу навәки дьн ԝанарʹа бьдана, чьмки ԝи ԝәʹдәйда тʹәне баԝәрийа Мәсиһти һәбу. Мәсиһи йәктийеда пәй һинкьрьн у рʹебәрийа Сазкʹаре Мәсиһийа дьчун, демәк Иса Мәсиһ. Ле дәрһәԛа дера хԝә чь дькари бежи? Тӧ баԝәр дьки, ԝәки әԝ һин дькә әԝе йәке чь кӧ Иса һин дькьр у дькә әԝ, чь кӧ пәйчуйед Мәсиһ дькьрьн? Ле чаԝа тӧ дькари дь ве йәкеда избат би? Мәщәләкә баш һәйә у әв Кʹьтеба Пироз ә, чь кӧ али мә дькә баԝәрийа хԝә һьмбәри һинкьрьна ԝе бькьн.

Һәла дәрһәԛа ве йәке бьфькьрьн: Иса Мәсиһ гәләк ԛәдьре Ньвисаред Пироз дьгьрт у әԝ һʹәсаб дькьр ча Хәбәра Хԝәде. Иса ԛәбул нәдькьр ԝан мәрийа, йед кӧ һинкьрьнед Кʹьтеба Пироз дьданә  алики, сәва кӧ рʹаԝ-рʹьзьмед хԝә демәк ԛәйдед хԝә, пешда биньн (Марԛос 7:9-13). Жь ве йәке әм дькарьн бежьн, ԝәки пәйчуйед Исайи рʹаст, гәрәке баԝәри у һинкьрьнед хԝә, ль сәр һʹиме Кʹьтеба Пироз саз кьн. Ләма жи ԝе баш бә, ԝәки һәр Мәсиһи жь хԝә бьпьрсә, ‹Гәло һинкьрьнед дера мьн ль сәр һʹиме Кʹьтеба Пироз ьн?› Сәва кӧ щаба ве пьрсе бьдьн, һун дькарьн һинкьрьнед дера хԝә һьмбәри ԝе йәке кьн, чь кӧ бь рʹасти Кʹьтеба Пироз дьбежә.

Иса гот, кӧ һʹәбандьна мә Хԝәдерʹа, гәрәке ль сәр һʹиме рʹастийе бә, демәк ль сәр һʹиме рʹастийа Кʹьтеба Пироз (Йуһʹәнна 4:24; 17:17). У Паԝлосе шанди жи гот, кӧ хьлазкьрьна мә ԝе йәкева гьредайи йә, кӧ «рʹастийе нас кьн» (1 Тимотʹейо 2:4). Ләма жи гәләк фәрз ә, кӧ баԝәрийа мә ль сәр һʹиме рʹастийа Кʹьтеба Пироз бә. Чьмки ԝе йәкева гьредайи йә, әме хьлаз бьн йан на!

Әм ԝә тʹәглиф дькьн бьхуньн шәш пьрсед жере у дина хԝә бьдьн, ԝәки Кʹьтеба Пироз чаԝа ль сәр ван пьрса щаба хԝә дьдә. Бьньһерʹьн рʹезед Кʹьтеба Пироз кӧ тенә ԝәкʹьландьне у бьфькьрьн дәрһәԛа щабед пьрсед Кʹьтеба Пироз. Паше жь хԝә бьпьрсьн: «Һинкьрьнед дера мьн ль сәр һʹиме Кʹьтеба Пироз ьн?»

Әв леколинкьрьна кьн дькарә али ԝә бькә һьмбәриһәвкьрьна лапә керһати бькьн. Һун дьхԝазьн һинкьрьнед дьн йе дера хԝә, һьмбәри Кʹьтеба Пироз кьн? Шәʹдед Йаһоԝа ԝе дьлша бьн али ԝә бькьн, кӧ рʹастийа Кʹьтеба Пироз леколин бькьн. Һун дькарьн йәк жь Шәʹдед Йаһоԝарʹа бежьн, кӧ тʹәви ԝә һинкьрьна Кʹьтеба Пирозә бепʹәрʹә дәрбаз кә. Йан жи һун дькарьн бькʹәвьнә малпәра мә, jw.org.