Дь Кʹьтеба Пирозда, хәбәра Йунани кʹижан кӧ һатийә ԝәлгәрʹандьне ча «нәԛәлпи», рʹастә-рʹаст те һʹәсабе һьндӧрʹва баш. Әԝ ӧса жи дькарә бе һʹәсабе бәдәԝбун алийе намусийеда.

Паԝлос бь рʹебәрийа Хԝәде гьлийед ӧса ньвиси: «Әм дьхԝазьн кӧ һәр тьшти рʹаст бькьн». Мәсиһи ԝан гьлийед Паԝлос бь тʹәмамийа дьле хԝә һьлдьдьн. Ле әԝ гьлийед Паԝлос чь тенә һʹәсабе?

Һʹәчʹи зәʹф мәрьв һәр шәбәԛ пешийа кӧ дәрен дәрва, хԝә нәйникерʹа дьньһерʹьн. Чьрʹа? Чьмки әԝана дьхԝазьн рʹьнд бенә кʹьфше. Ле хенщи пʹорчекьрьна бәдәԝ йан кʹьнщхԝәкьрьна модерн, тьштәки һе фәрз һәйә. Бь рʹастийе, әԝ йәк кӧ әм дьле хԝәда чь мәри нә, дькарә бәдәԝбуна мә һе зедә кә йан һе кем кә.

Хәбәра Хԝәде әʹйан дькә, кӧ дьле мә бәрбь хьрабийе мә дькʹьшинә. Дь Дәстпебун 8:21-да те готьне: «Сьтԛе дьле мерьв жь зарʹотийеда хьраб ә, ПКʹМ». Ләма, һәрге әм дьхԝазьн мәрьве рʹаст бьн, әм гәрәке мьԛабьли ԛальбе хԝәйи гӧнәкʹар дәрен. Паԝлос дәрһәԛа хԝә гьли кьр кӧ әԝ ча мьԛабьли гӧнә дәрдькʹәт: «Әз бь кʹурайийа дьле хԝә ԛануна Хԝәде бәгәм дькьм, ле ԛанунәкә дьн нава хԝәда дьбиньм кӧ мьԛабьли ԝе ԛануна һʹьше мьн бәгәм кьрийә дькә шәрʹ у мьн дькә һесире ԛануна гӧна, йа кӧ нава мьнда йә» (Рʹомайи 7:22, 23).

Мәсәлә, һәрге дьл мә һелан дькә кӧ әм тьштәки хьраб бькьн, у хԝәстьна мәйә ԛайим һәйә кӧ ԛәлпийе бькьн, әм дькарьн гӧрʹа дьле хԝә нәкьн, чьмки әԝ зоре мә накә. Демәк әм хԝәха дьжберьн чаԝа бькьн. Чахе әм хԝәрʹа сафи дькьн, кӧ фькьред хьраб жь хԝә дур хьн, әм дькарьн нәԛәлп бьминьн, у фьрԛи тʹӧнә кӧ мәрьв дор бәре мә ԛәлп ьн йан на.

Сәва кӧ әм мәрьвед нәԛәлп у рʹаст бьн, әм гәрәке хԝә ль намусийе бьгьрьн. Ле йазьх, гәләк мәрьв иро һе зәʹф дьфькьрьн кӧ чь щурʹә кʹьнща хԝә кьн, нә кӧ чь щурʹәйи бь намус бьжин. Ләма жи, әԝана сәр гәләк ԛәлпи у нәрʹастийе чʹәʹве хԝә дадьдьн ча ԝанрʹа дәст дьдә. Кʹьтебәкә дәрһәԛа намусийеда («Thе (Honеst) Truth About Dishonеsty»), һатә готьне: «Гәләк щар, әм нәрʹастийе дькьн у хԝәха хԝә дьхапиньн кӧ йанчь әм мәрьвнә рʹаст у нәԛәлп ьн, чьмки әм дьфькьрьн кӧ кьред мә рʹаст ьн». Ле гәло һәнә принсипед рʹаст, кʹижан кӧ дькарьн али мә бькьн, ԝәки әм бьзаньбьн гәло ԛәлпикьрьн ԛә те ԛәбулкьрьне йан жи чьԛас те ԛәбулкьрьне? Бәле, принсипед ӧса һәнә.

Бь милйона мәрьв избат бун кӧ Кʹьтеба Пироз бона намусийе принсипед рʹаст дьдә. У әԝ принсип найенә бәрамбәрикьрьне (Зәбур 19:7). Әԝ рʹебәрийа рʹаст дьдә, мәсәлә бона малбәте, хәбате, намусийе у рʹӧһʹани. Әԝ рʹебәри щерʹьбанди йә. Ԛанун у принсипед Кʹьтеба Пироз бона  һʹәму мьләта, раса, у бәрәка нә. Һәрге әм Кʹьтеба Пироз бьхуньн, бьфькьрьн сәр ве, у ширәтед ԝе бьдьнә хәбате, әме бькарьбьн дьле хԝә һин кьн кӧ нәԛәлп у рʹаст бә.

Хенщи занәбуна рʹастә жь Кʹьтеба Пироз, диса һәнә һе зедә тьшт, кʹижан кӧ дькарьн али мә бькьн ԝәки әм мьԛабьли нәрʹастийе у ԛәлпийе дәрен. Әм дьжин дь ве дьнйайеда, кʹижан кӧ зоре мә дькә кӧ әм принсипед нәрʹаст ԛәбул кьн. Ләма жи әм гәрәке Хԝәдерʹа дӧа бькьн, ԝәки әԝ али мә бькә (Филипи 4:6, 7, 13). Һәрге әм ӧса бькьн, әме мерхасийе бьстиньн сәва кӧ бькьн чь кӧ рʹаст ә у һʹәму тьштида нәԛәлп бьн.

Һитоши, дәрһәԛа кʹижани кӧ тʹема пешьнда һатә готьне, кʹар станд жь ве йәке кӧ наве хԝә хԝәй кьр чаԝа хәбаткʹаре рʹаст у нәԛәлп. Әԝ ньһа дьхәбьтә, у мәзьне хәбата ԝи гәләк дьшекьринә кӧ әԝ ча нав-намус дьхәбьтә. Һитоши дьбежә: «Әз гәләк рʹази мә, кӧ мьн дит хәбатәкә ӧса, кʹидәре кӧ исафа мьн тʹәмьз те хԝәйкьрьне».

Мәрьвед дьн жи дитьнә кӧ әԝ йәк гәләк керһати йә. Ԝәрә әм һьнә мәсәлед ԝан мәрьва шеԝьр кьн, йед кӧ данә хәбате әв принсипа Кʹьтеба Пироз кӧ «һәр тьшти рʹаст бькьн» у кʹар же стандьнә.

• Исафа Тʹәмьз

  «Чахе әз 13 сали бум, әз жь мәкʹтәбе дәркʹәтьм сәва кӧ тʹәви дьза бьхәбьтьм. Мьн һәбуна хԝә 95 сәләф бь ԛәлпийе ԛазанщ кьр. Паше, мьн мер кьр. Мьн у мере мьн дәстпекьрьн һинбуна Кʹьтеба Пироз тʹәви Шәʹдед Йаһоԝа. Әм пеһʹәсийан кӧ Йаһоԝа * Хԝәде кьред нәрʹаст у ԛәлп нәфрʹәт дькә. Ләма мә сафи кьр кӧ жийина хԝә бьгӧһезьн. Сала 1990 мә хԝә тʹәсмили Йаһоԝа кьр у һатьнә ньхӧмандьне чаԝа Шәʹдед Йаһоԝа» (Мәтʹәлок 6:16-19).

  «Бәреда, мала мьн бь тьштед дьзийе тʹьжә бу, ле ньһа мала мьн жь тьштед ӧса аза йә, у жь ве йәке исафа мьн тʹәмьз ә. Чахе әз дьфькьрьм дәрһәԛа гәләк сала кӧ мьн ԛәлпи дькьр, әз гәләк жь Йаһоԝа рʹази мә бона рʹәʹма ԝи. Ӧса хԝәш ә чахе һәр шәв дьчьм кӧ рʹазем, әз заньм кӧ Йаһоԝа жь мьн рʹази йә» (Шерил, Ирләнд).

  «Чахе мәзьне хәбата мьн бьһист кӧ мьн жь бькʹьрчи рʹӧшәт һьлнәда, әԝи готә мьн: ‹Хԝәдайе тә, тә дькә мәрьвәки амьн! Рʹасти жи кʹәрәм ә кӧ мәрьвәки мина тә компанйа мәда нә›. Чахе әз һәр тьшти рʹаст дькьм, исафа мьн тʹәмьз дьминә бәр Йаһоԝа Хԝәде. Әԝ йәк ӧса жи али мьн дькә кӧ әз али малбәта хԝә у мәрьвед дьн бькьм кӧ әԝана жи ӧса бькьн» (Сони, Һон-Конг).

• Әʹдьлайи Һʹьшда

  «Әз дьхәбьтьм дь банка интернасйоналида, чаԝа аликʹарчийе администраторе. Ве бизнеседа, мәрьв рʹастийе у нәԛәлпийе дьдьнә алики, сәва кӧ дәԝләти бьн. Ньһерʹандьна ӧса бәлабуйи йә: ‹Чьрʹа ԝе чь бә мәрьв һьнәки ԛәлпийе бькә, һәрге әв һәбуне у пʹәра тинә?› Ле әз ԛәлпийе накьм, у ләма әз гәләк рʹьһʹәт ьм. Чь жи һәбә, мьн сафи кьрийә кӧ тʹьме рʹаст бьминьм у ԛәлпийе нәкьм. Мәзьне хәбата мьн заньн, кӧ әз тʹӧ щар ԝана нахапиньм у нә жи әзе бона ԝана кәсәки бьхапиньм» (Том, Дәԝләтед Йәкбуйи).

• Ԛәдьрехԝәгьртьн

  «Һәвалхәбаткʹаре мьн, әз һелан кьрьм кӧ әз бьхапиньм йанчь һьнә тьшт сәр хәбате ӧнда бун, ле мьн инкʹар кьр кӧ бьхапиньм. Чахе әԝед кӧ дьзин әʹйан бун, мәзьне хәбата мьн жь мьн рʹази бу кӧ әз нәԛәлп ьм. Сәва кӧ бьбьн мәрьве нәԛәлп дь ве дьнйа ԛәлпда, лазьм ә мерхаси, ле ахьрийеда әм итʹбарийе у ԛәдьр ԛазанщ дькьн чахе нәԛәлп ьн» (Каоре, Жапонйа).

Исафа тʹәмьз, әʹдьлайи һʹьшда, у ԛәдьрехԝәгьртьн, әԝ һʹәму тьшт дьдьнә кʹьфше кӧ һежа йә мәрьв нәԛәлп у рʹаст бә. Һун жи ԛайил ьн ве йәкеда?