Тʹема пешийа ԝеда, мә дәрһәԛа нишанәке шеԝьр кьр, йа кӧ Иса гот. Әв нишан избат дькә, кӧ Пʹадшатийа Хԝәде ль әʹзмана ида һатийә кʹьфшкьрьне у Пʹадше ԝе Иса Мәсиһ ә.

Кʹьтеба Пироз дьбежә, кӧ чахе Иса бу Пʹадша, пешийе әԝи Мире-щьна у щьнед ԝи жь әʹзмед авитә сәр әʹрде. Ньһа һʹӧкӧме ԝан тʹәне сәр әʹрде һәйә, у әв мәʹнийа сәрәкә йә, кӧ чьма һʹале дьнйайе жь сала 1914 ӧса хьраб буйә (Әʹйанти 12:7, 9).

Рʹаст ә һʹале дьнйайе пʹьрʹ хьраб буйә, ле Иса ча Пʹадше Пʹадшатийа Хԝәде ида гәләк тьшт кьрийә кӧ али инсанәте бькә. Бь сайа шьхӧле һинкьрьна Кʹьтеба Пирозә һʹәмдьнйайе йа кӧ Иса тʹәми дабу бькьн, гәләк мәрьв принсипед Кʹьтеба Пироз педьһʹәсьн у жийина хԝәйә һәррʹожида дьдьнә хәбате (Ишайа 2:2-4). Бь милйона мәрьв пеһʹәсийан кӧ жийина ԝанда чь йә лапә фәрз, малбәтед ԝан дьһа бәхтәԝар бунә, әԝана рʹази нә бь тьштед кӧ щәм ԝана һәнә у набьнә диле материализме. Әԝ мәрьв жь ԝан һәр тьшта ида ньһа кʹаре дьстиньн у дьбьнә мәрьвнә ӧса, кʹижана кӧ Хԝәде дьхԝазә бьн сәрԝертийа Пʹадшатийа хԝәда бьвинә.

Иса ида ль әʹзмана сәрԝертийе дькә, ле сәр әʹрде һәла һе мәрьв сәрԝертийе дькьн. Хԝәде тʹәми да Иса: «Нав дьжмьнед хԝәда сәрԝәрийе бажо!» (Зәбур 110:2). Зутьрәке Иса ԝе бь тʹәмами һʹәму мәрьвед мьԛабьл кʹӧта кә, ле кʹи кӧ һазьр ә гӧрʹа Хԝәде бькә, әԝе рʹьһʹәтийа дьл бьдә ԝан.

Зутьрәке Пʹадшатийа Хԝәде ԝе

• Һʹәбандьна ԛәлп кʹӧта кә. Религийед кӧ дәрһәԛа Хԝәде дәрәԝийе һин дькьн у жийина мәрийа чәтьн дькьн, зутьрәке ԝе бәтавәбьн. Кʹьтеба Пироз религийа ԛәлп бәрамбәри жьна ԛав дькә. Чахе әԝ бе кʹӧтакьрьне, гәләк мәрьв ԝе зәндәгьрти бьминьн (Әʹйанти 17:15, 16).

• Сәрԝертийа мәрийа бьдә һьлдане. Пʹадшатийа Хԝәде ԝе сәрԝертийа мәрьва к′ӧта кә (Әʹйанти 19:15, 17, 18).

• Мәрьвед зӧлм кʹӧта кә. Ле әм чь дькарьн бежьн дәрһәԛа ԝан мәрьва, йед кӧ хԝә ль хьрабийе гьртьнә у нахԝазьн гӧрʹа Хԝәде бькьн? Мәрьвед зӧлм ԝе кʹокева бенә ԛьрʹкьрьне (Мәтʹәлок 2:22).

• Мире-щьна у щьнед ԝи бьдә һьлдане. Мире-щьна у щьнед ԝи ида ԝе нькарьбьн мьләта бьхальфиньн (Әʹйанти 20:3, 10).

Әв йәк ԝе чь кʹаре бинә бона бьнәлийед Пʹадшатийа Хԝәде?

Иса нә мина сәрԝеред ве дьнйайе йә. Әԝ ча Пʹадше Пʹадшатийа Хԝәде, ԝе һе зедә тьшт бона инсанәте бькә. Тʹәви ԝи ԝе 144 000 мәрьвед бьжарти, ль әʹзмед сәрԝертийе бькьн (Әʹйанти 5:9, 10; 14:1, 3). Әԝ ԝе әʹсәйи ԛьрара Хԝәде дәрһәԛа инсанәте, бинә сери. Пʹадшатийа Хԝәде ԝе гәләк тьштед дьн жи бькә бона һʹалхԝәшийа инсанәте.

• Нәхԝәшийа у мьрьне бьдә һьлдане. «Йе кӧ ль ԝьр рʹудьне, ԝе нәбежә: ‹Әз нәхԝәш ьм›» у «иди мьрьне тʹӧнәбә» (Ишайа 33:24; Әʹйанти 21:4).

• Ԝе әʹдьлайа рʹаст у бехофийе бинә. «Ԝе сәламәта лаԝед тә зәʹф бә», у «ԝе һәр кәс дь бьн меԝа хԝәда у дь бьн даре хԝәйи һежиреда рʹунед у йе кӧ ԝан бьтьрсинә тʹӧнә бә» (Ишайа 54:13; Миха 4:4).

• Ԝе хәбата һʹәԝас бьдә. «Йед кӧ бьжартьмә, ԝе кʹаред дәстед хԝә кәвьн бькьн. У ль щийе вала кʹәда хԝә нәдьн» (Ишайа 65:22, 23).

• Ԝе проблемед еколожийайе сафи кә. «Ԝе чол у щийе шорәх кʹефхԝәш бьбьн у бәйар кʹефхԝәш бьбә у мина нергьзе ԝе чʹичʹәг бьбә» (Ишайа 35:1).

• Ԝе мәрийа һин кә чь бькьн, кӧ һʹәта-һʹәтайе бьжин. «Әв ә жийина һ′әта-һ′әтайе, ԝәки әԝ тә нас кьн, чаԝа Хԝәдейе р′асти бешьрики-беһәвал у ӧса жи Иса Мәсиһе кӧ тә шандийә» (Йуһʹәнна 17:3).

Хԝәде дьхԝазә, ԝәки тӧ бьби хԝәйе ԝан һʹәму кʹәрәма (Ишайа 48:18). Готара дьн ԝе шьровәкә, кӧ әм чь ньһа гәрәке бькьн, ԝәки ахьрийа пʹьрʹ баш ԝар бьн.