«Әԝе кӧ дьзийе дькә, бьра иди нәдьзә, ле бь худана хԝәйә һʹәлал бь дәстед хԝә бьхәбьтә, кӧ бькарьбә дәст бавежә кʹәтийа  жи» (ӘФӘСИ 4:28).

Әʹфьрандаре мә дьхԝазә кӧ әм жь хәбате ләзәте бьстиньн. Чьрʹа? Мәрьве хәбатһʹьз бәхтәԝар ә, чьмки әԝ дькарә әʹбура хԝә у малбәта хԝә бькә. Әԝ һәла һе дькарә али йед дәсттәнг жи бькә. Мәзьне хәбате ԝи ԛимәт дькә. Бәле, бь рʹасти мәрьве хәбатһʹьз хәбата хԝә ӧнда накә. Кʹьтеба Пироз дьбежә кӧ хәлата хәбата гьран, пʹешкʹеша жь Хԝәде йә (Ԝаиз 3:13).

«Әм әʹсәйи заньн кӧ исафа мә рʹьһʹәт ә у дьхԝазьн кӧ һәр тьшти рʹаст бькьн» (ИБРАНИ 13:18).

Һәгәр әм һʹәлал бьн, әме ԛәдьре хԝә бьзаньбьн, дьле мә ԝе рʹьһʹәт бә у хәԝа мә жи ширьн бә. Хенщи ве йәке, мәрьвед дьн жи ԝе итʹбарийа хԝә мә биньн у ԛәдьре мә бьгьрьн. Мәрьвед ԛәлп ван мәщала ӧнда дькьн. Ӧса жи исафа ԝан дькарә ԝана бьчәрчьринә у әԝана дьтьрсьн кӧ рʹожәке ԛәлпийа ԝан ԝе әшкәрә бә.

«Пʹәрәһʹьзи бьра нава жийина ԝәда щи нәгьрә у дәстед ԝәда чьԛас һәйә, рʹази бьн» (ИБРАНИ 13:5).

Мәрʹа пʹәрә бона хԝарьн у һʹәԝщед мәйә дьн лазьм ьн. Ле йәкә «пʹәрәһʹьзи» тьштәки гәләк хоф ә. Әԝ дькарә мәрьв һелан кә, ԝәки һʹәчʹи зәʹф ԝәʹдә у ԛәԝата хԝә сәр ԛазанщкьрьна гәләк пʹәра хәрщ кә. Гава мәрьв пәй пʹәра дькʹәвә, әԝ дькарә һәләԛәтийа хԝә тʹәви нәфәред хԝә хьраб кә, у һәла һе зийане жи бьдә сьһʹәт-ԛәԝата хԝә (1 Тимотʹейо 6:9, 10). Ле йа һәри хьраб әԝ ә, кӧ мәрьве пʹәрәһʹьз дькарә һеса ԛәлпийе жи бькә. Мәрьвәки билан ӧса гот: «Әԝ мәрьв амьн ә, хԝәйе хер у бәрәкʹәт ә, ле йе дьләзинә дәԝләти бә, бе бәла наминә» (Мәтʹәлок 28:20).

«Биланийе у фәʹмкʹарийе хԝәй кә» (МӘТʹӘЛОК 3:21, ДТʹ).

Һәрге әм хԝәндьна баш бьстиньн, әв йәк ԝе али мә бькә мәрьвнә щабдар у де-баве баш бьн. Ле стандьна хԝәндьна баш мәкʹтәбеда йан жи университетеда, бехофи у бәхтәԝарийе найньн. Һәгәр әм дьхԝазьн жийина хԝәда һʹәму алийава пешдачуйи бьн, әм гәрәке хԝәндьне щәм Хԝәде бьстиньн, демәк алийе ԝида бенә һинкьрьне. Кʹьтеба Пироз дәрһәԛа мәрьве кӧ гӧһ дьдә Хԝәде дьбежә: «Чь жи дьхԝазә мийасәр дьбә» (Зәбур 1:1-3).