ПРИНСИПА КʹЬТЕБА ПИРОЗ: «Мәрьве хԝәйисәбьр жь мерхас четьр ә» (Мәтʹәлок 16:32).

ӘВ ЧЬ ТЕ ҺʹӘСАБЕ: Әм кʹаре дьстиньн, гава ԛәԝате дьдьнә хәбате, кӧ емосийед хԝә контрол кьн. Щарна тьштед ӧса дьԛәԝьмьн, кӧ һәр кәс дькарә һерс кʹәвә. Ле һәрге ве дәме хԝә контрол нәкьн, әме зьраре кʹәвьн. Леколинкʹаред иройин әʹйан кьрьнә, ԝәки чахе мәрьв һерс дькʹәвә, гәләк щар тьштед ӧса дьбежә йан жи дькә, сәва чь жи паше пʹошман дьбә.

ТӦ ЧЬ ДЬКАРИ БЬКИ: Һʹәта кӧ һерсе ль сәр тә контрол нәкьрийә, тӧ сәр ԝе контрол кә. Һьнә мәрьв дьфькьрьн ԝәки мәрьве һерс зор ә, ле бь рʹасти һерсбун нишана сьстбуне йә. Кʹьтеба Пироз дьбежә: «Мәрьве кӧ нәфса хԝә нькарә, әԝ мина бажарәки хьрабәйи бесур ә» (Мәтʹәлок 25:28). Аликʹарийа мәзьн әв ә, ԝәки пешийа кӧ һерс кʹәвьн у тьштәки бежьн йан бькьн, ԝе баш бә фәʹм бькьн кӧ бь рʹасти чьрʹа әв йәк ԛәԝьми. «Фәʹме ԛәнщ мерьв жь һерсе пашда дехә у рʹуспитийа ԝи ԛӧсур-нәньһерʹандьн ә» (Мәтʹәлок 19:11). Әм бь аԛьлайи дькьн, гава гӧһ дьдьнә дӧ алийа у дьхәбьтьн кӧ ԝана фәʹм бькьн. Метода ӧса дькарә дәрәще зәлал кә у ԝе мәрʹа һеса бә хԝә контрол кьн.

ПРИНСИПА КʹЬТЕБА ПИРОЗ: «Шекьрдар бьн» (Колоси 3:15).

ӘВ ЧЬ ТЕ ҺʹӘСАБЕ: Бь рʹасти бежьн, тʹәне мәрьве спасдар дькарә бәхтәԝар бә. Ве йәкерʹа әԝ мәрьв жи ԛайил ьн, йед кӧ жь бо ԛәзийе мәрьвед хԝәйи незик йан тьштәки ԛимәт ӧнда кьрьнә. Әԝана дьбежьн, ԝәки гава дина хԝә дьдьнә ве йәке чь кӧ  щәм ԝана ньһа һәйә, у нафькьрьн дәрһәԛа тьштед ӧндакьри, әв али ԝан дькә шекьрдар бьн.

ТӦ ЧЬ ДЬКАРИ БЬКИ: Һәр рʹож бьфькьрә йан жи хԝәрʹа бьньвисә ԝан һʹәму тьшта, сәва кʹижана кӧ тӧ шекьрдар и. Әʹсәйи нинә, ԝәки әв тьшт мәзьн бьн. Бьфькьрә сәр тьштед бьчʹук жи, мәсәлә чаԝа рʹо дьчә ава, хәбәрдана тʹәви мәрьве һʹьзкьри, чь кӧ ләзәте дьдә тә, йан жи ша бә кӧ мәщаләк тәрʹа һатийә дайине диса рʹожәке бьжийи у рʹонайе бьвини. Һәрге тӧ сәр ԝан тьштед позитив бьфькьри у рʹази би, те бәхтәԝар би.

Тӧйе ԝи чахи жи кʹаре бьстини, гава бьфькьри, ԝәки чьма тӧ сәва малбәт у һәвалед хԝә рʹази йи. Чахе тӧ зани, ԝәки сәва чь мәрьвед дьн ԛимәт дьки, әве йәке ԝанарʹа бежә. Тӧ дькари һәма рʹастә-рʹаст ԝанарʹа бежи, йан жи бь нәʹма у әʹнәма. Бь сайа ве йәке тӧйе һәләԛәтийа хԝә тʹәви ԝан мәрьва дьһа баш ки, у бәхтәԝар би, чьмки бәхтәԝари жь дайине те (Кʹаред Шандийа 20:35).

ЖЬ ШӘРʹ БЬРʹӘВӘ.

«Дәстпебуна шерʹ мина авбәрʹдане йә, һе шәрʹ кӧ гьран нәбуйә же дур кʹәвә» (МӘТʹӘЛОК 17:14).

ДӘРҺӘԚА АХЬРИЙЕ БӘРХԜӘ НӘКʹӘВӘ.

«Иди бона р′ожа сьбе хәма нәкьн, чьмки р′ожа сьбе ԝе бона хԝә хәма бькә. Хәмед р′оже бәси ԝе нә» (МӘТТА 6:34).

КʹУР БЬФЬКЬРӘ У ДӘРБЕРА НӘКʹӘВӘ БЬН ҺʹӦКӦМЕ ЕМОСИЙЕД ХԜӘ.

«Һьнге фьрасәте тә хԝәй кә у аԛьле мьԛатийе ль тә бькә» (МӘТʹӘЛОК 2:11).